،





1930 - 2018

لم يكتب لها ربي شفاء لتغادر تلك الغرفه وقدر لها ان تفارق الحياه
بأكملها رحمك الله عمتي واسكنكي الفسيح من الجنان

اللهم ارحمها واغفر لها وتجاوز عنها واجعل قبرها روضه من رياض الجنه
انا لله وانا اليه لراجعون !

سلام على اهلي هنا واصدقائي الافضل في عالم النت دائما
شكرا لك من ارسل هنا او فـ الصراحه والله يجزاكم كل خير ولا يوريكم بيوم مكروه
ويحفظ احبابكم وناسكم واهلكم ..

والله يرحم عمتي ويتجازو عنها ويكتب لها كل خير

اليوم اللي احس ودي اكتب لين اقول بس كل شي يقول تعالو نكتب بجد كميه
اجواء من زود الزين اللي فيها تقول يارباااه

الظاهر مافيه مدونه اليوم مامريت عليها وعوضت الايام اللي فاتت
واعذرونا على القصور وكذا ياشين يوم تمر وماتترك لك بصمه في مدونات العالم

مدري ليه احيان ننفس ونسوي مدري كيف ومانترك لنا بصمات في مدونات العالم
او اي مكان نكون فيه !!

ازعجت العالم اليوم بكل شي تحملونا شوي بس وش واسوي وربي مشتاق
للسوالف للدعم لكل شي وان شاء الله اني ماقصرت معكم

عاد اعذرونا على القصور وكذا

ينادوني الشباب على الفطور خلوني اروح افطر ربي يسعد الجميع
يالله كونـــو بخير ..

وحمد لله على سلامه الاقلام اللي كانت غايبه لاي ظرف كان وهلا بالجدد

هلا بمدرينا القديم ابو العز هلا والله بملكه الشموخ مراقبتنا هلا والله فيكم
بجد تواجدكم اسعد الكل وانا اولهم ..

وبس والله .. سلام

يقال ان في قانون الراحه النفسي .. الانسحاب من الفوضى راحه لا تقدر بثمن !
ومن الذكاء العقلي التجاهل لانه يعيد كل شي لمكانه الطبيعي !

للتطوير دائم جد لنفسك مكان فـ القمه فـ القاع يشهد ازدحام كثير !
للتميز ابدع بأسلوب يختلف عن الاخرين وانت في قمه الاسترخاء واجعلهم يقلدونك !

حدث كل قوانيك على الدوام وحتى اسلوبك لتصبح واضحا مع الجميع !

اهم شي لا تحسبون كل تغيير يعني الاستغناء عن الكل قد نضطر احيان للاستغناء
لكن لا تجعلوه دائما !

لا نعلم قد يكون الاستغناء افضل للبعض ولا يعد خساره ومن لا يعد الاستغناء
عنهم خساره لا تتمسكون بهم !

المهم ان تجد لك انت مكان بينهم ويعترفون بك !

فـ الاخير

كن واضحا مع نفسك دائما وفخورآ بها .. بدون تنفير او التقليل من احد

وبس والله كونـــو بخير .. وشكرا مليون للاقلام الراقيه التي مازالت تواصل
تواجدها بين كل فتره والاخرى بين هذه الصفحات وخلف كواليسها

فخور جدا بكم وبتواجدكم حفظ الله احبابكم وابعد عنكم الاحزان جميعا
نقطه ونهايه سطور

ســـلآم

آأإأآم آأإأآك ..
احيان كثيره ماعندنا شي نقوله فنقعد نقرا من هنا وهنا
وكـ العاده اذ ماعندي شي اقوله تلقوني افرفر على المدونات وبس اقرا لين اقول آمين !!

عاد ماشاء الله يافيه اقلام ودك بس تبشك فـ مدوناتهم من زود الطناخه والسوالف
نفر على سبيل المثال شهزراد تنهيده طيف ابو العز ذول لو تقعد كول اليوم هناك ماتمل من الفرفره عندهم !!

مدري بس التواجد في مدوناتهم له شكل ثاني على قولتهم بالله لحظه بوريكم شي
هذا المضوع من فتره نفسي اتكلم فيه وكذا بس ماني عارف كيف ابدا
عاد اللي مثلي راعين الهرج الزايد واللي نصه ماله داعي بس عطوهم
بدايه الموضوع وهم يسون له رجول ويخلونها سالفه

الحين تعالو هنا وش رايكم بالكلام فـ الصداقه بين الشب والبنت وخاصه بعالم النت اتركو عنكم الواقع
وكذا بتكلم بالنت بس !! عشان محد يطلع علينا مطفي النور ويسوي منها سالفه وكذا محنا ناقصين

ترىياليت دايم نتعامل وفـ النت بالذات بذا المبدا ان الصداقه هي اللي تجمعنا
يعني اذ بنزودها شوي نوصلها للاخوه وكذا !وين المشكله في ذا الشي لا اعلم مشكلتنا احيان لازم يتطور
اي شي له علاقه باختلاف الاجناس لازم ينمو وكذا

يعني لو فرضنا شابين جمعهم منتدى او اي وسيله تواصل بذا الوقت وتطورت الصداقه
بينهم وكذااو بنتين فراح تكون الصداقه حلوه والعلاقه اخويه ومافيها اشي

بالعكس بعضهم تصير علاقته متينه بشكل ماكان يتخيله ابد وهم يمكن مايعرفون بعض ولا قد شافو بعضهم
بس جمعهم مكان ونشات بينهم صداقه حلوه !! هنا اذ اتحدت الاجناس ولدين او بنتين !!

طيب ليه اذا احتلفت الاجناس دايم فيه محاولات مظنيه ان الصداقه تتحول الى حب ومدري ايش
ليه اصلا نخاف نكون صداقات من الاساس مدري !! دام الامور في اطار الاحترام المتبادل

وكلن يعرف حدوده زين وين الضرر فـ الصداقه كمان مدري !!
وعاد قوقل ماهو مقصر مر اقرب صفحه وخذ من الوورد لين تقول بس
وارسلها للصديق ولا كلفه ولا هم يحزنون

شايفين اللي ماعنده سالفه اذ لقي شي يهرج فيه كيف يطولها
وهي صغيره هذه حالتي اليوم بالضبط يالله ماعليكم اهم شي الاخلاق

فـ الاخير كونــو بخير وكثرو من اصدقاءكم وحافظو على من يعتبرون انفسهم اصدقائكم
وكونو خير معين لهم لانهم بحاجتكم دائما

وصح ترا طفشتكم بذا الموضوع بس وش اسوي من زود التناحه وكذا
ساعات انسى حتى وش تعشيت

فسوو سكيب للموضوع ماعليكم

وبس والله سلامتكم !! ســلام

السلام عليكم .. خميسكم ونيس باذن الله ونهايه اسبوع سعيده
واجازه طيبه اتمناها لكم وللي حولكم

الاسبوع ذا عدى اسرع واجمل لو شوي التعثر ببدايه كان شي
المهم ماعليكم .. اليوم جايب لكم اخبار وعلوم عطونا الجلسه الانبساطيه اهم شي

وهلا بالخميس << بدون تلحين بالله

اليوم من جيت ماسكه معاي الاحلام ومغير اقرا عنها من الصبح مدري وش هو له
يمكن من الفضاوه وكذا !!

المهم ابشركم طلعنا نقدر نتحكم بالاحلام بكل سهوله ونحلم باللي نبي !!
<< من جده ذا

ايون اتكلم من جد والناس اللي مشتاقه لناس وودك تشوفها او تقابلها بالاحلام
صار تقدر تشوفهم وكذا !!

<< خويكم به بلا اليوم

مافيني شي بس تقدر تشوف اللي تبي بالاحلام وتتحكم فيها
المكان مايساعد اكتب كل شي والشيخ قوقل ماهو مقصر معنا تقدرون ترجعون وتكملون السالفه
بسوي زي شهرزاد اذ مافيها حيل تكتب قالت روحو لقوقل

ماعليكم نكمل السالفه هذا يــ طويلين الاعمار

في درسات اثبتت انك تتقدر تتحكم بالحلم قبل النوم وفي الفتره الاشد نعاس
في انك تفكر بالموضوع اللي تبغى تحلم فيه بشكل اكثر واذ عندك صور حاول تشوفها
وذا مافيه يكفي التركيز في التفكير على نفس الموضوع ثم نام

وراح يطلع لك الحلم صافي وفيه خاصيه الاعاده بعد << امزح بهذه

لا وتعالو هنا كمان تقدر تحل المشكله اذ عندك مشكله بس لها كم شرط

اهم شي بعد ماتصحى لا تقوم من الفراش لين تحاول تجمع كامل الحلم وتحاول تتذكره
لانك اذ قمت على طول وجيت تتذكر بعدين ماراح تتذكر شي للاسف

فخلك في محلك لين تتذكر كل شي او الاكثر !!

خلوني افطر واكمل لكم السالفه !!


سلام للحين !!

يتبع <<

ايوه الحين تقدر تصعد وبالراحه بعد بس اهم شي كلن يجيب معاه سلمه
عاد الطوال مايحتاج بس ينتبهو للقصار عاد بالنسبه لي من (168-173) والله مدري بالضبط كم طولي
بس متاكد بين هذه الرقمين لاني اخر مره قست ايام الثانوي قبل اوصل سن
توقف الطول الفطري !!

ماعليكم نرجع للاحلام والقدره على التحكم فيها !!

يقولون التركيز قبل النوم على الشي اللي نبي نحلم فيه راح يجببه التفكير لأحلامنا
عاد خويكم مدمن افكار خاصه قبل النوم وماحب التفكير بالواقع اللي اعيشه قبل النوم

فاغلب فكري يكون معكم هنا بعبير وياهو شفتكم باحلامي واجد بس كنت اقول اضغاث احلام
طلعت من تفكيري فيكم وربي !!

قابلت كذا شخصيه هنا بالاحلام طبعا من جد اتكلم وربي لا وبعضهم حتى جونا بالبيت وبشكو
معنا تقول من اهلنا وكذا

مبغى اجيب اسماء وابلش معكم عاد اللي طلعت له مره بحلم يقول >> واثق الاخ
واذكر من قالو لي بجد اني اطلع لهم باحلامهم بس كوابيس وبدون ملامح

مدري ليه جا ببالي افلام الرعب الحين ماعليكم !!

اذكر مره قابلت ناس معنا بعبير هنا ومن المشاهير في ساحات الحرم كانو مجموعه
وبطل قصتنا معاهم مدري مين نادى باسمي " وسمي " مع انه محد يناديني كذا بالواقع
بس بالحلم كذا نادى اللي معاي على طول بطلنا التفت وقال انت اللي بعبير !!

وخذو ذيك اللالتفاته حقت الافلام الهنديه والهواء يحرك شعرك
ايوه امر !!

المهم اني صحيت بس متذكر قال لي اسمه وقبل اقول هلا والله صحيت للاسف

يالله ماعليكم اهم شي الاخلاق وهذه قصه وحده وفيه ثلاث باقيات
ذا فضيت قلت لكم الباقيه !!

بس خلونا نكمل موضوعنا شكلي كمان طولتها وهي قصيره
نروح للرد الجاي ونتلكم اكثر خليكم قريب

كاسه شاهي وراجع ..

سلام

يتبع كمان <<

هيا خلونا نكمل نطلع لاحلامنا ونعرف كيف نتحكم فيها !!

مدري وش بلاي اليوم فيني كميه سوالف ماهي صاحيه شكلي لو اقعد لين الظهر اسولف
ماراح اطفش جعان قرقره وربنا !!

الدراسه تقول اننا في الاحلام تقل مساله الرقابه على المنطق عندنا وتكون الامور
اكثر حلول وكذا فالعقل في وقت الاستيقاظ تحكمه ادوات رقابه ذاتيه منطقيه تتحكم فيه

بس في وقت النوم هذه الرقابه المنطقيه تكون تقريبا معطله فيكون التفكير
والحل والاحلام اكثر تهور وفيها امور بعيده عن المنطق لان الرقابه وقت النوم تقريبا معدومه !

عشان كذا تلقونا ابطال خارفين فـ الاحلام واحيان مانقدر نتحرك من الخرشه
ورجولنا ماتشيلنا فـ المنطق شبه معدوم وكذا !!

ماحب اتكلم بالصيغه العلميه تتعب بالقراءه والكتابه ارجعو لقوقل اسهل

المهم ماعليكم !! نكمل

نقول اهم شي ركزو فـ اللي تبون الحلم فيه وعيشوه قبل النوم بيطلع لكم
عشان كذا طيف ترا احلامك بتكون اغلبها عن الينانوه وكذا

صح وترا فيه دراسات تقول انك تقدر حتى تتحكم في حلم ناس غيرك
عن طريق التخاطر الذهني وهذا طلع كمان صحيح

كنت اظنها سوالف عشاق وخرابيط طلع فيه كمان تخاطر ذهني بالتفكير
هذه يبغالها جلسه طويله وكذا خلوني اقرا فيها زياده واجيب العلم

المهم طولتها ونسيت الشغل !!

كونـــو بخير ولنا لقاء باذن الله قريب .. واجازه سعيده للكل

لا اوصيكم احبابكم كونو قريب منهم في افضل حالاتكم لتجعلو من تواجدكم افضل
وبس والله

نقظه ونهايه سطور ... ســـلآم

آأإأآم بآأإأآك افتر نون بالنوم المشدده
ايون قبل اقول شي في جمل خاصه للمدونه هذه واشوف العالم تاخذها بدون مايدفعو
شي هذا وانا حتى القيمه المضافه مخليها على حسابي وشايلها عنكم !!

( خودافس - اأآم باك - نقطه ونهايه سطر - وبس والله - سلام - وماعليكم - كونو بخير )
اي احد يستخدم في الايام الجايه هذه الكلمات يجيب الرسوم مالي دخل !!

نجي للمهم ماعليكم من سوالفي الحين طيف مشرشحه او الدراسه اللي جيبها خويكم
اللي هو انا طال عمري هنا !! شرشحه وتناقض عمرها شوي تقول ماتجي
وشوي تقول جات ماعرفنا لك ياطيف !!

مالي علاقه كمتابع للدراسات ومهتم في الاطلاع على الجديد منها اني احكم على صحتها
او لا اللي عليا اني انقلها وكذا

صح نقلي لكم عليه لاني احوسها حوس يوم انقلها بس اهم شي المضمون
يكون واضح وكذا !!

بعدين لا تقاس الدرسات بشخص واحد لانها دراسه على مجموعات كبيره بالعاده وياخذو
منها النتيجه النهائيه ويحكمو ع الموضوع وكذا يعني قياسها على نفسك خطا !!

هنا تجاوب على تساولى اذ احد حلم فيني طال عمري اول لا !!
يعني صارت معاك بالحلم لانك قبل تنامي كنتي تفكري بالمنتدى
واهله عشان كذا طلعنا لك يا ام كشه
ولا من زيننا اصلا عشان تحلمي فينا لو ماكنا على بالك قبل تنامي
مافيها شي نكون على بالك ترا لا تخافي محنا اخذين شي

وبعدين ترا اللي يطلعون بالاحلام مايشفو لانهم مايدرون انهم طلعو اصلا
<< بالله بلا جنان ماهي ناقصه البنت

طيب بس تحمست !!

المهم نكمل مع الطيف

لانك ذبحتينا بصور الخيول بمدونتك حتى من سنين وانتي تسني الفارس
بشماغه البيضا يدق بابكم وكذا غصب احلامك تكون عن الخيول لان فكرك اغلبه معها

وبعدين ياطيف الدراسه تقول مو شرط تفكيرك يكون قبل النوم
على طول احيان افكار دائمه او طويله في البال وتنردد كثير زي سالفتك مع الخيل

يعني للان الدراسه صحيحه ليه تنكريها في بدايه ردك هناك !!!!

فـ الاخير

تراك انتي اللي تلكمت عنها وقابلتها في ساحات الحرم وكان معاك
اربع بنات وبعباياتكم وانتي شوي ويغمى عليك من الوناسه >> سالفه الوناسه كذب

بس بجد انتي اللي فـ الحلم بساحات الحرم بس اول ماكنت بقول
دام طلعت لك اجل انتي بعد طلعتي لي !!

المهم اذ مانسيت بعلمكم بحلومي الثانيه والمشاهير اللي طلعو معاي
بس اليوم بكثر افكار قبل النوم ودي يطلع معاي كم واحد اطقطق عليه بالحلم

يالله كونــــو بخير .. واستانسو بالاجازه .. سلام

صبحكم الله بالخير .. وياهلا وسهلا فيكم جميع
مدونتي اليوم لقيتها شوي وتحذفون بها فـ الصفحه الثانيه !! ليه طيب

كفايه وضع النصر فـ الدوري والكاس وكل شي تبون تكملوها بالمدونه
مايصير ياشباب كذا !!

المهم اليوم صبحت على ذا الموضوع

الجانب الذكوري لــ حواء !!

طبعا مضووع في الحوارات والنقاشات وصلت له من مدونة تنهيدهـ لان لو مالقيت
الرابط هناك مالظاهر كنت بروح له !!

بجد استخدام المدونات في الاعلان عن المواضيع المميزه حلو
فشكر تنهيده على دلنا على الموضوع لاني من الناس الكسلى ماطلع من ذا القسم

الى اذ حصلت لي رابط !!

المهم مالكم فـ الطويله شاركت براي صغيرون هناك بس بجد الوضع
هناك رهيب بدعو الشباب والبنات والله فـ التعليقات

وكلن يقول الزود عندي وكذا !!

المهم الرابط في العنوان شوفو الردود والكلام وطبعا ردي معهم
خلوني اكمل امر المدونات من امس ماجيتها بروح اكمل وجايكم باذن الله

ســـلام

تعالو نقلب ام صفحه هذه الصفحه احس قعدت فيها
ثلاث سنين ماخلصتها مدري ليه !!

نختمها بذا الرد ونتقابل بالصفحه الجايه

قبل اختم اقول الله يجزاك بالخير عبدالعزيز ورحم الله والدينك
ماتقصر يالغالي ..

وبس والله نقطه ونهايه صفحه شوي كئيبه حتى رقمها ناسيه
المهم نقول وداعا لها

ســـلام