بلا رقيب / لعاشقه ديرتها ، كاملة

**Loli.** · 01-08-2011, 10:41 AM

رد: بلا رقيب / لعاشقه ديرتها ، كاملة

أجل تزوجها لاتجبروني على الحديث أكثر وحضرت ذالك الزفاف بقهر لامثيل له ولكني سعدت كثيرا ورقصت ايضا
أجل اعلم اني متناقضه ولكن وجود كراميل وريدا في تلك الليله معي انعش روحي واشعرني بسعاده فلم أكن
أشعر بأني وحيده منبوذه كعادتي حينما احضر المناسبات التي تدعوني إليها سعاد ...
وكنت محط انظار الكثيرين وشعرت ببهجه شديده حينما تعمدتا ريدا وكراميل طلب اغنيه خاصه لأرقص عليها ..
وكانت كلماتها رائعه توحي بعبارات هجر وأنتقام وخذلان رجل ما لفتاة .. ومن سيكون هذا الرجل ..سوى فارس الحفل الأول وعريسه ..

لم أعد أدخل منزلنا سوى لنوم فكثير من المشاكل التي يمر بها ترهق تفكيري وأنا احتاج كل تركيزي .. لأحقق انتقامي
فأصبحت لأشارك ابدا بتلك المناوشات التي تحدث داخله وابتعدت اكثر عن مشاكل أخواتي ...

×××

صحوت على رنين هاتفي المزعج .. لم أرغب بالرد ولكني تذكرت ماخططنا له أنا ووسوسو يوم أمس فرفعت الهاتف بسرعه ولكن الخط كان قد انقطع ..
..لقد اقنعتها بعد جدل طويل ان تعرض على خلف التسجيلات التي قمت بها بمساعدة سوسو التي دست جهاز التسجيل
في هاتف غرفة مالك .. والتي لشدة غبائها لم تكن تعلم لماذا مالك يتصل من هاتف غرفته وليس من هاتفه الجوال ..
بالتأكيد لأنه يحادث فتاة من الخارج وليس من نفس دولته .. ولكن هذا ابدا لن يستوعبه عقل سوسو الأخرق ...
أجل ستعرض على خلف محادثات مالك مع عشيقته وديان .. ولن يكن لدى خلف القليل من الوقت ليكفر فيه
ان تلك الفتاة ليست زوجته .. فهو سيشتاط غاضبا ..
وينفعل ويصرخ ويكسر عنق اخيه وربما عنق زوجته ايضا وبعدها
ربما سيفكر قليلا ولن يجديه التفكير لأنه لايوجد اثبات لبراءة مالك حتى يتحدث وخلف لن يعطيه ابدا الفرصه ليتحدث ...
وكذالك زوجته لن يكون امامها فرصه لتثبت برائتها فخلف بنظره جميع النساء خائنات .. الم يكن
الفضل لي بترسيخ ذالك المفهوم في رأسه من خلالي ومن خلال الريم حبيبته الأولى ...
وحتى لو انكشفت الخيوط سيقع اللوم على رأس سعاد .. التي لن تفضح ابدا سرنا الصغير فهي تعلم
انه ربما يشفع لها ولكن انا لن يشفع لي ابدا ... وقلبها الطيب سيجعلها تضحي بروحها من أجلي ..
ألست أنا شقيقتها التي لم تنجب والدتها كم اصبحت تكررعلي بالفتره الأخيره ..
أجبت بسرعه قبل ان ينقطع الخط للمره الثانيه ...
وصلني صوتها وكأنه يحتضر ..
سوسو :خنقني كان بيذبحني ..
كلا يألهي هل فشل مخططي للمره الثانيه ..
لأعلم كيف خرجت مني الكلمات فقدت تصورت خلف امامي وهو غاضب سيكسر عنقي ..ياألهي ..
ميشو :سوسو أين انتي ماذا حدث ...
ثواني فقط ابتلعت فيها ريقها ثم انهدر الحديث من لسانها كالسيل المنهمر ..
سوسو :ميشو بموووت .. ياويلي بيذبح مالك ..كسر المسجله وخنقني انا هربت كان بيلحقني زي المجنون والله اناسويت كذا لأنه اخوي
مالك خانه وش اسوي اسكت عنه .. بس خلف اخوي ومالك ماهو اخوي ... ميشو حنا تهورنا ليش سوينا كذا لوقلناها بطريقه ثانيه احسن
ياويلي امي لودرت بتقتلني ترجيته مايعلمها قبل ماأقول له بس هي سمعت صراخه وشافته وهو يخنقني يعني بتعرف اني انا اللي فضحت مالك هي تحبه والله ماتسامحني ميشو ساعديني وش اسوي ....
يألهي كم اشعر بالأرتياح ..كدت اجن حينما فكرت ان خلف كشف خطتنا ...
كنت سأتحدث ولكن صوت الطلق الناري اللذي وصلني عبر الجوال الجم لساني ..
ميشو :سوسو ماذا هناك ..؟!!
صرخت سوسو بهستريا :قتله اكيد ... قتله ...

((4))

خلف

كل شي بعيوني تساوى .. اخوي يغدر في .. زوجتي تخوني .. ماكنت اشوف شي ولا اسمع شي .. ناس تمسك فيني
ناس تصارخ تبغى توقفني عن اللي أسويه ... يبغوني أهدأ اسمعهم ..اعلمهم وش اللي فيني ..اصلا ماهمني شي بهالدنيا ..ومحد موقفني
السلاح بيدي وهي قدامي ... والله لو يوقف بيني وبينها ابليس مافكيتها ذابحها .. ذابحها ...
صوبت السلاح عليها ..
خلف :تخونيني يال **** مع أخوي قليل المروه ..
ماكنت اصارخ ولا اصايح مثل عادتي يمكن تعودت على الخيانه ويمكن ذبحي لهم مريحني قبل ماأبدأ فيه ..
حطيت الرصاصه بقلبها ..
زفيت اللي كانوا بطريقي ونزلت ركض للملحق اللي يرقد فيه ...
كنت احس بالناس اللي تسحبني بس مأأدري من هم ولاهموني امي ..جدتي .. بنت ابليس .. بوصله وبذبحه ومحد فاكه مني ..اليوم بدفنه بقبره ..
دخلت عليه بالمجلس ..وهو قايم مايدري وش السالفه ..
خلف :تخوني تخون أخوك ياقليل المروه ضاقن عليك الحريم ... مابقى الا مرتي ...
كنت رافع السلاح بذبحه .. حاطها بقلبه ... بس صراخ عمي مبارررك اللي مأدري من وين طلع عماني
جاء ووقف بيني وبين وولده ....
مبارك :خلف تكفى ياولدي نزل السلاح هذا أخوك وش اللي قاعد تقوله عنه ماهو مسوي اللي تقول هذا كلام عذال بيفرق بينكم ... مالك اخوووك مايخووونك لو ايش ... ياولدي عشاني أنا ابوك اللي ربيتك تكفى لاتخلي الشيطان يعمي
عينك لاتذبح ووولدي ...
تكفي خلف لاتحرمني منه ومنك ..تعوذ من شيطان وأنا ابوك ...
كان يتوسلني يترجاني ... ودموووعه نززلت ....
بس أنا ماسمع كلامه ولاأبي اسمعه .. اكيد ولده بيدافع عنه بس أنا مايريح قلبي الا ذبح الخاين ...
نار شابه وسط قلبي .. والشياطين تناقز قدام عيني ...
حلفت محد يفكه مني .. وبذبحه يعني بذبحه ..
خلف :عمييي وخررر عنه انا ذابحه ذابحه .. وذابح نفسي وراه .. بس وخررررر ..
صرخت امي وبدون قصد لفيت عليها هجم علي مالك بيأخذ السلاح بس أصبعي كان على الزناد وثارررر ...
دممممممم لا
يموووت لا
لاتموووت أخر كلمه استوعبها قبل مايغيب فالظلام ...

**Loli.** · 01-08-2011, 10:45 AM

رد: بلا رقيب / لعاشقه ديرتها ، كاملة

((5))

ماهو مصدق وجوده مع هالأنسان ... ولا مصدق انه جالس بمجلس هالرجال وحاط يده فيده يعقد قرانه على بنته وماهي أي بنت ..
ماحس الا على اخر كلام الشيخ ونظرات الرجال له .. بصوت حس انه طلع من اعماق روحه:قبلت ..

من مات أخوه ماكمل شهر وهوفاضي يتزوج ..هذي نظرت الكل له وكلمه بيقولها كثيرين ..
بس هو ماهمه الناس كل همه أمه
.. من قالت له منيره ان فيه شي واحد
يقدر يسويه ممكن يطلع أمه من اللي هي فيه .. ماصدق خبر .. كان ينتظر بس وش هالشي عشان ينفذه ولو كان قايله
له ترمي نفسك بالنار عشان أمه ماقال لا .. وش تجي صحة أمه عند زواج ..
يتزوج دام بأستطاعته .. كان عارف أن ابوها مستحيل يقول لا ..
بس ماتوقع هالموافقه منها ومن أختها .. كيف ..؟! ..
الشيخ اخذ موافقتها سمعها تقول موافقه .. معقوله .. يمكن وحده من خواتها ردت عنها ..
ويمكن هي ترضى فيه .. أكيد انجن عشان يفكر كذا .. بس لو وحده من خواتها يعني تلاعب .. لاماهي معقوله الطريقه اللي يفكر فيها ..
متى يطلع من هنا ويروح يبشر أمه ..
معقوله بترضى عليه بترد عليه لو كلمها .. ولابتكرر كلمتها اللي صار بالفتره الأخيره ماعلى لسانها الاهي قلت لك لاتخلي أخوك .. تذبحه هالكلمه ..قاسيه على قلبه المعذب ..
هو موقادر يعيش من عذاب ضميره وكلام أمه يذبح روحه ..
يعني لو فكر ان هذي بتكون نهاية اخوه كان تخلى عنه ...لا هو الغلطان من البدايه ليش ماوقف له يوم سلك ذاك
الطريق .. ليه مامسك بيده ورجع للطريق الصحيح .. بس هو وقف يتفرج على أخوه وهويضيع
يوم ورى يوم وسنه ورى سنه .. لين صار رجوعه مافيه أمل منه ..
حس بمنير اللي جالس جنبه يهز يده ..
انحني عليه
قيس :نعم ..
منير :خلنا نرجع البيت .. امي لحالها هناك ..
أول مافكر ان امه وحيده بالبيت قام بسرعه وماعبر نظرات الرياجيل المستغربه وهو يستأذن قبل العشاء حتى ..
وهو يمشون المسافه الصغيره بين بيت جيرانهم وبيتهم ..
منير :ومتى الزواج ..
قيس :متى ماقالت أمي ..
منير :وسارا ..
لف عليه بطفش وهو يفتح باب البيت ..
قيس :وش فيها ..
منير :بتعيش معنا ..
قيس :لامع الجيران ..
رد عليه منير بتريقه ..
منير:اكيد مع الجيران لأنهم أهلها ..
ماعبر منير وراح مباشره لغرفة أمه ..
دخل عليها لقاها على فراشها منسدحه وتسبح بصوت عالي ..
قيس :يممه ..
وجاء جلس قدامها ..قالها وهو يبوس يدها ..
قيس :يمه ملكت على ساره ..
ناظرت امها ودمعه بعينها ..
ام كايد :اخوك كان يبغى اختها ..
قيس :يمه جابر خلاص تزوج ..
ام كايد :مهو جابر .. كايد ..
قام بسرعه من قدامها .. خلاص مايبغى يسمع اكثر كفايه عليه ضغوط اليوم ..
صادف منير اللي داخل ومعه صينيه عليها أكل لأمه ..
قيس وهو يحط سيجاره بفمه :أجلس عندها .. لاتخليها لين ترجع منير ..
.. اول ماحرك سيارته تذكر شي فتح الدرج اللي قدام .. شنطتها .. شنطة شوشو نستها بالتاكسي يوم خطفها ..
ههههههههه يحبها ويتزوج اختها ياهي دنيا ..

((6))

وعد

حالة بيتنا ضياع تعرفوا وش معنا ضياع ... اه انحسدنا ... كنا نحب بعض قلوبنا على بعض .. واللحين مانجلس بمكان واحد .. بس انا مقابله نوف ونوف مقابلتني ..
شوق طول عمرها مشغوله بمطبخها .. وهند البارده تتابع مسلسلات وترقد .. وتبكي اذا مالقت شمبو تغسل فيه شعرها اللي أحس انها تحبه اكثر منا ....
أشياء كثيره تغيرت بحياتنا .. ماتوقعونها .. تصورون ان ضحى صارت ماتجينا الا بالأسبوعين مرره ...
وسارا وملاك مايجلسن معها أبد .. بعد ماجبرت سارا تزوج قيس كلنا كرهناها وحقدنا عليها يعني مو كره كره .. لا بس أنا اخذت منها موقف .. للحين اتذكرها يوم تصرخ على سارا اللي مصدومه من طلبها وتضحك تحسبها تمزح معها
كانت تقولها اذا مارحتي وقلتي للشيخ انك موافقه تتزوجين قيس ماني اختك ولاتعرفينها .. انا كنت بنجن يوم اسمعها تقول لسارا كذا كيف هي ..
اصلا ليش تطلب منها توافق انجنت هي بعدين ليش قيس يخطب سارا غبي هو وش يبي منها .. مو يكرها ويظربها ووده يقتلها .. طيب ليش .. وللحين بعد ماملكوا من ثلاث شهور ماني عارفه ليش تزوجها ...
والشي هذا بيجنني .. واللي يقهر اكثر منيررر ماعاد يجينا حتى لما اشوفه صدفه طالع من بيتهم وأناديه مايرد علي ينزل راسه ويكمل طريقه وكأنه مايشوفني .. ونوف بعد ماسوى معنا كذا ماعاد تكلم عنه وتهاوشني اذا تكلمت عنه قدامها ...
بس أنا ماأعرف اسوي مثلها .. انا ابغى نرجع مع بعض مثل قبل ليش الناس كلها تغيرت كذا .. ولا المجنونه ميشو بس تمشي وتردد غيرت من شكلي لأنتقم منه ولكنه مات
لما يراني حتى ليعرفني او لا .. لم اذيقه المرررر كما تمنيت .. لم يتوسلني حتى اصفح عنه كما خططت .. شفتوا كيف من كثر ماتردده حفظته ..واذا مالقت احد يسمعها
مسكت روبي وجلست تخربط عليها .. الحمدالله انها ماهي ولد وتطلع فالشارع ولافضحتنا ..
والعله اللي ماتنسمي شهدووه راحت مع أمي ايه راحت معها دقت عليها وقالت انها تبغى تسكن معها وذيك ماصدقت خبررررر اوووف منها قلعه تقلعها هي سبب كل البلاوي اول ماطلعت ضحى من المستشفى هربت هي لأمي من دون حتى ماتقول لنا وبسببها كانت ضحى
بتموت للحين اتذكر ذاك اليوم .. كنت اكررره الوقت ذاك اللي كنا فيه غريبين مو حنا .. مصدومين خايفين ..
تعرفون بيت الأشباح .. كان بيتنا كذا ..تصوروا ذاك اليوم جاء الليل وماشغلنا الأنوار من الرعب اللي كنا عايشينه بعد ماطاحت ضحى لأن شهد الحقيره هربت .. كنا فقدنا للأمل نعرف وين شهد
بس بالأخير تنازلت اللي ماتنسمى امي وأتصلت وقالت ان شهد عندها وأن شهد هي اللي اتصلت عليها وقالت لها تجي تأخذها ..
كلنا حسبناها هربت مع واحد من اللي تكلمهم زي بالمسلسلات .. بس الحمدالله انها كانت عند امي ومانزلت راسنا بسواياها ...
سمعت الخبله نوف تكلم بس مافهمت كلامها ..
وعد :ووش ..؟!
نوف :اووف حتى انتي صرتي تسرحين ..
وعد :وش فيك يالخبله ..؟!
نوف :مافي شي بس مليت من هالحكره مانقدر نطلع ولاندخل مثل قبل وضحى ماتجي تطلعنا ..
وعد :عادي المفروض تعودي خليك مثل خواتك الضبان متأقلمات ومايطلعن من غرفتهن ..
نوف :تصدقين يقهرررني اكررهن ..
وعد :حماره حرام عليك ليش تقولين عنهن كذا
نوف :ليش يعاملن ضحى كذا .. ضحى مثل أمهن المفروض مهما سوت مايضايقنها .. هن سبب ابتعادها عنا .. بكره تصير ماتجينا ابد ..
وعد :اللحين بكره عيد
نوف :يقولون
وعد :احس ماني فرحانه قبل ليلة العيد ماأرقد من الفرحه احس اني مهمومه ..
كنت بقول اول مره يمر عيد ومأشوف منير بس خفت تهاوشني لاصح حتى بعيد الفطر ماشفت منير بس بذيك الأيام كنت مصدومه بالظروف اللي حنا فيها ومافكرت بمنير ..
نوف :أي تصدقين ودي اطلع والعب بالطرطعان بالشارع ..
وعد :تونا جايين من الحوش ولاعبين ..
نوف :تقارنين الشارع بالحوش .. امانه ماتنقهرين يوم تسمعين صوات الصراخ والهيصه اللي جاي من برى وأنا وانتي مقابلات بعض ...
قلت شي كنت متردده أقوله عشان ماتضحك مني نوف .. بس بقوله وأمري لله ..
وعد :نوف انا ماأبغى اطلع برى اخاف يصوروني مثل ضحى ...
حسيت وجه نوف تغيير وماضحكت مثل ماتوقعت ..
نوف :اووف اسكتي ماأحب هالسالفه ..
وعد :انا اقولك عشان موكل مره تكررين على راسي نفس الكلام ..ونسيت وش اتفقنا عليه موقلنا
بنصير محترمات ونصلي الصلاه بوقتها ونتغطى زين مو لثام مثل ملاك وسارا ... ونلبس قفازات .. وشربات رجلين .
نوف :ايه لاتجلسين تكررين على راسي هالسالفه كأنك تمنين على أحد ..
وعد :انتي خبله ما ئمن .. بس بذكرك ..
نوف :طيب طيب اذكر ..
وعد :عشان نصير مثل ضحى .. وتفخر فينا ..
نوف :عارفه ترى انا اللي قايله لك هالكلام ..
طالعتها بنظره اعرفها تموت من القهر لاسويتها ..وقلت الجمله اللي اشوف لقلتها بعيونها رمز الخطر ..
وعد :صدق انك بزر ..

((7))

ملاك

طلعت من غرفتنا وانا قرفانه من الملل اللي احس فيه .. وصلت الصاله سمعت وعد ونوف يسولفن فيها ماكان لي خلقهن بيجلس يرجني بكره عيد وبكره عيد .. بس طفش سارا دخلت تسبح وانا بقيت لحالي .. اروح اجلس مع الخبلات احسن لي
...
نوف :قسم بالله لو سمعتك تقولين الكلمه هذي ..
قاطعتها وعد ..
وعد :أذبحك عارفه ..خخخخ فرصه اذبحيني بكره خروف العيد ..
نوف :ايه صح ضحى تقول بيذبحون اضحيه وووناسه ..
قلت وأنا اجلس وأخذ الريموت من يدها ..
ملاك :أيه صاروا بيذبحون .. باعتنا واشترته ..
نوف :اووووووووف ..
وعد :انتي لو سمحتي مية مره قلنا لك لاتكلمين عن ضحى كذا .. ولانوف بتذبحك واتسوي منك خروف العيد ...
ياسخفها هالبزر ..وععع انا مأدري كيف طول عمري كنت متحملتها ...
ملاك :اقول ابلعي النعمه واسكتي ..احسن لك ..
نوف :يعني وش بتسوين لها اذا ماسكتت ...
اوووف انا اصلا مجنونه اللي اجلس عندهن قمت بعد مارميت عليهن كم كلمه رفعت فيها ضغطهن ورجعت غرفتنا واشوى
كانت سارا طالعه من الحمام وتجفف شعرها بالمنشفه ..سألتني اول مادخلت ..
سارا :وش فيه صوتك طالع بعد ..
ملاك:الحقيرات ذولي ارفعن ضغطي ..
كرهت النظره اللي بعيونها خير ان شاءالله تعاتبني تقهرني بارده وبزياده هاليومين زايد الأدب عليها والأخلاق ..
سارا :ليه تقولي عنهن حقيرات .. حرام عليك ..
ملاك :سارا ماأبغى اتهاوش معك عشان ناس ماتسوى ..
سارا بتبكي :ملاك والله اللي فيني كافيني وانتي بكلامك ذا تعذبيني .. حرام عليك نوف ووعد صاروا حقيرات وناس
ماتسوى ذولي خواتنا صغار بحاجه لنا .. كفايه اللي ضاع علينا .. بنضيعهم بعد ...
ملاك :سارا افهمي ذولي كانن خواتنا بس هم ...
قاطعتني بصوت قوي ..
سارا :هم ايش ملاك وش اللي تغير مو عشان واحد ...
ملاك :كمليها حقير ليش سكتي .. غلطتي اني خبرتك بسري .. ايه عشان واحد حقير .. الواحد الحقير .. هذا عطاني درس بالحياه ..بحياتي كله ماراح انساه ...
سارا :بس انسي خلاص .. والله مايسوى تخربين علاقتك بخواتك عشانه ..
عطيتها ظهري عشان ماأحن عليها وأسكت لشفت ملامح وجهها الضعيفه ..
ملاك :خواتي .. هن اللي باعني وباعنك ..نسيتي وش سوت فيك ضحى .. هي اللي بدت تهددك بأخوتها وكأنك محتاجه
لها .. تمن عليك باللي سوته لك طول حياتها ..
جت ووقفت قدامي صديت بوجهي عنها..
سارا:سووت لي أنا مو لك وضحى أنا عاذرتها صح اخذت منها موقف يومها والى اللان وماني مستوعبه انها سوت فيني
كذا ... بس بعد اللي مرت فيه ماهو بهين وكل اللي مريت فيه وممكن امر فيه مايجي ربع اللي هي شافته...
صرخت فيها احسها ماهي مستوعبه حجم الكارثه والمصيبه اللي هي فيها ...
ملاك :انتي غبيه ولاتستغبين ... مافيه شي اهو من مصيبتك تعرفين وش معنى تزوجتي قيس ...
بكره يجي يقول بنسوي عرس ولا يقول بيأخذك بدون عرس بعد .. كيف بتحملين تجلسين معه بمكان واحد وينتقفل عليكم باب واحد .. انتي والوحش بس ..
رمت علي نظره خاويه ..

**Loli.** · 01-08-2011, 11:19 AM

رد: بلا رقيب / لعاشقه ديرتها ، كاملة

سارا :على الأقل هوني علي .. انا عارفه الحقيقه ماني مغفله ولابزر ضعيفه ماني فاهمه وش اللي يدور حولي ..
وبعدين يعني وش بيصير .. اقسى معاناتي اني بعيش معه بمكان واحد .. وش اخطر شي ممكن يصير يقتلني عادي امووت .. تنتهي حياتي .. مافيه شي يروع لهدرجه ...
ملاك :سارا لاتقولين كذا بعيد الشر عنك ...
نفخت علي وهي تنام على فراشها ..
سارا :ماتسمعين نفسك .. خلاص تزوجت الوحش اذبح نفسي عشان ترتاحين كل يوم تعيدين لي بنفس الأسطوانه
كأني انا اللي جالسه ابكي عندكم اقول بتزوجه ...
مأدري وش اللي يضحك بجملتها وخلاني اضحك ... هههههههههههههههههه هههههه ههه .. من زمان ماضحكت
جلست اضحك واضحك واضحك ... لين حسيت الدنيا كلها سمعت ضحكتي ...
بعد ماسكت جلست فتره مبتسمه لفيت على سارا بقولها شي لقيت بسابع طعش نومه ..
سحبت اللحاف وغطيتها كانت توها متحممه وشعرها مبلول يمكن تمرض عاد بكره عيد مو كأني مصدقه عمري عيد وعيد ...
أي بس مأدري بدية اتفأل احس انه بكره بيكون غير عن الشهرين اللي راحو ..
وععع ياهم صدق كانوا قرف .. معاناه بقلب ..
احس اللي جالس يصير معنا ماينتصدق ..
ضحى تنصوروتبتعد عنا .. ميشو تنهبل .. وسارا تزوج قيس .. وشهد تهرب من البيت
كل شي تغير ومابقى مثل قبل ...
كنا وين وصرنا وين سبحانه مغير الأحوال من حال لحال ..
حتى سارا صارت غير وانا غيررر ...
قبل نضحك ونفرفش وبس نكت كنا سعيدين بالنا خالي ...
ماحنا حاسبين لدينا حساب ...
مرتاحين وعايشين حياتنا وأكبر مصيبه ممكن تصير لنا وحده منا تزعل من الثانيه ..
يعني لعب بزران ...

((8))

ضحى

قفلت الكتاب اللي كنت اقرأ فيه وحاولت اعتدل بجلستي بس اه .. ظهري كان بينكسر .. كان فيه مخده على الأرض حاولت انحني بأخذها بس ماقدرت اوووف من هالبطن حشى لو حامل بثلاثه .. استغفرالله العظيم .. ريحت على المخده اللي وراي .. وأنا الهث كأني قاطعه ميل ركض ..
اخخخ احس وزني زاد من جلست البيت .. قبل اوقف نص اليوم على رجلي مابين الشرح بالمدرسه وتقضيت اشغال البيت وماحسيت بكل هالتعب ..
والسهر ماكنت اعرفه انام قبل ماتجي الساعه تسع واصحي مع الفجر .. واللحين ماأنام الا الفجر .. وماصحي الا نص العصر ..
عمري مافكرت اني بكون كذا ..
حسيت بحاجه تسحب طرف روبي .. نزلت راسي لتحت لقيت نوره تطالعيني بعيون ناعسه ..
بصعوبه شلتها وجلستها على رجلي وأنا اسألها...
ضحى :وش مصحيك ..
نوره :تووها ..اليد ثندوتشه ..
ضحى :تووها .. طيب قولي ماما ..
فتحت عيونها الخضراء بقوه ثم صغرتها .. يمه ينخاف منها ..
ضحى :قولي ماما ولامافيه ثندوتشه ..
:غصب تكونين أمها ..
اوووف هذا من وين طلع ..
ضحى :ايه غصب هي التربيه ببلاش .. ماطلبت غير تقول ماما .. ولاتظرب ..
عساف :انا اللحين ظربتك كل اللي سويته لمست طرف خشمك .. صار ظرب.. والا أنتي من اللي ماينلمسون ..
ضحى :ايه منهم .. وش تبي مارقدت ..
عساف :انتي ليش مشغله اسلحتك الهجوميه ليل نهار ..
حاولت اقوم واشيل نوره معي ..
عساف :ههييي انتي يالخبله نزلي البطه هذي ..
وسحبها مني ..
عساف :مجنونه انتي ..قالوا لك لاتشيلين حاجه ثقيله .. مهبوله انتي موكافيه انك ظاربه بتعليمات الراحه والغذاء بالجدار ..
ضحى :وش باقي كلمة سبه ماقلتها ..
ورحت امشي عنه بسوي لنوره الثندوتشه ..
عساف :خير على وين .. ماأجلس اقول كلمتين على بعض معك الا قمتي ..
رديت وأنا ادخل المطبخ ..
ضحى :الله أكبر مالقيت وقت تقول فيه كلمتين على بعض مأدري من اللي مسبب لي صداع من كثر قرقه ..
عساف :تعالي اكلمك انا .. وش بتسوين بالمطبخ ..
ضحى :عساف لازم يعني بسوي شي يمكن بشرب مويا ..
نزل نوره اللي شايله على طاوله وجلس ..
عساف :لا أنا اعرفك لكنتي بتسوين مخالفه حواجبك توصل نص جبهتك متجهزه ل...
صرخت نوره بنص مقاطعه كلامه ..
نوره :توها ثندوتشه ..
عساف :تووها .. ثوي ثدوتشه ..لاتأكلنا المفجوعه هذي .. معلمتها شدين الصراخ ..
سويت لنوره السندويتش يوم جيت اعطيها السندويتش .. خطفها المتوحش ..
ضحى :هييي هاتها حقت نوررره ..
رد وهو يأكلها ..
عساف :ياسلام تسوين لنوره وأنا لا ..
ضحى :أنت متى قلت تبغى ..
عساف :مو لازم اقووول امم حلو الجام اللي وسطها باي نكهه ..
لفيت عنه بعصبيه وجلست اسوي وحده ثانيه بسرعه ..اوووف والله بس سويت سندوتش واحس روحي بتطلع ..اووف
ماصدقت أخلص بسرعه مافكيت السندويتش الا بيد نوره ..
عساف :كل هذا حرص اصلا ماهي حلوه مأعجبتني .. اللي تسوي كاتي أحلى وأطعم وألذ ..
ضحى :والله محد اجبرك تأكلها كان انتظرت لين تصحى كاتي .. وتسوي لك سندوتشه بيدينها الحلوه ..
عساف :طيب سوي نفسي زعلتي جامليني .. حسسيني انك تغارين ..
ضحى :والله الواحد يغار من ناس تسوى مو من كاتي
قال مسوي نفسه مستقيم ..
عساف :استغفري ربك وش فيها كاتي ادميه مثلها مثلك ..
قلت بتعب ..
ضحى :بروح اجلس بالصاله ..
اووف جلست بنفس مكاني اللي قبل وحطيت مخده زياده ورى ظهري ..
جاني وهو شايل نوره اللي تأكل سندوتشها ..
عساف :من صدقك تعبانه لايكون بتولدين ..بتخربين علينا العيد انتي ...
ضحى :تصدق انك ثقيل دم ..
عساف :والبركه بحضرتك خليتني غصب ثقيل دم من كثر ماتكررينها فوق راسي ..
قلت اصرفه ..
ضحى :رح ارقد بس وراك مشاغل كثيره بكره ..
عساف :ايه وراي خروف اذبحه .. الله يعين اول مره اسويها.. كني بصير عساف ..
وناظر بنظرة يقالي بريئ ..
ضحى :عاد خساره ماطلعت على ولد أخوك السفاح .. يذبح بشر ماهو بهايم ...
انا قلت الكلمه من هنا وارتجف جسمه من هنا .. وبصوت عالي قريب لصراخ قال ..
عساف :ميت مره قلت لاعاد تجيبين طاري هالسالفه ..
ضحى :ليه مو كن اللي مات أبوووووي ..
عساف :الله يرحمه .. وللمره الأخيره اقولك ماعاد ابي هالموضوع ينذكر ببيتي ..
وقام بسرعه للغرفه .. خير ان شاءالله يقاله زعل اللحين ..
مو كأن اللي قلته هو الحق .. ولا اللعين ولد اخوه يذبح أبوي
وتنتهي السالفه لو ماأهل زوجته رفضوا يتنازلون عن حقهم يمديه اللحين عايش مبسوط
بدنيته ولاكأن اللي قتله أنسان .. يتمه وراه فوق العشر بنات..
لاتسع حنا بس تسع .. والعاشره هي اللي أختارت أمها علينا ..
حتى دية أبوي وورثه ماراح ينولنا منها شي .. بس انا اوريه اخونا العزيز اللي مأدري من وين طلع
بيني وبينه المحاكم ...

..نهاية الحلقه ..

تحياتي
عاشقة ديرتها

**Loli.** · 01-08-2011, 11:22 AM

رد: بلا رقيب / لعاشقه ديرتها ، كاملة

الحلقه السادسه والأربعون

[1]

(..ياصباح العيد ..)

سارا

اول ماأذن الفجر قمت من فراشي كنت صاحيه من زمان بسبب كابووس من ضمن الكوابيس اللي تعودت عليها بالفتره الأخيره ..
كنت احاول ماأفكر بهالموضوع عشان ماتجاني الكوابيس لانمت بس ماأقدر غصب عني افكاري تجرني لهالموضوع ..
بداخلي شي يضحك .. والله يضحك على سخافة الموضوع ..كيف ودي افهم كيف تزوجني قيس ..هو اهبل غبي متخلللف .. وش يبغى فيني ..
أكيد تزوجني عشان يطقني اكثر واكثر ومايمنعه شي أنا متأكده من هالشي .. بس هين أنا اوريه حتى انا بأنتقم منه وبظربه ويمكن انفذ فكرة ملاك
وسممه ويموت ولا اذبحه وهو نايم وحده من هالأفكار لازم انفذها .. بتخلص منه ومن الكابووس اللي يلاحقني من يوم كنت صغيره ..
بصير شجاعه واقتل الووحش ..
مجنونه انا مجنوووونه وغبيه كل هذي احلام وأمنيات ماني قادره انفذها .. لسان وتفكيرر غبي هذا أنا ..
كنت دخلت المطبخ وسويت قهوه .. بعدين رجعت توضيت وصليت وصحيت ملاك تصلي ..
دقيت على غرفة وعد ونوف وغرفة شهد وشوق ومشاعل خفت اقرب من غرفتها برسل لها ملاك لنزلت الصراحه مافيني اشوفها ويتنكد يومي من بدايته ..
طلعت بالقهوه للحوش وحطيتها على السجاده وبديت اتقهوى كان فيه نور خفيف والجوو روعه ..
شوي وجتني وعد وهي تقول ..
وعد :غررريبه سارا افندي نازله وبالحوش ...
سارا :ههه غريبه وعد افندي صاحيه بدري ومو يوم دراسه ..
وعد :اصلا انا ماأصحي بدري الا الأيام اللي مافيها دراسه .. ايه على طاري الدراسه مادريتي وش سويت ذاك اليوم تهاوشت مع ابله سمررر لأن معها جوال كاميرا .. وابله عطوف تقول عادي هي معلمه قلت لاحبيبي وش يضمن لي انها ماتصورنا يعني معلمه ملك ماشاءالله ماتخطأ وهوشه طويله عريضه
قلت لها وانا عارفه الجواب ..
سارا :وبالنهايه سمعوا كلامك ..
وعد :طبعا لا طردتني ابله عطوف من الأداره وقالت بتكتبني تعهد اذا رجعت تكلمت بهالموضوع ويمكن تفصلني اسبوع ..
واستمرت سوالف المدرسه وبدوا خواتي يجتمعون بالتدريج لين ماصار فيه احد بالبيت موجالس معنا غير مشاعل ...
وقضينا هالصباح من احلى الصباحات ورحنا وصلينا العيد ...

[2]

(..لم يكن ذنبي ..)

ميشو

كنت ابكي بألم من القيود المؤلمه اللي تحيط بمعصمي وخوف من المصير المجهول .. رايته يتجه للدولاب حيث يحتفظ بسلاحه بالتأكيد سيحضره ليقضي علي كما فعل مع مبارك .. حاولت التخلص من قيودي بيأس وحينما كان الفشل نصيبي
بدأت بالبكاء والصراخ .. حتى استيقضت ووجدت نفسي بفراشي بالمنزل ..
بعيد جدا عن خلف .. كلا ليس ببعيد انا ارى يده كل ليله وهي تطبق على عنقي وعيناه تتوعداني بالويل ...
ميشو :اووه كلا .. خلف اغرب عن وجهي اكرررهك اكرررهك .. بعد عدة دقائق اخذت احدق بوجهي الغريب عني في مراءة الحمام ..
هذا هو الوجه السيء الذي تسبب لي بالمتاعب .. ليتني لم اسعى إليه ولم اسرف أموالي للحصول عليه ..
هذا ماجناه علي انتقامي ... تأوهت بألم وانا استفرغ مابجوفي لاتعلمون ماتسبب لي كلمة انتقام من سقم ..
سعيت لأنتقم منه اقسم اني فعلت ذالك ولكني لم أرغب بموته ..لا لم أريد ذالك فقط اردت الأنتقام ..
اوووه كلا يألهي كفى ياأنتقام ابتعد عني انت تؤلمني .. احشائي تتمزق لم يعد بها ماأخرجه ..
أنا لاذنب لي خلف من قتله ماذنبي انا هو ناكر الجميل الذي قتل والده الذي رباه ..
أجل هذا ماحدث انا لاشأن لي ...
هو المسئول هو الأحمق الذي ارتكب الجريمه ...
انا فقط اوقعت بينه وبين مالك لماأريد منه ان يقتل .. اردت فقط ان يتشاجرا ولابأس من الظرب الشديد المبرح ..
ولكن لا للموت ..
أنا لاأحتمل ان اتسبب بمقتل احد ..
وماذا لوكان هذا الشخص والدي ..
يألهي اغفرلي سوء صنيعي ..
لم اكن اقصد ..
حينما وصلني خبر موته كدت افقد عقلي ... كيف مات.. انا لم انتقم منه بعد لم احقق انجازي واتفوق عليه بعد ان يأتي ذليلا ليطلب مني ومن أخواتي الغفران ..
لم اضع الخطط تلو الخطط حتى يموت وينتهي انتقامي بهذه طريقه شنيعه ..
لقد خسرت .. خسرت أنتقامي ووالدي ..
بدت أخشى الحياه وأخشى ماتحمله لي الأيام ..
سيعلم خلف ماحدث وسيأتي ليدق عنقي وهذا ماأنا باأنتظاره ..

[3]

( .. أحاسيس أنثى ..)

ضحى

نزلت الدرج بحرص بعد مارفض مسيو عساف يعطيني نوره اللي جالسه تفرج عليه وهو يذبح الأضحيه مع شدن ..
عساف :خلاص بجيبها لاتنزلين ..
ضحى :مشكورمابي اتعبك ووخر ايدينك القذره عن اختي ..
عساف :انا يديني قذره اجل شوفي وش بسوي ..
وقبل مايعطيني أي فرصه للتصرف كان واقف قدامي ويحرك اصبعه اللي ملطخ بالدم على خدي ..
ضحى :ياحيوان ..
رفعت يدي لخدي وانا ماني مصدقه ..
قالي بتهديد ..
عساف :هاه وشو ماسمعتك ..
ضحى :ولاشي الله يأخذك ..
تراجعت بعد مامسكت يد نوره وطلعتها معي للداخل البيت .. حسبي الله عليه القذر موكافي مقرفنا بالذبح هنا مأدري
وش هالتفكير الهمجي اللي عنده ..
لاهو بس يبغى ينكد علي لأنه يوم قال فيه ناس يذبحون ضحيتهم في بيتهم تمصخرت عليه ..
بعد ماغسلت وجهي جيت اجلس بكرسيي ..اخخ وش ذا ظهري بينكسر حسبي الله عليك ياعساف ..
هزيت رجلي بقهر ولا يقول بيروح للزفت اللي ذبح ابوي وانا حتى خواتي ماشفتهن ..
عساه يعفن بسجنه ان شاءالله ...
اخخ من توتر ظربة يدي بطرف الكرسي وانكسر اظفري ..
أي ياعساك للعله ياعساف ..
هذا اظفري اللي مضبطته ومتعبه نفسي عليه ..
وش هالسخافه اللي اعيش فيها ولانا ضحى صرت افكر بهالأمور التافه مناكير ومكياج ..
وخرابيط الحريم اللي ماوراهن سالفه ..
وش فيني ماكنت كذا كله من جلست البيت اللي خنقتني ..
لا لتغيرين الحقائق ياضحى صح جلست البيت لها دورها بس بعد عساف له دوره ..
أي الحقير يقهرني يوم يجلس يمدح بالحريم اللي يطلعن بالتلفزيون
وانا زي التافهات انقهر واجلس اكشخ يقالي ابوريه اني احسن منهن ..
استغفرالله تفكيري صاير اتفه من التافه ...
اكيد هذا من تأثير الحمل والصدمات اللي مريت فيها خلت عقلي خفيف شوي ..
دق التلفون وهو بعيد عني مافيني اقوم اجيبه تركته يدق لين فصل .. ورجع يدق على دخلت
عساف اللي وقف يرد عليه ..
عساف :هلا .. ايه لحضه ..
وجاب لي السماعه وحطها على رجولي ..
عساف :قولي لأختك تخفض من نبرة صوتها شوي بغت تفقع طبلة اذني ..
سحبت السماعه منه بقوه بدون مارد عليه ..
ضحى :نعم هلا وعليكم السلام ..
كنت احسبه راح بس الحقير كان جالس على تكايت الكرسي وماسك شعري بيدينه القذره ...
صرخت عليه..
ضحى :ياحقيره ..
ابتسم بلؤم وهو يقول ..
عساف :ههه هذا بدال الجل اللي تحطينه على شعرك هذا احلى منه مافيه ..
كنت راصه يدي على السماعه بقوه الله لايفضحنا وش هالرجال قذر ومتخلف وغبي وحيوان... حسيت ودي انتف شعري من القهر الله يأخذه المقرررف ..
رجعت السماعه على أذني وانا طالعه بحقد
ضحى :ايوه وعد وش تقولين .. طيب لاتصارخين ماسمعتك زين سلك السماعه خربان ..
قال الزفت اللي جلس على تكيات الكرسي ومايل بيده على ظهر الكرسي ..
عساف :افا والله وراحت هيبتك ياأبله ضحى حتى الفاره وعد صارت تصارخ عليك ..
رديت بحده على وعد ..
ضحى :طيب وعد انا جايتكم بعد شوي وقولي كل اللي تبين ...
وقفلت السماعه بقوه ...
شفته يلف رايح للغرفه ..
ضحى :وبعدين يعني من سخافتك ...
عساف:سخيف بعد طيب شوفي من بيوديك لخواتك ...
ضحى :لاتصير لئيم ترى قسم بالله لروح مع ليموزين ..
عساف :عشان احش رجولك ..
قهرني تهديده ..
ضحى :والله لروح ولاهميتني ...
دخل الغرفه بدون مايرد علي انقهرت ولحقته وانا اجر نفسي جرر ..
ضحى :ليش تطنشني ..
دخل راسه مع فتحة الثوب وهو يرد علي..
عساف :تصدقين كنت احسبك غير طلعتي مثل باقي الحريم حنه وازعاج ..
هو صادق انا تغيرت وصرت غبيه وتافهه بس المفروض مايبان علي اني متأثره بكلامه
ضحى :هذا انا ماتغيرت بس شكلك انت اللي مليت وتبغى تخلص مني ..
قولها عادي ترى ماهي بعيده عنك ..
عساف :اووووف انتي حتى بالعيد تنكدين على الواحد عشيته ...
ضحى :ايه انا نكديه محد جبرك علي .. طلقني وفكني ..
عساف :انت انهبلتي او وش سالفتك شكل دروس الرياضيات كانت نافعتك من تركتي المدرسه وانتي صايره
اهبل من شدن الطفله ...
شوفوا الحيوان ياقارني بالشدن ..
ضحى :لاتجلس تخربط على راسي قلت لك وصلني بيت خواتي ..
صرخ على بقوه اكذب لو قلت ماخوفتني ..
عساف :بسسسسسسسس .. قلت لك قبل العصر مافيه بيت خواتك ...
ضحى :اسمع ترى والله لروح لبيتهم مشي ..
طالعني ببلاهه وهو فاتح فمه ثم سحبني مع كتوفي لين لصق راسه براسي ..
عساف:انتي مجنونه رسمي ..
وزفني عنه بس مو بذيك القوه اللي تخل بتوازني ..
وطلع بسرعه وهو يأخذ مفاتيحه لحقته على صوت المفتاح في باب البيت الداخلي قفل الباب علي ..
قسم بالله بستخف من هالرجال هذا عديم احساس ...
حتى خواتي بالعيد مايبغاني اروح لهم وهو رايح يزور المجرم ولد اخوه حسبي الله عليهم اثنينهم ..
سحبت الجوال واتصلت على خواتي اقولهم اني موجايه قبل العصر ..

[4]

(..ملاكي ..)

عساف

ركبت السياره بأبتسامة المنتصر واللحين وريني كيف بتطلعين يامدام ضحى .. من يوم جلست بالبيت بعد سالفة التصوير وهي متغيره حسبي الله على اللي كان السبب ..
الأدميه استخفت من يوم درت ان وحده من زميلاتها المعلمات مشتركه مع الطالبات بالنشره الصوره ..
وهي اللي اخذت رقمي من جوال ضحى عشان ترسل لي الصوره وتفضحها ..
والله الحياه هنا ماهي مثل قبل كل شي تغير.. وبالذات حياة بنات مبارك المنحوسه
وتنحس كل احد يقرب منها ..
ولاخلف يذبح مبارك اللي كان له أكثر من أبووو ..
صح هن مالهن علاقه مباشره بس احس ان خلف تغير من عرف العله مشاعل .
غيرت رايي ماني رايح لخلف تلقون ميزاحه اللحين وين وانا خلقه متعكر مزاجي ..
قلت اروح ليسرا اكيد الأهل متجمعين ببيتها يمكن القى صحبه تفتح النفس ..
بس وووين الصحبه اللي تفتح النفس بالسجن .. حسبي الله على اهل هالوديان مأدري الرعيان .. اللحين يرفضون يتنازلون عن حقهم وبنتهم كل اللي صابها رصاصه بسيطه بيدها وهذي هي ماجلست بالمستشفى حتى يوم ومسوين لي فيها انهم راعيين حق .. ومالك ابوه هو اللي مات وهو كان بينقتل ومتنازل عن حقه وحق ابوه والله أنه رجال ...
نزلت فبيت يسرى وكان الرجال ملي المجلس ماشاءالله طلعت من عندهم ودقييت على يسرا قلت لها احتريها ببيت شعر بسلم عليها ... دخلت واول كلمه قالتها
يسرا:هاووو بس انت ومدام ضحى وينها ماتنازل تجي او وش سالفتها لاتقول مريضه ومأدري ايش مافيها الا العافيه اقوى مني ومنك ... وبنتك ام شبر ونص ولسانها شبرين وينها بعد ...
قلت لها بكل صراحه ..
عساف :مايبغون يجون واذا كان بنتي لسانها طوله شبر ونص فهي طالعه عليك ...
يسرا: ياحظها لو طلعت المهم كل سنه وانت طيب مع انك توك تذكر تمرني...
عساف :والله اذا ماني ناسي ان بعد اخوك وعند بيت وعمرك مامريتيني فيه ..
يسرا :بسم الله عليك وش فيك صاير ماتحمل الكلمه كذا اعدوك ضحى وبنت عمتها ...
رفعت عيوني للسقف وانا اقول ..
عساف :لأله الا الله .. اللحين انتي وش فيك على بنت الناس ...
يسرا:اللي فيني قهري على اخوي .. اللي ساحرته .. ودي اعرف وش مسويه لك ومخليك كذا زي الخاتم بأصبعها ولاتحمل كلمه عليها .. نعنبوك صورها منتشره بكل جوال وكلمه عليها ماقلتها ..
عساف:ايه هذي اللي انتي تبينه بس احلمي اسوي اللي فيك بالك ...
يسرا :ايه لأنك ماأنت برجال ..
قمت وانا اقولها ..
عساف:شكرا ياأختي العزيزه على الغثاء اللي غثيتيني فيه بيوم العيد ...
مسكتني مع طرف ثوبي ..
يسرا:والي يثبت لك انها ماتستاهل ثقتك فيها ودفاعك عنها ويوريك دلايل مشيها البطال بغيابك ...
ماشعرت بيدي اللي راتفعت وهوت على وجها لين شفت الدهشه بعيونها زفيتها عن طريقي وطلعت وانا ندمان على الساعه اللي فكرت فيها اني امرها والله ان مقابل خلف افضل الف مررره من شوفتها ...
تبغاني اصدق بضحى ممكن اسمع على أي احد واصدق الا ضحى .. ضحى بعين مثل الملاك مستحيل تخطأ ..

**Loli.** · 01-08-2011, 11:23 AM

رد: بلا رقيب / لعاشقه ديرتها ، كاملة

[5]

(.. بأنتظارك ..)

قبل كانت فرحتها بالعيد لاتضاهى موبهاليوم بتشوف حبيبها واصابعها بتصافح اصابعه..
كان اجمل الكلمات اللي بتسمعها بهاليوم صوته بالسلام واحلى التهاني اسمها باللسانه ..
كانت تتعب باقي اليوم ونفسيتها تسوء .. متى بيجي عيد ثاني وبتتاح لها الفرصه انها تكلمه بدون قيود ..
واكثر مايألمها نفسها اللي تتلهف على انسان ولاهوداري عنها ..
بس سبحان مقلب القلوب ومغير الأحوال .. واللي قلب الوليد اللامبالي لعاشق ولهان ..
وصار يمكن هو يتلهف اكثر منها على هاليوم ..
وينه اليووووم وووين لهفته ارقدتها الغيبوبه اللي دخل فيها بعد الحادث
لاعاد فيه عيد ولالهفه ولا دلال ودلع ..
لفت الطرحه على راسها وسحبت شنطتها وطلعت من زنزانتها اللي كانت تسمى جنتها ..
اول ماشافت الصاله خاليه من امها اسرعت لبرى اكيد امها بتمنعها من روحة المستشفى بس مستحيل
تترك الوليد بهاليوم لازم تروح له وتشكي له كيف حالها من بعده
كلهم يبغون يفرقونها عنه بس هي مستحيل تطيعهم لو وش مافعلوا ..
لورقد الوليد بعيد الشر عنه الف سنه بغيبوبته ماتخلت عنه ..

[6]

وعد

رميت السماعه بقهر يوم اتصلت ضحى تقول ماهي جايه قبل العصر وجلست ابكي وش هالحاله هذا موعيد هذا كائبه
قهرر مللل طفش ..
بحياتي مارقدت بسبب الطفش ولأول مره اسويها دايم لطفشت اطلع بالشارع وافر بالحاره او اروح لمنير واطق على بيتهم اذا مالقيته عند الباب بس اللحين خلاص ماعاد فيه فرفره بالحاره مع هالأفكار نمت وانا ماني حاسه بنفسي ..
صحيت على صراخ شدن ونوره على راسي ..
رفعت اللحاف عن راسي وشفتهن جالسات يلعبن بأغراضي اللي اشرتيتهن للعيد صرخت عليهن ..
وعد :ياحماررات اتركن اغراضي ..
اول ماسمعت شدن صوتي خبت شي بجيبها وهرب رميت اللحاف ولحقتها وبغيت اتعثر واطيح بنوره اللي تلحقها وماهي فاهمه وش السالفه .. فتحت الباب الخارجي وطلعت وانا بنص الطريق دق التلفون ورجعت اركض له وقبل ماتوصل له
يد شدينه رفعته ورفستها برجلي عشان ماتسحبه من يدي .. وبأقوى صوت تحمله حبالي الصوتيه رديت ..
وعد :الوووووووووووووووووووووووووووووو
ماسمعت شي على الطرف الثاني غير هدوء وكأنه واحد بغرفه نايم ومشغل المكيف ..
رجعت اصرخ مره ثانيه ..
وعد :الووو ..
يوم ماسمعت رد قلت خلاص بقفل السماعه بس سمعت صوت كأنه بسه مخنوقه يقول ..
:الوو لو سمحتي مشاعل مبارك موجوده ..
وعد :مين مشاعل مبارررك لاغلطانه ياأختاه..
وفجأه يوم قلت ياأختاه تذكرت ميشو كتاب القواعد صح هي اسمها مشاعل وابوي مبارك يعني هي المطلوبه ..
رجعت اصرخ بسرعه قبل ماتقفل المررره ..
وعد:لالحضه ايه موجوده مشاعل ..
ويوم تأكدت انها ماصكت سألتها ..
وعد :من انتي ..؟!
ردت علي :ممكن أكلمها ..
وماقالت من هي ..لاوالله تحسب نفسها ماأتصله على فندق جالسه تطلب بدون ماتقول من هي ..
وعد :شوفي انا مأقدر اناديها من غرفتها بدون ماعرف من انتي فرضا كنت
انتي وحده نصابه ولاساحره ولاديانه وش دراني عنك مو أي احد
يتصل علينا بيكون محل ثقه فالأفضل انك تعطيني اسمك عشان لوصار شي لاسمح الله نبلغ عنك الشرطه ..
ويفضل اسمعك السداسي او الخماسي عشان اذا متي انتي نطلب واحد من جدانك ..
سمعت هدوؤ طويل بعد ماخلصت كلامي ..
ثم رجع صوت الحرمه اللي كأن احد رابط على رقبتها شي وخانقها ..
:الله يخليك ناديها لي والله مأقدر انتظر اكثر من كذا ..
كنت اسمع بشي طيب اتوقع يسمى السلام او السلم او حمامه حسيته يطير داخلي ..
فقلت لها
وعد :انتظري بروح اناديها لاتطيرين قصدي لاتقفلين
رميت السماعه وطلعت اركض فوووق وشدن الزفته تلحقني ..
لفيت عليها بعصبيه ..
وعد :خير وش تبين ..
شدن :وين رايحه من اللي كلمت
زفيتها بنرفزه ..
وعد :وانتي وش دخل ابوك ان شاءالله باريس هيلتون متصله
شدن :والله لو ماقلتي لي من كلمت لروح وارفع السماعه واقول من انتي
وافضحكم يقولون عنكم بيت صللب ..
وعد :وانتي ايش اكبر صلبيه بالرياض انقلعي يالله عن وجهي ..
طقيت على باب غرفة المهبوله ميشووو تصدقون غبيه صارت تقفل باب غرفتها مأدري من وين طلعت المفتاح اصلا بالبيت مافيه غرفه لها مفتاح من طلعت على الدنيا .. مصدقه نفسها خايفه احد يغتالها والله لو انها واحد من المجاهدين ..
وعد :أفتحييي ميشووو فيه وحده تبغاك على التلفووون شكلها تبيك ضررررررررورري جوودن ..
وعد :قسم لو مافتحتي لروح اصك السماعه بوجها
وماردت اوووف انا وتهديدي اللي مثل وجهي يبغى لي تهديد اقوى ..
وعد:قسم لو مافتحتي لروووح اكتب على باب بيتنا هنا مقر ميشو المهبوله
ولافتحت الباب وجلست اطق واطق واطق وكل مررره اقول تهديد لين بالأخير انفتح الباب بشويش زي افلام الرعب
وكذا حسيت الدنيا ظلام مع انا بعز النهار وطلعت روبي يعني صدق رعب قسم صدقت انها اللي فتحت الباب
شوي بس وطلع راس ميشو وكشتها الطايره ..
ميشو :ماذا هناك هل اتصل ..؟1
جلست اتمقل بملامحها الجديده شفايفها اللي صايره مثل شفايف شيماء علي وخدودها اللي غطت على خدود نانسي ..
وعد :لا ماأتصل عزرائيل بس عزرائيله اتصلت ..
هزيت راسيي استغفرالله ياربي مايصلح امزح بهالأسماء وهالأمور كم مره حذرتنا ابلة الدين من هالشي ..
وعد :قصدي وحده تبيك على التلفون ..
كذا حسيتها ترتجف والله شفتها ترتج مثل الجلي .. ومرت من بيني وبين شدن ونزلت تحت وحنا نمشي وراها
بهدؤ ضابطين الدور كأن بفيلم اول ماوصلت الصاله وشافت التلفون ناظرت فيني بخوف لدرجة اني شكيت انها صدقت سالفة عزرائيل ...
وسألتني وهي تأشر على السماعه واصبعها يرتج..
ميشو :هل هووو ..؟!
نطت الملقوفه شدن ومسكت السماعه اللي طايحه على الأرض ..
شدن :خوذي ميشو لاتخافين كلمي صديقتكي ..
وعد:وانتي وش دراك انها صديقتها ..
شدن :اكيدصديقتها اجل من بتكون.. لتخوفينها انتي .. خوذي ميشووولاتخافين ..
شوفوا البزر بنت اللذينا سوت اللي ماقدرت عليه وخلتها تكلم اول ماحطت السماعه على اذنها كتمت نفسي بسمع أي حرف بتقوله ...
ميشو :مررحب ..ا
ثواني بس وابعدت السماعه عن اذنها وهي تقفل عيونها بعدين رجعت السماعه وصوت اللي كانت تكلمني بهدؤ واصلني من قوة صراخها ..
كانت تقول لمشاعل شي ومشاعل بس تقول لا وتصرخ عليها وتكررر لا لين بالأخير قفلت السماعه منها كنت وراها ويوم لفت ناظرتني قسم بالله ان الشي الشرير اللي كان بعيونها ررررجع ..
قبل كان فيه شي تغير غير التغير اللي بوجهها شي بعيونها الزرق كان يلمع كنت اخاف منه وبعد ماسوت عملية التجميل
اختفي واللحين رجع شكل العمليه انتهت صلاحيتها اكيد بعد شوي بتنفش شفايفها وخدودها ..
طلعت الحقها بشوف وش تسوي بس كانت سابقتني دخلت وقفلت عليها الغرفه ..
وعد :حماره ..
شدن :واللحين وش بنسوي ..
وعد :بايش نسوي .. انتي وش عند تلاحقيني بكل مكان احد قايلك انك ظلي ..
شدن :سخيفه ودووبه وماراح تروحين معنا الملاهي ..
وعد :مالت بس ومن قال اني ابغى اروح معك مكان ..
صرخت عليها ورحت غرفتنا اصلي لأني صحيت بدون ماأصلي وكان الوقت عصر صليت الظهر والعصر ..
وحسيت بألم وتأنيب ضمير لأني ماصليت صلاتي بوقتها ..
مأدري كيف البنات يقولون انهم يجمعون كل صلواتهم ويصلونها لاصحوا ماتعورهم قلوبهم ..
واذا قلت لهم انتم عديمات احساس قالوا لا ..
وكل وحده تقول كيف انها حساسه لأنها تنهبل وقلبها يتقطع اذا اللي تحبها غابت او زعلت عليها بايخات ..
نزلت تحت للحوش اللي كانوا متجمعين فيه خواتي طبعا بأستثناء الزعلانات .. كانت ضح ضح متسنده على مخدات وممدده رجولها .. كنت مقهوره وابغى اطنشها بعدين قلت لاعيب يابنت هذي اختك الكبيره ابوك وأمك مره وحدده بعدين هي اللي بتوديك بعد شوي للملاهي .. ورحت سلمت عليها وانا موضح اني زعلانه ..
كنت بروح اجلس بعد ماسلمت عليها بس هي سحبتني وجلستني جنبها وهي تضم كتوفي لها ياحبيلها ضح ضح حسيتها صايررره طيبه مررره ..
ضحى :هاه وعوده للحين زعلانه ..
وعد :وليش ازعل مو أول مره توعدوني بشي وماتنفذونه لي ..
زفرت بقوه وهي تسألني وش تبغين .. ياربي هذي كيف عرفت وش افكر فيه ...

[7]

(..في صف الوحش ..)

منير

كان الطلب اللي طلبه مني صعب بس انا قلت اني قدها والرجال عند كلمته ... وقفت على اصابع رجولي ومديت يدي بقوه لين وصلت الجرس اللي مأدري وش فيه اليوم كنه ارتفع عن مكانه .. كانت اصابعي ترتجف شجعت نفسي وقلت وش فيك يامنير لاتخاف وعد ونوف ماهن هنا ولاحتى اشواق ..
ضغطت على الجرس بقوه بعد دقتين سمعت صوتها يوصلني من ورى الباب من أنا ... بغيت اطير من الفرحه ابغى بسرعه انتهي من هالموضوع .. قلت بسرعه
منير:انا منير ..
فتحت الباب بسرعه .. بس انا ترددت ادخل ياربي وش اللي بسويه انا هذي سارا كيف اصير معه ضدها نسيت
اللي كان يسويه فيها .. بس لا اللي بسويه مو خطأ بعدين هو أخوي ..
ياربي يوم نادتني من جديد حسيت نفسي نذل .. دخلت بسرعه وانا اسألها ..
منير :وين البنات وين ضحى ..
سارا :وش عندك لاسلام لاكلام مباشره سؤال وش تبي بضحى اخبرك بوعد ونوف ويخب ..
منير :امي تبيها بسرعه ماعندها احد وهي تعبانه من رجعت منيره لرجلها وانا عندها بس لحالي وهي اللحين تقول تبي وحده منكن ..
كنت مرتبك واقطع بكلامي .. ياررربي خطأ خطأ اللي اسويه خطأ ياويلي من ربي ..
سارا :احلف منيره رجعت لرجلها غريبه وش الطاري ..
منير :يووه من اسألتك اقولك امي تبي احد منكم ضروري وانتي فاضيه تسألين .. وين ضحى ..؟..امي تاركها لحالها بالبيت جابر وقيس مسافرين وفاديوووه هايت له اسبوع مارجع

**Loli.** · 01-08-2011, 12:26 PM

رد: بلا رقيب / لعاشقه ديرتها ، كاملة

برب بروح أصلي وراجعه أكمل البارت :$

**Loli.** · 01-08-2011, 02:13 PM

رد: بلا رقيب / لعاشقه ديرتها ، كاملة

سارا :مافيه احد كلهم طالعين بس انا وملاك وميشو ..
يوووه اللحين وش الدبره ميشو وش تسوي هنا .. هو قال يبغاها تكون لحالها يعني مافرقت بيتنا او بيتهم ..
منير :طيب تعالي معي لأمي ..
سارا :هاه وانا وش دخلني ..
منير :حلوه وش دخلك مو انتي من بنات جيراننا وهي طلبت وحده منكن ..
سارا :طيب لحضه بصحي ملاك تجي معي ..
سحبت من يدها وأنا اقول ..
منير :يطوووووول بالك اقول امي تعبانه تقولين بتصحين شيطان تكفين بسرعه ..
سارا :طيب لحضه خلني البس عباتي بتسحبني لشارع كذا ..
ودخلت تركض بسرعه ..ياه ياهي ضعيفه يانكذب عليها بسهوله .. يارب سامحني يارررب ...
طلعت اركض بسرعه قبل ماترجع وتلقاني ماأقدر اواجها شفت باب بيتنا مفتوح دفيته بقوه لين صار مشرع ورحت اركض قبل ماتشوفني وكنت ابغى ابعد عن المكان ...

[8]

(.. ربما كانت نهايه ..)

سارا

كنت جالسه على تلفزيون ملانه بعد مانامت ملاك اللي تقول البارح مانامت زين.. يوم سمعت صوت الجرس انهبلت من بيدق علينا الله يستر يعني ضحى وطالعه مع البنات وميشو نايمه فووق ومنير قاطعنا من زمان من بيجي يعني ..
رحت للباب وانا اقدم خطوه وارجع خطوه واللي خوفني انه مادق الا دقه طويله بعده وقف فتره ورجع دق دقه ثانيه طويله على نهايتها كنت واقفه عند الباب سألت بخوف مين .. يوم سمعت صوت منير ارتاح قلبي ومن الفرحه انه طلع
هو مو أحد ثاني فتحت الباب بسرعه ونسيت انه قاطعنا من زمان .. اول ماقالي عن امه كسر خاطري مسكين تاركينه لحاله مع العجوز المريضه واخوانه اللي مافيهم خير مسافرين وتاركينهم ..
اخذت عباتي بسرعه وطلعت له بس كان طالع يحوول شكل امه مره حالتها كايده طلعت ومن الربكه نسيت وقفلت باب بيتنا وراي ..وانا ادخل مع بابهم واقفل وراي تذكرت اني ماخذت شنطتي اللي فيها مفتاحي والله اللي رحت فيها اذا صحت ملاك ومالقتني بتنهبل بس بشوف وش تبغى فيني ام كايد وارجع بسرعه يمكن قبل ماتقول حتى كنت وصلت الصاله وبديت انادي على منير بصوت منخفض خوفني منظر البيت الهادي المظلم مافيه نور الا شمس العصر اللي بدت تبرد .. خفت ارفع صوتي اكثر وماهي حلوه ادخل غرف الناس افتش عن ام كايد ..
ياربي من هالمنير ماقدر ينتظر ثواني لين اخذ عباتي واجي معي .. سمعت صوت مشي لفيت بسرعه لأن الصوت جاي من المطبخ اللي وراي كنت فاتحه فمي بسأل منير ....... بس تجمدت الحروف على لساني وطار عقلي من اللي شفته
مستحيل احلم انا صح منير قاله انه مسافر وش يسوي هنا .. لا لا لا ا ....

[9]

ضحى

نفخت بقوه وهو يضحك ويناظر باللي ورانا عساه لسد العيون إن شاءالله .. الداشر ..
ضحى :استغفرالله العظيم ..
جلس يحرك الكوب اللي قدامه وهو يتطنز علي ويقول ..
عساف:حلو الأستغفار كثري منه ينفع للي مثل حالتك ..
ضحى :ليه وش فيها حالتي شايفني مجنونه او على باب الله ..
عساف :كلنا على باب الله بس انتي حالتك مستعصيه ..
وارتفعت اصوات اللي ورانا بضحكه مايعه .. قهرتني خلاص ماأقدر اجلس كذا مأدري ليش تحسسني اشكالهن بالبنات قليلات الأدب اللي بالمدرسه ودي اقوم وسكتهن ووقفهن عن حدهن بس للأسف هنا مالي سلطه على أحد ...
قمت امش وماحسيت الا باليد اللي تمسكني ..
عساف:ضحى روحي فيك شي ليش قمتي ..
ضحى :يعني بالله عليك ليش قمت عاجبتك المصخره انتي ..
عساف :يعني مافيك شي ..
ضحى :وش فيني يعني لاتخاف ماراح اولد هنا وافشلك ..
وكنت وصلت الطاوله اللي جالسات فيها هند واشواق ونوف وجلست معهن وهو واقف لللحين مكانه ..
ضحى :للحين واقف انتبه لرجولك تكسر روح لطاولتك القديمه اجلس مع المصخره اللي هناك ولا أقولك اسحب كرسي واجلس معهن ترى ماراح يقولن لا..
ضحكن البنات وهو راح بدون مايتكلم احسن عم المجرم يستاهل اكثر من كذا .. قلت لنوف بنرفزه ..
ضحى :وانتي وش مجلسك هنا ورى ماتروحين تلعبين ..
نوف :قلت لكم اذا ماجو معنا سارا وملاك ماراح العب ..
هند :قسم انك خبله يعني حنا سجناهن هناك ولاهن اللي مو معطيات احد وجه ومايبن يحتكن فينا ابد ...
نوف :انتي مالك شغل انا اكلم ضحى ..
جت هند بترد بس قاطعتها ..
ضحى :خلاص انتي وياها راسي منتخف ماني ناقصتكن ..
دق جوالي وكانت زميلتي مها اللي كنا ساكنين مع بعض بالقريه فيها الخير هي الوحيده من زميلاتي اللي دايم على اتصال معي وماعمرها قطعتني.. عزمتني حاولت اتملص منها بس هي مصره وتقول ان ماجيت امها بتزعل علي تذكرت ام ناصر المره الطيبه اللي تعدني حسبت بنتها ماقدرت ارفض قلت لها إن شاءالله بجيهم بكره ...

[10]

( ..هل ستعود ..)

ملاك

صحيت من النوم مفزوعه حلمت حلم شين بالوليد استغفرالله العظيم هالأنسان ماهو راضي يطلع من راسي .. يارب يارب انساه خلاص كرهته من كثير مايعذبني بالأحلام ...
انا اخطأت وهذ ثمن خطأي استغفرالله العظيم .. نزلت تحت ادور سارا بقولها عن حلمي حرام هذا جزاي اني نمت وتركتها لحالها ... ياربي وين راحت هالزفته .. جلست ادور بكل مكان ولاني لاقيتها ... والله لو انها ابره لقيتها على هالتدوير كيف عاد البقره سارا ... ياويلي لايكون خطفتها الجنون ... او ميشو المجنونه ذبحتها.. يمكن بالسطوح .. صح اكيد بالسطوح هي تجيها طفات اللهم لاشماته تلقونها اللحين جالسه تطل على الجيران او تكنس السطوح او تطبل وترقص خبله لاتشرهون عليها ...بغيت ابكي يوم شفت باب السطوح مقفل من داخل يعني اكيد ماهي فيه .. ياويلي اختي وين راحت ... جلست انادي ونادي وانادي ولا احد يررررد ..
ملاك :سارا ... سارررررا....ساررررررررا .. الله يخليك اطلعي .. والله تخرعت وينك .. سارررا تكفين لو تسمعيني اطلعي ...
لايكون طلعت ... لايكووووووون لاياربي لا أي شي تكون راحت له الا هالشي يارب لا ...
جلست على هالحاله ساعه كامله او يمكن اكثر وانا جالسه ادعي ان سارا ترجع الصاله اللي كنت جالسه فيها ظلمت ومافتحت الأنوار كنت مرعوبه ماأبغى الوقت يمر وسارررا مارجعت .. جلست ابكي واضحك واظرب نفسي واشد شعررري من القهر اختى مختفيه وانا جالسه هنا ماني قادره اسوي شي .. خلاص بنجن بنهبلللللللل ...
ابغى اختتييييي..
ماقدرت اصبر اكثر اخذت التلفون ودقيت على ضحى ... بسرررعه ردي تكفين ضحى رررردي بسررررعه ...
ماول مانفتح الخط ...
ملاك:الحقيني ضحى سارررررررا اختفت ماني لاقيتها .. الله يخليك تعالي بسرعه بنجن والله بنجن ...

**Loli.** · 01-08-2011, 02:14 PM

رد: بلا رقيب / لعاشقه ديرتها ، كاملة

[11]

ميشو

( .. الهروب ..)

لأعلم مالذي تريده هذه المجنونه سوسو .. هل جنت تريدني ان اذهب بقدامي لمسرح الجريمه .. مازلت امتلك عقلي ولله الحمد .. ولكن مالأمر الخطير الذي تريد اخباري به ولاتستطيع ان تخبرني عنه بالهاتف ... كان اتصالها على الهاتف مرعب لي فأنا قد قطعت جميع سبل الاتصال بي .. ولكن نسيت امر هاتف المنزل ...
سوسو تهددني ان لم احضر انها ستفضح كل الأمر لمالك ووالدتها ولكني لن اعطيها الفرصه لذلك سأذهب ولكن سأحتاط لأمري وبعد ذالك لقد اتخذت قراري سأبتعد عن هنا .. سأهرررب ولكن بطريقه ذكيه ..
بحثت بجنون عن هاتفي المغلق حتى وجدته بين مذكرات الدراسه فتحته بسرعه وبحثت عن الرقم..
ميشو :ماذا كان اسمها ابرار .. جود ... مها .. او صباح ...
ارجوك لاتخذلتي .. يألهي ماذا كان اسمها ... بتول اجل بتول ... بحثت عن رقمها بسرعه فوجدته ... لم اتواني عن الأتصال بها ..
ميشو :مرحبا بتول انا مشاعل ..اجل مشاعل مبارك ... انا بصحه جيده شكرا لك... بتول لقد حدثتيني فيما مضى عن شقيقك ... اجل طبيب حسنا لابأس ...
كتمت انفاسي بعمق وانا أسألها ..
ميشو :هل مازال العرض جاري ..؟!.. اووووه شكرا لك ياعزيزتي ... اه بالتأكيد انا كذالك ...
واصبحت كلماتها مبهمه بالنسبه لي هل حقا سأفعل ذالك سأتزوج شقيقها الطبيب لأهرب من هنا .. اين قالت يعمل في بريطانيا لا بأس .. بالتأكيد بريطانيا ستكون افضل بكثير من العيش بخوف تحت سطوة المتعجرف خلللف ..
احتضنت صغيرتي روبي وسألتها ...
ميشو :هل ستكون الحياه في بريطانيا مسليه كما هي هنا ...

[12]

( .. حماقات ..)

انحنى على ركبه قدامها وهو بداخله يسب ويلعن بغباء منير هو ماقاله كذا غبي غبي غبي ... لا ماهو منير الغبي
هو الغبي اللي طلب منه هالشي اللحين هو يقوله ناد ملاك ويبغاه يفهم ان المقصود ملاك نفسها اكيد منير فهم انه يبغاه يفتح له المجال بسارا .. حط يده على راسه وش يسوي فيها اللحين هذي من اول ماشافته اغمى عليها ..
لاوالله اللي تزوجو ..
هز يدها بخفه :سارا ساررا اصحى ساررا...
ياربي هذي وش بيصحيها ..راح المطبخ واخذله كوب مويا ... وصبه عليها ولارد ... يارب ماتكون ماتتت معقوله بتموت عشان بس شافته لا مستحيل والله لو كان قلبها ماضعف منه وهو دراكولامايموتها هالشي .. كان يدور على نفسه بعجز مايدري وش يسوي بنفسه وهو يدعي على غباء منير اللي حطه بهالورطه .. نزل يهزها ..
قيس:سارا اصحيي تكفين اصحي.. اصحي الله ياخذك لاتفضحيني اصحي سارررررررررا .. ...
يستاهل والله انه يستاهللل .. كل اللي يجيه هذا ذنبه ...
قال بيشوف شوشو أي شوشو أي زفت .. ذولي ملعونات ماهن بنات كل وحده لاصقتن بحياته من جهه ومنكدات عليه تنكيد ..
كب على راسها كل شي وهزها هز وصفقها بس عشان تصحي ولا احد راد عليه .....
فكريسحبها ويرميها بأي مكان بس ماتبقى هنا ... بس لا مستحيل يسويها... هو اللي جابها هنا وهو اللي يستاهل كل شي يجيه ...
ارتعب يوم سمع صوت الجرس ...
لا من .. من جاي بهالوقت .. سحبها بسرعه ودخلها اقرب غرفه غرفة امه اللي خاليه منها لأنه مسافره لأختها بقريه قريبه من الرياض مع جابر .....
عدل ثوبه وفك اكمامه المصفوطه .. وركض يفتح الباب .. بس ليته مافتح الباب اول ماشاف من عليه عرف انه انكشف .. صوت البصقه اللي جت على وجهه والكيس اللي انرمى عليه وصوتها الحاد وهي تخبره ان هذي ملابس اختها وماعاد تبغى تشوفها في بيتهم ...
ونظرات عساف المحتقره له ..... احرقته وعلمته أي مصيبه طاح فيها ..
انصك الباب وراهم كان بيلحقهم ويقولهم انهم افهموا الموضوع خطأ خطأ خطأ ...
بس وش يقول ولا وش خلاص كل شي انتهى ... وطاح الفاس بالراس ...
يافضيحتك ياقيس ويامصيبتك ...

[13]

( .. ذهبت للأبد..)

ملاك

ماني مصدقه مجنونه ضحى هذي مجنونه صح .. مسكتها مع طرف عباتها
ملاك :انتي متخلفه متخلفه ماهووو من حقك تطردين سارررا هذا بيتها بعدين انتي من صدقك تفكرين فيها كذا ... اصلا سار تخاف من قيس تخاف منه كيف بتروح له برجولها ...
ضحى :لاترفعين صوتك علي ياززززززفت واختك الحيوانه قليل بحقها اني اطردها من البيت لأن لو جبتها هنا لشي واحد بس اني اذبحها وادفن عاررررها ... ومن قال انه اول مررره تروح له يمكن الف مررره وانا ياغافلين لكم الله ...
بتجنني المجنونه هذي كيف .. كيف سارا تروح القيس غبيه هذي قسم غبيه ..
ملاك :اصلا ماعمرها طلعت من البيت الا معيييييييي ..
ضحى:انطمي عني ماني ناقصتك انا .. واذا مو عاجبك كلامي انقلعي عند خالتك او بأي مكان ومو بعيده عنك تكونين مثلها .. انا مو ناقصتك تخربين خواتي ..
ملاك :انا ياضحى انقلع وخايفه على خواتك مني بس بعدك هذا بيت ابوي وجدتي قبل مايكون بيتك .. وعلى العموم شكرا على شكك فيني والله يسامحك ياأختي الكبيره بس انا مستحيل اسامحك على اللي سويتيه فيني وبساررا ويوم تكتشفين بيوم انك ظلمتيها لاتندمين لأنك بصرفك هذا مو ذبحتيها هي بس ذبحتيني انا بعد ....
طلعت لغرفتي وانا اردد بداخلي والله مانساها لك ياضحى دموعي ماوقفت من يوم صحيت ومالقيت سارا ... كنت متصوره أي نهايه لها ليوم الا هذي النهايه ... سارا مع قيس مجانين صح مجانين من بيصدق كلامهم .. حسبي الله عليك يامنير الملع ** ليه قلت لهم ليه ...
خلاص سارا ماراح تجي .. ياويلي عليك ياسار وش سوى فيك الحقير حسبي الله عليه ... ياربي وش بتسوي اللحين كيف بتعيش معه وكيف بتنحرم منا انا مأقدر مأقدر اعيش كذا وسارا بعيده عني ولاقادره اعرف وش صار فيها ...
ماأقدر اجلس كذا من غير سارا ماقدر يالناس كيف بكمل حياتي من غيرها كيف ...

[14]

(.. الخائن ..)

منير

جالس امشي مأدري وش اسوي ماني قادر ارجع للبيت اكيد بيذبحني قيس بس والله ماقدرت اسكت ارتبكت يوم سألني عساف اذا شفت سارا طلعت من بيتهم ماتوقعت انها للحين مارجعت ساعتين كاملات او تقريبا ثلاث ساعات .. كله من الغبي قيس المتخلف هو اللي ورطني ومأدري كيف طلعت مني الكلمه وقلت انها ببيتنا ..
خفت اصلا هو كشفتي لأني ارتبكت ووضح علي اني مسويه شي..
بيدرون باللي سويته لايارررب مايدرون ... بيكروهني اكيد بيكرهوني وبيقولون عني خائن لأني ساعدت اخوي ضدهم ..وعد ونوف ماراح يسامحوني ابد وساررا .. ساررا هي اللي ورطتها .. انا استاهل اني اضيع اموووت لأني خاين ليش سويت كذا يارب سامحني انا كنت بس ابغى اساعد قيس ..وخفت منه .. قيس يخوف اكيد بيظربني ويكسر راسي لو ماسويت اللي طلبه مني بس وش استفدت اللحين خربت علاقتي بصديقاتي ... وفضحت قيس اكيد ماراح يسامحني وبس يشوفني بيذبحني ..
.. ماني بجالس هنا بروح لبيت منيره قبل مايمسكني قيس ... ركبت تاكسي ورحت لمنيرره اول مادخلت عندها اخذت التلفون بدق على بيت خالتي واكلم امي بقولها ترجع بسرعه لأني خايف من قيس .. بس مأدري اقول لها اللي صار اولا..

نهاية الحلقه

**مجنونة وجنوني يجنن** · 02-08-2011, 05:56 AM

رد: بلا رقيب / لعاشقه ديرتها ، كاملة

يويل حالي كملي خخخخخخخخخخخخ تعبتيني هع

**Loli.** · 04-08-2011, 01:09 AM

رد: بلا رقيب / لعاشقه ديرتها ، كاملة

أن شاء الله بكرا أضع التكملة ..
الحين والله ما قدر فيني النوم ولا أقدر أنام بدون السحور هاع ..
يعني بنسدح على سريري واذ أكلت السحور وصليت بنام ..

أذ قعدت من النوم من عنوني الأثنتين بكملها لكم .. :$

بلا رقيب / لعاشقه ديرتها ، كاملة

تعليق

تعليق

تعليق

تعليق

تعليق

تعليق

تعليق

تعليق

تعليق

تعليق

google Ad Widget