ماهذا الهدوء
يشبه هدوئي هالفترة
جيت من السفر السبت ونفسي مسدوده وجا كرف في الدوام موطبيعي
على قولة زميلتي, حزنت على نفسي. لأن فعلا الي سويناه أنا وهي فوووووووق طاقتنا, أخر ثنتين يروحون البيت.
نص الفريق ماخذين اجازات. الحمد لله على كل حال (ويبقى للإنجاز حلاوة) حتى لو ما انجزت كل المهام.

ما حكيت لكم حكاويه في سفرتي, تعرفت على صديقتين هناك لكن مش تركيات, ايرانيه ومغربيه.. مالقيت تركية تتكلم غير لغتها
ومعاهم توسعت معرفتي في الحتت شوي ولو كنت مو مربوطه بأمي أخاف عليها لحالها والا كنت أبحرت في الاستكشافات.
امي لها اهتماماتها فأروح معها حارس أمني ^_^.
الموهيم , لازم تتعرفو على ناس من أي بلد ناوين تروحوله قبل تروحون, لاحظت ان السياح مايشوفون قلب البلد
زي اللي يجون السعوديه ويروحون مداين صالح مثلا وشوارع التحلية وأبرز الأماكن مثلا ولا دخلو جوا البلد,
والأحياء والاماكن الشعبيه لأهل المنطقة. استمتعت في طرابزون خصوصا اننا سكنا قدام البحر وكل يوم بوجهي صبح ظهر ليل
وسبحت صبح ولليل رغم قوة الأمواج.. بجد لا يمل منها للي يحبون هالجو.
أما اسطنبول ما يكفيها اسبوع صراحة..استمتعنا فيها ولا شبعنا.. لكن كان الاستغلال يحفنا من كل جهة,
لذا كنت محتاجه أحد أتأكد منه ان احساسي صحيح وينورني باللي جالس يسير وتعلمت الحمد لله.

المهم ان الويك اند جا وأنا حية أرزق الحمد لله... تعبت
والان فاتحه الكمبيوتر أكمل شغل للأسف. بس مامعي أي نشاط ثاني أختي حبيبة قلبي سافرت لدراستها وانا زعلانه من قبل اسبوع على قرب سفرها.
قدباي


قبل القدباي.. حساب الصراحه شكله خربان, مايفتحشي
إجازة سعيده

مسهم بالخير
طلع حساب الصراحة بخير وماعليه خلاف, فترة وتعدل..
اثاري مو بس أنا لحالي عندي مشكله في الجوال مع منتدى عبير
نفس قصة نفر كويس بالضبط:


آه يافجعة أول يوم بالسنة الجديدة..
ماودعت السنة الفايتة إلا بدعوة: ( اللهم اني أسألك خير السنة الجديدة وخير مافيها وأعوذ بك من شرها وشر مافيها)
وجيت يوم 1 محرم من دوامي العصر وكنت جايبه العامله حقتنا من بيت جدتي معي يعني مافي بالبيت غير أمي,
ووصلت عند الباب الا الفرن حق المطبخ برا وكله من فوق أسود وأشياء ذايبه عليه من الحريق ووضعه مزززري..!!
قلت اصبري لا تتسرعين ادخلي وشوفي اش فيه, لقيت باب بيتنا مو مسكر مفتوح.. برضو دخلت وتعوذت من ابليس..
الا طريقي للدور اللي نجلس فيه كله بقايا سوداء وأيادي قدور .. هنا ركض على فوق أدور أمي
دخلت المطبخ لقيت انو كان فيه حريق, وأدور أمي وماهي فيه, أتصلت وردت الحمد لله تقول مسيره عند وحده من الجدات ..!
قلت يا أمي قوليلي انتي في المستشفى؟؟ لا تكذبين عليه انتي بخير فيك شي؟؟ ..
و تحلف انها زايره هالجده وما تبغى تحكيلي اللي حصل قدامها تقول اذا رجعت اقلك..
وأنا استناها وماني عارفه أتأكد اذا هي بخير وابويه يتصل يتطمن علينا كعادته وماحكيت له شي ولا لأحد ..
والحمد لله جت وهي زي الورده اللهم لك الحمد, وبس ألاحقها وأضمضمها :(
قالت سمعت طقطقة قوية وطلعت لقيت المطبخ مشتعل وأول شي سوته طفت الكهرب من الكيبل عشان فوقه أسلاك..
وغرقت بطانيه ورمتها ع الفرن الين جا عامل مدري كيف طلبته وكملو الباقي.
الحمد لله ان الغاز برا البيت في الحوش, هي نسيت قدر يطبخ مويه وسكر وطلعت النار للشفاط مدري مروحة وذاب ع الفرن وتحمس لفوق..
حكيت لكم اني ما أخاف لا من جن ولا من حيوانات قد ما أخاف من الغاز والانفجارات عموما..
وبس الله لا يعيدها من فجعه ولا يفجعني ولا يفجعكم لا في حبيب ولا غريب يارب.

سنة خير وبركة علي وعليكم يارب

السلآم عليكم ومساء الخير جميعا
الله يسلمكم من كل شر شكرا على الدعوات الطيبه والتهنئة بالعام الجديد
أعتقد اللي هنتني خفايء عاد عرفو بأنفسكم اذا كانت سوالف حتى لو بالرموز
الصراحات المجهولة للمتنمرين أو اللي عندهم صراحة محرجة أو خايفين تكون تزعل =)


نفر كويس يسأل عن جملة في حسابي الصراحة

الف سلامة على الوالدة ياشهرزاد والحمد لله على سلامتها
وراح الشر على قولتهم ودامه اول السنة فان شاء الله بقية السنة تكون خاليها من الشرور
مدري كذا جدتي تقول اذا صار شي مو زين في بداية سنه او يوم او شهر او اسبوع
تقول هذا دليل ان الشر جاء اول والخير مقبل في كل الايام الباقية الله يرحمة ياجده رحمه
وعلى فكرة ارسلت لك بوقتها على الصراحة بس للاسف هذا اللي صار معي

بعدين تعالي انت قاصده تكتبينها الصاراحة والا تكليجه .. اعترفي

لا مو تكليجة لكن عشان اللحن,, على أغنية البساطة البساطة أه ياعيني ع البساطه

الله يسلمك ويارب آخر الشرور على قولتك..
ودي أهربت لكن لساتي في فترة ركوود وأتابع أنمي العمالقة نزل له الموسم الثالث
الدوام ومع عميدتنا الجديدة المتحمسة , أهلكتنا
اليوم من قوة حماسها تسولف بالإيميلات.. خمس ايميلات عن ورق العنب !
سوالف وفوائد عشان نزل عندنا في الكفتريا ورق عنب شغل بيت هههههههههه
يالله أجيكم لاحقا على خير

السلآاام عليكم

فعاليات حلوة وجذابة بالمدونات خصوصا في مدونات نفر كويس وطيف عابر ونور الفجر
وشقران في المقدمه... أقصد طيف صراحه وصلتني للضحك بصوت عالي
جمل مستذئب أجل هههههههههههههههه

وتفسير نور الفجر للحلم مدري كيف, بعيد عن تفسيري تماما
يعني الحلم كله ديك وحيوانات وجو رعب للأهل وللبيت
والوسمي بس طل كأنه إعلان لمنتدى عبير بنص الحلم وسارت التفسيرات كلها عليه

المهم استلمت الغايبين اللي طلو مؤخرا بتقييمات ترحيبية.. حبيت طقطقة نفر كويس يوم يقول شكلكم نازحين من الباث ههههههه

يالله حركو اللعب لين أجي أبغى أختم ذا الصفحة مدري ليه بس كذا مو عاجبتني هههههه
معي حصيلة انتقاءات من تويتر تصلح بصفحة جديدة ^_^

صباح الخييير صبااح الوطنية






كانت لي احلام ..

اساسا صعب تتحقق ..

بس من جنوني دايم اتخيلني عشتها وطلتها ..

ياه يا امانينا .. ياه ياقلوبنا ..

ياه ياأحنا ..

رغم مشينا وجينا ..

لفينا وتهنا ورجعنا ..!!

ياه كلها صارت ..




من مدونة عاشقة المطررر
عاد يقولو حقين الطاقه وقوانين الكون
انو لما تحطي حلم براسك و(تعيشيه) بدون ( تعللللق )
راح يتجلى في واقعك ^_^

طبعا أنا أقراء من باب الإطلاع وكنت أحس اني مافهمت شي وكيف وشلون
بعدين تذكرت أحلامي اللي تحققت واللي ما تحققت

كنت أطمح لوظيفة في بيئة إنجليزية أو أي بيئة غربية
عشان أحس اني مسافره مو مداومه
احب اتعرف على اللي مايشبهوني ولا يشبهون ثقافتي بشي, متعة في الاستكشاف والمعرفة
حتى الإدراك يتوسع..
المهم كنت أدور في وزارة الداخليه وظايف في السفارات أو الملحقيات
لأن في منطقتي فيه شح في فرص العمل وأبويه سعى في المدن يلاقي لي وظيفه بنفسه
وعجز رغم ان هالمهمه ما تعجزه بالعاده لكن ماطلع معاه شي, قام يلعن تخصصي اللي كان يجمله بعيوني هههههههه
أرزاق سبحان الله .. المهم

باقي الحلم بعيوني لكن ما علقت نفسي فيه عشان ما أحبط
وجاب الله البيئة الإنجليزيه ومتنوعة الجنسيات لحدي !

أما الأحلام اللي انتهت بخيبة كنت متعلقه فيها للأسف
لو كنت اطمح لها بعقل بدون تعلق كان ع الأقل ما أتعبتني نفسيا, وتجي زي ماتجي .
التعلق بأي شي مهلكة, كفخو أنفسكم إذا فكرتو تعلقوا آمالكم بشي.

وصلتني لمرحلة راشد يوم يقول:

ماعاد في الأحلام حاجه تستحق
اتعب وراها وانتظرها كل يوم
واللي فرق ها الحين عندي ما فرق
غاب القمر والليل تملاه النجوم


جلست فترة طويلة كرهت الجامعات والدراسات العليا والأمور اللي طمحت لها
حسيت اني زهدت في الأحلام وغابت الهمة.. حتى ادماني لتحسين ذاتي ومهاراتي وقف لفترة طويلة
وزدت عشره كيلو للآن ماعرفت افسر السبب اللي خلاني أوصل لهالمستوى من التحول

كل هذا نتيجة التعلق في الأحلام..
كنت أحسب الاصرار هو التعلق, لكن الإصرار, هو الصبر+ إيمانك بنفسك وقدراتك + عدم الإستسلام للتحديات والظروف (بدون تعلق)

جمعة مباركة

اللي يسألوا عن تنهيدتي
بخير ولله الحمد, بدات وظيفتها في المكان الجديد وعايشة اليوم بيومه
ف بلاشي دراما أوك =)

Sometimes love is like bad weather
You can't pray it away
You can't make it better
Sometimes love is like bad weather
We can dance in the rain
But can't stay together

مساء الخير =)

كثير اقتباسات طرحها نفر كويس في مدونته عن العلاقات أثارت رغبتي في التعليق على كم جزئيه
زمان كانت تعجبني الاقتباسات اللي تتكلم عن عظمة الصمت, وانها أقوى رد
أحيان كثيره تكون أسوأ رد إذا ماهو وقتها ولاهو الموقف المناسب ولا الشخص المناسب,
إذا الشخص مهم واحترنا في الرد عليه ما نتركه بصمت, إذا كنا بننفعل نرد في وقت ثاني لكن بدون تأخير..
إذا صمتنا واضح وإنه هو ردة الفعل الأنسب للموقف لاباس.. لكن معظم المواقف تحتاج نتأكد انها مفهومة..
أما ذا الشخص مابيستوعب شي ولا يهمنا إنه يفهم فنتركه على عماه.

أنا أكثر الصامتين للأسف لأني وخصوصا تحت تأثير المشاعر..صعب أعبر وأشرح وأحيانا أجد صعوبه في التفاهم..
مثل والدي لما أكون معاه في موقف صعب .. نتحول على الرسايل.. قبل الواتس آب كنا نتراسل ورق ههههههه
عني برضو ما كنت أرد.. هو اللي يرسل
الآن أشوا فيه تحسن وعرفت إنه لاباس بالنقاش حتى لو إنه في احتمال ما يوصل مقصدي صح,
لابد أكون سويت اللي عليه وقبل ما أكون متأخره .


باقي ودي أعلق على جزئيات مدونة نفر كويس
تعليقي على نوعية هذي الأقوال وهي منتشرة ودايم تمر قدامنا


"بعض الأشخاص يدخلون حياتنا من أجل التطفل فقط
وعندما يكتشفون كلجوانب الحياة لدينا ينسحبون بمكر
كأننا لم نجتمع بهم يوما ولم نبادلهم أي شعور
إنهم أقل الناس خلقا وأكثر الأشخاص خبثا فاحذروهم.
رفيقةالجزائرية."

"الوداع لايقع إلا لمن يعشق بعينيه "

تذكرت تعليق وحده في تويتر تقول " لا تحملوا العلاقات فوق طاقتها .."
مو كل علاقة لها معطيات ثابته ولا نتائج وحده,
ولا الأطراف هم الأطراف.. ولا الظروف هي الظروف
ولا التحديات وحده.
في تويتر كثير ألقى قواعد من الناس وتنفع في بعض الأحوال وتتفق معها
والباقين يتبنونها لكنها بعيده عن اللي يمرون فيه وبكذا يظلموا أنفسهم وغيرهم.


وبس والله, من يتفق يسوي سبسكرايب وصراحه ولايك

ودي أبتعد عن كل الواقع
أطلع بطيارتي الخاصة
بدون ما أحد يدري ويني ولا أخذ مخلوق
بس أسجل رسالة لأختي اذا ضيعوني يلقوني
وأنطلق في مغامرة لوحدي فوق الجبال وأوصل أماكن ماتعرف ريحة البشر
وفيها حيوانات ماتم إكتشافها, ممكن يجوز لي المكان وأقلب طرزانه وأبطل أرجع
وفيها نهر أو شلال يووووووووووووووووووه ياجمال الرحلة.

سندت ظهري على الكرسي وغمضت عيوني وكملت خيال شوي ورجعت لكم
شميت حتى ريحة المكان
بكمل ..باي