رد: رواية قيود / الكاتبة ساندرا

رد: رواية قيود / الكاتبة ساندرا

طلال: ماكتبتي ؟
راغده راحت عند الباب وسكرته: وانا لحقت أمسك جوالي ..
طلال عند الباب بابتسامة: حبيت بس أذكرك ..
راغده: وانت ليه متحمس لهالقد الشغل عاجبك كان قلت لي اسفر ماريان واعينك بدالها ..
طلال: فيك النوم ؟
راغده: سهر مافي يلا نام..
طلال بخيبة: طيب
راغده لما ماسمعت صوت ابتعدت عن الباب .. دوشت نص جسمها ولبست قميص نوم طويل أحمر مع كارديقان .. دهنت يدها بلوشن الكرز ..
جوالها رن قامت
استغربت اتصاله وردت: الو..
طلال بترحيب: لبى ألوك .. اخبارك؟
راغده: بنوم وانت ؟
طلال: ما ودك نسولف ؟
راغده: طلال وش قلنا احنا ؟
طلال: اجيك ؟
راغده: روح الله يستر عليك
وسكرت الخط وهي تضحك على هباله ..
رجعت لتسريحتها وهي تحط مرطب شفاة وتدهن المسك ..
فتح الباب وبيده وسادة ولحاف ..
راغده التفتت بسرعة: وش تسوي هنا !؟
طلال ببراءة: المكيف حقي خربان .. مامعي مكان انام فيه ..
راغده: الله اكبر ! وين عايشين فيه إحنا بشقة ! يا كبر المكان بالبيت اختار اي غرفة تنام فيها .. عندك غرفة الي رتبتها لأمي ..
طلال تسطح بالارض قريب من سريرها: لا بنوم هنا خلاص .. وراي بكره قومة صبح وشغل ..
راغده قامت من كرسي التسريحة وتخصرت: نعم! يلا يلا قم ..
طلال رجع يده ورا راسه وباعجاب: مولع حبيبي بالاحمر ..
راغده شدت على الكارديقان بحيا: لاتغير الموضوع ويلا قم ..
طلال يصفر: اموت انااا على الزين ..
راغده ضحكت على خباله: وش فيك أنت اليوم؟
طلال رفع نفسه من السرير:وش رأيك نلعب لعبة لو فزت بنام هنا .. ولو خسرت بطلع ..
راغده: وانا معي وقت لهالالعاب..
طلال: يعني انام هنا؟
راغده باندفاع: لالا .. هات لعبتك لشوف ..
طلال قام وصار قبالها وبان فارق الطول الكبير بينهم: نلعب مصارعة ..
راغده بفهاوة: نعم !
طلال مرر بكس على بطنها خفيف ..
راغده رفعت حاجبها: انت عارف اني ما بفوز عشان كذا طلبت هاللعبة صح..
طلال بحماس: والااااااان الضربة القاضية .. ضربة اندرتيكررر ..يااااا " مسك كتفها وحذفها على السرير وهو فوقها "
راغده انفجعت من حركته : قوم قووم ..
طلال بخبث: يعني انا فزت ..
راغده بحيا: طلال قوم ماعاد في نفس والله ..
طلال قام منها وجلس جنبها: انا فززت يااهوو
راغده : لا طبعا حتى ما اخذت دقيقة من بدأت اللعبة وانت على طول هجمت حتى مداني استوعب اللعبة ..
طلال: مالي شغل " اخذ وسادته وحطها بالسرير" انتي ماعندك سرعة بديها ..
راغده: وش تسوي انت ؟ نومة بالسرير بعد! خلك بالارض ..
طلال تسطح وسحبها لحضنه وبهمس: وراي شغل بكره يلا ننام ..
راغده الي اندفنت بصدره ، ما قاومت وهي تشم عطره الي دايم تشمه فيه سكتت شوي : اليوم منت بطبيعي فيك شيء ؟
طلال وهو يشم ريحة عطرها الفاتن وبهمس دافي: استهبل عليك بس عشان تنسين حزنك راغده .. ما أحب اشوفك متضايقة .. اي ما كانت الأسباب ..
راغده لمعت عينها ماقدرت ترفع عينها له وبصوت قريب للهمس: هالقد تحبني ..
طلال شد عليها لحضنه: توك تدرين ؟ " وضرب كتفها على خفيف " رغم أنك حقيرة معي ..
راغده ضحكت بألم: آسفة ..
طلال: ارتحت بس شفت بسمتك وضحكتك والان يلا نامي ..
راغده ناظرته بضياع: وأنت ؟
طلال تنهد: أنا بنام بصعوبة لانك بقربي ..
انخرطوا بنظرات مليانة مشاعر جات بتتكلم بس هو سبقها: يلا حبيبي تصبحين على خير ..
راغده " يصير اعشقك فوق العشق عشقين ؟ "

طلال " ليتك ترحميني وتفكين الحظر عني "
شلحت الكارديقان وغمضت عينها بعد انتظام انفاس طلال لنوم ..
.
.
وهي تشوف امها على سجادتها اقتربت منها اول ما سلمت: يمه تعالي نفطر ..
ام عبدالعزيز: افطروا عليكم بالعافية ..
ريهام: انتي ومها رافضين تاكلون يعني اكل لحالي ؟
ام عبدالعزيز: ليه مها وش عندها ..
ريهام:استخفت وجلست ، ابد مو طبيعية يمه .. كلا تجلس لحالها وتضم بنتها وتبكي ماتريد احد يسولف وياها ..
ام عبدالعزيز قامت بتنهيدة: احصلها منين انا ..
دخلت غرفة مها وشافتها بنفس حالتها الاخيرة ..
ام عبدالعزيز: علامك يا مها ؟ وراه رافضة تتكلمين مع احد وما تأكلي شوفي نفسك كيف صايرة صفراء من قلة الأكل ..
مها ناظرت امها بخوف: يمه جايني الدور أنا ..
ام عبدالعزيز: دور ايش؟
مها برعب: جايني الدور ربي بينتقم لي من كل الي سويته براغده مثل خالي وابوي بيصير فيني انا ..
ام عبدالعزيز جلست جنب بنتها وبعطف: مها ألي سووه هم كان عظيم وهو مقدر ومكتوب من زمان .. ليه تقولين هالكلام وش سويتي انتي لراغده ! كلها ناجمة عشان غيرة وبس تطلقتي من حمود ربي رد لك عقلك ..
مها بفك يرجف: لما كنت عندها بالبيت صرت اتفش لشيء يدينها ويخرب علاقتها مع طلال يمه .. ولما ما لقيت شيء خلاص اعلنت انهزامي والله ما سويت شيء غير الي سويته والي انتي تعرفينه ..
ام عبدالعزيز: تكلمي مع راغده وافتحي قلبك لها ..
مها بانفعال: ما بتصدقني .. كثير اكذب عليها ..
ام عبدالعزيز بحزن: اعتذري ألف مرة ومرة .. ابوك بس يقوم بالسلامة ان شاءالله ..
مها قاطعت امها : ممكن ما يقوم بعد ! راغده دعت علينا وكل واحد بياخذ جزاته .. انا خايفة يممه " وصارت تصيح بقوة "
ام عبدالعزيز ضمتها بقوة: يابنتي لاتسوين بنفسك كذا
.
.
.
بطلت عينها بشويش وهو يهز فيها: قومي ..
صدت على الجهة الثانية وغطت اللحاف وجها: بس دقيقة ..
طلال: لا قومي .. الساعة ٩ الآن ..
وشال اللحاف من على جسمها وهي غطت نفسها بسرعة ولبست الكارديقان ألي كان طايح جنب السرير : وش فيك ..؟
طلال ابتسم وهو يشوفها تستر نفسها: يلا قومي ..
راغده تناظر فيه بعصبية: هذا انا قمت ..
طلال: مو انتي قايلة بتصحيني عشان اشتغل ..
راغده عند الحمام: وانت مبسوط ليه ؟
دخلت الحمام وسوت طقوسها اليومية وطلعت
طلال الي كان جالس بطرف السرير ببراءة : خلصتي ؟
راغده بقهر: طالمة متحمس هالقد قوم يلا نظف المكتب .. كتاب كتااب ..
طلال : اوك يلا نروح ..
راغده: مافهمت !
طلال: مو بنظف سوا ؟
راغده سكتت شوي : هههههههههههه يا زينك بس .. اقول قم لحالك .. انا حتى صلاة الفجر استغفر الله ما صليتها ..
طلال طلع من الغرفة بصمت ونزل تحت ..
راغده جلست بغرفتها قرابة ساعة ثم نزلت بعد ما لبست بجامتها المريحة
شافته يلاعب العيال وبغرابة: خلصت تنظيف ؟
طلال: اي ..
راغده راحت للمكتبة بصدمة وهي تشوف فعلا نظيفة ..
طلال جاء وراها وهو مستند
على باب المكتبة وبابتسامة نصر: وش رأيك يا سنيورة ؟
راغده بانبهار: ماشاء الله عليك .. شغلك نظيف ما يمزح ..
طلال بغرور: طبعا .. أي شيء احط يدي فيه يصير بيرفيكت ..
راغده: بسم الله عليك .. الشغل ما خلص لا تفتخر لهالقد ..
طلال: اطلبي قد ما تريدين انا قده ..
راغده: مفرش السرير الي غيرته اغسله بالحوش .. دولاب المطبخ يتنظف وتشيل كل الطناجر وتمسحه وترجعهم .. وأنا بروح الآن بسوي شغلي وبرجع بعد صلاة الظهر بمشيئة الله ..
طلال اخفى بسمته : طيب خذي راحتك يمديني اخلص اشغالي ..
راغده: انت عجيب .. عموما بروح ابدل وأنزل ..
صعدت فوق ولبست لبسة خفيفة واخذت عبايتها وراحت مشي لبيت نرجس ..
طلال الي كان يناظرها من عند الباب ابتسم وطار عند ماريان : يلا سوي شغل كله وانا بمسك العيال لاتشيلي هم ..
ماريان: اوك سنيور ..
ام نرجس رحبت فيها ترحيب حار: هلا حبيبتي ..
راغده باست رأسها: اخبارك ؟ اجل وين نرجس؟
ام نرجس: الحمدلله .. شوي وبتنزل ..حياك
راغده جلست بالكنبة واول ماشافت نرجس قامت لها وبعد التحية بقلق: ايش صاير نرجس اقلقتني رسالتك ..
نرجس باحراج: سامحيني راغده بس فعلا احتجت لك ..
راغده: فداك حبيبي لو احتجتيني ٥ الفجر بجيك ..
نرجس: يا لبى قلبك انتي صديقتي الوحيدة والله .. " وبهمس " امي هاليومين ماغير زن وحن فوق راسي ماعندها الا هالسيرة ..
راغده: سيرة شنو ؟
نرجس: جاء من طرف خالتي رجال متزوج وزوجته ماتخلف ..
راغده بفرح : صدق؟ يارب يكتب لك الي فيه الخير ..
نرجس: وأنا حتى ماخلصت عدة ..
راغده: ماباقي لك الا دورة وخلاص ..
نرجس: انا مالي نفس الزواج راغده ، اريد ارتاح كليا ..
راغده: بتفكير: طيب وش رايك تتعرفين له بوقت الخطبة مفيد أنك تعرفينه ولو قام يتفلسف عليك ويقول ما اقدر اكلمك الا بعد كتب الكتاب ارفضي ! ضروري تعرفيه زين قبل لاتتخذي الموافقة .. ولا امك بترفض ؟
نرجس بتردد: امي ما بترفض .. انا حتى لو كلمته بوقت الخطبة لاني بكلمه بحضورها
راغده فهمت عليها: لا تشيلي هم نرجس أنا بسأل عنه بشكل مفصل ..
نرجس بابتسامة: لاخلا ولا عدم يا راغده ومثل ما فصلتي صهيب فصليه هو انا ما اريد استعجل ابدا ..
راغده: اعطيني مهلة يومين الى ٣ ايام والعلم بيجيك ان شاء الله ..
نرجس: خذي راحتك راغده انا مو مستعجلة اصلا .. لو راح ماعليه حسوف .. افطرتي ؟
راغده: لا لسى ..
نرجس قامت : يلا ثواني واحلى كبده بتجهز ..
راغده: اوه كبده ههههه وناسة والله ..
نرجس: امي مسويتها بس عرفت انك بتجين .. نفطر برا بالحديقة نغير جو شوي ..
راغده: اوك تمام ..اساعدك ؟
نرجس: اذا ودك حياك
راغده قامت معها للمطبخ تساعدهم وسوالف ضحك تروح وتجي .. لعند الحديقة فطروا
ام نرجس: ليت لو تزاورينا دايم راغده اتونس وياك والله ..
راغده: حبيبة قلبي .. لزوم تونسوني انتوا ، طلال بيرابط وضروري جيتكم لعندي ..
ام نرجس: اوك على خير ان شاء الله ..
على الساعة ١١ طلعت من عندهم توجهت للبيت وريحة النظافة فيه
شافت طلال رافع بنطلونه يهم بالجلوس وهو يتنهد بتعب وبابتسامة: عافاك .. تسلم يدك على هيك شغل وتنظيف ..
طلال بتعب: والله شقى العيال ..
راغده: عيال ! ليه انت مسكتهم ؟
طلال انتبه على نفسه: من التعب ماعرفت وش أتكلم اقصد البيت الكبير تعب ..
راغده: اهاا .. عشان تعرف المعاناة صدق ..
طلال: ابد مالي كلمة عليك من اليوم ورايح لو اشوف عناكب بالجدار مابتكلم ..
راغده:هههههههههه رحمتك والله .. خلاص أنت أرتاح وأنا بسوي لك احلى غداء ..
طلال ابتسم من داخله لان كل الي سواه تمثيل من تنظيف البيت
بس العيال فعلا اشقوه ..
دخلت المطبخ وبعد نص ساعة دخل معها وهو يشم الريحة وباعجاب: الله الله عليك ياشيف .. حركات والله سلطة ألوان ..
راغده بابتسامة: اي عشان جهودك والله انك تستاهل ..
طلال: بس المفرش ماغسلته لأن وقتي كان ضيق وتعبت .. خلصت شغل بالضبط لما جيتي انتي بالضبط ..
راغده: فدا والله .. احس اني قسيت عليك واشقيتك والله ..
طلال حس بكمية حب وعطف بكلامها وعجبه الوضع وبملامح تعبانة: اي بالله انقسم ظهري من كثر ما أنزل واطلع بهالصحون كل شيء سويته من قلب ..
راغده ابتسمت له بحنان : الأكل الطيب جاهز ارتاح وانا بتكفل بكل شيء ..
طلال اقترب منها وضمها من ورئ وباس رأسها وبهمس دافي: أحبك تفهمين ولا لا ؟ أنا أ ح ب ك " قالها حرف حرف"
راغده نزلت راسها بخجل ..
طلال بنفس همسه: متى بسمعها منك ؟ والله أني فاقدها ..
راغده ألي حست بحرارة بوجها من الخجل ابتعدت عنه: انا متى بخلص غداء ها !؟ ارتاح شوي وبيجهز ..
طلال : اوك تهربي بس مصيرك بتقولينها لي .. انا بقوم اتدوش وبتجهز لصلاة الظهر والغداء اريده يكون جاهز ..
راغده: ويتشرط بعد هههههه اوك انت رح بس " وكأنها افتكرت شيء" الا صحيح طلال أنت وين وديت البشارة ..
طلال حس انه تورطت وباندفاع: وين بيكون بعد .. عقاب لك قومي دوري أنا بتدوش يلا باي .." وطار فوق "
راغده ظلت تدور وكل ما احتاجت شيء صارت تدور " ياربي صار ماريان ٢ .. تحب تغير بالأماكن "
جات ماريان وبيدها الرضاعة
راغده: ماريان ممكن تدورين صحن سلطة ..الأبيض " وهي تأشر بيدها "
ماريان فتحت الدولاب وطلعته بسرعة
راغده بذهول: ماشاء الله عليك بسرعة .." رجعت تقطع فجأة ناظرتها" يور كلين ؟ آور سنيور ؟
ماريان: مي ..
راغده اشتضت غيض: طيب يا طلال طيب انا بعرف كيف اتصرف معك .. تكذب علي وتستغفلني ها ..
ورجعت تكمل طبخها وقدمته بطاولة الطعام وجلست عيالها بالكراسي المخصصة لهم ..
طلال رجع من الصلاة بابتسامة على وجهه وجلس بحماس: لبى السنعة بس وش هالدلع ذه كله لو ادري كنت زمان نظفت ..
راغده تجاريه: تستاهل يابو راشد تستاهل .. فيه العافية
بعد الأكل الطيب .. جلست قباله بالصالة : اقول طلال لاهنت ودي انك تنظف التسريحة لغرفتي ..
طلال: خلاص روحي سوي مشاويرك ..
راغده " اي عشان يحلى لك الجو وتكذب علي " : لا لا عيني .. انا متربعة هنا ضروري اشوفك كيف تنظف عشان اتعلم منك يا نبراس انتا ..
طلال تورط: لا راغده اطلعي وانا اخلي البيت لك دبلكس ..
راغده باصرار: لا يعني لا .. ماريان بتمسك العيال وانا بشرف عليك بنفسي .. يلا قوم
طلال: لا خليني ارتاح توي مأكل ..
راغده: خذ راحتك ساعة أعتقد أنها تمام ..
بعد مضي الساعة
مسكت يده وصعدو فوق وهو يمشي بكسل ..
راغده جلست بالسرير: وهذا هي جلسة يلا انت نظف وأنا بشوفك ..
طلال بيده المنشفة صار ينظف على قد ما يقدر لكن بالنهاية ماطلع مثل تنظيف ماريان ..
راغده قامت: الله الله ! شو يا أستاذ طلال صابتك عين ؟ اشوف تنظيفك ماصار دبلكس على قولتك ..
طلال باندفاع: اليوم كان شغل كثير علي استنزف طاقتي .. حتى ظهري انكسر صدق ..
راغده مدت له فراشاة الاسنان: نظف البانيو فيها يلا وراي ..
طلال فتح عينه على الآخر: نعم نعمم ! وش ذه ..
راغده كفتت يدها: انا بعدي كذبتك علي بهالتصرف ..
طلال: اي كذبة ؟
راغده: كذبة تنظيفك .. وما هي الا ماريان الي سوت كل شيء ..
طلال ابتسم بخجل: كشفتيني !؟
راغده هزت راسها بالايجاب وسط نظرة حادة ..
طلال: أنا ابو راشد وابو ساره سامحيني بلاش هالعقاب ..
راغده بنفس نبرة صوته: وانا ام راشد وام ساره يلا ياحبة عيني نظف .. اريد البانيو يلق لق .. اريد اشوف وجهي فيه يلا ..
طلال بقهر مشى وراها : حرام عليك راغده ..
راغده: طبعا .. وانت مو حرام لما كذبت علي .. تفضل الفرشاة
طلال أخذها منه بعنف وصار ينظف جوا البانيو وهي تغني وتبرد اظافرها
وتأشر له : نظف هنا زين" وزادت صابون "
طلال: توي منظفه .. يهودية انتي ؟
راغده: اوبس صب كثير معليش والله ..
طلال الي يفرك بقوة وبقهر: طبعا .. الفلوس كاثرة تصبين هالقد ..
راغده بدلع: معليش تلال .. صب لحاله ..
ولما شرف على الانتهاء قام وجفف البانيو وقام إلا هي تسكب صابون وباندفاع: ياااربي بالغلط ..
طلال فتح عينه على الاخر ونزل بنطلونة وبانفعال: انا اوريك يابنت اللذينا ..
راغده ركضت بسرعة قبل لا يمسكها
طلال اول ما خطئ خطوة زلق بسبب المويا والصابون وطااح : اااا ..
راغده التفتت وفرطت ضحك لما شافته بالارض: ههههههههههههههههههههههه هههههههههههه..
طلال ويده على اسفل ظهره بألم: ااااه ..
راغده اقتربت منه ومدت يدها وسط ضحكها: بسم الله عليك .. فيني ولا فيك ..
طلال من قلب: امين ..
راغده رجعت تضحك وحطت يده على كتفها وهي تمشي بشويش بعد ما اقتربت منه صارت محاطة بالصابون والمويا ..
طلال بلعانه دفعها عسب تطيح بس ماعمل حساب يدها ألي اشتدت على قميصه وفقد توازنه وطاح فوقها ويده على رأسها عشان ما تلتطم بالارض ..شهقت بخوف وغمضت عينها بقوة
طلال ضمها لصدره يحمي راسها وبخوف: انتي بخير ؟
راغده بطلت عينها بشويش وهي تناظره بصمت ثم ضربت كتفه: تريد تطيحني ها ..
طلال: مو بقصدي والله بس جيت كا جكارة و تخويف لك ..
راغده تناظر بعيونه وبخجل: اوك ممكن تقوم ..
طلال انتبه على نفسه وقام ومسك ظهره: ااه ..
راغده وهي تحارب ألف شعور تجاهه ساعدته لين ما دخلوا الغرفة وجلس بطرف السرير ..
كان الصمت بينهم مربك واشتياق كبير ..لكن كل منهم احتفظ لمشاعره الفايضة لنفسه ..
اخذت المرهم بيدها واشرت عشان يقلب .. دهنت اسفل ظهره باصابع مرتجفة
قامت من السرير ..
وبهمس: أرتاح ..
طلال: عادي الوجع مش كبير ..
راغده جات بتطلع بس اوقفها صوته ..
طلال نزل قميصه الاسود : راغده لحظة .. ممكن نتكلم شوي .. اجلسي " واشر لها جنبه "
راغده جلست جنبه بصمت وهي تناظر فيه ..
طلال: لين متى بنظل على هالحال ؟ انا معي كلام كثير لك ..
راغده الي حست ان الوقت مثالي للكلام: انا بعد معي كلام لك كثير " مسكت يده " طلال أنا من فترة كنت بقول لك أني مستعدة نبتدي من ....
فجأة اندق الباب ..
ام عبدالعزيز: راغده ..
طلال بقهر: استغفر الله .. " قام وفتح الباب " هلا بهادمة اللذات ..
راغده ألي ماقدرت تكتم ضحكتها: هههههههه هلا يمه ..
ام عبدالعزيز: صدق انك ماتستحي على وجهك ..
راغده: يمه طلال يمزح صح طلال ..
طلال بغيض: لا مش صح ..
راغده داست على رجله ..
طلال بألم: صح صح .. شرفتينا عمه ..
ام عبدالعزيز الي ما اقتنعت: اي ما يخالف .. راغده اختك تحت تبغيك ..
ونزلت تحت
طلال بقهر: هذا ألي كان ناقصني أنا ، ما حلت تجمع الأخوات إلا اليوم وبهالوقت ..
راغده بضحكة: ما اعتقد بتطول عموما الوقت لنا طلال لا تشيل هم بس يروحون بنتكلم ..
طلال انتبه لرنة جواله كان من صاحبة سامي: اوك تمام انا بشوف هالنشبة اكيد في شيء .
راغده: اوك تمام خذ راحتك هم بيكونون بالمجلس على اي حال ..

نزلت تحت للمجلس ..
أول ما دخلت المجلس قامت مها ضمت راغده بقوة وبنوحة: حللي وبيحي مني راغده .. مابرتاح الا لما تسامحيني ..
راغده باندفاع: وش هالكلام مها اكيد مسامحتك ما بيوم فكرت ادعي أو احقد عليك ..
مها شدت على راغده: حلليني راغده اريد اسمعها منك ..
ام عبدالعزيز بحزن: سامحيني راغده جيت بلا موعد بس أول ماعرفت انك مو بالدوام جيت لهنا .. حالتها ما تسر تعبانة أصرت أنها تجيك اليوم ..
مها تمسح دموعها: سامحيني راغده لاني مافكرت اعتذر منك بعد كل الي صار بشكل جدي الا بعد ما صار لابوي خفت افقد جوان مثل ما راح أحب عيال لابوي ..
او ممكن يصير لي مثل خالي بدر ..
راغده صارت تناظر ب اختها يألي حزنت عليها بشكل كبير وهي تشوف تعابيرها الصادقة وحزنها من قبل اعتذرت لكن الآن كان فعلا بشكل كبير وعميق ..
وبتأثر: الله يحللك ويبيح منك وربي يهديك ويمسح على قلبك ..
مها بفم حزين: من قلبك راغده ؟
راغده: طبعا مها .. بالأخير موضوع اغتصابي ماكان لك دور فيه .. والحمدلله على كل حال ربي عوضني بشخص لو ألف الدنيا كلها ما بلاقي مثله ..
مها: تبغين اقول له ان كل ألي قلته كذب في كذب و..
راغده قاطعتها: لا مها خلاص هو عرف من زمان أن كل شيء كذب في كذب .. وانا ما تمنيت بيوم يعرف اي شيء عنكم .. مهما وش كان ما كان يظل هذه اسرار أسرية
شوفي لما أخته ميس انخطبت ماعلمني .. ممكن لان يشوفون هذا سر ومن حقهم انا ما زعلت لان الموضوع لسى تحت الدراسة .. مو كل شيء ينقال لزوج يا مها ..
مها بندم: سامحيني راغده لو بيوم اذيتك سامحيني لاني كنت أنانية واني حاولت اخرب بيتك عشان غيرتي العمياء منك .. كان كل هدفي أني اخرب حياتك مثل ما حياتي خاربة ..
راغده: مها ! انتي صغيرة وتقدرين تتزوجين واحد افضل من حمود واحد من البداية قابل فيك أنتي .. لا تسمحين لأي ماكان امي او ابوك يجبرونك على زوج ما يقدر يسعدك بس عشان ماديته او مركزة ..
ام عبدالعزيز تنهدت: الآن حالته خلاص .. بيخلونه تقاعد خلاص .. لكن الحمدلله ان حالته مستقرة ..لسانه ثقيل بياخذونه لمستشفى الملك سلطان بالرياض لتدريب ..
راغده ناظرت بمها: ولا تسولفين لزوجك المستقبلي عن اي شيء من ماضيك وفعايلك .. لان الي خلا حمود ..
مها قاطعتها: يتركني لاني حقود وحسود .. اعرف راغده .. وجهيني راغده لا تتركيني اخذيني بيدي اشعر بالضياع من بعد طيحة ابوي ..
راغده تنهدت: ربي يقومه بالسلامة ..
.
بالنسبة لطلال ألي لبس ملابس دوامه إستعداد للمرابطة عشان خويه ..
وهو يتحلطم ..


يتبع

رد: رواية قيود / الكاتبة ساندرا

وهو يتحلطم ..
دخلت عليه راغده استغربت وهي تشوف لبس الدوام: مو على اساس مامعك ؟
طلال بدون ما يناظرها: سامي زوجته تولد برابط عنه ..
راغده: الله يقومها بالسلامة ، على كذا ٤ ايام بترابط .. مرة كثيرة ..
طلال: ممكن يعتقوني ويصير يومين او ٣ ..
راغده بابتسامة: بكون بانتظارك ..
جاء بيرد إلا بدقة
ام عبدالعزيز من ورى الباب: راغده ..
طلال بقهر: استغفر الله " فتح الباب "
وطلع بخطوات غاضبة ..
ام عبدالعزيز تناظر بنتها ب استغراب: وش فيه ؟
راغده بضحكة: ولا شيء ..
.
.
.
بدوامها تلقت اتصال من مريم ..
تشكرها على وظيفتها الجديدة بالمصنع ..
راغده بابتسامة: ربي يوفقك مريم ويكون رجعتك له ولدوامك الجديد خير لك ..
مريم: شكرا راغده .. على كل شيء سوتيه لي و..
راغده: كل فترة بسمع هالكلام انا ؟
مريم بحزن داخلي: اصيلة يا راغده ..
انهت اتصالها من مريم وهي تشوف القروب شعلة يبارك بوظيفة مريم وبرجوعها لزوجها ..
ابتسمت بخفة وهي تشوف حالتهم المتغيرة كثير عن قبل ..

بزيارة مفاجئة .. دخلت نرجس بابتسامة على وجها وباندفاع : صبااح الخير ..
نهلة الي كانت وراها: اعتذر طال عمرك بس الاستاذة نرجس درعمت ..
راغده: هههههه حالها حال أمي .. ولا يهمك ..
نرجس بدون اهتمام وبنفس ابتسامتها: جهزتي نفسك لكتب كتاب ميس ؟
راغده: للان ..
نرجس: ليه دايم انتي باردة ..
راغده: لأن بتكون عائلية بس بالزواج بيكون في حفلة .. ايش تشربين؟
نرجس جلست وصارت قبالها: شربااات ..
راغده بضحكة: ابشري .. " ونقرت الزر وطلبت طلبها " ادري منتي بخالية " فتحت الدرج" تفضلي ..
نرجس بحماس: طول عمرك فاهمتني ما انحرم منك يارب " صارت تقرأ عن ادق تفاصيل حياته ومعلوماته "
راغده: ارتحتي؟
نرجس: ايش اسوي يا راغده امي تحن فوق راسي على كل جلسة لي وياها تفتح لي سيرته ماتريد يروح وما أدري على ايش مستعجلة استغفر الله ..
راغده بابتسامة: نرجس يا حبيبتي شوفي نفسك انتي وما عليك من امك وهذا ملفه كامل قبالك ..
نرجس: ماقلت لك الاخبار الجديدة .. صهيب كتب كتابة ..
راغده بذهول: ماشاء الله .. قبلو فيه !؟؟؟ رغم كل ألي فيه !؟ هو تعالج اصلا من مرضه ؟
نرجس بابتسامة: من ألي بتقبل به غير وحدة واطية مثله ! انا فرحانة ان الي بياخذها قوية عين والله ان تلعن جدفه وجدف امه .. هي قووية والله ان تتولاه ..
راغده: سبحان الله .. انا متحمسة اعرف وش نهاية هالزيجة ألي بينهم ..
نرجس بحماس: مو قدي والله موو قدددي .. بس احنا ننتظر ونشوف .. واخبار امك بعد وفاة يوسف ..؟
راغده تنهدت: تبكي بالخفى وتجينا بكل قوتها .. ما ودها تبكي قبالي ممكن لان هي تدري ألي فيني مكفيني ..
نرجس: ليه وش بك انتي ؟ الصلاة على النبي كل شيء تمام معك بس انتي مزودتها ..
راغده: بعد ما يرجع من دوامه ببلغه بقبولي فيه مع شريكة ..
نرجس مسكت يد راغده وبحنان: الحياة دايم ماتعطينا الي نتمناه ..
راغده ابتسمت بضعف: أنا بخير نرجس .. أنا تأخرت كثير بالقبول تعبت من المعافرة لزوم ارضى خلاص ..
نرجس: على كذا ايش ناوية تسوين ؟ لزوم تحتفلين معه ..
راغده: تحبين هالسوالف لذلك بستعين فيك شوي وتشاركيني أفكارك ..
نرجس بحماس: افا عليك بس ..
.
.
.
جات ببيت عمها
وهي تدور بعيونها على جنان ..
اسيل: بغرفتها مو هنا ..
اسراء قامت لغرفة جنان الي كانت جالسة على جوالها ..
جنان انصدمت من وجود اسراء هنا
اسراء ناظرت بجنان بشكل مطول واخذت نفس عميق مصحوب ب ابتسامة : شفتي يا جنان آيش نهاية ألي ياخذ شيء مو له !
جنان عقدت حاجبها: جايه هنا وداخله غرفتي بس عشان تتشمتين فيني ! صدق انك وقحة ..
اسراء : اتشمت ! لا ابدا بس اعلمك أن الدنيا ذي لها حوبه يا جنان .. أعتبر ألي صار لك هو درس لي أنا بعد لو أخذت طلال أكيد بكون بنفس مكانك اليوم ..
جنان بحده: ليه جايه هنا ؟
اسراء: عشان اطلعك من جوك الكئيب ذه ألي ماله داعي ..
جنان: شكرا .. مو بحاجة ..
اسراء ابتسمت بسخرية: طلال ألي معذبة نفسك عشانه عايش حياته ومرتاااااح لآخر راحة وانتي ! تؤتؤتؤ بكاء وانهيار وألم ماله داعي والله ، جددي حياتك وابديها صح .. وانتبهي تتزوجين واحد مش مقتنع فيك لان اكيد مصيرك بيكون مثل هاليوم ..
جنان انخرطت ببكاء عميق وبفك يرجف: محد يريد الشقاء والضيم لنفسه يا اسراء .. انا فعلا حبيت طلال مثل ما انتي كنتي تحبينه تمنيت لو بس يرضى فيني كا زوجة مو اكثر أنا ما طلبت المستحيل ! على قد ما لبست على قد ما تدللت له مايشوفني .. شككني ب أنوثتي كلها عشان هالراغده ..
اسراء بعد صمت دام دقيقة : أنا أكيده ان طلال لا يمكن بيلاقي وحدة تحبه زيي يا جنان بس للقلب مذاهب ! وطالمة عندك كمية حب ورومانسية وفريها لزوج الصح ألي بيشوفك بعينه مثل ما طلال يشوف راغده ..
جنان: كيف قدرتي تنسينه ؟
اسراء: مثل ما الرجال ينسى بمرأة ! انا بعد بنسى برجل ! وحبي وكل شيء يكون لشيء حلالي افضل لي .. اعتبري كلامي كله هو مجرد نصيحة لك وشكرا لأنك كنتي الضحية بعلاقة بين اثنين ما كنت أنا ..
جنان بألم: ما افهمك احيانا .. ذي شماته ولا شفقة ومواساة ..
اسراء عند الباب: اعتبريهم كلهم ب آن واحد يا بنت العم .. استأذنك ..
جنان صارت تناظرها لما اختفت من عينها ورجعت تبكي ب استياء وألم وهي تطلق تنهيدات الألم والوجع لحالها من بعد ماكانت بعيون سطام العاشق الله يرحمه وبين عيون طلال الهيمان بوحدة غيرها ..
.
.
اخذت دوش لكامل جسمها وسوت عنايتها الكاملة اليومية لكن بشكل مبالغ .. بعطور فيكتوريا سيكرت والمسك من عبدالصمد القرشي ب أماكن النبض بجسمها ، لبست قميص نوم علاق أبيض لتحت الركبة من عند الصدر دانتيل ومن تحت ساتان ماسك على جسمها شوي لبست خلخال ذهبي .. ومن عند الكتف وشم أسود ..
مناكير أحمر صريح .. شبشب أبيض ..
حطت كريم واقي الشمس كا كريم اساس وتنت بخدها وشفايفها وكبست رموشها الماسكارا السودا أكتفت بهاللمسات البسيطة لسهرة
دهنت اللوشن بجسدها ..
اتصلت ب طلال ورد عليها وباندفاع: طلال انا ما بكون بالبيت معليش صار معي شغله مهمة منيب مطولة ..
طلال بخيبة: لا راغده ..
راغده: معليش باي
وسكرت الخط وهي كاتمة ضحكتها ..
دخل سيارته بالكراج وفتح سيارته بقهر وهو يتحلطم وهي مستخبيه ورئ سيارتها تشوفه لما اختفى من عينها
فتحت سيارتها من ورئ وسوت ترتيباتها ..
طلال صعد فوق ولع الأنوار بالغرفة تفاجئ عناية شخصية من زهور الريف في بوكس مكتوب عليه بكرت صغير ١. تحمم فيهم ..
ناظر بالكرت بغرابة واخذ دوش منعش بعد مرابطة ٣ أيام .. حس بالنظافة الكاملة لف المنشفة حول خصره جاء بيفتح الباب لكن انتبه لكرت ملصوق مكتوب " ٢. ألبس الملابس ألي تحت السرير .."
طلال رفع حاجب ونزل حاجب " وش السالفة ؟ "
نزل يده لتحت السرير كان فيه كيس أسود جواته عطر رجالي جديد وبيجامة بلون النيلي والأسود وفي كيس صغير فتحه كان موجود مرطب شفاف وكرت صغير مكتوب " لاتنسى تحط المرطب :) "
أبتسم بلا شعور وكأنه فهم وش تخطط عليه ..
لبس بجامته القطعة العلوية بلون الازرق الملكي النيلي والقطعة السفلية أسود فضفاض ..
دهن العود الخفيف عند ذقنه وشنبه وتسبح بالعطر ليكمل اناقته ..
لبس الشبشب الأسود وتوجه لغرفتها استغرب أنها مقفلة دق مرة ومرتين جات ماريان: سنيور .. سنيورة راغده داون .. كراج ..
طلال ب استغراب: كراج ؟
نزل تحت وفتح الباب جات وراه وغطت عينه وباندفاع: ممنوع النظر ..
طلال ألي صفقته ريحتها العطرة وبابتسامة وأفكاره تتزاحم عليه: وش ؟
راغده صارت توجهه لما وصلوا لعند سيارتها ونزلت يدها : تداااا ..
طلال ابتسم بذهول وهو يشوف كيف حولت شنطة السيارة لمكان لسهرة
حيث انها شالت الكرسي الثاني من سيارتها اللاند
وصارت المساحة أكبر ..
مفرش سرير مضرب أبيض تحت و٣ مخدات عريضة بغطاء ابيض بقصة فرنسية عند جوانبها ووسادات مبعثرة بلون البيبي بينك وشمعة عريضة معطرة برائحة الفانيليا .. فازة شفافة يعتليها ورد بلون البيبي بينك وتدرجات الوردي ..
وريحة المكان ممزوج بعطرها ألي يآسر قلبه .. ولابتوب مفتوح للفيلم ..
مع لوح خشبي فوقها فواز الخوخ وعليه فيونكة بلون البيبي بينك واكواب فاخرة زجاج رفيعة وكرتون بيتزا ..
طلال باندفاع: كل ذه ل " والتفت لها "
انصدم من شكلها ألي من زمان ما شافها تلبس له كذا ، له هو وبس تنح لشكلها ولجمالها ألي مالي عينه ..
راغده انحرجت من نظراته جات بتحط يدها على صدرها المكشوف بس نزلتها لما تذكرت كلام الدكتورة سلمى في محاضرتها لحياة زوجية سعيدة أن الرجل مخلوق بصري ..
وبتوتر: ايش رأيك بالمكان ..؟
طلال بذوبان: كل شيء حلو ومثالي ..
راغده ابتسمت وبفرحة: صدق ؟ ترددت اني اسوي الحفلة بالسيارة بس هي كانت المخبئ الوحيد ألي ما بتنتبه له .. حلو اكيد؟
طلال بلع ريقه : ليت لو أقدر ابوسه ..
راغده ناظرته بعدم استيعاب
طلال باندفاع وغير الفهم: اقول ليت لو اقدر ابوس المكان من جماله ..
راغده: اهاا .. كويس الحمدلله انه اعجبك ..
صعدوا جوا السيارة وطلال يناظر بالمكان باعجاب اكثر: مرة مريح .. حبيت فكرتك ..
راغده: شفتها بالسناب لوحدة سوتها .. شفت إنها حا تكون فضيعة لو طبقتها بسيارتي ..
طلال باس يدها: احلى مفاجأة والله ..
راغده بابتسامة: عساك راضي ؟
طلال بتفكير: نص ونص ..
راغده بضحكة: عاد اليوم هذا بالذات امي مابتجي لا تشيل هم ..
طلال باندفاع: لا تجيبي سيرتها هي تجي على الريحة والله ..
راغده بضحكة دلع عفوية اخذت عقله: ههههههههه .. حزنت عليك والله ..
طلال بذوبان أخذ يدها وحطه بصدره اليسار وبشاعرية: ماحزنتي على قلبي ألي هواك ؟ ماحزنتي علي وأنا متشفق للمسة يدك " وشد على يدها " ما اشتقتي لي ؟
راغده ابحرت بعيونه السود ..
طلال كمل بشاعرية: راغده أنتي مو عارفه حبي لك ؟
راغده بصوت قريب للهمس: عارفه .. بس " سكتت "
طلال فهم صمتها: بس مو عارفه ليه تزوجت جنان !؟
راغده الي حاولت تخفي حزنها بس ماقدرت: لا تشيل هم راح اتغلب على ..
طلال قاطعها: أنا طلقت جنان ..
راغده انصدمت من الخبر مهي عارفه تفرح أو تحزن لكن بلا شعور ابتسمت ابتسامة عريضة وحضنته ..
بكل قوتها ..
طلال ألي ذاب اكثر من قربها وهو يحس كأنهم جسد واحد وكأنها داخله بين ضلوعه حوطها بيدينه وشد عليها أكثر وهو يطلق تنهيده شووق عمييقة : اللهم الثباااب ..
راغده حاولت تبعد عنه بس هو شاد عليها وبحيا: طلال ..
طلال وهو يستنشق عبق ريحتها العطرة:
شوي بس .. شديني من جديد ..
راغده ألي حست لهفه وفقد كبير بصوته شدت عليه بصمت طويل بينهم ..
طلال ابتعد عنها ببطء ..
راغده ناظرت به: طلال مهما أن قسيت عليك بيوم أفهم أنه ناجم عن سبب ، وكل ألي صار بيننا كان بسبب احساسي الكبير أنك خدعتني واستغفلتني ..
طلال: يا روح طلال أنتي ، يعلم الله يا راغده أن الزواج صار رغما عني وانا الآن خلاص طلقتها ما أظن أن في سبب واحد يمنعك .. " سكت شوي " يمنعك من أن نكون زوجيين طبيعيين مثل قبل ..
راغده : طالمة أن كل شيء رغما عنك ليه طلقتها ! مش ممكن يصير عداوة بينكم ! اقصد أنتوا الآن تراضيتو مبدئيا بين عمامكم الثانيين مو ممكن الآن يصير عداوة بينكم ..
طلال فهم قصدها وباندفاع: لا .. تطمني عمي أبو اسيل متفهم بس عرف أني مالي ببنته وأن حبي لك منعني من أني اقرب لها " مسك ذقنها بطرف اصابعه وبنظرات حادة " يشهد الله علي أني ما خنتك حتى بالذاكرة وأن الفرصة كانت قدامي لكني رفضت بس عشان اثبت لها ولعمي أني مالي بهالزيجة ..
راغده رفرف قلبها من كلامه وهي تحس بحرارة مشاعره وصدقه
طلال كمل: غير ألي شفتيه بالاستراحة من مسكة يد ما كانت أكثر من كذا ..
راغده بغيرة: وبيوم ميلاد توائمي؟
طلال حس بغيرتها وبابتسامة عريضة بانت غمازته: بس عشان اثير غيرتك ..
راغده بغيض: وعساك استفدت شيء ..
طلال بنفس ابتسامته: استفدت أني شعللت الغيرة بقلبك .. وهذا دليل كافي أنك تحبيني ..
راغده:......
طلال بلهفه: قولي أنك تحبيني راغده ..
راغده : على أساس أنك ما تدري ؟
طلال بشوق: نفسي اسمعها منك بنفس المشاعر ونبرة الصوت ألي كنتي تقولينها لي ب ايام الثلاث ألي بالفندق ..
راغده:.......
طلال: ظللتي تكررينها لي فوق ال٥٠ مرة لا ال ١٠٠ مرة وكنتي بكل مرة تقولينها لي كأني أول مرة اسمعها منك ، شعور غريب وحلو ممكن لأنك حبيبتي ! " ابتسم بخجل " أن ألي أحبه يحبني وهو ملكي وحلالي وش أريد من الدنيا بعد ؟
راغده كأنها تريد تنسيه: طيب وافعالي قبل ايش كانت تبين لك ..
طلال بزعل: هذا ألي كان مجنني راغده ، كنت استشعر كراهيتك وعدم رغبتك فيني " تنهد بعمق وهو يتحسس خدها الناعم وبهمس" ذبحتيني يا بنت .. وش باقي ما سوتيه بي ؟ يعني كل ذه بس عشان أني تزوجت عليك تحرميني منك ..
راغده قربت وجها منه وصغرت عينها وبنبرة تهديد: هذا تحذير أول .. لو كررتها لآي ماكانت الاسباب مو بس بحرمك مني إلا وجهي هذا " وهي تأشر على وجها" ماعاد بتشوفه طول عمرك ..
طلال بنظرات حادة: لآخر لحظة جذابة حتى بتهديداتك ..
راغده اخفت ابتسامتها: كلامك هذا ما بيغير أي شيء من قراراتي وأرآئي ..
طلال قرب وجهه منها أكثر وبصوت قريب للهمس: أنا مو بس متأكد إلا جازم وخاتم أن كلمة مني تلعب في داخلك لعب ..
راغده ألي حست أن نبضات قلبها تزيد على همساته وكلماته الدافية وهي تحاول تدعي القوة: وأنت نرجسي لآخر لحظة " ابعدت وجها منه " أنا جهزت فيلم حيعجبك وزمان البيتزا بردت بسبب الكلام بقوم اسخنها وارجع ..
اخذتها وطارت للمطبخ وكأنها بحاجة لهواء جديد وهي تتحسس وجها ألي صار أحمر بسبب خجلها ..
ابتسمت وهي تتحسس خدها ألي لامسه طلال " خبلة والله .. بس ليه خبلة ! أنا فعلا ابتعدت عنه فترة طويلة واشعر أن مشاعري تجاهه كلما تزيد ماتقل "
سخنت البيتزا وتوجهت للكراج وهي تناظره يسكب الفوار بالأكواب الزجاجية جلست جنبه وشغلت الفيلم ومدت له قطعة من البيتزا ..
كان الفيلم يحتوي على مقاطع مخلة للآداب ..
طلال كان يناظرها و كأنه يرد لها سواتها فيه قبل: ايش هذا ! عيب عليك الي تحطيه ..
راغده باندفاع: بس بالبداية بعدها يصير مؤدب الفيلم ..
طلال: لا لا عديه ..
راغده: كيف اعديه وهم يتكلمون بكلام مهم ..
طلال: عيب لطفلة مثلك تشوف هالأشياء ..
راغده رفعت حاجب ونزلت حاجب: بالله ! " حطت يدها على خصرها " كل ذه وطفلة ..
طلال صار يتفحصها وعض على شفته :طفلة بمقومات امرأة فاتنة ..
راغده شب وجها من الحيا ، انتبهت لكلامها : ما قصدت كذا .. قصدت طولي وحجمي مو لطفلة ..
طلال : لا لا أنا فاهم قصدك زين ..
راغده باندفاع: والله ما قصدت الي تقصده .. " وضربت كتفه " شرير أنت ..
طلال فتح عينه :كيف تضربين أبوك !؟ ها
راغده: من متى صرت أبوي ! سلامات ..
طلال: أنا أبوك وزوجك وكل شيء ..
راغده بعناد: مو بس اضربك أنا اكسر راسك لو تستفزني ..
طلال: يلا وريني لشوف كيف بتضربيني ..
راغده بتهديد: أنت تدري وش ممكن اسوي ..لا تتحداني ..
طلال: لا بالله يلا سوي لشوف " وقرب وجهه منها " ورين...
ما استوعب إلا وهي مبتعده منه بعد ما تركت قبلة سريعة له
وبجراءة: لو تتكلم وتستفزني بنهيك ..
طلال بخدران: انهيني وألعني جدفي بعدد ..
راغده فرطت من الضحك: ههههههههههه ههههههههههههه قسم انك مجنون ..
طلال بذوبان: وه يممه .. عيديها بس ببطء ..
راغده بعدم استيعاب: وش ذي ؟
طلال: البوسة ..
راغده ضربت كتفه بحيا: خلاص .. الفيلم بيروح وانت تهذر .. صمتاا ..
طلال حس أنها تريد تتجرأ ومابين حياها فتح ذراعه لها : تعالي ..
راغده كانت تدري لو ترتمي بحضنه وسط لمساته بينهدم كل شيء وبتكون زي اللعبة بين يدينه يحركها كيف ما يبغى .. ما ترددت بالقرب منه وهو يلاعب بشعرها البلاتيني ويأكلها البيتزا ب ابسط الأمور كانت تحس بحبه واهتمامه فيها ..
انتهى الفيلم وهي مركز بس انها بين حضنه وان طلال خلاص صار لها والعائق زال ..
طلال سكر اللابتوب ورفعه لقدام السيارة مع كرتون البيتزا ..
وشغل موسيقى هادية وصار يناظرها:تعالي لحضني ..
راغده: أنا مرتاحة كذا ..
طلال: طيب حبيبي .. ايش مناسبة هالامسية الرومانسية ؟
راغده : هدنه ..
طلال:......
راغده وهي تحاول تدرس ملامح وجهه بس فشلت: وعشان اعتذر لك ..
طلال ألي ملامح وجهه بانت بالقلق: تعتذرين على وش !؟
راغده: على أني اشقيتك معي وعذبتك لفترة طويلة ..وقلت اكافئك بليلة كذا خفيفة وحلوة ..
طلال تنهدت براحة : للحظة بس نزل قلبي لبطني وللحظة رجعتيه لموقعه ..فكرت بشيء ثاني ..
راغده ابتسمت بضعف: لهدرجة متأثر بكلامي الي قلته لك قبل حادثة خالي بدر ..
طلال ناظرها بحزن: آسف لأني اذيتك وجرحتك بقصد او بغير قصد مني .. كيف اداوي جروحك ..؟
راغده: يهمك ؟
طلال: ما أريد نبدأ حياة جديدة ولسه بقلبك وجع وألم .. يهمني أنك تكونين راضية رضى تام ..
راغده مسكت يده وبحب: ما وصلت لهاليوم إلا بعد تفكير أن علاقتنا تستحق نعطيها فرصة ثانية وما في الآن أي سبب يمنعنا .." أخذت نفس عميق " نخبك ..
طلال رفع كوبه وضرب بكوبها: بصحتك ..
دام الصمت لمدة دقيقة ..
راغده: سولف لي وش صار بالفترة الي كنت ترابط فيها .. وكيف نظامكم ..
طلال صار يسولف لمدة دقيقتين بلا توقف وهو منغمس بالاحداث ألي صارت له مع أصحابه ..
راغده وهي متكيه بيدها بحالمية حركت فمها بدون ماتنطقها ..
طلال وقف وهو يشوف نطقها للكلمة بشوق ولهفه ..
راغده بهمس مسموع: أ ح ب ك .. أحبك ..
طلال لمعت عينه : على قد الإنتظار ذي الفترة ألي محروم إني اسمعها منك .. حسيتك رديتي روحي .. ب أربع حروف .. راغده عيدي ...
راغده بنفس همسها : أحبك أحبك أحبك ..
طلال ضم وجها بيده وطبع قبلة شوق لها وضمها بصدره بقوة ..
راغده ألي حست بتوتر كثير وسعادة كبيرة بجواتها لأتخاذ القرار الصحيح ..
طلال شبك يده بيدها وبنفس لهفته وشوقه: يصير ؟
راغده تقاوم خجلها: يصير ..
طلال حس بسعادة كبيرة تعتريه اقترب منها بهدوء: من حبيبي انا ؟ ردي عليا وأولي " يلحنها "
راغده بضحكة خجل: هههههه أنا ..

وقضوا أجمل الليالي الممزوجة بالشوق واللهفة والحب ............ ^،* ...........

اليوم التالي الساعة ٩ صباح ..
دخلت بيت بنتها بمفتاحها الاحتياطي وهي تدور بعيونها على بنتها
شافت ماريان بالصالة مع التوائم : وين سنيورة ؟

توجهت للكراج بغرابة: معقولة بالسيارة ! شكلها تستهبل علي .. اكيد طلال موصيها ان....
سكتت لما سمعت صوت جوا السيارة اقتربت بشويش

طلال يبوس خشمها ويشدها على صدره: يمه الحب يا ناس ..
راغده بضحكة: خلاص طلال والله شبعت ..
طلال: فيه العافية حبيبي ..
راغده تشوف الساعة ألي بجوالها: تأخرنا طلال يلا نطلع من قوقعتنا ..
طلال بحالمية: لسى ما شبعت منك ..
راغده بخجل ابتعدت عنه وجات بتطلع الا تشوف أمها بوجها ..
طلال بهلع: بسم الله بسم الله وش جابك ألحين عمه ..
ام عبدالعزيز تشوف المكان وتناظر بلبسهم ألي جالس طلال بدون قميص بس سروال كعادته اذا جاء بينام وراغده بفميص قصير ..
راغده فهمت نظرات امها وبخجل: افطرتي ؟
طلال يلبس قميصه ونزل من السيارة ..
ام عبدالعزيز اخفت ابتسامتها: الحمدلله فيه العافية .. بس شفتك ماتردين وانا مرة مستعجلة ..
راغده: عسى خير !؟
.
وبالسيارة
ام عبدالعزيز: كان لازم يروح معنا ؟
راغده: ما أشعر بالاطمئنان إلا معه يمه ..
ام عبدالعزيز: بس هو الان مايتحرك حتى عمك وضعه مزري ..
راغده: برضو يمه ..
ام عبدالعزيز تشوف الساعة: يطول اذا تدوش ؟
راغده: على حسب ..
بعد ١٠ دقايق صعد السيارة وتوجهوا للمستشفى ..
قابلهم د.حمود بحفاوة ..
د.حمود: كيف حالك يا عمه..؟
ام عبدالعزيز بدون نفس: بخير ..
د.حمود بابتسامة: للان شايلة علي ..
ام عبدالعزيز بعدوانية: ولبكره ..
د.حمود بضحكة: تظلين عمتي رغم كل شيء ..
ام عبدالعزيز: عمة عين الشيطان ..
طلال: ووين غرفة الخبيث ؟
د.حمود: اي واحد فيهم ..؟
راغده باندفاع: يقصد عمي فؤاد ..
ام عبدالعزيز: وانت وش دخلك وين دكتوره ..
د.حمود: انا طبيب عام ياعمه واتطمن عليه كل فترة على أي حال هو يكون جد بنتي جوان ..
ام عبدالعزيز بقلق: واخباره الان ؟ في اي جديد ..
د.حمود وداهم لغرفة فواد الي كان صاحي بس فمه مايل ويهذي بكلام غير مفهوم ..
أول ما شاف راغده اعتلئ صوته ..
النيرس ألي بالغرفة: لا لا اهدأ يا عم ..
فؤاد ظل يتمتم وهو بوضعية التشنج ليده ..
النيرس باندفاع: معليش دكتور حمود بس الزيارة ممنوعة وضع المريض حرج ..
طلعوا من الغرفة وبقت ام عبدالعزيز تناظر فيه وبحزن: أنا جبت راغده هنا عشان حسيت أنك تريدها تكون هنا ..
فؤاد بصعوبة نطق: ل..ا... م..ار..يدها ..
ام عبدالعزيز نزلت راسها بأسى ..
النيرس: معليش يا خاله لو المريض فيه حساسية مع أفراد اسرته لاتجيبيه لان وضعه جدا حساس وانا مشددين علي ..
.
طلال بصدمة يناظر حمود: هذا هو فؤاد !!
د.حمود تنهد: شفت شلون ! هذا هي الدنيا كيف ممكن ربي انتقم من سواياه ب احب اولاده .. ما تدري قد ايش هو يحب يوسف ويشوفه غير عن عياله ..
طلال بشفقة: لا اله الا الله .. اللهم لا شماته ..
ناظر براغده ألي جالسة وهي ضامة كف يدها ببعض وملامح الحزن بوجها اقترب منها بقلق: حبيبي انتي بخير !؟
راغده بدون ما تناظره وبعد صمت دام ٨ ثواني: ما ناويت له الشر بيوم على ألي سواة فيني .. على تحريض بدر لي على اذيتي على غيرته مني على على على .. موتة يوسف حزن لنا كلنا .. وألي شفته بعيون فؤاد اليوم عرفت أنه رغم التعب الي فيه هو .. هو ماتغير يظل يكرهني .. حسيت للحظة وكأنه يقول اطلعي برا يا بنت ناصر اطلععععي ..
طلال جلس جنبها وحط يده فوق يدينها المضمومة كا نوع من المواساة لان في كلام ما ينقال بس تحس فيه
راغده بحزن: أريد أطلع من هنا طلال ..
طلال قام وشبك يده بيدها: يلا حبيبي ..
طلعوا من المستشفى وراغده بصمت تناظر النافذة ..
أول ما وصلوا البيت طلعت راغده فوق ..
طلال يناظر براغده لما اختفت من عيونه : راح تكون بخير عمه لاتشيلين هم ..
ام عبدالعزيز: طالمة انت جنبها اكيد ما بخاف ..
طلال ناظرها بغرابة: ما ادري انتي تكرهيني ولا تحبيني يا عمه احترت معك !
ام عبدالعزيز بكبرياء: وه .. عاد من زود حبك لي عشان احبك مالت عليك ولا مالت ..
طلال بابتسامة عريضة: وش دعوة يا عمه أنتي بحسبه امي .. يكفي انك ام راغده .. مع أن تجيك أحيانا طلعات مدري كيف قايلة لكن الحمدلله .. الاهم انك ماتضرين راغده بشيء ..
ام عبدالعزيز: طالمة أنت زين معها فأنا بكون زينة وياك ..
طلال بود: يوم زواجنا قريب اتمنى ماتجين ..
ام عبدالعزيز ضربت كتفه وسط ضحكات طلال : ايا الي ماتستحي على وجهك ..
طلال: ههههههه امزح ياعمه امزح .. بس صدق لاتقتحمين خليها خاصة ..
ام عبدالعزيز رجعت ضربته: وش شايفني ..
طلال: دخلاتك يا عمه كأنها مداهمات عسكرية الله يصلحك ..
ام عبدالعزيز ناظرته بنص عين: اطردني بعد اطردني ..
طلال بروح مرحة: لاوش دعوة بيت بنتك بيتك ..
ام عبدالعزيز: على بالي بعد .. يلا وطمني عن راغده ..
طلال صار يناظر عمته لما راحت " شبه كبير بين الام وبنتها .. رغم ان ولدها مات لكنها تكابر وتخفي حزنها "
صعد فوق للغرفة شافها عند المراية تضبط شكلها لانها تدوشت سريع ولا رتبت نفسها اقترب منها وباس راسها من ورئ: جميلة مايحتاج .. " سكت شوي " وين ودك نروح ؟
راغده ناظرته بالمراية: يصير تخطفني ونبعد عن الخبر ؟ " تنهدت " معليش انا ما ادري وش اقول بس حاجة جواتي تريد تغير جو ..
طلال مسك جواله وابتعد عنها شوي بعد صمت عشر دقايق باندفاع: يلا حبيبي جهزي نفسك بنروح جدة ..
راغده ناظرته بعقدة حاجب : ايش !
طلال: يلا مايمدي باقي على الرحلة ٤ ساعات كافية لك صح ؟ تجهزي أنتي وماريان والعيال ..
وطلع من غرفتها لغرفته يجهز شنطته وتاركها بذهولها لحقته لغرفته وباندفاع: كانت مجرد رغبة طلال ما قصدتها صدق ..
طلال وهو يحط المنشفة بالشنطة: اجل احذري من امانيك عندي " ألتفت لها" لأني المارد الازرق " وباس خدها" هو الشيء البسيط ترى ما بنروح للخارج !
راغده ابتسمت من جواتها لكنها تدري عن ظروف طلال المادية رغم ذلك يحاول يسعدها ب أبسط شيء ، توجهت لغرفتها تجهز الشنط لها ولعيالها ..
رتبت امورها تامة ..
دخل عندها: حبيبي بس ساعة بالكثير وأكون هنا ..
راغده: طيب ..
طلال اخذت سويج السيارة وتوجه لبيت ابوه ..
عبدالرحمن جاء بوجهه: ابوي زعلان بعد ما طلقت بنت اخوه ..
طلال تنهد: للان ؟
عبدالرحمن: ولبكره رح شوفه ..
طلال دخل المجلس وباس رأس أبوه : كيف حالك يبه ؟
ابو فهد: لو حالي يهمك ماكان كدرتني بهالشكل .. كيف اناظر لأخوي بعد سواتك ذي ها !
طلال: يبه ترى عمي هو ألي قال لي اطلق بنته ..
ابو فهد بعدم تصديق: طليل لا تكذب علي وتلعبها علي ..
طلال: والله يا يبه .. كان الإتفاق أن نجلس سوا بس كم شهر واطلقها عشان السمعة والفضيحة .. اتصل به وهو بيقول لك ..
ابو فهد مسك جواله
.
.
نرجس بصدمة: هااا ايش تقولين !؟
راغده بابتسامة: اي بالله طلقها ..
نرجس تلولش: كللوووش ألف مبروك ألف مبروك راغده ..
راغده بنفس ابتسامتها: الله يبارك فيك نرجس ..
نرجس: بس انه يطلق بنت عمه عشانك ! ذه مش حب إلا عشق يا راغده ربي لك الحمد ..
راغده: للان مو مستوعبة انه طلقها بجد شيء خيالي .. طلال بيكون لي خلاص !
نرجس: اي وبهالسفرة فلي أمها حتى لو انها يومين الاهم تغيرين جو ..
راغده: وايش صار عليك ؟
نرجس: ماكنت مقتنعة فيه بي سمعت نصيحتك وكلمته ودريت شخصيته معضم الشيء ، رجل واعي وفاهم الحياة صح رزانته ششيء الصراحة ، وكل شروطي وافق عليها وعشان ما اغلط راغده رحت حللت عشان اعرف هل اقدر انجب له ولا بتصير نهايتي طلاق .. والحمدلله ماعندي اي مانع من الحمل ، بس الي مستغربة منه اني ماحملت من صهيب رغم اني اخذت فترة ماكنت اكل حبوب منع الحمل ثم اكلتها ومع ذلك ماحملت ..
راغده: تصير يا نرجس ممكن ما توافقتوا وبالنهاية ذي خيرة انك ماحملتي منه ..
نرجس: وزواجه هالاسبوع .. بكل وقاحة ارسلت الدعوة لامي !
راغده: وش تتوقعين منها ! لكن الله يشغلهم في انفسهم ..
نرجس قامت بحماس: ويوم زواجكم كم باقي عليه ؟
.
.
ابو فهد سكر الخط من اخوه وهو مذهول: معقولة !


يتبع

رد: رواية قيود / الكاتبة ساندرا

رد: رواية قيود / الكاتبة ساندرا ( كاملة )

ابدعتي يا أنيقة
اطيب المنى وخالص المودة مع عبق الجوري والليلك
نهاية رائعة وسعيدة للجميع حيث كان الكل يستحق
بانتظار الجديد منك ولا تتأخري يا غالية
لروحك أجمل الأماني واعذبها

رد: رواية قيود / الكاتبة ساندرا ( كاملة )

ابدعتي ابدعتي ابدعتي وسلمت انآملك ، رواية جدددداً جميلة كجمال صاحبتها
مو غريبه عليك ياساندرا ويعجز الحكي عن وصف الي بداخلي من حب لك ولرواياتك ،
دُمتي بود ...

رد: رواية قيود / الكاتبة ساندرا ( كاملة )

من طبيعة الإنسان أن يتعب. أنت لست دائمًا كرة من أشعة الشمس مليئة بالطاقة ويمكن أن تفعل أي شيء في أي وقت. تحتاج فقط إلى الاسترخاء لفترة من الوقت والتفكير في الأسباب التي تجعلك تستمر. فكر في الأهداف التي لديك في الحياة.

رد: رواية قيود / الكاتبة ساندرا ( كاملة )

سعيدة جدًا بعودتك ساندرا، واستمتعت كثيرًا براويتك الحديثة "قيود"
اكتشفت عن طريق الصدفة أمر عودتك بعد ما خططت لاعادة احدى رواياتك لأجدد حنيني للأيام اللي كنت أقرأها فيها والايام اللي كنت اتوق فيها لانتظارك! وبرواية جديدة! وأنا اللي ياما بعد انقطاعك بحثت عنك كثير لعلي أحصل وسيلة واحدة فقط للتواصل معك
أو على أقل تقدير لو انك تملكين حساب عام يطمني بوجودك.
رواياتك تحمل ذكريات كثيرة من مراهقتي وأيامي الجميلة اللي ولت سائلة المولى ان يكون حاضري وايامي القادمة اجمل.
كيف حالك بعدما انقضت تلك السنين؟ أتمنى أنك بخير وبأحسن حال