بلا رقيب / لعاشقه ديرتها ، كاملة

**Loli.** · 29-07-2011, 10:43 AM

رد: بلا رقيب / لعاشقه ديرتها ، كاملة

قيس :ان لله وانا اليه لاراجعون .. من متى ووين لقيتوه ..
وليته ماسأل يوم جاه الجواب ..
:في زباله شكل اللي كان معه رموه بالزباله عشان مايتورطون فيه ..
هذي نهايتك ياكايد زباله ... وش بيقول لأمه وش بيقول لأخته .. وش بيقول لمنير .. ولف وراه على طول وشافه واقف يبكي .. سمع اللي انقال ماكان يبغاه يسمع كيف نهاية اخوه الكبير اللي المفروض كان له بمثابة أب ..

(((8))

عساف

اول ماطلعوا اهل قيس دخلت عليها وزي ماتوقعت ماكان فيه عندها احد من خواتها اللي اخذت المستشفى حارتهن الثانيه ومتراته شبر شبر ..
كانت مغتمه وكأن هموم الدنيا كلها على راسها لدرجة اني شكيت انها درت عن سالفة الصور ...
عساف :وش فيك ..؟!
ناظرتني وكأنها توها تنتبه لوجودي ..
ضحى :مافيني شي ..
سكتت شوي وتكلمت ماتوقعت ابد اللي بتقوله ..
ضحى :تعرف جيراننا ام كايد قبل فتره خطبت سارا لولدها قيس وأنا وافقت ...
طيب ماأدري وش المطلوب مني هنا بس اذا كانت بتسألني عن قيس ..
عساف :طيب قيس رجال كويس ..
ضحى :بس سارا ماهي موافقه .. وانا ماشاورتها حتى ..
اووف شكل الموضوع كايد وانا ماأحب احشر نفسي بمثل هالمواضيع بس دام هي اللي بدت وشكلها تبغى شوري لأول مره بحياتها لازم اتجاوب معها ..
عساف :طيب وانتي ليه وافقتي بدون ماتأخذين شورها ...
ضحى :لأن قيس رجال طيب على قولتك بس سارا تكرهه لانه كان دايم يظربها وشي ثاني لأن فرص سارا بالذات بالزواج قليله توها طالعه من خطبه فاشله ..
الصراحه مأعجبني تحكم ضحى بحياة خواتها بس صدق هي المسئوله عنهن وكبيرتهن بس ماتوصل لأنها تتخذ قراراتهن عنهن ..
عساف :والله ياحياتي هي اختك وانتي اعرف بمصلحتها مني ..
ماردت علي ورجعت لسراحانها ..
عساف :ماقلتي كيفك اليوم ..
طالعتني بنظره صغيره ..
ضحى :يعني احسن ..
عساف :خلاص كلها يومين وبتطلعين .. دبرت لك خدامه بجيبها اول ماتطلعين ..
ضحى :بروح عند خواتي ..
عساف :روحي للمكان اللي يريحك والخدامه معك ..
كنت جاي بقوم لأني تذكر شغله كنت بجيبها ونسيتها ..
بس يدها اللي مسكت يدي خلتني الف عليها بصدمه .. حلو والله وصرتي تمسكين يدي ياضحى ماتبغيني اطلع ..
ضحى :وش كنت اللي تقوله امس ..
سألتها وأنا ارجع اجلس على طرف السرير..
عساف :وش قلت ...
ضحى :من بيني وبينه عداوه ..
عساف :يوووه انتي للحين ذاكره هالسالفه .. انتي محد يمزح معك ..
ضحى :السالفه ماكنت مزحه ..
عساف :وكيف حكمتي انها ماهي مزحه .. ضحى لاتسوين نفسك فاهمه لكل شي ..
ضحى :انا متأكده انك ماكنت تمزح ..
عساف :وانا متأكد اني كنت امزح ... لاتسوين نفسك فاهمه لكل شي ..
اووف وش فيني انا بعد شوي ولاظربها كف .. يارب اوووووف طلعت قبل ماتهور واجرحها بكلام يطلع بدون ماأقصده انا من بعد سالفة الصور ماني قادر اتحكم لابكلامي ولاباعصابي المنفلته على اهون الأمور ... الله لايجزاك خير ياخلف انت ووسوستك ..

((9))

وعد

اول مانزلنا من السياره .. وشفت شكل قيس وهو حاضن منيرعلى باب بيتهم خفت ياربي وش صاير .. يعني قيس يظرب منير يوطى على راسه مو يحضنه اكيد صاير مصيبه .. ياحرام لايكون ماتت ام كايد ...
سألت سارا اللي كانت واقفه معي ...
وعد :وش صاير .. ليش يبكي منير ..
سارا :ياحليله مسوي نفسه طيب ..
وعد :بروح اشوف وش السالفه ..
ويوم شفت نوف راحت لهم رحت اركض وراها لاتفوتني السالفه بس يوم قربنا ماعرفنا نتكلم لين رفع منير راسه لنا اول ماشافنا شهق بقوه وجاء يركض لنا ..
ناظر فينا قيس بنظره وكأنه بيبكي ياحرام وش فيهم .. ودخل بيتهم ..
جانا منير يبكي وبنفس الوقت يحاول يمسح دموعه ..
منير :كايد مات ..
ياحرام مات كايد بس هو سكران يعني حتى يوم كان حي وجوده مثل عدمه ..
نوف :منير لاتبكي الرجال مايبكي بعدين خلاص هذا يومه ..
سارا :تعال منير ادخل معنا .. لاتبكي زين هوكان بيموت اليوم اوبعدين .. وكلنا بالأخير بموت ...
ياربي خواتي غبيات ذولي مايعرفن يتصرفن وش بيموت وماأدري ايش .. والله يحزن وهو يبكي ...
جلسنا نسمعه وهو يبكي ماندري وش نسوي كيف نسكته وكل ماقالت سارا اوشوق حاجه بكاء ..جلس عندنا يبكي لين جاء قيس وأخذه كان واقف على الباب وقالنا خلوه يطلع لأجي اطلعه بنفس لأنه جاء كم مره ومنير يبكي مايبغى يرجع لبيتهم بس يوم قلنا له اللي قاله قيس طلع بسرعه ..وسارا قالت ..
سارا :أقشر طيب طلع على حقيقته ..
جلسنا ننظر في بعض لأن محد منا قال عنه طيب اوشرير..
ماقدرت انام طول الليل افكر حتى انا بموت واذا مت وش بيصير لي بكون بالقبر لحالي وانا اخاف من الظلام ...
ياليتني اسوي اشياء زينه تنور علي قبري ...اكره الظلام ماأبغى الظلام ..
سمعت نوف تسألني ..
نوف :أي ظلام ماتشوفين النور اللي مخلينا موقادرين ننام ..
فتحت عيوني وشفت النور مالي الغرفه .. كذا لاجاء النهار مانقدر ننام لأن غرفتنا مافيها ستار والنور يملأ الغرفه ..
وعد :بتداومين اليوم ..
نوف :ايه عندنا اختبار قواعد ..
وعد :ماهو قالوا مافيه اختبارات بالرمضان ..
نوف :يقالك ماتعرفين ابله وعد ..
وعد :وعععع لاتقولين ابله وعد تقهريني الله يأخذها الشينه ذيك اسمها على اسمي ..
نوف :صدق انك حوطيه ليه تسبينها اللحين افطرتي ..
وعد :أستغفرالله استغفرالله .. وترى حتى انتي افطرتي ليه تسبيني ..
نوف :اسكتي ترى بديت اعطش من الكلام معك انتي بتداومين ..
كنا نتكلم وكل وحده بفراشها اصلا توه بدري الساعه توها ثمان ..
وعد :اكيد بداوم اجلس وش اسوي ماأقدر اكل ولاأحوم بالحاره .. على الأقل بالمدرسه بنسوي محاظره بالمصلى ..
نوف :ماقلتي لي بحظر اجل ..
وعد :توقعين منير للحين يصيح ..
نوف :مأدري عنه تلقينه نام اليوم اكيد بيسوون العزاء ..
وعد :أنا بروح ..
نوف :خبله انتي وش يوديك ..
وعد :الخبله انتي يعني ليش بروح اصور بيتهم بروح اعزيهم..
نوف :بكيفك .. اقولك وش سويتي مع ندووه للحين تحرش فيك ..
وعد :لا الحيوانه ماتقدر اللحين المعلمات كلهم معي والناس كلها تدري انها منافقه مايحبونها مثل قبل
..
نوف:رجعت تسب لاتقولين حيوانه يابقرره .. واصلا هي من البدايه منافقه وكل البنات يدرون بس المعلمات دايم مايصحن الا بالأخير سمعت انها بتغير المدرسه ..
وعد :بقلعتها احسن وعقبال سارووه ام كشه ..
نوف :انتي لوبيدك ماتبغين احد يبقى بالمدرسه غيرك ..
طولنا وحنا نسولف لدرجة اني يوم وصلت المدرسه كنت ميته عطش ..
الحصه الأولى ماحظرت الدروس لأني كنت مشغوله بالمحاضره اللي بنسويها بالمصلى بعد استراحة الصلاه ..
بعد الحصه الثانيه جتني بنت من فصل نوف تركض .. وقالت لي ..
:الحقى وعد نوف جالسه تهاوش مع بنت من ثاني متوسط عدمت وجه البنت واخت البنت وبنت عمه كفخوا نوف بسرعه ..
رحت اركض وراها ولقيته يتهاوشون بين فصل نوف وفصل ثاني متوسط ب .. كان بينهم سيب صغير فيه دورة مياه وهناك كانت الهوشه ..
اول مره اشوف نوف كذا معصبه كانت تظرب بنتين ظرب ماهو صاحي حتى يوم نتهاوش مع عيال الحاره ماعصبت كذا ...
وعد :نوف خلاص فكيها .. نووووف ترى بيفصلونك فكيها ...
صرخت علي نوف ..
نوف:ماني فكتها لو يقتلوني ماهو يفصلوني بس انا اوريها الحقيرررره والله لأذبحها ...
وتفلت (بصقت ) عليها بقهر وهي ترفس البنت مع بطنها ..
جت ابله عطوف معصبه ومعها الوكيله والمراقبه وتجمعوا كل الأداره اسحبوا نوف بقوه وانا اركض وراهم ...
ابله عطوف :ياقليلة التربيه ولد قسم بالله ماأنتي بنت حتى برمضان مانتي فاكتنا من شرك .. انا اوريك بفصلك فصل نهائي ماعاد ابي اشوف رقعت وجهك في مدرستي ..
كانت معصبه مررره شابه نار اصلا شكل البنات بعد ماصفقتهن نوف ينرحم بس مأدري ليش عندي احساس ان الموضوع كايد ...
جلسنا بالأداره اكثر من ساعتين بهواش ابله عطوف اللي تبغى تفهم من نوف السالفه بس نوف رافضه تكلم وحسيت ان نوف تبغى تبكي حتى يوم جت البنت وسألوها وش السالفه ماتكلمت وكان خايفه من نوف بقووووه ...
اول مارجعنا للبيت ..
وعد :نوف قولي ليش ظربتي البنت ..
انصدمت يوم جلست نوف تبكيييييييييي ..
نوف :الحيوانه الحقيرره اكرررها عساها الموت ....
وكانت تشهق بقوه وهي تبكي ..
نوف:شفتي الحيونه وش تقول بنت خالها الحقيره بالثانويه اللي تدرس فيها ضحى وهي ومجموعة بنات صوروا ضحى يبغون ينتقمون منها ...

نهاية الحلقه
تحياتي عاشقة ديرتها

**Loli.** · 29-07-2011, 10:44 AM

رد: بلا رقيب / لعاشقه ديرتها ، كاملة

الحلقه الرابعه والأربعون

((1))

.. مغفله ..

ضحى

المفروض اليوم اطلع من المستشفى اللي لاعت كبدي منه ..الم ظهري للحين مضايقني ومسبب لي خوف ماأبغى اذوق الألم اللي ذقته ذيك المره .. كان عساف رايح يتكلم مع الدكتور وسارا جالسه عندي ..
سارا :ضحى كلمتي ام كايد ..
يووه هذي وش دراها عن ام كايد لاوتكلم بهالبرود ..
ضحى :وليش اكلمها ..
سارا :من امس وش نقول لك .. ولدها كايد مات ..
ضحى :يوووه نسيت لوصلنا البيت اكلمها ..
سارا :مسكينه ارتفع عليها الضغط اول يوم بالعزاء وطاحت عليهم ...
ضحى :كلنا ماشين بهالطريق ..
سارا :لا اخاف انا مأحب احد من اللي احبهم يموت افضل اني اموت اول وحده ..
دخل علينا عساف
عساف :خلاص جاهزين ..
كنت جالسه على طرف السرير وماسكه ظهري اللي احسه يتكسر لجلست كذا ...
ضحى :ايه يلا نمشي ..
وجيت اوقف ...
قال هو
عساف :ياءالله نسيت اجيب كرسي لحضه انتظروا بجيب لك كرسي وأجي ...
ضحى:لحضه تعال
بس كان طلع مصدق نفسه بجلس على كرسي ...
مادريت اني كنت اقولها بصوت عالي الا يوم قالت سارا ..
سارا :وليش لا انتي تعبانه شوفي يدك بس على ظهرك تحسبين الطريق صغير والله لينهد ظهرك قبل ماتوصلين السياره ..
كلامها خلاني اوافق بدون معارضه اني اجلس على الكرسي يوم وصل فيه عساف اللي علق على كتفه الشنطه الصغيره وبيده ماسك كيسه وبنفس الوقت كان يدف الكرسي ..
اول ماوصلنا البيت واستقبلوني شدن ونوره اللي وحشوني كثيررر حسيت اني فعلا مرتاحه بعد كل اللي صار من دخلت المستشفى ...
جتني ملاك طالعه من المطبخ معها صينيه عليها اكوب فيمتو ..
ملاك :كلووووووووش كلوووووووش تو مانور البيت ...حوزع الشربات على أهل الحاره ...
هند :تسوينها خبله بس لاتنسين ان ولد جيرانا توه ميت ..
ملاك :ايه صح الله يرحمه .. وراح سكران الحاره ...
وعد :لازم نتعاقد مع سكران جديد حاره بدون سكران مثل طبخه بدون بهار ..
ضحى :خلاص بنات استغفرالله وش هالكلام ...
وعد :غريبه ضح ضح ماصارختي بس قلتي اسكتوا ...
ضحى :والله لوانتي رايقه انا ماني فاضية لك ..
استغربت سكوت نوف اللي العاده صوتها يلعلع مع وعد ..
ضحى :نوف وش فيك ...
حسيتهم ارتبكوا وهند جلست تضحك ...
هند :هههههههه مافيها شي بس محزنه على كايد ...
ضحى :وين شهد ليش مانزلت ماتدري اني بجي ...
سارا :اكيد مالها وجه طنشيها الخبله عشان تعرف خطاها وماتعيدها ...
مادري ليش جاني احساس ان خواتي كلهم كانوا عارفين عن شهد وماخبروني يعني انا المغفله بينهم ...
ماسألتهم لأني عارفه انهم بينكرون بس انا بطريقتي الخاصه بعرف وساعتها ياويلهم اذا دريت انهم كانو مغطين عليها ومستغفليني كل هالوقت محد منهم بيمر من عقابي ...

((2))

..الأنتقام الكبير ..]

ميشو

أخبرتني سوسو بمكالمتها انها سمعت مالك يحادث فتاة بالهاتف ويناديها وديان حتى انه لم يهتز حينما راى سوسو وأكمل محادثته ... سوسو كانت جازمه ان من يخاطبها مالك هي خطيبة شقيقها خلف ..
كانت منهاره وتكاد تفقد عقلها من هول الأمر .. طلبت منها ان تدع الأمر لي .. وفعلا هذا ماحدث وبعد ثلاثة ايام من تلك المكالمه هاأنا اجلس وبيدي الورقه الرابحه .. الفتاة التي كان يخاطبها مالك لم تكن ابدا خطيبة خلف ومن سوء حظه .. وسعادة حظي أن لهما نفس الأسم .. ووديان التي يحادثها مالك لبنانية الجنسيه وهي صديقه عزيزه جدا عليه عرفها منذ مايقارب العامين ..
والان هل فهمتم ماسيحدث حينما يعلم خلف ان أخاه على علاقه هاتفيه وربما تتعدى ذالك مع خطيبته ..
سيكون الأمر مثل انفجارعنيف يقع في منتصف المنزل يحطم الجميع ويحولهم للأشلاء ..
خلف سريع الثوره فحينما يعلم بذالك سيسعى لتطليق تلك التضاريس ويكيل اصناف العذاب لأخي العزيز مالك .. ربما يعلم بعد ذالك بحقيقة الأمر ولكن الأهم ان لايعلم حتى يتحقق مرادي .. وانا على ثقه بإن هذا ماسيحدث خلف لن يحكم ابدا عقله..
ماذا لو وضعت سوسو بالصوره بحيث بعد انكشاف الحقائق تكون هي الملامه .. رائع يبدو اني سأتسلى كثيرا ...
قفزت جالسه بعد ماكنت مستلقيه.. اليوم ستخرج ضحى من المستشفى هل وصلت ..؟!
يجب على ان انزل حالا والا وقعت في لسان التوأم اللاذع .. وفعلا كما توقعت ..
ملاك :عساك ماجيتي ... صح النوم بدري حبيبتي روحي كملي نومتك ...
لم أجبها حتى قبلت ضحى ثم استدرت لها ..
ميشو :اهتمي في شئونك ...
سارا :يقالك اللحين بتكسحين توأمي يالقطوه ..
ميشو :سارا لما لاتبعدي عن طريقي ..
يألهي لاأعلم ماحدث فجأه وجدت نفسي احلق في الهواء ...
ميشو :أنزلاني ياسافلات ...
ملاك :بالمشمش ...وش رايك سارا نعلقها بالمروحه ..
يألهي اشعر بأن ذراعي ستتمزق من جهة الكتف ..
ميشو :اتركيني ياوغده ملاك سأقتلع رأسك ان لم تنزليني الان ..
اجابتني سارا وهي تحرك قدماي بعنف ..
سارا :اسكتي لاوالله نرميك على الأرض بقوه ...
ضحى :خلاص بنات صدعتوني نزلوها ...
ملاك :حركي سارا بنطلع فيها للحوش عشان مانصدع بضح ضح حبيبتنا ..
وفعلا فعلتا ذالك يألهي سأقتلهما ...
ميشو :انزلاني .. كلا لاتفعلا ذالك ....
اه يال الهول يالها من سقطة مؤذيه غبيتان اود لو اقتلع رأسيهما ... وقفت على قدماي وانا ممسكه بظهري ... وصحت بهما ..
ميشو :سافلات ..
تافهات اكرهن ..
صوت وصول الرساله الصادر من جهازي انتشلني من افكاري الشريره للكيفية الأنتقام من التوأم الحقير ..
كانت رساله من المركز التجميلي يخبرني بأن عملية التجميل التي سأجريها تحدد موعدها بالسادس من شوال ...

((3))

[.. واندماه ..]

بالمجلس الكبير بعد ماخلى من المعزيين كان جالس ومنزل راسه للأرض شماغه اللي مغطي فيها راسه ولافها من كتف لكتف تشربت دموعه اللي نزلت بعد ماختلى بنفسه .. راح اخوه توأمه اللي ماكان توأم جسد بس توأم روح ... قضى اول سنينه وهو وكايد مايتفارقون دايم مع بعض رغم ان كايد يكبره بسنتين .. دخلوا المدرسه مع بعض .. مع ان كايد كان الأكبر بس هو كان يعتبر نفسه وصي عليه معه بكل خطوه هو يعرف يدبر نفسه بس كايد مايعرف يدبر أموره لازم يعتمد عليه بكل شي .. استمروا على هالحال لين دخلوا المرحله المتوسطه من هناك كان افتراقهم بدا يحس ان كايد عاله عليه يحسه يفشله بضعفه كان يبغاه قوي مثله يكره انكساره ...
بدأ يبتعد عنه بالتدريج لين صار كايد وحيد وبين ليله وضحاها تعرف على شلة فاسد افسدته معاها ..
وطريق الخطأ اعتبرها القوه اللي ياما تمناها .. كان يشوف نفسه قوي رجال سوى شي قيس نفسه ماقدر يسويه ... وهو أخطأ يوم تخلى عنه وتركه يختار الطريق اللي يبي كل هذا بسبب كبرياء مراهقه غبي كان تفكيره محدود بس هو تفكير ذيك المرحله .. كان مجروح لأنه أبتعد عنه ومافكر بجرح كايد يوم هو اللي ابتعد عنه .. هو ماكان بحاجه الكايد بس كايد كان بحاجته ومعتمد عليه ... مسح دموعه بسرعه يوم سمع صوت احد يقترب من المجلس ..
منيره :قيس تكفى تعال شوف امي اقنعها تأكل تعبت معها من أمس مادخل فمها الأكل ..
قام بتكاسل ولحقها على غرفة أمه اول ماشاف حالتها نزلت دمعه من عينه ..
يحس هو اللي قتل اخوه .. هو اللي قتله .. ماقدر يجلس اكثر طلع بسرعه على غرفته ..
هو السبب لو ماتخلى عنه لو ماأبتعد عنه لووو انتشله من طريق الفساد قبل مايضيع ماكان اليوم يبكي اخوه ويبكي خاتمته ..

كان جالس يتأمل الليل و عيونه تدور بالظلام وترجع تستقر على النور المتسرب من شباك مطبخهم .. انتبه على خيال انسان جاي من ظلام الحوش الثاني ... ماعرفها لين جلست تحت النور .. تنهد بقوه ويده على الستاره بيقفلها سولت له نفسه يوقف ثواني يتأمل فيها شوشو .. وطرى على باله كايد .. اللي شوشو والركض وراها اشغلوه عنه .. هي السبب من اختفى اخوه مالقى وقت يدوره فيه ليش لأنه يركض ورى شوشو وين راحت وليه اختفت ومن هي .. يوم هي اختفت قلب الرياض عليها وماخلى مكان مادورها فيه شهوررر وهو يدور عنها ومامل وأخوه ولد أمه وابوه يغيب شهر كامل ماسأل عنه ولامره وهو يعرف وين يلقاه بس ماكلف نفسه يلتفت لأخوه أشغلته شحاده حقيررره تراكض ورى الناس تشحدهم والخافي اعظم وحده مثلها تطلع تشحد وتروح وتجي ماوراها احد يسأل عنها الشحاده من اهون الأشياء اللي ممكن تسويها ...
قفل الستاره بقوه وهو يلعن شوشو واهتمامه الغبي فيها ...
تمدد على سريره بأمل انه ينام بس صوتها اللي بدأ بوليد وانتهى بكارثه طيرة النوم من عينه ...

((4))

.. هل كنت الشيطان ..]

ملاك

بعد ماخلاص حسيت انا سارا نامت تسللت من عندها وأنا متأكده انها ماراح تلحقني لأني قلت لها اني بسوي السحور وبس بجلس اسولف معها لين تنام وبعدين بروح نزلت تحت ومالقيت احد اليوم كلهم ناموا بدري .. كنت بجلس اكلم بالصاله وافضح نفسي بس اشوى اني تذكرت ضحى اللي نايم بغرفه تحت بابها يفتح بوسط الصاله وهي تاركه الباب مفتوح عشان مافيه مكيف ..
واصلا مافيه احد اللحين يشغل المكيف لأن الجو بارررد مرره بس هي تقول حرانه طلعت للحوش ..
وجلست تحت شباك المطبخ على طول عشان النور اللي جاي مع شباك اكره اجلس بمكان كله ظلام ..
دقيت على وليد وأنا خايفه مايرد لأني من زمان مطنشته ..
تقريبا من تعبت ضحى ودخلت المستشفى قفلت الجوال وماعاد فتحته..
خلاص احس انه لو ماتزوجني وليد بضيع تخليت عن اشياء كثيره عشانه
ولو ماتزوجني بكون انا الخسرانه ..
لا هو بعد بيخسر شوق حبيبته الشينه الله يأخذها موكفايه انها غنيه وعندها اهلها امها وأبوها بعد تزوج الوليد ظلم قمة الظلم .. ليش انا احبه وهي تزوجته ..
بس لا هو مستحيل يتزوجها مافيه انسان صاحي يدق عليه واحد ويقوله انا كنت على علاقه مع زوجتك ويكمل زواجه فيها اكيد بيطلقها مثل ماطلق خلف الريم اللي انا تسببت بطلاقهم يوم اتصلت على الجوال اللي طلبت مني ميشو اتصل عليه وغيرت صوتي يومها كان الموضوع عادي عندي صح كنت خايفه بس سويت الشي ذاك عشان ميشو ...
وماتوقعت ابدأ اني بكرر هالشي بس المره هذي عشاني والندم مقطعني ماني قادره افكره كيف سويت كذا كيف اتهمت انسانه بريئه انها على علاقه بالشخص وانها ***** استغفرالله العظيم ..
كنت غبيه كنت شيطان كنت أي شي شرير بس ماكنت انا ملاك ..
بذاك اليوم كنت مره منهاره بعد ماعرفت انه ملك على شوق ..
كنت مره مقهوووووررره مأدري كيف تجرأت وطلبت من سفر جواله واتصلت منه على جوال الوليد اللي كنت سارقته من زمان من جوال ود ..
وخشنت صوتي بنفس الطريقه اللي كلمت فيها خلف ذاك اليوم مادري كيف كنت قادره اتكلم واضحك منه وكأني واحد مستهتر تافه خبيث نذل لعب بوحده بعدين جاي يفضحها قدام زوجها ..
ولعبت الدور صح كنت احس اني ماني أنا يمكن ابليس ساعدني اكيد بيساعدني مو السالفه فيها خراب بيوت .. بعد ماقفلت جلست ساعه اطالع بالجوال ماني مصدقه اني سويت اللي سويته ..
كان الموضوع سهل مرررره سهل ..
بس بعده صارت المكالمه هذي كابوس يلاحقني بصحوتي ونومي حسيت لأول مره بحياتي شعور الأنسان الخبيث الظالم ماتصورت نفسي أبد بهالموقف انا اظلم احد انا اتسبب لأحد بأذيه انا لو بيدي نزعت الشر كله من العالم وزرعت فيه الخير ..
انا حتى الناس الأشرار ماأكرهم وأدور لهم الف عذر وعذر لشرهم هذا انا اللي ماقدرت اكره ابوي على كل اللي سواه فينا والعذاب اللي ذقناه بالحياه من بعده ..
ولاقدرت اكره جابر اللي كان فارس احلام مراهقتي ماأبغى اتعمق لكم ليه حبيته صحيح زواجه من غيري جرحني بس ماقدرت اكررهه ..
ويمكن تجربتي مع جابر هي اللي خلتني اتهور واكلم الوليد واسوي كل اللي سويته لأني اخاف يضيع مني مثل ماضاع جابر كنت اقول انه معذور لوتزوج غيري هو وش دراه عني وعن حبي ...
وتحت هالضغط وفكرة اني احب واتزوج واحد غني وأرتاح من ايام الفقر اللي رغم انها حلوه مع خواتي بس مره لأني كثير امر بأوقات اتمنى فيها لوكنت غنيه تجرأت وبديت بأول خطوه وهي المكالمه بعدها تعمدت اطيح بوليد بكذا موقف وبالأخير كلمته على الجوال بدون حتى مايطلب مني بس هو عادي عنده مارفض ومع الأيام عرفت ان هالشي عنده طبيعي ويكلم الاف البنات مو بس انا ..
وتعمقت علاقتنا وصرت التقي فيه اذا زرنا خالتي لين كشفتني ود الصراحه هو طلب مني أطلع معه بس انا مستحيل اسوي هالشي مستحيل ...
ملاك :الوليد ..
الوليد :نعم ..
ملاك :مابغيت ترد ..
الوليد :صباح الخير وينك من اسبوع لايكون تزوجتي انتي بعد ...
ملاك :ليه من غيري تزوج
الوليد :كلكن لاجاء رمضان التزمتن وتزوجتن .. ماتدرن انا حافظين هالكذبات ..
ملاك بنرفزه :ولللييييييييد ..
الوليد :خيررر
ملاك بدلع:مأشتقت لي ...
الوليد :صوتك لاوالله ماأشتقت له بس شوفتك اكيد ..
ملاك :احلم
الوليد :ماودك تشوفين خالتك ..
ملاك :قديمه ..
الوليد :حددت زواجي بأجازة العيد ...
وش قاعد يقول هذا يكذب والله العظيم يكذب مستحيل اللي يقوله صدق ...
ملاك :كذاب ..
الوليد :وليش الكذب ..
ملاك :وانا حرام عليك وعدتني تطلقها ..
الوليد :وعدتك وكنت بلعب عليك... تدرين ليه اقول لك هالكلام لأني قررت اروح مكه بعتمر وماودي اروح هناك وعندي نيه شينه لك فأحسن شي قلت اخبرك الحقيقه ..شوق حبيبتي احبها بجنون مستحيل بطلقها عشان وحده مثلك .. على فكره تعجبني سذاجتك قليل القاها فهالزمن مع ان اللي بمثل ظروفك ماشيات على حل شعرهن ... ملاك صدقيني هالطريق مايصلح لك خليك على سذاجتك احسن لك ...
وكلام كثيررر كثيررر انقال ماوصلها منه الا ذبذبات الحروف ...

***مزون شمر*** · 30-07-2011, 07:06 AM

رد: بلا رقيب / لعاشقه ديرتها ، كاملة

يعطيك العافيه
استمري ياحلوه

**مجنونة وجنوني يجنن** · 30-07-2011, 08:43 AM

رد: بلا رقيب / لعاشقه ديرتها ، كاملة

ياوؤؤ ة_ة اندمجت هههههههههههههههههههههههه
واصلي قلبؤوؤ

**مجنونة وجنوني يجنن** · 30-07-2011, 06:09 PM

رد: بلا رقيب / لعاشقه ديرتها ، كاملة

طلعت روحج ادري خخخخخخخخخخخخخخخ
كملي ب_ب

**Loli.** · 31-07-2011, 07:45 AM

رد: بلا رقيب / لعاشقه ديرتها ، كاملة

لالا عادي يالغلا
حيل نورتوا

تششكرات اليوم أن شاء الله أحط الباقي فديتكم :$

**مجنونة وجنوني يجنن** · 01-08-2011, 04:37 AM

رد: بلا رقيب / لعاشقه ديرتها ، كاملة

كح كح ناطرين

**Loli.** · 01-08-2011, 10:27 AM

رد: بلا رقيب / لعاشقه ديرتها ، كاملة

((5))

.. هل هي النهايه ..]

قفل منها واحساسين بداخله يتصارعن أحساس بالندم انه ضيع من يده صيده سهل قليل ينلقى مثلها .. واحساس بالرضا لأنه اتخذ هالخطوه الصعبه وتخلى عن شهوه ونزوه في سبيل أنه يتقرب من ربه .. نوى يعتمر ويطهر قلبه يبغى يروح مكه ونيته صافيه يتمنى يبدأ حياه جديده .. يبغى الله يغفرله ويصلح له حياته بعد الزواج ..
مايبغى حياته الأوليه تأثر عليه .. خلاص هو بيترك هالطريق وان شاءالله ..الله بيعينه ..
رجع لشغله اللي كان يسويه قبل ماتدق .. سبحان الله يمكن لو مادقت كان سكت ومافكر يقولها ويمكن بعد العمره يرجع ويكمل لعبه عليها .. محظوظه يوم اختارت هالوقت عشان تدق فيه بعد ماأنقطعت اسبوع كامل ..
:عمي الوليد خلاص لميت حاجاتك ...
الوليد :ايوه خلاص ان اللحين ماشي خوذي الشنطه هذي نزليها معي ..
ود :ليه حماليه لك ..
الوليد :ود والله ماني ناقص ظرافتك ..
ود :موكأن اغراضك كثيره احس الشباب اغراضهم اقل من كذا كل ذولي شناط ...لايكون حاط عدة الأستشوار وشنطة المكياج ..
الوليد :وانتي حاسدتني حتى على الشناط شوفي فيه فوق دولابي شنطه خوذيها لك ..
ود بقهر:تتريق علي ..
الوليد لف عليها بعدماكان يرتب بشنطته المفتوحه:بتساعديني ولا أطلعي برى ..
ود :اوووف يأخي ليش انت ماتحبني ..
الوليد :اطلعي بررررى ..
ود :حرام عليك وش سويت انا كذا ...
الوليد :كذا ميزاجي .. تفضلي اطلعي برى ...
ود :خلاص بنزل الشنطه بدون كلام...
قدام باب الفيلا الداخلي كان موقف السياره وفاتح الشنطه يدخل أغراضه وود على راسه تنق ..
الوليد بصرخه وهو يلف على ود اللي واقفه وراه :اللحين انتي وش تبغين ..
ود اللي انخرعت من صرخته : خلاص اسفه مأبغاك تدعيلي ..
الوليد :طيب بدعليك بس فكي عني ..
جاه صوته من وراه وبنبره خبثه :ماشاءالله تدينا ..
الوليد لف لصوت اللي مسبب له كوابيس :خير ..
نواف :ليه اللي يشوف وجهك يشوف الخير ..
الوليد يطالع بود :ادخلي ..
ود اللي تخاف من عمها نواف:مع السلامه لاتنسى ادعيلي ...
نواف :هذا يدعي لك هههههههههههههههههههههههههههههههههههههههه ..
الوليد بالفتره الأخيره تأكد ان نواف اجبن من انه يسوي له شي يخرب علاقته بالشوق:وش عندك تضحك ..
نواف:يقولون شر البليه مايضحك وصدقت هاليوم ...
الوليد بدون مايعطي ادنى اهتمامه لكلام نواف ركب سيارته وطيرها قدام عيون نواف .. اللي ضحك زياده بعد ماأبتعد الوليد مسكين للحين يفكر ان تهديده له بتخريب حياته يقصد فيها حياته مع شوق .. مادرى ان تفكيره ابعد من كذا بكثير ...
هو ناوي يقضي على حياته من الناحيه الماليه وهو عارف ان الوليد بدون فلوس مايقدر يعيش .. بيخليه يشحد حتى اللقمه اللي يأكلها ..
وهو حتى شهاده جامعيه مامعه .. يعني ماراح يلقى وظيفه محترمه تلمه وعنده الطريقه اللي من خلالها بيضمن ان اخوه محمد مايساعده ولا أحد من العائله يساعده وبيكره فيه الصغير قبل الكبيرر ..

رغم انه اصبح شبه متأكد ان نواف مايقدر يضره ولاحتى يخرب عليه حياته مثل ماكان يتوعده لكنه للحين مقابلته تسبب له توتر وضيقه ... زاد من سرعة السياره وعشان يخفف توتره مثل مايظن شغل المسجل لين صار صوت الموسيقى يهز السياره من قوته علق السماعه كويس بأذنه ودق رقمها وحده من العشرات الموجوده ارقامهن بجواله بيتسلى فيها قبل مايخبرها انه تركها وبيتزوج عشان يريح ضميره مثل ماهو متصور ...
اخر مكالمه واخر اغنيه قبل مايحرم بالعمره ويتوب ..
هوخلاص بيتوب بس بيسمع هالأغنيه ويكمل هالمكالمه ..ووسط ضحكه وكلماته الغزليه للأنسانه مأدري وش اقول عنها بالطرف الثاني تنفجر الكفره الأماميه للسياره .. تتقلب السياره مره واثنين وثلاثه السماعه معلقه بأذنه ... والأغاني تصدح داخل السياره ويختلط صراخه مع صراخ الغناء
توه يضحك قبل ثواني بس واللحين يصرخ مايبغى يموت
وش يلاقي ربه فيه يردد كلمات اغنية واذنه للحين صدى ضحكه ماجنه راسخ فيها ..
مايبغى يموووت وهو ماتاب بس بيعتمر ويصلي وبعدين يسلم الروح
..
مايبغى يمووووووت وهو حتى الصوم اليوم ماصام اشتهى العصر سيجاره وشربها ..
مايبغى يموت وهو عاصي ربه ..
افنا عمره ليله ونهاره وهو عاصي ربه ويوم يموت يبغى حسن الخاتمه وتنقبض روحه على عباده ...

اخر نظره لعينه تعلقت بالبطاقه الصغيره اللي متعلقه قدام المرايه ومكتوب عليها عبارة التوحيد لاإله إلا الله محمد رسول .. هل سينطقها ....!
حاول ..؟!
هل ملك الموت قريب ..!!
في ليله من ليالي رمضان المبارك
في العشر الوسطى عشر المغفره ..
يموت واي موته ستكون ..
على طاعه ..!!
خاتمه حسنه ام ماذا ...؟!
هل مات هل ختمت اعماله بالحياة الدنيا هل هذه هي النهايه ...

((6))

.. لن أفقدها ..

عساف

رغم اعتراضات خلف اني ماروح وماحاولته ثنيي الا اني رحت واشتكيت في قسم الشرطه على تصوير زوجتي في مؤسسه حكوميه واعطيتهم الرقم اللي وصلتني منه رسالة الوسائط اللي فيها صوره ..
خلف خايف من الفضحيه .. وانا اسأل وش فضيحه اكبر من ان صورها انتشرت ايه انتشرت ...
اليوم واصلتني صورتها بلوتوث عند الأشاره ...
لحضتها وسوس لي الشيطان اطلقها وأرتاح .. ايه اطلقها .. وش الذنب اللي ارتكبته عشان اتحمل هالفضيحه ..
بس للأسف ماني قد هالشي كيف اطلقها وولدي وشدن وين يروحون .. وكيف ابتعد عنها ..
انا حفيت عشان اخليها ترضا عني اللحين اتخلى عنها من اول اختبار ..
وخلف هذا صاير مثل الشيطان بس يوز بأذني يبغى ينكد علي حياتي مثل ماهو منكد على نفسه ...
الصراحه احسه انسان مريض ...
اوووف ماصدقت اوصل البيت من هالزحمه اللحين كيف بدخل لضحى وهي بين النمل خواتها ...
دقيت عليها بس ماردت .. ياحياتي شكلها نايمه ..
فتحت الباب بمفتاحي الخاص او بالأحرى هو مفتاح ضحى ..
فكرت الساعه 11 ونص الصبح من بيكون صاحي وبرمضان بعد ..
جربت افتح الباب الداخلي اللي لو مانفتح معي كنت بروح للمجلس .. بس انفتح دخلت وأنا ماشي للغرفه اللي قالت لي ضحى انها بتنام فيها شفت وحده من خواتها نايمه على الكنب ..وعمى ان شاءالله وش مجلسها هنا رجعت طلعت وطقيت على باب الصاله بقوه عشان تصحى ...
:خيرررر وش فيه ..
عساف :انقلعي بدخل لضحى ..
:عمى ان شاءالله بيتنا وينافخ بعد .. انتظر لين اطلع فوووق وادخل مالت بس على وجهك الشين ...

**Loli.** · 01-08-2011, 10:31 AM

رد: بلا رقيب / لعاشقه ديرتها ، كاملة

الشرهه مو عليها على اللي رباها الحيوانه انا وجهي شين والله اني مزيون ...
سمعت صوت ركضها على الدرج ثم :ادخللللللل ..
دخلت ومباشره على غرفة ضحى .. انصدمت يوم شفتها نايمه على فراش على الأرض .. الغبيات ذولي مايدرن انها تعبانه وظهرها متعبها مايعرفن ينزلن لها سرير من فووووق .. هذي اختهن اللي ضحت بعمرها ومالها عشانهن مايعرفن يردن لها المعروف .. صدق قليلات تربايه ..
ضحى :وش عندك واقف ادخل ...
عساف :اللحين خواتك اللي مافيهن خير ليش ماحطن لك سرير تنامين عليه مايعرفن ان نومة الأرض تتعبك..
ضحى :من قال ان نومة الأرض تتعبني انا طول عمري انام على الأرض والفراش هذا مريح مرره ...
عساف :يعني لازم تدافعين عنهن ...
ضحى:وانت لازم تهجم عليهن ...
عساف :لأنك تقهريني بسببهن انحرم منك كثير ..
مأدري كيف طلعت مني هالكلمه اللحين بتفتح لي مشاريع .. وتذكرني ببلاوي اللي سويتها ..
صدمتني يوم أخذت الموضوع بروح رياضيه ..
ضحى :اووه يالبيبي اجل تنحرم من الماما ..
قلت لها مسوي انكت ..
عساف:حرام تسخرين من أخيك المسلم وانتي صايمه ..
ضحى :اولا ماأنت اخوي زوجي ثانيا ماني صايمه .
ياحلوه زوجي من فمها تحسسني ان اعني لها شي .. وصحيح هي ماتقدر تصوم عشان العلاج ولأن الصوم يتعبها ومانعينها منه ..
عساف :افطرتي ..
ضحى :لاصلا توني صاحيه على وجهك ..
عساف :على وجهي الشين قوليها ..
ضحكت وقالت ..
ضحى :انا ماقلت شي ..
أحس فيها شي متغير رغم التعب والمرض والأرهاق احسها وجها فيه شي الأبتسامه ..
ايوه هي الأبتسامه .. بس الأبتسامه الصافيه .. مو ابتسامتها المكشره حقت التطنز ...
عساف :اسوي لك فطور ..
ضحى :لاتكفي فكني من طبخك اللي مره ملحه زايد مره بدل الملح سكر ...
عساف :ترى مره وحده اللي طبخت فيها وسويتيها مرات .. واصلا كنت مرتبك مايعجبك طبخي ...
ضحى :هههههههههههههههههههههههههههههههههههههههه ..
عساف :الله يخليلي هالضحكه وراعية الضحكه يارب...
مدت يدي بلمس الحفره اللي تسببها ضحكه تحت ذقنها بس دفت يدي ..
ضحى :مو بتسوي فطور ..
عساف :طيب بس بلمسها وأروح ..
ضحى :روووووح انت صايم مايصير كل شي تبغاه تسويه ..
عساف :اصلا محروم صايم ولامفطر ..
دخلت المطبخ ولقيت البطله شدن حاطه لها كرسي واقفه عليه وواقفه قدام الفرن وحاطه لها تاوه تقلي فيها بيض ... ونوره مطلعه القدور من دولابها وداخله فيه تلعب ...
صرخت عليها من القهر بتحرق نفسها بلقافتها ...
عساف :وش تسوين ..
غمضت عيوني برعب يوم شفت رجلها تزل من حافة الكرسي بعد ماأفزعها صوتي وتفقد توازنها وتطيح على وجهها بالتاوه وتطيح على الأرض وتاوه على راسها ...
ثانيه ثنتين ثلاث .. وكنت عندها طايح على رجولي وانا اصرخ مفزوع ..
عساف :شدددددددددددددددددددددددددددددددددددددددن ...

((7))

.. أغلى النساء ..]

خلف

ماأدري وش مطريها على بالي هاليوم اووووف منها ... لو هالعساف يطيعني ويطلق اختها ونرتاح من سيرتهن ..
كل ماكلمته بهالموضوع طاح لي بتبغى تخرب حياتي مثل ماحياتك خربانه وانت غيران مني ومن خرابيط الحريم هذي ..
بس الشرهه علي انا اللي حاشمه وعاده رجال ..
ولا انا وش فيها حياتي ماأحسن منها رجال عزوبي ومرتاح واذا طرى في بالي اتزوج مأحط في بالي .. البنات ملي البيوت وهذا أنا بعرس بعد العيد ..
بس هو اللي خرب من بعد ماراح مصر وطايحلي بخرابيط الحب ..
انا اذا اعجبتني وحده تزوجتها .. واذا شافت نفسها علي بيت اهلها يحتريها والمره بدالها الف بس عزة نفسي وحده ..
خلف :اللحين انتي ليه ماتروحين بيتكم ترقدين وتفكيني ..
بتقولك ياخلف .. لاأريد ابغى اجلس على قلبك ..
خلف :استغفر الله العظيم والله اللي انجنيت ياخلفان وتوك ماتهنيت بشبابك ...
متزوج عشر مرات وتوك ماتهنيت .. لاماتهنيت .. وقمت اناظر نفسي بالمرايه ..
خلف :وش اللي ماهو عاجبتس فيني يامشاعل .. عشان ترفضيني .. زين ورجوله وجيبي مليان ..
لايكون شايفه لها شوفتن ثانيه .. تسويها ماشيه على حل شعرها يمكنها من راعية الخرابيط ...
اييييييه وش فيني انا اثور نفسي تلتعن بحريقه ان شاءالله ماعلي منها انا بتزوج وديان اللي تسوها وتسوى طوايفها بنت رجال طيب وراعي تجاره ..
ماهي بنت الفقر المشرده .. هي وبستها اللي تنقلها معها كنها ورعن لها ..
والله لتزوجها وأكسر خشمها وجيبها خدامه عند عمتها وديان ..
ايييه ياخلف احلم يقولون الأحلام ببلاش لوأنك قادر تزوجها ماكان هذا حالك ..
تهووس فيها ليل ونهار ..
ايييه الحماره والله ان لها غلا بقلبي ماهو لغيرها من الحريم ..
بس هي الحماره اللي مأدري وش شايفه علي ماتبي تزوجني ..
وانا زي الخبل مسوي فيه راعي كرامه ياليتني وافقت يوم قال لي عمي مبارك يملك لي عليها بدون شورها عند مطوع يعرفه ...
بس لا ماني رجال لو تزوجتها غصب عنها ..
انا بتزوجها ومن ورى خشمها بس برضاها ..
طلعت من غرفتي بعد ماعفت النوم .. باقي على الفطور ساعتين ماعندي شي اسويه فيه لو مارقدت ..
نزلت تحت ولقيت امي جالسه تخربط مع رئيسة الخدامات ...
خلف :يمه تعالي هنا ابيك ..
جلست بالصاله الجانبيه حقت التلفزيون وجت امي وجلست وهي تنافخ ..
خلف :كل مادخلت البيت وانتي تهذرين معها ..
أم خلف :لازم ارشدها تبغاني اسكت عليها تحوس لي الدنيا ..
خلف :انتي اللي مكبره راسها لو مخليتها مثل خوياتها ..
ام خلف :خلف انت وش فهمك بهالأمور ومن متى تهمك امور البيت ..
خلف :ايييه يايمه العزوبيه خلتني اهتم بأمور الطبخ بعد ..
قالت وكنها عارفه المستخبى ..
ام خلف :العزوبيه ياخلفان ولاكاني ادري عن المدرسه اللي اخذها مسيار ..
اهبووو ماينتخبى عليها شي هذي ..
خلف :يمه لاتهرجين قدام احد عن هالسالفه ..
ام خلف :والله اللي جاب لي علومك يوصلها لغيري ..
خلف :اووف منكم حريم مايندس عنكن شي ..
ام خلف :لامايندس عنا شي .. انت ماخليت بيت بالرياض الا وتزوجت منه ..
خلف :الحمدالله بالحلال وشرع رب العالمين ماتعديت حدوده ..
ام خلف :بس هذا خبال ..
خلف :وش اسوي للحين مالقيت اللي تفهمني ..
ام خلف :اقول اعقل وخل سوالف الشباب الطايش عنك .. ماأنت صغير .. يايمه ابغى اشوف عيالك ..
خلف :اذا لقيت اللي تفهمني ماني جايب عيال من حيا الله وحده بكره ترميهم علي وتروح تزوج ويضيعون عيالي من بعدي ...
ام خلف :انت مسوس ترى ماهو كل الحريم مثل حريم عمك مبارك ..
سحبت يد امي وحبيتها ..
ماتخلت عنا بعد ماتوفى ابوي ومارمتنا تمسكت فينا وتزوجت الرجال اللي حافظ لها على ورثنا ومالعب فيه ...
خلف :والله يايمه كل هالحريم مايسوون ربع اظفرتس .. الله يخليتس لي ...

نهاية الحلقه

عاشقة ديرتها

**Loli.** · 01-08-2011, 10:39 AM

رد: بلا رقيب / لعاشقه ديرتها ، كاملة

الحلقه الخامسه والأربعون

((1))

ضحى

بعد ماطلع من عندي عساف سحبت شنطتي وطلعت منها جوالي تذكرت رساله اللي وصلتني أمس من المديره بس ماكان لي خلق أقراها .. اكيد تسأل عن
الغياب وفاتحه محاضره طويله عريضه عن اهمالي وتسيبي ..
ايش ....؟؟!!!
كانت الحروف تمر قدام عيوني بسرعه ماني مستوعبه اللي فيها ..؟؟!!..
وش اللي تواسيني ومشكلتي كنها مشكلتها
لا أنا اتصورررررررررررررررررت ...
مستحيل هذا الكلام موصحيح .. انا ..
كيف .. وشلون وعساف ........ عساف يدري ..
اكيد هذا تخريف من عندها ...ليه تواسيني وليه تصورت .. وليه تعتبرني وحده من بناتها ..
وليه وألف ليه براسي .. بس صرخة عساف .. طيرت كل اللي باقيلي من عقل .. وش فيه ليه يصرخ ..
حاولت اقوم والتمزق اللي احسه بظهري حاول يعيقني بس الصدمه ماخلت فيني فكرر ... دخلت المطبخ وأنا اتسند على الجدار .. شفته ماسك شدن ويهزها ..
ليه يهاوشها وش سوت هي ..
عساف :قسم بالله لو شفتك داخله المطبخ مره ثانيه لأسويك بالفرن ..
شدن :لتصرخ انتي اللي خوفتني وخليتني اطيح ...
كان يسحبها مع طرف القميص اللي لابسته بيطلعها من المطبخ ..
ضحى :وش فيه ..
مأدري كنت اسأله عن شدن أو عن الرساله او عن مين ...
كان يصرخ يتكلم يحرك يديه قدام وجهي بس ماني مستوعبه شي وأخر شي فهمته صوت باب المدخل ينقفل وراه ..
وشدن تقول لي .. انه هو اللي خوفها وهي مالها ذنب ...
صرخه هي اللي طلعت مني ..
او أعتراض ...
جمدت شدن وصيحت نوره ولمت كل البيت علي ..
ضحى :مستحي ل ...
كنت اهز راسي بلا انفي هالشي انا ...
في احد بينك وبينه عداوه
في احد بينك وبينه عداوه
في احد بينك وبينه عداوه
في احد بينك وبينه عداوه ..
,,, وزوجك اشتكى والمدرسه بتسوي تحقيق لين توصل للفاعله ... وو.. وو.. وو
كلام مايعنيها .. هي تصورت وعساف يدري كل هالوقت يدري وماخبرها يعاملها مثل الغبيه ..
ليش سكتت يوم سألها مابقت تسأله .. ماكانت تدري .. ماتصورت بعد سؤاله كل هالمصيبه ..
يعني صورها انتشرت الناس تشوفها
هي اللي ماتخلي احد يشوف طرف اظفرها كل الناس اللي يسوى واللي مايسوى تشوفها وتكلم عنها ..
وليش وعشان ايش ...
حقيرررررر اللي سواها حقيررررررر
بتخنقه بيديها عمرها ماراح تسامحه
بتقتله ايه بتقتله وبتقتل أي احد يتكلم عنها
هي حافظة على نفسها خافت ربها وطاعته .. وماخانت عهد ..
وانسانه شرذمه حثاله ماتخاف ربها فظحت سترها .. الله لايوفقها ولايسمحها ربي حسيبها يوم القيامه ...
ماكانت تدري انها تهز راسها .. لين وصلتها صرخت عدم صبر من سارا ..

((2))

سارا

روعتني الصرخه كانت من ضحى اعرف صوتها .. انهبلت نطيت من فراشي مفزوعه قلبي احسه تحرك من مكانه من الروعه .. مأدري كيف كنت امشي ووصلت تحت .. ضحى مريضه ليش تصرخ أكيد صار لها شي .. تصورتها يوم طاحت علينا وهي تلوى على سجادتها تصورت معاناتها تكرر مره ثانيه ..
كل شي كل شي فكرت فيه الا أني القاها واقفه كذا صح كانت وقفتها منحنيه ويد متسندها فيه على الجدار قدام المطبخ ويد على ظهرها بس بعد ماكانت احسها تألم
كانت تفكرررر وسرررحانه بعالم ثاني .. وانا كنت ارجف من روعة صرختها ناديتها هزيتها ماردت علي الا بعد ماصرخت
سارا :ضحى وش فيك ...
ناظرت فيني ووجها ماكان طبيعي .. شفايفها كانت ترتجف كأنها بتبكي .. وبكت ..دموعها تنزل.. ضحى تبكي..وصوتها مخنوق ومرتجف وفيه قهررر ..
ضحى :ليش انا وش سويت ... انا حافظت على نفسي .. ماسمحت لأحد يغلط علي ولايفكر فيني غلط ....
ليش يسووون فيني كذا .. ليش يبغون يذبحوني .. انا وش سويت لهم ... بحياتي كلها ماغلطت على أحد ...
وش سويت عشان استحق هذا ليش الناس دايم تبغى تحطمني .. ليش الكل ماسك له سكين ويطعن فيني
.. ابوي .. امي .. زوجي .. خواتي .. الناس اللي برى ...
ليش كل اللي حولي ..يبغون يقضون علي ...
ايه انا ضحى .. ايه انا عنيده وظالمه وحقيرررره واحب احطمكم ..
بس أنا انسان .. اشعر بظلم مثلكم .. انطعن وأتألم وانحرق من تصرفاتكم ..
أنا ماأكرهكم ليه تكرهوني .. انا مثلكم بشر.. مثلكم .. انا مثلكم ...
لاتكفين ضحى لاتبكي ليش تقولين كذا .. انا ماأبغاك تبكين .. كنت بتكلم بقولها لاتسوي كذا بحلف على المصحف
اني احبها ومستحيل اذيها .. ورب السماء كنت بسوي كذا .. بس فجأه دخلت هند مأدري من وين وهي تقول ...
هند :الحقوا شهد هربت ....
شفت ضحى تشهق بأنفجاع وترفع راسها للسماء ..قسم كنت اشوفها تتشهد والله تتشهد ...
وطاحت على الأرض ...
كذا مثل أي حاجه جامده ترمينها على الأرض وتطيح ...
مسكتها أنا ونوف اللي كانت تبكي وتقول اكرهكم ليه ذبحتم أمي ....

((3))

ميشو

بسرعه مضت الأيام .. خرجت من المركز الطبي منتشيه بعد العمليه التجميليه لقد بدوت رائعه .. ليس كثيرا ..
وليس أفضل من قبل .. ولكن يبدو شكلي جيدا ..ولن تتعرف علي والدة فهدي ولاحتى اخواته وقريباته وسوسو منهن
ولكنها بالتأكيد تعرفني لأني اخبرتها ولكن من غير ذالك ماكانت لتعرفني ...
شعري .. اشعر بالألم من اجله فقد قصصت الكثير منه حتى اصبح قصير جدا يلامس اكتافي وصبغته بلون أخر جميل .. بدوت فيه شقراء فاتنه .. وارتديت عدسات ملونه جديده فأصبح لون عيناي بني فقط لا غير ..
لم أعرف نفسي حينما وقفت أمام المراءه ...ريدا كادت تجن حينما رأتني
لن انسى كيف انفتحت عيناها بذهول ماحييت ...
اممم لم ابت ليلتي من فرط السعاده والقليل من الحيره وتردد كيف سأبدا باغواء فهدي ...
امممممم تبدون محتارين رغم اني رددت الخطه على مسامعكم الاف المرات .. ماذا سأفعل .. انا اكره والدي .. احقد عليه .. منذ كنت طفله صغيره.. بدأ هذا الكره .. والغيره ..
كنت اسمع والدي وهو يخبر جدتي كيف سيتزوج باشا ارملت ابن عمه ووالدة خلف ..
لكي يحميها ويحمي ابناء ابن عمه من الضياع ..فهو لايرضا ان يحدث لهم ذلك .. ولكن ماذا عن نحن ابناءه لماذا
يرغب بالتخلي عنا ..
لقدأخبر جدتي انه سينتقل للعيش بالمنطقه الشرقيه ليسكن هناك حيث أموال وتجارة ابن عمه ..
بالأضافه لأرملته وابناءه ...
سيبتعد عنا من أجلهم هذا مافهمه عقلي الصغير يومها .. رغم انا والدي كان بعيد جدا عنا ولم اشعر بأبوته ابدا ولكنه
كان يعيش معنا في نفس المنزل ..
ننام كل مساء تحت سقف واحد .. رغم تعدد زوجاته والضياع الذي كنت اشعر به
كلما دخلت منزلنا امراءه جديده بصفتها زوجة أبي وخالتي ولكن كنت اشعر بالأمان ايضا فهناك والدي جدتي وأخواتي من حولي
.. كان دائما مايردد والدي انه يريد ابن ذكر ..
ولكن ذالك الموضوع لم يكن يأرقني كثيرا فوالدي سيبقى يتزوج
حتى ينجب ابنه الذكر ولكنه معنا لن يبتعد .. حتى ذلك اليوم الذي أخبر فيه جدتي بأنه سيبتعد من أجل والدة خلف ...
كرهتها .. وكرهة والدي .. وكرهة خلف وشقيقته ..
أجل كرهتهم كره صغير كبر مع الأيام .. والدي أصبح لايزورنا أبدا فقط زياره واحده بعد بضع شهور ..
حتى بدأ يختفي كليا من حياتنا وبعد سقوط جدتي ماقبل الأخير ..
بعدها لم يزرنا ابدا .. حتى عاد بالفتره الأخيره ..
كل تلك السنوات زرعت في قلبي حقد دفين ونيران متقده .. لن تطفئه مياه الأرض كلها ...
أمقت والدي واتمنى ان يعود ليطلب الصفح مني ومن أخواتي .. شعور رافقني سنوات عمري ..
وحلم اغفو كل ليله على أمل ان يتحقق نهار الغد .. حتى بات هذا الحلم ..
مستحيل لن يتحقق .. فشحنت كل مافي قلبي من كره وحقد ورغبه بتحقيق حلمي .. وقررت الأنتقام ..
رسمت الخطط تلو الخطط ..وقبلها بنيت الحلم كيف سيأتيني ذليلا يطلب صفحي ...
كانت خطط بعضها عشوائي والأخر محبوك يحقق غايته بطريقه جميله ..
وبعد تلك المحاولات .. ومع سنوات من مصاحبة سوسو .. التي رسمت الخطط للأطاحه بها وكسبها صديقه لي .. ماأن علمت أنها تدرس بنفس جامعتي بعد انتقالهم للرياض وبالفعل حققت غايتي وكسبت صحبتها ..
صاحبتها من أجل اتعرف على عائلة والدي التي سأنتقهم منه من خلالها ..
وبعد العديد من الخطط والنجاح والفشل توصلت لخطتي ولكن بعد ان اضعت بعض اوراقي ..
اوراقي التي اضعتها لعبتي الأولى مع خلف .. حينما اسميته فهدي .. فلولا معرفته لي ..
لمافعلت كل هذا وغيرت من شكلي ..
ولكن كان درس لي حتى لأعبث بلا هدف واضح ..
واللان لماذا عملية التجميل وتغيير للأسم ..
شكل ميشو واسمها لم يعد ينفعان .. فيجب ان اصبح صوره جديده وابنه جديده للمبارك الذي مع كثرة بناته لن يعلم انه ليس هناك مشاعل وريما وانهما شخصيه واحده ...
سأتزوج خلف ومن خلاله انتقم من مبارك سأجعل خلف يعقه .. يأذيه .. يكرهه يأخذه من أمواله ويرميه في دار للعجزه ..وكذالك يفعل بوالدته ...
أنا واثقه من دهائي وخبثي ومكري .. وأعلم اني بأذن الله سأفعل ذلك ..
ولكن كان هناك عائق أمامي .. سهل وصعب ..
كيف سيعرفني خلف حتى يطلب الزواج مني ...
تبرعت سوسو التي ظنت اني مغرمه متيمه بشقيقها وأفعل كل ذلك
لأصل إليه لأنه لن يتزوجني بعد ان رفضته حسب تفكيرها ..
اشفق عليها لأنها لاتعلم ان خلف سيزحف على ركبتيه ليترجاني لوطلبت منه ذالك شرطا لقبولي الزواج به ... أخبرتني انها تستطيع ان تقنعه بزواج من ريما شقيقة مشاعل
لكي يكسر غرور مشاعل فقط يتزوجها لمده قصيره ثم يطلقها .. ويستطيع بعد ذلك الزواج من مشاعل لو أراد ....
واضافت ايضا ان اقناع خلف بالزواج اسهل من أقناع طفل بشرب حليب بنكهته المفضله ...
لما اغير شكلي .. خلف لايعرفني اعلم لم يراني من قبل متأكده من ذالك .. ولكن والدته وقريباته يعرفنني وكذالك مالك القذر .... لما اغير اسمي .. حتى بعدما احقق انتقامي انتهي من الوجود .. سأنهي شخصية ريما وأعود مشاعل
سأعود لشكلي القديم وأسمي القديم ولن يجد خلف ريما أبدا ليقتص منها ...

اخبرتني سوسو قبل دخولي المركز الطبي بيوم واحد فقط بأن خلف على وشك الأقتناع بفكرة الزواج من ريما ..
وايضا اخبرتني بامر أغضبني كثيرا وافقدني بهجة الأنتصار التي شعرت بها .. لقد أخبرها انه ربما يتزوج ريما
مسيار .. لأنه لايستطيع ان يتزوجها بعد عودته من شهر العسل مباشر مع وديان ...

بلا رقيب / لعاشقه ديرتها ، كاملة

تعليق

تعليق

تعليق

تعليق

تعليق

تعليق

تعليق

تعليق

تعليق

تعليق

google Ad Widget