،



والله بجد اشتقنا .. !!

بس قبل بقول والله ماعندي سالفه بس شفت مدونتي شوي وتصير بالصفحه
الثانيه وقلت يابو مايصير ذا الكلام !!

والسبب الاهم وعدت ناس اني اكسر العزله واكتب اليوم
لاني في حاله ملبده بالغيوم مالكم اي علاقه فيها فـ المنتدى اقصد

بس ملبده بالغيوم وماحب ادخل يوم اكون بذا الحاله
فـ اكون اكثر مع نفسي

بس ماش انكسرت العزله تخبرون فيه اشياء مانقدر عليها احيان تكون اكبر مننا

سمعت سوال مره يقول ::

اذ كنت مخير بين اثنين ولازم تختار !

لو خيروك بين الصدق .. والحبيب .. وين بتكون ؟

مستعجل وربي ولا عطيتكم رايي بكل صراحه ووين بكون بذا الحاله بس خلونا نشوف
انتم وين بتكونو اكثر مع الصدق حتى لو فيه شي من مضره للحبيب !!

او مع الحبيب لو فيها شوي بعد عن الصدق !!

وبس والله .. خلوني ارجع شوي لعزلتي زي ماقلت لكم وربي جاي عشان
وعدت ناس اني اجي ولا كان كملت الاسبوع

كونــو بخير .. سلام !! ولا تنسون الفاضي يقول لنا رايه وين بيكون
عادي ترا نقبل الاراء اللي تكون فيها دبلوماسيه اكثر

طبعا عدلت شوي بالكلام لان نور اخذنا لمكان غير اللي ودي نتكلم فيه

ســـلام

يامساء الخير بها الخميس باقي كم ساعه وتبدا الاجازه وبعضهم
بدت عندهم من اولا بس يالله هانت واجازه باذن الله اسعد للكل

اشوف ودره فرحانه بيوم اجازه تعالي شوفي عندنا من كثر الاجازات اصلا نسينا عددها
لا وازيدك من الشعر بيت باقي حول 26 يوم وتبدا الاجازه اللي تجلط

اجل بعد كم اسبوع بناخذ اجازه لرمضان كامل وعيد الفطر كامل والقعده تحليه كامل
والحج بعد كامل قسم هذه الاجازات واللا بلاش يمديك تلف العالم كله ونص الاجازه مامر
ويجيك من يفرح بيوم وزيه مع نفسك والله يابنت الاجواد وداومي وانتي تضحكي بعد

والسنه هذه بسوي زي الطلاب والمدرسين وباخذ شهر عشره وتسعه اجازه يعني
كلها كم يوم واضف قشي واشوفكم باذن الله بالقعده

واحلى تحيه للناس المداومه وكذا !!

تصدقون يحزنون الطلاب اللي عندهم في رمضان دراسه ذول اكثر ناس
يحزنون وودي لو بيدي اخليهم ياجزون زي السعوديه بس ماش بيدامون وهم صايمين >> طبعا مقصد ورده

فـ الاخير

كل شي بيمر زي ماجا نسال الله السلامه والصحه والعافيه واللا الباقي مقدور عليه
كونــو بخير .. سلام

آأإأآم بآأإأآك ويدي ماهي بمخباي
نسيت شي والله واصلا داخل بذا الحراراه عشان اتكلم فيه بس من شفت كلام ورده
عن الاجازات مدري وش صابني كاني فرحان بالطقطه عليها مدري وربي

المهم كنت كالعاده في مدوناتكم زي ماتوقعتكم مبدعين والله
نور صاير منوعات مغير يلقط من المدونات ويجيبه بمدونته ويعلق عليه بطريقته
صح احيان يقلبها مدري كيف بس ونيس ذا الادمي وربي يوفقه ويسعده

نفر يوم يبدع احسه شي عادي جدا الرجال يملك قلم مميز وطرحه دايم متالق
اهنيك على ذا الشي يابو الانفار بالنون والفا ترى لحد ينكب عفشي ويقراها بالباء والقاف
امزح وربي واكوس من ينمزح معم نفر ربي يسعده

نجي للنفسيات تنهيدهـ وشهرزاد مددري وش صاير فيهم ذابحهم البخل علينا
مدري ماعاد يشفو مدوناتنا تحمس للهربته يكتبون ويطلعون بدون حتى شي لو بسكوت شاهي
اي شي اهم شي لا تتركون مدوناتكم فـ قارعه الطريق شبه فاضيه
لانكم يوم تكتبون بجد بجد تدون المكان اكثر اكشنه واكثر حماس لنا انا نكتب معكم

فـ ربي يسعدكن ثنتينكم لا تبخلون علينا بالهربتات وكذا !!

طيف ومين مايعرف طيف يوووه ياهي راعي هربته وسوالف وربي مبدعه ماشاء الله عليها
يوم تكتب ونقعد نقرا لها اتحدى لو ماتتغير نفسيتك للافضل قلمها مره مميزه
اهنيك على روحك الحلوه بصراحه والابداع ماهو غريب عليك ربي يسعدك

وماشاء الله كل يوم نكتشف يها موهبه غير شوفو كيف خطها بالانجلش يامشاء الله
اول احس كل البنات خطوطهم زي بعض مخيسه طلع فيه عينات يجي منها

ابو العز بطل الدوري ابو نقطتين اللي كالعاده يفشلونا برا وفالحين بالمحليات
صاير هو كمان بخيل وماتشوف له سوالفه وهربتات وطلعات على بناتنا هنا بالعاده بسطر
يخلي نص بنات عبير تقوم قيامتهم

مين كمان بقى !!

صح ورده ام اجازه يوم مدري الدراسه اشغلتها واللا الجوال اللي انسحب منها السبب
صايره ماتنشاف الى مره بالشهر غطت على القمرا ( قمر نص الشهر )
المهم بالتوفيق ان شاء الله وربي يسهل امورك ويختمها معاك على خير وتبيضي وجهه اهل كـ عادتك دوم


يالله .. باقي بس موضيع صغيرون شفته بمدونته قريبه بروح اجيبه
واعلق عليه شوي خليكم قريب

بشرب الشاهي وراد لكم .. سلام

وصلت من ثالث وهالمره جايب معاي كلام المفروض ينعلق على
مدخل القسم ونبروزه عشان يقراه كل واحد قبل يدخل اي مدونه وقبل يرسل اي صراحه
وكمان قبل يستقبل اي صراحه كلام رهيب وفي محله

لحظه بروح اجيب !! !!

هذه شهرزاد اللي تقوله وهي والله صادقه وابصم لها بالعشره بعد
احيان نكتب بنيه صافيه ومانبي شي بس المشكله المتلقي يكون في حاله ماهي بذاك الزود

او العكس يوصل لنا كلام بنيه اصفى من اي شي بس نكون في وضعيه هجوميه
ومطفين الانوار وماشين بسرعات مجنونه

ونجيب العيد فـ الاستقبال وتنحسب علينا هدف ونخسر بسبب تهور مستقبل او عدم وعيه
عشان كذا دايم اقول لحد يرد على اي شي بسرعه لحد ياخذ الانطباع بسرعه ولا يفسره بسرعه

خذ وقتك وخذ نفس وعلى مهلك واقرا من ثاني بوقت ثاني والله راح تكتشف اشياء
ما انتبهت لها من المره الاولى وقد صارت معاي كثير وربي وبغيت اجيب العيد

بس الله سلمني من الانبراشه وعدت الامور على خير !!

المشكله في عالمنا النتي دايم يعتمد على الارسال والاسقتبال زي كورة الطايره الاهم الارسال
والمهم الاسقبال لازم يكون اللاعبين الثنين في افضل حالاتهم عشان تتسجل النقطه لفريقهم

خليكم صاحين دايم وقدمو النيه الطيبه دايم وبلاش الفهامه الزايده اللي نسويها احيان
ونحاول نقرا بين السطور ويعننا حنا الفاهمين واللي قافطين كل شي

لا خفو على انفسكم قبل تخفون على الناس بعضنا يتعنا عشان يكتب ونيته مره صافيه
ويلقون كلام ماله داعي بعدها !!

يمكن كثير ارسل صراحات مره جاني رد يقول انت وش تبي بالضبط
ترا عارفينك زين قسم كذا عيوني مدري من مين ومدري ش ارد واقول

لاني يوم ارسل احيان ارسل لخمس او ست من الاعضاء هنا في نفس اليوم
ومدري مين اللي زعله كلامي مع انه والله تقريبا نفس الشي مع اختلافات بسيطه

فا تعوذ من ابليس واقعد القط بوجهي طول اليوم فشيله والله عاد
بس تستمر الايام وتعدي اهم شي اكلها واسكت !!

عشان كذا احيان ودك ترفق مع الكلام كاتلوج كامل بالقصد من كلامك عشان محد يفهم غلط
او يحكم بشكل متسرع

قرقر واجد صح ادري ادري والله بس جعان هروج واخوي متصل يقول مسوين غدا
جايهم ضيوف تعال قبل 2 طيب دوامي يتنهي 2 وربع مايصير

شكل راح علينا الغد >> وش دخلنا طيب

مدري بس مقهور واتحلطم يالله كونو بخير .. ودعواتكم الحق على غداهم
واذ احد بيعزمني ترا جوالي ماتغير وصار عندي سناب ابشركم

<< برا برا

لا تدف طيب بطلع .. اجازه سعيده باذن الله للجميع
فـ امان الله وحفظه

سلام

ياصباح الليل .. جايكم تالي الليل من الفضاوه
اول القى من يشغلني لي كم يوم فاضي مغير اتسدح واتحلطم
فالله يبعد عنكم الفضاوه اللي على غير سنع ...

نفر وشهرزاد يسالون اذ قصدي في تساولي الوقوف مع الصدق
او الحبيب اذ كنت مضطر تختار لك واحد

ايوه نفس تفسيركم هو اللي اقصده بس خلونا نسهلها شوي
بعضنا يتحسسون من كلمه حبيب
فخلونا نقول صديق عزيز !!

بالنسبه لي راح اوقف معاه لو فيها اللي فيها اهم شي
اوقف معاه وماحسسه انه لوحده طبعا قدام الكل

بس بيننا بغسل شراعه غسال على قولتهم .. لان احيان نخطي ونحتاج من يدعمنا
يوم نكون في موقف ضعيف او شي زي كذا

فراح اكون معاه مهما يصير وبتحمل نتيجه قراراي اهم شي نطلع منها
بسلامه وبعدين لكل حادث حديث !!!

احيان كثيره نغلط في اشياء تافهه ويحاول بعضهم يكبرونها عشان يبون يوصلون لشي
او ماصدقو خوينا غلط عشان كذا بتلقوني معاه !

وبعدين بعد ماتهدى الامور اكثر ماعندي مشكله نوضحها من ثاني
خاصه في الامور اللي مافيها تجاوزات على اي احد يعني مجرد اشياء او اغلاط ماتضر
فيسحتق منا الصديق او الحبيب نوقف معاه اكثر

ادري كثير بيعارضو كلامي بس بجد اتكلم مستعد ادخل معاه في المعمعه
واخلي الصدق على جنب يريح شوي وكذا لين نعرف كيف نرد الامور لوضعها الطبيعي

خاصه الاصحاب من الدرجه الاولى بكون معهم دايم وياما اكلتها على وجهي
بس يستاهل الرجال اللي اكلتها عشانه ولاني متاكد بسوي كذا لو انعكست
الامور وكنت بموقفه متاكد بيوقف معاي قدام الكل لو انا الغلطان

ف الاخير

هذه على قول نفر وجهه نظر لامر افتراضي لا دخل للامور الدينيه فيها
وبس والله

نقطه ونهايه سطور والله يستر من نور لا ينبرش علينا بذا اليلول
ونقول تصبحون على خير .. واذ مارقدت رحعت << ارقد وفكنا من شرك اقول

عندي صوت ضمير متعبني محد ياخذه ويفكني منه
هو حبيب بس ازعاج احيان

يالله سلام قبل اجيب العيد

اااام بااااك اقين < مسرعك
مافيني نوم قلت لكم اذ مانمت جيت وهذاني جيت بخرو المكان ياشباب
ودي بكاسه شاهي وحبه تميز وجبنه هنقاريه اويلاه اوم المخمخه على الفجريه

تصدقون عرفت من يوم عرفت النت والعلاقات اللي فيه انه
يبغالها طوله بال وسعه صدر وقل حساسيه وتخفيف تطفل

وقبول عذر وتقديم النيه الطيبه دايم عشان تستمر الامور احسن !!

احيان نحتاج نكون مع انفسنا اكثر ومانسمع احد يتفلسف علينا
زي اللي اسويه طال عمري من الصبح معكم مغير اتفلسف انا ووجهي

بس دام ما استنى رد من احد فعاديه جدا الامور
في ذا الوقت بالذات صار التواصل في النت سهل بقووه وكلنا معاه الجهاز
اللي يوصله لاي مكان بسرعه وبسهوله وتحت يده 24 ساعه

وبعضنا الله يصلحهم تلقاه بكل مكان يرسل ياخي خل عن سمانا
عطنا فرصه نتفس فكنا من شرك شوي !!

هذا حال الغالبيه في التواصل الاجتماعي ومواقعه انبلشو بناس فاضيه
ماعندهم شي مغير يدورون السوالف

المشكله ننفس ونزعل اذ مارد اللي بكل مكان مرسلين له ههههههه ياوسع بعض الوجيه
عشان كذا اشوف التسطيح والجلسه فوق السطح افضل فكثرو منها

ولا اجلسو بالصاله وتربعو وخلو العالم في حالهم !!

تعلمت من التواصل الاجتماعي ماكثر اساله ماكثر سوالف مالها داعي
مابين اني ادور تعاطف من اي نوع اكون دايم اكثر سعه صدر

واكثر فرح مع اي احد يتواصل معاي ابعد بقوه عن ( ليه - وكيف - ووينك - وايش تقصد )
انسى بسرعه اتجاهل التكرار قد مقدر اكون اكثر سماع من التحدث

يعني خلونا نقول نحاول نعطي اكثر من اللي ناخذه
نقدر الاوضاع نعذر اي احد ونسمع منه ونصدقه دايم ونحسسه بذا الشي

وايش بعد !!!

ايوه يكون ردنا دايم حاضر واسرع من اي شي ثاني لان التاخر في الرد
اسوء شي عرفته في عالم التواصل الاجتماعي في النت

ف الاخير

نحفظ سره اللي وصل لنا منه في كل وقت
لان الثقه في عالم خيالي صعبه ترجع اذ فقدت

وبس والله زادت بربرتي وسوالفي خلوني اسوي لي شاهي
وعسى القى خبز او تميز او شي اكله وربكم جعان

يالله .. كالعاده .. اذ مانمت رجعت .. سلام

هيييييه مانمت ومشعل الحب يعزمني على شبة الضوء
عاد بذا الحر شبه ضو!!!

< احد ياخذ الجوال منه بيزعجنا اليوم

لا وربي اخر شي بس تذكرت سالفه من كم يوم تقرقع براسي بقولها
وبمشي لان جاني اللي بيشغلني الله لايشغلنا الى بطاعته

هذا ياطويلين الاعمار

وش رايكم بالمدح الزايد اللي يجيك يمدحك مدح اوفر شوي
لو تكح قال ياويلي عليك سيمفونيه ابداع !!!

سلامات وش تحس بوه يعني امدح بس مو لها الدرجه
احيان يجيني كلام وربي احسه طقطقه عليا مو مدحه بجد ترا زياده المدح
تصنف من الذم يعني واحد عادي جدا

تخليه انشتاين زمانه او امروء فيس عصره او ديفيد بكهام
لا بالله خفو علينا شوي

نفسي اوريكم بعض الكلام اللي يوصلني على اساس انه مدح
وربي اقولها وانا صادق اني اشوفه ذم وطقطقه

فتكفون خفو علينا شوي ترا كلنا عيال قريه وكلن يعرف اخيه

يالله الحين تصبحون على خير .. وكونو بخير .. واحازه سعيده
مابقى شي عن اذان الفجر يالله استدح شوي وهو ماذن

فـ الاخير

لاتنسونا من بعض دعواتكم في بدايه يوم الجمعه .. كونو بخير

سلام

سلام عليكم .. معجبني الرقم حق اللايكات اللي وصلت للمدونه فلحد يخربه بليز يعني
مع اني متاكد الملقف واجد ماشاء الله عليهم ماراح يتركونه !!

ذا الرقم تجميع كم يمكن خمس سنوات وزياده شوي مدري والله
لاني سويت المدونه من الفين وعشره بس قبل كم سنه صفرو العدادات حقت اللايكات كامله

وطيرو كم سنه !!

ماعليكم الرقم لسى مجنون وماظنيت احد ينافسن به الى تنهيده وشهرزاد ونفر
ويمكن لو طيف تتحمس شوي بتلحقنا

ياخي بعضهم مدري ليه معصبين عليا يوم اتكلم عن اللايكات والارقام وكذا
كاني غالط بحق احد فيهم مع ان السالفه كلها حب ارقام وكمان شوي فشخره
يعني خلونا نشوف انفسنا عليكم شوي >> من زينك عاد

على طاري ساعات احس بوه ناس تخاف من اشياء ماله داعي يخافو منها
مثلا لو كنت جديد وكذا تلقونه يقعد فتره لين تلقى له بصمات في مدونات العالم تحسه ماخذ وضعية
المراقب من بعيد بدون حس !!

فـ المدونات

اشوف عادي جدا انك تترك لك بصمه وتتفاعل مع الناس والاشياء اللي يطرحونها في مدوناتهم
واكيد ماراح تقدر تكتب في مدونات العالم وترد عليهم عشان كذا تلقونا
نجيب كلام الناس من مدوناتهم ونعلق عليه وكذا !!

بعضنا عنده فوبيا من الكلام الواجد وتلقاه لا ارادي يحكم انه حشو وكلام فاضي وعلى قل السنع
فيحكم على الشخص من ذا الشي !!
لا ماهي كذا دام وصلت للمكان ياخي اقرا لك شوي وطلع اللي عندك وعادي ترا
تلقى ميزان تحت ع اليمين اضغط عليه واكتب رايك بصراحه

او دور على رابط الصراحه عند الغالبيه صفحات فـ الصراحه قول رايك ماعندك مشكله
بس تكفون لحد يروح ويكتب ويحش ويلمح بشكل عام وكذا

فـ الاخير

عندي شي يحتضر وودي تفزعون معاي ننعشه لانه داخل بغيبوبه من فتره
شكله انصدم من كميه التفكير العالمي اللي عند البعض واستنتاجاتهم الخطيره

فدخل في غيبوبه وكذا فاللي عنده خبره يفيدنا بصفحة الصراحه لانها تعيش في غيبوبه من فتره
تشتكتي من قل الانعاش وكثره العلل اللي فيها

يالله ماعلينا كلن بعلقه راضي !

بدايه اسبوع زوين باذن الله ونهائي للمعلمين وطلابهم قبل الاختبارات
بالتوفيق للجميع

والله يبلغنا واياكم رمضان على خير .. انتم ومن يعزون عليكم .. ولا تنسون

لحد يخرب رقم اللايكات خلوني كم يوم اترزز بوه

سلام

آأإأآم بآأإآك

ممسكه معاي قرقره من كم يوم لو ماعندي اجازه امس وقبله كان الظاهر
قفلت اربع صفحات شوفو ذا الصفحه بيومين بس هذاني بقلبها بعد شوي !!

ماعليكم توي كنت احوم بمكان قريب من هنا شوي والقى ولي سالفه استغربت منها
لحظه بوريكم هي !!

هذا يقول لكم ياطويلين الاعمار ...

" اننا مانقدر ننسى الشخص اللي حبيناه من اعماق اعماق قلوبنا .. لو مهما نسوي .. او سوى هو ..
لان الذاكره طويله الامد عندك بتحتفظ فيه للابد وبتقعد تتذكره لين تموت طال عمرك "

وانا اقول اش فيهم نص الشعب نفسيات واغلبهم سوالف حب وخرابيط
المشكله بعض السوالف عن حب عبر الاثير نتيه يعني عاد وش بيدي ذاكرتنا ذيك ان ذا حب
في واقع خيالي وكذا !!

بس خذو هذه عندكم عشان لحد يحسب السالفه ماهي زينه لا زينه حبو جعل مايحب الى انتم
هذا الله يسلمكم ويسعدكم يقول كمان

" الوقوع بالحب يحفز الشخص بشكل ايجابي يرفع نمو الاعصاب عند الحبيبه ويقوي ذاكرة الطرفين "

من الحين اقول لكم اللي بحبونكم لا تحاولون تكذبون عليه تراهم بيصيدونكم
عاجلا او اجلا لان الحب زي مايقولون يقوي الذاكره وكذا فـ انتهبو عاد

بالنسبه لي احس ذا الشي اكثر عند البنات لاننا حنا مافيه فايده بحب وبدون حب الذاكره سعتها
محدوده وبسرعه ننسى

نكمل لكم شوي عن ذا الموضوع مع خوينا اللي يقول كمان !

" بعض الاحيان نقع في حب الناس اللي ترفضنا بالبدايه بشكل تلقائي تلقى نفسك تحبه لان
ذا الشي يكون نتيجه استجابه عكسيه ضد الرفض في دماغك طال عمرك "

يمكن هذا سبب يوم نقول " الحب مايجي الى بعد عداوه " اثاري في دراستها وحنا اللي ماكنا
ندري عنها خطيرين الاولين لا دراسات ولا شي من واقع تجربه وخبره
الخواجات قعدو سنين لين اكتشفو ان السالفه لها علاقه بالمخ فـ الاول والاخير

لزوم نعلم الشيخ بالسالفه

اخر شي وهذه قويه شوي بس بعلمكم فيها مالي دخل يقول لكم !

" في الحب تتسارع نبضات قلبك يوم تتسارع نبضات قلب الطرف الاخـر بنفس الطريقه وهذه لها
علاقه كمان بالمخ ولو كان جالس قدامك بتلاحظها اكثر لو سالته عنها "

يعني من الحين للاخوه والاخوات الحبيبه اذ شفت قلبك قام ينفض وكذا قول لخويك
يهدي شوي لان قلوبكم متربطه ببعض بطريقه مدري كيف

فـ الاخير

كل ذا الكلام ترا جايبه ومسوي له بحث من اول وقاعد احوس عشان لقيت
ذا الكلام في مدونه قريبه تقول فيها شهرزاد

وبس والله وتاخرت على البصمه ونسيتها مره وحده من الحب وسيره الحب
يالله ماعليه اهم شي كنت بوصل لكم كم معلومه

اخر سطر

في عالم كيمائي اخذ نوبل في الكيماء تدرون وش كانت دراسته اللي اخذ نوبل عليها
كانت الدراسه تقول

" ان الشخص العاشق المهووس بالحب لا يتختلف عن الشخص المصاب بالوسواس القهري
حيث انهم يعيشون نفس التجربه كيميائيا "

وانا اقول ربعنا سبقوهم من سنين محد مصدقني مهم يقولون لقيس مجنون ليلى
طلع الحب والجنون يتفقون كيميائيا

يالله طولتها وهي قصيره خلوني ادور الشاهي وعلوم الرجال ونخلص الاشغال
كونـــو بخير .. سلام

ماعندي شي بس بعلمكم ان بقلب وجهي
سوري قصدي بقلب الصفحه بعد شوي ....

بس خرشتنا طيف الله يجلع ابليسها وعساها طيبه
طيف طمنينا يابنت وعسى ماشر

عاد قد صارت عندنا بواحد من عيال عمامنا
فقد النظر يمكن زي شهر بس الحمد لله الحين طيب وماعليه

يوم اقرا كلام طيف تذكرته على طول ..
اذ فضيت عطيتكم سالفته لانها مدري كيف جات معاه
ياهي علوم بس الحمد لله الحين طيب ماعليه

حتى كان يلبس نظارات بعد الحادثه والعمى ورجعت نظره
حذف بالنظارات ماعاد يحتاجها على قولتهم

سبحان الله نظره صار طبيعي بعدها ...

شوفو كيف داخل بعلمكم اني بقلب الصفحه
واشوفني عجبتني السالفه وقاعد اقرقر وكذا

يالله كونو بخير .. وربي يطمنا على طيف .. سلام