رواية يا خاطفي وين ألقى عزتي في زمان المذلة ! / كاملة

***مزون شمر*** · 14-04-2012, 06:00 PM

رد: رواية يا خاطفي وين ألقى عزتي في زمان المذلة ! / كاملة

عند شوق وفهد
سكرت الجوال وحطت جنبها لفت على فهد وأبتسمت وهي تشوفه يطالعها بنظرات متفحصه
شوق: ماتبطل تسبيلاتك هذي
فهد: لا...ويش تبي أختك شاده عليك بالكلام
شوق ابتسمت وهي تتذكر مها وكلامه:تقول مشتاقه لي وتبيني اجي عندهم بعدين
فهد بأعتراض: أنتي تعبانه ماراح أوديك ولاراح تتحركين من سريرك
شوق تبعد الصينيه عنها وبترجي: برتاح للعشاء بعدين توديني لهم والله مشتاقه لها بعدين هي شاكه فيني شي وأنا مابي أحد يعرف شي
فهد بأستغراب:ليش طيب ..مها تعرف انك مريضه
شوق: ايه تعرف بس انا كل ماسألتني اخبي عنها اعرفها بعدين تروح تقول لأبوي وحالتي أنت أدرى فيها كل يوم تتدهور أكثر
فهد :شوق أهلك لازم يعرفون ...على الأقل لو يعرفون انك حامل
شوق ارتجفت: لا مابيهم يعرفون شي ..تكفى فهد لاتقول عن حملي هو مو على أي حال يتم وأكمل
فهد تنهد:والحل معك ياشوق والله تعبتيني معك ترى أنتي ما غلطتي كل شي صار بالحلال وألا انتي متأثره باللي صار زمان
حست بتشنج كل أعصاب جسمها من طاري الذكرى الأليمه ..كأن سهم تصوب على قلبها وأخترقه ... غصت بأنفاسها هذه اللحظة وعيناها تشكو حرارة الدمع
أنتبه لتغير ملامحها المفاجئ تأكد أنه جرحها في أعماقها ...تلخبط كل شي فيه هو ماكان يقصد أي كلمه قالها
فهد :حبيبتي والله ماكنت أقصد أجرحك أو أزعلك ...انا قصدي
شوق قاطعته: فاهمتك مايحتاج تكمل
فهد باسها: أنا أسف
شوق بنفس طويل: حصل خير
فهد :شوقه أنا ابيك تصارحين أهلك أخاف يصير شي وتندمين بعدين انك ماخبرتيهم
شوق بأصرار:أرجوك فهد هذي رغبتي ياليت تحترمها
فهد : الى متى ؟!...بيجي وقت تندمين صدقيني
شوق بتأفف: وبعدين يافهد ..على العموم انا ابي اروح عند اهلي
فهد : طيب بعد العشاء أوديك

بعد العشاء
رجعت رغد من السوق مبسوطه ومرتاحه ...طلعت فستانها تقيسه
مها: روعه يارغود
رغد: حتى حق شهد الوانه حلوه
مها لفت على شهد اللي واقفه قبال المرايا وباين التحطم عليها:ياربي شوفي كيف أنتفخت
رغد شهقت:حرام عليك والله بتموتين من النحف كلي غذي نفسك
مها قربت منها:اي والله رغد معها حق شكلك صايره حوله اذا كل هالنحافه تشوفينها زياده
شهد: شكلي مابروح الملكه بشتري باهته
رغد شوي وتخنقها:الله عليك ياشهد زي القمر مافيك شي غصب تطلعين بنفسك عيب هذا يسمونها عدم ثقه
شهد تتخصر:والله انا واثقه من نفسي
مها تضحك: اجل لاتجلسين تعذربين في نفسك ..اسم الله عليك حلوه "لفت على رغد وغمزت لها"
شهد بسرعه: ايه تغامزوا علي
رغد رمت الكيس اللي بيدها: خذي لبس ميشو قيسيه عليه تذكرته بالصدفه
شهد ابتسمت:سبقك ابوه جابه له لبس يجنن
رغد فتحت عيونها على الاخير:وليش ماورتيني والله انك نذله
شهد: ماجات فرصه
مها تمشي لبرى الغرفه: بروح اكلم سحر اشوف متى يخلصون عشان يكون العشاء جاهز وانتم غيروا فساتينكم لا تخربونها " بعد ماطلعت من الغرفه ..قفلت شهد الباب"
رغد ترقص بفستانها:شوفي شهد بالله مو لايق علي
شهد ضحكت: يجنن ان شاء الله تنخطبي
رغد كشرت: لا تكفين مابي انخطب ولا اتزوج الفكره ذي راحت من راسي بدون رجعه
شهد :طيب يالله اطلعي بغير ملابسي
رغد مشت للباب: معك خمس دقايق فاهمه والا بخش عليك
شهد:اوك

بغرفه ثانيه كانت تكلم سحر ماحست الا بدخول شوق عليها
شوق أخفت كل معالم التعب فيها: سلام
مها رمت الجوال وضمتها بقوه: وعليكم السلام ...وحشتيني موووووووت
شوق زادت بضمتها لمها:وأنتي اكثر الله يشهد علي
مها تبعد عنها: ويش ذا الحلى صايره تهبلين
شوق حمرت خدودها وابتسمت: عيونك الحلوه .. اعطيني علومك واخبارك؟
مها جلست :بخير الحمدلله ..انتي ويش مسويه كيف مع زوجك؟
شوق نزلت عبايتها وزينت تنورتها جلست قبال مها: الحمدلله كويسين
مها تدقق بملامحها:كأنك تحت عيونك هالات سوداء
شوق ضحكت: يمه منك كل شي تنتبهين عليه ..ماعلينا وين سحر وشهد ورغد ما اشوف احد
مها:رغد وشهد بالغرفه يقيسون فساتينهم ..سمر تحل واجباتها سحر وهنادي بالمشغل
قبل تتكلم شوق دخلت ريم وصرخت: ياظالمات انا زعلانه عليكم
مها وقفت بسرعه وحضنتها: اشتقت لك ياحياتي وين الغيبه هذي
ريم باست مها ودفتها بقوه وهي تهاوش: يعي لو ما اتصلت على سمر وقالت انك وصلتي كان انا نايمه بالعسل
شوق تضحك:على مهلك شوي والله بيطق فيك عرق
ريم جلست جنبها وقرصتها مع خدها بشويش: انتي اسكتي شايله عليك ..وين البقيه؟
رغد وشهد دخلوا مع بعض: هلا ريوم وحشتينا
ريم تميل فمها بزعل:ايوه باين اني وحشتكم ولاوحده تفكر تكلمني تطمن علي الا انا اركض وراكم زي المجنونه واتصل ماتدرون انا حيه او ميته
رغد :مشغولين ياقلبي اعذرينا ..الا تعالي ماشريتي لملكة سحر
ريم الا شريت وخلصت كل شي ...المهم عندي لكم خبر يجنن اكيد بتفرحون
كلهم بحماس: ويش ؟
ريم تحرك شعرها بدلع : يالله الشاطره فيكم تتوقع ايش هو؟
مها بتلقائيه سريعه: حامل
ريم ابتسمت: يس حامل بالشهر الثاني
رغد بصدمه: أحلفي
ريم حمرت خدودها: والله
شوق ضمتها :الف مبروك ياقلبي الله يتمم لك على خير
ريم : امين يارررب ...يالله عاد مهاوي ما استاهل قهوه على ذي البشاره الحلوه
مها ضحكت : احلى قهوه لأحلى أخت بالدنيا ...دقايق والصينيه قدامك يابعد عمري
ريم ترمش بعيونها: ياويلي على هذا الغزل ..الله لايحرمني من صاحبه
شوق مسكت يدها وحضنتها بين كفوفها: ولايحرمنا من شوفتك
شهد : على البركه ريومتي الله يوفقك ويرزقك الذريه الصالحه
ريم :أمين

***مزون شمر*** · 14-04-2012, 06:02 PM

رد: رواية يا خاطفي وين ألقى عزتي في زمان المذلة ! / كاملة

شهد ركزت بنظرها على شوق وقالت بنبره غريبه: وانتي متى ناويه تجيبين لنا بنت والا ولد نفرح فيه
شوق ضحكت: قريب ان شاء الله
رغد تضحك: كل مره تقولين قريب قريب ولانشوف شي
شوق عبست وبنبره حاده :ايش فيكم علي ؟
شهد طلت برغد وقاموا يضحكون: سلامتك ولاشي
شوق: احس وراكم شي اعترفوا يالله
ريم تطالعم بنظرات استحقار: هذول ماعليكم منهم يحبون ينرفزون الواحد ماحفظتي حركاتهم
شوق انطلقت ضحكاتها: والله معك حق ناس ماتنعطي وجه
رغد تتلفت حولها: خساره مافي شي اصككم فيه عشان تتركون المسبه عيني عينك
شوق توقف: بروح المطبخ ابرك اشوف مها ويش تخترع
ريم بصوت ضاحك: تخترع الذره ههههههههههه
شهد بسخريه: ياقديمه
بعد ماوصلوا هنادي وسحر أتعشوا مع بعض كان الجميع مجتمعين على العشاء
سمر: يالله من زمان ماتعشينا كذا
مها ابتسمت: اي والله أشتقت لذيك الأيام
سحرأبتسمت:بجدكم تشتاقوا لبيتنا
شوق غمضت عيونها :يووووه بشكل ماتتخيلين راح تجربين هذا الشعور
سحر تركت كل اللي في يدها :خايفه
ريم تضحك:بدري ياقلبي ماشفتي شي خلي خوفك لوقته كلي الحين
شهد تمد لها ملعقه :يالله افتحي بؤك ياعسل
سحر تبعدها عن فمها: مابي انسدت نفسي
شوق كشرت:لودريت ماتكلمت ..يالله بلا دلع
هنادي وقفت : الحمدلله
اتجهت لغرفتها وقفلت الباب على نفسها أسند ظهرها خلفه ومعدل تنفسها في تزايد ...اقتربت دموعها على النزول وقلبها تزداد نبضاته مشت لسريرها ورمت نفسها عليه بكل قوتها وكأنها تخرج كل الأهات والتعب الموجود داخلها وتفرغها فيه ..ضمت وسادتها بحزن مؤلم ولوعة تشرح بلعومها بألم متعب كل الذكريات تزدحم في مخيلتها ...سألت نفسها ألف مره عن سبب وضعها الأن لكن مالقت اي اجابه تشفي تساؤلاتها انفجرت بالبكاء ماتقدر تبوح لأي شخص حولها ..هي بتضل تحمل همها لوحدها ...خايفه من مستقبلها المنتظر ..اشياء كثيره تجبرها وحده على الصبر ...تتنمى غيبوبة زمن تفيدها ولاتزيد لوعتها بسبب امسها ..فشلت فشل مزري في حياتها ماكانت تدري عن اللي بيصير
هنادي( هذا جزاء الحب ياماجد ... كنت اضحك على نفسي وابعد حبك وهواك عنها كذا تجازي قلبي اللي حبك ليش معك اكون فاقده نفسي ...كيف بتأقلم مع وضعي ؟!..الله يسامحك كنت كنت ...كنت أبيك لي وحدي كنت بعيني كبير وفوق أي شك في قلبي صديت عن قلبي ألف مره ولما اعترفت بودي لك لقلبي جيت وقتلتني بأيدينك ...اه يارب رحماك رحماك رحماك)
مسحت دموعها بعد ماسمعت صوت الباب يندق
هنادي:مين؟
كانت شوق اللي ماتطمنت لشكل هنادي وسرحانها الدائم في الفتره الأخير وهدوئها المريب:افتحي ياهنو ابيك
هنادي :شوقه انا تعبانه ابي ارتاح خليني بروحي
شوق بأصرار: هنو افتحي ابي اتكلم معك حبيبتي
هنادي برفض تام لأنها عارفه نفسيتها اللي يادوب قادره تتحملها لو بتجي شوق بتقول لها كل اللي بنفسها بدون ماتحس:قدري رغبتي مابي اتكلم مع احد الحين
شوق بحده:هنادي انتي فيك شي افتحي بسرعه والا بروح اعلم عمي
هنادي استسلمت وفتحت لها الباب ورجعت على طول لسريرها وكأنها تهرب منها ..دخلت شوق وقفلت الباب طلت في هنادي وجهها احمر وأثر الدموع باين عليها ..مشت لها بشويش وجلست جنبها على السرير حطيت يدها على كتف هنادي
شوق بحنان أمومي: مايرضيني اشوفك بهذي الحاله سألتك كم مره ورفضتي تجاوبي لكن الحين أبي أعرف كل السالفه منك تأكدي انها بتظل بيني وبينك...ايش مضايقك وتاعبك؟
هنادي بدون ماتحس ذرفت دمعه كسيرة ذليله: ولاشي
شوق خافت عليها أكثر ماتطمنت ابد انقبض قلبها أكثر رفعت وجه هنادي ومسحت دمعتها:كل هذا وتقولين ولاشي
هنادي:شوق ودي أموووت قولي كيف أمووت؟
شوق انرعبت من كلامها شهقت بصدمه:أيش قلتي ؟!..موووت ..هنادي انتي واعيه للي تقولينه حرام تقولي هذا الكلام
هنادي مسكت يديها بترجي:مابي أعيش ابي أروح عند امي محد حاس باللي فيني كل شي في هذي الحياه ضدي الحياه نفسها ماتبيني
شوق بحده: أستغفري ربك أيش قاعده تقولين انتي ..اتقي الله هذا أعتراض وتسخط على القدر
هنادي حطت راسها على صدر شوق وصارت تبكي زي الأطفال:مقدر أعيش أكثر ..والله مقدر قلبي ماصار يتحمل اكثر أعز صديقاتي تخوني وترميني بالنار مافكرت فيني ولافكرت بصداقتنا ..حب عمري راح زي لمح البصر
شوق كل خليه بجسمها متجمده وهي تسمع كلام هنادي اللي قالت كل اللي فيها ...ساعه من الوقت مرت بدون ماتحس ..كانت هاديه وجامده في محلها ماهي مصدقه اللي سمعته ...كانت تبكي على صدرها الأبيض بحراره دموعها تسيل عليه بهدوء ذرفت دمعه وحيده من رمشها الذي أثقلته الدموع بأنهمارها الدائم ...أوجاعها لا تنقص كفتها بل في أزدياد ...لمست شعرها ببرود أكتسى كيانها
شوق لفت يدها على ظهر هنادي ومسحت عليه بخفيف:هذا نصيبنا من الدنيا
هنادي تبكي بحده: ماني راضيه فيه والله ماني راضيه
شوق ابتسمت بألم وتحولت ملامح البسمه على وجهها الي تجاعيد حزينه مخلفه من بعدها سيل من الدموع المالحه التي تتذوق ملوحتها مع كل نفس تتنفسه أخرت زفره طويله من صدرها الضيق
هنادي مسحت دموعها وبصوت شبيه بالهمس:لاتبكين يكفيك اللي شفتيه بحياتك
شوق نزلت راسها تحس روحها بتخرج من جسمها:ما أكتفيت والله ما أكتفيت
هنادي مسكت يدها :لاتشيلين همي واللي قلته يضل بيني وبينك
شوق بنظرة حزن: احس أن هذي روحتي الأخيره من هنا ...ماعاد لي رجعه
هنادي ارتجفت بخوف:لا اعوذ بالله"رجعت تبكي"مابي اسمعك تقولين كذا
شوق مسحت دموعها ووقفت:بتصل على فهد يجي يأخذني احس البيت كله يخنق انفاسي
طلعت من هنادي وراحت للغرفه الثانيه تطلع جوالها ...انصدمت لما شافت الساعه 12 كلمت فهد يجي يأخذها
سحر: ماجلستني عندنا
شوق تلبس عبايتها:بكره اجي على فكره فستانك الحين يطلعه لك جلالي
سحر حمرت خدوده:تسلمي انتي وزوجك الله لايحرمنا منكم
شوق: ولا منك ياقلبي ...يالله انتبهوا لنفسكم
مها :كان نفسي تجلسين
شوق حست بدوخه تمست بالجدار اللي جنبه وكلهم لاحظوا ميوله
رغد مسكتها بسرعه:شوق فيك شي
شوق بتعب: لا بس حسيت بشوية دوخه
رغد تسحبها بتجلسها لكنها رفضت: اقولك اجلسي ممكن ترجع لك الدوخه
شوق: يمكن ضغطي هبط شوي ..الحين احس نفسي احسن أعطيني طرحتي
بعد مالبست وخلصت دق عليها فهد اللي كان ينتظرها تحت واستغرب تأخرها
شوق: مع السلامه ...نزلت بشويش وهي تحس بالدوخه ترجع لها بين فتره وفتره ...دخلت السياره وكأنها بذلت مجهود كبير
فهد لف على جهتها قبل يسوق السياره:حبيبتي علامك
شوق :حاسه بدوخه فظيعه
فهد: اوديك المستشفى ..الدوخه هذي ماهي طبيعيه
شوق :لا خلنا نروح الفندق احس بأرهاق ودي انام
فهد : ابشري دقايق ونوصل ...حرك السياره متجه للفندق بسرعه
كان يلتفت عليها بين فتره وفتره وهي شارده بخيالاتها بعيد عنه ..ماتدري ويش مخبيه لها الأيام من مفاجئات ممكن تعجل بعجزها ...تختزل أوكسجيناتها داخل رئتاها بأختناق قاتل وكأنها تتنفس سمادا ليقتل كل أحاسيسها وبقايا الأمل فيها بعنف
وصلوا للفندق بعد أنتظار ممل وخانق ...رمت عبايتها عل الأرض وبدلت ملابسها بسرعه حست فيه يمشي بخطوات هاديه خلفها
فهد :ويش مكدر خاطرك
شوق بصوت متعب:تعبانه الألم كل شوي يزيد ...محتاجه أنام تصبح على خير
حطت صندوق فستانها وفستان سحر على جنب فتح الدولاب وطلع له بجامه ..دخل يأخذ دوش بعد الجو الساخن اللي كان يتمشى فيه ...بعد نص ساعه طلع بشويش وشافها نايمه بسلام
فهد(ويش تخبين علي ياشوق ... ليه ماتبين تفتحين لي قلبك معقوله مرضك يبعدك عني بدل مايقربك مني ...انا اذا ماشفتك مدري ويش يصير فيني ملكتي قلبي وأحساسي )
تنهد وأنسدح جنبها كان يوم متعب عليه صاحي من الصباح الي هذا الوقت أستسلم للنوم بدون أي منغصات

***مزون شمر*** · 14-04-2012, 06:04 PM

رد: رواية يا خاطفي وين ألقى عزتي في زمان المذلة ! / كاملة

أما هي حست بسكون حركاته أكتفت بالدموع الحارقه والبكاء الصامت وبراكين الحزن المتفجره داخلها ...تصرخ دواخلها بعنف لكن لامجيب لها حالتها صعبها وأكتملت حكاية شقاء عمرها بهنادي بعد أعترافاتها التي دمرت شوق أكثر وأكثر
قل للحزن :
اللي سكنباطرافي يستكين ..!
قله خلاص ولله خلاص
ما عاد تغريني الحياة .!
ما عاد يغريني فرح .!
ما عدت افرح باللقا .!
ماعدت بعيون الحياة جنون
( وضحكات وشغب ) ..!!
انا غديت بعينها طفله ولعثمها الحزن !
طفله ممزوجه بوجع
طفله تبي تنطق " ح ل م"
وماتت الكلمه جفاء , ماتت حزن , ماتتوجع.!

لفت على فهد تتأمله وهو نايم مايدري شنو صار من وراه بالخفاء غمضت عيونها الحاره من تبعثر دموعها لمست يده بهدوء وكلها حزن وانكسار ....بعد معاناه من التفكير قدرت تهدأ وتنام ...مرت ساعتين من سكون أنفاس هذان الشخصين
ظلام حالك + جو بارد + انفاس منتظمه
فجأه أنطلقت صرخات مفجعه من أحدهما أهتزت لها الجمادات حولهم صراخ بصوت محتد خائف ..وجل مما رائه
صحت مرعوبه من صرخته القويه اللي افزعت قلبها ..فتحت الضوء بسرعه
شوق بخوف شديد: فهد
فهد بعد عنها وهو يشهق يبي يأخذ أكبر كميه من الهواء وتسارعت أنفاسه ونبضاته
شوق مسكت أكتافه: بسم الله عليك حبيبي ..أيش فيك
فهد بفزع: مين انتي ...مين ؟!
شوق فتحت عيونها مصدومه: انا شوق ...بسم الله الرحمن الرحيم عليك
فهد حط يده على صدره وهو يتذكر الكابوس اللي شافه: اعوذ بالله من الشيطان الرجيم
قامت بسرعه جابت له كأس مويه :أشرب ياقلبي ...جلست جنبه وقرت عليه المعوذات
بعدها بدأ يرجع طبيعي لكن انفاسه لسى ما أنتظمت
شوق تمرر يدها على خده وعيونها تتفحصه بنظرات خايفه: ايش فيك حبيبي قايم مفزوع
فهد: شفت كابوس الله يكفينا شره
شوق:أكيد نمت بدون ماتقول أذكار النوم
فهد طالع فيها بأحراج: هاه أيه صح ماقلتها ( على اللي حافظها اصلا ..استغفر الله العظيم واتوب اليه)
شوق ضمته: الحمدلله انه كابوس تعوذ من الشيطان وأقراء الأذكار وان شاء الله تنام مرتاح
فهد رفع راسها لوجه: انتي فيك شي حاسه بشي ؟
شوق ابتسمت له بحب: مافيني الا العافيه
التقت عينه بعينها ..تذكر شكلها بمنامه بكاها وصراخها كل توسلاتها له ظهور أمه وقتلها له اللي أرعبه لف يديه على ظهرها وحضنها لصدره: الحمدلله
شوق كانت تسمع نبضات قلبه المتلاحقه بعدت عنه وطالعته بقلق:فهد قولي ويش فيك ؟ وجهك مصفر
فهد : ولاشي..خلينا ننام أحسن
رجع أنسدح ..وهي رجعت مكانها وطفت النور..حست بقربه منها ويده اللي تلتف على خصرها قابلته وباسته على خده
شوق تبي تفرفش عنه شوي: يمكن كابوسك عشان ماقلت لك تصبح على خير
فهد ضحك:والله يمكن مو طلعت ولقيتك نايمه ويمكن نمت زعلان عليك
قرصته على خده بشويش:ايه اعترف انك زعلت علي
فهد :اح قرصتك تعور
شوق :يوووه نسيت انك حساس
فهد يخرب شعرها: تتريقين علي يابنت القايد
شوق قربت وجهها منه: افا انا اتريق على فهودي "سكتت شوي وبعدها قالت بنبره حلوه" فهد اذا جبت ولد ويش بتسميه؟
فهد تفاجئ من سوالها اللي ماتوقعه أبدا :امممم انتي ويش خاطرك تسمين الولد؟
شوق: راكان
فهد : اسم حلو ...بس ويش معنى راكان ؟
شوق تذكرت أخوها الوحيد اللي ماعاش الا اسبوع ولحق امه اللي توفت بعد ماولدته:على أسم أخوي الله يرحمه
فهد سكت مصدوم بعد دقايق قال بصوت مندهش:كان عندك أخ؟
شوق: امي ماتت بعد ماولدته وهو عاش أسبوع لان وقتها جاء وعمره 7 شهور وتوفى على طول
فهد: أذا خاطرك بأسم راكان ان شاء الله اكون ابو راكان يا أم راكان
شوق ابتسمت: عاجبك الأسم
فهدبنبره حلوه: عجبني حيل يكفي انه على ذوقك ...طيب أذا بنت
شوق بسرعه قالت:ابي أسميها نجد
فهد بأستغراب:ويش نجد ..لالا ماعليش ماهو حلو غيريه
شوق بدلع:ياسلام هو انت اللي بتتعب بالولاده وألا أنا يعني الحين وافقت على راكان ورفضت نجد
فهد يضحك:بالله هذا أسم ..دوري غيره
شوق كشرت: بس هذا عاجبني
فهد بأعتراض: لا ...طيب ويش رايك بأسم نس.."سكت على طول"
شوق فهمت قصده: حبيبي أذا تبي تسميها على أمك ماعندي مانع نسميها نسرين اسم حلو وسهل
فهد: لا ماهو هذا قصدي ...ويش رايك نسميها جومانه
شوق :وووع ماهو حلو ..شوف يانسرين أو نجد واحد منهم
فهد يضحك: طيب خلاص تأمرين أمر يأم ركوني
شوق ضحكت:واو ياحلاته على لسانك
فهد يمسك خشمها:اللي محليته راعيته
:::
:::
:::

***مزون شمر*** · 14-04-2012, 06:05 PM

رد: رواية يا خاطفي وين ألقى عزتي في زمان المذلة ! / كاملة

يوم ملكة سحر

الكل كان مشغول بنفسه وتحضيراته بالأضافه للكوافيره المتواجده عندهم عشان تجهز سحر
شوق: انتم اذا خلصتوا روحوا للاستراحه انا فهد بيجي يأخذني وسحر معاي
مها: زين انا خلصت بشوف هنادي وسمر ورغد اذا خلصوا
شهد توقف: بروح البس ميشو يوسف رفض أروح مع جلالي
مها تغمز لها: ولهان الرجال
شهد حمرت خدودها وسوت نفسها معصبه: روحي شوفي شغلك
مها ماتت ضحك على شكل شهد اللي تحول الي لون الدم ..طلت بشوق اللي مبتسمه لها
مها :ديري بالك عليها
شوق عقدت حواجبها : مين ؟
مها تتخصر: سحر يعني مين
شوق انفجرت ضحك:على بالي شهد
شهد لفت وهي تزبط شعرها:ايش رايكم احط شعري على جنب والا لا
شوق مسكت خصل عشوائيه وثبتتها على جنب: كذا أحلى
صدح صوت نغمة جوال شهد في الغرفه :هذا يوسف اكيد وصل ..ألقت أخر نظرة على نفسها وطلعت من الغرفه متجه الى غرفتها عشان تشوف مشاري
شهد: هلا حبيبي
يوسف: هلا وغلا بالزين كله ..بشري خلصتي
شهد:لا والله حبي باقي شوي ..لا يكون وصلت تحت
يوسف: لا بعد مامشيت من بيتنا يمكن أوصل امي وغدير ..وبعدين أرجع لك
شهد ابتسمت: زين ماتسوي يكون أنا وميشو خلصنا
يوسف: نص ساعه واكون عندك تعرفين الاستراحه قريبه من البيت
شهد تضحك: ايه نسيت انها قريبه من بيتكم ...يالله بخلص قبل توصل "قفلت الجوال وبدت تلبس ميشو وتجهز أغراضه "

في الغرفه الثانيه
كانت ميته من الخوف ومتوتره ..تهز برجولها بشكل فضيع وتقضم أظافرها من شدت الخوف والتوتر
مسكت يدها بحنيه وعلى شفتاها ابتسامه هاديه:صلي على النبي وأذكري ربك ..ماله داعي الخوف أجل كيف بتكوني يوم الزواج
سحر: بموت من الخوف أحس قلبي بيوقف شوقه اكيد حاسه فيني انتي جربتي من قبل نفس الأحساس
شوق تغمض عيونها وتتذكر كيف كانت مجبوره على زواجها من فهد مشاعرها كانت غير عن أي بنت في الدنيا وقت ملكتها طردت كل الافكار اللي هجمت على مخيلتها وركزت بسحر اللي محتاجتها بهذا الوقت:اي حبي مريت فيها انتي بس استغفري وأدعي الله انه يبعد الخوف عنك ..لاتضيعين أحلى لحظات عمرك بأشياء مالها داعي
سحر تأشر للكوافيره توقف: لاتتركوني انا معرف أتصرف
شوق ضحكت: من عيوني كلنا جنبك ..بخلي الكوافير تكمل شغلها بروح اجلس بالصاله ارتاح شوي
سحر: أوك
أتجهت للصاله وشافت مها لابسه عبايتها ومعها رغد وسمر وهنادي اللي كانت ملامحها متغيره 360 درجه بسبب نفسيتها المتدهوره والميك أب اللي محليها ومعطيها نعومه وبراءه طفوليه
مها تمسك بنتها: احنا رايحين جلالي ينتظرنا تحت أنتبهي لسحر وقبل توصلون كلميني على الجوال
شوق: طيب
سمر :شفت شكلها وربي ميته من الخوف
شوق ابتسمت:بيجي يوم ان شاء الله تكوني بنفس مكانها
سمر ترفع يديها:يارب يكون قرريب
هنادي تدفها: يالله عاد تأخرنا
رغد :اي والله تأخرنا ..يالله خلصونا
طلعوا كلهم وبقت وحدها في الصاله ..بدأ يرجع لها الألم من جديد يوخز جسمها أكثر وأكثر
شوق ( يارب تعدي هذي الليله على خير ..يارب مابي فرحة خواتي وفرحتي تخرب يارب)
نست الالم أو بالأصح تناسته لما سمعت صوت شهد وراها
شهد تدور شنطتها:اقولك ماشفتي شنطتي؟
شوق: لا انا رايحه ألبس سحر قريب تخلص وأنا لسى مالبست ولا سويت شعري
شهد ابتسمت لها: طيب ترى انا شوي وخارجه يوسف وصل تحت
شوق:اشوفك في الأستراحه ..مشت للغرفه وشهد تدور شنطتها اللي ماتذكر وين حطتها
بعد ربع ساعه لقتها ..رجعت للغرفه وشافت يوسف شايل مشاري ويبوسه
شهد (الله لايحرمني من شوفتكم):ويش رايك بميشو وهو كاشخ
يوسف لف عليها صفر تصفيرة اعجابه لانه وصل ودخل الجلس على طول وماشافها:اكيد مو أحلى من أمه
شهد حمرت خدودها:عجبك الفستان؟
يوسف رجع مشاري على السرير ومشى بأتجاه شهد: يجنن انتي اي شي تلبسينه تزيدنه حلى
شهد نزلت راسها واشغلت نفسها بشنطتها اللي تدخل فيها جوالها وعطرها وبصوت مستحي: الحلا منك وفيك
يوسف قرب منها وباسها على خدها:مشتاقلك ياغلاي
شهد بعدت خصله متمرده عن وجهها:مو كثر شوقي
يوسف ابتسم: ويش رايك بالرجعه ترجعين معي للبيت
شهد فتحت عيونها على كبرها وشهقت: من جدك تتكلم؟
يوسف عقد حواجبه:ايه من جدي ليش ماترجعين خلاص مابقى الا اربع ايام وتخلصين الأربعين
شهد كشرت: ماشاء الله عليك دقه بالحساب
يوسف ضمها: الشوق ومايسوي
شهد باسه على خده ومسحت روجها: يالله حبي تأخرنا
يوسف يضحك: ياحبك للتصريف
شهد تشيل مشاري واغراضه:انت شايف الوقت مناسب
يوسف نغزها مع جنبها:ايه شايفه مناسب
شهد ضحكت :طيب خذ ولدك وأنزلوا بألبس عبايتي وألحقكم
يوسف: لا تتأخرين

***مزون شمر*** · 14-04-2012, 06:06 PM

رد: رواية يا خاطفي وين ألقى عزتي في زمان المذلة ! / كاملة

بعد ساعتين من هذا الوقت
الكل متواجد في المكان الذي سيشهد أول خطوه لحياه جديده أبطالها شخصين لاثالث لهم سينفردون بذاتهم عن الجميع ويكون لهم مساحه حره مولوده شرعا ليبدوا لحظاتهم الاولى بين أحضان أهلهم وأحبائهم ...وبعدها يكملون مسيرتها التي ستكون عمرا من أيام متكوره بالمجهول لا أحد يعلم غيبها سوء الواحد المعبود
قلوب أجتمعت على وقت فرحه وسعاده كثيرا ما أنتظروها بالأخص قلب عاشق متيم في حبها المجنون وقلب فاتنه تخوفاتها تكدر أحاسيس الفرح والحياء المتزاحم بنظراتها خليط مشاعر يتفاعل مع أوكسجين الجو ل يخلق على رمشها دموع مالحه لاتجد حيله لتنفيس ألا بها..تشبتث يداها وعيناها بالتي تقف أماما لتساندها في صعود أول خطوات حياتها الجديده التي تحمل لها كثير من المفاجئات ..تستنجد بها روحيا وجودها معها يشعرها ببعض الأمان الذي تلاشى ويذكرها بأحضان دافئه أفتقدتها منذ الأزل
شوق همست لها:سحر يالله وقعي البنت تنتظر والرجال برى ينتظرون
سحر مسكت القلم وهي ترجف وبصوت يكاد لايسمع:ب..بسم الله
ابتسمت وهي تتأمل حبر القلم يرسم توقيع الموافقه على أرتباطها المصيري بزوج وحبيب قد يكون الدنيا بأسرها في عينها ..نزلت راسها لمستوى جبين سحر وطبعت قبله تحمل معاني الحنان والامومه الصادقه
شوق: ألف مبروك حبيبتي ..الله يجمع بينكم على خير
سحر نزلت راسها بحياء وخدودها تعلن حاله من الهيجان الخجول مكتسيه لون الورود:الله يبارك فيك
شهد ضمتها بقوه لصدرها بحب أخوي:على البركه حياتي الله يوفقكم مع بعض ويكتب لكم السعاده
لينا باستها على خدودها بقوه:مبررووووك سحورتي ألف مبروك "لفت على شوق وأخذت الدفتر منها ..طلت في ريم اللي تسلم على سحر وتبارك لها
لينا:بروح أبشر حبيب القلب تلقين مغمي عليه الحين
أم لينا وخلاتها أمتلت زغاريطهم في المساحه الضيقه بالغرفه المتواجده فيها سحر
مها تسلم على أم معاذ:الف مبروك الله يتمم على خير
ام معاذ بأبتسامه رضا: أمين يارب "مشت لسحر وسلمت عليها بحراره وباركت لها ولشوق وشهد والبقيه
رغد كانت منتبه لهنادي وتصرفاتها الغريبه ..ماهي عادتها تكون أنعزاليه بمناسبه زي هذي بالعاده تكون خالقه جو حلو ..أفتقدت حسها ومرحها ..ملامحها تبوح بحزن لكنها تكابر وتحاول تروض طغيان مشاعرها الجامحه
مشت لهنادي وقربت منها لاحظت سرحانها الغير طبيعي :هنوده
هنادي فزعت لانها كانت بعالم ثاني:هلا رغد
رغد: خير حبي فيك شي كأنك متضايقه في شي مزعلك
هنادي ابتسمت: ابد مافيني شي
رغد مدت يدها:قومي يالله نسلم على سحر قبل تفقدنا وتزعل علينا
هنادي وقفت ومشوا بأتجاه سحر ..ورغد تراقب هنادي بكل حركه تصدر منها
بعد ماسلموا عليها..طلعوا لمكان الحفله وبقية المعازيم ...بدأ الرقص على أنغام الديجي اللي أضافه جو على السهره الحلوه ..وكل قلب من قلوب المتواجدين ينبض بوادي مختلف عن أي قلب أخر ..البعض يتألم والبعض يحب والبعض يشتاق وقلب واحد فقط يحتضر أخر اللحظات بألم فادح يسكن الجسد الضعيف ...جلست على كرسي بعيد عن الكل ..تتأملهم عن بعد ابتسمت على نفسها وحركتها
(شايفه ياهنادي كل واحد لاهي بعمره ودنيته أذا أنتي مافكرتي بحياتك وكيف تغيرينها محد بيتهم فيك أو يغيرها لك ...ليش ماتخلين كل الموازين تنقلب وتنحرف عن مسارها الصحيح ..ليش رافضه دخول باسل في حياتك ..صحيح أنه دخل بطريقه غير مرغوب فيها لكن انتي بس تقدرين تخلين دخوله لصالحك ماهو ضدك ..فكري زين لاتتسرعين بقراراتك وأحبكي كل شي على مهلك وخلي السحر ينقلب على الساحر)
حست بيد تنلف على رقبتها وصوت تقدر تميز صاحبه لفت راسها بتلقائيه للخلف وابتسمت بفرح :هلا وغلا روان توقعتك ماتجين
روان تبوسه على خدها: أقدر ارفض لك عزيمه ..كيفك اليوم حبيبتي؟
هنادي: الحمدلله مبسوطه ..انتظرتك تتصلين بعدين شفتك طولتي قلت اجل ماراح تحضر
روان ضحك: شوفيني قدامك ..يالله على الكوشه نفسي ارقص لين أشبع من الرقص
هنادي توقف: يالله نروح عشان اعرفك على خواتي وبنات عماتي اكيد راح تنبسطي زياده
روان بحماسيه: يالله هنوده
أتجهوا للكوشه وهم يسولفون مع بعض..مرت هنادي من عند عبير اللي جات مع امها بالغصب وشافت هنادي اللي طنشتها وكأنها ماشافتها ولا شالتها من أرضها
أم عبير بصدمه:أيش فيها هنادي ماسلمت عليك ؟
عبير عقدت حواجبها بأستغراب:ليه سلمت عليك ؟
ام عبير:أيه اول مادخلنا سلمت علي وبسرعه راحت ..ليه ماجاتك دايم على طول تكونين معها
عبير أرتبكت:هاه ..ايه حنا متهاوشين ؟
ام عبير رفعت حاجبها بحده واستنكار:انتم تتهاوشون خير ويش اللي صار؟
عبير:ولاشي زعلت مني على سبب تافه كها يومين ونتراضى
ام عبير :ان شاء الله ..بس مين اللي معها الحلوه كأنها أجنبيه
عبير:صديقتها بالجامعه يقولون البنات أن أمها فرنسيه مدري اوربيه الاكيد أنها ماهي سعوديه
أم عبير بأعجاب: ماشاء الله

شوق كانت تراقب هنادي وصديقتها من بعيد وفرحت لما شافت هنادي مبسوطه وتضحك وعايشه جوها بدون منغصات
شوق(الله يوفقك ياقلبي واشوفك سعيده ومبسوطه ومافي شي يجيبلك الهم وينغص عليك حياتك)
جات مها جلست جنبها وتتكلم معها عن ام معاذ وكلامها عن سحر اللي حبتها على طول

بالكوشه
رغد ابتسمت:ماشاء الله اجل ابوك تاجر معروف
هنادي : هي عايشه لوحده في قصرهم ماعندها اخوان ولاخوات وكل اهلهم في جده
رغد حزنت على روان:ان شاء الله نكون مثل اهلها
روان بحياء:والله حبيتكم ودخلتوا قلبي
سمر: وانتي بعد تدخلين القلب
روان:انتي ايش تدرسي رغد ما اشوفك بالجامعه ؟
رغد :انا ادرس طب والحين تدريب في مستشفى .....
روان بصدمه: والله
هنادي ضحكت:ايش فيك انفجعتي مو قلت لك ان اختي تدرس طب
روان:نفس المستشفى اللي ولد عمي يشتغل فيها؟
هنادي عبست:اي ولد عم انتي قلتي كل اهلك في جده
روان ابتسمت: ايه نسيت اقولك ان ولد عمي جاء وكمان عايش معانا في البيت بس له قسم خاص فيه
رغد: أيش يشتغل ولد عمك؟
روان :دكتور أسمه وليد الراجح
رغد انصدمت وشهقت :أيش؟
روان استغربت ردة فعل رغد : الدكتور وليد الراجح
رغد :متأكده ان الدكتور وليد ولد عمك ؟
روان:انتي تعرفينه؟
رغد ارتبكت وتغيرت ملامحها بشكل ملحوظ:ايه اعرفه هو الدكتور اللي أتدرب عنده"حاولت ماتبين اي شي قدامهم" أنصدمت لما قلتي انه ولد عمك
روان ضحكت:قال لي أنو بينقل لجده في مستشفى التتخصصي عند مامته واهله
رغد بعد سكوت طويل:كأني سمعت أنه متزوج
روان احتدت ملامحها وبعدها انفجرت ضحك:مين قصدك وليد ..أخر شخص يفكر أنو يستقر وليد ماعندوه مشروع زواج ابدا
رغد ابتسمت:أها الله يوفقه بحياته
روان تغمز لها: راح أوصيه عليك وأخليه يساعدك
رغد بحده:لا "كلهم طلوا فيها بصدمه تمالكت نفسها"قصدي مولازم انا اعرف أدبر اموري مشكوره حبيبتي "وقفت"عن أذنكم بشوف شهد وميشو
روان وهنادي تفضلي
سمر جرت هنادي قريب منها وهمست:أيش فيها رغد
هنادي تهز كتوفها بسلبيه: الله أعلم

***مزون شمر*** · 14-04-2012, 06:07 PM

رد: رواية يا خاطفي وين ألقى عزتي في زمان المذلة ! / كاملة

في مكان الرجال الذي سيشهد حكايه أخرى
فهد ويوسف وأبو هديل جالسين جنب ابو مها اللي يسلم على الحاضرين من العائلتين
كان خايف أن باسل مايحضر ويفشل كل اللي خطط له ...حس بجواله يدق ..طلعه بسرعه ورد
فهد بهدوء: هلا والله ...وينك فيه ؟..طيب بطلع لك الحين
دقايق وطلع عند مواقف السيارات يستقبل باسل ...اللي وصل بعد ثواني
سلم عليه بحراره واشتياق:كيف حالك وكيف الشغل معك
باسل ابتسم له: بخير انت شخبارك عسى امورك تمام؟
فهد:الحمدلله احوالي ماشيه
باسل التفت على البوابه وبدأ اعصابه تتوتر:مين جوا ؟
فهد ابتسم ومسك يده: يالله قدامي انت ماتعرف احد فيهم بعرفك عليهم شخص شخص
باسل اخذ نفس طويل ومشى للبوابه خلف فهد اللي انبسط بجيته
دخل وهو يتأمل الرجال اللي وقفوا عن يمينه ..سلم على معاذ وأبوه واعمامه ..بعد التبريكات والسلام وقف قبال ابو مها اللي أول مره يشوفه بحياته
فهد: سلم على ابو مها عم شوق
باسل فتح عيونه على كبرها وحاول يخفي ارتجافه وهو يشوف نظرات ابو مها الحارقه له وعيونه على فهد اللي يعرفه على باسل بلباقه وأحترام وبداخله خوف تبددت مساحته وطغت على كيانه

^^
^

أنتهى هذا البارت على خير
ولكن بأي نهاية ستنتهي رحلتنا...؟!

***مزون شمر*** · 14-04-2012, 06:09 PM

رد: رواية يا خاطفي وين ألقى عزتي في زمان المذلة ! / كاملة

البارت السادس واللأربعون

كل ما ح'اولت أسأل -

وش هو اللي صار فيك . . !

ردني عنك ( السكوت ) . . ‘

وصاحت اشواقي عليك ~

يا عيوني اللي | تشوف ‘

راجع أحساسك | وشوف ‘

يمكن تحس وتقدر -

أإن " حبي فيك " حي . . !

عند الرجال

فهد ويوسف وأبو هديل جالسين جنب ابو مها اللي يسلم على الحاضرين من العائلتين
كان خايف أن باسل مايحضر ويفشل كل اللي خطط له ...حس بجواله يدق ..طلعه بسرعه ورد
فهد بهدوء: هلا والله ...وينك فيه ؟..طيب بطلع لك الحين
دقايق وطلع عند مواقف السيارات يستقبل باسل ...اللي وصل بعد ثواني
سلم عليه بحراره واشتياق:كيف حالك وكيف الشغل معك
باسل ابتسم له: بخير انت شخبارك عسى امورك تمام؟
فهد:الحمدلله احوالي ماشيه
باسل التفت على البوابه وبدأ اعصابه تتوتر:مين جوا ؟
فهد ابتسم ومسك يده: يالله قدامي انت ماتعرف احد فيهم بعرفك عليهم شخص شخص
باسل اخذ نفس طويل ومشى للبوابه خلف فهد اللي انبسط بجيته
دخل وهو يتأمل الرجال اللي وقفوا عن يمينه ..سلم على معاذ وأبوه واعمامه ..بعد التبريكات والسلام وقف قبال ابو مها اللي أول مره يشوفه بحياته
فهد: سلم على ابو مها عم شوق
باسل فتح عيونه على كبرها وحاول يخفي ارتجافه وهو يشوف نظرات ابو مها الحارقه له وعيونه على فهد اللي يعرفه على باسل بلباقه وأحترام وبداخله خوف تبددت مساحته وطغت على كيانه ..مد يده بهدوء وثقه تخالف مابداخله
باسل: السلام عليكم
أبو مها ببرود ونظرات حارقه: وعليكم السلام
باسل: كيف الحال
ابومها: الحمدلله ..كيف حالك أنت
باسل غيرت نظراته بأتجاه فهد تهربا من ابو مها:بخير
فهد بأبتسامه رضا:وهذا يوسف عديلي
باسل ابتسم وسلم على يوسف ..والبقيه برحابة صدر ..بعدها مشى لكرسي بعيد وجلس أشر لفهد اللي جاء جنبه
فهد : ويش فيك انعزلت تعال عندي انا ويوسف
باسل :لا لا ماودي ازعجكم
فهد: اقول يالله تعال عندي بسرعه
باسل:فهد ترى ما تركت اشغالي والغيت الاجتماع الا عشانك يكفي تتأمر علي ..على فكره وصلني خبر ان ابوك باع قصره وكل شي يملكه
فهد: بجد ..متى صار هذا الكلام؟
باسل سحب له كرسي: أجلس اجلس ورانا هرج طويل
فهد جلس جنبه: خير قول باين عندك اخبار كثيره
باسل:كنت بقولك بعد ان الشركه اللي كتبتها لي وصلت ارباحها للنص
فهد رفع حاجبه بأعجاب: ماشاء الله ..شاد حيلك
باسل يغمز له: ولو ترى أعجبك راعي شغل تخبرني
فهد: أسمع بكره الصبح ابي أقابلك بمكان في موضوع مهم ابي أحاكيك فيه
باسل عقد حواجبه بأستنكار:خير ويش فيه؟
فهد حط يده على كتفه: كل خير بأذن الله اقولك بكره ..الحين بروح عند عمي
باسل ابتسم له وطالعه لين وصل لمكانه بجنب يوسف اللي بدأ يقهوي الضيوف بمساعده من بندر وأبو هديل
باسل( ويش بتسوي يافهد لو تدري اني تزوجت هنادي ...الله يستر لايصير شي أنا ماحسبت حسابه )
تذكر هنادي طلع جواله بسرعه واتصل عليها ..ماجاه رد من أول مره لكن رجع كرر المحاوله عدة مرات

***مزون شمر*** · 14-04-2012, 06:11 PM

رد: رواية يا خاطفي وين ألقى عزتي في زمان المذلة ! / كاملة

بجانب أخر من هذا المكان الصغير

كانت مبسوطه بهذي المناسبه رمت كل ألألم خلفها خشية من تنتصر عليها ...كانت ترقص مع روان بفرحه والبسمه ماتفارقها ..عاشت هي والبقيه ساعتين من الفرحه والمشاعر الجميله التي ابعدت كل قلب عن مايعانيه لبرهه من الزمن
هديل تصرخ:أي عليهم ..عاشت هنوده
هنادي تضحك:بدل الصراخ قومي ارقصي معنا
هديل تضحك وتدف خلود:يالله خشي أتحفيهم برقصك
خلود تتخصر: يوم قربت الأغنيه تخلص منت صاحيه
هنادي رجعت جلست مكانها وعيونها على روان اللي ترقص مع رغد وأنسجمت معهم ..حست بحركه جوالها لانها حاطته سايلنت ..رفعت بتلقائيه وارتسمت تجاعيد الكره على جبينها
هنادي(ويش يبي ذا بعد ..أووف منه ناشب لي) ...نزلت من الكوشه المصغره ومشت لمكان بعيد محد يلمحها فيه ..قربت من الغرفه اللي جالسه فيها سحر وأنتبهت لغرفه صغيره فاضيه ..دخلتها وسكرت الباب وجلست على أقرب كرسي لها ..رجع دق للمره الالف عليها وردت
هنادي: نعم
باسل: مساء الخير
هنادي ميلت فمها وسندت ظهرها على الكرسي ردت بدون نفس:مساء النور
باسل:وحشتيني
تجاهلت كلمته وماردت عليه أبد ..مرت خمس دقايق صامته بين الطرفين وهي تنتظره يستكمل حديثه
باسل انقهر من سكوتها حس أنها كارهته ولاتبيه ابد تنرفز وحاول يكبت نفسه ولايزيد الطين بله: كيف الحفله؟
هنادي تمد صوتها بنبرة دلع: حلوه حلووووه مرررره
باسل: ان شاء الله مبسوطه فيها
هنادي بنفس النبره: أيوه بشكل ماتتخيل
باسل حط رجل على رجل وهو يتأمل الرجال اللي جوهم هادي مره: ويش رايك بعد الحفله تروحين معي
هنادي فتحت عيونها وبنبره حاده:أيش؟!
باسل يمد صوته بنفس نبرتها: تروحين معي
هنادي: انت جيت هنا؟
باسل بسخريه: تخيلي !!
هنادي انقهرت منه: تستهبل أنت وألا أيش؟
باسل: أدري عنك ..ايه انا بالميدنه وقريب منك مابيننا الا كم خطوه
هنادي:طيب والمطلوب يعني؟
باسل عقد حواجبه:اتوقع انك فاهمه بس تستهبلين
هنادي بنبره جديه:شوف باسل روحه معك لو تموت تعرف معنى لو تموت ماراح اروح معك ..بعد العشاء تقدر تمسك طريق جده وترجع لانك ماراح تشوفيني فاهم
باسل ببرود:بكيفك بس انا بروح لأبوك واقوله أبي "يصر على اسنانه بالنطق"زووووجتي
هنادي بعصبيه:حشى والله انت ماتركت للأصول شي
باسل: ادري عنك ترانا زوجين يابنت الناس افهمي ذا الشي وألا انا بفهمك غصب عنك
هنادي:شوف يابسيل ...انت تزوجتني غصب عني ماهو برضاي ..ومن شروط الزواج تراضي الطرفين ماهو طرف واحد
باسل: عاد تزوجنا وانكتب العقد وتوثق بالمحكمه يعني كل شي رسمي وعلى السنه
هنادي بتأفف: وبعدين؟
باسل:ولا قبلين ترى انا بنام بشقتنا بنتظرك هناك
هنادي بحده: ماتفهم انت ترى اتكلم عربي انا
باسل بنبرة تهديد: انتي حره ..لاتلوميني على اي تصرف بعدين
هنادي أنقهرت منه نفسها تذبحه وترتاح منه ومن كلامه اللي يرفع ضغطها ويخليها ماتقدر تتمالك أعصابها : بحاول
باسل: مدام ابوك عارفه كل شي ماعاد للخوف داعي يعني مالك عذر تتهربين مني
هنادي بكره: الله يأخذك
باسل ابتسم بمكر: يأخذني ويجيبني عندك
هنادي عصبت منه: قفل الحين
باسل تعلقت عيونه بشخص دخل وسلم على أبو مها بحراره وعلى البقيه ..ضحك:على فكره توقعي مين دخل قسم الرجال الحين ؟
هنادي زفرت أنفاسها بحرقه تبي تنهي هذي المكالمه بأي طريقه بدون وعي قالت: مين؟!
باسل بنبره خبث ومكر: ماجد
هنادي انصدمت وبشهقه غير أراديه قالت: مين؟!...ماجد !!
باسل ميل فمه بقهر: ايه ماجد
هنادي ببرود يغلف أحقادها وكرهها لهم جميعا:ويش خصني فيه اذا جاء وألا ماجاء ؟
باسل ابتسم: قلت يمكن يهمك امره اكثر مني
هنادي انقهرت:لاهو ولا انت تهموني
باسل:متأكده أنه مايهمك
هنادي عصبت:باسل ترى فاهمه قصدك زين ..ماله داعي تلمح على شي ماهو موجود من الاساس
باسل بلين: أنا مالمحت على شي أنتي تفهمين الامور غلط ..اخر الكلام اني أنتظرك بالشقه سامعه
هنادي طرت في بالها فكره:خلاص بجي ..بروح قبل احد يحس بغيابي باي
باسل أستغرب ردها توقعها بتصر على رفضها :باي ( زين أنها واقفت والا كنت بطنش فهد وأرجع جده احسن من الجلسه هنا بدون فايده)
هنادي قفلت الجوال ووقفت تأملت الشاشه وابتسمت( خلاص لحد هنا وبس ..لازم تمحين شكوك باسل وتخلينه يوثق فيك ..انتي طحتي ياهنوده وانتهى الأمر تقبلي الوضع ولاترفضينه يمكن يكون أحسن من ماجد الحقير ..وبعد ما أثبت نفسي وأرجع لقوتي من جديد ياويلك ياماجد مني انت وعبير ) عدلت شعرها وأخذت نفس تجدد فيه أوكسجيناتها ..ورجعت للكوشه كأن شي لم يكن ..تخفي خلفها الكثير والكثير

***مزون شمر*** · 14-04-2012, 06:14 PM

رد: رواية يا خاطفي وين ألقى عزتي في زمان المذلة ! / كاملة

عند مها وشوق ..كانوا مع سحر اللي بالغرفه تنتظر دخول معاذ
لينا تضحك على شكل سحر المتوتر: سحوره هدي نفسك
سحر تهز رجلها بتوتر:انا هاديه بس انتي ماتشوفين
شوق طلت بلينا ومسكت نفسها عن الضحك:ايه خليك كذا هاديه
لينا تهمس لشوق:تقول هاديه ماتشوف شكلها كيف ترتجف هههههههههه
شوق:أوووش لاتعصب هي اخلاقها مش ولابد
لينا ابتسمت:خلاص بسكت لا تذبحني
مها لفت على سحر: بسم الله عليك تجننين ..يالله عاد اقري على نفسك
شوق: انا قريت عليها بس أفضل ترجع تقرأ مره ثانيه
لينا تقرب من سحر وتحط يدها على شعرها اللي مستشورته على طوله ومسويه من الأمام حركه ناعمه وطالعه كيوت مره:انا اقرأ على زوجة أخوي مابقى شي ويدخل معاذ
شوق حطت المبخره على الطاوله:انا بطلع عند عماتي عاد الباقي على ليونه وبنادي ريم
قبل تلف وتمشي أنفتح الباب بشويش ودخلت ريم
ريم بصراخ: واو سحووووورتي
سحر أبتسمت لشوفة ريم :ريومه تعالي ابيك جنبي
ريم تغمز لها:عرفتي قيمتي المعنويه الحين
لينا: خليها تجرب اللي جربناه وقتها كنت تتكركر علينا
شوق :انتبهوا لها حطوها بعيونكم ..يالله مهاوي تركتي رنومه مع عمتي اكيد جننتها
مها بشهقه: ياويلي راح عن بالي ...لبست صندلها وطلعت جري قبل شوق
شوق قبل تطلع لفت عليهم:لا أوصيكم انتبهوا لها اذا جاء رجلها
سحر ارتجفت من سيرته وبسرعه تعلقت عيونها بريم اللي ابتسمت لا أراديا على شكل سحر الخايف

قفلت الباب وراها وفتحت شنطتها ..شافت علبه الدواء والالم يزداد عليها أخذت علبة مويه من المضيفات ..وأرتشفت منها خلف قرص الدواء دخلت القاعه الصغيره ومشت للكوشه تشارك البقيه فرحتهم وفرحتها بأختها وشقيقة قلبها
هنادي وقفت لما شافت شوق قربت منهم :شواقه تعالي بعرفك على صديقتي
شوق بحب :ماشاء الله صديقتك جايه وينها ؟
هنادي لفت على روان اللي وقفت لما صارت شوق قبالهم:هذي روان صديقتي
شوق مدت يدها تصافحها وارتسمت على شفايفها بسمه حب:اهلين روان ..كيفك؟
روان بمرح:الحمدلله بخير ..أنتي كيفك ؟
شوق: بخير ...هنوده ماقلتي لي ان صديقتك تهبل
هنادي تضحك:الله الله يارونا شوق تمدحك
روان :الحق عليك ياهنوده ماعرفتي توصفي اختك ماشاء الله جميله
شوق: فديتك ياعيوني ..ان شاء الله مبسوطه معانا
روان ابتسمت وطلت في هنادي: دام هنوده موجوده اكيد مبسوطه
هنادي:شوقه تعالي اجلس بمكاني انا برقص
روان :لالا خليها ترقص معنا
شوق تتهرب:لا ماعرف ارقص واستحي ..انتم ارقصوا وانا هنا بجلس
هنادي تضحك:خلاص يالله روان نرقص
روان تمسك يد هنادي:يالله نرقص ...هديل تعالي معانا
هديل تبعد خلود عن طرقها: احم احم يالله طبينا
هنادي ابتسمت: وربي انك هبله ...بس يالله ارقصوا
جلست على الكرسي تتأملهم والفرح داخله يتراقص على انغام الموسيقى ..وتضحك على حركات هنادي وهديل ورقصهم مع بعض ...طلعت جوالها بتشوف الساعه لقت مسج من فهد ...فتحته بلهفه وحب

من ليلة البارح ،،~
وصوتك له صدى في مسمعي . .
يالبي نبرتك ،،~
والحنان اللي حواه بنبراته

ابتسمت من قلبها على رسالته اللي أبعدت كل التعب عنها ودبت الحياه فيها ...أخذت نفس تبعد فيه كل ألأمها وتستمع بلحظاتها مع أهلها

بعد ساعتين كانت طويل على قلوب ابطالنا المنتظره .. انتهت السهره بهدوء كماء بدأت وهي تخفي وراها الكثير من المفاجئات ...رجعوا الكل للبيت
رغد بحماس: هاه سحور ايش صار
سحر اللي ميته من الخجل: كل خير ..بكره اقولكم فيني تعب وارهاق ابي أنام وارتاح بعد هذا الهم
سمر تضحك:قال هم قال
هنادي كانت بالغرفه تبدل ملابسها ولبست بنطلون برمودا رمادي وبلوزه دانتيل وردي كت تعطرت واخذت شنطتها وجوالها وبجامه احتياط لو تنام برى البيت ...خرجت وشافت الكل بالصاله مجتمعين حول سحر ويحققون معها ..عدى شهد اللي بالمجلس تكلم يوسف ومخليه مشاري مع رغد
الكل بأستغراب:على وين
رغد تطالع بجوالها تشوف الساعه:خير خير وين رايحه كاشخه كذا الساعه 2 نص الليل
هنادي ابعدت كل التوتر عنها وبثقه:بروح انام عند روان ابوها مسافر وماعندها احد بالبيت كلمت ابوي ووافق
دخل ابو مها على كلمتها وسكت لما شافها ناويه تخرج
سحر:يبه شوف هنادي بتطلع الحين ؟
ابو مها: ايه استئذنت مني وانا موافق ...وين مها
سمر : تنوم بنتها بغرفتها
ابو مها لف على هنادي: انتبهي لنفسك يابنتي ..الله يحفظك يارب
هنادي حست بغصه من كلام ابوها ..نزلت راسها بانكسار ومشت بأتجاه الباب وكلام ابوها يتردد بأذنها..لفت طرحتها ونزلت بسرعه عشان لاتتردد بالروحه

***مزون شمر*** · 14-04-2012, 06:15 PM

رد: رواية يا خاطفي وين ألقى عزتي في زمان المذلة ! / كاملة

بعد ماركبت بالسياره تنهدت ..كأن جبل من الهموم والاحزان انزاح عن صدرها ..تذكرت باسل وانها بتكون معه بعد دقايق معدوده
هنادي(يارب ارزقني الصبر على هذي المصيبه اللي انا فيها) اتصلت عليه ومن اول رنه وصلها صوته
باسل :هلا وغلا
هنادي: وينك؟
باسل ببرود: يعني وين؟..بالشقه
هنادي: اوك كنت بتأكد خفت اجي وما القاك
باسل ابتسم وأمتزجت الفرحه بنبرته:انتي بالطريق ؟
هنادي بدون نفس: اي بالطريق..دقايق واكون عندك ..باي
قام بسرعه رتب ملابسه اللي كان راميها بعشوائيه ..وتعطر وعدل شعره اللي كان بشكل عشوائي فتح الأضاءه وطلع للصاله ينتظرها ...ثواني وسمع صوت جرس الباب
مشى للباب وفتحه ..دخلت وهي متماسكه بالكامل ولكن الخوف بدأ يتسلل لقلبها نزلت الطرحه عن وجهها بشويش وبصوت خافت قالت: صباح الخير
باسل سكر الباب: صباح النور
بدت ترتبك لانها ماهي عارفه كيف تتصرف بهذا الوضع ...نزلت عبايتها وعلقتها وقامت تتأمل الشقه كأنها اول مره تدخلها
هنادي: وين المطبخ ؟
باسل ضحك:ويش تبغي بالمطبخ ؟
هناد كشرت:الحين بتدلني عليه والا اروح افتش بنفسي
باسل قرب منها:لالا بدلك "مسك يدها" يالله امشي
أستغربت من هدوء وسكينته وتعالمه اللطيف معها عكس أول مره كانت تقوي نفسها أكثر وأكثر وبالها ايش بيصير بعد دقائق من الان ..سرحت بملامحه وشعره المتمايل مع حركاته
باسل فتح الضوء:هذا المطبخ
هنادي دخلت وصارت تتأمله :اممممم حلو ماشي حاله
باسل تكى على الباب بحيث انها ماتقدر تطلع:صرتي بالمطبخ ويش تبغين تسوين ؟
هنادي احتدت ملامحها:بغيت مويه عطشانه "أعطته ظهرها وفتحت الثلاجه اللي انصدمت بفروغها من اي شي "لفت على باسل وحطت يدها على خصرها: الحين بيت ويش كبره ثلاجته فاضيه ..حتى علبة مويه مافي
باسل كان متنح فيها وبجمالها الطفولي وحركاتها تزديها براءه باله بعيد عنها مايسمع أي كلمه من اللي تتفوه فيها ...لاحظت سرحانه وحركت يدها لكنه ما صحى من سرحانه
هنادي صرخت : بسوووول
باسل ارتجف: بسم الله ....نعم
هنادي رجعت تتخصر:الله ينعم عليك ..وين سرحت يالحبيب تراني اكلمك ما أكلم الجدار اللي وراك
باسل مشى لها ولف يده على كتفها ..لاحظ تغير ملامحها وجمودها :أمري ويش تبين اجيب لك
هنادي بدت ترتجف بداخلها:سلامتك مابي شي ..."حاولت تبعد عنه لكنه ماسكها بقوه"خلاص مابي شي
باسل قربها لحضنه:يابخت العيون اللي شافتك الليله
زاد كلامه توتره وبدت تحس بحراره تسري بجسمها وأنفاسها تختنق دفته بشوش تبي تغير هذا الوضع اللي يربكها:عطشانه ابي مويه
باسل:بالغرفه في مويه
هنادي انقهرت من بروده:لي ساعه اقول عطشانه بالاخير تقولي بالغرفه ...الله يعيني على برودك "مشت من جنبه وراحت لغرفة النوم ...شافت على الطاوله علبه مويه وكأس ..صبت لها وشربت منه يمكن تخف الحراره اللي فيها ...حست بدخوله وراها لفت بسرعه وشافته جنب التلفزيون
باسل: ويش رايك نتفرج على فيلم
هنادي(جايبني من البيت عشان تتفرج على فيلم والله حلال فيك الذبح) ابتسمت ابتسامه صفراء:براحتك
باسل يجلس على الكنبه ويمد رجوله:أنا أهم شي عندي راحتك
هنادي شوي وتنتف شعرها من العصبيه مسكت نفسها لاتزل بشي:راحتي هي راحتك
باسل طل فيها بأعجاب :هنودتي انت متأكده من اللي تقولينه والا بديتي تخرفين
هنادي كبت المويه الباقيه في كاستها عليه: ليش متزوج عجوز خرفانه
باسل فتح عيونه وهو يتحسس قطرات المويه على وجهه:لا والله متزوج غوريلا متوحشه
هنادي شهقت بصدمه وطيرت عيونها وبحقد قالت:أيش ؟..غوريلا يا ذيب مسعور
باسل انفجر من الضحك على تشبيهها:ويش قلتي..بالله عيديها تكفين
هنادي مشت له وهي منقهره : تبيني أعيديها هاه ..هين أوريك الحين
شافها ماشيه بأتجاهه وبداخله يبتسم ( جت برجولها لي ريحتني والله) مدت يدها لرقبته بتخنقه مسك يدها وباسها
هنادي عصبت:باسل اكرررهك
باسل ضمها لصدره:بس أنا أحبك
هنادي بحقد :كيف تحب غوريلا متوحشه
باسل يضحك:احلى غوريلا بالكون
هنادي بعدته عنها وخنقته بقوه وجلست على ركبها على الكنب:ولك عين تعيدها بعد
باسل ميت ضحك على شكلها :فكيني
هنادي:تأسف والا ما افكك
باسل:بتأسف بس على طريقتي
هنادي بأصرار:قول أسف
باسل :اسف بس فكيني ...عدلت جلستها وصارت تطالع بنظرات غريبه
هنادي :احد قالك انك اغبى مخلوق
باسل عقدت حواجبه:لا والله بالعاده يقولون اذكى مخلوق
هنادي عبست بحده:سخييييف
باسل ابتسم:سخيف اثول غبي عبيط ..كل شي يهون لأجل اشوفك
هنادي طلت فيه:زين انا تعبانه برجع بيتنا انا قلت اجي اشوفك يمكن عندك شي مهم طلع ماعندك ماعند جدتي
باسل طير عيونه فيها:خيييير خيير..وين رايحه ؟
هنادي ترفع صوتها وتطول كلامها:بيتنا
باسل:هذا انتي ببيتنا ...وبعدين ماشبعت منك ولا من شوفتك من جيت وانتي شابه علي
هنادي شهقت:أنا شابه عليك؟.."وقفت بعصبيه "شوف بسيل انا ماني جايه هنا عشان اسمع منك كلام يضيق الخلق ..مره شابه عليك ومره غوريلا متوحشه انا الزم ماعلي كرامتي ..ولا طبت رجلي هذا البيت الا عشان ما يغضب علي رب العالمين وتلعني الملائكه واضن انت فاهمني زين
باسل وقف جنبها:حقك علي والله امزح معك بس انتي اخلاقك مره ضيقه اي شي يعصبك ويعكر مزاجك ماتتركين لي فرصه اتقرب منك
هنادي لفت على يمينها وصار وجهها مقابل وجهها بفرق الطول بينهم:هذاني جنبك بس أنت ماتعرف تقول كلمه زينه ماتعرف الا تهددني وإلا تجاكرني
باسل فتح عيونه على الاخير:أهددك والا اجاكرك؟
هنادي تميل فمها:أيه
باسل:وهذا اللي مزعلك ويخليك تعصبين
هنادي جلست على الكنبه: أيه بعدين تسنع معي والا ماعاد بتشوف وجهي مره انه
باسل جلس جنبها وحط يده على كتفها: الحين مين اللي يهدد
هنادي(بدينا بالنكد وضيقة الخلق):خلاص خلاص حصل خير ...شغل ال tv خلنا نغير جو
باسل ابتسم وجلست جنبها وهو يهمس:بنغير جو ..لاتستعجلين

:::
:::
:::

رواية يا خاطفي وين ألقى عزتي في زمان المذلة ! / كاملة

تعليق

تعليق

تعليق

تعليق

تعليق

تعليق

تعليق

تعليق

تعليق

تعليق

google Ad Widget