رد: رواية/ شجون روحي شجون أنفاسي

بختصار يمكن اعلق بالاتي
راحت احاسيس المحبه مع الناس
واحد يحب و واحد يعشق مزاجه

او بالاخص

و من منا لا يحب ل الابتعاد قليلا

عن ضوضء المتاعب

و يتركز في زواية لم تمسها إي من >> حماقات الحياة


روايه اجتماعيه بدون تصنع وبالهجه العامه توحي بان الكاتبه تحمل ف طياتها الكثير من الخيال الواسع
لك ودي وتقبلي مروري

رد: رواية/ شجون روحي شجون أنفاسي

يعطيك العافية والله فرحني كلامك عن الرواية وشكرا ع دعمكم لي
وعذرا على الإطالة فعندما أنسجم بالكتابة أنسى نفسي

رد: رواية/ شجون روحي شجون أنفاسي

البارت الخامس عشر
بعد ما راح رياض رجعت شجون عند البنات وكانوا ساكتين ومتخوفات من شوق جلست شجون معاهم ع الطاولة: ليش ما كلتوا يلا تفضلوا
شوق حطت الفطور ع الطاولة وقامت تاكل ولا عبرت البنات اللي معاها وهم استحوا يمدون يدهم عشان ما حد قال لهم تفضلوا
شوق: وش عندك أنت ورياض
شجون: يا شين اللقافة وأنت أيش دخلك
شوق: لا والله ترى ذا أخوي
شجون: ولا تنسين أنه ولد عمتي
ابتسمن البنات ع مشاحنة شجون وشوق
شوق: خلونا ناكل وأنت حسابك بعدين مو قدام الناس
بدور: ما حنا غرب خذوا راحتكم
شجون: ما عليكم منها ولا تزعلون ترى شوق مرة حبوبة بس غارت لما شافتكم معاي
شوق: رياض ما خلاني انتظر الكوفيرا واجيبها معاي
شجون: خلاص اجهزي معاي
شوق: بس كذا كثير ترى إحنا خمسة ما نلحق نجهز
سارة: لا إحنا نجهز لحالنا
شجون: عادي دقي عليها مرة ثانية وتجي أنا بظل بالأخير عشان ألحق أنام وارتاح من التعب مدري وش اسوي بحالي
بدور: واضح عليكي التعب حرارتك مرتفعة ووجهك أحمر
شجون تذكرت اللي صار أمس لسه اثار أصابع فارس ع وجهها عقدت حواجبها كيف ما انتبهت وابتسمت بقهر: كل وحدة تغسل صحنها وكوبها
المها: أنت تامرين بس ليش بيت بهالكبر ما فيه خدم
شجون" لأن فيه خدامة ببلاش": اللحين ماله داعي أنا وزوجي بس نقدر نشيل انفسنا وأصلا ما استخدمنا كل الغرف
بدور: معاك حق
كانوا البنات فرحانين بالقصر أخذتهم شوق جولة بالمكان وورتهم الحدايق والبيت الزجاجي الصغير شافوا المسبح وكل شيء بالقصر أما شجون فكانت بسابع نومة
استمتعوا كثير وعاشوا يوم من الف ليلة وليلة وخصوصا لما جات الكوفيرا وطلبت شجون أنها تبدأ بالبنات وبالأخير هي وشوق
قالت شجون للكوفيرا: أبيهم اليوم أحلى من القمر
بدور: شفتوا يا حليلهم والله يا حلو العز
بالمسا راحت بدور وخواتها مع شوق وصلهم رياض بناء على طلب من محمد بس شجون تأخرت عنهم لأنها تبي تغير فستانها دقت شوق ع فارس وقالت له عشان يأخذ شجون ع الملكة
لبست شجون فستان أسود مخملي طويل ضيق عليه خطوط بيضاء بفتحة لنص الفخذ بسيور عريضة عليها كرستالات بيضاء وقصة قلب من جهة الصدر وكاشف نص ظهرها وفاردة شعرها وحاطة كرستالات نجم ع شعرها وكثفت الميك اب عشان ما أحد يلاحظ أثار أصابع فارس ع وجهها كانت شجون تحاول تسكر سحاب الفستان ومقدرت وما انتبهت ع اللي واقف قدام باب غرفتها وعيونه تناظرها بقهر
وظلت تحاول وهي تسب فستانها قرب منها تسمرت مكانها لما شافته ونزلت عيونها بقهر مسك السحاب وسكره لها لمس ظهرها جفلت وهي تئن حس أنه المها وشاف رضوض وكدمات ع ظهرها من كثر ما رماها ع الأرض قال بقهر: أنا اللي سويت فيكي كل ذا كيف بتروحين للحفلة بذا الفستان
شجون بقهر: عادي أصلا الجو بارد بلبس ذا
شاف بيدها معطف صغير فرو قصير حد الصدر لونه أبيض لبسته لمت أغراضها بشنطتها أخذت جوالها ونزلت من غير ما تناظره كان يدري أنها ما رح تسامحه بس لازم يتكلم معاها" أول ما نرجع ع البيت لزوم اتكلم معاها ذا لو رضت ترجع معاي"
نزل وراها وقلبه مليان قهر وصلها بسكات للملكة فتحت باب السيارة جات تنزل مسكها فلتت يدها منه: شجون بترجعين معاي البيت أو لا
شجون بضيق وبصوت عالي: لا أكيد ما برجع معاك تصبح ع خير
فارس تنهد" وأنت بخير يا شجون انفاسي": وأنتي بخير
@@@@@
الكل كان مبسوط وفرحان شجون عرفت بدور وخواتها ع كل بنات عمها جلسوا مع بعض وأصوات الضحك واصلة للسما مر كل شيء ع خير إلا ع شجون كالعادة مقدرت تتحمل أصوات الموسيقا العالية
قامت من مكانها وبعدت عن الناس وهي تبكي بألم ألم راسها اللي كان يرقع طبول وألم من نوع ثاني خلاها تحس شنو معني أنك تعيش لحالك دقت ع واحد من أخوانها وعيونها تدمع
ألووو إياد تكفى تعال ودني البيت تعبانة حيل
وش فيك طيب وينك فيه اللحين
أنا جنب المسبح
زياد بخوف: وش اللي وداك هناك
شجون: ما لقيت مكان هادئ أكلمك فيه غير هنا ألحق علي مقدر اتحمل راسي بينفجر
زياد: شجون بعدي عن المسبح أو أجلسي بمكانك لا تظلين واقفة قرب المسبح جيبي عباتك وأغراضك جاي لك بس تكفين بعدي عن المسبح الله يخليكي
زياد ميت رعب خايف شجون تطيح بالمسبح قبل لا يلحق عليها
شجون: طيب لا تتأخر الله يخليك
قام مفزوع وراح بسرعة سأله جواد: وين رايح
زياد: شجون تعبانة دقت علي
جواد: وليش ما دقت ع فارس
زياد: مدري عنها بس واضح أنها تعبانه وخربطت الأرقام حتى أنا تقولي إياد بلحق عليها بسرعة بوصلها وارجع لكم
رح لشجون بسرعة كانت تتألم وتعض ع أصابعها شافته راحت له ورمت حالها بصدره وهي تبكي: إياد تكفى ودني البيت مقدر اتحمل
زياد" بس لو تبعدين عني ...وش فيك خبل أنت أختك تعبانة":تعالى تسندي علي تقدرين تمشين
شجون: بقدر
شالها بين يده وركبها السيارة وهي تبكي وتعض أصابعها رق قلبه لحالها وقام يلعن زوج أمها اللي خلاها تتألم طول حياتها ودمعت عيونه: لهالدرجة تتألمين يا شجون الله يجازي اللي كان السبب ونيمها بحضنه ووصلها ع بيتها عطته المفتاح فتح الباب وشالها دلته ع الغرفة وحطها بغرفتها: متاكدة أنك تصيرين زينة
شجون: أي روح أرجع لخالك اللحين يزعل بس تكفى إياد لا تعلم أحد
زياد ابتسم: للحين ما عرفتي تطلعين الفروق العشرة بين إياد وزياد
شجون بتعب رفعت غرته وما شافت الندب: أنت زياد مو إياد
زياد باسها بجبينها: شاطرة يا بعد عمري نامي اللحين وارتاحي
نامت وغطاها باللحاف رجع للحفلة وقلبه مو مرتاح أنه تركها لحالها
@@@@@
رجعت ريناد من الحفلة وهي حدها مبسوطة بدلت لبسها ونزلت شافت أخوها جالس ع الكنبة براحة وحاط أيديه ورا راسه ويبتسم لحاله عجبها الوضع جات وجلست مثله وهي تبتسم ناظروا بعضهم وراحوا في نوبة ضحك مسكها ونيمها بحضنه ومرر يده ع شعرها وكل واحد منهم شارد بتفكيره
ريناد تذكرت وش صار بالحفلة وشلون سوت لما سمعت ذيك الحرمة تتكلم عنها تبي تخطبها لولدها رجعت ابتسمت وتذكرت لما راحت لفواز دورت عليه ولقته بالأخير جالس يدخن
فواز: شلون عرفتي أني لحالي اللحين
ريناد: كذا خمنت أنك أكيد تدور عن مكان هادئ تدخن فيه
فواز: برافو يا قلبي أنا أحب زوجتي تفهمها قبل لا تطير
ريناد بخجل: زوجتك احلم
فواز: تبين أخطبك اللحين ترى خالك رفيقي وش قلتي
ريناد: لا تبيه يذبحني بعدين أنا ما أحب زوجي يدخن أنا بروح
فواز: وليش جايه إذا بتروحين خلك شوي يا عصفوري مسألة التدخين سهلة أنتي وشطارتك
ريناد: أخاف احد يشوفني معاك
فواز:بس شوي خليني اشبع منك قبل لا يحس علي خالك الممل كل ما أتكلم عنك يمد يده علي مو كني رفيقه
ريناد بضحك: عشان تعرف أن لي أهل لو زعلتني بيوم يقطعوك
فواز: يا حليلي والله بس بسألك فيه زوجة مثلك كذا حلوة وتذبح تقابل زوجها بعباية ومتلثمة بعد
ريناد: عن الغلط أقول وكفاية عليك كذا
فواز: أشوف وجهك بس تكفين نزلي طرحتك بس شوي ما أكل حلوين أنا
ريناد كشفت وجهها ع السريع فواز: اخ يا قلبي شفت عصفوك الأصفر وش يسوي فيك
ريناد بخجل: استح عاد ترى أعلم
فواز:احلفي عاد وش رايك ننادي خالك... ضحك بس شافها خافت: يلا روحي وأياك أحد يشوفك غيري ... جوالك معاك
ريناد: أي معاي ليش تسأل
فواز بلعانة: لا شيء بس ممكن أشوفه أبي اشتري لأختي مثله
ريناد صدقته ومدت له جوالها اخذه وع السريع كتب رقمه وحفظه ودق عليه
ريناد تشاهق: وش سويت
فواز: أبي رقم عصفوري ينور جوالي خذي بس صبري علي شوي وإنشالله عن قريب تلاقين أمي وخواتي عندكم بالبيت
ريناد سحبت جوالها منه وجات تروح مسكها ولفها له
ريناد: فواز تكفي تري ما يصير كذا
سحبها لعنده وقربها منه حيل خافت منه: فواز ارجوك
فواز قرب من إذنها: بس أبي أقولك أحبك
ريناد خفق قلبها للكلمة ذابت وحمر وجهها تركها فواز وقال لها: خلاص روحي انا بعد أخاف عليك
فتحت عيونها وناظرت أخوها وهو بعده مبتسم وقالت له: وش فيك شارد كذا وكله تبتسم
عبد العزيز: وأنت أيش دخلك وعن اللقافة قطعتي علي سعادتي وسدتي نفسي الله يسد نفسك
ريناد تلمس خده بيدها: عبودي الله يخليك ليه مبتسم كذا
عبد العزيز: ما رح أقولك موتي قهرا وبعدين بذمتك وجهك ذا يستاهل أني أخبره شيء أأأأأخ يا ربي وش هالقرادة اللي لازقة فيني
ريناد قامت عنه وتخصرت: أنا قرادة يا الشمبانزي
عبد العزيز:وش تقولين يا قليلة الأدب لا تنسين أني أخوكي الكبير يلا نامي برجلي وأنت ساكتة شوفي في شنو كنتي سرحانه واتركني لحالي الله يسد نفسك
رجعت حطت راسها ع رجله وسرحت بافكارها وابتسمت شافت عبد العزيز يناظرها مرة ثانية بابتسامة وراحوا في نوبة ضحك من جديد
قال لها: خلينا نروح ننام لو تمينا ع هالحال يطلع علينا الصبح وأنا وراي دوام يلا يالغالية تصبحين ع خير بس تعالى هنا أنا وتدرين كل شيء عني وتدرين في شنو انا سرحان بس أنتي أيش فيك حلاك زايد وكله توزعين ابتسامات
قامت باسته وراحت: لعانة فيك ما بقولك وتصبح ع خير يا أحلى سنفور كبير بالدنيا
@@@@@

رد: رواية/ شجون روحي شجون أنفاسي

فارس دق ع شوق وخبرته أن شجون راحت ع البيت مع واحد من أخوانها حس بقهر كبير وألم بقلبه" مكتوب عليك حرقة القلب طول عمرك يا فارس" راح ع البيت وهو ماله نفس يدخله وشجون مو فيه راح ع غرفته حاول يفتح الباب بس كان مسكر ظن أنه سكره ونسى مفتاحه بمكان راح لغرفة شجون دخل وشافها فاضية شاف أغراضها بمكانها وبكرات الصوف مبعثرة بالغرفة ابتسم راح ع الحمام ومن الحمام دخل غرفته لأن الحمام كان مشترك بين غرفته وغرفة شجون بس هي ما كانت تدري شعل النور وانصدم لما شافها نايمة بسريره بفستانها ما درى وش يسوي من فرحته يعني ما راحت لبيت أبوها
قرب منها كان يبي يلمسها بس تركها دق قلبه لشكلها وظل يناظر فيها وهو ساكت فجاءة حست عليه وقامت مفزوعة: أنت وش تسوي عندك
فارس ببرود وهو رافع حاجبه: ولا شيء بس كنت اعتقد أن هذي غرفتي
شجون: قصدك كانت غرفتك
فارس انصدم عرف أنها بتم بهالغرفة " وأنا وين أروح" بس طاح عن قلبه هم أنها يمكن تتركه :... شجون ممكن نتكلم
شجون: لا عن شنو تبي تتكلم في شيء لسه ما سويته فيني شنو ناقص بعد عشان تبي تكمله
فارس: شجون أرجوك
شجون: أرجوك أنت خلاص انا تعبت مليت شبعت إهانات وضرب وذل شبعت من تجريحك لي
فارس: بس عطيني فرصة
شجون: تبي فرصة اللحين تبي أعطيك فرصة ليه ما عطيتني فرصة وأنا اتوسل لك ليه ما تركتني أدافع عن حالي واشرح لك وأنت تطقني وتجرحني بكلامك كم مرة ترجيتك وأنت ما تسمعني خليتني خدامة ببيتك وأنا زوجتك صغرتني قدام كل الناس صرت أخاف اروح لأي مكان عشان بس ما أسمع الكلام اللي يقولونه عني وكله بسبتك أنت حتى دراستي مقدرت أركز فيها والسبة أنت
فارس: بس شجون...
تقاطعه: ليه تبي مني اسكت اللحين بعد شنو أنا تحملتك وايد وصبرت عليك وكل ذا عشانك أنت عشان ما تزيد جروحك والامك عشان شوق طلبت مني من أول ما ملكنا أني اتحملك لأنك تعذبت بحياتك حسيت فيك لأني أنا بعد مجروحة مثلك سويت كل شيء يرضيك تحملت عذابك وإهاناتك كنت تضربني وأكل تبن وانطم وأقول معليه بس أنت وش سويت عشاني ولا شيء لا تقول أنك تغيرت عشاني لا يا فارس أنت ما تغيرت عشاني أنت تغيرت لأنك تبي ... تبي تنتقم من إنسانة خانتك فيني لأنك تبي تربيني لأن أنا لقيطة ما عندي أهل لو كنت أنا بنت خالك صدق كنت سويت فيني اللي سويته لو كانت أمك عمتي صدق وأنا بنت أخوها اتهمتني تهمة مثل ذي أكيد لا لا يا فارس لا
فارس يصارخ: تكفين بس اسكتي
شجون وهي تبكي:لا ما بسكت لأن ذي الحقيقة أنا ما لي وجود بحياتك أصلا وجودي مرتبط بمزاجك تضربني وتهينني متى ما بغيت ومتى ما بغيت تاكل وتلاقي ملابسك نظيفة ومرتبة كنت موجودة خدامة وببلاش بعد ولما تبي تحفة حلوة تتباهي فيها قدام الناس تزيني عشان الكل يشاهق بس يشوفني أما الحقيقة ما لي ولا شبر واحد بحياتك
فارس بصراخ: وأنا لي شبر بحياتك لا أنت بعمرك ما تركتي لي مساحة صغيرة بحياتك ولا بقلبك ولا مرة سمحتي لي ادخل عالمك كل الناس قريبة منك إلا أنا شوق أروى أخوانك أبرار اللي كل أسرارك معاها سعود محمد اللي ما يصيرون لك قلتي أنهم خوالك وصار لهم وجود بحياتك حتى مجود الصغير قريب منك وبينكم أسرار حتى لو كانت تافهة ورياض اللي لجتئي له لما طحتي بمشكلة والمفروض تعلميني أنا أنا زوجك عن هذا الحقير اللي كان يدق علييكي ويزعجك رفيقاتك كل الناس إلا أنا ويني من هالزحمة مالي مكان أنا الوحيد الي ما لي وجود لها لدرجة أنا بعيد عنك ليه
شجون ودموعها تحفر خدها: أعلمك عن شنو ألجأ لك أنت... ليه ..أنت متى صدقت كلامي عشان أخبرك أن في أحد يضايقني ويدق علي أنا بنضرك وحده وسخة تعرف شباب وتطلع معاهم وأنت الملاك اللي بعمرك ما غلطت أنت عالمك نورا وبس نورا اللي حتى باحلامك ما تفارقك خلك مع أطلالها واتركني لحالي أصلا اللي مثلك يستاهل وحده مثلها لأنها هي اللي قدرت تأدبك وتجيب راسك
فارس فار دمه من كلامها وما حس إلا ويده تصفق خدها بقوة وندم ع اللي سواه لما شاف لمعة عيون رمادية تناظر فيه وكلها دموع وقهر
فارس: شجون...
شجون: طلقني
فارس: أنت شنو تقولين
شجون تصارخ: طلقني ما أبيك أنا أكرهك أكرهك طلقني خلاص مهمتك أنتهت مشكور وما قصرت وهذا أنت ربيتني مثل ما قلت وتأكدت أني ... ناظرته بحرقة وقامت تصارخ: أكرهك يا فارس أكرهك الله يأخذك طلقني
جات تروح بس تألمت حيل لما قامت بسرعة وطاحت ع الأرض وهي ماسكة ظهرها
نزل فارس لمستواها: شجون وش فيك أنت بخير
شجون: بعد عني
شالها وسطحها ع السرير غاب دقايق ورجع قامت بتروح بس مسكها بقوة نيمها ع بطنها فتح سحاب فستانها وحط مرهم بيده ورح يدلك ظهرها وسوى لها مساج كانت هي تبكي بصمت وعيونها الرمادية تدمع بس دموعها كانت ولا شيء قدام دموع فارس والندم ياكل قلبه وصوتها وهي تقول له أكرهك كان سوط يجلد جسده ويقطع قلبه
@@@@@
واو ما بصدق أحس أني بحلم كاني بكرتون سندريلا وناسة
بدور: يلا يا سندريلا ترى صارت الساعة 12 رجعي مثل ما كنتي خلصت الحفلة والأمير ما خذاك
سارة: أوووووف منك كله تنكدين خلينا بعدنا نحلم
المها: أنا بنام بهالفستان ولا رح أمسح الماكياج من وجهي عشان أتاكد أني كنت بقصر السلطان ولا كنت أحلم
بدور:هههههههههه بلا هبال
المها: بس تعالى أكيد هالفساتين ذي صارت لنا مو
بدور: واي عن الطمع أحس أنا قاعدين عالة ع الناس
سارة: أكيد لنا ترى ما برده يظل عندي حتى لو طلب محمد نرجعه
المها: بس شجون كنها بدر مشاء الله عليها والله محظوظ اللي خذاها
بدور: أي صدقتي بس كل خواتها وبنات عمها مثلها حبوبات ومتواضعات أنا كنت خايفة يتمسخرون علينا أو يحقرونا بالحفلة بس صار العكس والله تفاجأت
سارة: الحمد لله عاملونا مثل ما نكون أقاربهم حتى الأمهات لما عرفوا أننا ربع بناتهم كله يا بنتي ويا بنتي أعمامنا ما سووا لنا اللي سووه
بدور: الحمد لله يمكن الوضع ذا نهاية صبرنا وأكيد ربك يفرجها علينا من أوسع أبوابها بس ولا مرة تخيلت أننا حلوات كذا لولا بس هالكعب العالي كان قلت أنا بنات عز من زمان
سارة: هههههههه ذكرتيني وحنا نتمايل بالكعب مدري شلون يستحملونه لا ويرقصون وعادي عندهم
المها: متعودين ولا همهم لولا ذيك بنت عم شجون اللي اسمها حنان قالت لنا نخلعه كان صرنا مسخرة بالحفلة الحمدلله أن فساتينا طويلة
بدور: تصدقون هالبنات أفكارهم شيطانية كذا واخذين الحياة ببساطة ولاهمهم يا حليلهم والله
المها: بس عروسة محمد قمر يستاهل وحده مثلها كل ما أتذكر الصدفة اللي جمعتنا بمحمد أقول الحمد لله وإنشالله ربي يعطيه كل ما يتمنى ولا يحرمه من شيء
سارة: إنشالله ويعطينا نحنا بعد رجاجيل مثل محمد
بدور والمها: إنشالله
@@@@@
" يا ترى أحمد النذل يرضى يطلقني إلا غصب عنه مو بكيفه" تسطحت بسريرها غمضت عيونها وتذكرت عبد العزيز
بالحفلة عبد العزيز راح يم المطبخ وطلب من وحده من الخدمات تنادي أبرار وتقول لها جواد يبغاها
طلعت أبرار من غير غطا وراحت وين ما دلتها الخدامة وقفت تناظر شوي وما شافت أحد دورت يمين شمال مافي أحد
أبرار: أكيد ذي غلطانة والتفتت عشان تروح تفاجأت بعبد العزيز قدامها وشهقت
عبد العزيز: لا مو غلطانة
أبرار: يعني أنت مو جواد
عبد العزيز: أي أنا بنت عمي وأبغى أشوفها وين المشكلة
أبرار: استح عاد لو كنت أدرى...
قاطعها: كنتي تغطيتي أو ما جيتي المرة الجاية عيوني ذي درس عشان تحرمين تطلعين كذا حتى لو أخوك كلمك
أبرار حمر وجهها وعبد العزيز كان يناظرها من فوق لتحت وهو يحفر شكلها داخل قلبه كانت أبرار لابسه فستان أحمر ناري بفصوص ذهبية ماسك من الصدر وعاري طويل وضيق بفتحة توصل لنص الفخذ ورافعة شعرها كله فوق بتسريحة وردات صغيرة وميك اب سموكي كثيف وكان شكلها تحفة
أبرار: عيب عبد العزيز لا تطالعني كذا
عبد العزيز: أموت ع اللي يستحون أأأأأخ يا قلبي
أبرار: أنا بعدني متزوجة ما يصير كذا وجات تروح مسكها وحوط خصرها وهو يشم ريحتها
أبرار: عبد العزيز أرجوك يمكن يمر أي أحد اللحين
قرب منها حيل وجذبها ناحيته وباس شفاتها وهي تشاهق وتركها بعد دقايق: اسف ما قدرت أنتظر لما نتزوج بس وعد أول ما تخلصين عدتك رح أملك عليك ع طول وأعوضك عن كل اللي راح من عمرك ياعمر عبد العزيز
وتركها وظلت تناظر فيه لما اختفى وكلامه يرن بأذنها مثل الطبل
ابتسمت وتحسست شفتها مكان بوسته ضحكت" صدق ما يستحي هالقليل الأدب" بدلت ملابسها ونامت للصبح وهي بعدها مبتسمة
@@@@@
دق جوالها ردت ع طول لأن بعدها ما نامت وابتسمت لما شافت المتصل
هلا بقلبي
محمد: فديت هالصوت وصاحبته شلونك
شذى: بخير بعدني ما نمت بس أنت للحين ما نمت
محمد: لا ما نمت تصدقين أني اشتقت لك
شذى بدلع: لا ترواغ من شوي كنت معاي متى لحقت تشتاق لي
محمد: لا جد اشتقت لك أنت ما اشتقتي لي
شذى بخجل: بس تبي تسحب مني كلام
محمد: اللحين من حقي أكلمك بأي وقت أنتي زوجتي شنو رايك بالهدية عجبتك
شذى: تصدق للحين ما فتحتها أخاف أني بحلم
محمد: لا ما تحلمين أنتي لي من أول يوم شفتك فيه ومستحيل كنت أتركك لأحد غيري
شذى: أي قص علي يوم تشوف ذيك البنت تنساني وتحقرني
محمد: بس بغيت أربيك ولا ذي بعد مو حقي أنا يا شذى ما أبيك تعارين خلق الله مو ذبنهم أنهم فقارى وأنت تدرين ترى دوام الحال من المحال
شذى: أدري والله مو ذنبي يمكن أنا سكت ولا تكلمت والله مالي خص باللي صار بس ما قلت من وين عرفتهم ذول تصدق أمس بالحفلة ما شاء الله عليهم شكلهم جنان
محمد: يجي يوم وبحكي لك عنهم بس ليصير ذاك الوقت أبيك تقدريهم وتعاملينهم بطيب وحنية اعتبريهم يصيرون لي يعني لازم تحترميهم
شذى: من عيوني يا بعد عمري
محمد: تسلم لي عيونك يلا أخليك اللحين أكيد بتنامين
شذى: لا خلك شوي
محمد: تسهرين معاي؟
شذى: بسهر
محمد: للفجر؟
شذى: لأخر العمر
محمد: أحبك
@@@@@

رد: رواية/ شجون روحي شجون أنفاسي

ووواووو من جد روووعه كملي مررره متحمسه
يعطيك العافيه وربي يسعدك..

رد: رواية/ شجون روحي شجون أنفاسي

أعذروني أمبارح مقدرت أكمل تنزيل البارت لأن الكهرباء قطعت وبس تقطع الكهرباء تقطع معاها تغطية الإنترنت والجولات (مالت)
اللحين بأكمل تنزيل البارت الخامس عشر

رد: رواية/ شجون روحي شجون أنفاسي

بعد ما رجع جواد وأخوانه صار فهد يستبهل كالعادة والباقين يضحكون عليه
فهد: واي يمه لحقي علي لحقي
ام جواد: وش فيك بسم الله ع ولدي
فهد: بخريني أنا ما رح أطلع مرة ثانية إلا ومعاي شيء أزرق كانت بتصير مجزرة مذبحة كبيرة
نادر:هههههه تعال أقرأ عليك بسم الله ع أخوي
أم جواد: وش سالفته الخبل ذا
فهد: البنات يمه شافوني بالثوب والعقال استخفوا وقاموا يتضاربون عشاني وكل وحدة تقول حقي أنا وهذا لي
حنان: من زين كشتك اللحين
فهد: تدرين اليوم اللي بتزوج فيه بيسجل أعلى نسبة وفيات بالعالم ترى كل بنات الديرة ينتحرون عشاني وأنا مقدر أخذهم كلهم ترى الشرع محلل لي أربع بس مو خمس ست سبع ملايين لا لا مقدر
جواد: طالع هذا اللحين فهيد صار يفهم بالشرع لا ويقول مواعظ بعد بركات يا شيخ فهد
الكل هههههههههههههههه
فهد: شفتي يمه الحسد ترى عيالك غيرانين عشان أنا الوحيد المزيون فيهم يوم أمشي معاهم أصك عليهم كلهم واحد واحد
جنا: واي بروح انتحر وايد أحسن لي إذا أنت طلعت أحلى مننا كلنا ارمي حالي من البلكونة
الكل:ههههههههههه
فهد يقلدهم: هيهيهيهي دمك خفيف مرة يلا انقلعي ما ناقص غير البزر
جواد مسك جنا من شعرها: تعالى هنا نسيتك
جنا: يمه قولي له
أم جواد: هد أختك يا الخبل
جواد: اللحين أقولك روحي صعدي مع نادر أو فهد تعاندين وتركبين معاي منو فكرتي حالك أنتي
جنا: سيارة أخوي وبركبها بكيفي أبرار وش فيها زود عني تنزلني أنا وتركبها هي
نادر: لا السالفة فيها أبرار بصراحة جنا أنتي الغلطانة تحملي ما يجيك
حنان: على نفسها جنت جنا
هههههههههه
جواد وبعده ماسكها وخرب لها تسريحة شعرها: لو سويتها مرة ثانية...
ام جواد: هد بنتي وخر عنها الله يعين زوجتك عليك وش رح تسوي فيها والله مدري
جواد: بس خليني أملك عليها وما رح أترك شعره براسها انتفه كله
حنان: الحمدلله ماني زوجتك تصبحون ع خير
جواد: إلا أبرار وينها
نادر: من زمان بغرفتها احنا وصلنا قبلكم بربع ساعة
جواد: بروح أشوفها ليكون تعبانة مو من عادتها تنام قبل لا تشوفني
راح جواد فوق لأبرار دق باب غرفتها ما ردت فتح الباب بشويش شافها نايمة بعمق وبسمتها ما فارقت وجهها قرب منها ومرر يده بشعرها" كلها كم يوم وأملك وبعدين أفضى لموضوعك وبريحك من هالنذل للأبد أأأأخ ليتك سمعت كلامي يبه"
@@@@@
صحت الصبح وهي ناوية تروح بيت أبوها دورت ع فارس وما لقته ظنت أنه طلع دقت عليه سمعت صوت جواله بالغرفة:لا وناسي جواله بعد شافت جواله مرمي ع السرير مسكته ودق قلبها لما عرفت أنه مخصص لها نغمة خاصة فيها وحاط صورتها رجعت دقت عليه وهي تسمع أغنية ماجد المهندس ناديت وينك وقالت بصوت عالي: من متى يا فارس وأنت تنادي علي
فارس كان بغرفة الملابس سمعها لما تكلمت وقال بينه وبين حاله" من لما ملكت عليك" ظلت شجون تدق ع جوال فارس وتسمع النغمة الخاصة فيها وترجع تدق
فارس" هذي وبعدين معاها والله أنها طفلة" طلع من غرفة الملابس وشافها قرب منها: جوالي لو سمحتي أبغى اطلع
رمته ع السرير بمكانه وين ما لقته ولفت: بروح بيت أبوي السايق يوديني فطورك جاهز إذا تبي تفطر
فارس بقهر: ما أبي فطور عليك بالعافية متى بتروحين
شجون: أنا رايحة اللحين
فارس: شجون...
شجون: مع السلامة
راحت شجون بيت أبوها كان يناظرها من فوق لما اختفت عن عيونه" لمتى تظل ع هالحال كل ما طلعت أو راحت بيت أبوها تخاف أنها ما ترجع لك" اخذ مفاتيحه وجواله وراح لدوامه
@@@@@
عبد العزيز وين أبوي
اللحين ينزل تعالى جلسي خلينا نفطر قبل لا نروح الدوام
ريناد: عبد العزيز ترى أمي سمر تبيني اتصلت فيني وقالت لي أروح لها وأجيب معاي أغراضي عشان أبيت عندهم
عبد العزيز: طيب جهزي حالك ونطلع سوا أحطك عند أمي سمر وأروح دوامي
ريناد: بس أنت وأبوي تظلون لحالكم كذا من يجهز لكم الأكل ويهتم فيكم
عبد العزيز: ما عليك منا ندبر حالنا يلي تعالى نفطر نادي ع ابوي ترى نتاخر كذا
ريناد: إنشالله
وطلعت فوق تنادي أبوها وبعد ما فطروا نزلت أغراضها وركبت مع عبد العزيز راح أبوهم لشغله ووصلها عبد العزيز بيت عمها خالد
@@@@@
وصلت شجون ع البيت سلمت ع أمها وخواتها وراحت لغرفتها اشتاقت لها وايد وانسدحت ع سريرها شوي ونزلت مع سجا لما عرفت أن ريناد جات عندهم
ريناد: شلونك سجا وأنتي شجون
سجا: حنا بخير أنت كيفك
ريناد: أنا بخير بنام عندكم اليوم وباكر
شجون بفرحة: أنت بعد واو وناسة
ريناد: وين خالي أبي أسلم عليه
سجا:أكيد بالصالون مع أخواني
شجون: خلونا نروح لهم
دقت بدور ع محمد وباركت له عنها وعن خواتها سكر منها وهو منفقع من الضحك ولا قدر يسكت
دخلوا البنات: السلام عليكم
إياد وزياد: وعليكم
أسيل: وش فيه خالي
إياد: ما ندري عنه من دقت عليه وحدة اسمها بدور وهو حالته كذا
محمد: الله يقطع ابلسيها هالبدور والله قالت أحلى نكتة بحياتي ما سمعت مثلها وقام يضحك
الكل ناظر بعضه واستغربوا
أسيل: ضحكنا معاك ايش فيك تضحك لحالك
محمد وهو يضحك: تقول بدور أن شج ههههههه أن شجون وخواتها وبنات عمها حبوبات ومرة متواضعات هههههههه
إياد وزياد: شنو وانفجروا ضحك زياد:ذي أكيد غلطانة يمكن جلست بطاولة ثانية ما صدق
ههههههههههه
محمد وبعده يضحك: ما قلت لك أحلى نكتة
ريناد بزعل: وذا اللي خلاك تضحك كذا ليش مو ذي الحقيقة
إياد: حقيقةههههههههههه الأخت واخذة مقلب بحالها قال حقيقة قال
محمد: مسكينة بدور طيبة حيل وايد مغترة في هالبنات لا وتقول لي حنان بعد وريناد كلهم طيبات إلا ذول وين والطيبة وين الله يا الدنيا
شجون لفت وجات تروح وهي زعلانة: الشره مو عليكم الشره علي أنا اللي اشتقت لأمثالكم وجايه أشوفكم
ريناد: خلونا نطلع شنو اللي جابنا أصلا
دخلت سمر عليهم محمد فز وعدل جلسته: هلا يمه
ريناد: شلونك يمه سمر
أم إياد: بخير يا بنتي شجون قلتي لفارس انك تنامين هنا
شجون: ها أي أقصد لا أنا...
أم إياد بعصبية: كلمة وحدة أبي اسمعها استأذنتي أو لا
شجون بعدت خصلات شعرها عن وجهها وع طول: أي... لا لا ما قلت
أم إياد: دقي عليه قدامي واستأذني منه
شجون: يمه وش فيك أنا بنام ببيت أهلي ما نمت ببيت غرب عشان استأذن
أم زياد بصوت عالي: شجوووووووون أن ما دقتي اللحين واستأذتني ما لك جلسة ببيتي تلمين قشك وتذلفين بيتك سمعتي
شجون بخوف: طيب طيب كاني بدق
أم زياد: اللحين قدامي أشوف بعد هالعمر أنا ما عرف أربي بنات مثلكم ليش بعد ما دقيتي
دقت شجون بملل ع فارس شاف المتصل" وش فيها شجون ليش داقة" ورد عليها: شجون أيش فيك صار لك شيء
شجون وهي تناظر أمها بخوف ابتسمت: حبيبي
فارس:حبيبي أنت استخفيتي
شجون: أقول فروسي
فارس: وبعد فروسي أي فهمت يمك احد
شجون: أي ذي أمي سمر
فارس: وأنا أقول هالتغزل ليه اخلصي وش عندك
شجون بدلع: حبيبي تمانع لو نمت عند أهلي يومين بس يومين تكفى
فارس: بعد هالكلمة اللي قلتيها ولو أني أدري أنك ما تقصدينها نامي يومين بس يومين ثالث يوم أشوفك بالبيت
شجون: تسلم لي يا قلبي سلامات ها هذا أنت استأذنت ارتحتي
أم زياد: قدامي أنت وهي
البنات: إنشالله
محمد بعد ما راحت سمر والبنات: الله يستر ترى سمووور صاكة ع الأحمر أدرى أنها راح تقلبنا واحد واحد
زياد: الله يستر أقول خلونا نحترم أنفسنا لا تقلب علينا
@@@@@
أم أحمد: والله يا أحمد أن سويت اللي براسك بتشوف اللي بعمرك ما شفته
منيرة: هي بعدها زوجتك روح وجرها من شعرها وجيبها
أم أحمد: أنت ولا كلمة ليش تزيدين النار حطب
أحمد: عدل كلام منيرة ليكون ع بالهم أني خفت لا والله بحرق قلبهم وأخليهم يندمون ع اليوم اللي شافوني فيه
أم أحمد: ما رح أسامحك لا دنيا ولا أخرة ان سويت لبنت الناس شيء طلقها وخليها تروح لحال سبيلها
أحمد: ماني مطلق بجيبها هنا وأكسر خشمها أن ما خليتها تبوس جزمتي ما أكون أنا أحمد والله ما أخليك تتهني يا أبرار هين
منيرة: ذا الكلام دامها ع ذمتك جيبها وطقها لما تقول بس أنا لو منك أجيبها وأحبسها أصبحها بطراق وأمسيها بطراق
أحمد: عدل كلامك أنا بوريك يا أبرار ويناظر أخته:بس نطرني اليوم أو باكر أجيبها لك هنا وأبيك توريها نجوم القايلة
أم أحمد: حسبي الله عليكم من عيال حسبي الله ما رح أسامحكم أبد
أحمد: أنت خلك بعيد يمه ولا عاد تتدخلين بهالموضوع
ام أحمد: حرام عليك حط أختك مكانها عيب اللي تسويه بس ما أخليكم تنفذون اللي براسكم
منيرة: وش بتسوي يعني
أم أحمد: مو اللحين كل شيء بوقته حلو وبتشوفين أنت وهو
@@@@@

رد: رواية/ شجون روحي شجون أنفاسي

بعد يومين جهزت شجون حالها عشان ترد بيتها بس دق عليها خالها سعود يبيها جا لها وأخذها معاه للبحر
سعود: يبه شجون أنت لما رحتي لعند بدور وخواتها ما تعلمتي شيء من اللي عانوه بحياتهم ورغم كل شيء شوفيهم ينتظرون باكر وعندهم أمل أن ظروفهم تتحسن
شجون: بس انا يا خالي
سعود: اللي عانتيه يبه والله ما يجي نقطة ببحر هالدنيا ما أقول أن اللي عشتيه شيء بسيط أو سهل بس لو اوديك لإدارة السجون تسمعين هناك قصص تبكي الحجر أو تروحين للمشافي تشوفين الناس المريضة تبي حبة دوا وبأي ثمن كنتي تقولين الحمدلله ع كل شيء ترى لو شفتي مصايب الناس تهون عليك مصبيتك وتقولين انا بعدني بخير
أنتي إنسانة حساسة وبعدك صغيرة ع الشقا لا تخلين الحزن يسيطر عليك ويغرقك أنا لما أخذتك لعند بدور وخواتها أبيك تتعلمين من حياتهم درس أبيك تصارعين مثلهم أنت شفتيهم كيف يسبحون ضد التيار ويكافحون عشان بس يعيشون فهمتي يبه طالعي ذاك الرجال اللي قاعد ع الكرسي المتحرك والله مستعد يدفع كل شيء يملكه ويرجع يمشي من جديد الدموع مو لك يا بنتي فهمتي
شجون وعيونها تدمع: فهمت بس أنت تدري وضعي أنا يا خالي
سعود سكتها: شنو هو وضعك ما أحد ينكر أنك بنت خالد حتى أمك نفسها أنسى هالسالفة وشيلها من بالك ترى ما لها أساس من الصحة والكل يدري مفهوم
شجون تمسح دموعها: مفهوم
سعود: وشنو فهمتي اللحين
شجون بحركات أطفال:لا دموع بعد اليوم تا تا تا تم
سعود يضحك: وش تسوين يا خبلة
شجون: أسوي دعاية حق جونسون
سعود: هههههه أأأخ منك ما أقول الله يعينك يا فارس مع هالبزر
فارس من وراهم: عشان تعذرني بس والله أنها تموتني ناقص عمر
يلا مشينا
شجون ناظرت سعود ضمها له وقال لها:روحي لبيتك أنا قلت لفارس يلاقينا هنا ويأخذك ع بيتكم بس ها لا تنسي اللي قلناه اللحين
شجون: ما رح انسى شكرا خالي
سعود: يلا روحي تبردين اللحين ونبتلي فيكي
فارس بضحكة: سلام خال سعود
@@@@@
أم فارس: شوق ما قالت لك شجون ليش راحت بيت أهلها وإذا كانت بترد ولا
شوق: لا ما سألتها أكيد اشتاقت لأهلها راحت تزورهم وش فيها ذي بعد
أم فارس بعصبية: قومي اللحين اتصلي فيها وشوفيها إذا بترجع أو ماهي برادة
شوق باستغراب: بس أفهم ليه ما ترد صار شيء أنا ما أعرفه
أم فارس: كلمة قلتها وما بعيدها تقومين اللحين وتتصلين فيها ولا بتشوفين وش أسوي فيكي
شوق: طيب طيب بروح
السلام عليكم
وعليكم
شوق: شلونك يبه
ابو فارس:بخير يبه ع وين
شوق: ذي ليلى الله يهداها مدري وش فيها كله معصبة وتصارخ
ام فارس: روحي وسوي اللي قلت لك عليه بسرعة
راحت شوق وظلت أم فارس مع زوجها وكانت مهمومة وخايفة
أبو فارس: أنت وش فيك هالأيام وايد متغيرة
أم فارس: هالبنت مصيبة وطاحت فوق راسي ولدي قام يهددني بسبتها يقول إذا تركته يسافر لأمريكا ولا رح يرجع
ابو فارس: تستاهلين كم مرة أقولك تركيهم ولا عاد تتدخلين بينهم اتركي الرجال وزوجته ما تطيعيني
أم فارس شوي وتبكي: وأنا وش دراني أنها
أبو فارس: مالك شغل فيهم ولدك مو مرتاح معاها مقصرة معاه بشيء
أم فارس: الشهادة مرة مريحة ولدي ولا مرة قصرت معاه كله قايمة فيه ومهتمة
أبو فارس: أجل ليش تبين تخربين بينهم عشان بس أوهام بعقلك المريض
أم فارس: أنا ما كنت أبيه ياخذ وحده...
أبو فارس: سمعي يا ليلى وكلام يوصلك ويتعداك أنا خسرت ولدي مرة وما عندي استعداد أخسره مرة ثانية والله أن ضاع مني ولدي بسبتك ما لك قعدة ببيتي زين
أم فارس: بعد هالعمر يا سعد تقول هالكلام لهالدرجة مالي خاطر عندك
أبو فارس: ذا اللي عندي يا حرمة خافي الله في البنية حتى لو ما كانت بنت أخوك مو ذنبها أنها جات نتيجة لغلطة أمها ودام ولدك يبيها ومرتاح معاها ما لك شغل فيها تكون بنت من تكون ترى عيب اللي تسوينه اللحين لو خبرت أبوها أو جدها باللي تسوينه فيها وش بتسوين حزتها لكن لأنها بنت خلوقة ومتربية وما يطلع منها العيبة ساكتة وصابرة عليك كافي حرام اللي تسوينه تركيها لحالها
سكتت أم فارس وهي بعدها خايفة أن شجون ما ترجع وفارس ينفذ تهديده
@@@@@
قبل يوم من ملكة جواد وسجا دقت شوق ع شجون وقالت لها أن فساتينهم وصلوا وطلبت منها تجي عشان يجربون ملابسهم وتشوفها
راحت لها شجون رغم أنها ما كانت تبي تشوف عمتها ما تبي تتصادم معاها من بعد اللي صار وشافت أروى بعد هناك انبسطت لأنها رح تشوف نجد وسألتها أروى: أيش اللي صار دامك مو حامل والله ما كنا نقصد بس فرحنا أنا وشوق لما ظنينا أنك حامل
شجون: أدري مو ذنبكم بس أنا لما رحت لبيت بدور أكلت سبانخ وخليط من السلطات وخلطة وانا معدتي ما تتحمل هالأعشاب قمت استفرغت بس ذي كل السالفة بس عمتي ... خلاص اللي صار صار
شوق: والله ما كنت أدري أن العلاقة بينك وبين فارس سيئة لهالدرجة بس والله ... وما كملت كلامها إلا تشوف نجلاء وأمها: ذول وش جابهم
سلموا وجلسوا شجون ما كانت تبي تناظرهم بس سكتت لما شافت عمتها جات وجلست
نجلاء بحقد: شلونك شجون وشلون الحمل
شجون: دامني ما أشوفك ولا أسمع صوتك أنا بخير
أم سامر: ليكون تنسين ع بنتي الله يهداك
شجون بسخرية: ليه من قلة الأشياء اللي اتنسى عليها
شوق وأورى:ههههههههههههه
استحت أم سامر وحست حالها تفشلت أم فارس ناظرت شجون بحدة: لا تؤاخذينها تراها تمزح معاكم
نجلاء: ما قلتي لنا بأي شهر أنتي أحس بدأ يطلع لك كرش
أروى وشوق:ههههههه
شجون تمط كلامها: بالعاشر ما بقى شيء وأولد
ههههههههههه
نجلاء حمر وجهها من الإحراج والفشيلة
أم فارس تتوعدها بعيونها
شوق: قومي شجون تعالى فوق نجرب ملابسنا ترى الفستان اللي اختاره لك فارس مرة خطير أكيد تحيبنه
أروى: دامه من فارس أكيد يعجبها ولو كان خيشة
نجلاء تناظر وهي مقهورة وميتة من الإحراج من نغزات شجون وطلعت شجون مع شوق وراحوا يجربون ملابسهم
بعد ساعة طلعت أم فارس تشوفهم ليش تأخروا فتحت الباب وهي تشوف شجون منسدحة بالسرير وشوق تعصرها بظهرها وهي تصرخ
أم فارس: شنو تسوين أنتي وهي وش ها المياعة
شوق بعدت عن شجون والأخيرة عدلت جلستها
شوق: شجون مستحية من الفستان وتقول ما تبي أحد يشوف هالوحمة اللي بظهرها تبي شيء يغطيها
قربت أم فارس: بعدي وريني وش فيك أنت الثانية
نامت شجون ع بطنها ورفعت فستانها عشان عمتها تشوف الوحمة اللي كانت بأسفل ظهرها وأول ما شافتها شهقت بصوت عالي
قالت شجون: شفتي قلت لك مقدر ألبسه عاري مرة والوحمة ذي تفشلني
شوق: بس الفستان مرة حلو عليكي إذا كان على ذي نغطيها بشوية مساحيق
أم فارس وبعدها مصدومة: الفستان ذا لايق عليكي ألبسيه وعن قلة الأدب الزائدة أنتي وهي صدق ما تستحون
@@@@@
عند الشباب
اللحين لو نطرت شوي كنا سوينا ملكتنا مع بعض يعني بس أسبوع ما ذاك الفرق بس أنت خايف أصك عليك
محمد: منو ذا اللي يصك علي ليكون انت بس ... صعب يا جواد يعني الناس كذا تنقسم ع اثنين وبعدين لا تنسى أن مساعد ال... بعد لهم ربعهم اللي لازم يعزمونهم والله تصير زحمة وش رايك نتزوج نفس اليوم
جواد: وذي بعد ما رح تضبظ لأن أنا بنطر سجا لما تخلص ثانوية وأنت بعد كم أسبوع رح تتزوج
زياد نادى ع جواد راح له وع طول جا نادر وجلس يم محمد
نادر: محمد ترى أحنا للحين ما ساعدنا الحلا بشيء الفلوس مو حل لمشكلتهم
محمد: أدري بس أيدي متكتفة أبي حل جذري لمشكلتهم يشيلها من عرقها
نادر: وش رايك نجيب لهم خدامة ع الأقل البنات ينتبهون ع دراستهم أكثر
محمد: وش قاعد تقول ذا بيت ينحط فيه خدامة أحس ان بيوم يطيح عليهم
نادر يضحك: صدقت طيب وش رايك ندور لهم ع بيت يكون مناسب لهم ونستأجره
محمد: جبتها والله ذي حل مؤقت ومناسب ليه ما فكرت بهالشيء قبل بس بعد مو حل أنا أفكر أزوجهم وكذا يرتاح بالي
نادر: تزوجهم شلون ومن منو ما تقول لي رح تعرضهم بمزاد وتدلل عليهم
محمد يغمز له: وحدة منهم أنا شبه مطمن عليها وأدري أن السنارة غمزت ها والثانية و بعد أحس انها بالطريق بس ذي فيها الشك
نادر: والثالثة
محمد: الثالثة ذي ... والتفت لفارس وقال له بخبث: وش رايك بزوجة ثانية يا فارس
فارس انصدم ووفتح عيونه ع وسعها
الكل:هههههههههههه
إياد: ليه تبي تزيد همومه خله بمصيبة واحدة ترى مو ناقص
فهد: أنا أبي زوجة بس ها يا محمد أبيها هادية كذا وتسمع الكلام مثل زوجها فارس
إياد ناظر زياد وهمس: منو ذي اللي تسمع الكلام ليكون قصده شجون وقاموا يضحكون فارس ومحمد فهموا عليهم وراحوا معاهم في نوبة ضحك سكت محمد يوم شاف نواف وقال" الثالثة بعد لقيت لها اللي يناسبها لو صار اللي ببالي أكون حليت المشكلة من أساسها يا رب توفقني بس"
@@@@@
بالملكة لبست شجون الفستان اللي جابه لها فارس وكان من قطعتين باللون الأزرق الملكي القطعة اللي فوق كانت كاشفة مبرزة أعلى صدرها وبطنها ع هيئة مثلث من تحت سيور بكريستالات بيضا والقطعة الثانية عبارة عن تنورة تبدأ بأسفل ظهرها ماسكة من فوق ومنفوخة من تحت بطقبات وذيل ومطرزة برسومات بيضا ورافعة شعرها شينون بميك اب سميك وكثيف ناظرت شكلها بالمرايا والتفتت تطالع الوحمة وهي مفتشلة منها" والله عاري كثير هالفستان" لبست طقم ألماس تعطرت وأخذت شنطتها وجوالها ونزلت
كانت سجا طالعة مثل الملاك جلسوا البنات ورقصوا لها وزفوها وجات بدور وخواتها بعد وانبسطوا مع البنات
بعدت شجون عن مكان الحفلة لأن راسها كالعادة ما تقدر تتحمل الأصوات العالية وقفت بعيد وتذكرت يوم ملكتها واللي سواه فيها فارس نزلت دموعها ومسحتها ما كانت تدري بالعيون المكحلة اللي كانت تناظرها بقهر" أكيد تذكرت يوم ملكتنا اللي المفروض تكون فيها أسعد إنسانة وأنت حرمتها من هالفرحة"رن جوالها ردت: نعم فارس بغيت شيء
ما رد عليها وظل دقايق يسمع صوت تنهيدها وأنفاسه تسابق دقات قلبها
فارس اسمعك
ليش واقفة هناك لحالك بالبرد
مقدر اتحمل راسي يالمني أحس أني بموت
لا تظلين هناك أخاف أحد يشوفك
تبتسم: بس أنا ما أشوف أحد
شجون ما أبيك تمرضين ترى برد عليكي وفستانك...
شجون قاطعته: ذا ذوقك أنت ولا نسيت
فارس يتنهد: غمضي عيونك ولا تتحركين
غمضت عيونها دقايق:افتحهم أنت وين رحت
سكر جواله وقال: التفتي وراك
لفت شجون وراها كان تشوف فارس قدامها خفق قلبها لما شافته بالثوب وشعره اللي يذبحها" أأأأاخ من عيونك الكحيلة" كان هو يناظر فيها من فوق لتحت حمر وجهها أول مرة تحس حالها عارية كذا: لا تطالعيني كذا أحس شكلي غلط
فارس قرب منها بخوف وسحبها لحضنه: شكلك يهبل بس ما أبي أحد يشوفك غيري
تعالى نجلس هناك راحت مع فارس جلس ع الأرض وجلسها بحضنه كان ظهرها لازق بصدره وحطت راسها ع كتفه ظل يمرر يده بشعرها غمضت عيونها وهي مستانسة بحضنه سألها: شجون ليش أنا ملاكك الحارس أنا شفت اسمي بجوالك بس ليش
شجون وبعدها مغضمة عيونها: لأنك ع طول تحرسني رغم كل شيء سويته فيني بس أنت كنت دايم جنبي كان عندك غرفة انت ولا مرة نمت فيها كنت أحس فيك ع طول بغرفتي تنام ع الكرسي أو الكنبة كنت أحس فيك وأنت تحسس حرارتي وتتطمن علي ... لما أتالم ألقاك فوق راسي تطبطب علي أنت ما كنت تنام إلا لما تتأكد أني بخير وبعد ذا كله تسألني ليش اسمك ملاك حارس
فارس باس خدها" أنا ما استاهلك يا شجون أنفاسي أوعدك إنشالله باكر يكون أحلى"
@@@@@
حنان طلبت من شوق تساعدها في رفع صينية القهوة والحلى وطلعت معاها
إلا شوي وتشوف فهد جاي عندهم ولا استحى وهو يتغزل بشوق اللي أول ما شافته حطت اللي بيدها وهربت ع داخل
حنان: فهود وش جابك يا وجه النحس
فهد: يا قليلة الحيا لا تنسين نفسك بس وبعدين شنو اللي وش جابني أبوي قال روح جيب القهوة والحلى ما كنت أدري أني أشوف كشتك لا ومتكشخة ع بالها حلوة
حنان: احلف عاد اقلب وجهك أنا لما جيت ع بالي أشوف جواد أو نادر ناس محترمة مو أنت ووجهك
فهد: حنون وتاليها معاك احترميني ع الأقل قدام الحورية اللي هربت لداخل يعني كلك نظر
حنان: امسك عني فشلت البنية الله يسود وجهك
فهد: حنان سكتي لا تخليني اخطط وجهك اللحين
مع جية إياد اللي قاله عمه يروح يشوف فهد ليه طول وما جا بسرعة
إياد: فهد وين غطست أنت وع طول نزل عيونه ووقف ورا فهد: اسف ظنيت أنك لحالك ليش طولت كذا
فهد أخذ القهوة من يد حنان وعطاها لإياد اللي كان واقف وراه وأخذ سفرة الحلى: ذي حنون السخيفة واقفة تخربط فوق راسي
إياد" يا حليلي أول مرة أشوفها حلوة كذا"
فهد" ذي شوق بنت عمتي واي ما ظن أني أقدر أنام اليوم
من بعد يوم طويل وشاق نام الكل والتعب هاده بس الفرحة ترفرف فوق أحلام أغلبهم
@@@@@

رد: رواية/ شجون روحي شجون أنفاسي

بالصبح جلست أم زياد مع أبو زياد وهي معصبة من يوم ملكة محمد وتتضايق لما تنجاب سيرة شذى بالبيت
أم زياد: والله بناتك جننوني فشلوني قدام الناس
أبو زياد: وش فيهم مشاء الله عليهم
أم زياد: لأنك ما تدري عن شيء وحدة كل شوي أنا بتطلق وبروح أعيش عند جدي بالمزرعة والثانية تقول ما تبي تتزوج وما يندري وش بتسوي فيني سجا بعد
أبو زياد: شنو اللي بتتطلق واللي ما تبي تتزوج خلهم يقولون هالحكي قدامي وأوريك فيهم وبنتك ليه ما تتبي تتزوج إنشالله
أم زياد: مدري عنها وش بتقول عنها الناس خواتها اللي أصغر منها تزوجوا وهي بعدها ولو تدري وش سويت فيني بعزيمة أم بندر فشلتني مو كنها بنتي اللي ربيتها
أبو زياد: مدري لمن طالعات هالبنات بس أكيد طالعات ع أمهم مقيولة بعد
أم زياد: احلف عاد إلا قول طالعات لك أنت واكبر دليل بنتك شجون
أبو زياد: شجون ذي مدري لمن طالعة جامعة المجد من أطرافه كل مساؤي العيلة فيها
هههههههههه
بس تدرين أنا مو متحسف ع شيء كثر أني تركت بنتي كل السنين ذي عند الغرب ضروها وعدموا صحتها يوم أشوفها تتألم قلبي يتقطع عشانها ومقدر أسوي لها شيء
أم زياد: خلت حيلي والله ما تقدر تتحمل أي صوت عالي من ألم راسها مقدرت تتهني حتى بملكة أختها ومثل ما قلت ما نقدر نساعدها بشيء أو حتى نعالجها
أبو زياد: ما قول إلا حسبي الله ونعم الوكيل في أمها كل السبب منها يا جعلها للموت
@@@@@
اجتمعوا البنات ببيت العم خالد بعد أيام من ملكة جواد وسجا جلسوا يسولفون ويضحكون قالت لهم حنان أنها حبت بدور وخواتها حيل واشتاقت لهم
ريناد: صدق والله تعودنا عليهم كأنهم ربعنا من زمان مو تونا تعرفنا عليهم
شوق: وش رايكم نروح لهم نزورهم
أسيل: أي صح وكاهي شجون تدل البيت لأنها راحت لهم قبل
شجون: ها لا انسى الموضوع أنا ما بروح هناك
ريناد: وليش إنشالله
شجون: كذا كيفي تبون تروحون بقلعتكم أنا ما حد يجيب سيرتي
حنان: بس أنت تدلين البيت وبعدين وش فيك عليهم
شجون: كذا استخفيت كفاية اللي صار لي من تحت راس بيتهم
أبرار قامت تضحك لأنها عارفة اللي صار بالتفصيل أما شجون حمر وجهها من ضحكها عليها
أسيل: شنو اللي صار لك من تحت راسهم أحسهم حبوبات وقربيات ع القلب
شجون: أنت لو شفتي بيتهم ما قلتي هالكلام بعدين لو رحتوا كلكم وين بتجلسون إلا إذا كنتوا رح تسون طوابير وتدخلون واحد واحد ترى ما يشيلكم المكان
سجا: شجون ليه هالكلام اللي ما جا من أسيل وحنان أكثر اثنين شايفات أنفسهم تجي منك أنت
ريناد: وبعدين خالي محمد قال هالبنات ينحطون فوق الراس واحترامهم واجب علينا كلنا
شجون: كلمة وقلتها اللي تبي تروح كاهو المكان خلوا خالكم يوصلكم أنا ع ذاك البيت ما بروح ولو كان جنة
أبرار:ههههههههههه أأأأأخ منك يا شجون بس حرام اللي تسوينه كل ذا بسبة أكله وتغمز لها
شجون حمر وجهها بزيادة: انطمي أنتي
ريناد: خلاص وش رايكم أعزمهم عندي ونجتمع كلنا ببيت أبو عبد العزيز ونستانس معاهم إلا إذا شجون عندها راي ثاني
حنان:لا ثاني ولا ثالث أصلا هي ما عندها سالفة كله دلع ماصخ
أبرار:ههههههههه بموت من الضحك لو تدرين وش صار ما قلتي دلع ماصخ أأأأأأخ بس
شجون دمعت عيونها وقالت وهي معصبة: الشره مو عليكم بس انا الغلطانة اللي جالسة مع تافهات مثلكم
وقامت تروح وهي تبكي من سخرية البنات عليها
حنان: شجون لا تصيرين حساسة كذا تعالى وين رايحة
شجون: بروح بيتي والله ما أجلس عندكم دقيقة زيادة
راحت وهي تبكي وأبرار مو قادرة تنفقع من الضحك ولا قدرت تسكت
ريناد: الله يعين ولد عمتي عليها مدري شلون مستحملها الخبلة ذي صدق تفور الدم
@@@@@
بالمسا راحت المها مع نادر عشان تصرف بضاعتهم إلا شوي ورجعت وهي تبكي المها نست حالها وكشفت وجهها بالسيارة لما حست أنها اختنقت من الغطا نادر كان يطالع فيها ولا استحى أو نزل عينه" ماشاء الله كل هالجمال تحت الغطا هذي بلا ماكياج كذا أجل لو حطت ماكياج أكيد تهبل كل الديرة" وانتبه لحاله وهو بعد يطالع فيها: المها وش فيك تبكين وليش رجعتي كذا بسرعة
المها وهي تبكي بقهر: صاحب المحل حقرني وقال ما يأخذ مني قطعة إلا إذا كشفت وجهي وغير كذا لا ولما رفضت سبني وطردني
نادر عصب وفار دمه فتح درج السيارة وطلع المسدس حقه سحبه وحطه بوسطه وقال لها: تعالى معاي أبي أشوفه النذل
المها خافت لما شافت المسدس: نادر وش بتسوي
نادر بعصبية: أنت ما تسمعين نزلي وريني هالحقير منو عشان أشوف شغلي معاه
المها: تكفى نادر ما بي تتورط بشيء
نادر بصراخ: انزلي احسن ما ابتلى فيك
المها نزلت من السيارة وهي تمسح دموعها شافها نادر: لا تبكين مفهوم تغطي وامشي معاي
راحت المها مع نادر ودخلت للمحل: كاهو
نادر: السلام
صاحب المحل: وعليكم بغيت شيء أخوي
نادر حط يده ع خصره وبعد جاكيته عشان صاحب المحل يشوف المسدس وقال له وهو يمد له الكرت حقه:أنا نادر وليد ال... الأخت ذي كانت عندك قبل شوي و...
قاطعه صاحب المحل بخوف: حياك تفضلي أختي حياك وين البضاعة ترى صار سوء تفاهم الأخت فهمتني غلط
نادر مسكه من ملابسه: غلط صح أياني وإياك تعيد هالحركة فهمت وإلا بتكون نهايتك ع يدي واللحين كم تدفع ثمن هالأكياس
صاحب المحل: بأخذ بس كيس والكيس الثاني...
نادر: ما عجبني العرض وسحب المسدس
صاحب المحل: كم تبي في الكيسين
المها جات تتكلم سكتها نادر: الضعف
صاحب المحل: بس ذا وايد
نادر: كذا ما رح نتفق وأنا ما أحب الهذرة ترى ما عندي وقت تدفع ولا شلون
صاحب المحل يبلع ريقه: بدفع اللي تأمر فيه
ودفع لهم ضعف ثمن البضاعة وقاله نادر أنهم رح يترددون عليه من فترة للثانية وأخذ المها وطلعوا
قال لها: ها راضية اللحين
المها: الله يخليك ويحميك ما أدري شلون أوفيك حقك
نادر: لا تقولين كذا يا الحلى تصدقين ما كنت أظن أنك حلوة كذا زين سوى فيك صاحب المحل عشان أشوفك وغمز لها شقهت المها وضربته ع كتفه: استح أحسن لك
ضحك معاها ووصلها للبيت وهي مستانسة
نهاية البارت الخامس عشر
@@@@@

رد: رواية/ شجون روحي شجون أنفاسي

اكثر من رايع يعطيك العافيه
ياليت تحاولي تشدي المتابع وتتكلمي عن ابو خالد نوع من اعطاء المتابع شي يسير وان الحياه تحاكي الجميع ولايكون تركيزك بس ع احداث شجون
وجهة نظر فقط يا استاذتي الفاضله