تغريدة صباح } ..

**ShahrzaD** · 30-04-2018, 01:02 PM

رد: تغريدة صباح } ..

جبت الصوره هذي اللي منزلتها قبل كذا عشان تعليق الوسمي
يقول طال عمره :

كنت في مدونات شهرزاد وطيف قبل شوي وحده تمجد في كتاب الكاتبه ماخلت شي
من الحش فـينا ماقالته وطيف شغاله مدح بالكتاب

المشكله الصور كلها حش بالاشناب للاسف

شهرزاد جايبه صور للنحل مدري النمل وسواتهم في الضعوف ذكورهم وطريقة رميهم

ومصدقين اللي مكتوب على الصوره واصلا وش خلاهم يحكمون انهم الذكور !!

ما حشيت في الذكور
نزلت الصوره عشان التعليق المكتوب تحتها.. كلااام سليم ومو معناه حش :)

كمان لا تستعجل وانت تكتب لأنك أنكرت اللي في التغريدة ثم جبت معلومة تتفق معها

وياكلونه اذ قلت الموارد حقت الغذاء لانه مايفيد في جمع العسل او شي

يعني يتخلصون منهم سواء أكلوهم والا رموهم من كثرهم هههههههه
https://twitter.com/aquaponic_q8?lang=ar

طيب جبت لك رابط حساب اللي منزل التغريدة عشان تقرأ البايو,
كاتب ( مهتم بالزراعة وتربية النحل )

فعلا اللي مايعرف الصقر يشويه

ياخي لا تتمحرش في فتيات القوة بعدين تلحق مصير ذكر النحل

**ShahrzaD** · 30-04-2018, 08:31 PM

رد: تغريدة صباح } ..

" كم كان عمرك عندما كنت مفعما بالحياة..؟ "

**ShahrzaD** · 01-05-2018, 06:09 PM

رد: تغريدة صباح } ..

" ‏الحلم ليس الذي تراه في نومك
‏ وإنما الحلم هو الذي لا يتركك تنام.."

أما أنا على قيد الرقاد

**ShahrzaD** · 04-05-2018, 03:39 PM

رد: تغريدة صباح } ..

انا قررت اكمل تدريس العام القادم .. الحياة مع العمل
حلوة .. الا اذا صار شي طارئ مثلا يخليني اخذ فترة راحه
ف راح تلاقوني مبثرتكم هنا .. تخيلوا عاد

_ تنهيدة

أنا نويت... خير اللهم إجعله خيييير، نويت أكمل بعملي رغم المحن,
مريت بفترة الركود اللي حتى الوناسه هناك ما أشارك فيها لين يسحبوني بكرسيي أبو كفرات.
مره زميلتي حلفت علي أجلس بكرسي العيادة المتحرك، تبغى تفحط فيني وتوقض البهجة
اخذتني للدور اللي فوق بالاسنصير عشان ننزل ملفات وكملتها بتفحيط ههههههههه
الله على المنظر وأنا مغصوبه أفلها

ولما نزلنا كملت تفحيط ومرت طالبه وكلها علامات استفهام ذول يستهبلون والا من جد الموظفة مريضه
ههههههه

برب تماشي

**ShahrzaD** · 04-05-2018, 08:11 PM

رد: تغريدة صباح } ..

رجعت من التمشيه الجميلة
صورت لكم صور جميله راح انزلها في الصفحه الجديده ان شاء الله

نرجع للتفحيط بالكراسي، دايم يسوونها زميلاتي وأنا في مكتبي جالسه مافي أي تفاعل
اخرتها ساحبيني أنا وهيبتي اللي فرحانه فيها ههههههههه نثروها
اللي احب اسويه من انشطة لكسر الروتين هي اللعب بكورة بحجم يدي
حقت التوتر، أحب ارميها على الجدار قدامي واستلمها...

نيجي لسالفة اكمال المسيرة الوظيفية...
صحيح مريت بفترات كم أقاوم فكرة الاستقالة وأحاول أنتهز وجود الضغط هذا،
في اني اتعلم كيف اتعامل معاه وأبتكر حلول.. من صفات القائد انو يستغل المشاكل لإبتكار الحلول فقلت اجرب هالمره قدها والا مو.
ابتكرت افكار وخطوات ساعدتني وبديت في أهدافي الوظيفية اللي كتبتها قبل..
واحسني افضل كأني تأقلمت من جديد .
بقي فقط ادارة الأزمات اللي تطلعلي كل يوم، بإذن الله اسعى الترم القادم ان هالأزمات تقل.

أما يوم الأحد الثقيل، سرت اصنع صباحي فيه عشان أتصالح معاه

أمر أخذ كفي ومافن كيك بالتوت الأزرق
واقول لقريبتي خلينا نصنع صباحنا ونجعله جمييل..
وقتها انكب شوي من الكفي علي.. وحرك السواق وانا ما أخذت باقي فلوسي ههههههه
واصيح عليه يرجع، الأحد جالس يصعب محاولاتي .. فجلست اقول لقريبتي
صباحنا جميل وسيظل جميييل ، لكل ضووء أضواء ههههههه ناويه إذاعه مدرسيه

اصنعو صباحكم يوم الأحد واحكولنا كيف طريقتكم ^_

**ShahrzaD** · 07-05-2018, 11:17 AM

رد: تغريدة صباح } ..

ياصباح الفللي

ناوية أستفتح الصفحة اليديده بصور الرحلة وشغلة من الواتس,
بس الوقت ضيق الان ما يتسع الا للحش

نفر كويس مافيه لايكات لين تقلب الصفحة, تضامنا مع مرايم وفتو
غصب عن قلبي وش اسوي.
الموهيم جايبه سالفه من مدونة نور الفجر..

احتاجت 38 غرزة لوقف النزيف
مواطن يهشم رأس زوجته بـ "عفريتة السيارة" في القريات

مع النحية لشقيقتي ... الشرطية ...
كل قسيمة = عفريته
وحده بوحده والبادي اظلم
اللهم اشهد فقد بلغت

اليوم مع زميلاتي كنا نسولف عن عميدة كلية أمريكية كانت في يوم ما شرطية

وكانت عاجبتني في حل مشاكل الموظفين عندها خبرة روووعه في التحقيق وإظهار الحق,
قلت لزميلاتي لابد أنوع في خبراتي وأدخل المرور دام فتحو المجال ههههههههه
كل ما مسكت سياره فيها زوجين أأشر ع الرجال وأقول للزوجة, هو يأذيك ويزعلك, أهبله مخالفه والا والا ؟
(أهبله=أعطيه)

المهم قريب بديت أقتنع أتعلم سواقة, فقط في حالة ان السواق ما حافظ ع السيارة,
والا الصدق أحب أمارس أمور كثيرة في الطريق, أقرأ أكل أشرب أسولف في البرامج أمد الكرسي أخذ قيلولة,
والله في عمريكا أبويه طلبني أخذ الرخصه هناك وأنا أماطل, رغم اني اتدرب اسبوعيا مع ربيعاتي العمريكيات,
البابا ما أظن يفكر أسوق هنا لكن هناك يبغاني أكتسب هالمهاره للعوزه

أخويه لما جرب يدربني, أول ما بديت نويت أرجع ريوس بدون ما ألتفت ورا,
قال وقفييييييي !!! ... وش هالثقه ريوس بدون ماتلتفتين

وقتها أنا سلمت الدركسون وغنيت له يادريكسيون يادركسيون يادركسيون.. مالي نصيب.
ف البارح قلت للسواق بشويش بالسيارة كل شوي تخربها بسواقتك, فلوس كثير وبنزين فلوس كثير وراتب إنتا كثير,
بعدين أنا أسوق أحسن !!.... ما ألتفت علي ولا كأني أحكي ههههههه ياجبل ما يهزك ريح

**ShahrzaD** · 07-05-2018, 08:39 PM

رد: تــغــريــدة صــبــآح } ..

لقطات من تصويري...
مو سهل احمل الصور على مركز تحميل بالجوال..لذا استعنت ببرنامج المنتدى:

-١-

-٢-

-٣-

-٤-

-٥-

-٦-

مانزلت كل الصور، تكفي هذي ^_^

**ShahrzaD** · 08-05-2018, 09:42 PM

رد: تغريدة صباح } ..

تعالي عيني بعينك كذا اشوف
الحين مافي لايكات عشان متضامنه مع بنات جنسك
والا كسل مافيك تعطي لايكات وكيذا

تستغرب تضامني وما تستغرب اللي تخطب على بنات جنسها
عني فيني حمية مرتفعة لبنات جنسي حتى اني امسك نفسي كثير عن دور المحامية،
عشان ما اكون مدخل شر، ودي تقعد الوحده في غفله ومبسوطه ولا اني افتحها على النكد.

أما بخصوص كلامك عن كل شخص نظرته للأمور والأشخاص بحسب اللي يشوف في واقعه وفي بيئته، كلام منطقي وواقعي.. لكن وين راحت التجارب ودروس الحياة واتساع المعرفة والأفق...
معقوله كل الأشخاص يبقون في نفس الصندوق اللي اتوجدو فيه بدون ما يتوسعو في معرفتهم وتصحيح نظرتهم ومفاهيمهم..؟ ما اعتقد

انا كنت اشوف اللي يصلي فروضه في المسجد انه صحابي.. خلاص.
وعرفت ان اللي معروف بين الرجال وانه رجال وسمعته حلوه بينهم، مو شرط يكون زين لأهله.
توقعت ان كل رجال يكون عند كلمته .. لان يفترض يكون رجال
وغير هالأمور تغاضي المجتمع عن الذكر وأخطائه ووقوفهم معه
مثل فزعاتهم في الديه لشباب مهابيل وتسامحهم مع فشايلهم
والبنت يدفنونها من اصغر خطأ ويتبرون منها، مهزله.

انا لما اتعقد من الزواج مو من الشباب لوحدهم
انا شايفه واقع غير منطقي ولا قادره اتقبله
حتى وأنا في عزلتي وعزوفي ماني قادره اعيش بإختياري..
وراتبي اوزعه مفرحات لغيري لأن ما أقدر اسعدني به بالطريقه اللي أنا أختارها
واذا قلت باختياري يروح الناس بفكرهم للغلط والسفور والانحلال الاخلاقي..
( الغلط مايحتاج حريه) لكن مالي حق أختار لأني مو شاب محصن ومراعى من المجتمع .

**ShahrzaD** · 09-05-2018, 10:41 AM

رد: تغريدة صباح } ..

صباح الورد

اليوم معي بنت أحد الطالبات الله يحفظها عمرها 5 سنوات يمكن,
ممنوع دخول الأطفال بس قلت للادارة بخليها معي في مكتبي,
صعنووونه توهقت جايه بكعب وأنا ألاعبها وأتمشى معها تبغى تراكض في الأسياب,
يازين صباح هاليوم بوجودها, تذكرت أجواء الروضة وبراءتهم,
أمي أحتفظت بأوراق الروضه حقتي وتقييم الأستاذات وملاحظاتهم لين سرت في الثنوي,
لقيتها صدفه وقريت جاني ضحك

, رقم 3 بالعربي راسمته نفس الشوكه ,
وكنت صاحبة خيال وسوالف لا تمت للواقع بصله, فكاتبه الأستاذه اني فجأه أفتح لها سالفه في الكلاس
وأحب أسولف وأكيد كان صعب تسكيتي ههههههههه لكن أستاذه وفاء عشقت هالصفه فيني.
سوالفي كان لها معجبين حتى الجيران في الجمعات كان عندنا جار ياخذني عنده ويحش في أبويه,
وأجلس أدافع عنه قدام البابا والرجال, مو بصياح وبكى, بنفس استغراب الأطفال انو ليه تقول كذا في بابتي .
قريب أفتقدت روحي في الطفولة, فغارتي برائتي مرحي وأصدقائي...

تذكرت كلامي لما قلت ما أبغى أشتغل مع أطفال أو طلبة المدارس, أبغى أتعامل مع جامعيات وبالغين,
والحين.. يازين الأطفال جنبهم.
سعيده إن أولاد أختي كبرو وهدو من جنانهم, سرنا نسولف ونقضي أوقات حلوه,
كنا جالسين ناكل سوا في طاوله وحده أنا وهم وأختي الصغيره,
وجيت مالقيت كرسي ف أختي جلستني معها بنفس الكرسي, قلت خن نعطيهم درس في الأخوه هههههه
قلت شفتو أختي تحبني جلستني معها عشان ماعندي كرسي, قام الكبير أعطاني كرسيه وقال أنا بجلس على الطاوله..
فاجأني الله يسعده ويحفظه, كنت بأعطي درس في الأخوة وأعطاني درس في الذوق والأخلاق.

**ShahrzaD** · 10-05-2018, 10:07 AM

رد: تــغــريــدة صــبــآح } ..

الناس تصبح تشرق مع الصبح
تشرب شااااي حيليييب
تشرب كفي والا لاتيييه
تشرب شراب عسل
تصووم مثلا
بس تنفس ع الصبح غريبه وخصوصا انه الخميس الونيس مو صبح الأحد.
يالله صباح الخير

عندي طلب بس، ترجم مدري ترجمي اش معنى الكلام
عندي قابليه انقسم لاثنين مافهمتها
وأصحي تنكتب إصحي

تغريدة صباح } ..

تعليق

تعليق

تعليق

تعليق

تعليق

تعليق

تعليق

تعليق

تعليق

تعليق

google Ad Widget