.
.
.



من الكسل قاعد اقلب ملفاتي واجيب من التصاميم القديمه
وارزها فيذا يمكن احد يعجبه شي ويشتري !!

...

المهم صبحكم الله بالخير جميع كبيركم والصغير والله يتمم على مرضى المسلمين الشفا
قولو امين لانه في ناس بحاجه للدعاء

نجي للشخبطه !

اول شي لحد يرجع للصفحه اللي قبل هذه خاصه اصحاب القلوب الرخوه والضعيفه
اللي ماتتحمل الضرب من تحت الاحزمه

خليكم هنا احسن اصلا مدري وش صايبني امس وانا انحلطم عليكم
تقول شايبن مضيع طاقيته وهي فوق راسه

ثاني شي ببارك لشهرزاد بدايه دوامها وبالتوفيق ان شاء الله وربي يكتب لك كل خير
وعقبال العزابيه << قصدك العاطلين

ايوه العاطلين سوري بس تحمست شوي ماعليكم
بالتوفيق شهرزاد وماشاء الله عليك من كلامك طحتي في المجتمع والمكان اللي انتي تحبين
وتدوري عليه من فتره ..

خلاص اخيرا صار موضوع البصمات الخمس رسمي عندنا بالامانه وتو راجع
من بصمه الساعه (9) صرنا تقال برزان بروضه مانطلع الى مع ابواننا

اللي يرفع الضغط ثلاث بصمات بين كل وحده والثانيه ساعه وكل وحده مدتها ربع ساعه
(9) و (10) ونص و (12) ونص

التاخير يعني الالغاء والالغاء يعني الحسم كل بصمه عليها خصم ساعه ونص من اليوم
واليوم كله (6) ساعات يعني وش بقو لنا

المشكله مصبحين علينا بالتعميم اليوم من بدري تقول خايفين اننا نشرد
ومانرجع لهم نبصم خلاص سبق السيف العدل وطارت الطيور بارزاقها

تدرون عاد وين المشكله ان الجهاز او الاجهزه اللي نبصم فيها والله جنب باب الاداره
يعني بثواني وانت باصم بس ياشين التقييد وعدم الثقه هذه اللي مي حلوه

بالموضوع !!

يالله ماعليكم اهم شي الاتحاد هزاء الهلال زي كل سنه والنصر رجع لمكانه وباذن الله
الصداره جايه وراجعه قريب

فما عليا من شي

كونو كما تحبون وانجوي اقوى شوي ولاتنسون اللايك والشير والتقييم وكذا

>> من زمان نفسي اقولها

وربي احسني هلوست خلاص من كثر التعامميم والخطابات اللي نسويها ونتلقاها كل
شوي ومن البصمات احس الوطن العربي كلهم عرفوا ببصمات الامانه

الام بي سي والعربيه فضحوا فينا

يا لله بطلع قبل اجيب العيد

خودافس

والله العظيم اني مشتاق ونفسي بوحده بس وحده
ياربااااه شعور رهيب يالله ماعليكم !!

واخيرا اتحررت واخيرا اتحررت

ايوه كذا احسن كذا اشيك كذا اكثر اريحيه وانا معكم وبينكم
اول بالسقف ذبحني البرد وربي مو حلو الدوفره بدون طلاب وكذا لازم اكون

معكم وللا ماله داعي تواجد اصلا !!

رد ع الطاير بس عشان بعلمكم اني نزلت لكم

سلام

ايوه وقفها عندك !

ياخي ليه ماتوقفها عندك اي اساءه لاي شخص جاتك من اي احد

وقفها عندك !

ليه تخليها توصل للشخص المقصود بالحكايه او تظن انه هو المقصود

وقفها عندك !

ياليت تخلي هذا شعارنا وخاصه بعالم النت وبمواقع التواصل ليت
نمشي على ذا الموضوع على طول

وقفها عندك !

ش المشكله انك توقفها عندك يعني بتخسر شي لا والله بالعكس بتريح
ناس وبتريح راسك انت بالاول

من السوال وايش معنى وايش تقصد وليه انت بالذات
اللي ماوقفها عنده

ياخي وقفها عندك !

قوي قلبك ولا تطاوع نفسك لان النفس احيان تميل للشر
الى اذ سيطرنا عليها صح

وقفها عندك !

لتكون ممر لاي شي وتوصل كل شي لا وانا اخوك ماهي شطاره وربي
انك تكون ممرر للكلمه او للقصه او السالفه اللي وصلت لك لا

وقفها عندك !

شوفو لو بس نترك الحماس الزايد واللقافه اللي مالها سنع ونترك الموضوع
بس كم ساعه وبعدين نرجع نفكر ننشر او نوقفها عندنا !

والله بتلقى انك لو توقفها عندك افضل

المشكله بعضهم يحسب بتكون له حظوه عند الطرف الثاني اللي وصل له السالفه
او القصه او الحكايه لا والله بتطيح من عينه وماعاد بيحيكي لك اسراره

وتحلطمه من بعض الاشياء لانه شافك وش سويت مع غيره
فنصيحة اخو ( وقفها عندك ) وخلها توصل من غيرك اوتموت لوحدها بدون ماتوصل

انتم تدرون بعضنا يحب يفضفض لناس وناس لا كذا القبول والمحبه من الله سبحانه
فخذها نصيحه مني اذا احد فضفض لك او استامنك على شي

حاول قد ماتقدر توقفها عندك !

لا تخليها تتجاوز حدود مكانك يالطيب اوكيشن والكلام لنا جميع مو لاحد بعينه

كونوا بخير وتذكرو دايم

وقفها عندك !

سلام

آأإأآم بآأإأآك

>> اهلن وسهلا حياك الله

البقى يابعد حيي البقى خشمك اقول

ماعلكيم من خرابيطي مع صوت الضمير بوريكم شي بس لحظه بروح اجيبه

ياهوو وربي ما دخن اش فيكم انتم قسم مادخن بس كنت ولا الان لا والله
ما دخن هذه معلومه ع الطاير

واصلا خويكم صاحب ذا المدونه القهوه مايشربها اصلا
كيف تبونه يدخن سلامات !!

مدري مين قريت له قيل فتره يقول ما اشرب القهوه قلت بس اخيرا لقيت
واحد من طقتي مايشرب القهوه لا عربيه ولا افرنجيه ولا هم يحزنون

اللي زي كذا يصفون معنا ترا المكان واسع حياكم الله ياخوان

المهم معليكم اليوم مدري وش فيني
شوي فووق وشوي وربي متقربع وحالتي لكم عليها يمكن البصمات لها دور
مدري بس خلاص اصبعي راح فيها كل شوي بصمه

احس بيهج من يدي بعد فتره طفشته عاد العالم تبرمج اصبعين انا ووجهي مبرمج لهم اصبع
اقول عشان اذا صار شي اخليها عذر مابصم ادري مع نفسي

بس ماعلينا اهم شي الاخلاق

صح قبل انسى ببارك للمشرفين اللي نالو اوسمه الاشراف الممميز
تنهيدهـ - رتيل - وماريا ذول اللي شتفهم لليوم ويعذروني الناس اللي ماشفت تكريمهم

بس مبرووكين ياصبايا ومنها للاعلى تستحقون صراحه كل خير
وعقبال مانشوفكم ماسكين اماكننا اللي مغير نترزز بها من فتره

يالله خلوني احول لكم شوي ع القناه الثانيه دام ماعندي سالفه
والمود كانه انعفس شوي !!

كونو بخير واحلى سلام للكل


واجازه سعيده باذن الله للجميع ومباركين للي خلصو اختبارات ومن الفضاوه
جايين هنا يحشون فينا امزح وربي


خوادافس

صآر الفضآ حلم , و عصآفيرنآ صدور
في " غصن الأمآني " , ليتنآ مآكبرنآ

ســــلآم الله عليكم يالربع .. أخباركم !
بدايه اسبوع جديد ان شاء الله انه يكون افضل واحسن من اللي قبله
واتمنى لكم بدايه موفقه وختام جزء اول من الدارسه

ايوه الاسبوع ذا الاخير عندنا اجازه اسبوع رجعنا للدلع وكذا يمين طلابنا
فالين اومها كل شوي اجازه اما لو اني طالب في دول الخليج

واشوف اجازه الطلاب السعوديين شكلي اطق او يصير فيني شي
عاد لحد يقول اقصد شلة الهربيته العمانيه ورده وماريا واللي معهم لا لا

المهم اجازه موفقه وسعيده باذن الله !

نقطه ونهايه سطر

نجي للمدونات اللي توجت معنا ذا الاسبوع ببارك لهم !
مبرووكين ( ماريا - فارس - الحل الصعب )

تستحقون اللتويج صراحه الف مبرووك ودعوه للعالم حقين التدوين
تقييمهم يستاهلون صراحه ..

نقطه ونهايه سطر

وصلنا للشتا احسه جاي بدري ذا السنه بالعاده يكون بنهايه الشهر هالمره جا مع نوفمبر يجري
تقول احد وراه عاد اشين شي يبدا الشتا وتكون معلول
ومزكم هنا ودك تسبح في براد حليب زنجبيل !! مع اني ماحبه بس احيان تنجبر عليه

المهم ماعليكم والله يخارجنا من ذا البروود

سلام

مشكلتنا ندور السعاده على طول ونحسب انها بتدوم لا والله لازم شوي مطبات
على كم بريك وانت ماسك الخط لازم شوي انزلاقات وكذا

طولو بالكم واستعينوا بشوي صبر وزي ماقلنا هي الايام كذا
يوم لك وعليك ويكفيك الله شر !!

بس تدرون ويمكن تكونو ناسين ان بعد اي عسر وعدنا الكريم باليسر المضاعف

فإن مع العسر يسرا * إن مع العسر يسرا *


هنا يبن لنا ربنا ان بعد الشده رخاء وبعد الكرب فرج عشان كذا لازم نصبر شوي
لبعض الامور اللي تمر علينا وتصيبنا بدل لا نلوم انفنسا بزياده
ترى الامور ماتجي سهله خاصه في البدايات واي شي بداياته تكون اصعب

يعني بالعربي حقنا ماندري وين الخير يكون فلازم نطول بالنا شوي يكمن الخير
في القادم من الايام وراح تضحك على نفسك انك كنت زعلان وشايل هم الدنيا على راسك

وعسى أن تكرهوا شيئا وهو خير لكم
وعسى أن تحبوا شيئا وهو شر لكم والله يعلم وأنتم لا تعلمون

هنا دعوه من الله سبحانه لعدم الاستعجال في بعض الامور
لاننا بشر ماندري وش المكتوب او ايش رايح يصير لنا مع الايام
فلا نستعجل بالنواح والصياح والتشاؤوم والامور باذن الله وبقدر منه

والله كريم حكيم رحيم بالمومنين !

سبحان الله مدري ليه مانهدي شوي ونتوكل على الله في الامور كلها
نقول دايم ونعم بالله وكذا بس في قراره انفسنا لا مانطبق ذا الشي

مانحاول نكون متوكلين حق التوكل على الله في السراء والضراء
في كل امورنا خلونا نقوي شوي وقفتنا مع انفسنا عشان نهديها

دائم ترى المصايب تبدا كبيره بس تصغر لا توقفون عندها كثير
وتخلونها تشغلكم عن كل شي لا !!

وترى احيان نشوهفها مصيبه وهي لا !

شكلي مقفل الموضوع مدري وش قاعد اقول من اول قلبت قناه المجد
على قول نفر الله يذكره بالخير

صاير مدري وين يختفي لي فتره ما اشوفه من بعد الصداره
مسوي حركات يعن ني ني ترا مع نفسك حدك الجوله الجايه
وتصير الرابع وبعدين دور تلحق بالصداره

فـ امان الله

خلوني اطلع قبل اجيب العيد

ســلام

خلاص تكفون لا عاد اشوف تقييم من احد حتى اللي بيمدح ماله داعي
بجد التقييم ترى غير لا تخلونا نكرهه !!

بجد في تقييمات مدري كيف تحذفك من فوق حذف ولا احدن سمى عليك
فمن الان لحد يقيم خلاص بح يكفي شكرا !!

ليت اقدر اقفل الخاصيه وربي لقفلها بجد مدري وش يحسون فيه بعضهم

لا تعليق اكثر من كذا لاني بصراحه مدري ش اقول
وبنفس الوقت مبغى اجيب العيد !

طبعا الكلام مو للكل بس بالعاده الشي السئ يخرب مليون كلمه
زينه لو مهما سويت تاثير الكلمه الشينه اكبر واقوى وياثر اكثر



سلام

اي والله استغفر الله وآأإأآتوب إأليه .. وسلام عليكم
البارح حسابي متهكر او ان مخي هواللي متهكر وكذا

فما ادري انقزو ردي الاخير ولا كانكم شفتو شي اصلا
اهم شي كل واحد يصلح سيارته !

وشكرا ع الدعم اللي وصلني من اهل العناد اللي يقولون احد يقول لنا روح يمين
نروح شمال لا خلاص خليكم براحتكم تبون شمال يمين اي شي
اهم شي تشكرات مليون ع الدعم

شكرا كمان للعالم اللي وصلت دعمها بكذا مكان هنا او تويتر او
الاسك المهم ربي يسعدكم جميع ماعليكم زي ماقلت لكم

كنت متهكر نوعا ما بس الحمد لله الامور طيبه وربي

وذا اخر رد بالصفحه وبعد شوي بقلبها واخليكم تنسون وش قلت امس

يالله بفطر وببصم جننا الجنوبي اميننا الله يسامحه بس الكرسي مايدوم لاحد
ومصيره يدور مارافع ضغطي الى الكذب اللي يطلع بالاعلام

واللا الباقي وربي مافرقت معنا !

يالله سلام قبل اجيب العيد

واتهكر انا بكبري فـ اقرب جمس عاد من يلعب مع وزير وكذا
وزير السلطان اذ شفته مار انخرش كيف لو وزير اصلي زي اميننا

خودافس