بلا رقيب / لعاشقه ديرتها ، كاملة

**Loli.** · 11-07-2011, 01:11 AM

رد: بلا رقيب / لعاشقه ديرتها ، كاملة

((5))
عساف

اليوم عندي له خطط خاصه بغت تخرب بعد اصابة اخت ضحى بس الحمدالله مر الموضوع على خير وماوصلها خبر .. بصعوبه قدرت اقنع خواتها انهن يرجعن للبيت ورجعتهن بنفسي ورجعت لها بالسرعه اخذها من بيت أبوها ..لا لحضه انا كيف نسيت وخوووواتها اللي معها كيف اصرفهن ,,لاشكلها الليله مقفله بوجهي من كل جهه ..
دقت علي اووف اكيد كل الناس طلعوا ...
عساف :هلا ..
ضحى :وينك ترى ملينا ..
عساف :طيب اسمعي اطلعي وخواتك خليهن يروحن مع خلف ..
سألتني كنها مسمعتني زين ولايمكن ماستوعبت كلامي ..
ضحى :كيف ..؟!
يعني على الأدب ..
عساف :اقولك خلي خواتك يروحن مع سعاد وخلف .. ابيك بموضوع مهم ..؟!
ضحى :لازم يعني .. لحضه ..
وسكتت شوي بعدين رجعت بالصوت معصب بس ماهو عالي وهذا المهم ..
ضحى :وش قاعد تخرف انت على كيفك اخلي خواتي يطلعن مع رجال غريب .. انت اللي جبتنا وانت اللي بترجعنا جميع ..
عساف :اولا الرجال ماهو غريب ولد زوجة ابوهن وأخته معه واطلعن مع اللي ابعد منه..
ضحى:احترم نفسك وبلا طولة لسان ..
عساف :انت اللي اسمعي ..صدقيني ماتبين خواتك يعرفون وش اللي حصل اطلعي لحالك عشان بنطلع مباشره للمستشفى ..
ضحى :مستشفى ايش وش اللي صار ..
عساف :بتعرفين اذا طلعتي يالله بالسرعه لاتنسين لحالك وقولي لخواتك يطلعن مع خلف وسعاد ..
قفلت منها وبالسرعه اتصلت على خلف يارب مايكون طلع ..
خلف :هلا عمي ..
عساف :اسمع ابيك توصل بنات عمك للبيتهم ..
سكت شوي وكنه مافهمني ..
خلف :أي بنات عم واي بيت ..؟!
عساف :من غير عمك مبارك بالسرعه انا مشغول ..
خلف :لحضه وسواقهم وين والا خل سواقنا يوصلهن ..
عساف :طيب صرفهم انت ..
وماأدري ليش مع اني مستعجل وماني متفرغ له بس قلت ..
عساف :على فكره ام القطاوه معهم ..
ركبت بأدب حتى الباب مقفلته بقوه مثل العاده ..
ضحى :خير وش صاير ..؟!
حركت السياره بعدين رديت عليها ..
عساف :اختك وعد تلعب وطاحت وانشقت رجلها واللحين بالمستشفى منومينها ..
سكتت احتريها ترد تعلق تستفسر ولاكلمه ولاحرف ولاحتى نفس ..
شكلها واثقه اني بوديها للمستشفى وكنت محل ثقتها وصلنا المستشفى ..
دخلنا للغرفه اللي منومه فيها اختها كانت راقده مثل ماتركتها ..
وقفت عند راسها تأمل فيها وحده نايمه من طلعت على الدنيا مقابله خشتها وش بتلقين فيها جديد تناظرينه اووووووووووووف ..
وبعدت جلست تناظر برجلها ترفعها وتحركها .. ويدها على الشاش اللي على رجلها ..
عساف :خلاص شفتيها يالله انا تعبان ..
ضحى :روح ..
عساف :وين اروح ..
ضحى :للمكان اللي تبي ..
عساف :وانتي ..
ضحى :برافق مع اختي ولاتبغاني اروح وأخليها ..
عساف :بس انا ماني سامح لك خلي أي وحده من خواتك ترافق معها ..
ضحى :تسمح لي تكفى لاتعطي نفسك اكبر من حجمها هذا اختي وانا المسئوله عنها ,, ماراح اتركها بالمستشفى بمحيط غريب عليها لوحدها عشان حضرتك ماتسمح لي ..
عساف :واصلا هو ماطلبوا مرافق ..
ضحى :لاه ماشاءالله وش هالتطور انا متأكده واجزم انهم طالبين بس شوف حضرتك وش قايلهم وكيف مصرفهم عشان ينومونها من غير مرافق ..
يعني خلاص الفشل هو الحكم الأخير على مخططاتي ..
ناداتني وانا طالع رجعت لها وانا ماني طايقها ..
عساف :خير .؟!
ضحى :طيب اسأل يمكن نبي شي ..
عساف :وش تبين ..؟!
ضحى :بكلم خواتي يجهزن لي اغراض مرعليهم وخذها .. وشدن لاتأخذه خلها عندهم ..
من قال اني بأخذها صدق عليها أفكار .. انا ماني متحملها وهي معها ابلش فيها نفسي لحالها ..

((6))

خلف

دخل للفيلا بعد مكالمة عساف بعد ماقال لسواق يجهز سيارته عشان يوصلهم اول ماخطت رجله داخل الفيلا وصله صوت الصراخ وصوت امي صوتها..
دخلت بالسرعه ولاكنت متجهز للي بشوفها ...
مشاعل روووووووووووووووبي ..؟!
تحت رجول مالك يدوسها برجليه ايه يدوسها ..
وانعدمت الرؤيا عندي ماعاد اشوف شي ..
كم مر ..كم راح ..؟! وش سويت ذبحته او للحين حي ..!! كل هذا لاتسألوني عنه ...
ماحسيت الا على صوتي امي وهي تظربني تبغاني افكه ..وسعاد تقول ..
سعاد :خلللف خلاص موته اتررركه ..
فكيته بعد ماكنت خانقه وطيت رجلي ببطنه ودست على رقبته ... وهو يقاوم يحاول يقوووم ..
مالك :وخر بذبحها الحقيررره فكنييي ..
قهرني من الحقيرررره هو الحقير اللي جالس يتهجم على ضيوفنا رجعت اخنقه ..
امي :خلاص خلللف تكفى خللف فكه ..
جريته مع ثوبه وهو مو قادريمشي بس غصب عنه خليته يتحرك وبرى رجعت اظربه والمره ذي ماكان فيه احد يفكه من يديني ..
مالك :فكني وخرررر بتذبحني ياملع ...ن .. اتركني بذبحها الزباله وخررررر .. انا اللي بذبحها وخررر ..
كان يسب وانا ازيد ظربه يتكلم وانا احاول اكتم صوته ماأبي اسمع كلامه .. ماأبي افكر بقصده وليش سوى اللي سواه ..
مع ان الجواب واضح ومفهوم ..

**Loli.** · 11-07-2011, 01:12 AM

رد: بلا رقيب / لعاشقه ديرتها ، كاملة

((7))

ماهي قادره تفهم اللي يصير حولها ليه كل هالظرب وش سوت مشاعل ..؟! ..ليش مالك ماهو طايقها ليه يسب بخواتها وش سالفته معهم ..؟!
مختفي من أمس واليوم جاي عشان يظربها ..!!!
كانوا جالسين بهدوء هي ومشاعل وامها وخوات مشاعل وتهاني وعبير صح حركات امها مسببه لها قلق ماتبيها تهين مشاعل وخواتها تخاف تقول كلام يجرحهم تكره هالمواقف اللي تلقى نفسها مضطره تسمع اهانات امها لناس وهي تجلس ساكته ماهي قادره تمنعها ولاقادره تخفف من وقع هالكلمات على اللي يسمعونها ..
واللي زايد خوفها انهم بنات زوجها والأكيد انها ماتحبه وتتضايق من وجودهم لا ومتأخرين بعد كل الناس .. مستحيل تسكت لهم وصار موقف امها اللي خايفه منه ولاشي قدام اللي صار ..
دخول مالك الثاير اللي تحول لهياج بعد ماشاف مشاعل ..ماأهتم ولاعبر وجود ضيوف ولا أمه وحريم اخوه ..
قال وهو يرتجف وكأنه مو بعقله :هذذذييييي وش تسوي هنا ..
امه :مالك وش فيك داخل علينا كذا اطلع الله يرضى عليك عندنا ضيوف ..
مالك :ضيوف ماشوف ضيوف اشوووووف زباله ..هذذذي وش تسوي هنا ..
وهجم عليها وجرها مع شعرها :وش تسوين هنا ياحقيرررره ..انتي ماتتوووبين ماكفاك اللي جاك أمس لازم اذبحك عشان تفهمين .. تبين اذبحك ابشري ..
ورماها على الأرض وجلس يركلها ويدوس في بطنها..
وهي يردد :بذبحك يازباله ..
حاولت هي وأمها يوخرونه عنها يفكونها منه بس ماقدروا كان هايج ثاير اكثر من أمس .. كل اللي بالصاله مصدومين خواتها حريم اخوه .. ودخل عليهم خلف بوقته.. بس ماتوقعوا اللي صار بدال مايفرقهم خلف زاد الطين بله بظربه لمالك..
وتبدلت الأدوار صار مالك مكان ميشو بس خلف مارحمه كان ناوي يذبحه .. جره لبرى وانتقلت المعركه لبرى ومصير مالك بعلم الغيب..
ليش كل هذا ماهي فاهمه شي توقعت خلف يوخره عنها وبس ماتوقعته يظربه ليييش ظربه ليييش ..؟!
طلعت امها لغرفتها من غير كلام بس بعد مارمت على مشاعل وخواتها نظرات تذبح .. وطلعت معها عبير ..
طلعت مشاعل وهي تزر عباتها وخواتها المصدومات وراها بس قبل ماتطلع .. طالعت فيها هي وتهاني ..
مشاعل :سأذيقه المررر .. سأدفعه الثمن اثمان .. سيتمنى الموت جراء ماسيعيشه من عذاب ..
ماكانت ميشو اللي تكلم كان شيطان,, ابليس بصورة انسان ..

((8))

ملاك

ياحليلها وعوده حتى وهي مرضانه تنكت ..خخخخخخ .. بس كالعاده دمها ثقيل ..
وعد :ليش ماجبتوا لي ورد ..
سارا :وش تبين بالورد ماينتاكل ..
وعد :هى هى هى مايضحك ..
ملاك :اذا كلام سارونا مايضحك كلام مين اللي يضحك الناس اللي دمهم مثل الدبس ..
وعد :اذا تقصديني انا فأنتي غلطانه لأني دمي احلى من شربات المصريين .. ولاتغيرين الموضوع ابي ورد ..
ملاك :يالبلشه ترى الورد غالي ..
وعد :مالي دخل انا ماصدقت امرض عشان تجيبون لي ورد وبالأخير ماأحد يجيب لي ورد وبس انتم اللي تزوروني لودريت ماتعبت نفسي ومرضت ..
شوفوا البنت كأنه بكيفها تمرض ..
ملاك :يعني وش المطلوب منا ..
وعد :أبي ورد وناس جدد يزوروني ..
ملاك :ليه فلم مصري هو نجيب ناس جدد يزورونك ولاحبيبك يجي ..
طارت عيون وعد فيني ..
وعد :بس انا ماعندي حبيب ..
وندمت على كلمتي يوم وصلتني صرختها اللي جمدت جبني الأيمن كله ..
ضحى :ملاك بلا قلة حياء ..
ملاك :ام سوري نسيت انك عندنا ابله ..
غريبه رجعت بدري من المحاضره العاده محاضراتها تطول ولابس هالشي معنا .. مسكينه نوف لقت نفسها لحالهاووسط محاضرة ضحى الصراحه ارحمها بس والله يستاهلون ليش امس يوم احذرهم مايطلعون ويسمعون كلام ضحى ماطاعوني يستاهلون .. هذا جزء اللي مايطيع امه وضحى مثل ماما ..
ملاك :ههههههههههههههههههههههههههههههههههههههههههههههههه هههه ..
سارا :هبلا وش فيك تضحكين ..
وعد :ياحرام انهبلت توأمك وانتي بتنهبلين مثلها ..
سارا :ياسخيفه ..
ملاك :سارا تصورينا مهابيل ..
ضحى :لاتعبون انفسكم وتصورون انتم مهابيل طازجين ..
سارا :وأنا أقول ليش الأبله كانت تقولي ياهبلا اثريها كانت داريه وخالصه ..
ضحى :داريه عن ايش ..
ملاك :انا مهابيل ..
ضحى :يارب لتبتلينا ..
ذكيه انا عرفت وش تقصد ..
ملاك :لاتطمني ماراح يجوونك توأم مثلنا ..
ضحى :اعوذ بالله الله لايقووله ..
وعد :يعني انتي بتجيبين اخت لشدن ياحرام شدن راحت عليك ...
ضحى :الحمدالله والشكر انا وين الله باليني بخوات ناقصات عقل ..
شدن :بس انا ابغى اخت ..
وعد :مالت عليك وش تبين فيها ..
شدن :عشان تصير اصغر مني وازعجها مثل ماتزعجوني ..
وتستمر الحرب بينهم .. خلونا منهم فيه شي مو طبيعي قاعد يصير في بيتنا ودي اقول لضحى عنه بس شكل مزاجها متعكر وماهي ناقصتني ..
بس صدق والله الفضول بيذبحني ودي اعرف وش اللي امس صاير لمشاعل وشهد وشوق وهند ..
ضحى :خلاص ارجعوا للبيت ..
وعد :لاتو الناس لاتروحون ..
ضحى :ارجعوا لخواتكم بس ..
قلت بتريقه وانا امرر يدي على خشمي ..
ملاك :طيب على امرك بابا على هالخشم ..
سارا :باي وعوووده بكره بنسرق لك ورد من اللي بالزينه بر ى ..
وعد :لا ابي مغلف ...
ملاك :لاهذا بعدين يجيبه لك بعض ناس ...
وعد بغباء:من ..؟!
والله اني خايفه اقول الكلمه وتدوس ببطني ضحى بس ماعلي بقولها واهرب انا عند الباب ..
ملاك :ومن غيره ابو العيال ..
وحطيت رجلي اخخخخخ ماردني غير باب السياره من الجهه الثانيه ..
سارا :وجععع داخله مرثون انتي ..
ملاك :هع مرثون ولايد ضحى ..
شدن:اصلا ماكانت بتظربك جلست تضحك ..
ملاك :والله تضحك الصراحه تقدم .
سارا :وش رايك نمر على خالتي ..
ملاك :وذولا وش نسوي لهم ..
سارا :عادي نأخذهم معنا خليهم يغيرون جو ..
وغمزت لي ضحكت على فكرتها ياه يحنا بنستانس ...
انتظرونا الحلقه الجايه نستانس سوى ..

نهاية الحلقه الثلاثون

**مجنونة وجنوني يجنن** · 11-07-2011, 11:30 AM

رد: بلا رقيب / لعاشقه ديرتها ، كاملة

واؤووؤ شي شي
بس غثني مالك صاير خرؤوف ويوم درا انها اخته طقها طيب البنت رافضتك يعني مهي مخفه ليش يطقها....؟توه تفطن وصار سي السيد وقعد يطقها

**Loli.** · 11-07-2011, 08:44 PM

رد: بلا رقيب / لعاشقه ديرتها ، كاملة

لأنهم هم كذا الرجال ..
الحين راح احط الجزء لك مجنونة

منوره :$

**Loli.** · 11-07-2011, 08:53 PM

رد: بلا رقيب / لعاشقه ديرتها ، كاملة

الحلقه الحاديه والثلاثون ..

((1))

(..الأماكن ..)

ملاك

حاولنا نقنع نوف تجي معنا لبيت خالتي ومدحنا لها ود وانها فله وبتنبسط لو جت معنا بس رفضت العله بس ماهو علينا رحنا لبيت خالتي وهي معنا قسرا لاطيبا ..
نزلنا عند بيت خالتي بس هي عيت لاتنزل ..
ملاك :انزلي يالخبله بتبقين مع سواق اللميوزين لحالك ..
ردت علي بصوتها الخشن ..
نوف :مانتي شايفه رجال قدامك يخوفك هالبنقالي ..
ياربي من هالبنت شكل عقلها فيه فيوزات ظاربها مصدقه عمرها انها ولد لا وتزعل بعد ماهي ولد رجال ..
سارا :نوفوه انزلي بالطيب احسن لك والله لودرت عن حركتك هذي ضحى ..
وماكملت كلمتها الا ونوف نازله ,,صدق من قال مالها الا سارتها ..
قبل ماندخل سحبت سارا على جنب وقلت لها ..
ملاك :لاتنسين تقولين لخالتي انك موافقه بعدين قولي لها تقولي وانا بسوي نفسي ماأدري اوكيه ..
سارا :اوكيه يابيه ..
جيت افتح الباب بالمفتاح اللي عطتناخالتي وسارا دق على الجرس موحلوووه ندش عليهم هيك بلا احم ولادختور هع متأثره بخطيب سارا ..
فجأه اجراس الدفاع المدني دقت بالراسي ماعندي حاسه سادسه بس سمعت صوت ريال داخل ..
ناظرت فينا نوف بأتهام ..
نوف :عندهم رجال وانتم تقولون البيت مافيه الا خالتكم ..؟!
سارا :يعني بنكذب عليك حنا ايه مافيها الا خالتي وحنا ماندري من اللي هنا ..
جتنا الخدامه ..
سألتها سارا ...
سارا :من اللي فيه ..
الخدامه :دكتور جواد ..
صرخت بدون أحساس ..
ملاك :خطييييييبك ..
حطيت يدي على فمي يوم ناظرن فيني نوف وشدن ياللهول عاد مالقيت ازل بلساني الا عند كونان واينشتين ..
نوف :سارا انتي مخطوبه ..
سارا :اشششش لاياهبلا انا وملاك نلعب نقول كذا اسكتي لاتسمعك خالتي .. وانتي روحي قولي لخالتي انا برى ..
قلت لها بأذنها بعيد عن اذان المتطفلين ..
ملاك :لو اني منك ارجع يوم دريت انه فيه وماهو بكل قوة عين بتشوفين خالتك ...
سارا :ماأعرف امثل واضحه انا ..
ملاك :ماهو وضوحك هذا اللي بوديك بالداهيه المفروض اللحين تسوين نفسك مستحيه ماهو بجرأه تقولين لخالتي انك موافففففقه ..
سارا :شلون يعني افيديني وفقك الله ..
ملاك :اسمعي ايته الأخت السأله الأمر لايحتاج فتوى كل الذي المفروض تسوينه انك تجلسين تراجفين واصبعك تحطينه بفمك ماتنزلينه يقالك من الأحراج بتأكلين اظافرك ..
سارا :لاووووعععع يالقرف ..
ملاك :جججب خليني اكمل قبل ماتجي خالتي ..
سارا :اكملي كلي اذان سامعه ..
ملاك :ووو اجلسي تعتي بالكلام واكلي الحروف على كيف حالك ..؟!
جتنا خالتي وهي تناظر بنوف وشدن بأستغراب ..
وبعد ماسلمنا عليها علمناها ان ذولا خواتنا وماعندهم احد بالبيت وجنباهم معنا ..
خالتي :ياهلا والله الله يحيكم حبايبي .. تعالوا معي للمجلس الثاني جواد مع اخوه الوليد هنا ..
هي قالت الوليد من هنا وقلبي ساح من هنا .. شوي وانط عليها وأبوس يديها وأقول لاخلينا نجلس هنا معهم يالناس حلمي اشووووفه من قريب مليت من مطالعه من بعيد ودي اشوفه وجها لوجه ,,صحيت من احلامي على قبصة سارا لي ..
سارا :امشي فضحتينا ..
ملاك :ياحماره عورتيني ..
سارا :قليلة ادب وش موقفك قدام المجلس ..
ملاك :ماوقفت قدامه ..
سارا :لاتكذبين لو مالحقتك كنتي جالسه معهم اللحين ..
ملاك :ياحماره ليش وقفتيني ..
زفيتها عني ..
سارا:ملاك استخفيتي ..
ملاك:والله بستخف من حبه ..
سارا :قسم بالله انك سخيفه امشي بس قالتك احبه ياليت بس ضحى تسمعك عشان تقص لسانك وتعلقه على رقبتك ..
حطيت يدي على فمي وكأنها بتقصه اللحين استغفرالله ياربي معها حق سارا افكاري غبيه كني مراهقه بس والله هذا قلبي هو اللي يتكلم مو أنا ..!!
دخلنا بالمجلس ولقينا خالتي ماسكه شدن وتضحك شكلها اعجبتها اصلا من يشوف شوشو وماتعجبه ..
وجلسنا على هالحاله سوالف ولعب واستخبال بس خالتي مايعجبها استخبالنا وفيه شي ثاني ماأعجبها نوف كانت نظرتها لها ماأدري كيف ماأقدر اشرحها فيها احتقار فيها شفقه ..
بعد فتره جت الشغاله وقالت لخالتي ان جواد والوليد ياحياتي على هالأسم ..!! طلعوا ..
خالتي :يالله عاد خذوا راحتكم اللي تبي تطلع تروح أي مكان البيت بيتكم ..
سارا :خالتي ماله داعي تقولين هالكلام كل ماجيناك حنا عارفين قدرنا عندك ...
حطت خالتي يدها على كتوف سارا وقربتها من هنا بحنان .. الحركه هذي جننتني انقهرررررت ..
خالتي :ادري حبيبتي بس ابي خواتك الصغار يأخذون راحتهم ..
ملاك :لاتخافين خالتي هم يأخذون راحتهم بكل مكان مايحتاجون توصيه ..
قبصتني سارروه مع يدي وقالت لي ..
سارا :صرفي خواتك عشان اعلن لخالتي موافقتي ..
ملاك :مأوصيك سوي نفسك منحرجه وياويلك ان رفعتي راسك اضبطي المشهد جنى ماهي احسن منا ..
سارا :انا وين وجنى وين صدق انك طموحه ..
ملاك :يالخبله مايبيلها عرفنه بس اهم شي ماتضحكين ..
سارا :عاد هالشي اللي ماأقدر اضمنه لك ..
ظربتني ملاك بكوعها مع بطني ..
ووقفت وأناقول ..
ملاك :نوف شدن تعالي معي بوريكم غرفتنا اللي عطتنا خالتي الله لايحرمنا منها ...
ابتسمت لي خالتي وحسيت انها غصبه نفسها على الأبتسامه يوووووه وش فيها ذي شكلها غاصه فيني ماهي قادره تبلعني ياحرام ارحمها هع ..
طلعن الخبلات وراي .. وعند الباب لفيت على سارا بعبط ...
ملاك :سوسو مو جايه ..
سارا :لا بجلس مع خالتي ..
ابتسمت خالتي .. وعشان اغيضها قلت ..
ملاك :قومي لاتصيرين ثقيله يمكن خالتي عندها شغل ولاشي لاتثقلين عليها ..
ردت خالتي بالسرعه ..
خالتي :لاعاد سارا من بين الناس خفيفه على قلبي ..
ملاك :حرام عليك لاتقولين عن سارا خفيفه تزعل ..
خالتي :ووش يزعلها ..
ملاك :تحسس من هالكلمه ..
ياحرام والله خالتي مسكينه ماهي فاهمه حاجه ... ردت عليها شدن بلقافتها المعتاده ...
شدن :هي تحسس لأن اللي على راسه بطحا يحسس عليها ..

**Loli.** · 11-07-2011, 08:54 PM

رد: بلا رقيب / لعاشقه ديرتها ، كاملة

ضحكنانا ونوف وشدن بس هع .. والله وطلعت خالتي ماترضى على سويررره ..
بالغرفه فوووق .. طلعت بالبلكونه ولحقتني شدن .. حطت لها كرسي ووقفت عليه ...
شدن :الله حلوووه حديقتهم ..
ملاك :.........
شدن :ياليت هذا بيتنا نعيش فيه جميع ..
ملاك :.......
شدن :حنا تفرقنا اناوماما صرنا نروح عند بابا وانتم هنا تجوون ووعد ونوف وشهد وهنووده وشووق فالبيت وميشو بس طالعه ياليت عندنا بيت كبير نجلس فيه ومانروح عن بعض ...
ملاك :هناك يجلس ..
شدن :مين ..
ملاك :هو ..
شدن :مين هو ..
ملاك:كل يوم اشوفه جالس هناك ..
شدن :اووووووووووووووف من هو..؟!
ملاك :........
شدن :طيب هو ليش يجلس هناك ..
ملاك :عشان يراقب البيت ذاك ..
واشرت لها على البيت اللي لو بيدي انسفه عن الوجود ماقصرت .. ليه جالسه تكلم معها ماأدري .. يمكن لأني مليت ودي افضفض وسارا تاخذ الموضوع مسخره ولاتسكتني لأني مللتها من كلامي عنه .. وماعندي غير شدن اقولها اللي اقوله لسارا لوكانت مكانها..
شدن :ليه هو حارس ..
ملاك :لا,, توقعين انتبه لي ..
شدن :انتي تشوفينه وهو كل يوم يجلس هناك اكيد شافك الا اذا هو اعمى ..
ملاك :ايه هو اعمى ..
شدن :طيب كيف يشوف البيت ذاك لو اعمى ..
ملاك :لأنه اعمى قلب ..
شدن :ياحرام .. طيب وين هو اللحين ..
حبست دموعي قبل ماتنزل .. ليه محد فاهمني ان احبه هذا ماهو بأختياري غصب عني .. والله لو تحسون الوجع اللي أحسه بقلبي وان أشوفه كل يوم جالس على هالكرسي ونظره للفيلا الملعونه عرفتم وش معنى وجع الحب الحقيقي ..
او اللحين وأنا اشوف مكانه الفاضي تحسونه اهون علي لاوالله اكثر الم لأني ابي اشوفه امووت لو ماشوفته ... مشتاقه له حييييييييل ..
احبه ومشتاقه له واللي فيها فيها ..
وجلست ادندن :الأماكن كلها مشتاقه لك والعيون اللي انرسم فيها خيالك ..والحنين اللي سرى بروحي وجالك ..
ماهو بس أنا حبيبي ...
شدن :الأماكن كلها مشتاقه لك ..
وجلسنا على هالحال لين جتنا نوف وقالت يالله بنرجع للبيت .. وتركت الأماكن ..

((2))

(..بداية اللعبه ..)

سارا

قهرتني ملاكوه الفضيحه عن جد هبلا ماتعرف تصير لبقه فضحتنا بخالتي ام جواد ..
بعد ماطلعوا لفيت على خالتي ام جواد وقلت لها .. وانا منزله راسي وشوي ويصقع ركبتي .. ياليت بس تنفع الحركه ..
سارا :خالتي بقولك شي بس مستحيه ..
اتحداكم وحده تقول جمله مرتبه مثل جملتي وتدل على الحيا والخجل ..
خالتي :وليه الحيا حبيبتي انا مثل امك ..
خير ياطير واذا كنتي امي لاتصيرين مصدقه سوالف المسلسلات عن حنان الأم وعطفها .. ياملحي وانا اقول لها هالكلام وانا المفروض اكون خطيبة ولدها المستحيه ..
جلست ارمش بعيوني تقريبا سطعشر مره بالثانيه وانا ارفع راسي وبسرعه انزله ..
خالتي :حبيبتي وش فيك من صدقك مستحيه .. ياحياتي قولي اطلبي ..
لاضروري انطق المره فهمت السالفه خطأ قالت اطلبي .. وليه لا .. يصير يعني اخطب ولدها ..!! .. ولاخلوني اخطب وليدووه المزيون لملاك ..
عشان تنهبل اختي علي ..!! لا ..لأني احبها ماراح اتخذ هالخطوه المصيريه اللي ثمنها هبال أختي بعيد الشر بعيد الشر ...
خالتي :سارررا كل هذا حيا ..
رفعت راسي بالسرعه ونزلته وهالمره صدق حسيت نفسي مستحيه لأن وجهي حسيته حار وقلت الجمله بالسرعه وبدون تلكك مثل ماقالت ملاك..
سارا :انا موافقه ..
انصدمت بضحكت خالتي لايكون غيرت رايها وخطبوه له وحده ثانيه ولاشي وانا احرجت نفسي لا يارب لا ..
خالتي :ياحياتي كنت عارفه انك ماراح ترديني .. وعشان كذا اناطلبت جواد يجي عشان يروح مع اخوانه من ابوه ويكلمون ابوك وأهلك ...
ومبارك شكو اللحين يروحون له اووووووف مالي خلق يتدخل بالسالفه ...
سارا :طيب ليش ابوي ماتكفي ضحى ..
خالتي :الله يهديك بس تبغينهم يروحون لمره ...
سارا :لا ماأقصد كذا يعني يروحون لزوجها ..
خالتي :ماينفع ياحبيبتي لازم يروحون لأبوك ...
اوووووف يعني السالفه فيها مبارك ..!!
خالتي :وش فيك سارا ..
سارا :لا ولاشي ..
خالتي :اسمعي حبيبتي بشورك بالشي بس اذا موعاجبك لاتحسبيني بزعل وبأخذ بخاطري منك ..
ياربي وش عندها لايكون صدق غيروا رايهم وأنا الخبله جالسه اعرض نفسي عليهم ..
سارا :لا قولي عادي خالتي انتي مثل امي ومستحيل ازعل منك ..
ماأدري كيف طلعت معي الجمله بس يالله تمشي الحال الشرهه على اللي يعرف امه ولاحتى شافها عشان يحترمها ولايزعل منها ..
خالتي :ياحياتي والله اني ماأحسبك الا بنتي لو عندي بنت ماأغليتها كثرك.. ويمكن اغلى من عيالي بعد..
لاعاد خالتي حرام البكش من انا عشان اصير اغلى من عيالك ياشين الحريم لكذبن عليهن كذب ..
كملت خالتي :جواد يقول يبي يشوفك قبل مايخطبك .. لاتنسين ماراح ازعل منك لورفضتي ..
حسيت مثل الكهربا تسري بجسمي .. وش اللي تطلبه مني خالتي اطلع قدام رجالل .. مستحيل اللي تطلبه مستحيلللل ماأقدر ..
كنت جامده وأنا ارد عليها حتى ماحاولت اوضح ليش انا رافضه ..
سارا :لا ..
بعد ساعات بالسياره وحنا راجعين ماكان يتكلم فيه غير شدن تهرج مع ذا وذا حتى السواق ماتركته لحاله .. انا ماني قادره افكر ومو رايقه للكلام من طلبت مني خالتي ذاك الطلب ليه ماأدري احس نفسي ماني متقبله الموضوع ..هي الموضوع عندها عادي لأنها جاده بالطلبها بس انا اللي جالسه العب عليهم وأتسلى كيف اتجرأ واطلع قدام واحد انا واثقه انه ماراح يكون زوجي بيوم من الأيام استغفرالله بصير مجنونه لو وافقت ..
خالتي ماسكتت وحاولت تفهم سبب رفضي قلت لها اني رافضه بس بعد الملكه عادي .. واقعتنت .. ملكه هاه بالمشمش ..
سارا :ههههههههههههههههههههههههههههههههههههههههههههههههه هههههههههههههههههه هههههههههههههههههههههههههههههههههههههههههههههه ه..
نوف :اللهم سكنهم مساكنهم ...
ملاك :الكلام مردود لك .. ساراونا وش بك حبيبة البي زحكينا معك ..
سارا :تذكرت شي اقولك عنه بالبيت بس قسم بالله حتضحكي ..
ملاك :متأكده ومن اللحين لوبدك اضحك ...
شدن :لأنك مرجوجه وعلى الهزاز ..
ناظرنا انا وملاك في بعض وانفجرنا ضحك ..
نواف :قسم بالله انكن سخيفات ..
قلت عشان اقهره ..
سارا :ملاك ياهي صارتلي هوايل مع خالتي ..
صرخت ملاك وهي تخبطني على كتفي بالررررررررررقه كالعاده لدرجه حسيت قلبي جاب قول بالقفص الصدري وطلع تسلل ..
سارا :بشويش قطعتي ظهري ..
ملاك :تكلمي امحه ولاشعيره ..
سارا :لا برسيمه ..
رفعت يدها بتكرر الخبطه ..
سارا :لاخلاص توبه امحه امحه ..
رجعت على كرسيها وبغرور ..
ملاك :اكيد هذي مخططاتي ماتنزل الأرض ..
نواف :وش السالفه ..
سارا :بليز خلك مكانك لاتدخل عرض ويعطونك مخالفه ..
ملاك :ويادخل بين الليمونه وقشرتها موطايل منها الا حموضتها ..
نواف :اصلا ماني فضولي لذيك الدرجه وبنات يعني وش بيصير عندكن ...
ملاك :وانتي وش ياشيخه ..
قلت اقلد صوت نواف الخشن ..
سارا :انا رجال ..
ملاك :والخيبه بكل الرجال الا ...
سارا :ايه الا ...
هع توهقت تستاهل وياليت هالزله قدام احد يستاهل ..
ملاك :نواف ...
الخبل صدق ونفخ ريشه ..
شكلنا بنوديها للمطوع يقرأ عليها وبنأخذ هالملاك معها اظن الله يتوب عليها من أفكار المراهقين اللي بتوديها بالداهيه ..

**Loli.** · 11-07-2011, 08:55 PM

رد: بلا رقيب / لعاشقه ديرتها ، كاملة

((3))
(..دموع الرجال..)

مقهور من قاله اخوه انه جاي عشان يخطب وهو مرتفع ضغطه كيف يعني اللي اصغر منه يخطب وهو لا ..؟!
اللي طلب قبل هو واللي يحب ومتعلق قلبه هو واللي خطب اخووه ..
وقف على باب مكتب اخوه متردد .. اللحين لو دخل عند محمد بيفتح له موالات .. عن ضياعه لاوظيفه ولا ألتزام ولامسئوليه .. بس لا الشوق بتضيع من يده وهو مستحيل يفرط فيها لازم يخطبها اليوم قبل بكره ولاخلاص بيفقد عقله ..
لازم يملك عليها قبل مايتحرك نواف .. نواف أخوه ويعرف زين مستحيل يسكت وهو ذبح قلبه .. ذبحه يوم طلب من ابوه يخطب له اللي يحبها اخوه .. اخوه بالأسم بس ولابالحقيقه هم اكثر من اعداء يتنافسون على كل شي الواحد من هم يحسد الثاني على الهواء اللي يتنفسه ..
كان لعاب وصياع ومازال بس كان قلبه خالي لين علقه الشيطان ببنت عمه .. نواف كان عارف مصلحته وين ومامشى بنفس طريق أخوه بالعكس كان ذكي وداهيه ويحب الشغل اللي يجني من وراه المال لين تدمرت حياته على يد اخوه وأنجبر يتزوج وحده ثانيه انغصب عليها وبعد الزواج بأسبوع فصخ اخوه خطوبته ..
محمد :مفهي بعد ..؟!
نفض راسه بقوه اللحين بدال مايدخله هو اللي طلع له كذا فجأه وهو مو جاهز ...
محمد :تبي شي ..
بأرتباك وهو يضغط على الجوال بجيبه شوي ويكسره :ايه متى بتكلم عمي عشان نملك انا وشوق ..
محمد :اوووووف شايف هذا وقته ..
الوليد :اجل متى وقته .. مليت تراني والله لأترك لكم البلد باللي فيهاواهاجر ..
محمد :خلنا نخلص من موضوع جواد ..
الوليد :انا الكبير وهو اللي يخطب وين العدل بهذا وانا اللي طالب قبله وتقدمه علي ...
محمد :انت تدري ان التأجيل ماهو مني رح كلم عمك .. واخوك امه اللي تبيه يتزوج وبيأخذ بنت خالته وهي موافقه واهلها موافقين يعني ظروفه غير ظروفك تبي تزوج وحده غير هذي اشر وحنا نروح نخطبها لك بتبقى على بنت عمك انتظر لين تنازل وترضى فيك ..
ياليته ماهو أخوه الكبير ياليته نواف ولا أي احد ثاني عشان يفقع له وجهه ..
الوليد تكلم وهو يبتعد ومن العصبيه يده اللي يهدد فيها ترتعش :ماني مكلمه انت كلمه وقله اذا مارضوا نملك مع جواد بروح اتزوج أي وحده لوبنت شوارع وبنته بحجر عليها,,لأنها اذا ماتزوجتني ماراح تزوج غيررري ..
محمد بعصبيه :الووووووووليد ...
بس الوليد كان رايح ..
لحقه وهو يصارخ :الوووولللللييييييييييييييييد ..
ود :يبه الوليد وصل المريخ اللحين وانت تنادي عليه ..
لف عليها بعصبيه :وش تقولين انتي ...
تخسبقت يوم شافته معصب :لا ولشي بس اقول عمي الوليد من مبطي طالع ..
محمد :وانت وش تسوين للحين صاحيه ضفي وجهك ارقدي ..
ود :من عيوني تحت امرك ابو ود ..
وطلعت تركض لغرفتها ..
محمد :استغفر الله العظيم ..
قفل الباب وراه بقوه ولاحرف من الكلام اللي قاله لأخوه يقدر ينفذه بس من الأنفعال طلع معه هالكلام ..
ظرب على الدريسكون بيده مره وثنين وثلاث وبالأخير ظرب راسه على الدريكسون .. وبدا يبكي بالصمت ...!!!

((4))

(..التحدي ..)

ضحى

وقفت متفاجئه باللي قدامي .. صح انصدمت بزيارة يسرى وبعدها زيارة زوجة ابوي بس هذا اللي صدق ماتوقعته .. والدي بحضرة جنابه يحضر مع ان وعد صارلها ثلاث ايام بالمستشفى بس اليوم كل الناس جت ..
مبارك :هاه وش قلتي ..
فقت من شرودي على سؤاله وكل اللي قاله قبل ماسمعته ..
ضحى :وش اللي هاه ماسمعتك ..
مبارك :ماسمعتيني انا وش اهرج فيه من الصبح اقولك .. اختك جاينها خطاب ..
والله ماكنت مستغربته عليه كان عندي احساس بيجي يوم فالأيام وبيقولي هالعباره وبيجر وحده من خواتي مثل النعجه وبيزوجها لكاين من كان ..
ضحى :ومن هالخطاب واي اخت فيهم ..
مبارك :الكبيره شروق ..
اضحك ولا أبكي يالناس .. هذي اخت جديده ولاوحده من خواتي وغلطان بأسمها .. هذا اسم اخت لنا مانعرف عنها شي ولاوحده من زوجات ابوي ..
بس تمالكت اعصابي رغم انها فلتانه خلقه وبرود الأعصاب ماهو من طبعي .. بس عباره ترن بأذني هذا ابوووك والايه اللي ربتنا عليها المدرسه من الصغر ومابارحت خيالي لحضه ولانسيتها على مر الزمن وطول الجفا "ولاتقل لهما اف ولاتنهرهما"..
طاعة الوالدين وبرهم درس تغلغل للأعماق اعماقنا مبدأ تشربناه بجوارحنا .. وحنا لقيناهم عشان نبرهم هذي الفرصه قدامك .. احترمي ابوك تبرينه ... بس هو ماأحترمنا واهان انسانيتنا حنابشر مو حيوانات ولاجوامد عشان يرمينا ومايسأل عناحنا مانحس مانشعر .. يعني نبره طيب هوليه مابرنا بصغرنا وعطف علينا حسسنا بأبوته لنا,, ليه مارحم ضعفنابعد ماكبرناوحنا ولايا ..بس بعد هذا ابوك وواجب عليك طاعته ..
مبارك :وش فيك تهزين راسج ..؟!
راسج اه ابونا شرقاوي وحنا نجدين ياسلام ننحسد على هالترابط والتوارث اللي بينا ..
ضحى :ومن هم الخطاب يعني من معارفنا ولا من برى العايله ..
مبارك :لا من أهلنا وقريبين مره خلف ولد عمها ..
ضحى :ممممممميييييييينننننن ...؟!!!
مانتبهت اني كنت اصارخ لين فزت وعد اللي كانت نايمه من قبل مايجي ابوي وهي تسأل بعيون مقفله وفم مفتوح وش فيه ..؟!!
وعد :وش فيه ..ضحى وش فيه ..؟!
قلت لها ..
ضحى :أرجعي رقدي ..
ولفيت لطويل العمر مبارك ال .....
ضحى :خلف المزواج ماغيره روميو زمانه اللي فضيحته على كل الناس هو وغرامياته.. هذا مايستحي على نفسه له عين بعد للحين ماتاب وش يبي فضيحه أكبر من كذا ..
قطع كلامي بالصرخه اخاف اقول لكم افجعتني ابالغ لأن مبارك بالذات ماهو عصبي ولايعرف للعصبيه طريق..
مبارك :انطمي خلف رجال وينقطع لسانه اللي تكلم عليه هذا ولدي انا اللي مربيه ...
ضحى :وونعم دامك اللي مربيه بس سؤال ماأقدر اشوفك وماأسئله دامك لهدرجه طويل بال وراعي واجب تربي عيال الناس ليه ماقمت بواجب بناتك قبل وربيتهن بدال ماللي يسوى ومايسوى يهرج بتربيتهن ..
مبارك بنرفزه :ومن هارج فيكن ..
ضحى :عمة روميو اه قصدي خلف ..
وانفتح الباب فجأه ولفينا كلنا عليه ..
عساف :سلام عليكم .. مساءالخير عمي ..؟!
ووراح يجلس على الكرسي اللي جنب سرير ووعد اللي كانت مفهيه للحين فين وبأبوي ..
عساف :كيف حال رجلك اليوم ..
وعد:زينه متى بطلع ..؟!
عساف :بكره ..
مبارك :قلهم يتأكدون من الفحوصات زين ولو محتاجه تجلس بالمستشفى اكثر خلهم يجلسونها ماهم يلعبون بخلق الله ..
ماشاءالله يالأب الحنون .. انا مأدري وش فيهم رجال عايلتنا منتشر بينهم الحنان هالأيام ..
وعد :يووووووه من قال ابي اجلس اووووف انت ليه ماتحبني ياربي ترى ماأنت مسئول عني ...
أبوها تبونها تحترمه عيب اللي تقول وقبل هو حرام .. طيب فهموها وهي اللي عاشت عمرها كله بدون اب ان هذا أبوها جاي يتحكم فيهاو بهاللحضه والدقيقه لازم عليها تحترمه بدون نقاش ولاحتى تفكير ,,الواحد يحترم اهله يعزهم يحبهم لأنهم ربوه على هالشي مو عشان مسمى اب او ام ..
مبارك :بنت قص اللسان اللحين هذي تربيتك اللي فرحانه فيها ..
ضحى :لو بناتي ماقصرت فيهم مهما فعلت بظل بالنسبه لهم اخت مو ام ولاأب ..
وعد :لا من قال اصلا ضحى هي امنا وأبونا وانت ماهو من حقك تحاسبها لو سمحتوا صدعتوا راسي اطلعوا برى بنام ..
لنص كلامها صرخت فيها ومعي احد ثاني كان يقول نفس كلامي ماهمني من هو المهم اسكتها قليلة الأدب تعدت حدودها ..
ضحى +عساف :بنت وجعععععععع (هنا سكت عساف بس ضحى علقت )ععععععععععععععع ..
مبارك :يالله فمان الله ولاتنسين شاوري اختج عشان ماتجين بكره تقولين جبرتها وماأدري ويش ..بس ترى خلف ماهي لاقيه احسن منه ..
كان يتكلم وهو ماسك الباب ..
اول ماطلع ..
عساف :وش فيه خلف وش السالفه ..
تكتفت له وان اهز رجلي بدون احساس من الغيض اللي فيني وش كان يقصد بأخر عباره يتطنز قصده انه بيزوجها وافقت ولاماوافقت ولاصادق بكلامه ..
ضحى :لاتسوي نفسك ماتدري بس والله لو حب هالخلف النجوم ورجع مارضيت انه يتزوج اختي سامع وصله هالكلام زين ..
مسكني مع يدي بس قدرت افكها منه بالقوه ..
عساف :احترمي نفسك وانتي تكلمين معي ..
وعد :ههههي انت فك اختي .. مالك شغل فيها ..
عساف :انتي انطمي ياقليلة الأدب ..
وعد :مهما كنت قليلة ادب فأنا أحسن منك ...
عساف :دام هذي مربيتك ماأعتقد اصلا هي بكبرها يابيلها تربيه ..
كان يقولها وهو يأشر علي .. قمة القهر ان واحد ماعنده سالفه ولاعاش اللي عشته وذاق المر اللي تجرعته امرار يجي بكل حقاره ويحكم عليك بكل برود انك فاشل بكل اللي سويته ..
قهر قهر قهر قهر قهر قهر قهررررررررررررررررررررررررررررررررررررررر ...
ضحى :ياسلام ومن اللي بيربيني ان شاءالله لايكون حضرتك .. عاد انت كلش فاضي مربي بنتك وخالص ماعندك احد تربيه بتلتفت لنا ..
عساف :بربيك واكسر راسك بعد ..
هذا وش فيه متقوي علي خير ان شاءالله شكله قلبه شايل وممتلي بس بقريح ماهو أنا اللي ينقال لي هالكلام ومن مين من واحد هو وتراب جزمتي يتساووون ..

**Loli.** · 11-07-2011, 08:56 PM

رد: بلا رقيب / لعاشقه ديرتها ، كاملة

ضحى :اسمع انت ..
عساف :انتي اللي اسمعي صوتك ذا ترفعينه اقص لسانك حنا موفالبيت عشان ترفعين صوتك .. وعيونك ذي لاتجلسين تبحلقين لي فيها لا أسدها لك .. انا خلاص عفتك وعفت كل شي يجيني منك ...
فتحت فمي برد عليه بس مشى وتركني .. ركلت الكرسي اللي كان جالس عليه وأنا انفخ بقهر .. الحقير انسحب لو رجال كان وقف وواجهني ..بس هو رخمه ..!!!

((5))

(.. ماشأنكم ؟؟!!..)

ميشو

ولجت الى داخل المحل وعيناي تنظران الى الخلف يألهي ارجو ان لايكون قد لاحقني ..كم امقت هذا الفارس الذي لايفتىء عن ملاحقتي ,, بحق اعجبني في البدايه أعتقدت انه متميز عن الأخرين فتني مظهره الخارجي ولم يدم طويلا حتى أنكشف لي زيف مظهره الخارجي .. وتفاهة ضميره الداخلي فهو ليس الا ذئب اخر .. قبل قليل كان عليه ان يسد فاتوره كبيره لمشترياتي على أمل انا سنلقتي بعدها في أحد الأماكن وبالتأكيد لن يحظى بذالك الشرف ..
حسنا اين سيجدني الان سأختفي من هذا المجمع بالكليه ..
احتكاك عنيف واحساس بألم فضيع في كتفي الذي اشك انه بقي كتف وليس مجرد حطام وقبل ان اتفوه بحرف انصدمت بسيل من السباب والشتائم من امراءه تقف امامي ويال الهول لم تكن من اصطدمت به وكاد يحولني الى حطام بل هي مجرد مرافقه معه ..
الامراءه :انتي عمياء ماتشوفين ... عارفتكين يابنات ..........(لفظ غير لائق) تعمدن هالحركات ماتشوفن رجال الا رميتن حالكن عليه .. استحي على وجهك وقبل خافي ربك ..
صحت بها وأنا اكاد اتمزق من الألم الذي يعصف بي .. وبيد مرتعشه ابعدتها عن طريقي ..
ميشو :اغربي عن وجهي ..
الرجال :لحضه ياأختي اغراضك طايحه على الأرض ...
لم اشعر بها حينما سقطت من يداي الألم كان لايحتمل ... وبنظره شملته وشملت الأكياس المتكومه تحت قدميه ..
ميشو :وماشأنك انت دعها كماهي ..
لم افكر ان صوتي قد يشد انتباه المتسوقين ومن بينهم فارسي الأحمق ..
فارس :ميشو هذا انتي ..
وبدأ بجمع الأكياس الملقاه على الأرض ..
فارس :تعالي امشي تأخرنا ..
كنت مجبره على اللحاق به فأوجاعي لم تتيح لي فرصة الأختيار .. وخارج المجمع توقفت عن مجارته ..
فارس :تعالي ..
ميشو :توقف عن التفكير بحمق الى اين اءتي ..
فارس :تعالي معي أوصلك للمكان اللي تبين ..
ميشو :الأصابه في كتفي وليس بعقلي ..
فارس :كنتي بتجين معي قبل ولاكنتي بتهربين مني ...
ميشو :كلا ولكن لم اكن سأصعد الا سيارتك ولو كان فيها موتي ..
ابتعدت عنه وأنا أخرج هاتفي المحمول من حقيبتي بألم ...
اتصلت بالسفر ذالك الأخرق ليخبرني اين يقف .. الم اخبركم ان اضطريت لمعاودة الركوب معه لو يكن امامي خيار كريمه سافرت للخارج وسعاد لم تزال مسجونه في منزلهم ولأني لم اعتد البقاء في المنزل والتنقل جزء مني اضطريت لمعاودة الركوب مع هذا الوغد الأخرق ..
لم انتبه ان فارس مازال بجواري الاعندما حدثني عند رؤيته لسياره انه سيحمل الأكياس الى السياره ..
بعد ان صعدت الى السياره ووضع هو الأكياس بالمقعد الأمامي بجوار السائق ..
فارس :طمنيني عليك .. لاتنسين ماراح انام لين تكلميني .. باي حياتي ..
ميشو :الوداع ..
ابتسم على عبارتي فرحه بردي عليه ولم يفهم محتوى العباره انا أقول الوداع .. أي لالقاء بعد ذالك ..
ميشو :سفر اذهب بهذه الأكياس الى الجمعيه الخيريه ...
كنت انوي التخلص منها في سلة المهملات ولكن وجدت تلك العباره على لساني اجل جمعية الخير ستبعثها لمن يستحقها .. وأنا لست بحاجه لصدقه من شخص مخبول ولكني كنت انوي استنزاف أمواله .. عمل حقير اليس كذالك ..؟!! .. وماشأنكم انتم انا حره بالتصرفاتي ..
يألم اه كم هو مؤلم .. لم اصدق اني وصلت الى المنزل ..
لم استطع اخراج المفتاح من حقيبتي كنت اتألم بشده .. بالصعوبه وصلت يدي الى الجرس ضغطت على ذالك الزر المنكسر نصفه ولم ابعد اصبعي عنه ..
وعد :جايين لحضه الدنيا موطايره ..
هل اصبت بالهلوسه .. الم يكن صوت وعد ذالك الذي وصلني ..
وانفتح الباب ..
نواف :ميشووو وش فيك انتبهي لاتطيحين .. يوووووه كنك مسطوله وش شاربه انتي ...
وعد :ياربي شكله من كثر مانستهبل على كايد السكران الله بلانا وصارت اختنا سكرانه..
وصرخه :نواف امسكها ...
ضوضاء بعيده تبتعد اكثر وأكثر ,,وأنا اغوص في اعماق الظلام ..
برود تجتاحني وشيء لاسع يتحرك على خداي ..
افتح عيناي لأجد نفسي امام حشد من البشر وعيون مترقبه ..
ملاك :اشوووووى صحت ..
ضحى :ميشو تسمعينا ..
ميشو :أبتعدوا .. ماذافعلتم بي ..
سارا :نحرناك وش سوينا يعني اسعفناك وصحيناك من الأغماءه التي كادت تودي بك في داهيه ..
ميشو :كفففففففففففى ابتعداو عني ..
حاولت الجلوس ولكن الألم كاد يشل الجزء الأيمن من جسدي بأكمله ..

**Loli.** · 11-07-2011, 08:58 PM

رد: بلا رقيب / لعاشقه ديرتها ، كاملة

((6))

(.. قيس +الخطوبه =...)

وعد

هههههههههههههههههههههههههههههههههههههههههههه هههههههههههههههههههههههههههههههههههه ..
بلعت ضحكتي يوم شفت ضحى تلف علي والله لو مارجلي رايحه فيها كان ماهمني بس شسوي ماأقدر اهرب واذا طحت بيدها علي السلام .. بس والله تستاهل هالميشو ليش مازارتني يوم أني فالمستشفى ..
ياربيه والله الضحكه تطلع مني غصب شكلها نكته وهي تألم ..
سارا :استغفرالله العظيم حتى وأنتي مرضانه ماتوبين عيب يابنت لاتضحكين ترى مأنتي احسن منها ..
ضحى :بس انتي وياها .. وانتي ..
الكلام موجه لكتاب القواعد ..
ضحى :وش فيها يدك ..
ميشو :وماشأنك انتي توقفي عن التدخل بشئوني الخاصه ..
ملاك :اتوقع انا راسها منكفخ بعد ..
نواف :لاراسها فيه شي ثاني غير الأصابه ..
مسوي فيها ذكاء اكيد فيه شي ثاني فيه مخ ...
سارا :اتوقع هذا تأثير الخطبه ..
وعد :اللحين انتي تنخطبين وهي تأثر غباء هو ....
شهد :اووف يافضاوتكم اللحين وش بنسوي فيها ..
ميشو :اصمتي .. عن أي خطوبه تتحدث ..؟!
ضحى :موضوع طويل انتي اللحين كويسه ..
ميشو :كلا لست بخير ولكن يجب عليكم اخباري عن حكاية هذه الخطوبه ..
ملاك :اللحين حتى وأنتي وجعانه الفضول عندك شغال ..
ميشو :اصمتي انتي لاشأن لك ..
ادجرتنا هالمزعجه طلعت وتركتهم يتخانقون بالمطبخ .. لأن كتاب القواعد يوم طاحت شالوها ملاك وسارا وحطوها بالمطبخ وصبوا عليها سطل مويا بارد ويالله صحت لو صابينه على ثور صحى قبلها ..
الاصدق ماوجه الشبه بين ميشو والثور ..؟!!
لاتقولون حرف الواو خطأ ...
والله الجلسه بالرجل متعوره ماهو زين ملل .. شكلي بستغل الفرصه وأطلع لمنير ..
جرجرت نفسي لين وصلت الباب فتحته وصكيته وراي .. توقعت القاه بالسكه بس ماهو فيه والله مافيني اجرجر رجلي لين بيتهم بجلس شوي اذا ماطلع بروح ادق ..
اوووووووف ماهي حاله تأخر هذا اروح له قبل ماتطلع علي ضحى .. وبعد جرجرت رجلي لين وصلت بابهم وجلست ادق الباب لأن الجرس بعيد وماأطوله ..وخرت يدي بالسرعه يوم سمعت صوته .. ياويلي قييييييييس ..
قيييييس .. النجدددددددددددددددددددددددددددددددددددددددددددددد دددددده ...
قيس :جاي .. جاي ..
جمدت بمكاني ماأقدر اركض ..وانفتح الباب ..
قيس :خير ..
وطالع فيني من فوق لتحت ..
قيس :متى طلعتي انتي ..
وعد :اليوم الصبح وين منير ..
قيس :ماهو فيه وش تبين ..؟!
ياويلي وش اقول اخاف يطقني مثل سارا لو قلت اني جايه عشان منير ...
وعد :ضحى ارسلتني اعزم امك ..
قيس :ليش وش عندكم ...
ياللقافه وانت شكو .. خلاص جاين نعزمكم وبس لازم تعرفون ليش ومن بيجينا ومتى بيجون ووش بنطبخ .. صدق من قال الجيران ثيران .. خخخخخخ مثل من اختراعاتي شفتوا اني مو غبيه مثل ماتقول الأشاعات اللي يطلعنها علي توأم النكد .. يوووووه نسيت ارد على سؤاله المصيري ..
وعد :اليوم بيجونا ناس يخطبون أختي ..
ابتسم .. ياحليله مبسوط بس هو شكوو .. لايكون عاد نفسه واحد من العائله مثل منير .. صح هو انقذني وطلع طيب وفيه خير بس هذا مو معناه صار واحد منا ..
قيس :اختك من ..؟!!
لا اللحين اكيد بيصكني كف هو كلش مايحب طاريها وش اسوي اكذب واقول مأدري ولاكيف .. لا الكذب حرام بقول الحقيقه .. بيعصب خله يعصب محد قاله يتخذ اختي عدوه له وهي ماسوت له شي ..
بس قبل بتراجع على ورى عشان يكون عندي فرصه اكبر للهروب ..
وعد :سارا ..

نهاية الحلقه

**Loli.** · 11-07-2011, 08:59 PM

رد: بلا رقيب / لعاشقه ديرتها ، كاملة

الحلقه الثانيه والثلاثون ..

((1))

(..ألم ..)

ميشو

السابعه مساء ليس بالوقت الملائم للخلود لنوم ولكن هذا الألم الأحمق يجبرني على ذالك .. اه .. الا يحق لي الأحتفال بأنتصاري العظيم وأنا بكامل قواي وأخيرا تحقق ماكنت اسعى أليه لقد سيطرت عليه لدرجة أنه يرغب في الزواج بي .. ولم يبقى لي الا خطوه صغيره لتحقيق ذالك الأنجاز ..
وأنا في غاية الشوق لأجتياز تلك الخطوه ..
ولكن هذا الألم الحقيررر .. كم أكرهه .. يألهي لاأستطيع النوم اشعر بأني اتقلب على مزرعه من الشوك وليش فراش مهيء لنوم ..
مازلت اشعر بكيل الركلات التي تلقيتها على يد ذالك اللعين كم امقت ذالك المالك واود لو اخنقه بيدي هاتين .. ولكن ليس بهذه اليد المعطوبه ..
يألهي لماذا اسعى دائما لايلام نفسي .. فالحديث عن ذالك المالك لايزيدني الاسقما ..
منذ تلك الليله التي تلقيت فيها على يديه اعظم أهانه تعرضت لها في يديه والام جسدي لم تتوقف فأي لمسه او احتكاك اتعرض له تصيبني جرائها الام شديده ..
فجأه شعرت بأني لأشعر بالشيء بالتأكيد لأني ذهبت الى العالم الاخر .. عالم الأحلام والكوابيس ..
من طعنة رمح خلال الحرب التي خضتها بأحلامي استيقضت .. اه هل ذهب الألم حقا..
ميشو :اه هل ذهب الألم حقا ..
سارا :ملاك الحقي ميشوووو تهرج فصحى بأحلامها ...
ملاك :شكلها تألف كتب ادب وهي راقده ..
ميشو :انتما مالذي تفعلانه هنا ..
سارا :ولاشي بس بنستعمرك اسرئيل وأمريكا ماهن احسن منا حتى حنا قويات ..
ملاك : وبتدفعين لنا ضرايب على السنين اللي عشتيها بهالغرفه ..
ميشو :ولكن الأستعمار للأشرار ..
سارا :لاه بتقصين علينا اللحين بتفهمينا ان امريكا ام العالم شريره دوريلك اغبياء تكذبين عليهم ,, اصلا امريكا هذي ام الخير اللي تبذل كل جهودها وترهق عدتها وعتادها عشان تنشر السلام بالعالم لكي تعيش الكره الأرضيه والكواكب المجاوره بالسلام وتنعم بالرخاء ..
ملاك :يخرب حررررررريشك سارروو ماأنتي هينه لبلب بالتعبير كنك تلقين خطبه ..
سألتني سارا بأبتسامه من نال جائزة نوابل ..
سارا :ميشو وش رايك اعجبتك ..؟!
اجبتها بأبتسامه واهنه ..
ميشو :جيده لابأس بك ..
أكملت ملاك بمرح كنت سأستسيغه لولا دوار رأسي ..
ملاك :المهم لاتغيروون الموضوع الغرفه هذي وقعت تحت ايدينا تبينها ادفعي جزيه ..
سارا :لأاحرام هي مسلمه ماتدفع جزيه ..
ملاك :اجل وش تدفع ..
سارا :خراج مادرستي تاريخ انتي ..
ملاك :لا ماكنت احضر الحصص كنت اهرب ..
سارا :يالفاشله وأنا اقول ليش كنت اسقط بالجغرافيا ..
لأعلم مالعلاقه بين الأمرين ولكن بالتأكيد توجد علاقه على الأقل بالراس سارا الصغير الفارغ ..
ملاك :الا صدق ميشو بتوافقين على الخبلللل صديق الخبلللل ..
سارا :اللحين البنت يقالها فهمت اشرحي لها من الخبل الأول واعربي الخبل الثاني وعللي وجود كلمة صديق بين الجملتين ..
وقاطعت حديثها المفعم بالحماس بلهجه محبطه ..
سارا :لاتوافقين عليه بيطلقك ..!!
ميشو :أعلم ذالك ..
ملاك :تكفين ميشو لاتصيرين هبلا وتقولين بوافق عليه عشان افتك من هالعيشه ترى عيشتنا ماهي شينه لهدرجه ..
سارا :صح انا فقرانين وغلا الأسعار ماسوى فينا خير بس للحين عايشين ..
ملاك :لاتخافين ماراح نموت من الجوع انا وسارا مستعدين نشحد لو ساءت الأمور ..
اغتصبت ابتسامه كانت جاهزه للخروج عند أي جمله وكانت هذه الأجمل ..
سارا :بعدين هنا بالسعوديه محد يموت من الجوع عندنا جمعيات خيريه ماتقصر بس بتنتفين شعرك قبل مايقتنعون انك محتاجه ..
ملاك :ولازم تجيبين له توقيع من بوش الأبن يقر انك محتاجه ..
سارا:واذا عندك واسطه اللي تجي بالوسط تسهلت امورك يصرفون لك لوعندك حساب بمليار ريال ..
ملاك :خلاص ماأنتي موافقه صح ..
ميشو :ولكني لست الجمعيه الخيريه ..
ملاك :ههههههههههههههههههههههههههههههههههههههههههههههههه هههههههههههههههههه هههههههههههههههههههههههههههههههههههههههههههههههههه ههههههههه ..
سارا :قصدها بترفضين الخبل صديق الخبل ..
ههههههههه حقا ماأغباني ولكن هل الام اعتقد ان هذا التوأم لو اردا اقناع الكونجرس على اخراج اسرائيل من فلسطين لفعلنها ليستقيل بعدها جميع المجلس ..
ملاك :يالله عاد وش قلتي ..
قاطع عبارتها دخول شوق ..
شوق :اووووف انتن هنا وانا تكسرت رجولي ادوركن ..
سارا :الله من كبر البيت عشان تكسر رجولك ..
شوق :اللحين المفروض تكونين مستحيه ومقطعك الأدب ماهو لسانك وش طووله ..
ملاك :تكفين يالحيووويه انتي ..
شوق :ليش انا المخطوبه ..
ملاك :ودك انتي ..
اجابتها شوق بخدين محمرين ..
شوق :وليش لا دي سنة الحياه ..
ملاك بضحكه :استحت البنت ..
شوق :اووووووووف والله انكن سخيفات ..
وهمت بالخروج ..
شوق :اووووف نسيتني ليش جايه سارووه ضحى تقول انزلي يالله بالسرعه ..
ملاك :ياهوووووو يالله سارا ننزل ...
استقامت سارا بالسرعه واقفه ..
سارا :وش رايك فيني طالعه حلوه ..
ملاك :ناظري بعيوني وتشوفين انعكاس القمر ...
سارا :ملاك طلعتي شاعره ..
ملاك :من مبطي وعندي معلقات بعد تبين اقولك وحده من قصايدي ..
سارا :تفضلي ..
ملاك :الو الوو بابا فين بابافين .. بابا هنا هنا اهووه ..
سارا :قسم بالله من سمعت هالقصيده وانا اقول انها ماهي غريبه علي هالفكره ..
ملاك :شفتي كيف هذي كتبها وعمري خمس سنين ..
سارا :ياقلللبي كنتي تعانين ..
ملاك :اكمل ..
سارا :لاخليها بعدين بالليل ننسهر نناجي القمر ونقصد للنجوم .. بس اللحين عيدلي درس كيف اصير مستحيه ..
وخرجتا من الغرفه وهما تتناقشان بالدرسهما الرائع .. ربما انصح ملاك بعمل دورات لتدريس الفتيات نصائحها الرائعه بالنسبه للحياء المصطنع لمن لاتملك الطبيعي منه ..

((2))

(..سارا والمستقبل ..)

ضحى
حاولت ارتاح لخطوبة سارا بس ماقدرت .. القلق محاصرني واللي زايد همي أنها موافقه راضيه فيه .. صح هي فرصه كبيره انها تتزوج بظروفنا هذي .. بس لازم اتأكد من انه يستحقها اختي ماهي رخيصه لذيك الدرجه ضروري قبل ماأسمح بهالزواج اضمن انها بتعيش حياه هاديه مع انسان عاقل يستحقها .. حتى لوكان هالشخص قريب بيحمل لقب طبيب هذا مايعني انه بيقدر أختي وظروفها اللي عايشتها واكثر شي اخاف منه انه يجي اليوم اللي يشمت فيها وبحياتها قبل ماتتزوجه .. خواتي عانوا بحياتهم بمافيه الكفايه واليوم اللي بيتزوجون فيه لازم يكون تتحول بحياتهم من الشقاء للسعاده ..
خايفه من الفجوه الكبيره في المستوى التعليمي بينهم وأكيد بتسبب لهم بمشاكل كثيره بس اذا كان انسان فاهم وناضج بيقدر بمعرفته يقلص من هالفجوه ويمكن يقدر يقنعها تكمل تعليمها ويسوي اللي ماقدرت انا اسويه ..
.. و دام هو خطبها وهو عارف ووين واصله بتعليمها اكيد راضي فيها .. والصراحه الرجال بعضهم له طفات غريبه يعني مو كل متعلم وواصل للمستوى عالي في التعليم يطلب زوجه متعلمه اوجامعيه بالعكس بعضهم مايبغى معها الا شهادات الثانويه ويمكن هالجواد واحد منهم ..
أنا واثقه ان اختي تستحقه بس ياليت هو يستاهل سارا ماراح يلقى لها مثيل ..
دخلت علي وعد وهي تجر رجلها اللي ماأعقتها عن الخبال ..
وعد :جوووووو حريم كثار ..
ضحى :طيب اطلعي فووق انتي وخواتك لاتنزلون لين يروحون ..
وعد:بس ...
قاطعتها وانا ائشر لها على فوق ..
ضحى :لابس ولاشي يالله فوق ..
ثواني ودخلت شوق ووراها الحريم ..
سلمت عليهم بتحفظ .. قالت لي وحده عرفتني على انها خالة ملاك وسارا بعد ماقهويناهم ..
الخاله :انا اليوم ماني جايه اخطب سارا .. لأنها بنتي وتنخطب مني مو انا اللي اجي وأخطبها .. بس انا جايه اليوم اتعرف على أهلها وعشان الرجال يخطبوها .. وانتي اختها وأكيد لج راي بس تأكدي اني ماأخترت لبنتي سارا الا أحسن عيالي ..
وجلست تكلم عن عيالها وأخوانهم والعايله بشكل عام واللي معها كانت شغلتهن التفرج على البيت بتقزز ..كان ودي أقولهن ترى اذا مو عاجبهن يقدرن يطلعن ماهن مجبورات يجلسن يعني بس سكت عشان سارا ماأبغى اخرب عليهاحياتها المستقبليه قبل ماتبدأ ...
وحده منهن مانزلت عينا من على أختي شهد اللي كانت تقهويهم .. وهذي مو اول مره اشوف هالمنظر حتى بعزيمة مرت أبوي كانت نظرات كثير من الحريم على شهد .. على فكره شهد أجمل خواتي بأختلاف مزايا خواتي هي الأجمل .. معقوله يجيها نصيبها قبل خواتها اللي اكبر منها مشاعل وملاك .. لاجاء وشخص مناسب مستحيل ارفض عشان اللي اكبر منها ماتزوجوا هذا مو عذر لأن النصيب مايعرف عمر والزواج قسمه ونصيب ..واذا مقسوم لها تتزوج قبل اللي اكبر منها ماراح امنعه ..
كانت وحده من الحاضرات تكلم وماأنتبهت لها الا يوم لكزتني شوق اللي جالسه جنبي بكوعها .. وهي تهمس بأذني ..
شوق :وش فيك تقولك يبون يشوفون سارا ..
ضحى :اه .. اطلعي فوق نادييها .. بس هي لاتخلين احد غيرها ينزل ..
دقيقتين بس اللي مروا قبل ماتدخل علينا سارا وكل الأنظار توجهت لها .. اللحين هذي وش جابها .. وش فيني انا المفروض ماأستغرب يعني معقوله ملاك بتخلي سارا تنزل لحالها ..
سلمن وجلسن على جنب .. وخالتهن هي اللي عرفت الموجودات عليهن ..
جلست حابسه انفاسي لين طلعن ماأحب هالنوع من الحريم مايشوفن الناس قدامهن شي ..
سارا :ضحى قلتي لهم اني موافقه ..
ملاك :الحمدالله والشكر يالخبله تبغينها تقولهم انك موافقه بالنفس الوقت اللي هم جايين يخطبونك فيه ..
سارا :ايه عادي وش فيها لازم يعني حركات الغباء هذي هم يعرفون انها تعرف ليش اللف والدوران ..
شهد :الله يكملك بعقلك تصدقين احس ان خالتك ماعندها نظر ..
ملاك :والله اللي ماعندها نظر اللي بتصير عمتك مستقبلا بس خالتي كلها نظر يوم اختارت سارونا السكره اصلا هم لويلفوان الرياض كلها ونجد كلها والممملكه كلها والخليج كله وشبه الجزيره العربيه كلها والشرق الأوسط كله بس بدون يورانيم واسيا كلها والدول كلها والعالم كله والأرض كلها والكواكب كلها ومجرة درب التبانه كلها والمجرات المجاوره كلها والكون كله يحلمون يلقون مثل سارونتي ..
كانت ملاك تصارخ من جهه وتمط بالكلام ومن الجهه الثانيه شهد تصارخ تبي تسكتها ..
شهد :خلاص خلاص اقتنعت ان سارا مافيه منها بس تكفين اسكتي ..
ضحى :بس انتي وياها صدعتني راسي يالله انقلعن فوق ..
ملاك :هى تطردينا مو المفروض انتي اللي تنقلعين على بيتك ...
ضحى :ملاك طسي عني ..
ملاك :ماني على راسك ..
ضحى :ملاك ..
ملاك :ضحى انتي ليش كذا عصبيه قبل كنا نقول دراسه والبنات رافعين ضغطك بعدين قلنا متوتره عشان زوج الغفله اللحين وش عذرك ..
جيت برد عليها بس لاحضت ان كل اللي بالصاله سكتوا حتى وعد وشدن معقوله لهدرجه مهتمين للجواب ..
ضحى :ماشاءالله اخت ملاك ومن حضرتك عشان تسأليني او تحاسبيني ..
ملاك :انا ماحسبتك اسألك بعدين ليش تكلميني بهالطريقه وكأني اقل منك ..
ضحى :ملاك ضفي وجهك عشان مصلحتك ..
ملاك :واذا ماضفيت وجهي وش بتسوين يعني ..
سارا :خلاص ملاك ..
ملاك :لاموخلاص هي ليه ماتفهم انها مثلنا وماهي احسن منا ...

بلا رقيب / لعاشقه ديرتها ، كاملة

تعليق

تعليق

تعليق

تعليق

تعليق

تعليق

تعليق

تعليق

تعليق

تعليق

google Ad Widget