وسلام عليكم .. كيف الحال !

يامشاء الله وانتهى الاسبوع الاول الاطول هو والاختبارات اللي فيه
مبروك يادوافير وعقبال مايخلص الثاني وتفلونها صح

والله يبارك فيكم جميع صح كلهم ثنين بس احسن من ولا شي
يالله العافيه طيبه والجنه الجنه !!

مستعجل جاي اليوم ع الطاير تقول احد يطردني بس عشان الخميس
الجو يساعد لو تحصل لك كم كلمه ماتسوى بس عادي

هو اللي يعمل بيلقى كلام طبيعي ذا الشي
اللي ماعنده شي مين بيقول له ثلث الثلاثه كم !!

فما عليكم لحد يكسر مجاديفكم على قولت اهلنا ف الخليج
يالله خليكم قريب بخلص شغله بيدي وجايكم

لحد يروح القهوه والشاهي الحين جايه

سلام

لقيت ذا الحكمه في مدونه قريبه !!! وخويكم صاحب ذا الشخبطه ماعجبه الكلام
مايصير ياهووو هذا هروب او استسلام للواقع

من متى الصمت يكون افضل من الكلام اذ الكلام مكان فيه الم
وكان الكلام فيه دروس وعبر !!

اما اذ تبع الكلام الم او صاحبه بعض الالم لا للصمت !!

تسمعون لا للصمت في حضره الالم في وجود التجازو في تخطي الحدود
وليه اصلا الصمت والحق معنا

كذا يتعود البعض على تكرار نفس الخطا لانك التزمت الصمت
قوي قلبك وادخل في عين ابو ابوه لايهمك

بلا حكم منتهيه بلا كلام ماله معنى

قال ايش الصمت افضل من الكلام .. لنتعلم .. سلامات

تصدقون ماضرنا الى حكم زمان قالو ايش " اذ كان الكلام من فضه فالسكوت من ذهب "

هذه الحكمه اللي قالها شكله ابكم او ضعيف شخصيه وماعنده سالفه
لا شي يعلوا فوق الكلمه الصادقه والنصيحه الطيبه

بلا صمت بلا خرابيط

اصدح باللي تشوف وعلي الصوت ومد يدك اذ لزم الامر ذلك
وايوه اذ صار شي قول الوسمي قال

اما تقولون لي الصمت افضل لا ومليون ميه لا !

كل شي الى الصمت اللي يتبعه الم لا تكون صامت وتتالم ترى تندم

>> اليوم صاير مجرم وبخربكم

بجد وش اسوي لكم ساعات ينرفع ضغطي عيشوا الواقع اكثر
لا تاثر فيكم الكتب وكذا الواقع احيان كثيره يتخلف عن اشياء كثيره درسناها وتعلمناها

باختصار الواقع يفرض علينا امور تختلف واشياء نضطر نسويها
لا تهربون منها عيشوها واجهوها كونو قدها وزياده

بعض الاحيان ننفجر في الوقت الغلط ونسكت بالوقت الغلط عادلو بين الثنين
لا تستكت لين توصل حد الانفجار
ولا تنفجر بوقت تكون الامور بردت ترى بعدين بتصير انت الغلطان !!

ليه ماتكلمت بدري ليه بقيت ساكت !!

مدري وش فيني الكلام يسابق اصابعي ع الكبيورد ويجري بالشاشه
لها الدرجه تحمست مدري والله

بس ماعليكم من كثرت كلامي

اخر شي ونختم به الكلام

لا تتردد كن انت من يصنع الحدث وليس رده الفعل للحدث !!

سلام واجازه سعيده باذن الله

خودافس

... آأإأآم باإأآأك ...

اليوم يوم النقاش العالمي مدري عشاني فايق او لان كلامكم يحمس
الواحد يدخلك معاكم فيه في نقاش !!!

ماعليكم بتفلسف عليكم شوي لحظه ارح اجيب الكلام !!



كلام ف السليم اكيد الحب عشان يمسى حب يحتاج لوقت
مو من الباب للشباك امسكني وجيتك وحبيتك ومدري كيف !!

بس اشوف سنه ونص وقت مره طويل وبقوه بعد
ماطنتي يحتاج هذه المده كلها يبان الشي من بدري

مشكله وربي توهم الحب ومشكله كبيره ان البعض يتوهم الحب
ويعيش نفسه في وهم ويتورط اذ صحى منه
وهنا يكون الفراق بس بعد ايش !!

كميه اضرار كبيره كان ممكن تفاديها لو كان الحب بدون بنيان
هش معتمد ع الاحلام وكلام المسلسلات واحلام الشباب
في حب غير عن الواقع !!

هنا يكون الحب ماش ووهمي على قولتك ! والنتيجه فراق !!

المايك هنا صار مع شمس بعد ماكان مع شهرزاد وصراحه الثنين بدعو في الطرح
واخذو الموضوع من كذا جانب

هنا اضم صوتي لصوت شمس الحب الحب يختلف عن الحياه الزوجيه
والتفاهم بين الزوجين ... واحيان كثيره يجي معها واثنائها مو شرط يكون موجود قبلها

خصوصا في مجتمع زي مجتمعنا هنا واغلب المجتمعات العربيه !!

واحيان كثيره نشوف ازواج يفترقون عن بعضه وهم يحبون بعض
بس ماكان بينهم اي نوع من التفاهم

ف الاخير

الحب يبنى في احيان كثيره بعد العلاقات وفي اثنائها ويستمر مع تقديم بعض التنازلات
من الطرفين ف يقوى ويعيش ويستمر

وهذا اللي اتمناه لاخوك وزوجته وكل ابناء وبنات المسلمين

نقطه ونهايه سطر مو صدر ياشمس قلبتيها دجاجه مو حروف

يالله بالتوفيق للجميع

اخيرا

العقل يتحكم بكل شي اجعل قلبك احد هذه الاشياء !!

سلام

ياهي سريعه الايام وبالاخص الاحلى !
تمر بسرعه وربي مايمداك تقول ياهادي .. !

صبحكم الله بالخير ببدايه اسبوع جديد واخير في الاختبارات
الله يوفقكم جميع ويكتب لكم كل خير ويعديه على خير

ما هنا شين جديد .. البال شوي مشغول اتعبه السهر والممشى
يالله ماعلينا تمر ان شاء الله كالعاده وتبقى ذكريات

يقآأإأآل




ان سبب سعاده الاطفال لان كل القلوب تحتويهم !


عشان كذا تلقونا نحن لايام الطفوله وكذا مدري والله
بس كل ذكريات الطفوله حلوه

لحظه !

يقول بن فطيس ..



حارت دموعي في عيوني وصديت .................................

............................................... وأرمشت مابيها تبين وطاحت !!


مشكله الرجال في دمعته يتعب يخفيها تصدقون
ساعات نحسدكم يالبنات سهله دمعتكم وماتتعبون في كتمها !!



ماعليكم من ذا الكلام خذو النتيجه !!

:: جمال الوجوه لليس احلاها خلقه .. بل اكثرها ابتسامه ::

سلام

ياخوان فيه ناس مرضى ش الحل معاهم !!!

اللي يرفع الضغط ماعمري تجاوزت على احد او سويت لاحد شي
ماسك الجدار بيد ويد ع الكيبورد

الله يسامحهم !!

والله مدري ش اكتب مرتفع ضغطي ورب البيت !!

سلام لين تزين الامور

دخول مفاجئ هلا بالعياآأإأآل

صبحكم الله بالخير ياطيب من شافت عيوني >>> بلا خرط متى شافتهم عيونك
ياسبحان الله صوت الضمير ذا ازعاج وربكم

ماعليكم منه نقول هلا بالعيآآإأآأل

بالاول وقبل كل شي انسحابي باليومين اللي راحن كان تكتيك مو شي ثاني
يعني مع سبق الاصرار والترصد

بوه شي براسي وحبيت اسويه مو اكثر بس ع الطاير بعطيكم
لمحه ع الانسحاب وكذا

اول شي وبجد انشغلت تعرفون ايام تخرج وكذا مو بس ليا كمان لناس حولي
فانشغلت معهم بالتجهيزات والحركات وكذا وعندي اجازه يومين !

ثاني شي عشان اخلي الناس النفسيات يفرحون بانجازهم يوم يشوفون
كلامهم اثر فيني يعني حرام لازم نديهم جوهم وننفس شوي
نخلي لتعبهم نتيجه هههاي

ثالث شي وذا الاهم ركزو معاي بالله فـ السبب الثالث

ثالث شي عشان اوضح لكم بطريقه ملموسه ان الصمت مو حل
والهروب من المواجهه كمان مو حل

فلا تصدقون ان الصمت حكمه ومدري كيف تراهم مايدرون اللي قالوها
وش الحكمه في الصمت مدري وين !!!

والاهم من كل ذا الكلام والله ماكنت بزعلان ولا فكرت بالزعل
واصلا من جدكم بزعل من كلام النت وحشه سلامات خلاص صارت عندنا مناعه من ذا الشي
يعني كبرنا عليه !!

صح على طاري كبرنا وكذا لو بقول لكم عمري 22 سنه مين اللي راح يصدقني
مجرد تساول وبخلي مصداقيته تطلع مع الايام !!

مدري ليه احس شمس وشهرزاد وحده فيهم عيونها الان وصلت الشاشه !!! !!!

صح وقبل انسى الناس اللي تقرا سطر وتنقز اسطر
ارجع اقرا الكلام من ثاني فيه اشياء تفيدك

لاتروحو بعيد برجع بس بفطر !!

سلام

بجد هذآآ الكلام !!

الحين مدري وش يصير فيني اذ مريت مدونه ولقيت احد يتكلم
في امه وتكلم عنها !! !! تخنقن العبره ..

واقعد فتره متنح واعيد اقرا الكلام مره ثانيه

الله يحفظ أمهاتكم جميع ويطول باعمارهن ويخليهن لنا
ويرزقنا برهن ورضاهن والجنه

ذا الكلام لاني قبل شوي مريت مدونه قريبه من هنا
والله بجد احيان يوم اقرا كلام عن ( الأم ) لا ارديا الف شريط الذكريات مع امي
احيان كثيره اطلع مقصر معها مقارنه بالاشياء اللي تسويها لنا

المشكله اننا نحسب اننا نسوي لهم جميله يوم نقضي لهم اغراض بسيطه وكذا
وخاصه حنا الشباب !!

فـ الاخير

ترى مهما نسوي هو لاشي بالنسبه لما اعطونا !

سلام

الســــلآم علـــيكم ..

كيف الحآأإأآل شباب ولا هانو البنات .. اخباركم جميع
وحمد لله ع السلامه واجازه سعيده باذن الله

واللي للان يختبرون الله يتممها على خير وتخلصون وانتم
بأحسن الحال والاحوال

استفزني عبدالعزيز بكلامه في مدونته بعد ماقعد يفصل ويحلل بعمري
اما ياهو بدع صراحه بس يابو العز مو كل شي رياضيات وتقعد تجمع وتحط فرضيات من راسك

يعني خلي الدوفره شوي على جنب

اول شي اللهم لك الحمد ماعمري تاخرت سنه في الدراسه بديتها وانهيتها
بدون اي تعثر لا وكنت من المتفوقين واكثر من مره كرموني ومن ايام الابتدائي

يعني ابو العز خويكم دافور بس ع الصامت

الجامعه انتساب يابو العز واتكلم هنا عن قسم اللغه العربيه كل مجموع ساعاته
بين ( 137-140 ) ساعه تختلف بحسب بعض المواد الاختياريه وكذا

خويك صاحب ذا المدونه يابو الشباب جابها في (137) ساعه ياربي لك الحمد
وعندنا مسموح لك تسجل 23 ساعه بالترم الواحد هيا قسم وشوف كم سنه عشان تتخرج



اول مره انزل درجاتي بس استفزني ابو العز وبما انو اخر ترم
عادي ماتفرق معاي شوي واتحمس واجيب لكم المعدل

بس مسكتي نفسي بالاخير وقصيت الصوره لانه زي وجهي !!
تذكرو اني ما اعتبر زي وجهي حش او تقليل من الشي

فـ الاخير

اشغلت كم واحد بعمري وكذا ذاك اليوم رميت الكلام ورحت ماتوقعت كذا
لا وفيه تهديد ومدري كيف

ياشباب قلت افرضوا ماجزمت بالشي ركزو بليز

يالله خلوني اقوم افطر وباذن الله راجع

سلام

أحبك جدا
وأعرف أن الطريق إلى المستحيل طويـل
وأعرف أنك ست النساء
وليس لدي بديـل

...

وأعرف أني أسافر في بحر عينيك
دون يقين
وأترك عقلي ورائي وأركض
أركض خلف جنونـي

...

أيا امرأة تمسك القلب بين يديها
سألتك بالله لا تتركيني
فماذا أكون أنا إذا لم تكوني !!

...

وما همني
إن خرجت من الحب حيا
وما همني
إن خرجت قتيلا

...

من روائع نزار >> تدل دربها

احسن ما اختم فيه هذه الصفحه
التقي واياكم فـ الصفحه التاليه

كونوا بخير

سلام

ســلآم

اول شي ادوني رايكم بالتصميم وكذا بتقيم برساله باي شي ابغى اشوف
كيف جاي وسلامتكم !

ثاني حاجه

تصدقون مستحيل احد يكون لوحده ومع نفسه على قولتهم لازم
يكون عندك عضيد او سند تستند عليه في بعض الاوقات

صعب ان الواحد يبقى بمعزل عن الكل بتجيه الكابه وحومه الكبد والقلق
وضيقتن بالصدر !

يعني باختصار كون قريب من العالم عاد كانو حولك او عبر الاثير
حلوه عبر الاثير اهم شي لاتكمش لحالك << تكمش هذه من الانكماش ينكمش انكماشا

اللي عرف المعني يرفع يده وله عشر ريال وثلاث تقييمات ع الطاير
صح على طاري التقيمات ليه مابيع تقييم فكره صح

ماعليكم ضيعت وش كنت بقول !!!

تذكرت دايم خل عندك مكان تبوح فيه تتكلم فيه براحتك تاخذ وتعطي
لان الحديث في اغلب الاحيان راحه للنفس خصوص مع الاشخاص اللي يكونو محل ثقه

واللي نرتاح لهم !

بيني وبينكم ولا تعلمون احد مفتقد ذا الشي من كم يوم صاير نفسيه
ومع نفسي بس ماعليكم سحابه صيف وتعدي اعرفني نفسيتي زي وجهي

مو كل يوم تمام !!

اخر سطر

لا تحاول ابد تنظر للي راح بنظره سلبيه تدقيقيه لا خله يعدي على اوله
انظر للي جاي والفرق اللي بيكون معاه لا توقف عند مواقف كان فيها بعض الاخطاء

لاننا باختصار كثيره اخطائنا !

قيل لاحدهم ذات يوم ان كرهك وحبك متساويان !!
لو كنتم مكانه ماذا تعملون !!

نقطه ونهايه اسطر

فـ الختام

كن كل شي لاحدهم تسعد !!

سلام