،




ونقول ياإأآأإأآرب !

احس هذا مقطع من غرفه طيف وشهرزاد واللي تصورهم تنهيدهـ
وصبحكم الله بكل خير وبدايه صفحه جديده وقلبنا ام الاحزان اللي قبلها !

ياخي احيان ودي كذا اسوي بذكرياتي اقلبها وانساها
واي احد يذكرنا فيها على جبهته باقرب فنجال او دباسه !!

ياحب بعضهم بـ التذكير وخاصه السلبي يحبون يشوفون الناس متعكر جوها
ياخي اذ ماعندك سالفه لا تنبش بعض الامور اللي مالها داعي

نقظه ونهايه سطر

تعالو هنا الحين يوم تجي ودك تسوي شي وفرحان انت وخشتك بذا الشي
ويطلع شغلك زي وجهك وماله داعي اصلا !!

ياشين برده الوجه والله احيان كثيره تصيبن بالوقت الغلط
احس وجهي بارد كاني فاتح لي فريزر بعز البرد تالي الليل ومقابله ادور
شي ينوكل

الحين اذ صار معاكم كذا ماودكم الارض تنشق وتبلعكم اي قسم
المشكله انك ماعاد تقدر تسوي شي مغير تبرد وجهك وودك الوقت يعدي
والناس تنسى !!

شعور اهبل عبيط غبي وكل شي !!

نقظه ونهايه سطر

فيه اوقات المفروض يكون الكنترول على الكلام اكبر خاصه بوقت الروقان
لان العيد يكون قريب جدا وكذا

واحيان ودك من يخليك تهدي اللعب شوي وتقضب ارضك
بس مشكلتنا احيان مانسمع للي يبي يوقفنا بنص الحماس عشان مانتهور

ونحسبه يتكلم ضدنا او شي ماندري انه يشوف ابعد شوي مننا

بس تصدقون عاد احسن شي اننا نكون كذا لاننا اكثر طبييعه
ماهي مشكله يوم نجيب العيد وذا اللي اسويه ياكثر ماجيب العيد

بس امون واعرف الناس اللي قاعد معهم ومدى تقبلهم لي ولاعيادي
<< حلوه اعيادي

وبس والله ماعندي سالفه المهم ترا فيه رابط عندي تحت
العناكب من كثر مابنت عليه صار مهجور بقوه اللي فاضي يسير له هنا بالتوقيع تحت

يكفي المشاكل اللي جات اصحاب التطبيق من الكفار

قصدي رابط الصراحه ترا !!

يالله كونو بخير .. ســـلآم

يقـــولون !

ان اكثر الأخطاء اللي نرتكبها في حياتنا
اننا نقول .. ( نعم ) في الوقت اللي المفروض نقول فيه ( لأ ) !

مدري ليه ياخذنا احيان النعم معاه بوقت اللا

مدري هو خوف من زعل بعضهم او اهمال في حق انفسنا عشان رضاهم
وفـ الاخير نكتشف بعد فتره ان اللا كان الانسب لو قيل !!

بس كمان نرجع ونقول لاجل عين تكرم مدينه
<< هذا بلاك ابوك ياعقاب

دقت الصدر بالوقت الغلط خل العين تنفعك بعدين انت ووجهك

تعلمو زين متى تقولون ( نعم ) ومتى ماتنقال وربي بترتاحون
خل العالم تتعود عليكم ولا تستغل ذا الجانب فيكم

وبس والله .. سلام

في بعض الاحيان او خلونا نقولها في غالبها خاصه في عالمنا الانترنتي وكذا
فيــه ناس تجيبهم الصدفه لحياتك او مكانك

تحسون معهم انهم خاتمه كل الاشياء الجميله
واللي بعدهم او قبلهم لا جديد !!

مشكله اذ بـ نمشى على هذا الكلام

سيمر بنا دائما اناس تقودهم الصدف الينا سيكون لوجودهم شكل مختلف
لحضورهم نكهه اخرى !

لن يستمرون وهذه طبيعه الحياه انها تتغير باستمرار
خلونا نعيش على هذا الاساس كل شي جميل مهما طال به الوقت سيكون ذكرى

لنجعلها ذكرى طيبه دائما لا يغيرها شي
لنذكر اصحابها بكل خير فـ كل الاوقات !!

فـ الاخير ..

اهم شي اننا نستمر في محاوله كسب قلوب الاوفياء لنجعلهم دائما
بالقرب منا ونكون الاقرب لهم لانهم يستحقون ذلك

كسب القلوب اهم من اي شي اخر
فهي من تجعل للحياه متعه اكثر

وبس والله .. كونـو بخير .. سلأم

فيه ناس مصدقه ذا الشي وانهم يقدرون يصنعون ابتسامتنا بكل وقت !!

والمفروض انهم يعرف ذا الشي زين مو كل الوقت بتقدر تصنع
لناالابتسامه واصلا محنا مطالبين بصناعه ابتسامهم دائما

حنا في اوقات كثير ندور من يصنع ابتسامتنا !!

تدرون وين المشكله بعضنا كل همه وشغله الشاغل انه يصنع ابتسامة العالم
واذ فشل تلقونه منفس وكذا !!

ياخي مو كذا مو شرط انك تكون صانع ابتسامه الاخر !!

ليت الناس تقدر ان الابتسامه ماهي صناعه بقد ماهي رده فعل
المفروض انها تكون طبييعه اكثر منها مصنوعه

وليتهم يمشون عليها !!

فـ الاخيـــر

اصنع ابتسامتك بنفسك وهي ستزرع فيهم الابتسامه بكل سهوله
ماهي كيميا الشغله !!

يالله يكفي فلسفه اليوم عليكم شكلي جعان سوالف بجد

كــونـــو بخيــر .. نقطه هذا كبرها .. وهارد لك للاتحاديه اجل 5 اكلوها
من التعاون

يالله .. سلام

صبحـــكم الله بــالخير .. زيه ذا البزر حالتي اليوم كلها كسل
فيه مقطع جايته شهرزاد عن واحد صغير يشتكي من الدوام !!

مدري ليه شوي واصيح معاه قسـم عاد مع المقطع حق الصوت
حزني وربي وردني سنين ورى ايام المدرسه

ومن امس واليوم كل شوي اشغله وارسلته للعالم عندي
يمين مقطع بجد يحزن ويقلب الذكريات مر مدونة شهرزاد وشوفوه !!

المهم

احيان كثيره احس نحتاج شوي تكبير راس وكذا عاد مافيه
احسن من ان احد يحسسك بالثقه فيك ياربااه هنا تحس انك شوي وتوصل السماء

من قو شوفه النفس

بس ماعليكم نرجع للوضع الطبيعي بسرعه لا تخافون بس بجد ترا احيان
لو كان الكلام فيه شوي مجامله او شي لكن حلو والله

يوم احد يحسسك انك نلت ثقته وكذا ياخي شعور جميل بجد

عشان كذا لا تبخلون على العالم اللي حولكم بمثل ذا الشي
خلوهم يعرفون قد ايش تثقون فيهم وكذا ترا ماهو ناقص منكم شي اذ سويتو كذا

نقطه ونهايه سطور

اليوم تصبحت برساله طيبه من شخصيه قديمه طيبه شراوكم بجد اسعدني ذا الشي بقووه
الله يسعد من تكلف وارسل

فـ الاخــير

رب كلمه تظنها بسيطه لكن وقعها دائما يكون مختلف عن توقعاتك
اطلقها وستجد لصداها صدى يصلك في مكانك

وبس والله .. كونـــو بخير .. سلام

8 / 3
فـ الثامن من مارس كل سنه تم تخصيص هذا اليوم للمرأه وقوقل اليوم
محتفلين بذا الشي فكل عام وكل نساء الدنيا بخير ..

عاد تصدقون في الكاميرون والسنغال وملاوي ودول اوربيه كثيره اليوم اجازه
لكل النساء وكل سنه زي كذا !!

طبعا ماحصلت دوله عربيه مسويه ذا اليوم اجازه للاسف !
بس ماعليكم اهم شي الاخلاق وكذا

نقظه ونهايه حكي !

ونقول نهايه اسبوع اسعد باذن الله واجازه حليوه للكل
والعاطلين مع نفسهم استناسو مع العالم ماعليكم وغيرو شوي من جداولكم

فيه مشاكل في روابط الصراحه شكلهم بيقفلونها بعد
الى الرابط في توقيع طيف اصلا من سنين مستغرب رابطها غير عننا جميع

المهم هو الشغال اليوم الباقي كله معلق ومشاكل

يعني بناخذ رابط طيف ونخليه للكل !!

عاد كل من كتب يقول لمين اللكلام وكذا وطيف تسوي الكنترول وتحول
الرسايل لاهلها وكذا

يالله ماعليكم زي ماقلنا قبل اهم شي الاخلاق !!

وبس والله .. سلام

قديييم هذا التصميم ايام عز النصر .. ومتصدر لا تكلمني وكارينو ياربااه
اليوم من الصبح رجعت لبدايه المدونه هنا تقريبا رجعت (9) سنوات ورى !!

يارباااه

بجد ايام وناس وحوادث وذكريات وكل شي يازين التدوين
يوم ياخذنا معاه الى لحظات عشناها وكتبنا عنها !!

يارباااه

قسم ذكريات بجد بعضها عجيب وكذا عاد ذا المدونه من زود الغبار اللي فيها
ماعمري غيرتها من سويتها يعني فيها كل شي تقريبا

بجد كميه ذكريات واشخاص وناس يالله يارب ان تسعدهم وين ماكانو
ليت اقدر اوصل للبعض لو بس اخذ علومه واخباره

والله تسع سنوات ماهي قليله عمر والله !!

يارباااااه

الحمد لله ان ماعندي صلاحيه احذف شي قديم او اعدل فيه ولا كان
خبصت الدنيا تخبيص اليوم لان فيه اشياء بجد مدري كيف جات

العمر يركض والله وحنا نحسب انا واقفين بمكان واحد والدنيا ماتتغير كثير
حدك ترجع كم سنه ورا تحس بجد انك شيبت وكذا

اكثر شي اعجبني في المدونه هذه من صـ 211 الى 230 تقريبا كان فيها كميه تفاعل
هي الاكثر في المدونه بكبرها وصلت هناك تقريبا عدد اللايكات الى 29 لايك ببعض الردود

يارباااااه

بجد هذيك الفتره كانت الافضل للمنتدى بكبره يمكن في عام 2011 اذ ماكنت غلطان
شايفين قد ايش قديم انا ومدونتي اليوم

يازين الايام فـ بعض الاحيان يوم تسحب معها لورى شوي

وبس والله اليوم قلبت مدونتي انتظرو التقليب الجاي في مدوناتكم وبجيب شوي
من فضايح بعضكم وتاريخهم القديم

يالله كونــو بخير واجازه سعيده باذن الله

وكلن يقفل مدونته او يحذف بسرعه لاني ناوي انبش فيها تنبيش بالايام الجايه
مالي دخل هذاني علمتكم

وبس والله .. سلام

صبحكم الله بالخير .. في بدايه اظنها بتكون مو بذاك الزود لذا الاسبوع
بس نقول .. يأإأآأإأآب خير !!

في اوقآت نمر بحاله خمول كامل وتحس الوقت بكبره يستقعد لك
بطئ ممل ثقيل وكله كسل !!

ماحب ابد ذا الشي يكون ببدايه الاسبوع لانك بتاخذ لك وقت لين ترجع للوضع العادي
حتى مالك نفس لشي وكذا !!

تدورن انعن شي انك حتى التفكير يصير عندك ماش وتسوي من الحبه قبه
لو هو موضوع تافه تلقاك تكبره وكذا !!

مدري ليه بس الغالبيه فينا كذا نحب نسوي الشو احيان بوقت ماهو وقت
<< هذا وش يقول ؟

تصدق ياصوت الضمير ماعاد ادري حتى واش اقول بس تلقاني اقول
وفـ الاخير ماعندي سالفه يمكن حلطمه بس وتفريغ شحنات وطاقه سلبيه على الفاضي

كمان مدري والله !!

صح على طاري تفريغ الشحنات وعلى طاري الصراحات
الحين عندي بالجهاز بالدوام ماتفتحت الصفحات ادخل من الجوال تفتح عادي

مدري ش السالفه بالضبط المهم ان الامور من الجوال تمام بس من الكمبيوتر لا
عشان كذا تكلمت ذاك اليوم

وتعالو شوفو نص الشعب يرسلون لي الرابط شغال ومافيه شي وكذا
لا اشوف تنهيده مسويه صفحه يديده للصراحه احسن مافيه زي تويتر جايبن لك عداد للحروف عشان
ماتقرقر وماتنتبه للعداد ويقطعك بالنص الكلام

عاد خويكم يحب القرقر فـ الصراحات ومعلقات احيان اكتب وما انتبه الى ماعاد يكتب
فحلو الموقع الجديد ابو تطبيق

كنت ناوي اسوي صفحه هناك بس دام القديم من الجوالات شغال ماتفرق ماله داعي الجديد

فـ الاخير

الصمت ماهو الحل الدائم .. بالعكس ذا ابو البلاوي كلها انك تصمت يوم تشوف من انسان
عزيز اي زله او خطا واصل الكلام خذ واعطي لين توصلون لنتيجه وبس والله ..

كـــونـــو بخير .. ســـلآم

حلوه بعض الذكريات حلوه بعض اللحظات حلو توثيقها حلوه بكل تفاصيلها
للحين اذكر ذا الايام !!

تصدقون اول احيان يوصل اللايكات في بعض الردود الى (29) لايك
ايام الطيبين الاولين

يـقول

أوقات ياخذنا الحكي ..
وننسى بالحكي أوقات ..
واوقات .. يا ليت الكلام سكات ..
و يجرحنا الحكي ..

نختم معكم ذا الصفحه ببعض هذه الذكريات ونقول الوعد بالصفحه الجايه
خليكم قريب ماتدرون يمكن اقلب الصفحه بعد شوي



هذه افضل عشره ردرود في المدونه واكثر عدد اخذت من اللايكات
ياربااااه بعض الردود اخذت (31) لايك كم كنتم كرماء معي

وكم اسعدني تواجدكم ودعمكم شكر بجد شكرا



نختمها بعدد مشاهدات المدونه (242) الف مشاهده يمكن من اعلى الارقام
في المدونات بجد اشياء رغم انها ماتفرق بس ترفع الراس وكذا

فـ الاخير

اتمنى لكم حسن المرور وسعة الصدور .. وان تكونو بخير .. سلام