طق ..طق...طق..

"ضرب قوي على كبوت سيارته .. وبصوت همجي"... خيييير ايش عنده ابو الشباب واقف هنا ..؟!

يزيد "والفجعه واضحه على وجهه": .. بسم الله ..."فتح قزاز سيارته .. وبعصبيه ".. نعم يالاخو فيه شي ..
:ألحين انا اسألك والا انت تسالني ... "قرب منه .. وهو مركز في ملامحه ولاحظ انفه احمر وعيونه حمراء دليل انه كان يبكي".. لحظه .. انت ... انت ... صديق بتال ..؟! ... الا صح صديقه ...
يزيد "ضاغط ع الجوال بقوه":.. ايه انا صديقه انت مين .. وبأي حق تضرب على سيارتي بهالشكل ...
: انا سند ...

"سند عايش في نفس الحي مع بتال ... اصدقاء دراسه .. درسوا مع بعض الابتدائي والمتوسط وما كمل معاه الثانوي عشان يشتغل ويصرف على جدته واخته .. سند ولد شهم ويحب الخير مع انه انسان غير منظم لا باوقاته ولا بشكله.. طويل ونحيف واسمر يحب يلبس الثوب الابيض والشماغ مرمي على كتفه ..دايم تشوفه يمشي وهو ماسك طرف ثوبه ورافعه بيد .. ويلعب بالمسبحة بيده الثانيه "..

يزيد "وصبرة بدا ينفذ ":.. طيب ..؟! والمطلوب يا سند ... انزل اضرب لك سلام والا ايش ..!!
سند "بلا اهتمام": عشان بتال بس ..ماني براد عليك والا كان شفت شي عمرك ما شفته .."ولف يأشر على البيت اللي وراه"..هذا بيتي وانت ساد علي باب الكراج ..
يزيد "بحرج": .. أأ سف .. معليه ماكنت مركز .. "كان بيحرك السيارة "
سند : والله منت ماشي الا لما تشرب فنجال قهوة .. حياك اقلط .. صديق بتال صديقنا ...
يزيد"ابتسم" : لا مشكور ما تقصر ... ماني فاضي ..
سند : على راحتك ... بس ما قلت لي متى جاي ؟!
يزيد "بحيرة": والله مدري .."يأشر على الجوال "..رقم شقته على شاشة جوالي لي ساعه ماني عارف كيف اقول له ...
سند "لاحظ حيرته" سحب الجوال من يد يزيد .. وضغط على مكالمة وهو لاف من قدام السيارة بيركب جنبه و طلع السيارة ..سكر الباب و"يزيد " فاتح فمه ومستغرب ...
سند : الوووو ...بتال موجود ..ممكن اكلمه لو سمحت ..."ويأشر ليزيد بيده على أساس يرفع قزاز السيارة ".. الو اخ بتال ... عندنا الوالدة مزنه في المستشفى .. راح تسوي عمليه المرارة ونحتاج توقيع ولي الأمر..
يزيد "هديت ملامحه .. والتزم الصمت والإنصات"
سند : ادري انك بلندن .. بس لازم تيجي .. لا أختك ما ينفع .. هذا اللي موكل فيه باقي الامور مو من اختصاصي ..حبيت أبلغك بأمر من الدكتور .. على راحتك ... مع السلامة ...أووووف ما بغيت اقفل منه ...
يزيد"باهتمام" : هاه ايش قال ..؟؟!
سند"حك راسه" : مدري حسيته ما اقتنع .. يمكن يكلمك..ول....

"جوال يزيد" بتال يتصل بك <<<<<<<<

يزيد "بعيون مفتحه ": هذا بتال .. "وطالع في سند" .. ايش اقول له الحين ..
سند : لا تقول له شي كأنك ما تدري الا منه وقول له انك بتروح تشوفها وبعدين تعطيه خبر ..لازم ما يدري إلا إذا وصل هنا وإحنا جنبه.. الخبر مو سهل عليه بالغربة لوحده..
يزيد"فهم على سند ..واخذ نفس قوي .. وتنحنح.. ورد على الجوال":.. هلا بتال ...
...................................

روضه بالمستشفى والدكتور يكشف عليها ..هي مازلت في غيبوبة..

ام محمد: هاه يا دكتور بشر كيفها الحين .؟!
الدكتور : وضعها مطمن ..
ام محمد : الحمدلله .. بس ليش ما صحيت ...ليكون السكر لسى مرتفع عندها ..؟!
الدكتور : لا بالعكس السكر عندها في أحسن مستوياته .. بس الظاهر انها تعرضت لصدمه نفسيه خلتها تختار النوم كهروب من الواقع ...
ام محمد "بحزن": إي والله ربي يعينها على ما أصابها .. طيب ايش الحل معاها كيف نصحيها ..
الدكتور : راح نحولها لدكتورة نفسيه عشان تعرف تتصرف معاها .. عن اذنكم .."وطلع من الغرفه"...

...........................

الساعه 8 مساء .. في شركة ابو يزيد .. في مكتب نائب المدير ..

يزيد "يتكلم بالتلفون": ابغى الحجز في اقرب فرصه .. دبرها من عندك .... ايه شخص واحد فقط ... أمه وأخته توفوا ولا لحق على دفنهم ولازم يرجع .. انا ادري ان فيه شركات طيران كثيرة بس انا ابغى شركتكم .. مشكوور .. ما تقصر .. "قفل السماعة"...

السكرتير"ريان" يدق الباب بخفه ودخل.. بيده ملف "أستاذ يزيد .. هذا ملف ل....."
يزيد "على نفس وضعيته من لما سكر السماعه": ريان .. الملف مهم والا يتأجل لبكرة ..؟!
ريان : هذا ملف الخطه التسويقية للسنة الجايه .. يعني تقدر تشوفه وقت ثاني إذا تحب ..
يزيد "هز رأسه بموافقة "... فطلع ريان بهدوء وسكر الباب على يزيد .. اللي سند رأسه على المكتب .. وهو يفكر ببتال .. طالع في جواله بتردد .. ومسكه وكلم .....الوو ... هلا بتال ... كيفك ؟!
بتال "بتوتر": هلا يزيد .. هاه بشر كيف امي ..؟!
يزيد : انا رحت لها المستشفى بس ماقدرت ادخل عندها انت تعرف لازم أوقات الزيارة .. المهم أن
بتال "بعصبيه": ايش ذا الكلام يا يزيد .. حتى اختي ما ترد علي لا على البيت ولا على جوالها ..ايش صاير ..
يزيد"بربكه": بتال .. بتال اسمعني خلك من هالكلام كله .. ان شاء الله بكرة تيجي وتطمن بنفسك عليهم .. انا بحاول ادبر لك حجز .. وان شاء الله نلاقي ..
بتال "يقاطعه": كيف كيف اجي وماجت الموافقة على الإجازة و ..
يزيد "قاطعه":.. بتال اسمعني تعال انت وبنشوف بعدين الأوضاع كيف ..
بتال : بس ...
يزيد : الحين انا مشغوول لا تتصل علي .. وقت ما يجيني رقم الحجز بكلمك ..يالله مع السلامه .."قفل السماعه قبل لايسمع رده" ..."معليش يا بتال سامحني "

.............................

في المستشفى ...
روضه تفتح عينها شوي شوي .. وتحرك راسها يمين ويسار بشكل بطيء ..
خديجه "انتبهت لها .. ووقفت بسرعه وقربت منها": .. روضه ..روضه .. تسمعيني حبيبتي ..
روضه "بتعب":.. اه ..
خديجه : رووضه .. انا خديجة سامعتني ...
روضه "تطالع فيها بصعوبه":..خديجه ..؟! .."تحاول تركز حوالينها.."..وين انا ..؟!
خديجه "بفرح" : روضه ..روضه تسمعيني ... انتي بالمستشفى ..
روضه "تحاول تجلس وتساعدها خديجه بوضع المخده ورى ظهرها ":.. م س تشف ى .."ضيقت بصرها .. تحاول تسترجع اللي صار .. فتحت عينها ..وشهقت .... ورفعت يدها بسرعة لفمها " .. أمي .. أمي .."تجمعت الدموع بعينها .. ورفعت يدها الثانيه لصدرها ".. صدق ام ي مات ت .."طالعت بخديجه .. ودموعها تنزل بقوه"..
خديجه "دمعت عينها..وهزت رأسها ..":ادعي لها يا روضه ادعي لها ..
روضه : يعني خلاص صرت يتيمه .. لا اب ولا أم "تبكي بقووه" اه يا يمه لمين تركتيني بهالدنيا ... اه يمممه... ليتني جيت معاكم مكه يا ليتني .... اه ...ياليتني سمعت كلامك ..اه.. ياليتني حققت لك امنيتك فيني انك تشوفيني احسن البنات...اه .."قربت منها خديجه وحضنتها"..نار نار في قلبي يا خديجه ..
خديجه : اذكري الله .. قولي إنا لله وإنا إليه راجعون..
روضه "مع دموعها": إنا لله وإنا إليه راجعون.

استمرت روضه تخرج من صدرها الاه بعد الاه على فراق والدتها .. وما كان من خديجه الا البكاء معاها ومؤزرتها...
.........................

"يزيد" .. يدخل فلتهم .. وهو رامي الشماغ على كتفه .. ويمشي ببطء .. وهو يفكر في اليوم هذا قد ايش فيه من صدمات وتعب .. جلس على أول كنبه صادفته في الصاله الواسعه اللي تتوسط فلتهم الكبيره ..نزلت "هويدا" وهي مركبه السماعات في إذنها ومركزه على جوالها وتضحك وتهز أكتافها.. من صوت كعبها .. طالعها "يزيد" ابتسم من شكلها..
هويدا "بالصدفه رفعت عينها وشافته يطالعها ويبتسم.. سحبت السماعات من اذنها .. ونطت عنده":.. هلا اخوي .."مدت يدها تصافحه".. كيفك ؟ شو اخبارك ؟..من زمان عنك ..
يزيد "مد يده لها صافحها": الحمدلله بخير..
هويدا : وليه تقولها كذا بتعب ..؟!
يزيد : صار اليوم موضوع تعبني شوي ..
هويد "بلا اهتمام":.. اها ... "مسكت جوالها .. تتصفحه "
يزيد "يطالع فيها يبغى يشوف هي مهتمه تسمعه والا بس كالعاده مايهمها شي ولو فضفض لها ما يلاقي رد يريحه": تحبي تعرفي ايش متعبني ...؟!
هويدا "طالعته ":.. بصراحه لا .. لان سوالف الشغل ما تهمني ..اهم شي عندي الفلوس وبس ...
يزيد "ابتسم على خفيف": خلاص على راحتك بلاش .. فعلا ليش اتعب نفسك بامور ماتهمك ..

جوال يزيد >>>>>>***** يتصل بك

يزيد "بتعجب":.. مين هذا رقمه غريبه ..."ضغط السماعه" الوو..؟! .. مين معي ؟!.. سند ؟!
سند : إيه سند يا يزيد .. صديق بتال في الحي ..
يزيد : ايه عرفتك .. هلا سند .. بس مستغرب من وين جبت رقمي الخاص ..؟!
سند"ضحك": لما أخذت جوالك وكلمت بتال .. عطيت جوالي رنه .. عشان لو بغيتك ...
يزيد"بملل": .. والحين فيه شي داق عشانه ؟!
سند : ايه بغيتك تمر على بكرة اذا انت اللي بتجيب بتال من المطار ..
يزيد : وليه امر عليك .. ؟!
سند : ولو يا يزيد بتال هذا اخو ..وهو في وقت صعب لازم الكل يكون معاه .. وحتى انت اخس منه ولا تزعل مني .. لازمكم رجال قوي مثلي يعني ...
يزيد"يحاول يمسك اعصابه": .. خير ..خير . اذا ما نسيت اتصلت عليك ..
سند : اقول لا تنسى سمعتني .. يالله مع السلامه .."قفل الخط"
يزيد "يطالع في الجوال بتعجب": اشتغل عند ابوك انا ..."رمى الجوال على الطاوله".. استغفر الله ..وش هالاشكال ... الله يعينك يا بتال ...
هويدا "طالعت مستفسرة": مين سند ؟! .. اول مره اسمع هالاسم "وضحكت" ..
يزيد : هذا صديق بتال في الحي .. تعرفت عليه اليوم ..
هويداء "بلا اهتمام": اها ..
يزيد : هويدا ...تدرين ان ... ا ن ام بتال واخته صار لهم حادث وتوفوا ... وانا قلقان على بتال ...
هويدا "تسمرت عينها شوي في الارض .. واخذت نفس عميق .. وطالعت في يزيد وابتمست": عادي وليه القلق .. اغلب الناس ماعندهم امهات وعايشين ... ريح راسك وراح يعيش وينساهم ..
يزيد "طالعها باستغراب": يعني الموضوع عادي عندك ..؟!
هويدا "وقفت ": انا بروح السوق .. اوكي ...باي "واخذت جوالها وطلعت تركض لغرفتها .. تلبس عبايتها "

...........................

اليوم التالي في العصر بالمستشفى ... الدكتور عندها بالغرفه ..

روضه "بعصبيه" :.. خلاص من المغذي ابغى أصوم ..بس السستر مارضيت تفكها ..
الدكتور : وليه الزعل حتى لو شلنا المغذي فاتك اليوم خلاص ..
روضه "انقهرت من برود الدكتور": انا مو تعبانه .. اكتب لي خروج اليوم ...
الدكتور : انتي ما فقتي الا الصباح من الغيبوبه .. افضل تبقي يوم ثاني ...
خديجه : روضه خلاص الدكتور ادرى بحالتك ..
روضه : لا بطلع انا بخير ..
الدكتور : الساعه 11 بالليل بمر مرة ثانيه لو السكر عندك أستقر .."طالع فيها وابتسم ".. راح نقول لك مع السلامه ..ماشي ..
روضه "باستسلام":ماشي ..

...طلع الدكتور من عندها ... وام محمد دخلت شايله معاها سلة فيها أكل وقهوه ...

ام محمد "بس شافت روضه صاحيه .. ": ياربي اسعد هالوجه ... "وقربت منها تحضنها ..".. كيفك يا بنتي عساك بخير .."ودمعت عينها "...
روضه "حست بحضنها.. وبكت":.. هلا خالتي ..عساني ما انحرم منك .."وبكوا الثنتين بحضن بعض "..
خديجه "حبت تخفف من الموقف ":.. الله لنا ... محد طالع فيني ... لا سلم علي ولا سالني عن حالي ولا حضني ..."سوت نفسها زعلانه"..
روضه "طالعت فيها وهي تمسح دموعها .. وابتسمت":انتي اختي يا خدوج اللي ما جابتها أمي .."بصوت واطي" الله يرحمك يمه ..
ام محمد "تطالعها بحب": ايه يا بنتي .. ادعي لها .. عسى ربي يصبرك ويجبر مصابك ...والحمدلله على كل حال قولوا الحمدلله
الكل : الحمدلله ...الحمدلله
ام محمد : خديجه .. أخوك ينتظرك برا .. روحي وانا بجلس عندها اليوم ...
خديجه : طيب يمه .. بس اشوف معاك سلة جبتي لكم فطور ؟!
ام محمد : ايه يا بنتي جبت لي فطور.. وبقيت لكم بالبيت .. اذا وصلتي سخنيه ..
روضه "بحزن": يالله تعبتكم معاي ...
خديجه : أي تعب انتي الثانيه .. "لفت تاخذ عبايتها".. يالله اشوفكم على خير ..
ام محمد , روضه : مع السلامه ...

....................................
يزيد ... أنتهى من فطوره .. ولبس وطلع لسيارته بالكراج ..

>>>>>>> ***** يتصل بك <<<<<<<<

يزيد : مو غريب هالرقم ... ألووو ...
سند : هلا يزيد ... يالله ياخي تاخرنا ...
يزيد : تأخرنا .. على ايش ؟!
سند : على بتال .. متى بتحرك للمطار..
يزيد : اها ..أ أ انا .. مشيت ...
سند "بتعجب": مشيت متى ؟! .. ليه ما افطرت بالبيت ..؟!
يزيد : الا فطرت بالبيت ...
سند : وانا صليت المغرب في المسجد اللي جنبكم ..وجالس انتظرك عند باب فلتكم بسيارتي .. ماشفت احد طلع ..
يزيد"مفتح عيونه":.. انت عند باب فلتنا ..؟!... "يضحك بحرج ".. صدتني اجل .. والله بالسيارة ماحركت ...
سند "ابتسم": يالله انتظرك.."وقفل"
يزيد : لا والله البلشه ... الحمدلله والشكر .. "شغل سيارته اللكزسس السوداء اخر موديل .. وفتح باب الكراج بالريموت.. وطلع من بوابة الفله وشاف سيارة هايلكس غماره صوت محركها واصله لعنده وهي بعيده وكل ماقربت صوتها صار اقوى .. ونزل منها "سند" بنفس هيئته المعتاده ثوب وشماغ على كتفه ومسبحه بيده.. قرب من سيارة "يزيد"..."
سند : سلام ... كيفك ؟
يزيد : هلا ...
سند : هاه نروح بسيارتك والا سيارتي ...؟!
يزيد "يطالع في سيارته وبعدين فيه.. ابتسم.. بس لاحظ الجد على ملامحه ..":.. أطلع معاي ...
سند : يالله دقيقه اضمن سيارتي واجيك ..."ركض على سيارته "
يزيد"بسخريه":الله واكبر اللي يسمعك يقول شبح احد بيسرقها "وضحك"..
سند "طلع السيارة ": يالله مشينا للمطار
...............................