ام باك

ادري اني ماطولت بس كنت ماشي بالاحدث ف الاحدث
المهم مريت كذا مدونه واعطيت اهلها لايكات عشان يدرون اني رجعت >> بالله مخ ولا ماهو مخ

والله مخ بس انتم نفسيات هههاي

ماعليكم وش كنت اقول !! ايه تذكرت كنت نازل للمدونه الرابعه او الخامسه اللي زرتها
عاد اول شي اشيك على مدونات الشله الهربيته وبعدين على باقي الشعب

تبغون اقول لكم مين الشله الهربتيه هنا ولا بلاش !!

خلاص اقول بس بشرط وش تدوني واقول لكم الشله الهربيته اللي مستحيل اشوف مدوناتهم
وماتلقوني داخلها لا اراديا مدري عن نفسي الى وانا جوا مدوناتهم وعايش جوهم

المهم نرجع للسبب اللي خلاني ارجع بسرعه واقطع الجوله التفقديه قبل اكملها

هذا ياطويلن الاعمار لقيت اختنا اللي معصبه 18 ساعه باليوم ومروقه ساعه وكم ساعه تكون فيها نايمه
المهم كلامها شدني واعجبني نفس الوقت !! ادور مشاكل صح نيهاهاهاهاهاي

هذا كلام بنت فلسطين الحره يسلم راسك ياشيخه انتي كذا الفيس اللي بالجوال قبضه يد ورافع الابهام

وكتبت الاسباب في مدونتها زوروا مدونة فلسطينيه وافتخر وشوفوا الكلام
وتعليقي ع الموضوع بيكون قريبا جدا

اصلا ماصدقت اني القى احد منهم ويحش فيهم ويفتح للشباب باب
عشان يحشون معهم ههههاي

يالله خلوني اكلم لفلفه بالمدونات شكل الصيد بيكون سمين
لسى ماوصلت لبعض مدونات شلة الهربته

خودافس


بس بضيف ذا التقييم توه وصل يعني حار

لا والله الملل سببه الاول الاختبارات والاستكنان مع البرد هذا
ذا المدونه وصاحبها ماعندهم الى الدجه

بس يسعدك ربي على الدعم فيس يعمز

اخر رجعه تحلموني شوي اليومين هاذي الجوع الهربتي يعمل عمايل والله !!

المهم اكتشفت شي الشعب مايتركون النذاله عنهم حتى وهم مشغولين نذول
وتوي مو اقول لحد ييجب طاري الكوره يعني الى اقولها وواحط فيس معصب عشان تبطلون نذالتكم !!!

يالله وش ذا كمان لقيت طيف تتكلم عن البنات وانهم ...... الكائنات >> والله مستحي اقول الكلمه
مع كل اللي فيكم بس والله اننا نحبكم !!

نفسي اعرف راي شهرزاد والشيخه ماثر في كلام فلسطينيه وطيف عن بني جنسهم
بس الجلد ف الميت حرام هههههاي

مدري ليه احس فيني نذاله شوي اطلب من شهرزاد رايها بعد ماقريت سالفتها مع زميلتها بالشغل
يعني اكيد بتحش معهم

بس خلاص بطلت لا تردي لين تقهوي زين وتقري الكلام في مدونات طيف وبنت فلسطين
وتمخمخي زين وبعدين اذ فضيتي انتي والورده حقتك ايوه طلي بالودره قبل تتكلمي

على طاري الورد عندي سوال !!!

ليه 99.99 % من البنات يقولون مانحب الورد ونشوفه يوم يموت !!

ترى معلومه للتاريخ ولاعلب البنات في الوطن العربي الشقيق ترى عمر الورده
الافتراضي مايتجازو الاسبوعين من نموها بشكلها اللي تقطف فيه وتهدى !!

وعمرها بعد القطف مع التبريد والحفظ مايتجاوز 15 يوم

عشان كذا افرحوا بالورد وخلو عنكم كلام مانحب نشوفه يموت ومدري كيف
لانه بيموت سواء اهدى لكم او بقى بالمحل او تركوه بنفس شجرته

عاد محدثكم اكثر واحد فيك يالسعوديه يحب الورد واهدائه
ويمكن مليون صوره اخذها للورد اللي يوصل لي اصلا الهدف الاساسي
من الاهداء التصوير ههههاي

يعني صوروه وخلوه يموت بقلعته << قايل لكم مخ بس محد يصدق

يالله بقوم افطر واتقهوى واسولف مع الشباب تعرفون
لي اسبوعين اجازه عن العمل وامس غياب واليوم داومت

سلام

مو بالعاده ارجع الظهر للمدونه بعد ماقفلت بابها وبخرتها الصبح
بس استفزوني بعض البشر بكرمهم وكلامهم !!



والله انكم من جد شعب تجيبون السعاده والله اني صادق
ياخوان !!

بسالكم الان هو فيه احد زيي او انا غير ؟

الحين افرح اذ شفت لايك او اثنين كيف يوم تكون بهذا العدد في اقل من ساعتين
لا ومعها تقييم ورسالتين !!

خلاص احسني ختمت الهياط بعدها واقعد بس ارفع بنفسي
لين اصحى من الفرحه وارجع لطبيعتي الشاب الهادي << كثر منها

نجي للفرحه كمان والله اني افرح واطير من الفرحه يوم اشوف احد من فتره
ماكتب او تواجد بمدونته ثم القى مدونته مع الاوائل فيذا

ودي اخم الشاشه من الوناسه

المهم اللي مثلي تحجيه ذا الحاله نصيحه يقول لي احجز له معاي في شهار
لا امزح وربي لتواجدكم طعم وشكل ثاني

حتى لو كان تسجيل تواجد وحضور له شكل ثاني لا تبلخون علينا بتواجدكم
في مدوناتكم خلونا ناخذ علومكم ترى الغياب شين واحسن علاج

للي في القلوب الكلام والله يريح خاصه اذا لقى تعليقات حلوه عليه

يالله يارب ان تسعد الجميع

وشايفين اني وجهه خير عليكم اليوم << اقسم بالله الغرور ذابح ذا الادمي

ماعليكم من صوت الضمير وجهي كان وجهه خير

طيف طلعت نتيجتها وطلعت بسيطه باذن الله كثر من الثوم والبصل وخذي كبسولات فيتامين د
من الصيدليات يرجع باذن الله المعدل الطبيعي وخفي حش ف العالم هههههاي

شهرزاد لقت فلوسهم المبيوقه او الضايعه ماتفرق اهم شي انهم لقوها مبروووك البرائه
وبياض الوجهه واصلا هم الشريهه كذا << جمع الشهري

دايم رايتهم بيضا عرفت كثير منهم انا اشهد ان رايتهم بيضا دايم

صح قبل انسى ترى ماقلت شي بموضوع حش البنات بمجتمع البنات بس نوهت عن الموضوع
وطيف اشوفها بتشقق هدومها من الخلعه لسى ماقلت شي

انتظروا رايي قريبا << رجعنا للاعلانات هههاي

يالله سلام

خودافس

.


سلام عليكم يامتعلمين يابتوع المدارس ازيكم عاملين ايه !!
بالله مو تقال مصري

ماعليكم من خرابيطي

نجي للمهم والمهم الله الله عليه << اليوم قالب مصري مدري ليه
ماعلينا يمكن للفطور دور

والله نسيت وش جاي اقول ايوه تذكرت !!

الحين كلنا نمر في ظروف تخلينا نتغير من حال لين حال وبعضنا تغيره يكون في ساعات
وتنقلب حالته من البوزتيف لين نيقتيف << مصري يتلكم لغات الله يعينكم

يعني بالسعودي تنعفس حالة بعضنا بسرعه وتتحول من الجو الايجابي الحلو
للسلبي الكئيب المظلم وهذه طبيعه في الكل انك تكون بمود وينقلب المود
بسبب بسيط او كلمه او موضوع تذكرته او اي شي !!

وتقعد مع نفسك والنفسيه خ ... ايسه وحالتها حاله هنا تكون ما تتحكم في اللي تقوله
او تسويه والافضل انك تقعد مع نفسك شوي وتبعد عن الكل شوي كمان

لانه ماهو من ذنبهم انك تزعلهم بسبب اختلاف في مزاجك وتعكره لاي سبب
الحل هنا من وجهه نظر اخوكم المهوي صاحب ذا المدونه

انك ما تحاول تصلح النفسيه بسرعه خلها على وضعها هي فتره وترجع للوضع الطبيعي
سبحان الله النفس كذا ساعات تقفل من دون اي مقدمات فلا تحاول انك
تجبرها على الانفتاح بوقت ماتكون مقفله نام احسن شي !!

ابعد عن اللي يزيد القلق والنفسيه الخايسه معاك لا تحاول تشتكي وانت في عز
ذا الوضع لانك بعد ماتهدي بتعرف انك جبت العيد وقلت اشياء لو ماقلتها كان احسن

عشان كذا زي ماقلت خلك مع نفسك لين تطلع من ذا المود

وكثر من الاذكار لان سبب رئيسي في القلق والنفسيه المخيسه اللي تصيبنا
يكون القلب مليان هم والذكر علاج وراحه للقلوب

من جد بذكر الله تطمئن القلوب !!

يالله خلصت الفلسفه الصباحيه
لا تروحون بعيد عندي كم كلمه بقولها بس امخ مخ ع الشاهي وارجع للوضع الطبيعي
واطلع من عبايه انشتاين وراجع

سلام ...

والله ماسويت لكن شي !! كل السالفه اني جبت كلامكن
هنا ولسى بجيب الباقي لان الشرهانيه شهرزاد اتحفتنا برايها في الموضوع

ينصر دينك ياشيخه استنى ماثر ( ورده الامل ) تقول رايها وكمان بضم معهم
احتريك <<< الى اورط هذه البنت معهم وياليت شمس كمان تتحفنا برايه

وانه حرف طال عمرك اذ فاضيه عطينا رايك بكلام الفلسطينيه ورايها في البنات !!

بس قبل بوريكم التهديد اللي جاني من امس لين اليوم !!
لحظه بروح اجيبه

هنا فيها تهديد ودم وركب وانا خلقه تجيني ام الركب
من ادناة الدون

هنا هجاء شعري اكثر حنيه بس الشعر العربي
يكتل احيان ويعز شعوب احيان !!

ولا حظوا معاي تراني ماقلت شي لين الان مغير اجيب اقتباسات
من مدونات الاخوات هنا بالمنتدى

رايي اخليه ف الاخير

نقلا عن شهرزاد ركزوا بالله على لا تطاق يارباه
شكرا شهرزاد ينصر دينك ياشيخه ايوه هذا الكلام
اللي يخليك تتحمس وانت تفكر وش تقول

قبل اطلع لا اوصيكم اي وحده تبي تعلق تروح لمدونات

فلسطينيه .. طيف ... وشهزراد قبل واتحفونا بردودكم
اني من المنتظرين << فيس يغمز

صبحكم الله بالخير وكل الخير مع امطار الخير
ياربي لك الحمد اصبحنا اليوم والمطر علينا ...

اللهم لك الحمد اللهم انفع به بالبلاد والعباد
المطر عام على كل الحجاز واجزاء من الشمال ياربي لك الحمد ..

يازين اجواء المطر تخليك غصبنا عنك تكون فرحان
تعيش جو حلو معها ... ش السر في الفرح مع اجواء الامطار ؟؟

اللي يعرف اجابه للسوال ينورنا ولا يبخل علينا بذا الشي

يانفر ياولد وين أراضيك !!

من يوم لبست البريهه الخضرا ماعاد صار لمدونتك مكان في جدول اعمالك
ليكون البنزين له

الناس اللي ذابحتهم الخواطر والحب كمان وينهم !!!

ياهو ريحوا انفسكم وعطوها بريكات ملحقين ع الدوفره

تصدقون اليوم كنت قريب انزل شي متهور وله فتره بالقوه ماسك
نفسي وهوشات مع نفسي يابن الحلال نزل الكلام واقول لا مو وقته

واشغلوني بنات حوا بهواشهن وتهديدهن لخويكم المودب صاحب ذا المكان
بس والله شي يوم تدير الحوار والنقل بين حوا ورفيقاتها ياخي جوهم حلو

حتى يوم تحش بخويتها ماتنسى تمدح يافي نفسها او في اللي متهاوشه معها
اسلوبكم في النقاش والاختلاف رهيب

مافيه ضرب من تحت الحزام زي عندنا الشباب

انتظروني بعد شوي بنزل كم رد ع الموضوع جاني
بس بسوي له منتجه وتشويق وباخذ الكلام من بين السطور واخليه عناوين

متعه اللعب في ذا الملعب

بس كالعاده مجرد ناقل مع شوي تعلقيات ع الطاير تذكرن ذا الشي
رايي الين الان بالموضوع ماطرحته

سلام

نكمل معكم " راي الحوريات في بعض تصرفات الحوريات "

يصلح عنوان كتاب صح عاد اعذروني طالب لغه عربيه واغلب المواد اللي
ادرسها في من ذا العنواين كثير

المهم بكمل معكم ادراة الحوار والنقاش بذا الموضوع واشكر كل اللي شاركن
واستنى اللي مغير يطالعن من بعيد ومو عاجبهن الوضع

اليوم وامس كان الصيد ثمين صراحه اقلام مميزه كان لها راي بالموضوع
لحظه بجيب لكم بعض كلامهم لاني كالعاده بس اقتبس ما اقول شي من عندي

كلام حلو من شمس تقول مشكلتهم في الفكر والتقليد حلو الكلام
وهي بدت كلامها وتقول

بعضهن طبعا مو الكل برضوا كلام حلو

ترى ماجبت الكلام كله لان شمس جابت الرد في ثلاث ردود وكلام كثير
اللي يبغى يعرف كل كلامها يروح لمدونتها << يالله دعايه بلاش

وكان لانها جلست تهدد صاحب ذا المدونه وانا غلبان ومالي دعوه
ف الموضوع بس حطيته تحت الاضواء لا أكثر

هذا تهديد ولا ماهو تهديد يامتعلمين يابتوع المدارس !! !!
بس بكمل الموضوع بشوف وين راح يوصلنا حتى لو بوه تهديد وكذا

الان ندخل على قلم اخر راقي ومايقل عن
قلم شمس والبنات اللي ادونا رايهم خلوني اجيب لكم الكلام وبعدين اقول لكم
مين صاحبته !!

هنا اختنا ( انه حرف ) تقول ان الفلسطينيه معها حق وكلامها صحيح
يارباه لها الدرجه فيه بمجتمعكن عينات تستحق الذبح

مالي شغل مجرد ناقل ترى وتكمل تقول

ينصر دينك هنا الكلام اللي اعجبني اقوى شي

نجي ف الاخير للديباجه عند كل بنت فيكم تعلق ع الموضوع
ليه بنهايه كلامكم تهددون صاحب ذا المدونه !!

ماذا فعلت لكن سيداتي !!

ياويلي ويلاه ثلاث مرات تكررت الكلمه يعني تهديد شديد اللهجه
عاد قلتها لكم من زمان خويكم خواف

بس برضوا بكمل نيهاهاهاهاهاي

ف الاخير

طيف بعد الف سلامه وماتشوفين شر واجر وعافيه باذن الله
اش فيك تخوفين الناس من ذا المدونه تراني ماقلت شي

اجل بعد ما اقول شو بتسوون فيني شكلكم بتقفلون مدونتي بكبرها

بس كمان راح اكمل



خودافس

اي والله سووو ماتش
خليكم من جوي اليوم وتذكروا اننا في اخر يوم ف الاسبوع
وبكره اجازه اي والله اجازه

مبرووك للطلاب مرور الاسبوع الاول للاختبار وان شاء الله تعدي الباقيات على خير
بس شوفوا لكم حل ياناس مع ( بقايا - وورده الامل ) احد يفصل عنهم النت لين
يخلصون اختبارات لا يحطونها اهلهم بروسنا اذ صار لهن شي !!

طيف افصلي النت عنهن وخلي عنك القرقره الزايده

ننهي المقدمه وندخل على الموضوع الرئيسي لحلقه اليوم جاهزين

نقول بسم الله ..

اول شي حياك الله نفرووش حمد لله ع السلامه وبشرنا كيف كانت الديره معاك
وكيف اهلها عساهم بخير ...

هذا ياطويل العمر والسلامه البنات يحشون بالبنات وجا خويك اللي هو مي
وركزت ع الموضوع شوي والعالم انطلقوا بلا هواده في التسحيب ببنات جنسهم
ونحن نتابع ونقل بكل حياد

بس اخذوا شوي مخرج غير الطريق المقصوده وانحرفت الامور شوي
عن الطريق >> هذه من مساء قياده المراه للسياره

لين وصل الحال لتدخل كبير الخبراء ابو العز
وماسلم منهم ..

ابشر بعزك يابو عزا ومايجيك عندي وانا اخوك


هذه السالفه يانفر بكل اختصار وسلامتك انتم واللي يقرون
عاد مجهز رد بس كاني ببطل منه

احسني ورطت بنت فلسطين وهي متعشمه فيني وتقول عمو ماتدري ان الفرق بيننا
يمكن مايجي 3 سنوات هههاي

يالله تستاهل اني اسحب ع الرد اخاف اجيب العيد

ف الاخير

لي رجعه بس بفطر واتقهوى وجايكم لا تروحون بعيد
سلام

خودافس بي

اأإأاأإأام باأإأاأإأاأإأاك

بما انه هذه اخر رد في هذه السنه 2015 واخر رد في هذه الصفحه
رقم (257) يارباه وربي اني متهور قربت اوصل للمليون صفحه

وعاد بما اني من مواليد هذا الشهر ايو والله

شوفوا



خويكم صاحب ذا المدونه تاريخ ميلاده في عالم عبير كان في شهر 12 من عام 2007
يامسرع الايام اذكر اول يوم كانه امس واذكر يوم فتحت المدونه

كان في 5 - 5 - 2010 تاريخ مميز كمان

وبرضوا تاريخ ميلادي كان في 24/12 يعني ذا الشهر يعني لي الكثير

يارباه ياكثر الايام لو نعدها بعد ماتنتهي والنتيجه منها تكون مو ذاك الزود
بس بصراحه عرفت ناس هنا كان قمه في كل شي والله قمه في كل شي

بدايه بطاب الخاطر الله يذكره بالخير وحلم دنياك وروميساء والمستشار وستروبري
وزين الاطباع وجون سينا وامير الذوق

الى نفر وعبدالعزيز اس ثنين ولدنا الحربي وولدهم ابو نوره
الين طاقم البنات اللي هنا بدون ذكر اسماء اخاف اذكر اسماء وانسى احد

بس يشهد عليا الله ماعمر احد تجاوز حدوده او غلط عليا في ذا المكان
وكانو قمه في كل شي بالتعامل بالنصيحه بتقبل الراي والراي الثاني

الله يسعدكم جميع ..

مدري ش اقول ما احب اتكلم كذا بس الذكريات دايم تختلط مع بعض
واحيان بعضها يكون مو بذاك الزين بس الحمد لله على كل حال

المهم استقبل التهاني بها المناسبات
وهذه مدونتي قدامكم وانتم وكرمكم وخويكم يستاهل

اي شي مقبول لو لايك بدون تقييم عادي اهم شي اترك شي

صح على طاري احد يعرف اخبار عن بحه والله لها فقده ذا الادميه
اللي يعرف عنها شي يوصل لنا اخبارها ...

ف الاخير

اتمنى تكون هذه المدونه سبب لو بسيط في تغير مود اللي يدخلها
اتمنى تكون سبب لو بسيط في ابتسامه اللي يدخلها
اتمنى اكون قد الثقه اللي حطوها في بعضهم واصبحت هذه المدونه مكان دايم يزورونه

اتمنى اكون ما غلطت على احد واذ غلطت باحد يسامحني
والله ما عمري كان قصدي اذي احد او اغلط عليه لسبب شخصي لا والله
كل اللي كنت اقوله او اكتبه او اسويه الهدف منه بس سعه الصدر والوناسه

خذوا من هنا اللي يوسع صدوركم واتركوا عنكم كل شي يغث
ولا تنسونا من دعائكم

وسلامتكم
ملاحظه : ترى كلامي ماهو وداعي لا والله بس بختمه السنه فيه
وبقفل ذا الصفحه فيه ولي عوده اذ الله كتب لنا عمر باذن الله

واحلى خودافس

وكل عام وانتم باذن الله بخير وفي خير وعلى خير
بالتوفيق للجميع

احبكم جميع واعزكم والله العظيم وسامحوني على القصور


سلام

ياهلا يالطيبن صبحكم الله بالخير .. بدايه اسبوع جديد ..
قررربت تنتهي امتحاناتكم ياهوو شدوا حيلكم

وعادي ترى الكبوات في ايام الاختبارات لا تشيلون هم اختبار واحد من عشره
يخرب عليكم الباقي عادي اللي راح راح فكروا بالجايات

ومو شرط تعثر بسيط يعكر جوكم ! شوفو الدافوره ورده زعلانه ع السوال الخامس
وتقول الاول والثاني والثالث سهلات .. خلي الخامس ماعليك منهم !!

بعدين قالوها لنا من يوم كنا صغار فهم السوال نص الاجابه عشان كذا مستحيل استاذ
راح يشرح لك السوال ف الاختبارات هذه قواعد عند كل المدرسين
وقت الاختبار مافيه شرح سوري ورده بس روقي ولا تشلي هم !!

نقطه ونهايه سطر ..

نجي لرجعه الكبار اهلا نفر واهلا ابو العز اللي مانشوفه الى اذ طلعت النتايج
يجي يحط لنا درجاته وبعدين ماعاد نشوف له تواجد فيذا

هلا غلاهم وحمد لله ع السلامه انتي وخواطرك الرهيبه الحزينه ,,

بركان اشغلني بالمقطع اللي منزله في مدونته انصحكم شوفوه لين الاخر وخلونا نشوف
تعليقاتكم عليه

تعليقي ع الفيديو بالرد الجاي ...

اما شمس ماتركت عاداتها في التسحيب بالعالم والضحيه هالمره كانت انوش
المشكله ما قلبتها عليها وخلتها تندم

انوش في كل مره شمس تمقلبك انتبهي هههاي

يالله ف امان الله

خودافس