بتال ..كان جالس على السرير .. ومتوتر من اللي صار بينه وبينها ... دقايق الا يشم ريحه حريق ... فتح باب غرفته بسرعه ... وخرج يركض "... روضه ... روضه ...."

كانت "روضه" في المطبخ وقد جمعت جميع اقمصة النوم و اللانجري اللي شرتها مع زوجة خالها .. ووضعتهم في مغسله المطبخ واخذت الكبريت واشعلت فيها النار ...وهي تبكي ومتوتر ..
دخل "بتال" المطبخ يركض ... شاف النار مشتعله ... بسرعه فتح صنبور المويه ... وطفيت النار ...مد يده يشوف ايش كانت تبغى تحرق ... بس "روضه" كانت اسرع منه سحبتها عشان لان يشوفها ..ولكن" بتال" اصر وسحبها .. ولمح بقايا اقمصة نوم.. كانت تبكي "روضه" من القهر ..هربت من نظرات بتال لغرفتها ... ركض بتال وراها .. ومسك الباب قبل لا تقفله ...وبجديه .."روضه .. لازم نتكلم ... تكفين لا تقفلين الباب "
تركت "روضه" الباب مفتوح..وجلست على سريرها ..وحطت يدينها على وجهها وهي منهارة وتبكي .. قرب "بتال" منها وجلس جنبها .. وهو يناظر بالارض ..وبعد تردد .." انا يمكن غلطت لما فكرت اني اقدر ارجع ايام زمان .. كنت ابغى ارجع لايام امي وسميرة باي ثمن ..كنتي الشي الوحيد اللي يذكرني فيهم .. خالك ووحدتي كانت السبب اني اطلب يدك للزواج عشان تكوني معاي طول العمر كجزء من ماضي اللي مشتاق له .. وظلمتك وظلمت مشاعرك ..كنت اتوقع ان ورقة الزواج اللي تربطنا ماراح تغير من نظرتنا لبعض "
روضه "نزلت يدها من على وجهها..مسحت دموعها .. وصارت تسمع له"
بتال :.. تذكرت سميرة لما كانت تقول يا بتال انت كبرت .. روضه مو اختك .. لا تسلم عليها .. وانا ماكنت مستوعب اللي تقوله .."زفر بقوه .. وطالع فيها .. مد يده وحطها على كتفها "..روضه ..انا ظلمتك لما طلبتك للزواج .. وانا مستعد اصحح غلطتي ..
روضه "طالعته بنظرات تساؤل "..
بتال : اذا تبغين ننفصل .. فانا مستعد .. وتشوفين حياتك مع واحد يحبك .. ويقدرك ..
روضه : بتال انا ...
بتال "قاطعها .. ووقف ": لا تردين الحين ..فكري بالموضوع .. لو حبيتي تستمري معاي زي اختي اهلا وسهلا .. ولا تنتظري مني شي .. ما حبيتي برجعك بيت خالك وورقتك معاك .. ومعاها بوسه على الراس بعد ..."وقف ومشى لعند الباب ".. فكري بالموضوع ..
"طلع من غرفتها "...وتركها مصدومه .. رجعت تبكي اكثر من قبل .. للاسف صارت دموعها هي متنفسها الوحيد ... الحب الوحيد بحياتها مو معترف فيها كانسانه كيف بيحبها ويبادلها الشعور ..

..................................

في الصباح .. وفي فلة ابو راكان ..

صحيت " لمياء " بكل مرح ونشاط ..بدت تلبس وتتضبط .. وصورة " يزيد " ما غابت عن عيونها ..توترت لما تذكرت تعامله معاها ..لبست عبايتها المطرزة بالفصوص الزرقاء .. وتحجبت بشكل مرتب .. ضبطت مكياجها ...واخيرا انتهت من التجهيز .. اخذت شنطتها وملفها بيدها .. وطلعت من غرفتها .. وهي نازله من الدرج ...حصلت "راكان" طالع من الفله .. وباعلى صوت "راكان ...راكان "
راكان "لف عليها":لميووه ... وش مصحيك الحين غريبه ...
لمياء "نزلت تركض من الدرج لحد ما وصلت عنده ":راكان .. توصلني معاك شركة بو يزيد ..
راكان : ليه وين السواق ...
لمياء "مسكت يده .. ": انا ابغى احس ان عندي اخ يهتم فيني .. ويوديني ويجيبني ..
راكان "طالعها بنظرات شك":والله انتي مو لله تسوين هالحركات ..احس وراك شي ..
لمياء "ابتسمت له": ..يالله مشينا ...
راكان : مشينا ... وامري لله ...

.................................................. ......

رن جوال بتال ... وهو بغرفته ...بالقوه سحب يده من تحت اللحاف ورد .. وهو مغمض عيونه ..."هممم"
هويدا "بدلع": صباح الورد والفل والياسمين ..
بتال "ابتسم": اة يا قلبي ... صباح النور ..
هويدا "بغنج":بتولي انت لسى نايم ... اصحى يالله ...
بتال "عض على شفايفه .. وبعد اللحاف عنه .. وجلس ": هذاني والله صحيت عشانك ..
هويدا "ضحكت": فديت اللي يسمعون الكلام ..
بتال : امري وش بغيتي ...
هويدا : مليت من البيت .. نفسي اطلع ...
بتال "رفع حواجبه":والمطلوب ..
هويدا : بصراحه نفسي اشوفك ..ايش رايك نطلع في كوفي شوب او... او أي مكان انت تختارة ...
بتال : اسمعي يا بنت الناس ..انا مو راعي بنات ومكالمات ولقاءات وخرابيط .. بس مدري انتي من وين كنتي تطلعين لي .. في الوقت اللي اكون متضايق تتصلين تلعبين بعقلي .. وصرت افكر فيك ليل ونهار ..ارحميني ..
هويدا "بدلع" : لازم اشوفك بتال ... بليييييز ...
بتال : مدري ... اشوف ..
هويدا : اوكي انتظر منك خبر ..
هويدا .. رمت الجوال بعصبيه ... "والله لاخليك تركض وراي .. منت راعي خرابيط هاه ...لو ما ادري انك غبي ..ماجريت وراك ... اووووف اكره شعور الذل "...
.................................................. .

يزيد ... في مكتبه ... دخل عنده السكرتير "ريان" .. يخبره ان "لمياء" تنتظرة برا .. دخلت "لمياء" ..معاها اخوها "راكان" .. "يزيد" لما شاف "راكان" معاها وقف وقرب منه يصافحه و يرحب فيه ..." يا هلا والله براكان .. حياك " .. اشر له يجلس .. ورجع يزيد .. لمكانه على المكتب..
لمياء "كانت مستعده انها تصافح يزيد .. ولكنه طنشها ..خلاها تجلس قرب راكان ..وهي متوترة"
راكان : اتوقع تقابلنا قبل كذا في كتب كتاب بتال ..صح ..
يزيد : ايييه .. عرفتك ..وفيه احد ما يعرف الدكتور راكان ..
راكان : تسلم .. "طالع في لمياء" ..مديرك ذوق ..
لمياء "طالعت في يزيد .. اللي رافع لها حواجبه وابتسم .. وبحرج": ايه ..ذوق ...
يزيد : خير يا دكتور راكان .. أيش سبب الزيارة ..
راكان : اولا بدون القاب قول لي راكان وبس ... ثانيا لمياء كانت تبغاني اشوف مكان عملها ...
يزيد : تشرفنا بأي وقت ..."طالع في لمياء .. ولمح ملفها بيدها ".. ملفك معاك اليوم .. هاتي اشوفه ...
لمياء "وقفت .. واعطته الملف ": خذ ...
يزيد "طالعها فيها .. وبعدين طالع في راكان ": اوكي .. براجع اوراقك .. اتركي لي رقم اتصل فيك ... وبخبرك باقرب فرصه ..
لمياء "بنظرات زعل": وليه كل هذا .. خلاص شوف الأوراق الحين ..وبكرة ابدا الدوام...
راكان "وقف": .. اوكي خذ رقم جوالي .."ومد يده يصافحه " .. ومشكور يا يزيد ...وتشرفت اني تعرفت عليك ...
يزيد "يصافحه": يا هلا والله ... والشرف لي انا ..."طلع بطاقة ارقامه من جيبه .." تفضل هذا الكرت فيه رقمي وارقام الشركه ..
راكان "اخذ الكرت": على خير ...يالله مع السلامه...

"راكان" و"لمياء" ..طلعوا من عند "يزيد" .. وهم ماشين الى الاصنصير .. راكان يطالع في الكرت ..." يزيد عبد الجليل يزيد"
لمياء "تضغط زر الاصنصير ": هذا اسمه ...
راكان "يطالعها بتعجب": برضه يعني ما تعرفين تقولين الاستاذ يزيد .. والا تفضل ..
لمياء : يووه يا راكان .. بلاش تعقيد ..
راكان : تعقيد .. !!! ... ترى هذا مديرك لازم تحترميه ...
لمياء : ترى لا يغرك انه مدير .. بابا قال لي ان عمره يمكن الحين 21سنه بس ...تخيل ...
راكان : الحين ايش دخل العمر .. هذا مديرك المسؤول عنك ..
يعني انا في المستشفى لازم احترم مديري ...
لمياء : انتو دكاتره يا حبيبي ... في يدكم حياة الناس ...
"فتح الاصنصير .. وطلعوا منه"
راكان : الحياة بيد ربي ..و..
لمياء "بلا اهتمام": قول لي الحين عندك مناوبه ...لان عندي مكان نروحه راح تنبسط منه ...
راكان : لا ماعندي بس مواعد طارق نتقابل في الاستراحه ..
لمياء "مسكت يده": تعالي بلا طارق بلا خرابيط ...

....................................