ابــشركم وقلبنا الصفحه ياربي لك الحمــد وكتب ربي لنا لقاء بعد غيبه
يازين بعض اللقاءات لو انها افتراضيه بس تبقى رائعه .. نكون في افضل حالاتنا من بعدها
احيان تاخذنا الامور والحياه لا أماكن بعيده ونغيب لفترات بس نرجع

فيكون للقاء شكل وطعم ثاني زي الفيمتو يوم نطنشه بعد رمضان
ونشوف له شكل ثاني مع رمضان !!

تصدقــون !

من الصبح افر في المدونه هنا اكتشفت اني من جد غياباتي واجد واسحب كثير عليها
بس ارجع واخذ لي فتره هذا زيني وحماس وكذا ثمن ارجع للسحبات
شكل يبغالي قرصه اذن عشان اركد وابطل سحبات !!

ماعليكم من خرابيطي اخذت فره على مدوناتكم النايمه شوي واللي مكسلين اصحابها شوي
ياخي والله ان لكم وحشه جميع يازين سوالفكم وربي حتى القديمه
بجد تدونا جرعات سعاده احيان الواحد محتاج لها !!

التعطيل والاجازات رهيبه بس تجيب الكسل وتكتل اذا ماسافرات وغيرت المكان وربي ملل
الدوام افضل من التعطيل والجلسه بالمكان نفسه !!

فـ الاخير

ترا الكلام اللي فوق اعزي نفسي فيه وكذا واللا وربي التعطيل لو بغرفه فوق السطح افضل
من الدوامات لا تصدقوني

تعالو هنا بالله تخيلو معاي اللي يزورنك في اليوم تقريبا فوق الميه شخص
وش بيكون شعورك وموفقك لو كل يوم كذا تقريبا

تلقى زوارك بذا الاعداد

والله انها سعاده بجد الله يسعدكم .. ذول اللي تقريبا زارو مدونتي باليومين اللي راحن
بحسب المشاهدات في اليوم يشوف المدونه تقريبا اكثر من 100 عضو

شكر مليووون والله شكر لكم جميع وعقبال مانشوف الكل فيذا
لي وقفه مع كذا سالفه جاتني بس خلوها بكره الصبح ان شاء الله الواحد يكون انشط شوي
ومنها ارتب ابو الافكار بمخي المصدي ذا يمكن اجيب العيد لو اتكلم فيها الحين


يالله بذا الظاهري بمشي اقفل مكتبي واتجهر للبصمه والخرجه

فـ امان الله .. سلام

صعبه ماهي صعبه والله .. كلها شوي تحديثات عشان الامور تضبط وكذا
ياخي الجوال يسخن ويعلق والشحن حقه يطير بسرعه !!

تستغرب فـ البدايه جوالي صاير الشحن مايمسك فيه بالصدفه احيان نروح الاب ستور
عشان ننزل برامج جديده نكتشف ان فيه برامج واجد يبغى لها تحديثات

ونطنش في احيان كثيره نحدثها للنسخ الاحدث او نتكاسل بعد فتره نسوي لها (update)
نشوف بعدها الشحن صار يطول بالجوال التعليقات حقته خفت وماعاد صار يسخن وكذا !!

يعني نص البلا في الجوالات خاصه الايفونات انها تحتاج للتحديث بس حنا مطنشين
يمكن مسوين انفسنا مشغولين وحنا ماعندنا شي بصراحه
ماعليكم ... هذه بالنسبه للاجهزه وانه يبغى لها تحديث عشان تتجدد وتصير افضل

واحيان من الكسل بس نطفيها ونشغلها تتعدل كثير امورها وتصير افضل لان اعاده
التشغيل كمان يصير فيها تحديث لبعض بيانات الجوالات وانظمتها فتتحسن شوي !

الزبده ...

ترى حتى حنا كبني ادمين .. >> حلوه بني ادمين

المهم حتى حنا نحتاج للتحديث اكثر من الاجهزه اللي معنا يبغالنا نحدث بياناتات وافكارنا وكل
شي مو نبقى طويل على نفس التفكير نفس الشغل نفس كل شي لفتره طويله

ياخي انفضو غباركم شوي عن تفكيركم عن الاشياء اللي تنفس فيكم
لا تصيرون تترددون في نفس المكان اللي كنتم فيه قبل حاولو تغيرونه للافضل اصنعو الاجمل ليومكم

عشان يمر بشكل افضل من امسكم !!

قللو من الحلطمه وجلد الذات وان البلا فينا ومغير نطالع بالناس ونقول ياليت نصير مثلهم
لا خلو العالم تتمنى تكون زيكم اكثر فرح اكثر وناسه واقل حلطمه !!

لا تخلون الاشياء الروتيينه في يومكم سبب ازمه مع انفسكم لا سووها بسرعه وابدو في اشياء جديده
اغلبنا ازمتهم مع الروتين اليومي لهم يتحلطون عليه فتره طويله وهم لسى ماسوو له شي !!

مثل توصيل الاهل وتلبيه طلباتهم بالنسبه للشباب وانها تشغلهم عن الشباب وكذا
تغسيل الاواني والطبخ وشغل البيت بالنسبه للبنات وانها اشياء تزهق وكذا !!

خلصوها بسرعه تراها ماتاخذ وقت وارجعو كملو يومكم باكثر متعه

اي شي يطفشنا المفروض نتجاوزه بشكل سريع عشان مايسوي لنا زحمه وكثر اللت والعجن فيه
بيسبب لنا ازمه مالها داعي !!

نقطه ونهايه سطور كثرتها شكلي

بتقهوى وراجع خليكم قريب ...

سلام

آأأآأإم بآأإأآك

ماطولت ادري بس لان الكتابه بشكل كثير في مكان واحد تملل شوي فـ وزعت الكلام على
ردين عشان البرسيتج وعشان الناس تقرا بدون ماتمل >> لا مخ

المهم

زي ماقلت لكم صاير اتابع مشاهدات المدونه على طول وكل مادخلت هنا ابشركم اليوم
زاد عدد المشاهدات عن امس بـ 150 مشاهده من امس لليوم الحمد لله

العدد مره مرضي لغروري

ماعليكم من سوالفي هذه وش كنا نقول قبل !! ايوه تذكرت عن التحديث وكذا
شوفو اغلبنا يشتكي ان ماعنده وقت وانه مشغول ومدري ايش لو يلاحظ اللي يقول كذا ان ماعنده شي

بس هو تعود على نفس النظام اليومي نفس وقت النوم نفس وقت الاكل نفس الاماكن
نفس الشله بالجوال نفس المواقع اللي يروح لها

يعني مايفرق امسه عن اليوم بشي كثير !!

بالله سوال كيف ماراح تحسون بالملل والطفش والتنفيس ؟؟

اكثر اللي تسويه اليوم حاول تتركه من البكره عنك حاول تنسى بشكل اسرع للاشياء اللي مشغلتك اكثر
اسحب على ابو ابو ابوها وانت مغمض

خذ بريك من نفسك وطف نفسك وشغلها يمكن تتحدث امورك حتى انت ماتدري
اقرا اكتب فعل الاشياء اللي كانت تشغلك اكثر عن النفسنه

عندك مواهب ومعطلها طال عمرك من فتره ومقفل عليها لانك مسوي مشغول
ارجع فعلها واشتغل فيها واشغل نفسك واستانس والعب يلاااا

تصدقون الكتابه هنا والقرايه للناس من الاشياء اللي تغيري مودي وربي فاقرو هنا
واكتبو وش عندكم فرغو شوي من الطاقات السلبيه بالكتابه والتعليق وكذا

تدرون ماعندي مواهب الى اذ بتعدون السوالف اللي مالها سنع موهبه
فخويكم موهوب

كيف لو كنت اقدر اكتب خواطر !!
او اكتب شعر !!
او اعرف ارسم !!
او لي في الكتابه والتحليل لبعض الامور !!
او صوتي يجي منه واقدر اغني !!

بالله كيف بيجي يمي الطفش ؟

اكتبو جعل مايكتب الى انتم ورونا ابداعاتكم خرابيطكم اي شي !!

فـ الاخير

طولتها بعد وهي قصيره اليوم وبكره لازم مايرتبطو ببعض كثير خلونا نقدر نفصل بينهم
خلونا نعيش اكثر منفتحين على ذواتنا واللي حولنا

ونزيد من نسب تقبلنا للاخر في كل شي ونقبل ونعرف ان الاختلاف مع اللي حولنا
المفروض هو اللي يعدل كثير من امورنا

وبس والله .. سلامتكم .. سلام

ونقفل اليوم بذا الكلام .. مدري كم بقى على نهايه الدوام بس جاي كذا
برز المدونه فوق وبقفلها اليوم !!

مدري مين يسال يقول انت اكثر واحد يجيب طاري الاكل بمدونته احسك دوبآآ
وكمان سوال يمكن بنفس الكلام بس بطريقه احلى ومدح بالبدايه
وختمها بالسوال عن وزني

احسهم كانهم متفقين عشان اجاوب غصب مدري والله .. المهم
مذكر من يوم يومي ان وزني تعدى الـ 60 لا ابد العب قريبها وانزل بس ماتعديتها ابد

ولا يغركم كلامي عن الاكل ترا مالي في كثر الاكل بس الكلام فيه يعجيب العافيه مدري فيه احد مثلي او لا !!
ماعليكم من شغل الاثقال والاوزان ترا وربي عووص من النحافه
احيان اخاف اطير يوم اجري

يالله ان تحيي الربع اللي اشوف لمدوناتهم اليوم حركات وبركات وكذا
ربي يوفقكم ويسعدكم جميع

يالله انتهى دوامي .. فـ امان الله .. سلام

.....

يقول طاوعني ولا تجيب سيره
ابنصحك يا عل في الامر خيره !!

طوف علشان تعدل امورك
وجامل خصوصا فالامور الكبيره !!

وسولف مع هذا وهذا وهذا
وحتى اللي مايفهم بشي استشيره !!

رفع لخلق الله وضبط معاهم
الدنيا حرب اختار دورك وصيره !!

...

وصبحكم الله بالخير .. الاسبوع ذا قاعد يجري جري مدري انا المستعجل وللا هو اللي
شاد حيله وقاعد يركض ركض !!

مدري عن مرور الايام غير يوم اقلب اوراق التقويم الصبح لا داومت واسوي
بحفظ التاريخ اليوم واعيد كذا مره اليوم بالهجري والميلادي

حده لين احد يسال اليوم كم اتنح واكتشف اني نسيت وانا موصي نفسي ومحرص عليها
ماتنسى بس انسى !! شكله من الحوب

ماعليكم ترا ساعات اخربط اجل قال من الحوب سلامات !!
على طاري الحوب و الناس الحبابه وكذا الحين لو بسال البنات بالذات وش تدين ابو الشباب
فارس الاحلام الفارس الملثم ابو سرواله وفنيله اذ حبيتي وكذا ؟؟

الفاضيه تقول وش تسوي له واللي ماعندها وقت احلى سكيب ولا عليها

خلونا من الحب وسيرته اللي احيان يازينها واحيان تغث والله سك ع الموضوع
يقولون الاولين بعض الامور زينه بس الازين استمرارها !!

كلام حلو ومكمل لبعضه بجد دايم الزين طيب وبعض البشر هبه من الله لنا يكملونا يكونون لنا
عون في اوقات كثيره وكلمه منهم توصل بعضنا للسما من الزين اللي فيها

ونتضايق لزعلهم ونحاول قد مانقدر نطلعهم من جوهم الكئيب وكذا
لان الزين مايصير يزعل

خل اللي بينك و بيني .. بينك و بيني
و لا تعلم به القاصي و لا الداني !!

و ابي وعد منك انك ما تخليني
و لا تعادل غلاي بواحد ثاني !!


الشطر الاخير ماله داعي لو مغيره الشاعر كان ابرك له لان الغوالي واجد
ومو كل غالي حبيب بعض الغوالي اقرب من الاحباب !!

اليوم جوي فيه كميه اشعار ماهي صاحيه شكلي من كثر ماقرا الشعر بصير شاعر
عاد لو تضبط معاي بكتب لكم كم بيتنا على الطاير

بس ماظنيت

فـ الاخير

يازين الربوع له رنه والله للان اذ احد قال اليوم الربوع يفز قلبي من مكانه فز
مدري ليه بس والله انه يفز

اخليكم وبمر شوي مدوناتكم اشوف العالم محركين سكون مدوناتهم هااليومين
عساهم دومم يحيونها معنا !!

ســـلآم

الله يغفر لي كبار المساوي
في يوم تجزا كل نفس بعملها

انا بوجهه من جميع البلاوي
وبحماه من طيش النفوس وجهلها

رب لغيره ما تلوق الشكاوي
اللي خلق كل النفوس وكفلها

كفلها ان اشهد انها كفلها .. وعدنا من ثاني من زود الوله مدري من زود طق الحنك
احيان بس ودي اكتب هنا لو ماعندي سالفه واليوم ممسكه مع الشعر

احيان بعض الصباحات تجبرك تكون ارووق الناس واحيان عكس وربي
هو نفس الصباح كل يوم بس احيان الناس اللي نقابلهم تفرق معنا الصباحات معهم

مدري بس اظن الثانيه هي الاقرب !!

مريت مدونات العالم اللي حولنا اليوم يسعد لي ربي صباحاتكم جميع
شي يوم تشوف العالم فيذا يكتبون

وعلى طاري المنبه وتقفيلته نفس سالفة تنهيده اذكر اول يوم اخوي ينام عندي
قبل يتزوج ويتركني وحيد كنت اطفي منبه والله مرات واجده واحيان اصحيه

واحيان اسوي نفسى مادريت اتسحب واطفي المنبه عاد كان يدرس بالجامعه وخويكم عاطل عن العمل
يعني قمه في النذاله اطفي منبهه واكمل نوم وهو يتورط مع محاضاراته

وكمان يوم نكون فـ الديره النومه مع العالم شي ثاني وزحمه والمشكله نومي على الريشه تقل بس لو احد يعطس صحيت

فا عاني من منبهاتهم صراحه واقول لهم من بدري لحد يوقت المنبه خلونا ننام
وياكثر ماقفلت منبهاتهم وكملت نومي نذاله ايوه بس نبي ننام وش اسوي لهم !!

بس عاد اذ شي مهم انا معاك المفروض نصحي راعي الجوال
او نكمل نوم ونترك المنبه يصحيه !!

وبس

ايوه تعالو هنا طيف قبل فتره تتكلم بموضوع ولقطها خوينا ابو الانوار ويبارك ومدري كيف
المشكله قريت كلامه قبل اقرا كلامها شوي وادور مين راعي السالفه ببارك له

يوم شفته بمدونة طيف عرفت ان السالفه ماهي نفس قصد خوينا ابو الانوار
البنت تتكلم بموضوع ثاني غير اللي هو يبارك فيه
ماعليكم كلن يصلح سيارته

طريقه شهرزاد حلوه في انها تجاوب على اسئله الصراحه بجد حلوه وين الناس اللي تسال بس
جابت كم سوال وجاوبت عليهم كفك

خفايء ماشاء الله عليها مدهره في مدونتها وصايره احيان تسولف زينا كذا وهربته
ايوه كثير من ذا الشي وخليك على هذا الخط تراه احلى من الخواطر اللي احيان تعور القلب

لا شي يستحق يطل من بعيد كانه بيختار لعيبه للمنتخب او يدور محترفين ياخذهم للهلال
مدري وش فيه مايشاركنا السوالف وكذا

ابو الاكواس شكله يتسدح بحدى هـ الديار مع الامطار والبراد
او انه مشغول خاصه ان الحج ع الابواب !!

عاشقه المطر مبدعه في وصف اجوائهم وسفرتهم تخليك تحس ابها باريس
بالتوفيق يابله واجازه سعيده عاد ماشاء الله المدرسين من طول اجازتهم

ينسون انهم موظفين احيان

وبس والله .. سلامتكم ..

انا ادري ان طبعي غريب
انا بنفسي .. ماعرف حقيقتي !!

انا فيه بس .. عادي لو أغيب
خلوني امشيها على طريقتي !!

مساكم الله بالخير .. طبعا الشعر اللي اجيبه لازم العب فيه شوي واعدل واخليه على جو مدونتي
فاذا صدف احد يعرف الشعر او راح يسوي له بحث وكذا يعذرني

لاني احرف فيه وابدل كلام مكان كلام الله يستر لا يمر الشاعر بكبره وينكب عفشنا
فلحد يعلم علينا واسترو ماوجهتم

مع اني اشوف التبديل اللي اسويه في الاشعار يخليها اشيك << اقول برا برا
وين اشيك يابو وحنا بالتغيير كسرنا اوم الابيات

عاد اللي لهم في الشعر وااوزانه والكسر وكذا يعطونا وش لاحظو بالشعر اللي فوق ووين
الكلام اللي انا ضايفه ومبدل فيه ؟؟

اللي يجيبها صح له اللي يبغى هديه تقييم اعلان لمدونته بلاش هنا
عشانا على حسابه اي شي بس يطلب

على طاري الجوايز وكذا مره جبت لغز قديم واهبل وكلن يعرف يحله
حطيته في قروب الجماعه الاعضاء فوق الاربعين واغلبهم كبار بالسن وكذا المهم حطيته

وقلت والله على جائزه ايفون X اللي يجاوب عليها يجيبه لي
يمكن ابو ثلاث دقايق نص الشعب جاوبو وانا قايل للاول بس المهم كلن يقول هو الاول
بس النت علق ومدري كيف وهوااش

بعد الهوشه ماهدت قلت للاول هاه متى بتجيب الايفون حقي عيونه صارن كوذيه
مانتبه للكلام واغلبهم بعد مانتبهو للكلام قاعد اقول اللي يحل يجيب الايفون لي

بس احيان الدرعمه والحماس يوديك في حيطه الين اليوم متمشكل معاي بسبتها
وعاد قروب تقريبا رسمي مافيه احد يسحب على احد قدام الريايل بس سامحته

لانه مره جاب بطاقة شحن ابو خمسين او ميه والله مذكر عطاني البطاقه وجواله قال بالله ماشوف زين
اشحن لي الجوال قلت وش لي قال لك البطاقه بعد ماتشحنه وقعد يضحك

خليته لين يجلس وجوالي بيدي شحنته بدل لاشحنه جواله عطيته البطاقه وجواله قلت ماهو راضي
يشحن شكلك بطاقتك فيها بلا

يوم شفته بيروح يرجع للمحل بعد محاولات منه ومن الشباب انهم يشحنونها قلت تعال تعال
تراني شحنتها بجوالي من اول

الزبده ماعندي سالفه ماعليكم مني احيان اكتب اي شي بس ابغى اصير في المقدمه معكم
وبس والله .. خلوني اروح اقفل مكتبي واشيك على المعاملات اللي راميها هناك من اول يمكن اخلصها

تسمون على خير .. سلام

ليست للقراءه !!



قد لا تاتي الامور كما نحب او كما نحن متصورين لها .. لكنها اتت على كل حال !
لنتقبل الموضوع باكثر رحابه صدر اهم شي البدايه

ومايتبعها دائما يكون انعكاس لقدرتنا على تقبل الامر في البدايه
اذن البدايه دائما هي اللي تفرق معنا !!

يوم نتقبل الامر بحزن وهم وحلطمه وصياح راح تطول حالة البؤوس اللي بنعيشها
يوم نتقبل الامر بكاثر تفائل وننظر له من اكثر من زاويه راح تختلف الامور معنا !!

احيان نكون مضطرين لركوب الموجه رغم قسوتها وشدتها
عشان نقدر نتحكم في توازننا وثباتنا ومانبين الضعف اللي بيصيبنا

بعضنا يقدر يتظاهر بالقوه لفترات بس مشكلته يوم يضعف راح تكون طيحة اكبر شوي
عشان كذا استمر اقوى دايم ولا تخلي لحظات الصعف تسيطر عليك

خلي لحظات ضعفك بينك وبينك قد ماتقدر !!

كون اقوى مع الناس قد ماتقدر بعد لا تخليهم يشفون لحظات ضعفك الى نادرا جدا
او لا تخليهم يشفوها ابد !!

بعضهم للاسف يتعمدون يظهرونا اضعف ويستنانسون اذ شافونا ضعاف
تلقاهم دايم يحاولون يهدون من توازن قواك وسيطرتك على ضعفك

يستفزونك باكثر المواقف اللي تتعبك !!

كونوا دايم اقوى من كل شي استعدو لتلقي كل شي وجهزو لردة الفعل قبل الفعل نفسه
مدري كيف تجي بس يعني خلونا نكون مجهزين ردة الفعل يوم نحتاجها وكذا

فـ الاخير

لنتذكر اننا لسنا معصومين من الاخطاء لذلك لنعتاد ان نعود انفسنا على الاعتذار دائما
لان هناك اناس توثر فيهم بعض اخطائنا بشكل كبير قد لا يظهرون ذلك لنا

لنعتذر لهم لنحمو بعض اثار تلك الاخطاء !!

وبس والله .. سلام

يأتي المطر دائما بدون موعد ليجعلنا أسعد .. كم هي جميله بعض اللحظات التي
لا تكون بمواعيد فقط تاتي هكذا بدون سابق تمهيد

تاتي وتملا الاماكن معها فرحا وبهجه !!
ليتها تطول لتبقى الاوقات اسعد

تدرون هي ليست للقراءه ايضا !

ليت عندنا شي نقيس فيه مدى تقبل الاخر لنا مدى رضاه او سخطه على
تواجدنا قريب منه ؟

عشان نقدر بعدها نتحكم في القرب او البعد

لانه في احيان كثيره بعضهم ينحرجون من تواجدنا حولهم لكن انفسهم الطيبه
ترفض انها تبين لنا ذا الشي رغم مدى اذاهم من تواجدنا حولهم

احيان كثيره تلقاهم يلمحون لذا الشي بس بدون مايقولون لنا شي
بكلمه بصوره بفكره !!

ياخي وش عنده ذا متى يقضب الباب ويفارق >> ذا بعض حديث الانفس

تتوقعون بعضنا ينتظر لين يطلع حديث النفس ويكون بصوت مسموع
او الافضل يقضب الباب من قاصرها ويابخت من زار وخفف

مدري !!

احيان كثيره ندور العذر بدل الالف مليون للناس اللي يعزون علينا ونجمل صورهم قد مانقدر
بس احيان تصرفاتهم هي رده فعل لبعض اخطائنا لازم نعرف ذا الشي

المشكله مع الوقت نخلي الاخطاء عليهم لا اراديا وبدون ماننتبه اننا اخطينا عليهم قبل
ياليت دايم نقيس الامور افضل

ونعرف انها كانت من عندنا البدايه ونعدل قد مانقدر بدل مانعتب وندور الزله
على بعض وكذا !!

مدري وش فيني اليوم بس لعبت في الفلوتاب والله مدري متى بترك هذه الحبوب
وابعد عنها اللي يعرفوني ومتابعين مدونتي من سنين يدرون قد ايش مدمن عليها

الله يفكنا شرها ويبعد عنا وعنكم الادمان

يالله .. استرو وماواجهتم .. سلام

ليست للقراءه !!

صمت غريب .. و حالتي في غرابه
.............. / ماني بـ رايق , بس.. ماني بـ ضايق


بجد اليوم ماني عارف وش فيني بالضبط من صحيت وفيني كذا بلاهه مدري
فهاوه مدري قل صح مدري كسل !!

قاعد الف في اشرطتي القديمه من يوم صحيت وكل شوي
اتذكر لي شغله واقعد اقول وش السالفه ليه كذا !!

وربي بجد تعبت شي يتعب بصراحه يوم ماعندك سالفه ومغير تقلب في ماضيك
وتقعد تضرب اخماس في اسداس !!

احب اخر ردود في الصفحه اكثر حلطمه عشان بعد شوي بقلب الصفحه وادري
اذ قلبت الصفحه محد بيرجع لورا ابد فماخذ راحتي واطلع الاشياء السلبيه بكبرها من راسي

احيان احس الكتابه والله تريح تحس انك تفضفض لاحد

وتريح لك شوي

المهم

ترى وربي مافيني شي بس كذا المود لكم عليه شوي اليوم مخيس او مغبر شوي
اهلي اغلبهم مسافرين ماعندي احد وشكلي بلحقهم اليوم بس والله مافيني حيل اسافر يومين وارجع

لاني مقدرش اخذ اجازه بذا الوقت توي جاي من اجازه والمخ يبغاله اجازه !!

من صحيت والله نفسي بسجاره مدري ليه كمان لو اظمن ماتكثر عن سيجاره وربي لاخذ لي وحده
يووه تذكرت وحده كانت معنا هنا في عبير الله يذكرها بالخير

لا قلت بدخن طارت فيني وتعصب وتزعل خلتني ماعاد اجيب طاري الدخان بمدونتي
الله يسعدها ويذكرها بالخير وين ماكانت وياليتها اذ مرت على المدونه تطمنا عن اخبارها

دخله مالها معنى في حقت الدخان

المهم

خلوني اقفل الصفحه على خير .. واسترو ماواجهتم .. وتراها حلطمه مو اكثر
الامور بخير وطيبه ياربي لك الحمد

فـ الاخير

سنبقى دائما كما نحن لنجعلهم يقبلوننا هكذا بدون ان نتصنع الامور ليقبلونا
فقط كونــو كما انتم

وبس والله .. نقفل الصفحه .. سلام