.
.


.
.

من اقرب التصاميم لقلبي وللان محتفظ فيه ومبروزه عندي
احب هذه الكلمه لين صارت لزمه !!

بس بجد صارت له ثلاث سنوات هذه التصميم ياربااه قسم بالله
الايام تمر بسرعه مسرع مرت ثلاث سنوات
والرابعه على الابواب !!

احسن شي اني حاط التاريخ شي تبقى ذكرى حلوه على مر الازمان !

نقطه ونهايه سطر !

ايوه اللي يسالون وش فيك ومدري ايش وربي عادي بس ساعات
تتكرن وتمسك معاك غلط الامور طيبه ياربي لك الحمد

نفسنه شوي مع كلم كلمه وتحمست بردي اللي قبل
بس نبدا صفحه جديده معكم وباذن الله تكون افضل

وحياكم الله معنا جميع !

بس بالله الطواقي يشفون لهم مكان ثاني ماعندنا مكان لهم
الى ابو العز يمون وربي لو يبغى احول طاقيه معاه ماعندكم مشكله

قال ايش لجنه توثيق هههاي سلامات حنا اليوم اللي طالعين على الكوره
عشان يجي مين يعلمنا فريقنا كم بطوله عنده

مع نفسكم وربي لو للصبح يتكلمون العالميه تبقى صعبه وقويه
تنهيدهـ هاتي القهوه بس والشريط والسياره من عندي والتفحيط بعد

وبنمر طيف وشهرزاد وشلظ الهربته العمانيه نلعمهم عن النصر وكذا
نفر سوي نوي صديق ابو العز نزل الطاقيه وتاخوينا بس هاه كل المشوار
بنشغل اغاني نصراويه اذ عندك مشكله مع نفسك

ومين بعد صح بناخذ رتيل شكلها نصراويه بس مابعد عرفت زين
وكمان انه الحرف بناخذها ياهو الفاضي يدك لايك

هنا وبناخذه معنا !

سلام سلام قبل اجيب العيد

خودااافس

وافضيحتاه لسى فيه عينات كذا ياويل حالي ويلاه
والله احسبهم انقرضوا على قول تنهيده بس الظاهر لسى باقي القشور


هذا كلام انة الحرف وان فيه من انقلب وتغيرت معالمته بعد ماعرف هيا من وين
قسم كانه اكتشفت سر الربيعات العربيه او عرف سر مثلث برمودا
او اكتشف داعش وش اصلهم سلامات يابو

للكل الحق في الفخر والتفاخر بدوله باهله بناسه وكذا
بس مو توصل لهذه الدرجه سلامات من انت طال عمرك !

بس تصدقون اللي زي كذا وتفكيرهم كذا احسن لنا انهم يغيرون فكرهم ويبعدون عننا
هذول بعدهم ارحم من تواجدهم في مجتماعتنا لانهم بياثرون اكثر لو بقو

فا اقول المفروض انوش تفرحين ببعد ذا العينات وخليهم
يغيرون لين يشبعون مع نفسهم على قولتنا !

بس تعالي شوفي بعض العينات اللي تمر علينا حنا الشباب من بعضهم
وهم قراب مننا بدرجه كبيره يعني يمكن يكون من نفس مدينتك وكذا

مع كذا يقلب عليك ويتغير بلمحة بصر وبغمضه عينا والتفاتتها

تصدقون ان اللي نشر مره خبر وفاتي هنا بالمنتدى انه من اهل المدينه ويمكن مابيننا
الى كم شارع مع كذا نشر خبر وفاتي في فتره كنت غايب فيها !!

يعني وش اكثر من كذا ما ظنيت فيه عقليات مريضه زي كذا
المهم ماعليكم

الناس اللي تفكيرها مايبعد عن شوفة نفسها فراقها عيد وربي

تعبنا نقول ونسمع ونشوف ناس تتلكم عن ذا الموضوع بس الى مايطلع لك تخلف
وعينات زي كذا بس تصدقون عشان نحمد ربنا على النعمه اللي حنا فيها
والعقل اللي ربنا رزقنا اياه !

الحمد لله على كل شي

فـ الاخير

تصدقون اشوف اغلبهم يتكلم كذا بعد غبنه صارت له من اللي تكلم عليه
او غير فكرته عنه غبنه من اي شي بس مايدري كيف يقول او يبعد ويحش

الى انه يشوف له عذر عشان يتكلم او يغير فكرته

اشوف اهم سبب بالموضوع الغيره من ( التفوق النجاح القبول التمكن
الاستمرايه التطور )

فيه ناس كثير عندها حقد ينمو اذ شاف هذه الامور اللي قلت عليها متوفره
في شخص وهو ماله من اغلبها نصيب فيظهر الجانب السي منه والحاقد

فلا احد يهتم ولا ياخذ بخاطره بنقابل عينات كثيره كذا هنا وبحياتنا
فيه ناس كل هما تكون زيك او احسن منك واذ ماقدرت تقلب عليك وتقعد تتصيد اخطائك لو هي بسيطه


مدري بس كذا اشوف

ع العموم حصل خير والدرب تتسع للجميع ابقى وفكر بشكل سلبي او امش وواكب
الركب واترك عنك ( العنصره التقليد شوفة النفس ) فـ الاخير كلنا واحد

مهما اختلافنا يبقى يجمعنا مكان واحد ولغه وحده وفكر واحد
على اختلاف قدرات هذا الفكر من شخص لاخر

كونو بخير

وبس سلامتكم شي في نفسي وحطيته هنا

سلام

آأإأآم بآأإأآك

اما مع ذا الموضوع لازم يكون لي رجعه لو مهما يكون

هذآأ خوينا وصديق الكل ابو العز الف الف الف مليون مبرووك
ربي يسعدكم بها ويحفظها لكم ويجعلها ربي من واليد السعاده
ويرزقكم برها ورضاها والجنه

مبروك ابو العز ماجاك يالخوي



الف مليوون مبروك وربي فرحة لك يابو العز كانك واحدن من اخواني
ياخي ذا الادمي له معزه غير وربي

دايم يحرجنا بكرمه وطيبه وعلو اخلاقه

الف مبرووك عبدالعزيز ماجاك مره ثانيه الف مبرووك
وسمها (عيده) وسمايتها عليا وددسن جديد بقراطسيه

يالله بطلع اهم شي نترك بصمه حلوه بذا الخبر الحلو ربي يسعدك يابو العز
على هذه الاخبار

ايوه عطونا اخبار تفرح خلونا نفرح شوي ماشاء الله على ابو العز
الله يحفظها لكم

سلام

ســـلآم عليكم .. ومساكم الله باللي تحبون جميع
كيف الاحوال مع البرد ذا !!

ياهو جانا بدون مقدمات شوي ونطير معاه وربي
الله يكفينا واياكم شر البرد وامراض البرد قولو امين !!

ماعليكم تعالوا هنا

عندي سوال من زمان ودي اسال وكذا الان طريقتي فـ الكتابه
هنا تعقد يوم تقرونها

قصدي اللهجه ماثره في الكتابه او عاديه !!

ياخي مدري ليه ناس يقولون يوم نقرا لك هنا نتقعد هم صادقين
ولا كيف

عشان بحول اكتب بالفصحى اذ عقدتكم شوي اللهجه لاني ساعات اكتب بنفس
طريقة نطقي للكلمه ومطنش اللغه وكل شي فما ادري عطوني رايكم

ولحد يقول كتاباتك رهيبه ادري << برا برا

كلامي عن اللهجه والطريقه اللي اكتب فيها مو المضمون بالله ركزو قبل تجاوبو اوكيشن

نجي للاخير

قبل اقفل ذا الرد شكر بحجم كرمكم ودعمكم وكل شي الله يسعدكم
وربي انكم سعاده بالدعم والمشاركه وكل شي

كونو بخير وربي يوفقكم

لي عوده اذ ماصار شي

فرحان اليوم فاز ترامب ماودي تفوز هيلاري مع انهم كلهم
نفس الطينه والعينه وحده بس نبي واحد مخفه نطقطق معاه ياهو توحفه ترامب وربي

يعني بنطفش من الطقطقه اللي يكفي المسلمين شره بس
ويحفظ علينا امننا وكل شي

يالله بطلع سلام

آأإأآأإم بآأإأآك

<< اصلا ماطلع يكدب
بدايه بحش مع نفسي وش لك شغل طلعت او باقي كنت ازور بعض المدونات
الصديقه تعرف مستحيل فيه مدونات جديد مكتوب فيها

وماكون هناك اخذ اخبار الشعب !

على طاري المدونات ياخي جاني مره اقفلها كلها واحذفها واطلع انام
لحد يقول ليه كذا مسكت معاي غلط

لو ماسجلت خروج وتعوذت من ابليس كان تلقون مدوناتكم كلها بالمحذوفات
اما لو يشوف كلامي الصمت الظاهر من بكره باند

بس وصاتي اذ بتشيلوني حطو تنهيده مكاني او غلاهم وطيف مسكوها الاشراف مع شهرزاد
اما يابتصير المدونات حفله وربي

على طاري طيف المهويه وين هي مختفيه يوم جات خويتها لنو هي اختفت تقول
انه مسكها جني الاستكنان !! مدري

لا بس تخيلو معاي تنهيده المراقبه على ذا القسم غلاهم مشرفه مع طيف وشهرزاد
بالله كيف بيخلون القسم احسهم بيخلون المنتدى يصير ترند باول شهر
على مستوى المنتديات السعوديه

بس كمان كنت بحذف مدوناتهم مدري ليه اما لو صحيتو اليوم وكلن يدور مدونته
ياااي وين مدونتي وين راحت

وربي شي تجون هنا تلقون اربع ولا خمس مدونات ومثتبت مدونتي فوق
عاد احد يقول لي شي اتحداكم

اقول حسابي تهكر << احلى عذر

واروح اسوي مسكين عند الصمت والوزير قسم فكره
بس خلاص ماش ماحذفت شي وعدت النفسنه على خير

اما انة الحرف لو جات ولقت المدونات كلها محذوفه وش تتوقعون بتسوي
عاد تعرفني مع نفسي ودايم امشي جنب الجدار وش صار لي

احسها بتكلم نفر شفت الوسمي وش سوا او لا شي يستحق عاد ماهو فاضي
مع بنته الجديده اللي يحفظها له

ولا بيسون شي بس اكيد بيدورون لي مليون عذر وليه حذفت المدونات كذا
بس كمان بسوي معهم مسكين واقول حسابي تهكر

اما لو اتريق وحسابي بجد يتهكر واكلها زي الولد اللي راعي الغنم
اللي كل شوي ينزل القريه الذيب الذيب لين جاه الذيب واكل غنمه !!

يالله خلوني اطلع شكل الجوع اثر فيني وربي

سلام

صبحكم الله بالخير .. وخميسكم احسن واروق واكثر نشاط
كيف العالم اخباركم عساكم بخير !!

وفاز ترامب يالله ان تاخذه قبل يكمل فرحته بالرئاسه وتفك المسلمين من شره
بجد جانا واحدن اطرش بيعميها بس الله يستر

...

ماعلينا المهم تدرون اصعب موقف ممكن تنحط فيه وش هو !

انك تعيش قصه او سالفه بكل تفاصيلها بين فلان وفلان او سين وصاد من الناس حلو
وبعد فتره تصير لك وتكون ان ( السين ) وبكل فخر

<< اما
اي وربي ياصوت الضمير ذا اللي صار كنت اسمع بس
الان عشت الموقف بنفس التفاصيل مع اختلاف الامكنه يالله ماعلينا اللي يعيش بيشوف

لا وبنفس السناريو كمان يعني امسك ليا واقطع لك على قولتهم !

نقطه ونهايه سطر

..

نجي للهجوله !

الحين يوم تمسك لك طريق وكذا وماشي ومع نفسك وفجاء يطلع لك لوجه
خفف السرعه الطريق مراقب زمان كنا نسحب عليها بعد ساهر صرنا بجد نهدي غصب

المشكله اذ كنت مثبت السرعه ومتربع ومامعاك احد بالسياره
اي والله ذا اللي دايم اسويه اذ سقت اثبت السرعه واتربع لان الخط طويل فما له داعي اتحمس
مع الدعاسات وكذا !!

المشكله تعبجك الجلسه ومع المسجل وربي تنسى انك تسوق لان الطاره مو كل شي
المشكله يوم تنتبه وبتعدل الجلسه عشان تهدي يكون ساهر صادك

تصدقون هنا ازيد السرعه من الغبنه صح فكيت المثبت حق السرعه بس ماش زدتها ماهديت
يعني اكلتها على وجهي ولا اتعلم من كذا مره صار معاي نفس الموقف !

مدري احط البلا فيني او فـ السياره ان فيها ذا الخدمه او في ساهر اللي نقصو السرعه في الخطا
فجا وبدون مقدمات او حاله التوهان اللي تصيبنا احيان

بس بجد بعد الفلاش اللي تاخذه من ساهر تصحصح شوي وترجع لعقلك بس بعد ايش
القلب يكون تعور شوي وفيه بعض التلفيات النفسيه

بس ياخي وربكم بشر وبنخطي كبرنا ولا صغرنا الى مانخطي

>> طيب وش نبي بسالفتك هذه

اما مافهمت اجل مع نفسك صوت الضمير ذا بلشه احيان يخليك تعصب على نفسك
يالله بفطر وبتقهوى واكيد باذن الله راجع !

يمكن القى حل مع ساهر

ســـلآم

آإأآم بآأإأآك

افطرت بس ماش ماعجبني الفطر بس اكلت لين قلت بس الحمد لله
<< هذا وهو ما اعجبك كيف لو معجبك

ياحبي لذا الصوت مسوي خفيف دم ماعليكم منه !

اصلا اليوم ماش النفسيه امشي وماني مع احد كاني اول مره اجي الدوام
مدري ليه بس كذا توهااان الله وكيلكم مدري وش هو منه !

شوي قلق مع حبتين نفسنه مع خوف بسيط وعليهم وسوسه
هذا البلا وين العلاج يادكتور

<< اقول برا انت وش قاعد تقول

جيت مره ثانيه هلا والله اقول ما القى عندك بنادول اكسترا
يمكن يهدي راسي احس البلا كله منه مدري ليه !

<< ياخي قلنا لك من زمان انتبه وانت تسوق

يووه لازم تذكرني يابن الحلال خلاص اكلتها الله وكيلك خلاص لاتدروشني كل شوي
تذكرني اللي يسمعك يقول بكون الاول او الاخير

ولا بتكون ها المره الاخيره لا مع نفسك اكلت قبلها وباكلها الان
والشكوى لغير الله مذله

شايفين رجعني للسالفه اللي اول وانا اصلا راسي متدروش
بدون شي !!

يعني المشغول المفروض محد يشغله اعذروه يمكن مو فاضي لكم
ويمكن انتم مو فاضين يوم هو فاضي

<< قسم ولدنا انهبل

والله مالهبله غيرك سكتو عني صوت الضمير ولا بترك المدونه له
اما كل كلمه يعلق عليها لو مين ماسواها

بس بجد بجد الهرجه كذا احيان نحسب اننا نسوي الصح اوالمفروض نسويه
تحت اي مسمى يكون وحنا جايبن العيد وبشكل ماهو صاحي ولا ننتبه اصلا الى بعدين

احيان يجيك الواحد ويفضي نفسه يبغى ياخذ رايك بشي وانت ماتكون فاضي
هنا بووووم يحدث مالم يكن متوقع فيكون الشخص عنك فكره مو زينه ويحاول يعديها

بس المشكله انك تكررها بدون قصد وربي فبوووووم اخرى
خلاص طفح الكيل منك

هنا تختلف الاجراءت المتخذه في حقك بس لك الحق كامل انك تتخذ الاجراء اللي تبي
تاخذه بس يكون باكثر احترافيه اسمع ووصل صوتك ذا المهم في السالفه

<< انت وش تقول وش تخربط

اندري

وربي اكتب ولا ادري وش اقول المهم فـ الاخير كلن بيصلح سيارته
تدرون احيان الفضاوه وربي مضره فلا تخلون الاطفال لوحدهم فترات طويله بدون ماتكونو حولهم وكذا
يمكن يسوون اشياء لا تحمد عقباها !!

فيه فكره تناقز براسي من البارح ودي ما سويها لانها زي وجهي
فبحاول اتجاهلها بالكامل ذا الفكره بس مو حقت تقفيل المدونات وحذفها لا وحدتن ثانيه

اكثر فهاوه من اللي امس !

قسم لو ما اطلع لجيب العيد انا ووجهي خلوني اطلع كميه ادريالين ماهي صاحيه
مع الفطور والحلى زادت وزي ماقلت اليوم فاضي مغير ابصم ومع نفسي هنا

يالله اشوفكم على خير ..

ســـلآم

هأآأإأآي قأأأآأيز آأند قيرلز

شي الدخول الظهر >> من الفضاوه وربي
ياهوو لسى مانمت انت للان فاضي بس تعلق حتى خليت العلم تحش فيني بسببك

هيا شوف !!

اما معاه حق هيا اكشخ ياعم هذه الاداره العليا هنا تدعمكم وش بقى
الظاهر كذا بتخلونه يشوف نفسه عليا تراه مهوي وربي
فالح بس بالتعليقات وكذا ولا منتهي ماعنده سالفه

نجي للتقييم !

شوفوا دايم اتعمد كتاباتي هنا يكون الكلام اللي بين السطور اكثر
من السطور نفسها صعب اشرح لانها تطلع معاي كذا اشفر
السالفه بسالفه ثانيه قريبه منها يارب فهمتو << والله محد فهم بس اختصر

احلى لبست نظاره عشان مدحو فيك خف علينا يابو
بيجنني صوت الضمير وربي ماعليكم منه

وش كنت اقول اهاه ايون تذكرت زي ماقلت لكم اتعمد اجيب سالفه وهرجه
قريبه من سالفه صارت لي عشان اوصل الرساله بشكل اسرع
واكثر غموض احب كذا وربي عاد اللي اقصدهم والله بالعاده يفهمون وش ابي اوصل

الباقين يضيعون بنص الطريق

مايحتاج اقول التقييم الاخير من مين باين الدوافير اذ تعقوا قارنو اي شي صعب
بالرياضيات مع ان الرياضيات عندهم زي العربي عندي

<< يابن الحلال انت لا عربي ولا رياضيات

شوف ماتنزل النظاره وربي ماعاد اكتب كلامك في مدونتي انت تفهم
ماعليكم ترا ما هاوشكم اهاوش الصوت ذا

ماعليكم زي ماكنا نقول دايم المعنى ببطن الكاتب فما عليكم
استنانسو باللي تلقون وكونو بخير

المهم تصدقون للان كميه قلق مو طبيعي قاعد اعيشها من الفجر للان
ما صار شي جديد وماني عارف كيف اسوي وجاي هنا اتلفسف عليكم وكذا
وربي ماعندي سالفه !!

المشكله طلعت البيت الساعه عشر عشان انام وراي خط اليوم بعد العصر
وقلت انام عشان مافيه وقت بعد الدوام رحت البيت ومانمت !!

ورجعت الدوام وهذاني قدامكم اهاوش صوت الضمير وضميري متعبني
<< هو انت بتقول ايه ياباشا

طيب لسى بالنظاره هذا فراق بيني وبينك ماعاد اجيبك هنا لو ايش
ترى اسويها مجنون وربي قال صوت الضمير قال

يالله خلوني اطلع بدا الاجواء تسخن عندنا بالدوام والاصوات ارتفعت الله يستر
بروح اطلع اشوف ش السالفه بالضبط !!


ســـلآم

الســـلآم عليكم

دخول بدون مقدمات بالله من جدكم تاركين مدونتي بالصفحه الثالثه
وربي لو ذابحك لكم احد ماخليتوها كذا تغبر ولا احد يلتفت عليها
من انتم !!!

>> ياهو رحب بالعالم الي جو اش فيكم

يووه وربي نسيت شكرا يابو اول مره تذكرني بشي صح
وماتقعد تحش !

اهلا وسهلا ومليون هلا والله بسيده القلم الراقي والراقيه
سيده التدوين الاولى ومنشاءته وصاحبة اليد الاول في انشائه هلا والله

(مرامي البدر)

ياخي يكفي تقول الاسم تحس بفخامه صاحبه وربي بجد اتكلم
للي مايعرفون مرامي البدر هذه هي من ساهمت وسعت بقووه في تاسيس هذه القسم بذا المنتدى

هي اول من افتتحت هذا المكان اول داعم للجميع هنا
يعني المفروض المنتدى والقائمين عليه يدونها رقابه ذا المكان او مساعد المشرفه العامه
على طول بمجرد عودتها اللي مثلها خساره يكون عضو عادي بس !!

حمد لله ع السلامه يابنت البدر وربي لتواجدك وحضورك شكل يختلف
عن كل الاقلام هنا كوني بخير واهلا فيك مره ثانيه في بيتك الثاني

شكرا شهرزاد على اعاده هذا القلم الراقي وصاحبته شكرا كمان انه الحرف
على ثقتك واعادتك للمرامي حسابها وكذا الف شكر

شكر مرامي على الكلام اللي قلتيه في حقي بمدونتك الله يسعدك يابنت
قسم سعادتي بعودتك كبيره اتمنى دائما لك كل خير

هذه مرامي نجي الان للاكثر جدليه وشوفه نفس وكذا لنو حياك الله لنو
واهلا وسهلا مليووون ماشاء الله عوده حميده باذن الله

والف مليوون حمد لله ع السلامه

بقى طيف المطفوقه اكثر قلم لتواجده انعاش للمكان اي ولله ياطيف قلمك ينعش هذا المكان
ولا سفن اب بارد بعز الحر

حمد لله ع السلامه وان شاء الله تكون صحتك واحوالك العال العال
وكل امورك طيبه وبخير !!

طبعا ولا انسى الدوافير ربعنا اللي صار سكنهم تقريبا هنا في المدونات
تنهيدهـ وشهرزاد وابو العز وعهد الهنا وورده ورتيل ذول ماشاء الله عليهم
دوافيرنا هنا مع ماريا وأنه الحرف بعد

الله يسعدكم جميع والله لتواجدكم في ذا المكان شكل اخر


وبس باخلص شغله بيدي وراجع باذن الله
قريت كلام كثير محتاج مني انبراشات عليه لو فيها طرد عادي اهم شي

مااترك شي يقرقع براسي

ســـلام

أقلبو الصفحه


>> الخــــلآ