رواية يا خاطفي وين ألقى عزتي في زمان المذلة ! / كاملة

***مزون شمر*** · 16-04-2012, 08:17 PM

رد: رواية يا خاطفي وين ألقى عزتي في زمان المذلة ! / كاملة

البارت التاسع والاربعون

ابيك تحس بغيابي
..... عشان تشوف بعيونك
تعرف اني دوا لجرحك
.... وعلى همك انا عونك
تشوف المر في كاسي
.. ياقاسي ..
لاجل عينك تجرعته
ترا من طيب انا ساسي تحملتك
................... تحملتك

رمت جوالها وملايين الأفكار أزدحمت ببالها ...تجمد كل مافيها عدا نبضات قلبها التي ازداد خفقانها ذرفت دمعتها بصمت مؤلم واتبعها سيل من الدموع الحارقه التي تجاوبت معها جميع خلاياها وأنغمست بدوامتها الباكيه ...مر عليها الوقت بدون ماتحس فيه وهي تعبر عن حزنها بالبكاء
صحى من النوم وانتبه لعدم وجودها بمكانها ..وقف وطلع لبرى الغرفه شافها جالسه ومخبيه ومنزله راسها ومغطيته بكفوفها وصوت شهقاتها واصله له بسبب قصر المسافه بينهم
يوسف قرب منها وبنبرة خوف ممزوجه بلهفه:شهد
رفعت راسها بسرعه والدموع متناثره على خدودها المحمره من شدة البكاء تعلقت عيونها بيوسف وكأنه حبل النجاه ..بصوت مبحوح:يوسف لاتخليني
جلس جنبها ولف يديه على كتفها وقربها منه: بسم الله عليك ..من الصباح تبكين ؟
حطت راسها بحضنه وتمسكت فيه بقوه:شووق ..شوق بتموت
ارتعب من كلمتها وأنتفض كأن كهرباء سرت بجسمه:خير ويش فيها شوق
شهد : ولدت
يوسف بعدها عن حضنه وابتسم لها:ماشاء الله ولدت ..المفروض تفرحين وتباركين لها مو تسوين مناحه
شهد شهقت: أنت ماتعرف شي .."وقفت "قوم وديني بيت أهلي بروح عند أخواتي
يوسف يطالع الساعه:الحين ؟!
شهد تبكي:رغد كلمتني كلهم منهارات قوم يالله
يوسف ماهو فاهم شي وقف :طيب بوديك بس فهميني السالفه
شهد تسحبه من يده: اقولك بالطريق
دخلت الغرفه وجهزت شنطة مشاري ولبست بسرعه ومشوا لبيت أبو مها
:::
:::
بالرياض
من أول ماسمعت كلام أبوها ورياض دخلت غرفتها وأنعزلت عن الكل ساعات تبكي وساعات تدعي وساعات تحاول ان تهرب من هذا الواقع للاحلام
دخلت عليها ليان:ندو حياتي مايصير اللي تسوينه قومي توضي وصلي وادعي لها
ندى تطالع ببنت ليان:ماني متخيله اللي صار ..قلبي يتقطع على فهد ماشاف يوم حلو بحياته كل ايام شقاء وتعب
ليان تواسيها: هذا المكتوب له وان شاء الله ربي يقوم شوق بالسلامه ونرتاح كلنا
ندى:ان شاء الله "بعد صمت طويل"يالله ياليان لو عاش راكان يتيم فهد بيتعذب طول عمره
ليان بحده: استغفر الله ..لاتتفاولين على خالي حرام عليك
ندى: اللي فهمت من كلام ابوي ان حالتها صعبه لانها من زمان مريضه ومحد يدري
ليان ضيقت عيونها بحزن:من جد صبوره هالأدميه
ندى نزلت دموعها:صورتها وهي طايحه على الأرض ماتفارق خيالي
ليان وقفت: قومي نروح عند جدتي وامي كل وحده ساكته ومتضايقه خلينا نحاول نغير الجو
ندى:مانقدر والله مانقدر
ليان طلعت جوالها:أجل اتصل على فيصل يجي ياخذني احسن
ندى بصوت ساخر:ايه روحي لزوجك المنبطح لا شغله ولا مشغله معتمد على فلوس أبوك
ليان تضايق:ندى لاتقلبين علي المواجع كافي اللي فيني
ندى لفت على يمينها:انتي اللي جبتي لنفسك العنا
ليان أخذت منها وطلعت من غرفة ندى

في بيت ابو مها
فتحت الباب لشهد اللي حضنتها بقوه وأشتركوا البكاء بينهم
ريم بتعب:خلاص ياشهد انتي ورغد كافي اللي فينا
شهد نزلت طرحتها وحطت ولدها بحضن سمر:هذي شوق مو أي أحد
دخل أبو مها وبنبرة أستعجال: بسرعه جهزوا لي شنطة ملابس يالله
رغد: بتسافر يبه ؟
ابو مها: أيه رحلتي بعد ساعتين يادوب ألحق يالله حطوا لي اللي يكفيني أسبوع
هنادي شهقت: وبتخلينا هنا لحالنا ..تكفى يبه خذنا معك نبي نشوف شوق
سمر رجعت تبكي:ايه يبه تكفى خذنا ابي اتطمن على شوق
ابو مها: أذا تعافت برجع أوديكم تشوفونها بس بالأول انا اروح ..أنتم مابي منكم ألا أنكم تدعون ربي يقومها لنا ولولدها بالسلامه
شهد: يبه اتصل علينا طمنا اول ماتوصل
ابو مها ابتسم: ان شاء الله ..يبه رغد جهزي الشنطة
رغد تمسح دموعها: طيب ربع ساعه وتكون جاهزه
لفوا على هنادي اللي ارتفعت نغمة جوالها بصوت عالي ..قامت من عندهم ودخلت الغرفه وقفلت على نفسها
هنادي: هلا باسل
باسل: بشريني كيف صرتي الحين
هنادي: ماني بخير وشوق تعبانه وما ادري عنها
باسل: تسافرين معي للرياض
هنادي انصدمت: أيش قلت ...انجنيت أنت ؟
باسل: لا ما انجنيت ..تراني اكلمك بجديه بتسافرين معي ؟
هنادي ردت عليه بحده: أكيد لا ..ابوي ماراح يرضى ..بعدين ويش بقول لأخواتي
باسل بخبث: عندي حل يرضي جميع الأطراف وأكيد ابوك بيوافق ..منها نرتاح ونكون مع بعض بصورة رسميه قدام الكل ومنها تروحين معي تتطمنين على اختك
هنادي عصبت منه وأنفجرت باكيه من كثرت الظغوط اللي عليها:طول عمرك حقير وسافل انا وين وانت تفكيرك وين ...بجد أنك عديم احساس
باسل بصوت حاد: أنا ماقلت هذا الكلام الا عشانك ..ابي راحتك بأي ثمن ..بس انتي مستحيل تفهمين علي "سكر الجوال بوجهها وهو بقمة عصبيته منها "
رمت نفسها على سريرها خبت وجهها بوسادتها وعيناها تذرف الدموع الحارق ..حياتها اصبحت لا تطاق وقدرتها على الصبر بدأت تتلاشي ببطئ قاتل .. كل شي حولها يدعوها على الأختناق أبسط احلامها ذهبت أدراج الرياح ..اصبحت كالهشيم تذروه الرياح بأي صوب وأتجاه ..الجميع يتلاعب بها ..حتى الانسان الذي أراد الأرتباط بها يصعب عليها التعايش معه كون أنه مجبرها على أختيارات كانت ترفضتها وتمقتها
أستفاقت من دوامة افكارها المتألمه على صوت سحر.. دقت الباب مره ومرتين لكن استغربت عدم وجود أي رد منها
سحر: هنادي ..افتحي الباب
هنادي تغطي نفسها وكأنها تهرب من واقعها: خليني لحالي
سحر:لا ماراح اخليك افتحي الباب وتعالي عندنا
هنادي صرخت بقوه: قلت خليني بحالي مابي أشوف احد فيكم ..مابي
استغربت ردة فعلها العنيفه رجعت للصاله ولقت خواتها كلهم مجتمعين والصمت هو اللغه السائدة بينهم
شهد كانت ترضع مشاري وبالها بعيد عن حاضرها اللي تتنفس جزيئات اوكسجيناته
ريم وقفت:بروح اسوي لكم أكل
شهد بصوت مبحوح: انا مالي نفس
سمر: ولا انا
رغد اخذت نفس طويل: وانا بعد
سحر احتد صوتها: مايصير اللي تسوونه هذا اعتراض على حكم الله ..لو شوق كانت موجود هزئتكم على اللي تسوونه
سمر:سحر ترى ماني ناقصتك اللي فينا كافينا
سحر:بروح اكلم جلالي يجيب لنا اكل وبتأكلون غصب عنكم ..ابوي وسافر وشوق تحت رحمة الله هو أرئف وأحن عليها منا كلنا
شهد أقتنعت بكلام سحر: خلاص روحي كلمي جلالي
رغد وقفت: بروح ارتاح راسي بينفجر من الصداع "قبل تتحرك خطوة " وين المسكن بأخذ حبه وانام
شهد بأعتراض: مايصير تأخذينه وانتي ما أكلتي شي
رغد: لا يصير ..راحت للغرفه بدون ماتسمع كلام شهد
ريم بتأفف: بنتعب مع رغد وهنادي ..هم من أول نفسيتهم تعبانه والحين زادت الطين بله
سمر حطت راسها على كتف شهد حتى تحس ببعض الأمان اللي فاقدته: ماني متخيله حياتي بدون شوق
شهد ضمتها: لاتقولين هالكلام ..انتي بكل صلاة أدعي لها
سمر غمضت عيونها :عماتي لسى ماعرفوا بالخبر ..وانا ماني قادره أتصل عليهم واقولهم عن اللي صار
سحر:العصر بكلم عمتي ام هديل وأقولها

***مزون شمر*** · 16-04-2012, 08:19 PM

رد: رواية يا خاطفي وين ألقى عزتي في زمان المذلة ! / كاملة

بعد صلاة المغرب
وقف عند الحضانه المتواجد فيها فلذة كبده الذي يقطن زجاجه تكاد تكبره ببعض السانتيمترات ...عيناه يصعب عليها ان تفارق تفاصيله الصغيره التي لم يتضح منها شي ..أحمرار بشرته ,صغر أنفه وأعضائه تشعره بأحساس غريب لأول مره يجتاحه ..مرر يده على الزجاجه الدافئه ببطئ ...ردد بينه وبين نفسه
( اللهم أحفظه لي من كل سوء وبلغني به وأجعله بار لي وبوالدته )
كان يفتقد هذا الشعور من سنوات وسنوات وأيقن بأن الأبناء هم زينه الحياه الدنيا ...قطعه من قلب متمثله أمامه قد يكتب لها الحياه أو تذهب الى خالقها بسلام ...دعى ربه ألاف المرات ان يتم عليه نعمته ولايحرمه منها ...كان أبوه واقف وراه يتأمل من بعيد له قرابة النصف ساعه لم يتحرك خطوة من مكانه
ابو رياض:خلص وقت الزياره خلنا نروح البيت
فهد يطالع ساعته مر الوقت بسرعه بدون مايحس:انا بروح أكلم الدكتور اتطمن على شوق
ابو رياض: ياولدي هلكت الدكتور بأسئلتك ..زوجتك تحت رحمة رب العالمين ..خلنا نرجع تأكل لك شي يسند من البارح مادخل بطنك شي
فهد :ومن له نفس يأكل
ابو رياض بقلة حيله:لاحول ولاقوة الله الا بالله ..الله يصبرك ياولدي ويكتب اللي فيه الخير
فهد:راح رياض وهزاع يستقبلون ابو مها
ابوه: ايه وهم رايحين للبيت معه ..خلنا نسبقهم
فهد تنهد :طيب يالله مشينا
بعد ما ركبوا السياره اتصل عليه باسل
فهد: هلا باسل
باسل: كيفك اليوم
فهد: ماشي حالي
باسل: وزوجتك ..كيف حالها ؟
فهد بصوت حزين :على حالها ماتغير شي
باسل:ان شاء الله الفجر اكون عندك بالرياض
فهد: لاتتعب نفسك خلك بشغلك اذا احتجتك كلمتك
باسل بأصرار:لا تحاول انت محتاجني أكثر من أول بجي يعني بجي أن شاء الله
فهد ابتسم على كلام شقيقه: طيب استناك الفجر
باسل: يالله اشوفك على خير ..مع السلامه
فهد:مع السلامه
لف عليه ابوه:اليوم تنام عندنا مافي روحه لمزرعتك
فهد بأعتراض:لا يبه أنا ما أرتاح الا ببيتي وبأخذ معي عمي ابو مها وباسل بيجي
ابو رياض: البيت يكفيكم كلكم وقسم الضيوف كله تحت أمركم
فهد أبتسم: ماتقصر يبه ..بس خلني على راحتي صعب أجبر عمي على بيت ماهو بيتي
ابو رياض بأستسلام: اللي تشوف

صباح اليوم التالي
صحت على صوت جوالها المزعج ...كل أعضاء جسمها توجعها من طريقة نومها المتمايله فتحت عيونها ببطئ وتفاجئت وجودها بغرفة مها وشوق بعد ليلة طويله صداها لم يغادر احساسها المتألم
هنادي( ويش جابني هنا ..وكيف نمت بدون ما أحس بنفسي) تذكرت جوالها اللي مازال يدق ..ردت بتكاسل :الووو
روان بخوف: هنادي ..وينك كسرت جوالك ماتردي علي ؟
هنادي بتعب:سوري رونا ما حسيت بالجوال كنت نايمه
روان ما أرتاحت لنبرة صوتها المبحوحه:حبيبتي ايش فيه صوتك؟
مرت ذكريات الليله الماضيه بسرعة البرق امام ناظرها ..منظر اخواتها وهم يبكون ..خوف ابوها اللي يخفيه بستار الصبر : أختي تعبانه
روان : خير ايش فيها؟ ..
هنادي بدت تبكي بصوت حاد: مريضه بتموت وهي بعيده عنا
روان: اكيد تكذبي علي
هنادي بدت تحكي لها اللي صار مع شوق وبين كل كلمه وكلمه تحارب شهقاتها المتسلسه

بغرفة ثانيه من البيت
حضنت مشاري لحضنها اكثر وهي ترضعه بحنيه وعينها على رغد اللي نايمه بهدوء
شهد( ياربي ايش اللي بيصير بولد شوق ...اكيد ماراح يهتموا فيه بالحضانه زي أهتمام امه فيه "تذكرت هدوء شوق وتهربها من موضوع الحمل"الحين فهمت كل شي هذا السبب اللي يخليها تغيير الموضوع لما نفتحه معها ..الله يهديك ياشوق ويقومك لنا بألف سلامه )
ابتسمت لميشو اللي يلعب بشعرها ويطلع اصوات عاليه: اووش لانزعج خالتو
رغد بصوت ناعس: أزعجتوني وصحيت
شهد ابتسمت لها:صباح الخير
رغد جلست وهي تمسح وجهها الناعس: اليوم ماراح أداوم مالي خلق
شهد:لا يارغد روحي لاتخلي اللي صار يأثر على دراستك
رغد ردت بدون نفس:والله مافيني أروح ماني قادره أفكر واعرف نفسي مستحيل استوعب شي ..بزياده ان دكتور وليد ماراح يتركني بحالي
شهد بتضجر:هذا لسى وراك مايمل
رغد: هو ماهو وراي بس يقهرني يحب يستفزني بأي شي
شهد رفعت حاجبه:يستفزك وألا يعجبك وماتبين تبيني شي
رغد اقترنت حواجبها بطريقه عصبيه:خيييير ..أيش قلتي ؟!..بجد أنتي وحده رايقه وفايقه أنا وين وهالكلام وين ..اساسا بعد عبدالله ب.."أنقطع كلامها وتعلقت عيونها بشهد اللي اعطتها نظره حاده"
شهد تعدل بجامتها بعد ماخلصت من رضاعة مشاري:لسى تفكرين فيه؟..يعني مانسيته
رغد عصبت: نسيته ونسيت كل شي كان بيننا اصلا مايستاهل افكر فيه هو اللي تركني بسهوله ومصيره بيندم هذا أذا ماشبع ندم للحين ..اذا جات علي لاهمني هو ولا عشرة من اشكاله قلبي ماعاد يطيق سيرته
شهد خافت من ردة فعلها العصبيه:طيب روقي انا ماقلت شي
رغد ردت بحده: الا قلتي وفاهمه قصدك زين ..يعني انا معجبه بذاك الدكتور الحقير صح؟
سكتت شهد ماقدرت ترد عليها
رغد:اكيد هذا اللي جاء ببالك ..بس افهمي اني ما اهتميت فيه مثله مثل غيره العيال كلهم واحد
شهد وقفت بتتهرب من رغد اللي عصبت وتغيرت ملامحها : بروح أجهز فطور تبين اسويلك شي معين
رغد صرخت عليها: لا
طلعت من عندها بسرعه ...توضت وصلت واتجهت الى المطبخ تجهز فطور لخواتها قبل يروحون لدواماتهم

***مزون شمر*** · 16-04-2012, 08:24 PM

رد: رواية يا خاطفي وين ألقى عزتي في زمان المذلة ! / كاملة

كيفك انت !
صاحي مثلي ولا نمت !
الوله سهر جفوني
وجيت اشكي لك عليك !
ماقدرت اغفى بدونك
وجيت بسهر ، ماقدرت
قلي انت ، كيف وضعك ؟
سهرت اطيافي بجفونك !
هو صحيح انك بدوني
طاوعك قلبك ونمت..؟!

أرهقه التفكير والهم ..طول الليل سهران لحاله يتأمل مكانها الخالي وبحلقه ألف غصه ..بعد ما صلى الفجر دعى ربه ونزل لغرفة الأكل يقرأ الجرايد وينتظر أبو مها يصحى ..بعد مرور ساعه دخل باسل اللي توه وصل
باسل: صباح الخير يابو راكان
لف للخلف وأبتسم:صباح النور
باسل قرب منه وسلم عليه وباس راسه: الف مبروك يتربى بعزكم
فهد من كل قلبه:أمين
باسل سحب كرسي وجلس:وعقبال ماتقوم أمه بالسلامه
فهد: الله يسمع منك
باسل: بشرني كيفك اليوم
فهد : زي ماتشوف ماشي الحال
باسل حز بخاطرة حزن فهد:ماعرفناك ضعيف كذا يابو راكان
فهد: الصخر وهو صخر تجيه لحظة ضعف فما بالك بأنسان مثلي
باسل :أصبري ياخوي أزمه وتعدي بأذن الله
فهد يطالع الساعه: تأخروا بالفطور لازم أحلق المستشفى بدري
باسل حط يده على كتف فهد: وأنا بروح معاك
فهد بأعتراض:لا أنت افطر وروح نام توك جاي من سفر وتعبان
باسل جلس بطريقه تضحك وكتف يديه:الحين سفر بالطياره تسميه سفر ..ياعم روح
فهد ضحك: أجل بكيفك أنا أطول بالمستشفى
باسل عقد حواجبه: وشغلك ؟..ويش بيصير فيه ؟
فهد ابتسم:دامك جيت يالله ورني شطارتك
باسل :يومين مو أكثر أوك
دخل ابو مها: أصبحنا واصبح الملك لله ... صباح الخير
فهد: صباح النور ..حياك عمي تفضل
وقف باسل وقرب من أبو مها بهدوء وثقه كانت قناع أرتداه للحظات حتى يخفي أرتباكه وخوفه منه
باسل: صبحك الله بالخير عمي
ابو مها بصوت متهدج: صباح النور
سلم عليه وقبل راسه ويده: تقبل الله
ابو مها : منا ومنك صالح الأعمال "جلس على كرسي ووجه كلامه لفهد" متى بنروح المستشفى
فهد: بس نفطر بعدها نتوكل على الله
ابو مها:إن شاء الله .. أيه ياولدي نسيت أبارك لك بولدك أمس ماني داري ويش اسوي ...الله يبلغكم فيه
فهد ابتسم: تعيش وتربيه ياعمي
أبو مها نزل راسه: امين

بالمدينه
أجتمعوا على سفرة فطورهم ...ست بنات كل وحده تبحر بعالم بعيد عن تفكير وعالم الأخرى
كانت تتأملهم الكل شارد ..والأكل ما نقص منه شي
ريم بتضجر: ويش فيكم ما تفطرون
هنادي وقفت : بالعافيه عليكم
ريم شهقت: بعدك ما أكلتي شي .تكفين هنادي لا تطفشيني اجلسي افطري
هنادي اللي كان وجهها متورم ومحمر:الحمدلله شبعت
سحر : يعني مايصير أروح للجامعه ألا وأنا متضايقه ..تكفين هنو اجلسي افطري
هنادي :قلت شبعت خلوني على راحتي
شهد :خلاص خلوها على راحتها اذا جاعت المطبخ موجود ..و هي ماراح تداوم اليوم
رغد: مين بيداوم
سحر :شكله بس انا
ريم: ايه اكيد بس انتي سمر من البارح تقول بتغيب
سمر : مين له نفس يداوم ..الحمدلله ان اليوم الأربعاء
رغد: يالله سحر لا تتاخرين
سمر : دقوا على ابوي أسئلوه راح لشوق وإلا لا
شهد: هبله انتي موعد الزياره لسى ما جاء .. بعدين الظهر نتصل عليه يكون عنده على الاقل خبر لو بسيط

بالغرفه
ترددت تتصل على باسل او ماتتصل ..خايفه تتصل عليه ويعصب عليها وتنهي المكالمه بعد حرب أعصاب وقيل وقال ... انهت أفكارها بأتصالها على روان
هنادي: شنو تسوين
روان: أتجهز للكليه
هنادي ترمي نفسها على مخدتها:اه
روان: سلامتك من الالالاه
هنادي: أحس اني مخنوقه وتعبانه ..كل شي في البيت يخنقني
روان: ياحياتي عليك...اليوم دوامي لين 10 ..على طول حجيك
هنادي: أوك انتظرك لاتتأخرين علي
روان: قلبي معاك ياحياتي
هنادي ابتسمت على كلامها: فديتك ..يالله اخليك تتجهزين ..باي
روان: باي

***مزون شمر*** · 16-04-2012, 08:26 PM

رد: رواية يا خاطفي وين ألقى عزتي في زمان المذلة ! / كاملة

بالرياض
دخلوا المستشفى
ابو مها: متى يطلعونها من العنايه ؟
فهد: بعد ماتصحى من تخدير العمليه ..لأنه كان تخدير كامل
ابو مها: لا حول ولاقوة ألا بالله
باسل:أجل انا بروح أشوف ركون ..بس دلني على مكان الحضانه بالاول
فهد: الدور الخامس وعليك تدور
باسل بذوق: أستئذن
فهد& أبو مها : تفضل
بعد ربع ساعه وصل باسل للحضانه وطلب انه يشوف راكان ...وقف قباله وكان بينهبل على صغر حجمه وملامح المختفيه ورى احمراره
باسل( يالله من زمان ماشفت طفل صغير ...اكثر من 15 سنه ياحليله يهبل الله يحفظه )
كان يراقب حركاته العشوائيه بأنسجام ولوقت طويل..على طول طلع جواله وصار يصوره عشرات الصور ..اختار احلى لقطه أخذها ..وادرجها برسالة وسائط وأرسلها
رجع لقسم العنايه المركزه وجلس في الأنتظار يستنى خروج ابو مها وفهد

داخل العنايه ...وبعد مرحلز التعقيم لهم ..دخلو عندها وكانت غامرتهم الفرحه بعد الخبر اللي وصلهم من الدكتور المشرف على حاله شوق بأستيقاظها قبل صلاة الفجر من التخدير ونجاح عمليتها ... فتحوا الباب الزجاجي وخطواتهم تقرب المسافه بينهم وبينها ...كانت نايمه بعمق لتهرب من الالم الذي لا يخف الا بعد المسكنات
صدم من شكلها والمنظر الذي يراه ... مصفره وشاحبه تكاد تخلو من معالم الحياه ..هي أشباه لأنثى كان يعرفها
همس بأذنها بنبره باكيه : شوووق
لم يصله أي تجاوب او رد منها ..لمس كفها البارده وزاد قبضته عليها بخفه: شوووق
فتحت عيونها ونظرات التعب تحويها ماقدرت تميزهم وصارت تهذي بأسم أمه وأبوها
ابو مها ماقدر يتحمل شكلها المبكي :ردي علي يابنتي
ضغطت على يد عمها بأقصى قوه تملكها ونزلت دمعه من عينها وبصوت متقطع: عمي
فهد بلهفه: نادتك ياعم
ابو مها بفرح:ياعيون عمك ..أمريني
شوق بهمس:أبي مويه ..عطشانه
فهد : الحين اروح أجيب لك مويه ...تكفى عمي انتبه لها بروح أنادي الدكتور وأجي
ابو مها : لاتوصيني على روحي
طلع من العنايه وشاف باسل جالس على الكراسي يلعب بعكازه
باسل: بشر كيف صارت زوجتك
فهد بفرحه: الحمدلله صحت ..صارت تتكلم بروح أكلم الدكتور
باسل ابتسم على شكل اخوه الفرحان:اوك أنا استناكم هنا

أخذت جوالها بكسل لما سمعت نغمة الرسائل المعتاده ..وفتحت الرساله عقدت حواجبها بأستنكار ..تجمدت مكانها من الصوره اللي تشوفها
هنادي بأستغراب: أيش هذا ؟..ناقصني يرسل وسائط ماهي واضحه
على طول اتصلت عليه وجاها رده ببرود:نعم
هنادي بحده: ويش اللي مرسله لي شكلك كنت نايم وانت ترسل
باسل رفع حاجبه بسخريه: ماتوقعت انك بطيئة استيعاب وحوله
هنادي شهقت: حوله ؟..مالت عليك
باسل ضحك: ماعرفتي اللي بالصوره
هنادي بنفس نبرته الساخره: لو عرفت ما اتصلت عليك ..يالله ماني فاضيه قولي ويش اللي مرسله
باسل يفكر:طيب ويش تعطيني اذا قلت لك
هنادي:يؤؤؤ لهدرجه غاليه عليك الصوره
باسل : وعليك بعد ..بس بالأول قوليلي ويش تعطيني جزاء اني فكرت فيك ومانسيتك
هنادي بتأفف: يؤؤؤؤؤ ..بحياتي ماشفت بكاش مثلك
باسل بتحطم:وانا بحياتي ماشفت وحده جافه وبارده مثلك
هنادي بدت تعصب من كلامه: بتقول والا اقفل الخط
باسل بدون نفسك:بقولك بس ترى ماسويت هالشي الا عشان ترتاحين وتطمنين على أختك
هنادي انجنت من كلامه اللي كان بالنسبه لها مجرد ألغاز × ألغاز:يوووه باسل خلاص اعطيك اللي تبي بس خلصني وربي ماصارت أشحدك تتكلم
باسل: خلاص هونت مابي منك شي .. واللي بالصوره ولد أختك شوق ..راكان
جمد كل شي فيها بعد شهقه قويه وبنبرة مصدومه: راكان ؟
باسل: لاتقولين انك ماتدرين بعد عن اسمه
هنادي شوي وتبكي: والله مادرينا
باسل ببرود: الحين دريتي مافرقت ... يالله مع السلامه
هنادي :لحظه لاتقفل
باسل بجفاف:ويش تبين ؟..عندك شي ماقلتيه
هنادي: بسئلك عن شوق ..كيف حالها الحين ..ابوي مادق علينا
باسل: الحمدلله بخير ..صحت من التخدير وتتكلم ..قبل شوي طلع فهد وقال لي
هنادي بدت تبكي وبصوت مترجي: تكفى باسل الله يخليك ..طمني عنها والله لو بيدي ما افارقها
باسل حن عليها من صوتها الباكي وترجيها له: خلاص ابشري بتصل عليك اذا أستجد أي شي
هنادي بدون ماتحس بنفسها: الله لايحرمني من طيبتك .." قفلت الخط على طول ورمت جوالها جنبها"
أما هو .. كلمتها كان لها وقع كبير على نفسه وأحساسه .. حس بقلبه يتجاوب معها وأطرافه ..زادت قبضته على عصاه وغمض عيونه بقوه محاول تجاهل أي مشاعر تراوده هذي اللحظة

{باسل}
اه منك ياهنادي ..قلبتي حياتي من أول يوم شفتك فيه ...من عرفتك والشقاء مايفارقني ..ليه ماتحسين فيني تعامليني كأني أبغض أعدائك ...مدري ويش أسوي عشان تحبيني وتعرفين اللي بقلبي وتعذريني على كل اللي سويته فيك ...اه منها هي سبب شقاء دنيتي

***مزون شمر*** · 16-04-2012, 08:27 PM

رد: رواية يا خاطفي وين ألقى عزتي في زمان المذلة ! / كاملة

عند شوق
بعد الفحوصات الحيويه لها ..بدت تستوعب وتعرف اللي حولها
شوق بتعب:فهد ..وين ولدي؟!
فهد ابتسم لها: موجود حبيبتي ..المهم الحين انتي
شوق نزلت دموعها:أبي اشوفه ..تكفون جيبوه لي
الدكتور:الحين انتي ماتقدرين تتحركين من العمليه بكره إن شاء الله تكونين احسن ونجيبه لك
شوق صارت تبكي:لا ابيه ألحين ابي اضمه لصدري ..محد حس باللي مريت فيه
ابو مها يحاول يقنعها: يابنتي الدكتور ادرى منك اسمعي كلامه وبكره زي اليوم
شوق احتد صوت بكاها: أبي ولدي ..جيبوه لي
فهد تقطع قلبه على شكلها: تكفى دكتور خلنا نجيبه لايزيد تعبها
الدكتور: مانقدر يا أستاذ فهد
شوق أنهارت:أطلع برى مابي أشوفك ..أطلع برررا
ابو مها مسك يدها:يبه اهدي ..مايصير اللي تسوينه
شوق تصرخه: طلعوه ..مابي أشوفه
طلع الدكتور بسرعه وطلب من فهد انه يهديها ويجاريها بالكلام حتى لا تنتكس حالتها ..لكن امومتها أقوى منهم كانت تبكي تبي تشوف ولدها وهم يهدونها ضلت على هذا الحال ساعه ونص ..بالاخير جات النيرس وأعطتها مهدئ ...غطت بعد بنوم عميق
ابو مها مسح على شعرها المتشعثر بكل ناحيه والمتداخل ببعضه ويرقيها ببعض الأيات القرأنيه والأدعيه ..تنقلت نظراته عليها تألم على شكل فهد اللي ماسك يدها وسرحان بملامحها الباهته والحزن والخوف تنبعث من نظراته
ابو مها: يالله ياولدي ماله داعي نبقى اكثر خلها تنام نرجع لها بالزياره الثانيه
فهد أخذ نفس عميق كل شي حوله يخنقه :خلنا نطلع

:::
:::
:::

بعد يومين
في بيت أبو مها ... الكل متضايق على شوق وعماتهم اجتمعوا عندهم
هديل بحزن: ياحياتي على شوق ..وربي ماني مصدقه اللي صار احسه حلم
ريم: هذا اللي ربي كاتبه لها
مها : كلمت ابوي قبل شوي يقول الحمدلله صارت احسن من اول
شهد : تكفون غيروا السالفه وربي اكتئبت كم يوم واحنا نبكي احس قلبي بينفجر
ام خلود: اقول ريم متى بترجعين لبيتك ؟
ريم: بالليل إن شاء الله .. سيف من الو بيجي يأخذني بس بسب اللي صار خلاني عند اخواتي
ام هديل: عسى الحمل ماهو متعبك ؟
ريم ابتسمت:لا الحمدلله
ام خلود بتحذير: انتبهي لنفسك لايصير فيك زي اللي صار بشوق لاتهملي مراجعاتك
ريم خافت: أيه أكيد
رغد تفكر: مو معفوله شوق جاها المرض فجأه ..انا متأكده وراها سالفه
مها بتردد: كانت .."سكتت ماتبي تفتح على نفسها باب من الأسئله والأستفسارات"
كلهم بصوت واحد: كملي
مها بتهرب: خلاص أنسوا الي قلته
ام هديل: والله ازعل عليك اذا ماتكلمتي
شهد بخوف: اجل رغد معها حق ..كان في سالفه واحنا ماندري
مها :هي كانت من اول مريضه وانا كشفتها بالصدفه ..ومره سافروا برى المملكه سوت عمليه بدون محد يدري ..طبعا بعد ماضغطت عليها اعترفت لي ..كنت انصحها بس هي عنيده تعرفونها ..من زمان مقررين عليها أستصال بس هي رافضه واكتفت بالادويه حتى فهد حاول معها بس ماقدر عليها
رغد شهقت: كل هذا صار واحنا ماندري
ام خلود بصدمه:لاحول ولاقوة الا بالله
مها:راحت أكثر من دكتور بالمدينه والرياض وكلهم اتفقوا على العمليه
شهد نزلت دموعها: ياحياتي عليها كانت تعاني بس ساكته ماتبي نعرف
مها تبرر لهم:تقول ماتبيك تخافون عليها خصوصا انها بعيده عنا
سمر تبكي بحده:ليييه تسوي فينا كذا ...ليييه ؟
سحر ضمت سمر لصدرها وهي تحاول تكبت دموعها وتمنعها عن الانذارف: خلاص ياروحي اهدي
هديل تمسح دموعها:الله يسامحها على اللي سوته
رغد: الحين فهمت كانت تبي تحمل ..حتى لو فيه خطر على حياتها "صرخت" مجنووونه
دخلت هنادي ورمت عبايتها على الكنبه ..سلمت على عماتها وهديل وخلود
هنادي: اطلع وارجع وانتم على نفس الحال ..بس تبكون ..خلاص كافي بكاء
شهد:ماتوقعتك عديمة احساس
هنادي تكت على الجدار وجلست بميلان: مو انتي اللي تحكمين علي ..بعدين هذا اللي ربي كاتبه علينا ماراح نغير شي ..لازم نرضى باللي صار
رغد وقفت وراحت غرفتها بدون ماتتكلم وباين عليها الأنزعاج..هنادي: هذي ويش فيها بعد؟
ريم: متضايقه ..والله يحق لها
مها وقفت: بروح أجدد القهوه
ام هديل وقفت مع مها:بجي معك ..في موضوع بكلمك فيه
هديل همست لهنادي بصوت واطي:هنادي معك ريحة دخان ..كنت مع مين؟
هنادي بأرتباك: بجد؟
هديل:والله..يالله اعترفي كنت مع مين
هنادي: مع صديقاتي ..تكفين هدوله لاتلمحين لهذا الشي والله ما افتك من خواتي انتي ادرى فيهم
هديل رفعت حاجبها وميلت فمها باتسامه هاديه:احلفي انه ماهو انتي ولك مني مايطلع هالكلام
هنادي :قسم بالله اني ما ادخن ولا حتى جربته
هديل: من حلف بالله فصدقوه ..وانا بصدقك لأنك حلفتي
هنادي ابتسمت: كثر الله خيرك " وقفت" بروح اغير ملابسي لا أحد يشك مثلك وابتلش
هديل وقفت وراحت معها للغرفه تبي تسحبها بالكلام ..لانها تعرف هنادي كثير وتفهمها على طول ..ومن تصرفاتها حكمت عليها وعرفت أن وراها مواويل ولازم تعرفها
بعد مالبست بجامه مريحه
هديل ييتفحصها: يووه صاير بطه
هنادي وقفت قبال المرايا وصارت تلف: بجد هدوله صايره بطه
هديل تضحك: مره زاد وزنك ..اعطيني السر يمكن يزيد حلاي مثلك
هنادي حمرت خدودها: وه بس بشوف نفسي بعد هذا الأطراء من جنابك
هديل: اقول لاتصدقين نفسك ..المهم اعطيني السر
هنادي: مافي سر ...تزوجي وتنتفخين مثلي
هديل فتحت عيونها: ويش قصدك ؟
هنادي ضحكت: ماقصدي شي ياغبيه ..اللي اقصده لا تتعبين نفسك جسمك كذا حلو ..لاحقه على السمنه من الحين ميته على الكرش والزوايد اللي مالها داعي
هديل بنظره خبيثه: والله فهمت شي ثاني
هنادي حطت اصباعها على راسها: صفي النيه
هديل بشك: والله أحسك وراك بلوى ..بس يالله الأيام راح تكشفها لنا
هنادي توترت من كلامها: لاحول ولاقوة الا بالله ..والله ماعندي بلوى ولاهم يحزنون
هديل ضمت هنادي فجأه:نسيت اقولك ..مبروك على الخطوبه
هنادي ضحكت:مرره بدري صراحه ..احسن لو ماباركتي
هديل تدفها بدفاشه: تجي متأخره احسن ماتجي مره وحده
هنادي:عقبالك يالدفشه
هديل من قلب: اميييين ..ويكون ولد عز زيك ومطنوخ يبرد كبدي
هنادي ماتت ضحك على طريقة كلامها المشفوحه:خساره لو كان عنده اخ غير فهد زوجتك أياه
هديل تتخصر: عاد لاتنسيني من صالح تشبياتك يعني يمكن تلاقين من نفس الطبقه تذكري بنت عمتك اللي تحبك
هنادي: ههههههههه لو تبين باسل مايغلى عليك
هديل : وع انا اخذ حقك يالله بس ..بس عاد تصدقين انتي وشوق شحطوا مرره عيال عز ودلال
هنادي تكش عليها: اعوذ بالله من عينك ..بسم الله عليهم الله يحفظهم لنا
هديل: بجد ياهنو دنيا حظوظ ..وألا انتي تاخذين بسيل اخو فهيدان
هنادي ابتسمت:ويش ناقصني حبيبتي كامله والكامل الله
هديل :صادقه بس بعد عشرات الكيلوات صايره تخققين
هنادي تلفها بأتجاه الباب: تدلين ذاك الشي ..طسي معه بسنع شعري وأحلقك
هديل تهز كتوفها وعلى وجهها تعبيسه:طول عمرك دفشه ماراح تعرفين النعومه ابد ..الله يعين زوجك بيجاهد في سبيل الله ..بيدخل الجنه بسببك
هنادي تضحك:فيني الخير والله
هديل: مالت عليك ...كدي شوشتك والحقينا
هنادي فطست ضحك:ياهووو ويش ذي الكلمه الجديده
هديل تقلب عيونها: ويش دراك انتي بالمصطلحات ..خليك بعالمك الشبابي
هنادي: من متى نزلت عليك الأنوثه ..والله ماهي لايقه عليك ابد والا ذي الكلمه اثبت لي دفاشتك
هديل مدت لسانها وسكرت الباب وراها

***مزون شمر*** · 16-04-2012, 08:35 PM

رد: رواية يا خاطفي وين ألقى عزتي في زمان المذلة ! / كاملة

بالرياض
وتحديدا بالمستشفى
بعد يومين من الأنتظار الحارق لها ..شافت أبنها الذي أنتظرته طويلا
فهد يقرب لها الزجاجه: ويش رايك فيه
شوق بحب:يهبل
ابو مها يضحك:لاتحكمون عليه من ألحين الولد سبيعي لسى ما أكتمل نموه
شوق: متأكده انه يهبل يكفي رائيي فيه
فهد ابتسم:شفت ياعمي مايهمها أحد
ابومها: والله زي الفار صغيرون مره
شوق عبست وبصوت محتد: عمييي
فهد وأبو مها: ههههههههههههه
شوق ميلت فمها: خلوني لحالي مع ولدي
فهد يرفع حاجبه بخبث: تبين تنفردين فيه لحالك ..مناك يصير هالشي
شوق تطالعه بحنيه:ياحياتي عليه نايم مو حاس بشي " لفت على فهد " فهد خلهم يطلعونه ابي احضنه
ابو مها: لا ..لسى صغير ماعنده مناعه
شوق بترجي: تكفى فهد الله يخليك روح كلمهم يطلعونه لي ..وربي قلبي بتفطر على ما احطه بحضني
فهد استجاب لكلمات بسهوله:غالي والطلب رخيص ..الحين احاول معهم
ابو مها بحده:ياولد علامك انت ..ماسمعت دكتور الأطفال ويش قالك اضن انك نسيت او تناسيت
شوق ابتسمت:عمي خله على راحته
ابو مها: والله انتي وهو منهبلين
فهد ركز نظراته على شوق اللي عيونها مافارقت راكان:اذا مالبيت طلبات شوق ..ألبي لمين
شوق نزلت راسها بحياء ..أبتسم ابو مها على كلام فهد ..ومشوا لقسم الأطفال حتى يقابلون الدكتور
بعد نص ساعه رجعوا لشوق وشافوها نايمه وهي جالسه وماسكه الزجاجه اللي متواجد فيها راكان
ابو مها بحزن:الله لايحرمني شوفتها هي وضناها
فهد من كل قلبه: امين
ابو مها بحيره:الحين لو سحبناه بتصحى وتعصب وتقلب الليله مناحه
فهد:انا بحاول أسحبه بشويش وبجلس عندها الليله
ابو مها:لا وانا عمك روح معي للبيت ونام شوف وجهك كيف صاير من الأرق والتعب ماترتاح ابد
فهد: كيف أرتاح وشوقو وولدي بعيدين عني ..انا ما يهدى لي بال ألين اشوفهم عندي بالبيت
ابو مها :يالله خلنا نأخذ الولد ونرجعه للحضانه ونروح للبيت
فهد بأستسلام: يالله
بعد ما وصلوا راكان للحاضنه وقفوا عند المصعد ..وتفاجئوا بوصول أبو رياض ورياض
بعد السلام
أبو رياض: كيف صارت زوجتك؟
فهد: الحمدلله أحسن من أول
رياض: والولد ..عساه طيب
فهد:كلهم بخير ..بس يمكن يطولون هنا
ابو رياض: الله كريم ياولدي ..مالك ألا الصبر
رياض: الظاهر عطلناكم عن مشواركم
ابومها: لا والله كنا بنرجع للبيت بس الصدفه زين اللي خلتنا نشوفكم
أبو رياض: ويش رايكم ترحون معنا للبيت نتعشى مع بعض
فهد: العذر والسموحه منك يبه ..باسل ينتظرنا بالمزرعه
رياض: اتصل عليه خله يجي عندنا
ابو مها:اذا علي ماعندي مانع
فهد ابتسم: أجل الليله عشانا عندك يابورياض
ابوه ضحك: الله يحيكم ..أتصل على أخوك خله يجينا
فهد:الحين أتصل عليه ..بس خلونا ننزل طولنا واقفين عند المصعد
ببيت أبو مها
لمت أغراضها بالشنطه وجهزت أغراض بنتها
مها: أنتبهوا لنفسكم ..إن شاء الله اذا قدرت يوم الثلاثاء اجي
رغد: على خير إن شاء الله
شهد: طمنينا عليكم أذا وصلتوا
مها تشيل بنتها: كلها ساعه ونكون بالقريه ...أشوفكم على خير
سلمت عليهم كلهم ونزلت
سحر: وانتي شهد متى بترجعين بيتك ؟
شهد: يمكن الفجر بعد مايخلص يوسف من شغله
سمر بحزن: فضى البيت ..مها سافرت وريم رجعت بيتها وشوق ماحد يدري عنها ..بنرجع لحياة الملل والزهق في هذا البيت
شهد لفت يدها على كتف سمر ومشت معها للصاله:ازعل عليك اذا سمعتك تتكلمين كذا مره ثانيه ..كلنا موجودين اذا طفشتي خلي جلالي يجيبك عندي ..حتى لو تبين تنامين عندي ماعندي مانع
سمر ردت عليها بضيقه:ماحب اضايق احد
هنادي :تعالوا أشربوا شاي معي
رغد جلست جنبها: الله يرزقني بعض من روقانك
هنادي: كلمني ابوي يقول كل شي تمام وشوق والصغنون بخير
شهد: الحمدلله

***مزون شمر*** · 16-04-2012, 08:36 PM

رد: رواية يا خاطفي وين ألقى عزتي في زمان المذلة ! / كاملة

دق جوال هنادي وقامت بسرعه للمجلس حتى تتكلم فيه بهدوء
هنادي: هلا رونا ..بشري ويش صار
روان ضحكة: جهزت لك طلبك خليت علياء تجيبه بمعرفتها
هنادي بفرحه:ياسلام عليك رونتي يا غلا دنيتي انتي ..تسلمين نردها لك بالأفراح
روان :هنادي انتي ماقلتي ايش تبي فيها ؟
هنادي: انتي عليك وفرتي اللي أبي والباقي لاتحاولين تعرفينه لانه شي خاص فيني
روان بشك: قلبي ناغزني عليك احس أنك تفكرين بحاجه بتوديك في داهيه
هنادي تضحك:أنتي تتكلمين عن الدواهي ...خلنا ساكتين أحسن
روان ضحكت: أنا خلاص مافيني رجاء بس من جد خايفه عليك بعدك ماتعرفي شي
هنادي: أنتي الخير والبركه ..منك نتعلم
روان: طيب ياللي تتعلمي بكره بعد الدوام نمر البيت واعطيك طلبك
هنادي: كم التكلفه ؟
روان تضحك: تخيلي بس
هنادي توترت: رونا مو وقت مصخرتك ..يالله كم كلفة
روان: 15 ألف
هنادي:لأنصدمت: أيش ؟..من جدك أنتي ؟
روان ابتسمت:وربي حتى أسئلي علياء
هنادي خافت: لالا ..روان انتبهي انا قلت لك مابي أحد يدري ألا أنتي أصحك تحس علينا علياء فهمتي
روان: لاتوصي حريص ..أنا ماخذه أحتياطاتي ولما سئلتني علياء كذبت عليها
هنادي: خلاص أجل بكره موعدنا بعد الدوام ..باي
روان:لاتنسي الفلوس ترى علياء اهم شي عندها المبلغ
هنادي: يصير خير ..باي
بعد ماقفلت الخط ..بدت تفكر بالمبلغ وكيف توفره
هنادي( من وين بجيب 15 ألف ؟!.. شكلي بتميلح عند باسل وأسحب منه على كيف كيفي ..أجل زوجي على الفاضي ..والله وطلعت بتفيدني ياباسل وتقضي عني غرض )
تذكرت بطاقة الصراف اللي أعطاها باسل ورمتها بدرجها بدون أهتمام ...ركضت للغرفه وقفلت الباب عليها ..طلعت الدرج وفتشته قطعه قطعه ...بعد ساعه حصلتها بشنطتها القديمه وضحكت
هنادي: لازم أروح أقرب صرافه واستعلم عن الرصيد
لبست عبايتها بسرعه وأخذت شنطتها والجوال ..قبل تنزل قابلتها شهد ورغد
رغد عقدت حواجبها بأستغراب طلت بالساعه: وين رايحه الحين الساعه 11 ألا ربع
هنادي : محتاجه فلوس وبرح أصرف من الصرافه
شهد :الله يعز المكأفئه اللي تفك أزمه
هنادي ضحكت بسخريه: أي والله ..يالله مستعجله ربع ساعه بالكثير وأجي
رغد: أقولك أستني اعطيك صرافتي اسحبي اللي باقي
هنادي:خلاص أنا اعطيك من فلوسي ما سحبت منها شي ..سيوو
أختفت عنهم بلمح البصر وأستغربوا سرعتها
شهد لفت على رغد: يالله نامي وراك دوام طويل
رغد كشرت: والله أنتي تبين تفتكين مني
شهد تغمز لها: لازم تنامين وتشبعين نوم في ناس بينجنون عليك لانك الأربعاء ماداومتي
رغد عصبت وقالت بحده: أوووف منك
صرخ مشاري من حدة صوت رغد وصار يبكي ..شهد: حرام عليك خوفتيه
رغد :مادريت انه رقيق على طول يبكي
شهد :يؤؤؤ عصبتي
رغد تميل فمها بقهر: يحق لي ما تشوفين كلامك اللي يقهر
شهد: ماقلت شي انتي الثانيه ...يالله عاد عن الدلع الماصخ وخلينا نجلس نسولف
رغد: ماعندي سوالف ..أروح أقرأ لي كم كلمه قبل أنام أزين
شهد بتأفف: ما الوم سمر يوم تطفش ..انتي وسحر وجودكم زي عدمه
رغد: متى نزلت عليك هذي الحنيه على سمور
شهد بزعل: ويش دخلك
رغد بضحكه: يوووه زعلتي
شهد: ويش رايك ؟
رغد: المفروض أنا أزعل مو أنتي
شهد تجاريها: أي باين
رجعت من عند الصرافه مصدومه ..مليون مره راجعت الورقه حتى تتأكد ..عدت الأصفار ألأف المرات
هنادي(أكيد أحلم ..والله ماني مصدقه اللي اقراه ..معقوله كل هذي المده ولا خطر على بالي يكون شي وقدره ..بجد أني عبيطه ولا افهم ..حلو ياباسل بديت أرضى عليك بعد كل الكفوف الي أكلتها من يدك ماراح أكون ناكرة جميل وأنتقم منك ..انت بتفيدني بحياتي كثير)
ضحكت على مخططاتها بشر ودخلت الغرفه ..رمت نفسها على سريرها وقبل تنام ارسلت له مسج ...سكرت جواله وحطته بالشاحن وسمت بالله قبل تغوص بعالم الأحلام
بالرياض
رجعوا من بيت أبو رياض بعد ما انبسطوا بالجلسه معهم وغيروا جوهم وروتينهم اللي عايشينه
باسل يهمس لفهد:يالله تكلم
فهد :عمي بتكلم معك في موضوع عارف اني بفتحه بوقت غير مناسب
ابو مها:تفضل ياولدي أنا أسمعك
فهد طالع باسل وابتسم ورجع ركز بنظراته وبصوت يتجلى فيه الأهتمام: باسل مستعجل الزواج من بنتك هنادي ..يعني أنا أقول بلى مانسوي زواج وبهلله على الفاضي ..يملك عليها ويأخذها لبيته
ابو مها طالع بباسل بنظره ارعبته وخلته يفقد القدره على تمالك أعصابه:أممم والله يابو راكان انا لازم أكلم هنادي وأسئلها اخاف يكون رائيها غير رايه
فهد: هذا حقها ياعم اسئلها وخلها تأخذ وقتها بالتفكير ...ومتى ما أعطتك رد كلمني عشان نتمم الموضوع بأسرع وقت ..أنت تعرف انه وحيد ماعنده أحد بجده
ابو مها: بس أنا عندي شرط لازم ينفذه قبل يأخذ البنت لبيته
باسل : أنا حاضر باللي تأمر فيه
ابو مها: تجيب لبنتي بيت في المدينه وتكتبه بأسمها
باسل بسرعه بدون ما يفكر بكلامه: ابشر ياعمي بشتري لها بيت وأكتبه بأسمها
ابو مها ابتسم على تهوره وهو مقصده الوحيد أنه يحس بقرب هنادي منه لانه مايرتاح لباسل مثل راحته لفهد:أجل بكره اذا رجعت للمدينه كلمتها ورديت عليكم
باسل: ايه مو لازم حفله وما ابيها تتجهز هي تجي لي بهدومها انا راضي فيها
فهد انفجر بالضحك: والله طلعت ماتلعب يابسيل ..مستعجل بالحيييل
باسل: طفشت من العزوبيه ..وتذكروا أني رجال مكسور أحتاج احد يهتم فيني
ابو مها: الله يكتب اللي فيه الخير
باسل بترجي: حاول معها توافق ياعم ..وانا حاضر بأي طلب تطلبه
ابو مها يضحك: يافهد خل اخوك يركد
فهد: عيب عليك ..لا تصير مخفه صير مثلي ثقيل وعاقل
باسل: روقنا ياشيخ ..

***مزون شمر*** · 16-04-2012, 08:39 PM

رد: رواية يا خاطفي وين ألقى عزتي في زمان المذلة ! / كاملة

بعد أسبوع
بالجامعه
هنادي شافت عبير تمشي بأتجاهها: عن اذنكم شوي وراجعه
روان كشرت: لا تتأخري
هنادي تغمز لها: مقدر أوعدك ..يالله اشوفكم بعدين
أية: يالطيف على عيون روان من ألحين بدت تطلع من محلها ..انتبهي ياهنو لا تموت علينا
هنادي: برفق عليها ..سيا
مشت لعبير وسلمت عليها
عبير:كيفك ؟
هنادي: بخير ..وانتي شخبارك؟
عبير: الحمدلله ..تعالي معي للمطعم بشتري عصير
هنادي تضحك: زي عصير أمس
عبير :أيوه ..عندهم عصير جوافه مافي أطعم منه بالجامعه كلها
هنادي : جربته قبل كم يوم ..حسيت طعمه عادي جدا
عبير: يمكن لأني احب الجوافه
هنادي تهز كتوفها: يمكن ليش لا ...يالله خلينا نروح نفطر مع بعض
بعد ما جلسوا على الطاوله وطلبوا لهم أكل
عبير: اقول هنادي ..صح بتتزوجين ؟
هنادي هزت راسها: ايه توك تدرين ؟
عبير :والله مادريت الا امس لما قالت لي امي ..وبعد انصدمت انها بس حفله عائليه وفي بيتكم
هنادي: احسن ياشيخه مالي ومال عوار الراس ... حفلة صغيره تأدي الغرض ولاتنسي عشان شوق وصحتها ماحبينا نسوي زواج كبير
عبير: الله يقومها بالسلامه ..كيف صارت الحين ؟
هنادي: احسن من أول تقدر تتحرك ..بس بعد اسبوع بيبدون معها جلسات الاشعاع مدري ايش شي مالنا فيه
عبير: وانتي متى بتسوون حفلتك ؟
هنادي:يوم الخميس
عبير شهقت:اللي بعد يومين ؟
هنادي :ايه ويش فيك منفجعه كذا ..ترى بتزوج ماقلت بهرب والا بأنتحر
عبير: يالله الله يوفقك ويسعدك
هنادي تميل فمها:ما أضن ..بس ربك كريم
عبير : لاتقولين كذا .. ماتدرين وين سعادتك ..ومع مين
هنادي وقفت: بروح اجيب الطلب وراجعه لك
عبير: أوك أستناك

بالرياض
كانت تسفرغ من الليل ما ارتاحت بنومها بسبب الغثيان والألم المصاحب له ... قامت صلت ركعتين الضحى ودعت ربها ..وقفت بترجع لسريرها لكن انخفظ الضغط عندها وداخت ..حاولت تستند بأي شي قريب منها ..لكن المسافه كانت واسعه قربت بسرعه من الجدار واستندت عليه ... دخل عليها وبيده باقة ورد انيقه جدا وعلى وجهه ابتسامه سرعان ما تحولت الى تعبيسه من منظرها رمى اللي بيده وركض لها بأقصى سرعه ضمها لصدره وشالها
فهد: شوووق ..تسمعيني
رمشت له بعيونها بتعب ..ساعدها تنسدح بمكانها وبعد شعرها عن وجهها
فهد: ويش اللي صار لك ؟
ماقدرت ترد عليها .. تلاشت قدرتها على النطق والألم يزيد عليها بين ثانيه وأخرى ..مرر يده على خدها حس بحرارتها ..طلع بسرعه يطلب من النيرس تتصل بالدكتور
رجع لها وجلس جنبها : شوق حبيبتي قوليلي ويش تحسين فيه
كانت تقلب عيونها ومتضحه عليها علامات قرب الأغماء ... مسح وجهها بمنديل مبلل بماء بارد ... دخلوا مجموعه من الممرضين وطلبوا منه ينتظرهم برى
بعد ساعتين كامله ..طلعوا من عندها
فهد: ويش صار لها ؟
الممرض: كل خير ..الحين نامت ياليت تخليها ترتاح
فهد: طيب ابي اعرف سر التعب اللي جاء فجأه
الممرض:عادي جدا هذي من الأعراض الجانبيه للعمليه وان شاء الله بتتعدى هذي المرحله
فهد تنهد: الله كريم
الممرض:ياليت لما نبدأ جلسات الكيماوي معها تبتعد عنها نهائيا لانها مضره حتى لك
فهد استغرب: كيف مضره لي؟
الممرض: لازم أشرحلك
فهد : امر عليك في مكتبك بس ادخل على زوجتي اتطمن عليها
الممرض: بانتظارك

بالمدينه
ابو مها: هنادي خلصتي من اغراضك
هنادي هزت راسها: جهزت اللي اقدر عليه باقي الفستان يطلع اليوم بالليل
ابو مها: الله يوفقك يابنتي ويكتبلك الخير .. انتي خلاص بتصيرين زوجته قدام كل الناس وماحد له كلام عليك ..وابيك يابنتي تحافظين على نفسك وبيتك
هنادي: إن شاء الله يبه
ابو مها: واهم شي ابيك تسوينه تنسين اللي صار وتسامحين باسل الولد شاريك
هنادي رفعت راسها وطلت بابوها بأستغراب: انت يبه تقول هذا الكلام
ابو مها: والله من اللي شفته الولد لو عنده نية شينه كان ماجاء وترجاني ابكر بموعد الحفله وأنتي ادرى بالظروف اللي نمر فيها
هنادي تنهدت: يبه انا خايفه ..يمكن اول كنت اضن انه بيطلقني بس الحين احس مالي مهرب منه
ابو مها:ماتدرين وين الخيره ..انتي توكلي على رابك وادعي الله انه يحببك فيه ويسخره لك ومايصير الا اللي يرضيك إن شاء الله
هنادي : إن شاء الله
دخلت سمر: سلام
الكل: وعليكم السلام
سمر: كيف حال عروستنا
هنادي ابتسمت: الحمدلله
سمر تطالع الساعه: ترى مابقى شي عن صلاة العصر بعدين بنروح نجيب الفستان
هنادي: ماشاء الله كأنك أنتي اللي بتتزوجين
سمر:ابي افرح ابي اغير مود الحزن اللي فيني
ابو مها: الله يديم السعاده علينا
بالمستشفى
كانت واقفه عند البوابه تنتظر وصول جلالي .. سمعت صوت وراها
وليد: مساء الخير
لفت بسرعه لمصدر الصوت اللي تبغضه: مساء النور
وليد: ممكن أسئلك ؟
رغد : تفضل
وليد: أبي اعرف سبب غيابك الأسبوع اللي فات
رغد: كأنك متأخر بسؤال ..أشوف ماله داعي ارد عليك
وليد: حاب اعرف ..ممكن تسمينه فضول
رغد شافت السياره: وانا أحتفظ بالأجابه لنفسي

::

***مزون شمر*** · 16-04-2012, 08:51 PM

رد: رواية يا خاطفي وين ألقى عزتي في زمان المذلة ! / كاملة

صفاء:كل هذا يصير بدون ماتقولي
فهد: مالقيت فرصه أقولك ..صفاء انا معتمد على الله ثم عليك بهذا الموضوع
صفاء: كنت مقرره هذا الأسبوع اقدم أستقالتي بس انت قلبت كل موازيني
فهد : أخدميني بذا الشي
صفاء: بحاول قد ما أقدر
فهد : كل الأوراق اللي تحتاجينه برسلها لك وأنت عليك الباقي
صفاء: أوكي بكلم المدير وأشوف ايش يقول بخصوص أجازتك اللي وقتها بالمره غلط
فهد: يالله صفاء مضطر اقفل الحين ..باقرب فرصه راح أكلمك
صفاء: صور راكان وأرسلي الصوره
فهد يضحك: أن شاء الله بس يكمل التسع شهور
صفاء :قلبي معاك
فهد: تسلمين ..توصين شي
صفاء: أنتبه لزوجتك هذا الوقت محتاجتك .. وان شاء الله اذا جيت الرياض ازوكم
فهد : الله يحيك
صفاء: مع السلامه
فهد: مع السلامه

^^^
^^
^

رجعة صفاء للرياض ..ماذا ستحمل معها حين عودتها؟..وماهي العلاقه التي تجمعها بفهد ؟
شوق ..وازدياد حالة سوء ..هل سيكون للقدر حكم اخر؟
هنادي ماهو الهدف الذي تسعى لتحقيقه ؟..وكيف سيكون تعايشها مع حياتها الجديد التي فرضت عليها ؟
باسل.هل سيضع لعلاقات هنادي حدود أم ماذا ؟
رغد ..أي مفاجئات تنتظرها ؟..والأهم هل سيعود عبدالله لأحداثنا ؟

شخصيه كانت معنا في البدايه لها عوده قويه ولكن ..من هي ؟!

انتهى البارت

***مزون شمر*** · 16-04-2012, 09:00 PM

رد: رواية يا خاطفي وين ألقى عزتي في زمان المذلة ! / كاملة

البارت الخمسون

يا أول قلب .. يبكيني .. و
تبكيني .. مواثيقه
أنا طباعي ماهي زينه و لكن
هذي أطباعي ..‘
تغربني قوافي الموت ....!ا
و أقول العمر تشريقه
أعيش ب شبه غيبوبه
و أعرف أن الزمن واعي

دخلت البيت معصبه رمت شنطتها وعبايتها في الصاله ودخلت لغرفتها
سمر باستغراب: ويش فيها معصبه كذا
هنادي ميلت فمها : مدري يمكن زعلانه من شي
سمر: مو يمكن ألا اكيد شفتي وجهها كيف احمر
هنادي تأكل من الحلى اللي بيدها:يالله اذا جات سألناها ويش فيها
سمر بنبرة خبيثه: ويش رايك نقول لأبوي هو يروح يشوف ويش فيها
هنادي تضحك: يالئيمه
ابو مها كان توه لابس ومتكشخ لخرجته اوقفه كلام سمر وبنبره فيها حده:ويش بتقولين ياسمر
سمر لفت زي المقروصه وراها: هاه.. لا ولاشي
ابو مها :قولي والا بزعل عليك
هنادي بتختصر الطريق: جات رغد معصبه رمت قرمبعها هنا وخشت غرفتها بدون ماتتكلم وتقول انها تبيك تشوفه انت
ابو مها عدل شماغه ومشى باتجاه غرفة رغد ...دق الباب وانتظر ردها
رغد: مين ؟!
ابو مها: افتحي يابنتي
بسرعه فتحت الباب وابتسمت:هلا يبه
ابو مها يتفحص ملامحها: يقولون انك متضايقه وزعلانه ..خير يابنتي صاير معك شي مضايقك ؟
رغد ضحكت: مشاكل بالمستشفى كدرتني ...لا تشيل هم يبه مافيني الا كل خير
ابو مها :الله يوفقك وافرح فيك انت وخواتك
رغد من قلبها:اميييين
بعد أختفى ابوها عن أنظارها وسمعت صوت باب الشقه تقفل طلعت لصاله ...وقفت قدامهم والشر بعيونها
رغد بتخصر: من فيكم قالت لأبوي اني متضايقه
سمر خافت منها: محد
رغد صرخت بوجههم: لا بالله ..يعني الجني قاله انا ويش فيني ..محد كان موجود غيركم يعني بالعربي وحده فيكم
هنادي بحده: انا قلت له عندك اعتراض
رغد بتهديد:المره الثانيه لو تشوفيني ميته قدامك ماتفتحين فمك ..فهمتي ؟
هنادي بسخريه:لا والله دكتوره رغد مافهمت عيدي كلامك مره ثانيه
رغد عصبت: غبببيه ..رجعت غرفتها وسكرت الباب بقووه هزت أركان البيت
::
::
في بيت يوسف
رجع من صلاة العصر مستعجل
يوسف: شهد..شهد ..شهوووده
شهد : انا بالمطبخ
دخل المطبخ وشافها جالسه تقرأ بكتاب طبخ ..حط يده على اكتافها وباسها على خدها
شهد :تقبل الله حبيبي
يوسف: منا ومنكم ..اقولك حياتي جهزي القهوه
شهد شهقت: لييييه ؟
يوسف ابتسم :بيجوني ضيوف
شهد كشرت: ليش ماقلت لي من بدري كان على الاقل جهزت شي مع القهوه
يوسف: والله توي مقفل الجوال من عبدالله بيجي العصر عندي
شهد :الحين اجهزلك احسن قهوه بالمدينه كلها ..ماعندي اغلى منك ومن ضيوفك
يوسف ضمها بقوه:بموووت وانتي السبب
شهد ضحكت: بعيد الشر عنك ياقلب شهودتك
يوسف :ايه ابيك تكشخين مشاري ابرزه بصدر المجلس بعلمه الرجوله من الحين
شهد: هههههههههههه اوك
جهزت القهوه وبخرت البيت بأجود أنواع العود ..ودخلت الغرفه تبدل لمشاري وتزينه ..دق جوالها
شهد:هلا هنادي
هنادي:كيفك
شهد: بخير الحمدلله
هنادي: كيف مشاري
شهد طلت فيه وبدأ يبكي:ماعليه ابي شي يسكته
هنادي تضحك: انا اسكته لك ..بس تروحين معي
شهد بنبرة استغراب:اروح معك وين ؟
هنادي: محل الفساتين اطلع فستاني واشتري لي اكسسوارات ليوم الخميس واحجز عند الكوافيره
شهد بحنيه: والله ودي اروح معك بس حظك اليوم جايين ضيوف يوسف
هنادي بتحطم: ياربي ويش ذا الحظ ..قهررر
شهد شهقت: عندي حل
هنادي:ألحقيني فيه
شهد:روحي انتي اعتمدي على نفسك وزبطي امورك ومريني اشوف الفستان وكمالياته
هنادي:اصلا ناقص اشياء كثيره ماقضيت منها ...باخذ سمر معي تساعدني واذا خلصنا وماتعبت نمر عليك
شهد:اقولك اتركي الكوافيره علي انا اتصل عليهم الحين احجز لك
هنادي :تسوين خير ماعندي وقت اصلا
شهد: يالله الحقي من الحين روحي
هنادي: اوك يالله باي

بأحد الغرف
ماقدرت تنام بالرغم من أنها بذلت اليوم كجهود كبير بالتدريب وتعويض مافاتها ...تذكرت الموقف اللي صار بينهم
د وليد: حاب اعرف ..ممكن تسمينه فضول
رغد شافت السياره: وانا أحتفظ بالأجابه لنفسي .."لفت بتمشي للسياره لكن يده كانت اسرع للمسها"
تقشعرت من لمسته مع العلم أن العبايه وملابسها تفصل بين يدها ويده ..حست بأشمئزاز منه تلاقت عيونها بعيونه وتضاربت مشاعرها من نظرته اللي أسرتها لعالم ثاني ..بعد ماحست على نفسها سحبت يدها بقوه منه
وبنبره حاده وجارحه: أنت تعديت حدودك ..أنتبه لتصرفات حتى ماتندم
د وليد:أنا أسف بس غرضي شريف
رغد صرخت بوجه:شريف وألا حليم مايخصني ...لاتفكر تقرب مني او تتعدى حدودك معي أنت دكتور وانا طالبه عندك..والامور ماتعدت هذا الشي الا اذا انت ناوي على شي انا ما أدري عنه
د وليد:أنتي ليش كذا ...أسلوبك جدا سخيف المفروض انك ناضجه وفاهمه انا ما طلبت منك شي الا اعرف سبب غيابك واظن من حقي لاني دكتورك
رغد من بين أسنانه: لا مالك حق تسال عن خصوصياتي ..وتأكد أني ما أقارن بسخافتك أنت وألا في دكتور طول بعرض يجري ورى طالبته بكل مكان
د وليد تحولت ملامحه للعصبيه نزل نظراته الشمسيه وبنبره ترعب: مين أنت حتى أجري وراك؟
طلعوا مجموعه طلاب من نفس قاعتها وكانت عيونهم على رغد اللي متغطيه ود وليد اللي واقف بجنبها
رغد قبل تمشي: أسئل نفسك ليه تجري وراي "مشت وتركته واقف بمحله "
قبل تركب السياره سمعت صوت من وراها
..:توي عرفتها على حقيقتها بنت ...
..: تلاعب بذيلها هالبنت ..تعرف تصيد
..:وأنت الصادق تتميلح عنده .."إن كيدهن عظيم"
ركبت السياره بسرعه وهي تبكي ومعصبه من د وليد وملاحقته لها اللي خلت الكل يتكلم عليها خاصة بعد ماصارت معه بنفس القروب ..كرهت اليوم اللي كملت فيه دراستها
أخذت نفس طويل ودموعها تسيل على خدها ..غمضت عيونها بألم وحسره
{ رغد }
بعد ما خلصت من عبدالله والهم اللي كان ساكن فيني وأتأقلمت مع حياتي يجي هذا وينغص علي من أول وجديد ..لازم أوقفه عند حده حتى لو توصل أني أترك الدراسه بس أثبت له اني ماني رخيصه
سحبت منديل من على الكمودينه ومسحت دموعها

:::
:::

رواية يا خاطفي وين ألقى عزتي في زمان المذلة ! / كاملة

تعليق

تعليق

تعليق

تعليق

تعليق

تعليق

تعليق

تعليق

تعليق

تعليق

google Ad Widget