( رواية من حب عفوي الى حب جنوني ) للكاتبه ( عقد اللؤلؤ ). (كامله)

**عقد اللؤلؤ** · 09-01-2013, 01:57 AM

رد: •.♥.•° ღ♥ღ رواية من حب عفوي الى حب جنوني •.♥.•° ღ♥ღ بقلمي ...

مزمز
مزون شمر
اوراق الخريف
الكاتبه ساندرا

اسعدني مروركم يالغوالي...

نورتوا ... ولولا متابعتكم ..لما استمريت بالكتابه

تحياتي القلبيه لكن جميعا

**عقد اللؤلؤ** · 09-01-2013, 02:03 AM

رد: •.♥.•° ღ♥ღ رواية من حب عفوي الى حب جنوني •.♥.•° ღ♥ღ بقلمي ...

<<<<<<<<<<<<<<<<<<<<<<<<<<<<<<<<<<<<
الجزء الحادي عشر
<<<<<<<<<<<<<<<<<<<<<<<<<<<<<<<<<<<<

بتال "مسك يدها وقرب من اذنها .. وبصوت كله حب ":.. يالله حبيبتي مشينا لشقتنا ...
هويدا "وضح التوتر بوجهها .. ولفت على اخوها ": .. يزيد .. "فكت يدها من يد بتال .. وقربت منه وبعيون مليانه دموع" ..يزيد.. راح اشتاق لك .. سامحني ..
يزيد "ابتسم لها ": اسامحك؟! .. ترى بتتزوجين انتي مو رايحه للحرب .. يالله مسحي دموعك .. لا يشوفك بتال ويفكرك لسى بزر ..
هويدا "تمسح دموعها بشويش عشان مكياجها ":.. انت بتوصلنا ...
يزيد :ايه .. يالله وين عبايتك ..."ينادي الشغاله "..جاني ... جيبي عباية هويدا ..وشنطة ملابسها ..

روضه كانت واقفه بحيره ..اذا بيوديهم بسيارته ..هي مع مين تروح .. قربت من بتال اللي كان مركز في هويدا .."بتال... بتال ..انا مع مين اروح "
بتال "انتبه لها .. وبنرفزة ":..مدري عنك .. شوفي أي سيارة وتعالي فيها ..."وبعد عنها .. ويساعد هويدا وهي تلبس عبايتها "..
فديت هالجمال والله ...
ابتسمت له هويدا بصعوبه ... مسكت بيد اخوها وتهربت تمسك يد بتال ... طلعت هي وبتال في سيارته راكبين ورا جنب بعض .. وروضه اضطرت تروح مع سواقهم .. عشان لا تضايق العرسان ..
.....................................

وصلوا لباب الشقه ووقفت "هويدا" بتوتر تراقب طلوع اخوها "يزيد" معاها .. ولكن للاسف طلعت "روضه" لوحدها من الاصنصير تسحب شنطه ملابس "هويدا" ..
هويدا "بقلق":وين يزيد ...؟!
روضه "بملل ":راح .. واعطاني شنطتك ...
بتال "فتح باب الشقه .. وبابتسامه عريضه ": تفضلي يا عرووووس ..
هويدا "بدون ابتسامه .. نزلت راسها.. وباستسلام .. دخلت للشقه ":..
بتال "دخل وراها على طووول .. ومسك عبايتها ينزلها عنها ": عني قلبي هاتها ... "سحبها منها ورماها على روضه وهي لسى مادخلت .. "... طوي عبايتها ودخلي الشنطه .. "ومشى جنب هويدا يوريها الشقه "..

روضه "متنرفزة":.. وجع ...كاني شغالة الهانم ..."جمعت العباية بلا ترتيب .. وسحبت الشنطه .. ودخلت الشقه وسكرت الباب وراها "...مشت للصاله حصلت هويدا دخلت غرفتهم .. وبتال ينتظر روضه ..اخذ الشنطه من يدها ..وبصيغة الامر .."كاستين عصير من الثلاجه .. ومويه بسرعه جيبيها للغرفه ".. ومشى للغرفه وسكر الباب ...
روضه "رمت عبايتها على الكنب بضيقه .. وطالعت في باب غرفتهم "..جعلكم ماتربحوون ..."وراحت للمطبخ "...

"بتال" .. جلس جنب "هويدا" على طرف السرير ... وقرب منها .. وهويدا بدات تتوتر وخاصة ان ذكرى ليلة العيد مرت قدامها كانه الحين ..تذكرت خالد واللي سواه فيها ..
بتال وكله حب ووله "مو مصدق اننا صرنا لبعض ..ولوحدنا ..".. ومد يده مسك يدها وباسها ..
هويدا "بربكه ":.. ب ..بتال .."سحبت يدها "..
بتال "بحب":.. ياعيون بتال وقلبه ..."جاء بيحط يده على خصرها"
هويدا " فزت وبتوتر.. وبعدت عنه ":.. لا تلمسني ..

>>> طق طق .. روضه من ورى الباب "بتال العصير والمويه "<<<

بتال "طنش روضه ...وبتعجب":.. هودي ايش فيك .. و كنتي تقولي متى نتزوج ... "وقف وقرب منها ".. ماله داعي التوتر هذا ..
هويدا "بعدت عنه ":تكفى لا تقرب .."وتبلع ريقها بصعوبه .. وصدرها يرتفع ويهبط بسرعه ".. ابغى ارجع بيتنا ..."وبدت دموعها تنزل"...
بتال "بخوف":..هويدا .. ليه البكا الحين .. هذي الليله اللي انتظرنا سوا بفارغ الصبر .. وبعدين هذا صار بيتك ..

"روضه" ملت وهي واقفه ورى الباب محد فتح لها ... حطت صينية العصير والمويه جنب الباب .. وراحت غرفتها ...وهي مو مصدقه اللي صار .. خلاص "بتال" تزوج ..واختار شريكة حياته .. انا ماسوا لي نص اللي سوا لها ..بس اكلم مين واحاجج مين وهو ولا معتبرني شي ... طالعت على التسريحه ..ولمحت السجاده .. حست فعلا ماراح يريحها الا انها تصلي .. وبدون تردد توضت وفرشت سجادتها وصلت بعد ما لبست حجابها ...

هويدا "بصراخ":قلت لك ابغى ارجع بيتنا ... ما ابغاك ..
بتال "يحاول يهديها ":.. طيب تعالي بس بنجلس نتكلم ماراح اقرب منك ..تعالي بس .."وقرب منها وهو ماد لها يده "..
هويدا "لصقت بالجدار ":..لا لا تقرب ..اطلع برا ..اطلع ...
بتال "مسح على شعره بتوتر ":..طيب ..طيب بطلع .. بس اهدي انتي .."وطلع من الغرفه "..
هويدا على طول ركضت لباب الغرفه وسكرته بالمفتاح ...
بتال ..تفاجأ لما سكرت .. دق عليها مرة واثنين ما ردت عليه .. عصب مررره من تصرفها ..ومشى لغرفة روضه .. وبدون ما يستاذن فتح الباب عليها .. وشافها جالسه على السجاده ورافعه يدها تدعي ...
بتال بقهر .."ايه وانا اقول وش صاير بيننا اتاريك انتي تدعين علينا..الله واكبر عليك ..ماتحبين تشوفين احد مبسوط ومتهني "..
روضه ""لفت عليه وهي مصدومه ":.. ايش ..انا .. انا ..ما احب اشوف احد متهني ..
بتال "بحمق":ايه ..والله انك حقوووده ..غيرانه منها ..عطيتيها عين .. حسبي الله عليك ..
روضه "وقلبها مجروح":.بتال حرام عليك .. ليه تقول كذا ..بعدين انا قلت لك بروح عند خالي كم يوم مارضيت ..تقول لا خليك معاي ..
بتال : اجل تبغين عروستي تطبخ وتغسل وتكنس من ثاني يوم ..
روضه : ليه انا شغاله يعني ..
بتال "ووجهه معتفس":.. بلا كثرة كلام .. هاتي مخده ولحاف ..
روضه "تفاجأة ..":...
بتال : مطوله وانتي مبلمه ..هات بسرعه ..

روضه "مشت ببطي مو مصدقه .. وعطته اللحاف والمخده حقتها ..وكانت مركزة بوجهه لانها توقعته يمزح "

سحب اللحاف منها واخذ المخده ..وطلع من غرفتها وضرب بالباب بقوه .."روضه" هالوقت كان وجهها جامد وشوي بدات تضحك من غير شعور .. وهي تتخيل عريس ونايم اول ليله في الصاله .. وهي تضحك ..فتح "بتال" باب غرفتها .. وفتح عيونه بس شافها تضحك .. وبقهر .." تضحكين هاه ...ضحكتي من سرك بلا .... اقول لو طلع اللي صار اليوم لاحد ماتلومي الا نفسك فاهمه "..
روضه "ماسكه ضحكتها .. وتاشر له بمعني طيب .."
بتال "كان شكل روضه يضحك وهي ماسكه ضحكتها .. وغصب عنه ضحك ":.. جد شر البلية مايضحك ..."وسكر الباب .. وطلع "

........................

راكان في مكتبه بالمستشفى ...الساعه 1 ونص في الليل .. دخلت عليه الممرضه ..."دكتور .. عبدالله طارق في العنايه "..
راكان ..بسرعه طلع من مكتبه وعلى قسم العناية المركزة ... سلمى بس شافته قربت منه وهي تبكي .."دكتور الحق ولدي بيمووت "..
راكان "بربكه ":.. اهدي يا ام عبدالله ...بشوفه الحين .."وهو رايح".. كلمي طارق ..
سلمى : كلمته جاي بالطريق ... "تفرك يدها ببعض بتوتر".. يارب اشفي ولدي يارب ...

بعد ربع ساعه طارق جاي يركض لعندها .."خييير ..ايش صار .. وين عبود "..
سلمى "تبكي ":.. مدري فجاة وقف عن التنفس وصار لونها ازرق ... في العنايه هنا جوا ..
طارق : لاحول ولاقوة الا بالله ... راكان موجود ..
سلمى : ايه من شوي دخل عنده .. "سكتت شوي ".. طارق ..كيف خلودي ..
طارق "لف بسرعه وطالعها بنظرات حاده "...
سلمى "بتعجب ":.. وش فيك اسالك عن خلودي ..
طارق "انتبه لنفسه ":.. بخير ..بخير .. الحين احنا في عبود ..
سلمى : مو كلهم اولادي ..
طارق : خلاص اسكتي ... "تذكر ليلة العيد .. وبسرعه هز راسه بنفي "..لا لا... اعوذ بالله من الشيطان..

طلع دكتور الاطفال ..ومعاه راكان .. جرى طارق لهم وسلمى تتبعه .. "..ايش صار لولدي "..
راكان : اهدى يا طارق ...تكلم دكتور بدر ..
الدكتور بدر : بصراحه ماراح اخبي عليك .. ولدك حالته متدهورة .. عنده فقر دم .. وحبوب بجلده .. وحرارته مرتفعه ..
طارق : طيب اعطوة مضاد ..او أي شي ..لا تخلون ولدي يروح مني كذا ...
الدكتور بدر : اكيد سوينا لولدك اللي يحتاجه ... وباقي تدعوا له ..
طارق : بيطول بالعنايه ...؟!
راكان : بعد 24 ساعه نقدر نقول لك عن حالته اذا استقرت ..
الدكتور بدر : عن اذنكم ..."وبعد عنهم "

راكان :طارق ماله داعي وجودك انت وزوجتك هنا ... ارجعوا البيت ووقت الزيارة تعالوا ...
سلمى : لا ماني رايحه البيت وولدي هنا ...
راكان : اذا ما طلعتوا برضاكم فيه مراقبين يطلعوكم ... "وحط يده على كتف طارق ".. روحوا ارتاحوا .. وانا مناوبتي الى الساعه 8 الصباح .. ماراح اترك عبود لوحده .. ولو صار شي بدق عليك ...
طارق " وباستسلام ":.. خير ... خير ..ان شاء الله .. بس تكفى لا تقفل جوالك .. عشان اكلمك اطمن ..
راكان : ابشر ...

طلع طارق وزوجته سلمى من المستشفى والخوف على ولدهم مسيطر عليهم ... مشوا بالسيارة رايحين للبيت .. والهدوء سيد الموقف .. مد يده طارق وشغل الراديو لعل وعسى يلاقي شي ينسيه تعب ولده ... وانطلق صوت الشيخ من الراديو بكل وضوح وتركيز ..
((وجعل أضداد هذه من الهم والحزن والضيق في التفريط في الطاعة وفعل المعصية. فما يجده الإنسان من هم وغم وضيق في الصدر ونكد في العيش فإن هذا غالبا ما يكون ثمرة من ثمرات المعاصي النكدة ونتاج من نتاجها المر. قال الله سبحانه: ومن أعرض عن ذكري فإن له معيشة ضنكا ونحشره يوم القيامة أعمى. ))

كان يسمع بانصات وتركيز .. وبدا يتوتر ..مد يده وقفل الراديو ..
سلمى : ليه تقفله ..خليه والله كلامه عجبني ...
طارق "يتهرب منها": اسكتي الحين مشغووول ..
سلمى "سندت راسها ":.. أي والله مقصرين في حق ربي الله يغفر لنا .. ان شاء الله اليوم باقوم اصلي الليل وادعي لولدي .. وكمان بكرة بصوم واتصدق له .. وباذن الله ربي يشفيه ويقومه لنا بالسلامه ..
طارق " والغصه ذابحته":..ان شاءالله ..."وسرح بالطريق .."
وصلوا بيتهم ... ونزلت سلمى ..وتنتظرة ينزل ..مانزل ... طالعت فيه من قزاز السيارة ...باستغراب .."طارق ..يالله "..
طارق "عطاها مفتاح الشقه ...":..ادخلي انتي انا شوي وراجع ..."وماعطاها فرصه تناقشه ... مشى بسرعه بالسيارة "

.................................................

**عقد اللؤلؤ** · 09-01-2013, 02:04 AM

رد: •.♥.•° ღ♥ღ رواية من حب عفوي الى حب جنوني •.♥.•° ღ♥ღ بقلمي ...

.................................................

"روضه" على سريرها ومتكيه على مخدتها ...ماجاها نوم ... تفكر في بتال .. وهويدا ... مو مصدقه اللي صار لهم صدق تزاعلوا والا يلعبون عليها .. تاكدت ان بتال نايم بالصاله لما طلعت بتاخذ حبوب السكر لانها نسيت تاخذه معاها في المناسبه ...ماتدري تفرح والا تزعل ..في كل الحالتين ماراح يتغير شي .. دست نفسها تحت اللحاف .. تحاول تنام ..

في الغرفه الثانيه ..كانت هويدا منهكه من التعب وخاصة ان الليله اللي قبلها مانامت ..من توتر الزواج .. ارتاحت شوي لان باب الغرفه مسكر .. مددت جسمها على السرير بلبسها ومكياجها ... ونامت وهي تفكر ..ايش بيصير بكره ..

..................................

طارق ..نزل عند البحر .. وجلس على الرصيف .. يحاول يهدي من الافكار اللي مسيطرة على تفكيرة .. بعد تردد اخذ الجوال .. و دور على رقمها ... حط الجوال على اذنه وهو مغمض عيونه ينتظر صوتها العذب يوصل لمسامعه ...وللاسف .."الرقم المطلوب غير موجود بالخدمه مؤقتا"..
عض على شفاته بضيق .. " اجل ..ايش كنت متوقع منها يا طارق تكمل معاك وانت حقييير "...كرهه نفسه اكثر لانه ماقدر يوصل لها ...
تذكر شي .. وبدون انتظار .. وقف من الحماس .. وكلم .."الوو ... راكان ..تكفى محتاجك .. الحقني ..."

..........................

"لمياء" .. جالسه بصاله .. تتابع فلم .. شوي معاه وعشرة شارد فكرها في "يزيد" و التغيير اللي صار له تجاهها ... نزلت امها من الدرج .. وشافتها جالسه لوحدها ... قربت منها بابتسامه ..."صباح الخير لموو"
لمياء "بابتسامه بارده":..لسى الساعه وحده ماما..
ام راكان "طالعت في الساعه ":وليه انا اشوفها اربعه ..
لمياء "بتعجب":.. يوووه ماحسيت بالوقت .."ووقفت ".. بروح انام بكرة وراي دوام ....
ام راكان : لمياء .. تعالي اجلسي ..."جلسوا جنب بعض "..ايش فيك يابنتي .. لك كذا يوم بس مسرحه ومتضايقه ..حتى وجهك ذبل ..
لمياء : مافيني شي ..
ام راكان : تكلمي يمكن ترتاحي ...
لمياء : ... ..يمكن زعلت شوي لان اليوم زواج اخت يزيد .."وارتبكت من اسمه "..انا اللي اشتغل عنده بالشركه .. ما عزمني ..وبابا عزمه ..
ام راكان : ابوك صديق عبد الجليل ..
لمياء : طيب وانا مو اشتغل بشركتهم ...ايش بيضرة لو عزمني ..كان نفسي اشوف بيتهم واتعرف على اخته.."وبزعل" ..بس خسارة ..
ام راكان : ابوك يقول ضيوفهم بس من الرجال مافيه حريم ...
لمياء : خلاص راحت مابيدي شي ... "وقفت"...يالله ماما بطلع غرفتي انتظر يأذن اصلي وبنام .... تصبحي على خير ..
ام راكان : وانتي بخير ..

طلعت لمياء وقهر الدنيا بداخلها .. وتكلم نفسها .. " يزيد هذا.. دواه عندي ... وبكرة يا ويلك مني .."

................................................

راكان ..نزل من سيارته اللي وقفها قريب من سيارة طارق عند البحر ...وراح يركض لعنده بخوف ..."خير طارق ..ايش فيك "
طارق "وقف له":..اجلس ابغى اتكلم معاك...
راكان :مكلمني الحق ومدري وشو ..والحين بكل برود تقول اجلس نتكلم...انت شارب شي ..استغفر الله ...
طارق : راكان ..انا ...بقول لك شي .. وادري يمكن تكون اخر كره اشوفك فيها او حتي تعترف فيني ...بس انا خلاص "دمعت عينه" ماعاد فيني اتحمل ..
راكان "هدي":..طارق ايش فيه ..انا عمري ماشفت دمعتك حتى بوفاة امك ..
طارق : بقول لك ... محد يقدر يساعدني الا انت .. ربي اراد انك تعرف حقيقتي .. بس لاني خلاص تعبت من تأنيب الضمير .. وولدي هناك مرمي بالمستشفى بين الحياة والموت .. وولدي الثاني عند اخواله له يومين ماشفته..ماعاد يفرق معي شي .. ابغى ارجع للاستقرار اللي كنت فيه مع زوجتي واولادي .. واللي ماحسيت بقيمته الا الحين ...وان شاء الله ماضاع الوقت لسى ..
راكان :.. مافهمت شي ...بس احس الكلام كبير اللي بتقوله ... "طالع يمين ويسار " ..المكان هنا كل شباب تحب نروح مقهى او أي مكان ..
طارق "هز راسه بموافقه ... وهو يمسح دموعه "... حط راكان يده على كتف طارق ..ومشوا لسيارته ...

وصلوا للمقهى ..نزلوا الاثنين ...وكان تقريبا شبه فاضي اختاروا جلسه بالدور الثاني ..طلبوا شاي .. وجلسوا مقابلين لبعض ... وطارق يتهرب من عيون راكان ...وبعد انتظار من راكان .."تكلم .. اسمعك "
طارق "منزل راسه .. وبتردد": ..بتكلم بس لاتقاطعني ..حتى وتفهم الموضوع كامل ...

"""وصل طلبهم للشاي ..والعامل نبههم بعد ربع ساعه بيسكروا المقهى لصلاة الفجر """

راكان : .. سمعته ربع ساعه وبنطلع .. مابقاطعك .."وصب الشاي"...
طارق : قبل ست شهور لما تزاعلت مع زوجتي وراحت بيت اهلها ..تعرفت على بنت .. ومن قلبي حبيتها ..وغرقتها بالهدايا الغاليه حرمت نفسي واولادي منها عشان ارضيها .. صدقتها اني الوحيد بحياتها .. علقتني فيها لحد ماصرت زي الخاتم باصبعها ..عجبني دلالها وجمالها ..
راكان "بانصات":.. وبعدين ...!!
طارق : اكتشفت انها تعرف غيري كثييير ..وكنت بتركها بعد مهاوشات وخصومات بيننا .. بس يمكن ماكانت تبغى تخسر البنك المتحرك تبعها .. وبعد اخذت رقم زوجتي من جوالي ...مره نسيت جوالي عندها ..وصارت ترسل رسايل عني لاقرب الاشخاص لي زوجتي مديري بالعمل ..شوهت سمعتي بينهم ..وعرفت بالصدفه بعد ما صار الكل يتكلم عني وعن اخلاقي .. من قهري حلفت لاخلي نهايتها على يدي ..
راكان "بخوف":..وش سويت ...
طارق "والشر يتطاير من عيونه ":... مشيت وراها مره على كثر مادوختني الا اني عرفت بيتها وعرفت من تكون بنته ...واتفقت معها مره في مواقف سيارات في مول نتقابلعلى اساس اني بصالحها ونرجع مثل قبل .... ونومتها ..و..
راكان "ضرب على الطاوله":.. نومتها ...اكيد اغت...
طارق "يقاطعه ":.. لا .. لا والله ماقربتها ...ولا لمستها .. بس اني .."وبتردد"... اوهمتها .. يعني خليتها تشك في نفسها ..
راكان "بعصيه":.مافهمت .. كيف يعني اوهمتها ..
طارق "بضيق ":. صبغة حمراء .. وملابس مقطعه ويمشي الحال ..
راكان "يسحب على شعره بتوتر":..شيطان انت شيطان ...والبنت صدقت ..
طارق : اكيد صدقت .. لانها ماعاد اتصلت علي ..راكان..لا تلومني ... حبيتها ..وحسيت انها خانتني ..واستغفلتني ..
راكان :..واكيد الحين اهلها بيجبروك تتزوجها ..
طارق :أي اهل ... اصلا .ابوها تاجر كبير مو فاضي ..لها ..
راكان : وانت الحين ندمان ..
طارق "بعيون مكسورة": أي والله ندمان .. وابغى اكلمها اطلبها تسامحني ... تكفى يا راكان ..
راكان : طيب ... كلمها ..ايش دخلني ...
طارق : انت الوحيد اللي تقدر تجيب لي رقمها ...
راكان "سكت ..مصدوووم .. جاء بباله لمياء اخته...وقرب منه ومسك ثوبه وشده لوجهه .. وبعصبيه ":... يا خسيس .... بنت ميين ..؟!
طارق "بخوف": .. ا .. ا ...اخت يزيد .. اخته .. اخته الوحيده ..
راكان "فك يده منه ..وهديت ملامحه .. ورجع يجلس ":..يزيد ماغيره ...صاحب الشركه ...
طارق : ايه ...
راكان "يتذكر":..لما كنا في الكوفي شوب مع بتال ..انت عرفته لما دخل هو وسند ..صح...عشان كذا استأذنت .. وقمت بسرعه متعلل باهلك ..مع انه وقتها قلت لي انك فاضي ... صدق شيطان ..
طارق : ..تكفى يا راكان .. جيب لي رقمها ..والله بس اطلب منها تسامحني ...

""العامل ... لو سمحتوا ..راح نقفل القهوه .. الحساب ""

اعطوة الحساب .. ونزلوا للسيارة .. طلع طارق وهو محرج من راكان ..بس ماكان عنده حل ..

راكان "طلع السيارة وضرب بالباب بقوه ..": انت دمرت بنت ..عارف ايش يعني ...ولا ازيدك من الشعر بيت ... دامها اخته الوحيده معناه امس كان زواجها ..
طارق " مو مصدق":.. اييش تزوجت .. معقوله عرفت اني مالمستها ..
راكان : الله اعلم ..يمكن ..."طالع فيه".. لا يكون تعرف اسمك وكل شي عنك ..
طارق : لا .. ماتعرف شي .. حتى اسمي الحقيقي ماتعرف ..تعرفني باسم خالد ...كنت بصارحها بكل شي بس لما عرفتها على حقيقتها حمدت ربي اني مافتحت فمي ..
راكان: .. شيطان ... والله مدري ايش اقول لك .. انصدمت بصراحه .. طلعت داهيه وانا مدري ..
طارق "نزل راسه":.. انا قلت لك يمكن تكون اخر مرة نجلس مع بعض لاني واطي ما استحق اكون مع واحد اخلاق مثلك ..بس انا تعلمت درس ومستحيل ارجع له ..وربي غفور رحيم ...
راكان " سرح شوي ": طارق لا تحسسني اني ملاك ...محد معصوم من الخطأ ..بس ولا يهمك .. باجيب لك رقمها ....
طارق "بفرح ": .. كنت ادري ان شهامتك راح توقف معي ... وديني لسيارتي الله يخليك ...ابغى الحق على صلاة الفجر ...
راكان " شغل السيارة ":.. ابشر ... بنصلي جماعه باذن الله .."وابتسم له "

..........................

صحي سند .. وراح للمسجد صلى الفجر ... ورجع البيت ...دخل الصاله ..وشاف " فطوم "..نايمه بس مفتحه عينها .. شغل اللمبه ..وتغطت فطوم من قوة الاضاءة .."يؤ سند قفل اللمبه ..عورتني عيوني "..
سند "جلس":.. جبتي لي الكئابه .. بس مقفله انوار البيت .." وبعصبيه "...والله لو شفت بعد اليوم لمبه مقفله يا ويلك ...
فطوم "تطلع راسها من تحت اللحاف":.. ايش فيك معصب طيب ..
سند : مو معصب ... يالله قومي سوي لي فطور ...
فطوم : بسوي لك حليب وشابورة ...
سند "مسرح .. ماسمعها ":
فطوم "قام بفرح للمطبخ ": ..الحمدلله ما اعترض ...

سند ..يتذكر لمياء ..واللي صار بينهم امس ...

///// سند على مكتبه.. وقف وراح لمكتب لمياء ... ومد يده لها بالاوراق ...وبابتسامه ..." ..تفضلي انستي ... خلصت الجدول .. وعليك كتابة الأرقام"..
لمياء "بلا اهتمام":..هات..."اخذت الاوراق"
سند "تكى بكوعه الاثنين على مكتبها وكفوفه على خده ...ويطالعها بنظرات الولهان.... كان يستعبط عليها "...
لمياء "طالعته ... وباستغراب ":... ايش فيه ...ليه تطالعني كذا ...
سند "بعباطه ":.. ولهان ...
لمياء "شدت حواجبها ...ووقفت بعصبيه ":... لو سمحت احترم حدودك .. احنا بمكان عمل ...
سند " متفاجئ من ردة فعلها ":.. ايش فيك عصبتي .. امزح معاك ..
لمياء "بعصبيه":بصفتك مين ...تمزح معي ...؟!...
سند "مصدوم":..خلاص اهدي ...اسف ...
لمياء : واسف هذي اصرفها من وين ..؟!
سند "بنفاذة صبر ":... خلا ص..بطلع ... "وطلع من المكتب بخطوات سريعه ...ماوقف الا بدورة المياة ... غمض بقوه من قهره ... ودخل للحمام ...طلع باكيت الدخان من جيبه ...ودخن بسرعه وهو متوتر " ///////

فطوم "جايبه الحليب والشابورة بصينيه ":.. تفضلللل ...
سند "انتبه لها ":.. ويطالع في الصينيه ... وش ذا ...حللليب ..انتي تدرين اني ماحب الحليب ...
فطوم "بزعل":.. ليه ماقلت من اول... سالتك مارديت علي ..
سند : متى سالتيني ..
فطوم : قبل شوي ..سند وش فيك...؟!
سند "حك جبهته":.. بتزعلي لو ماشربته ...
فطوم "ابتسمت":..عادي انا بشربه ...
ابتسم لها سند ... وقوف ..."بروح انام لي ساعتين قبل الدوام ... صحيني لو ماصحيت ..."....
فطووم: .. ان شاء الله ..
سند "وقف ولف عليها ":.. انتي تعرفي ابو سارة .. اللي بيتهم اول الشارع ..
فطوم : ايه .. سارة معاي بالمدرسه .. وهي وحيدة اهلها ..
سند "بتفكير":.. اها..
فطوم "بابتسامه ماكرة ":.. ليه تسأل عن ساره ..
سند :.. وش علي منها .. انا اسال عن ابوها .. "ولف رايح لغرفته ".. يالله بنام..

.................

**عقد اللؤلؤ** · 09-01-2013, 02:05 AM

رد: •.♥.•° ღ♥ღ رواية من حب عفوي الى حب جنوني •.♥.•° ღ♥ღ بقلمي ...

.................

الساعه 8 الصباح ...

... صحيت "هويدا" .. بكسل وهي ماسكه يدها لانها نامت عليها ..وتطالع في الغرفه بخوف ... وبعدين تذكرت انها عروس .. وقفت تتأكد ان باب الغرفه مسكر.. راحت لشنطتها .. وطلعت روب ومنشفه ... وطالعت في جدران الغرفه .. وبقهر جلست على حافة السرير .."مافيه حمام ... اوووف ...لازم اطلع ..."..فكرت شوي .."لا يكووون نام عند روضه ... وانا غبيه صدقت انه مايحبها .. اما وريتك يا بتال ...تضحك علي "...وقفت ومشت لباب الغرفه لفت المفتاح بهدوء ... وفتحت الباب وعلى طول شافت بتال نايم على كنبة الصاله الطويله .. ارتاحت لشوفته ..ابتسمت غصب عنها ..وطالعت في الابواب بالصاله وميزت باب الحمام .. ومشت بروس اصابعها عشان بتال لا يحس فيها ... ودخلت وسكرت الباب .. واخذت نفس براحه ... وفتحت الدوش ...

بتال ..سمع باب الحمام ..فتح عينه وجلس شاف باب الغرفه مفتوح ...وعلى طوول قام ودخل الغرفه ...بعد ماضبط اللحاف على اساس انه موجود ولسى نايم ...

.........................................
طارق .. يدور في بيته .. والجوال بيده ...سلمى قربت منه .. "رد عليك راكان ؟!"
طارق : لا .. جواله مقفل ...
سلمى : هذا وانت وصيته ...صدق ماعنده ذوق.. " رايحه لغرفة نومها " ..انا بروح البس عبايتي وباطمن على ولدي بنفسي ..
طارق "بزعل": .. كنت ادري انه بيزعل مني .. بس مو وقته الحين .. الله يسامحك يا راكان ..
سلمى "طلعت وهي لابسه عبايتها" :.. انا جاهزة ..
طارق "دخل جواله بجيبه ":.. يالله ..

..............................................
يزيد ... صحي وجلس على طاولة الطعام يفطر ... حس ان البيت فاضي عليه مع ان الخدم موجودين .. و هويدا مو دايم تنزل تفطر ... بس على الاقل كان فيه احد ينتظرة ويتكلم معاه ... انسدت نفسه عن الاكل ... وقف وبصوت عالي .."جاني ...جاني .. "
جاني " وهي تركض ": نأم مستر ....
يزيد "وهو يعدل شماغه عند مراية المدخل ... وبدون مايطالعها ": جيبي اللاب توب .. من المكتب ... "وطلع لسيارته .. وجلس ينتظرها ...مل وسحب جواله يتفقد الرسايل ... وتفاجأ برساله من لمياء ...عدل جلسته ... وفتحها بسرعه ...
(( يزيد .. لازم اليوم نجلس ونتكلم .. ))
..اه يا لمياء بايش نتكلم بالضبط ... "
جاني "فتحت باب الراكب .. ونزلت راسها له بدلع ":.. هدا اللاب توووب ...كويس مستر ..
يزيد : ايه ..خلاص شك....."ولما طالعها .. حصلها فاكه شعرها .. ولابسه بنطلون جينز مع بلوزة كت بيضاء " .. وين اليونفورم تبعك ..؟!!
جاني "بضحكة كذب ":..هدا كسيل مستر ..
يزيد "يلبس نظارته الشمسيه":في الغسيل هاه.... قفلي ..قفلي الباب ...
جاني "بابتسامه عريضه ..":باي ...باي .."وسكرت باب السيارة "
يزيد ..يهز راسه بنفاذة صبر "الحمدلله والشكر".. وفتح باب الكرج بالريموت ... وخرج رايح للشركه ...

...............................

صحيت " روضه " ولبست قميص قطني طويل لونه سماوي ..طلعت للصاله .. وشافت باب غرفتهم مفتوح .. وبتال توقعته نايم من شكل لحافه ..كانت بتصحيه ..وترددت ففضلت تتركه نايم ..و دخلت للمطبخ تجهز الفطور ...

"هويدا" ..فتحت باب الحمام بشويش... وطلعت راسها ...شافت "بتال" لسى نايم ... مشيت بسرعه للغرفه وهي لابسه روب الحمام والمنشفه على راسها.. وسكرت الباب ..وهي تحس بالانتصار ..لفت بفرح ... و تفاجأة ب "بتال" نايم على السرير ومتكي على يده و يطالع فيها .. هويدا رجعت على ورى بخوف ..وهي تعدل ربطة الروب .."متى دخلت "..؟؟!
بتال "ونظراته مركزها عليها":.. وحشتيييني .. "وجلس بسرعه" .. تعالي اجلسي جنبي ..
هويدا "تبلع ريقها ":.. لا .. اطلع عشان البس ...
بتال "نام ... قفل عينه":.. قفلت عيني ... مابطالع فيك ...
هويدا "تنرفزت":بتال ..

>>طق طق .. روضه من ورى الباب ..<<

هويدا بسرعه سبقت بتال لباب الغرفه وفتحته ...وبتال يطالعها بقهر ...
روضه "بحرج": ا ...الفطور جاهز ...
هويدا "براحه ":طيب ..."وطلعت للصاله بالروب"..
بتال "سحبها" : ادخلي البسي ..."وطالعها بنظرات تحدي".. وين بتروحين مني مصيرك لي ..."وطلع من الغرفه وسكر الباب وراه"..
هويدا "سحبت المنشفه من على راسها .. وبطفش ": .. ياربي منه .. "وبملل"...اخذت لها تنورة سوداء من شنطتها وبلوزة بيضاء مشجرة باسود مع كعب اسود ...

بتال ..ياكل وهو معصب وبين كل لقمه والثانيه يعطيها نظرة تهز بدنها ... وروضه مو فاهمه .. وباستغراب.."ماعجبك الفطور"..
بتال "بنفس النظرات ":.. الاكل نعمة ربي ما اقدر اقول شي ... بس صدقتي فيه شي ثاني مو عاجبني ...

طلعت "هويدا" من الغرفه بعد مالبست وتركت شعرها مفتوح ... ومكياج خفيف .. ابتسمت لهم .. ومشت لعند الطاوله ... بتال بس شافها تغيرت ملامح وجهه .. وابتسم .." ياهلا .. ياهلا بالجمال والدلع ".. وسحب لها الكرسي اللي جنبه ..."تعالي ...هنا"
هويدا "جلست جنبه بهدوء":..شكرا ...
بتال "يقطع لها خبز .. ويغمسه بالقشطه .. ويقربها من فمها":.. كلي حبيبتي ..القشطه ماياكل الا قشطه ...
هويدا "فتحت فمها بدون نفس .. واكلتها .." :..
بتال "يصب لها عصير":.. تفضلي قلبي .. اشربي ..ابغاك رويانه على طوول .. بس هاه "وطالع في روضه".. مو تسمنين .. ما احبك تصيرين مثل الفيل ..
روضه "طالعت فيه بقهر ... ورمت المنديل اللي بيدها على الطاوله ... و وقفت رايحه لغرفتها ":الحمدلله ...
هويدا "بترجي ":..روضه اجلسي ...
بتال "بتريقه": ..خليها ... مسويه رجيم ...
روضه ...مشت لغرفتها .. وسكرت الباب ...
هويدا : ايشفيها ؟!
بتال "يقرب منها":.. ماعليك منها .... كلي انتي...
هويدا "وقفت":... خلاص شبعت .. بتال ..؟!
بتال "وقف":..عيون بتال ...امري ...
هويدا : .. ابغى اروح بيتنا ....تكفى ..
بتال " بزعل ":.. ماكلمتي 12 ساعه عندي ..مداك تشتاقين لبيتكم ..
هويدا " بكت ":...
بتال "باستسلام ":... خلاص لا تبكين .. تدرين اني ما ارفض لك طلب .. بس بشرط ...
هويدا "تمسح دموعها ":.. وشو شرطك ..؟!
بتال "يأشر على خده ":..عطيني بوسه ..
هويدا "مسكت رقبتها بتوتر ":.. بتال ..
بتال "مسوي زعلان ":.. خلاص اجل مافيه روحه لاهلك ..
هويدا ".... تفكر ...":.. اخر مره ..."قربت منه وبوسه سريعه على خده.. وهربت للغرفه وسكرت الباب ... و"بتال"..مالحق يمسكها ..

"بتال" ..من ورى الباب يضحك .. ماشاء الله عدائه زوجتي ...
هويدا "ورى الباب في الغرفه" ...:..وع ..يا شين زوجتي من فمك ...اهم شي اروح لاهلي وخلاص ..انتهت مهمتي في .."تطالع في الغرفه "..في هالغرفه ... "ابتسمت ..ان اللي خططت له صار وماشي مثل ما تبغى .."..خلاص برجع لبيتي واطلب الطلاق ... وبكذا طويت صفحتك يا بتال من حياتي ..."تنفست براحه ... وجلست على السرير ..وهي تطالع نفسها بمراية التسريحه بفخر ...وتمدح ذكائها .."

......................................................

في الشركه ابو يزيد ...

يزيد أعطى أوامر لريان ما تدخل لمياء الا بعد مايعطيه خبر بالأول .. لانه متوقع جيتها بأي وقت ... وجالس بتوتر يطالع المسج بحيرة ...ويكلم نفسه .." ياترى وش عندك يا لمياء ... انا اتجنب أكلمك ما ابغى اضعف قدامك ..".

دخل سند عنده بعد ماستاذن ..."ممكن ادخل"..
يزيد "ابتسم له ":... اكييييد ... تفضل اجلس ..
سند "يعطيه الملف .. ويجلس":.. هذا ملف الإيرادات للشركة خلال هذي السنة و معاها طال عمرك جدول للأ...
يزيد "يقفل الملف... ويقاطعه ":..وطال عمري لا تكمل ...
سند "بوجه جامد ": ... فيه تعديل ماعجبك ..تحب اغيره ..
يزيد "يطالعه":..سند .. طالعني ..
سند "يطالعه بنظرات كلها هموم":.. نعم ..!!
يزيد "فهم نظرته ... شال الملف على جنب ... ووقف وراح لعنده ...": ..قوم معاي ..
سند "وقف ":.. وين .. طال عمرك ...؟!!
يزيد "عصب .. وقبض يده بوجه سند ": لو عدت هالكلمه مرة ثانيه ..والله بقس على وجهك ..."ومسك يده ...وطلع برا المكتب "...ريان ...اي احد يسال عني مو موجود اليوم ...
ريان : حاضر ...

مشى يزيد .. يسحب سند بيده وراه ...والكل يطالعهم .. سند يحاول يمشي بسرعه يزيد .."يزيد فكني ... بمشي لوحدي "
يزيد "بعصبيه وهو يضحك عليه ":.. امش وانت ساكت ... "وقف فجأه واختفى ضحكه وفك يده من يد سند...وهو يطالعها .. "..

لمياء .. واقفه قريب من الاصنصير ..وبس شافته وقفت بوجهه ...ولا أعطت وجود سند أي اهتمام..."ممكن نتكلم "..
يزيد " طالع في سند ... ومشى من جنبها للاصنصير مطنشها":... يالله سند ...
لمياء "تلف عليه بعصبيه ": انت ليه ماترد علي ...
يزيد "وكأنها مو موجوده ":.. سند تأخرنا ...
سند "مشى لعندها .. وطالع فيها ":.. ماعليه لمياء ..عندنا شغله برا الشركه .. عن إذنك .."ولحق يزيد للاصنصير "
لمياء "تطالعهم بقهر .. وضربت رجلها بالارض .. ومشت لمكتبها"..

.............................................

راكان طلع من بوابة المستشفى .. وهو تايه وضايع يفكر في البنت اللي ضيعها تهور طارق .. بدت ذكريات الماضي ترجع له بعد ما توقع انه نسى ..او بالأصح تناسى .. فتح باب سيارته .. وجلس فيها.. مسك الدركسون بقوه .. وطالع في درج السيارة .. وبعد تردد فتحه .. وطلع جوال منه .. شغله ودخل رمز البطاقه ..ابتسم لمى حصل رقمها .. طالع في ساعه السيارة .. وحسب فرق التوقيت .. واخذ نفس عميق .. وضغط على اتصال ... وجاه الرد بعد كذا رنه ..." yes "
راكان " .. فاتح فمه ومو قادر يتكلم ..."
: hello .. hello

راكان .. قفل بسرعه ... وهو يتذكر ايامه معاها .. شغل السيارة .. ومشى فيها لخارج اسوار المستشفى رايح للبيت .... فجاة رن جواله اللي ببنطلونه ..ارتبك وسحبه بسرعه ... بس هدي لما شاف رقم ..طارق .." نعم يا ابو عبدالله "
طارق : انت قاصد تقفل جوالك صح .. والله ماكان العشم يا راكان ..
راكان "ضرب على جبهته":..معليش يا طارق اعذرني والله مو قاصد ... بس قفلته وحطيته بدرج مكتبي ... ونسيييت ..والله معليش اسف ..
طارق : .. حصل خير .. انا بالمستشفى الحين ..
راكان :..انا طلعت .. خلصت مناوبتي ورايح البيت ...تحب ارجع لك ..
طارق : لا لاتتعب نفسك خلاص.. بس ساعدني بالموضوع اللي طلبته منك .. واوعدك اخر شي ممكن اطلبه ..
راكان : طارق... عطني فرصه استوعب اللي قلتاه لي .. والرقم راح يكون عندك باقرب وقت .. اووكي ... باي ..

**عقد اللؤلؤ** · 09-01-2013, 02:06 AM

رد: •.♥.•° ღ♥ღ رواية من حب عفوي الى حب جنوني •.♥.•° ღ♥ღ بقلمي ...

.......................................

يزيد .. وقف سيارته عند مطعم .. ويطالع في سند .. يالله انزل ..
سند "مسك يده ": تعال وين ..مطعم الحين ...؟!
يزيد "بحماس ":.. ايه .. يالله وربي جوعان ..

.. نزل سند من السيارة يلحق يزيد .. ودخلو لقسم الرجال ... اختاروا جلسه .. وطلب يزيد المنيو .. وطلب كل الفطور اللي عندهم ...
سند "مفتح عينه ":..وش هالطلب كله ... الساعه 11.. مابقي شي على الغداء ..
يزيد "تكى براحه ":.. وقت الغداء يحلها ربك ...ياخي ماجاء لي نفس اكل لوحدي ..
سند : ليه لوحدك .. وابوك وينه ...؟!
يزيد : ما نام بالبيت .. يقول عنده شغل ...
سند : الله يعينه ... كلمك بتال ... كيفه مع الزواج ..
يزيد :.. ما كلمني ولا كلمته .. بس .."تضايق ".. مدري ليه حزنت على روضه ..شكلها امس يقطع القلب ..
سند : ماعليك بتال رجال ماراح يظلمها .. صدقني راح تعيش مبسوطه معاهم .. وبعدين انت وافقت عليه وانت ادرى بوضعه وظروفه ..
يزيد :..ايه ...بس لو ما أصرت اختي عليه .. كان يمكن ماوافقت ..مو مقتنع انها تكون زوجة ثانيه ..
سند : يالله هذا نصيبها ..ايش بتسوي..ويمكن اختك احسن من اختي .. على الاقل تزوجت واحد قريب من سنها .. .."وبضيق"..اختي تقدم لها جارنا وبنته زميلتها بالمدرسه ... يعني عمرة تقريبا خمسين او حولها ..
يزيد : وليه لسى صغيرة ..ليه تضيع شبابها مع شايب ...
سند : يقول يبغى صغيرة عشان تجيب له عيال ..لان زوجته بعد ما جابت له بنت ماعاد حملت ..
يزيد "بتعجب":..يعني مأخذها مصنع تجيب له أولاد .. واختك غريبة وافقت ..
سند : اصلا لسى ما فاتحتها بالموضوع ..متردد بصراحه ..
يزيد : متردد ..انا لو بدالك واضحة مستحيل ازوج اختي شايب ..
سند : بس انا خايف عليها ..دايم سرحانه ومتضايقه ..وتمل لوحدها بالبيت ..لو جبرتها راح يكون لمصلحتها ..
يزيد : وليه كل هذا ..."وضحك ".. طيب زوجنيها ..
سند "ابتسم له .. وما اهتم لكلمته ":.. لو اختي مثل لمياء ..تقدر تتكلم وتدافع عن نفسها وتتصرف .. يا سلام .. بس مشكلتها خجوله وخوافه ..
يزيد " توتر من اسم لمياء ":..

"" جاء طلبهم ... و امتلت الطاوله من كل الاصناف .. ""

سند : الله يعطيك العافيه ..
يزيد "ابتسم ":بالعافيه ..سم ...".. وبدا ياكل ...وسرح بفكرة يقارن بين لمياء وفطوم .. غصب عنه ..وحده يعرفها كل المعرفه .. ووحده غامضه مايعرف حتى لون بشرتها .. ولا عينها ..ولا شي ولا شي غير اسمها .. هالشي ترك عنده فضول قوي يعرفها .. وعلى الرغم من كم مرة زار سند ببيته ماعمره صادفها .. ولا حتى سمع صوتها .. ويتذكر بالمستشفى لما تنومت جدتها .. ماقدر يتذكر صوتها .. "

>>>بتال يتصل بك<<<

يزيد "ابتسم":..اووه ..هلا بتال ...هلا يالعريس ..
بتال : هلا فيك ..اقول يزيد انا طالع من بيتكم شوي وجاي الشركه عندك ..
يزيد : خير ايش كنت تسوي ببيتنا ..
بتال : كنت اوصل هويدا ..
يزيد "فتح عينه وبربكه ":.. فيه شي ..؟!!
بتال "ضحك":.. اطمن بلليل بارجع أخذها .. بس أختك دلوعه تقول اشتاقت لكم وبصراحه انا ضعييف قدام دموعها ..
يزيد "ارتاح": اذا على كذا ..خلها تتدلع .. اسمع ..انا وسند بمطعم ابو شقره.. تعال والحق معانا الفطور.. اوكي ننتظرك .. يالله باي .."وسكر الجوال".. جاي بالطريق ..

سند "يطالع ساعه جواله ":..كويس انه جاي عشان لا تجلس لوحدك .. لاني الساعه 12 بروح يادوب الحق اجيب اختي من المدرسه ..
يزيد : .. ليه المدرسه مافيها باصات ..
سند : فيها .. بس هي ماتحب الزحمه .. وكانت تيجي مع ابو سارة وبنته ..جارنا اللي خطبها ..وماودي تروح معاه بعد اليوم ...
يزيد "حس بقهر من سيرة اللي خطبها ...وطالع في سند بتركيييز":.. سند ... سند .. تزوجني اختك .. ؟!

.................................

**عقد اللؤلؤ** · 09-01-2013, 02:08 AM

رد: •.♥.•° ღ♥ღ رواية من حب عفوي الى حب جنوني •.♥.•° ღ♥ღ بقلمي ...

قراءة ممتعه ...

تذكروا ردودكم تعطيني الحماس للانتهاء من هذه الروايه

شاكرة للكل المتابعه

***مزون شمر*** · 09-01-2013, 05:48 AM

رد: •.♥.•° ღ♥ღ رواية من حب عفوي الى حب جنوني •.♥.•° ღ♥ღ بقلمي ...

اشكرك على الطرح
لي عوده للقرأه ..

**مزمز** · 09-01-2013, 12:24 PM

رد: •.♥.•° ღ♥ღ رواية من حب عفوي الى حب جنوني •.♥.•° ღ♥ღ بقلمي ...

روايه في قمة الرروووعه
جارررري الانتظار ياعسل
الله يوفقك يارب ..

**أوراق الخريف** · 11-01-2013, 01:54 AM

رد: •.♥.•° ღ♥ღ رواية من حب عفوي الى حب جنوني •.♥.•° ღ♥ღ بقلمي ...

يعطيك ألف عافية غلاتي لولو

وسلمت اناملك وفكرك الرائع

بصراحة البارت مرة طويل ( هذا المطلوب)

فيه حماس ومواقف جنان

بس اللي حرق اعصابي برود روضة وجرأة لمياء وانانية بتالوه

اتمنى لك التوفيق

في انتظار سلسلة افكارك الذهبية

اختك / أوراق

***مزون شمر*** · 11-01-2013, 01:36 PM

رد: •.♥.•° ღ♥ღ رواية من حب عفوي الى حب جنوني •.♥.•° ღ♥ღ بقلمي ...

مسكينه هالروضه
مادري ليش عايشه معهم دامه يعملها هالمعامله
وهو مسكين بتال ، هويدا ضحكت عليه وصدقها وش ردت فعله اذا طلبت الطلاق منه ؟

الله يعطيك العافيه
ننتظر البارت الجاي بحماس لاتطولين ...

( رواية من حب عفوي الى حب جنوني ) للكاتبه ( عقد اللؤلؤ ). (كامله)

تعليق

تعليق

تعليق

تعليق

تعليق

تعليق

تعليق

تعليق

تعليق

تعليق

google Ad Widget