،




ابشر بعزك لعنبو من عادوك
تأمر علي وانا أجيك بياع ..

لاتشتكي الدنيا وان حي ياخوك
يفداك راسي وكلي لك انصاع ..

صبحكم الله بالخير .. ونقلب الصفحه من ثاني وثالث .. ونقول هلا بالعياال
فدى راسك يانور المدونه وراعيها اكتب جعل مايكتب فيها الى انت !

احيان ودك من زود الطناخه تلف على العالم وبس تعزم
عاد اجوائنا اليوم والله ماهي اجواء دوامات وقلق يامشاء الله السحاب من الفجر

مالي البلاد والمطر ماهو بعيد باذن الله !!

فعادي اليوم الواحد تكون نفسيته واحواله زينه ياربي لك الحمد
كبروني عيال خواني وانا مالي دخل من عرفتني وانا عم وخال وعلى غير السنع

اول العم تحسون له هيبه بجد احسني خربت اوم هيبه العمام واللا ذا وجه عم
يالله من قل الحيله اليوم مسكة حش فيني مع الصبح !!

ماعليكم اهم شي اصلا الاخلاق وكذا

تصدقون يقولون ان الاحسان للذات هو افضل احسان ممكن نسويه
فاحسنو لذواتكم دايم هي راس مالكم ..

تدرون وين المشكله احيان كثيره نسيء لذواتنا بدون ماننتبه ونعرف ان الاختلاف فينا شي طبيعي جدا
وان ارضاء الكل صعب في الغالب لانهم مختلفين في تفكيرهم وتقبلهم للامور

هنا نتعب احيان من ذا الناحيه لانه بيجينا انتقادات واجد من اقرب الناس لنا
لسبب بسيط انهم ماتقبلو الموضوع لاختلاف طرق تفكيرنا عن بعض

وبعضهم لا بس عناد ومكابر لا اكثر !!

احيان نشغل انفسنا بامور كبيره ومستقبل بعيد ونشيل الهم على هذا الاساس
مع انه المفروض نكون اكثر قرب في تفكيرنا لبكره لا نبعد واجد ونتعب

خلو بكره يجي بخيره وشره لا تبعدون في التفكير فيه

لو تلاحظون اغلبنا يبدعون يوم يجيهم احدهم يستشيرهم في شي او هم حابين
ينصحونه تلقونا نبدع بذا الناحيه ونعطيه افكار ومدري ايش

بس المشكله يوم حنا نكون بالمشكله نفسها نحتاس ونكون اكثر نفسنه وكذا
مدري ليه !!

يقال ان بعضنا يعيش مع احلامه الكبيره ويسعى جاهدا للوصول اليها وينسى حياته
الواقعيه اكثر او يشوفها اقل حماس وكذا

لان ابو الشباب خلاص ذبحه التفكير بالاحلام الكبيره ونسى يعيش واقعه صح
او خلونا نقول ماعاد يرضيه واقعه لان احلامه كبيره وكل همه يعيشها ونسى انها احلام
مو واقع !!

اليوم ماسكه معاي فلسفه مع الصبح احس الجو له دخل
مدري صراحه !!

الزبده

عيش اليوم بفرح اكثر واسعد بكل تفاصيل يومك لو كانت بسيطه
ولا تخلي بكره ومستقبلك اكبر همومك .. وبس والله

نقطه ونهايه سطور

سلام

هذه صوره تو صورتها وانا دخل الامانه قبل شوي .. الاجواء تقول بصم وحط رجلك
بس ضغط الصوره خربها شوي !!

ياماشاء يالاجواء اليوم اويلاه على الفرنكه وكذا !!

اصلا لو تشفون بالصوره هذه المدخل الرئيسي فيه هناك قدام مواقف كبار الموظفين
شوفو كيف فاضي مع اني جاي متاخر شوي بس ماشوف ولا سياره لهم !!

عاد عندنا ذول مالهم بصمات ماشاء الله مراتبهم فوق العاشره
فما يبصمو حضور وانصراف ويجي متى ما جا !!

يالله العافيه طيبه والجنه الجنه

يازين الامطار ويازين يوم تتذكر ان رمضان على الابواب يارباااه وربي شي
الله يبلغنا وانتم رمضان على خير

يالله عطوني افكار للهروب من الدوام اللي قاهرني امس طلعت
من عشر وعليها والاجواء كلها شموس صكت براسي لين قلت امين

واليوم مقدرش اطلع الى بعذر محبوك حبك مو اي عذر
وين الناس اللي دوم تفرنك على الدوامات وكذا عطونا اعذار تحمس وماتخرش الميا

بس ياليت قبل الظهر لانه اذ جا الظهر ماعاد له داعي !!

وينك يانفر انت وابو العز انتم اللي ممكن تفيدونن اكثر شي
يالله خلونا نفطر اليوم مضبطين الفطور الشباب صح

<< تعقدت ماعاد اجيب طار الفطور من طقطقه شهرزاد ذاك اليوم عليا

بس ماعليه اليوم استثنائي قلت لكم من قبل !!

يالله كونو بخير .. وهانت كلها يوم ويخلص الاسبوع على خير باذن الله
فـ امان الله .. سلام

هيأأإأآ تاخر الفطور شكل خوينا اللي راح يجيبه اعجبه الجو
وقاعد يتمشى على مهله برا

المهم خلوني دام فاضي اعلمكم بهذه السالفه حقت خوينا المحشش
وبيتهم الجديده !!

محشش يبغى يستأجر بيت وما نصحوه لانه فيه جني يخوف
بس ما سمع كلامهم واستأجره .. محشش ماعليه شرهه

المهم جا الليل .. قام الجني و قال لأخوياه بطلع اخوفه
طلع الجني و قعد جنب المحشش وقاله ممكن سيجارة ؟
طالع فيه المحشش وقال تفضل !! طيب خوينا مايرد احد

نزل الجني عند أخوياه وهو معصب وقالهم ما خاف ؟؟؟
رجع الجني نتف نفسه وخلا الدم يشرشر من جلده
و طلع عند المحشش و قاله ممكن سيجارة؟
طالع فيه المحشش وقاله تفضل .. كريم ابو الشباب ..

انجن الجني ونزل عن اخوياه وقالهم هالمره بموته من الرعب

قام شال عيونه و لف راسه وكسر يده وطلع عند المحشش
و قاله ممكن سيجارة ؟
طالع فيه المحشش و قاله تفضل !!

هنا الجني طلعت في راسه نخله وطار عقله
ونزل تحت ولعب في نفسه لعب
وطلع العامود الفقري وخلا جلده مشرشر وقلب عيونه وطلع عند المحشش
وقاله : ممكن سيجارة ؟!

طالع فيه المحشش وقاله :
ما تلاحظ أن الدخان قاعد يدمرك ويدمرمستقبلك ؟؟

وبس سلامتكم .. سلام ..

فيه شي محيرني وماني عارف ليه حنا فـ الغالب كذا ليه نفرق بين
الاشياء اللي يقولها الشباب عن مايقلن بعض البنات !!

ليه تفرقون بينهم في التلقي في ردة الفعل في الفعل نفسه !!

ليه نقسيها باكثر من مقياس ليه مانحاول نكون في نفس المكان او نفس رده الفعل مع الثنين
ليه نضخم بعض الامور او نعطيها فوق حقها بس لان اختلف اصحابها !!

والامثله كثير لو بجيب بعضها الظاهر بيقفلون المدونه هنا
او ماعاد احد بيسمع لي !!

سوالي اللي مدري وش يبي بالضبط

ليه تختلف رده فعلنا لكلام او مواضيع لاختلاف جنس من اوجدها ؟

في جهه يكون الثناء والاطراء والمدح والقبول موجود وفي الجهه الاخرى يختلف الامر
بشكل كامل !!

مدري متى راح نعتمد على الاخذ من جميع الاطراف بشكل متساوي ولا ننظر لمن تكلم
او صاحب الموضوع هل كان رجلا ام امراه ؟

متى يكون ربعي اكثر قبولا للمواضيع بغض النظر عن من طرحها
متى يساوون بين الاثنين وتكون رده الفعل متساويه
متى نعرف ان الامور هي بالفعل متساويه

لو اختلفنا مع بعضها لكن تبقى متساويه والحكم المفروض يكون واحد وليس لجنس من اوجده
ادري محد راح يفهم كلامي زي ماهو ببالي بس شي في بالي وحبيت اطرحه فيذا

وسلامتكم .. سلام

يقول من الطبيعي .. ان ترى السفينه في الماء
ولكن من الخطر ان يكون الماء في السفينه !!

فكن انت في قلب الدنيا ..
ولا تجعل الدنيا في قلبك !!

الحياه مثل الروايه .. وكل يوم صفحه جديده
اذا كانت اليوم الصفحه حزينه
فـ الصفحه التاليه سعيده

لذلك لا تقلق
فقط اقلب الصفحه وابدا من جديد لانها ستكون سعيده

وتوكل على الله !!
واستمتع بالحياه !!

نقظه ونهايه سطور .. سلام

قيلت لي هذا اليوم لا ادري كيف يكون التنصيف كـ العاده اقف محتار عن بعض
التنصيفات لا ادري كيف اصنفها !!

هذه طيف تسال عنها .. اقول لك هذه ماهي للدلع
هذه تعني انهم كسرو راسك لين قلت امين

من الضرب وكذا !!

خوينا قالها لي على ردك على كلامي ومدري ش كان الداعي
لها للان ماني فاهم الداعي لها والله !!

وبس والله سلامتكم

وحمد لله ع السلامه يابو الاكواس وجعله ااخر الغيبات نورت الحته ياباشا
بجد فقدنا الحبوب حقتك من كم يوم المدونات بدون الحبتين ماتمشي زين

يالله كونو بخير .. انتهى دوامي وفلسفتي لليوم هذا

ســلام

وهلا بالخميس .. بدون لحن بليز

صبحكم الله بالخير ... ياخي تعودت على دوام الساعه عشر ونص
هذا يمكن ثالث يوم بالاسبوعين الاخيره اجي كذا

وتاخير ساعتين ونص مايصير ادري
بس وش اسوي لهم شي وربي النوم لين عشره ثمن اداوم

الحين بتحس بشوي وناسه توك تداوم وكذا ونص الدوام راح
الغبنه يوم يجيك الراتب مقصوص منه واجد بسبب هذا التاخير اقعدها بعدين

بس عادي دام المزاج مرووق خلهم يخصمون مع نفسهم !!

نقطه ونهايه سطور

المهم ياشباب ميه مره اقول لكم ترا الامور عاديه وربي ماتستاهل نعتذر وكذا
احيان ناخذ شوي بخواطرنا بس والله عادي ترا ماله داعي احد يعتذر

يمكن احيان ودك تفهم وش السالفه وكذا مو اكثر
بس ماودي والله احرج احد معاي وانه يعتذر وكذا ترا قسم مافي الخاطر شي

ربي يسعدكم جميع !!

وبس والله

وش بعد ايوه صاير عندي قلق من شي هنا بس مدري كيف اقوله قسم
احس مالي وجهه لو اقول بس بجد فيه اشياء واجد استغربها

مع اني اعرفني واعرف اللي هنا زين !!

بس للان ولين بكره صراحه ماهي راضيه تركب معاي ولاني عارف اصلا
كيف الحل او وش القصد من السواه كذا والله

فما راح اقول ش السالفه يمكن اجيب العيد

نقظه ونهايه سطر

فـ الاخير

احيان ناس توديك للسماء والله بكلمه جاني تقييم برد كبدي على قولتهم
وجاني تعليق بالصراحه هد حيلي

فـ بجد فيه ناس توصلك السما وناس تحذفك حذف رهيب النت
يبغالك تكون دايم جاهز للسما ومتسعد للحذف مافيه حلول وسط

الله يسعد الجميع ويكتب لكم كل خير ويبعد عنكم الضيقه والهم
ويوفقك اللي عندهم اختبارات ويسهل امورهم ويطمنهم

وبس والله .. الحين نقظه ونهاية حكي

كونو مع من تحبون اكثر كرما واقل شكوى وافضل صحبه ... سلام

ليست للقرآأإأآءة !!



كآن " الطآووس " يرتعد خوفا وهو في الطآئرة المعلقة بين السماء والأرض ..!
كآن ينظر إلى ساعته في كل مرة ..!
يود لو أن الوقت يمضي
أكثر سرعة .. كآنت عينآه زائغتان .. ووجهه أصفر .. يرتجف لأي حركة ..!
يضطرب لأي صوت .. يدآري دمعته كلما طلب كابتن الطائرة
من الركاب ربط الأحزمة ..!
وينكمش في كرسيه كـ فأر رعديد ..!
ووصلت الطآئرة بـ سلامة ..!
وفي الصالة المطآر .. شاهدته
يسير بـ خيلاء .. وغطرسة ..!


ماقلنا ليست للقرآأإأآءة !!

السلام عليكم .. ومساكم الله بكل خير .. ومبارك علينا وعليكم
الشهر الكريم والحمد لله ان بلغناه ونحن في صحه وعافيه

.
.

بجد اجواء رمضان رهيبه بكل شي فيها تحس روحك حلوه
والعالم في افضل حالاتهم ماشاء الله عليهم

.
.

مبروك للكل وشهر مبارك للكل والله يتقبل منا صالح الاعمال
ويوفقنا لكل خير في هذا الشهر الفضيل

.
.

فـ الاخير

جاي مستعجل وربي ببارك لكم الشهر وبرز مدونتي معكم فوق
وبقضب الباب

اعتذر والله من الكل مستعجل وماعندي وقت ارد على احد
عشان كذا كتبت هنا

رمضان كريم والله يتقبل منكم الصيام والقيام

وبس والله

اشوفكم قريب ونختم هذه الصفحه بذا الكلام

احرصوا على اسعاد من حولكم فما اسهل اسعادهم في رمضان
وياكثر طرق اسعادهم فقط اجعلو سعادتهم هدفا لكم

وكونو جميعا بخير .. صيام مقبول باذن الله وفطور شهي واجر مكتمل باذن الله

استودعكم الله ربي .. فـ امان الله .. سلام