طفلتك ماعاشت احساس الطفوله روايه رومنسيه جريئه

**حلاعتيبيه** · 27-12-2009, 10:37 PM

خلص وطلع متوجه ل الفندق وتذكر جواله المغلق من أمس وهو ب باله يتصل على أمه وأخوانه يتطمن عليهم بس تفاجأ أول مافتح الجوال ب وجود 3مكالمات من نواف قبل كم ساعه ..
ومكالمتين من أمه وعصام قبل ربع ساعه ..
خاف وصاب قلبه القلق وهو يتصل على رقم عصام على طول وأول ماجاه صوت عصام يهلي ويرحب قال يقاطعه : عصام إنتو بخير ..؟؟ محد منكم فيه شئ ..؟؟

قال عصام ب إستغراب : لاياخوي احنا الحمدلله بصحه وعافيه مافينا شئ ..

قال عزام ب قلق وصوت حازم : أجل وش فيك متصل إنت وأمي قبل ربع ساعه ونواف من قبلكم ..؟؟

ضحك عصام على توتر أخوه وقال : هد هد مافيه إلا الخير بس أمي قالت لازم أكلمك أبلغك أنه نواف وأبوه طلبوا الملكه اليوم العصر .. وإنه لازم نحلل ل سديم الصبح ..

إرتاح عزام وهو يجلس على أقرب كرسي عمومي قدامه وقال : أوووف الله يسامحكم طيحتوا قلبي .. بس متى كلمك نواف ؟؟

قال عصام ب تفكير : ع الساعه 1 ونص كذا ..

قال عزام ب حزم : خلاص صار إن شاء الله .. عموما أنا راح أجيكم من بدري يعني ع الظهر إن شاء الله وأنا عندكم .. وإنت إذا خلصت سديم التحاليل مر ع الطباخ وإحجز لنا ذبيحتين ل العشاء .. سمعت ..؟؟

قال عصام ب طاعه : تامر امر ..

قال عزام وهو يوقف : خلاص أجل عطني أمي أكلمها إشتقت لها ..

ضحك عصتام وقال : وش عنده حبيب أمه توك أمس شايفها .. أمداك تشتاق ..؟؟

قال عزام ب جديه : أنا ماتعودت على فراقها وعساني ماأتعود عليه بس إنت كل يوم نايم ب مكان وعادي عندك الوضع ..

إبتسم عصام وقال : أجل لو تدري إنها قضت ليل أمس وهي تبكي عليك إنت وساره وإحنا نحايلها تسكت ..

حس ب وخزة ألم ب صدره وقال : عساني فدوة دموعها ..(وبحزم جاد) بس لا أوصيك ياعصام الله الله ب أمي تراها ب ذمتك ألحين ..

قال عصام ب رجوله : إبشر يالغالي وخذها هنا كلمها متلهفه عليك ..

\
/
\
الساعه 6 الصباح ..
المستشفى ..

الهرب دايم يولد مشكله !!
ليش تهرب من مصيرك يا بريء ؟!!

لايهمك .. لاتخاف الأسئله
واجه وخلك ولو مره جريء !!

دخلوا المستشفى ومرام تتجنبه وتتجنب نظراته ..
وقلبها يرجف رجف منه ومن وجوده ..
بس كانت تدعي اللامبالاه وهي تسولف مع سديم وتستهبل معاها ,,

وصلوا عند الرسيبشن وعيونها على كل شئ الا عصام اللي قال ل الممرضه : نوره .. ممكن بالله تساعدينا ندخل بدري عند غرفة تحاليل الزواج قبل الزحمه ..؟؟

رفعت راسها الممرضه واول ماشافته إبتسمت من تحت النقاب وبانت ب عيونها وهي تقول : لايكون ب تتزوج ياعصام ..؟؟

ضحك عصام وقال : ياليت بس مو انا اللي راح أتزوج ..

إبتسمت المرضه أكثر وهي تعطيه أوراق يعطيها الممرضه اللي بتسوي لهم التحليل وقالت : هذي الأوراق ومبروك مقدما ..

إبتسم لها وقال :الله يبارك فيك ..

وأول مارجع عند أهله اللي كانوا قريبين منه مره ويسمعون ويشوفون كل شئ بوضوح همست أمه بعصبيه :خير إن شاء الله طاق لي حنك مع البنت وتتبوسم لها ..وين جالسين إحنا ..؟؟

ضحك عصام ومسك يد أمه وهم يمشوا ل الغرفه وقال : يايمه لزوم الشغل بس ..

ضربته أمه على كتفه ب خفيف وهي تهمس بنفس العصبيه : ياروحي ع اللي مهتم ب شغله الحين ,, تذكر بس إنه عندك خوات ..

إبتسم وسكت وهو يعتب بداخله على أمه اللي فضحته قدام مرام ..

ومرام تضحك ب نفسها ب إستخفاف وتقول : شكلك صاير نسونجي ياعصام .. ماقول الا الله يعين اللي ب تاخذك وش بتتعذب ..

بعد خمس دقائق دخلت سديم غرفة التحاليل ومرام وعمتها برى ..
وربع ساعه طلعت سديم وهي ماسكه ذراعها من مكان الإبره وتقول ل مرام وأمها اللي جالسين ينتظرونها برا : عسا ربي يكسر يدها ه الفلبينيه لعبت ب يدي لعب وهي تدور ع العروق ..

ضحكت مرام وقالت وتقول : شكلك من الخوف نشفت عروقك .. (وكملت وهي تهمس لها وتأشر ب راسها على جهه عند الرسيبشن) كان طلعتي شوي أرويتيها ورجعتي ..

مافهمت سديم كلام مرام بس لما إلتفتت على الجهه اللي تأشر عليها حست ب قالب ثلج طاح ب بطنها ..

كان نواف واقف مع عصام وهو لابس ثوب ومشمر أكمامه ل نص الذراع و ب جيبه الأمامي نظاراته الشمسيه ..

وعصام ب المثل بس عصام لابس كاب أسود ممزوج ب الأبيض ..

ماتدري ليش أول ماشافته تذكرت الممثل عبد المنعم عمايري ..
تحسه يشبهه كثير ..
نفس الجسم ..
نفس الطول ..
نفس السمار ..
نفس حدة الملامح ..

ماحست غير ب هزة أمها لها وهي تقول : سديم إمشي خلصينا خلينا نطلع ل السياره تعبنا من الوقفه ..

مشت مسيره لا مخيره والمشكله مجبوره تمر من عنده ..
ماتقدر تمر من عنده ..
تخاف تفضحها نظرات عيونها ..
تخاف تفضحها دقات قلبها ..
تخاف تفضحها توتر يدينها ..
تخاف تفضحها رجفة رجلينها ..

بس كل خوفها زاد وهي تمر من جهته وقدامها أمها وجنبها مرام وسمعته يقول ل عصام : لا أنا امس مريت على تركي ووصيته يكلم رئيسه وإن شاء الله إنه مابيقصر ويطلع النتائج بسرعه .. عشان تتم الملكه العصر إن شاء الله ونطلع المغرب .. أو يوم الأحد ..

مشت بسرعه إنتبه لها نواف اللي شاف إبتسامة عصام وهو يقول : خلاص إن شاء الله نشوفك العصر .. ب أمان الله ..

رد نواف وعيونه تتجنب سديم : ب أمان الله ..

إلتفت وعطا الجهه اللي ممكن يشوفها منها ظهره ..
وحاول يهرب بعيد عنها وعن تأثيرها ..
وهو يفكر ..
ياترى ياسديم مكتوب لك معاي الشقا ولا الهنا ..؟؟
وياترى مكتوب لي معاك العذاب ولا النعيم ..؟؟

\

**حلاعتيبيه** · 27-12-2009, 10:41 PM

الساعه 3 العصر ..
الدمام ..
حي الفيصليه ..

ياشوق أنا قلبي لهوف
على الليالي المقبله
أخاف تطري لك ظروف
وأخاف حبي تجهله..
وأخاف أما عينك تشوف
غيري وحسنك يذهله..
واحد أنا ضمن الألوف
منك الوداد أتأمله...}

كانت جالسه مع أمها ومرام ويتغدون..
ومقضينها سوالف وضحك تحاول فيها مرام تبعدها عن التفكير عشان ماتتوتر ..
سمعوا صوت عصام يرحب ب أحد ب الحوش ..
إستغربوا وقامت سديم تشوف مين ه اللي يرحب فيه عصام كذا وطلت من الشباك اللي يكشف الحوش ..
وأول ماشافت مين صرخت من قلبها وهي تنقز : عزام ..

قامت أمها وهي تقول : وينه ..؟؟

وطلعت الحوش وشافته واقف يسلم على عصام وفاتن واقفه وهي متغطيه ومنحرجه مره لأن سلم عليها عصام ب الكلام ..

وعزام أول ماشاف أمه ركض لها ومسك يدها يبوسها وهي تبوسه على راسه ..

قال عصام ب ضحكه : الحمدلله ماكأنكم شايفين بعض أمس ..؟؟

قالت أم عزام وهي تضم عزام اللي أطول منها : هذا الغالي عساني ماخلا منه ..

وتقدمت لها فاتن تسلم على عمتها ..
وشوي إلا سديم جايه تركض وتحضن عزام ..
ضحكوا عليها وقالت فاتن ب مزح بعد ماراح عصام المجلس : بالله هذي وحده بتتملك اليوم ..؟؟

ضمت سديم خصر عزام اللي ضامها وهي تقول ب مزح : إنتي على بالك ضميته حبا فيه ..؟؟ لاحبيبتي بس عشان يتوصى فيني ويملك لي بسرعه لأنه هو ولي أمري ..

ضحكوا عليها ودخل عزام المجلس عند عصتام يتغدون سوا وفاتن دخلت مع عمتها وسديم عند مرام ..

وظلوا سوالف وضحك ووناسه ..

\
/
\

الساعه 5العصر ..
الدمام ..
حي الفيلصيه ..
أفخم قصورها ..

هذي عيوني قبل لاقول ../ جاتك
تبكي المسافة والصبح وامنياتي ..
يالهف حال اللي .. حيابك ! وماتك !
فرقاك .. كلمة / مختصرها : .. مماتي .!
ياقو قلبك .. لا .! .... ياقو ذاتك
من غاب طيفك .. والحصيلة : رفاتي ..!

كانت واقفه عند شباك غرفتها و تبكي ..
شلون يطلبونها تحضر ملكته ..؟؟
شلون يطلبونها تزيد العذاب على نفسها ..؟؟
شلون يطلبونها تحضر قرار إعدامها الأبدي ..؟؟
هي ميته صح ..
لكن ليش يطالبون ب حرق قلبها ..؟؟
مو ه الذنب ب الشرع كبير ..؟؟
إنه الميت يتعذب أو يشوه ..؟؟
طيب ليش مصرين يعذبونها أكثر ..
مو حرام عليهم اللي يسوونه فيها ..؟؟!

دخلت عليها إختها وهي تقول : أماني ماما تقول يللا إجهزي عشان نمشي قرب المغرب ..

قالتها وطلعت بدون ماتنتبه ل حالة أختها ..
وراحت ل أخوها ..

طقت باب غرفته ودخلت شافته منسدح ع السرير وب يده بخاخ الربو ..
وشكله توه أخذه لأنه وجهه أصفر وباهت ..

دخلت عنده وهي تقول ب خوف : سلطان .. وش فيك ؟؟

فتح عينه ب تعب وقال : مافيني شئ بس تعبت شوي وأخذت الدواء بس ..

مسحت على شعره الكثيف وقالت : طيب إذا تعبان ماله داعي نحضر الملكه ..

إبتسم لها ب وهن وقال : يعني مسويه نفسك مو ميته ع الروحه ألحين ..؟؟ يللا بس إجهزوا وإذا خلصتوا عطوني خبر ..

هزت راسها ب طيب وطلعت ل أمها تاركه أخوها ب أفكاره ..

تعب من ه الحاله ..
صارت تجيه نوبات الربو كثير من إنفعالاته اللي موقادر يسيطر عليها ..
بس هذا شئ مو ب إيده ياناس مو ب إيده ..
حاول ينساها بس موقادر ..
هذا شئ فوق طاقته ..
وفوق قدرة قلبه ..
ل درجة إنه ظل يوم الجمعه يدعي ويدعي ويدعي ..
إنه ربي يصرفه عنها ..
أو يجعلها من نصيبه ..
كان فيه شوية أنانيه ماينكر ..
لكن قلبه مين ب يداويه لاراحت هي..؟؟
بس مايدري يحس إنه ه القلب اليوم ماله وجود ..
كأنه ربي رابط عليه وجابره ..
ماكان متوقع يكون كذا بهاليوم وخصوصا بعد الحاله العنيفه اللي جاته قبل شوي ..

إنتبه على صوت جواله يرن ولما رفعه شافه رقم عزام رد عليه وهو يقول : هلا ب أبو خالد ..

قال عزام ب إبتسامه : هلا بك .. وينك جالسين ننتظرك مع الشباب ..؟؟

قال سلطان وهو يمسح على عيونه : ب البيت أنتظر الأهل يخلصون .. إلا من عندك ..؟؟

قال عزام وهو يطالع الشباب : كلنا متواجدين من دونك ..

قال سلطان وهو يجلس : خلاص إن شاء الله نص ساعه وأكون عندكم ..

\
/

**حلاعتيبيه** · 27-12-2009, 10:42 PM

بعد ساعه ..
عند الرجال ..

مدري على مين إتجه وأرمي حطامي والملام
من إيتقبل واحد مثلي معه.. تغريبته
::
البارحه ليلي دمع/ ينثر جفا /مدري هيام
وكل مانويت ارتبه عجزت عن ترتيبته
::
مليت أصبر حالتي من كم عام وكم عام
عشان حبي مايطيح وتبقى كبيره هيبته
::
جاب الزمن وش جاب لي طعنه وحلت بالعظام ياليت ماجاب الزمن .. إمحق عليه وجيبته
::
أحيان عادي للرجل يفقد كثير من الانام
بس البلا لامن فقد بين البشر حبيبته

كان الكل مجتمع ..
رجال وشباب ..
وينتظرون دخول المملك ..
بس كل(ن) كان ب جهه ..
لكن يجمع مابينهم مجلس كبير ..

كان نواف متوسط المجلس والربكه مبينه عليه ..
و نظراته متركزه على سلطان اللي يسولف ويضحك وكأن الملكه ملكته هو ..
مو ملكة حبيبته ..

إنتبه إن الشيخ دخل مع أبوالوليد والكل وقف يسلم عليه ..
حس إنه قلبه هوى ب الأرض وماعاد ب صدره غير الهواء ..
يعني خلاص ..؟؟!
ب ينكتب لها وتنكتب له ..؟؟!
ويظل هو مستانس وصديقه معذب ..؟؟
مستحيل يقدر على ه الشئ ..

سمع ترحيب الرجال ب الشيخ وعصام واقف يقهويه ..

والشباب من الجهه الثانيه قايمين عليه مزح وتريقه من شكله المتوتر ..
ووجهه الأصفر من دخلة الشيخ ..

دقائق وسمع مزح الشباب وهم يقلدونه إذا ردد وراء الشيخ ..

قال عصام اللي رجع يجلس جنب سلطان والشباب من حولهم : بالله ياسلطان تخيل شكل نواف وهو يردد وراء الشيخ ويده ترجف هههههههههه ..

ضحك سلطان وقلبه ينزف وقرب يمسك يد عصام كأنه يترجاه ..
وقال مازح وهو يقلد نواف ب اللي راح يقوله : عصام زوجني أختك سديم على سنة الله ورسوله ..

قال عصام ب ضحكه وهو مازح : قبلت يا ياسلطان ..و زوجتك إياها ..

قال سلطان ب ضحكه : إشهدوا ياجماعه زوجني إياها ..

ضحكوا الشباب على شكل عصام وسلطان وهم يمثلون ب تقليد نواف ..
وحتى هو صار يضحك ب هدوء مع ضحكة أبوه والرجال اللي سمعوا ه المشهد التمثيلي ..

بعد مده بسيطه طلع الكل يصلي المغرب ورجعوا ل المجلس ..
وفتح الشيخ كتابه وقال : وين بطاقة العريس وولي أمر العروسه ..؟؟

جلس نواف جنب الشيخ وعزام من الجهه الثانيه وكل واحد طلع بطاقته ..
قال الشيخ وهو ومنزل راسه ل الكتاب : وبطاقات الشهود لوسمحتوا ..

تقدم سلطان وتركي وكل واحد حط بطاقته ..

أخذ الشيخ بطاقة عزام وبدأ يسجل الإسم ..
وبعدها أخذ بطاقة وقرأ الإسم وبدأ يسجله ب إسم العريس ..

سلطان وقتها يحس إنه ماعاد ب صدره نبض ..
وإنه يعتبر من عداد الأموات ب جانب أبوه ..
والمصيبه إنه يشهد على عقدها ..
وهو يصطنع الإبتسامه وقلبه يصرخ فيه : ياكذاب إرحمني ..

ونواف وقتها يحس إنه أكبر خائن ل صديقه ..
وإنه نذل ومنحط وحقير ,,
وخصوصا إنه سلطان شهد ع الملكه ..
يعني كأنه قاعد يثبت له ويقول له : (أنا أحسن منك خنت قلبي ووفيت لك) ..

أخذ الشيخ البطاقات المتبقيه وأكيد إنها ل الشهود وكتب أسمائهم ..
وإبتدأ يكتب العقد ب كل دقه بعد المعلومات اللي عطاه إياها أبو الوليد وهو جاي معاه إنه مافيه شروط وكم المهر وخلافه ..

ولما وصل ل اخر نقطه رفع راسه وقال : وين ولي أمر العروس ..؟؟

قال عزام ب هيبته الدائمه : أنا ياشيخ ,,

إلتفت له الشيخ وطالعه ورجع طالع عصام وقال يسال عزام : هل هذا أخوك ..؟؟

إلتفت عزام على عصام وهو يقول : إيه ياشيخ ..

هز الشيخ راسه ورجع يكتب وبعدها رفع راسه يسال عزام : أسألك ب الله ياإبني هل العروس موافقه ..؟؟

قال عزام وهو عاقد حواجبه ومستغرب : إيه نعم موافقه ..

رفع الشيخ الكتاب على أساس يوقع العريس وألتفت على نواف و قال له ب إبتسامه : ممكن توصله ل العريس يوقع عليه ..؟؟

إبتسم نواف إبتسامه باهته وقال : أنا العريس ياشيخ ..

قال الشيخ ب إستغراب و هو يأشر ل سلطان اللي سمع إسمه من عصام :
ليش مو إنت العريس ياسلطان ..؟؟!

إبتسم سلطان ب حرج وعدل شماغه وهو يقول : لا ياشيخ مو أنا ..

عقد الشيخ حواجبه وقال وهو يلتفت على عصام : ياخوي مو إنت أخو العروس ..؟؟

قال عصام ب إبتسامه في ظل إستغراب الجميع : إلا أنا أخوها طال عمرك ..

قال الشيخ ب إستغراب : طيب مو توكم تقولون ل بعض زوجني وقال الثاني قلبت ..؟؟

قال عزام ب جديه : بس ياشيخ كانوا يقولونها ب مزح .. والعريس هذا هو جنبك وإسمه نواف وأنا ولي أمر العروس .. وإنت الله يعافيك ماأتميت مراسيم العقد ب الإيجاب والقبول ..

قال الشيخ ب إنفعال بسيط : ياإبني الزواج تم وخلاص .. أخو العروس هذا هو(وأشر على عصام) ويعتبر واحد من أولياء أمرها .. وه الأخ ( أشر على سلطان) طلب الزواج ووليها قبل .. والجميع كان شاهد يعني خلاص تم الزواج ..

ذهول وصدمه إمتلكت الجميع وألجمت ألسنتهم وأولهم ..
عزام ..
ونواف ..
وسلطان ..

لكن صرخه صدرت من عصام وهو يوقف و يقول : ياشيخ كنا نمزح وش ه الكلام ؟؟

قال الشيخ ب هدوء : يا إبني الرسول صلى الله عليه وسلم قال : ( ثلاث هزلهن جد وجدهن جد : الطلاق والنكاح والرجعة ) .. يعني ياأخي الزواج تم وأنا وثقته هنا ب الأسماء .. ولا كنت أدري إنت تمزح ولا لا .. وسواء مزح ولا جد البنت خلاص حلت ل هالرجال (وأشر على سلطان) ..

\
/
\

تم هالبارت ب حمدالله وفضله ..

***مزون شمر*** · 27-12-2009, 11:27 PM

سبحان الله
الله يعطيك العافيه البارت حلو
استمري

**الحلى مبتليني** · 28-12-2009, 02:41 PM

يسلمو

**fun girl** · 29-12-2009, 06:45 PM

وه وه بليييييييييييييييييييييييييز كملي متحمسه معها بليييييييييييييييييييييييييييييييز

و يسلمؤؤؤؤؤؤؤؤؤؤؤ ع الروايه الحلوه يا عسل

***عبير الزهور*** · 29-12-2009, 07:12 PM

مشكوره عالمتابعه
أستمري متابعينك

**raghad95** · 31-12-2009, 10:56 PM

أحلى بارتات ..

تسلمي يا شجوووونه

**قمر زمآنهآ** · 01-01-2010, 11:06 AM

يعطيك الف عافيه
مستمره معك لنهايه

**toomy** · 01-01-2010, 11:43 AM

يسلمو

طفلتك ماعاشت احساس الطفوله روايه رومنسيه جريئه

تعليق

تعليق

تعليق

تعليق

تعليق

تعليق

تعليق

تعليق

تعليق

تعليق

google Ad Widget