،




ونقول بـــسم الله ونبدا صفحه جديده بروح اجدد وافضل من قبل
ونقـــول حياكم الله .. ارحبو يالد

اليوم اشوف ناس من القدام حياكم الله وحمد لله على السلامه تو مازان المكان وربي
وهلا بالعيأإأآل

واحد مرسل هنا وواحد مسوي طلب صداقه يوووه قديم ماشفت طلب صداقه
وواحد مرسل فـ الصراحه

كم واحد ذول !!
ثلاثه اشك ان فيه واحد منهم مكرر بكذا مكان مع ان الاسماء تختلف في الثلاث امكنه
ماعليكم اهم شي حمد لله على سلامتكم وحياكم الله

بس اللي ضحني اكثر شي يقول بيحطوني انا والشيخ ابو الاكواس بمتحف تراثي
لاننا للان نكتب ومتواجدين بالمنتدى وكذا ابسط يابو الاكواس بنصير بالجنادريه

بس خوينا شكله ضيع اسمها اجل متحف التراث

الحين كذا واحد القاهم يدخلون المنتدى من الطيبين القدام اول مايشفون اسمي متصل او
لي حركه بالمدونات تلقى تقييم او رساله او تعليق

" انت لسى حيي وتكتب هنا "

لا والله ميت بس جاي اشوف الاوضاع بعدي كيف صارت !! عصبتوبي !!
ياخي قول ش اخبارك علموك كيف احوالك وش مسوي بعدين قول لسى تكتب وكذا

وبعدين موظفين وعندنا نت بالدوام << امانه
وفاضين الصبح بقووه واحسن مكان تضيع وقتك فيه ذا المكان وتسولف براحتك
يعني دام الوضع كذا بنعمر معكم سنين باذن الله

استغرب من الناس الفاضيه اللي بس يتابعون ع الصامت وهم واجد هنا
كثير منهم بعد ماكتبت عن وفاه عمتي لقيت لهم تواجد وعزوني في وفاتها الله يرحمها

الله يجزاهم كل خير بس لو انكم تشاركونا شويتين وكذا والله بتدون
للمكان اكثر جمال فخفو علينا وتنازلو شوي واكتب جعل مايكتب في مدوناتكم الى انتم !!

فـ الاخير

ابشركم الامور طيبه ياربي لك الحمد باقي بس المتصفحات تفتح حسابات الصراحه
ودي اقرقر على كم واحد هناك من الجهاز لان الجوال يطفش وربي

وبس والله كونـــو بخــــير .. سلام

حجازهم اصلي من سنين حاطهم بالمدونه وللان يشتغلون اللي يبغى يشوف
النسخه الاولى منهم يفرفر شوي بالمدونه !!


الوقت |~

- بطيئ : عندما تنتظر !
- سريع : عندما تخاف

- طويل : عندما تحزن !
- لاينتهي : عندما نتالم

- لاتشعر : به عندما تسعد !
- قاتل :عندما تكون في حالة فراغ


الوقت |~

لاتحدده عقارب الساعه لكن من يحدده
هو نحن وتغير نبضات قلوبنا

حكيم ياشيخ

ياصباااح الفول مع التميز وكاسه شاهي حساوي يجرح ويداوي
شوفو اللي ماهو من المدينه لا يتكلم عن الحساوي ( الحبق ) على قولتهم برا المدينه
مدري من وين مطلعين ذا الاسم احتس اول مره رحت لجده قبل فتره بكل مكان تطلب شاهي

قالو حبق ولا مغربي من جد اختلاف اللهجات والمسميات احيان ينكبنا والله
زي عندكم الجنوبيه ذول ولهجاتهم وربي تعبت مع لهجاتهم ولا فيه امل افهم شي زين !!

عشان كذا صاير بس اتحلطم على قولتهم ماعندي شي بس كمان ماودي
ابعد عن ذا المكان واصلا مقدرش !!

على طاري الصراحات امس انكتت كت في الصفحه احس العالم
كانهم كانو متواعدين عندي البارح مدري والله

خلوني اضبطها وانزلها لكم باليومين الجايه بس عاد لحد يرسل فـ اليومين الجايه
يكفي اللي عندي للان من فتره ااجلها وكذا

فـ الاخير

لحد يجيب طاري العالميه والاسيويه والهلال الوضع عندهم مكهرب بالحيل
يعني خليكم بالثلاثه والهزايم رايح جاي للاتحاد من النصر من حول خمس سنوات

صاير اللعبه حقتنا

اما الهلال ماعاد ينفع معهم شي تذكرون " لايضر الشاه سلخها بعد ذبحها "
هذه حالة الهلاليه بذا الوقت صراحه ماعاد يفيد معهم شي ابد

بس ماش خربو جونا والوناسه حقتنا ببدايه كل موسم الحين وش نططق عليه السنه اللي بتجي
تكفون حاولو منا منا لين تتاهلون خلو الوناسه بعدين لا تستعجلون عليها

وبس والله .. سلام

مسيتو بالخير ,, وهلا بالعيأإأآأل ياخي انعن شي تقعد لك زي ساعه تفكر كيف تطلع عشان
تروح وترتاح شوي يوم تطلع وفرحان انت ووجهك !!

فجـــأه كذا بدون مقدمات يتصلون عليك بالعمل يدورن عليك ولازم تجي ضروري
طيب وش عندكم ووين الشباب عنكم !!

انت تعال واذ جيت عرفت السالفه كذا عذاب وربي كل شي ماهو زين سويته
فـ العمل يجي ببالك وقتها وتقعد تضرب اخماس واسداس لين توصل

واخرتها يطلع شي تافهه وليتني رقدت وماجيتهم

ماعليكم من الفضاوه كـ العاده امر المدونات افصفص امها عشان اشوف احوال الشعب
لسى ماسكه معاي الرقابه مع اني عضو عادي من سنين !!

كل مذكر سالفه الرقابه وكيف انشالت مني اقعد اضحك مدري ليه والله
وكيف كانت ومازالت محاولات للعوده بس والله احس ماني اهل لها في ناس افضل واكثر تاهيل وفاضين

لاني بجد ماني فاضي الى وقت الصبح !!

ماعليكم نقول نقطه ونهايه سطر

نجي للمهم !!

هذا كلام للشيخ نفر صديق الكل واكثرهم اثاره للجدل هنا يمكن محد ينافسه في اثاره
الجدل الى تنهيدهـ

لا يابو الاكواس اذ بديت في موضوع واثار النقاش مع احدهم لا تتركه واصل معاه وانا اخوك
لين توصلون لنقظه تفاهم او التقاء الترك ماهو الحل !

وبعدين من شخص مجرب كثير لين شوي وشيب راسه الصمت ماهو حل ابد الصمت
يعتبر هروب من المواجهه بأدب بس !! ماهو الحل

بعضهم يغيب عنه اشياء في الموضوع او يفهم بطريقه خطا على قولتك بعضهم
ياخذو حبوب منع الفهم عشان كذا استمرار النقاش مع احد ما بالتاكيد بيحيب نتيجه دائما بس لازم

يكون الطرفين ملمين وماخذين فكره كامله عن الموضوع وشايلين كل سوء الفهم
وتاكد انكم بتوصولون مع بعض لحل يرضي جميع الاطراف !!

هــاه وش راي قراء مدوناتنا تشوفون النقاش مع هذه العينات مفيد او نتركهم على اولهم
وننهي النقاش من اصله ونريح روسنا هو الحل ؟؟

هذا تساؤلي وهو طبعا اكمال لكلام ابو الاكواس اللي اظن فيه من جاب له الجنان
ولا هو راضي يفهم الشخص اللي يناقش بكامل الموضوع ولا خوينا اللي يناقشه راضي يفهم

وشكلهم وصلو لطريق مسدوده او حكمو عليها من البدايه قبل يمشو فيها !!

فـ الاخير

الكلمه الطيبه مطلب المفروض نسعى وراها دايم ونخليها في المقدمه ونحسن الظن
ونبطل ناخذ الامور بشخصنه اكثر مما تتحمل

ونعرف لمين نفضفض سوالفنا وكذا

وبس والله .. خلوني اطلع دوامي مابقى منه شي كفايه رجعوني له بخدعه

كونو بخير .. ســـلام

ســـلآم .. هانت باقي يوم .. ونعطل كم يوم .. ابشركم
صفحات الصراحه رجعت تفتح عن طريق المتصفحات مو بس الجوالات !!

المهم زي ماقلت لكم من امس بنزل بعض الصراحات اليوم فهيا بنا واربطو الاحزمه



ياهلا والله بهذا الصباح يوم يحمل معه مثل هذا الكلام ..
بس عندي ملاحظه صغيرونه شوي ترا وربي يوم ارسل لاحد فـ الصراحه
ماقد فكرت او جا ببالي انه لازم يردها او شي لا وربي

ارسل كذا للدعم او التحفيز او الاعجاب بما وجدت في المدونه لان اغلب
الصراحات اللي ارسلها تكون زي التقييمات مخليها بما ان مانقدر نقيم على طول

واصلا مذكر اني كتبت وارسلت صراحه وفيها اسمي او شي لا !
لاني بجد مادور الرد ابد واذ جا الرد بهذا الجمال فاهلا وسهلا به

فـ الاخير بالنسبه لذي الصراحه ليه بعض البنات ينحرجون يمدحون في شي خاص
بالشباب بدون مايحطون معاه كل الناس شوفو اخر سطر



ياهلا وعليكم السلام .. هنا صاحبة الصراحه ماخذه راحتها وتمدح الله يجزاها
كل خير ويسعدها وتحش بكثره السوالف والسكيب وكذا

وش اسوي احيان ياخذني الحماس وبدل لا اقول شي بسطر تلقوني ساحبها
عشرين سطر والفايده يوخ يعني مابوه فايده

بس كمان شكر مليون على هذه الصباحات اللي تجيب مثل هذا الكلام .



هنا مره تكملت مره ثانيه مدري ثالثه او رابعه عن الصداقات بيننا
وحطيت تساول وكذا على اساس ابغى العالم تتكلم عن الموضوع

شوي الى جاتني ذا الصراحه وشقت اوم الجبهه شق من الخرشه
رحت شلت التساؤول وربي على طول وغيرت السالفه وكذا

مدري ليه حسيت اني طالب بمدرسه بس والله كلام في محله بس يشهد عليا ربي
اني كنت ناسي اننا تكلمنا بذا الموضوع قبل



هنا واحد او وحده تدري اني اداوم وابصم وكذا فجايه تطق طق عليا
مع انها حلوه العبارات او الكلام بس لو انها حولي يوم قريتها

كان

ونختم بهذه



ياخي والله انت الاجمل ومرورك الاروع وحضورك الاول تصدقون
اول مره احد يرسل من الشباب .. احسنا احيان مانسير على بعض فـ الصراحات

كلام كبير وجميل ونصه او اغلبه ما استحقه وربي
كم هو كريم صاحب هذه الصراحه ونصيحته من جد رهيبه

راح اخذ بكلامك واجيب المفيد باذن الله << شايف ان مدونتك زي وجهك
ماعليكم من صوت الضمير حقي وكذا

بس بجد هذه الصراحه رهيبه الله يجزاك كل خير اخوي ويكتب لك الاجر
وبس والله

يكفي هذه الصراحات لين اليوم واذ جا جديد ومفيد نزلته
كونـــو بخــــير

ســـلآم

أإآأم باك وع الطاير ماعندي وقت بس بوريكم شي
من زمان ماشفت كلام تعبان وحش في الصراحه

بس اول مانزلت كلام العالم اليوم الصباح شوفو وش وصل لي !!



هذه العينات ماترتاح يوم تشوف العام تتكلم فيك بشكل ايجابي وكذا
لازم يدخلون ويتكلمون كذا !!

ماعندي شي اقوله بس حبيت اوري اللي ارسل انها ماتفرق معاي وربي
سوالي :: ليه ماجات الى اليوم ؟

ماعندي اجابه للان يمكن اذ طبت علمتكم وكذا

ســلام

صبأأأحكم ابيض ومنور ونهايه باذن لله احلى وافضل للاسبوع
ش اخبارك علومكم عساكم بخير !!

بما انا لسى في قطار الصراحات علة قولت طيف فـ خلوني اختم بهذه المحطه الاخيره
لاخر رحلتين وصلت فـ الصراحه !!



يارباااه هذه الصراحه معلقه ربي يسعد من علقها وكتبها
وبعدين بالعكس احلى شي الكتابه بالعاميه الدارجه افضل للتعبير والكلام

مشكله صديقه وصديقه الصراحه خربو علينا اتكتيت الصراحه
وصرنا نحس لازم نكتب باللغه العربيه الفصحى يوم نكتب بالصراحه

ترا عايدي نكتب بالعامي افضل والله !!

ماعليكم بس شوفو نهايه الرساله والحروف تذكرت برنامج الشيخ عبدالعزيز المسند
الله يرحمه ايام كان يجي على القناه الاولى كذا الرسايل تكون

وياااهو بلا فهامه ترا الرابط موجود بالتوقيع اللي باللون الاحمر اضغطي
عليه يدخلك على صفحتي حقت الصراحه على طول ماله داعي تدوري كل المدونه عشان الرابط

بس ماهو منك من العجله اللي فيك من يوم عرفت وانت عجله !!



ياهلا والله صباح كل شي جميل صباح النور والسرور

هذه الصراحه رد على كلامي على وحده من صراحات الامس يوم اقول بعض البنات
ينحرجون يمدحو بالشي بشكل خاص ولا زم يعمومون وكذا

جا الرد ماشي بسرعه البرق شوي ويكسر شاشة جوالي
وكمان بالعاميه هالمره يمكن تعقدو مني البنات يحسبوني مفهم عربي اصيل
ولازم يكتبو بالعامي

لا كان مفهوم الكلام وواضح وربي اعتراضي على طريقة البعض
فـ التعبير عن الاعجاب بشي نكتبه وكذا بالطريقه العامه ونجمع الكل معاك

وين المشكله فـ انك تبدي اعجابك بشي نفسه كتابه او مدونه او رد
ترى عادي الامور

>> ماتنعظى وجهه يابو انت بلشه

فـ الاخير

الله يسعدكم جميع بجد اسعدني تواجدكم وكلامكم وكل شي ربي يسعدك جميع
شكر للتوضيح وشكرا لكل شي

واسف للناس اللي ماهي منتبهبه ان رابط الصراحه بالتوقيع
المره الجايه بنزل فيديو ويوريكم كيف تدخلون على الرابط من التوقيع

يالله كونـــو بخير وسلامه

ســـلام

آأإأآم بآأإآكـ << ولكم مأإأن

طبعا موضوعنا لسى مانتهى مع ابو الاكواس نفر وشهرزاد في طريقه النقاش
و الانسحاب منه وكذا .. وصراحه وبدون مجامله نفر وشهرزاد

وضيفو لهم تنهيده وشمس وطيف وابو العز ذول من اكثر الناس اللي لو تتناقش
معهم لشهرين قدام ماراح تندم ابد ماشاء الله عليهم

دايم يملكون الحجه والاقناع والامتاع فوق كل ذا يعني تستفيد تستمتع وتقتنع
فخلونا نكمل شوي معاهم

هنا الكلام لأكثر من عرفت قدره على النقاش والاخذ والرد بكل ابداع
كلامك رهيب وفي محله ومحد يقدر يقول غير ذا الشي

بس وانا اخوك للتوضيح :: المراء :: هنا القصد منه ترى طعن الشخص اللي قدامك
في كلامه واستخراج غضبه بذا الشي ويدخل فيها كما التحقير وكذا

عشان كذا جا هذه الدليل والفضل الكبير لم ترك ذا الشي ولو كان على حق والوعد ببيت باسفل الجنه
حتى ولو كنت محقا لان القصد احيان مايكون اظهار حق لكن القصد الطعن والتحقير وكذا

عشان كذا كان الذم

وللمعلوميه طبعا بحسب اللي اعرف ان الاختلاف ينقسم لثلاث اقسام ( نقاش - جدال - مراء )
الجدال لاظهار الحق مطلب وفيه توجيه فيه من القران لاظهار الحق باللين وبدون غضب وكذا

ولنا في قوله تعالى : ( وجادلهم بالتي هي أحسن ) : هنا الجدال مطلب ووااجب لتبيان الحق
لاهل العلم والمعرفه ومن يملكون الحجه المقنعه ! يعني هنا الجدال مطلوب وكمان في اوقات
يصير ضروره علينا !!


بس لا يتجازو ذا الشي والى تلقونا دخلنا فـ الجدال المذموم البغيض اللي مايجيب الى العداوه
وتركه اكيد افضل !

اما النقاش في احيان كثيره يكون عشان نعرف وش السالفه بشكل كامل ونكمل الناقص
فناخذ ونعطي ونرد على بعض في اطار الاحترام قبل كل شي

فماهو صحيح اننا نترك اي نقاش بدون مانكمل معرفه اللي نبي ونوصل الفكره كامله وكذا
هذا اللي كنت اتكلم عنه امس !

هذا كلام لشهرزاد صراحه بعد كلام طويل ورهيب قالت قبل بس اخذت هذا
لانه هو المفيد وزبده الكلام انا معاك بهذا الشي

بس لو نكمل شوي مانترك اللي يصير يصير وتراها بالصاد مو بـ السين
وبس والله واعذروني على كثر الكلام اللي اغلبه مدري وش ابي بوه

وهلا والله بالخميس وهلا والله بالعيآأإأآل

كونـــو بخير .. سلام

هناك

من يبعث ب نفسك
شعور السعاده دائما . . !
هناك من يفكر . .

ب ابسط شي يعني لك الكثير


هناك من يفتش عن ابتسامتك
ل يزرعها بداخلك وانت لاتعلم . .

نصيحه حافظو على اللي زي كذا .. لانك ماراح تلقونهم بكل الاوقاإأآت

يقول
يربكني .. رحيل الحلم ..
وصحوة جرحي المكبوت ويضنيني ..
صراخ الصبر .. إلا من شق أسماعي .. !

ويزيد
تبغي تضيق خاطري جعله فداك ؟؟
مهوب انا اللي يعاتبك في حلالك
طلبتني قلبي وانا قلت لك .. جاك
والحين سو بخافقي ما بدا لك ؟؟

فرد احدهم عليه حين يجتمع حسن الظن
,, بطيبة القلب تزيد نبضات الغباء ف الإنسان ،،

مدري بس ماعمر حسن الظن وطيبه القلب
كانت غباء

يالله ماعليكم نختم ذا الصفحه
بذا الرد والوعد باذن الله بالصفحه الجايه ..

خليكم قريب سلام