كونك في شراييني

كذا تسأل تشاورني اذا هالروح مشتاقه
ومن غيري فدى قلبك حبيبي يا نظر عيني

تناول وافترش قلبي يزيده حبك بطاقه
سعادة قلبي بحبك ولمسة ايدك ايديني

كذا دايم عليك أوله عليك النفس تواقه
ولا اتغير أبد عنك لأنك مزهر اسنيني

ترى حبك زرع فيني حنانٍٍ(ن) ثبت اشواقه
أبسقيه الوفا والحب ولا حْد(ن) عنه يثنيني

متى تتحقق امالي تجيني الروح سباقه
تخطى كل شي(ن) صعب وتتمنى تلاقيني

ولا ابغى لحبنا يذبل فراق(ن) يشعل احراقه
ولا ابغى يفرح العاذل إلى شك(ن) يوديني

أبد هاك الوعد مني حقيقه جات بّراقه
أحبك كبر هذا الكون زهوري يا بساتيني

أبعلن للملا إني بدونك أشعر بفاقه
أجوعك .اعطش لحبك وكونك في شراييني

الشبل من ذاك الأسد

( تخيّر أسمه يوم شافه وناداه
فهد العرب من بين كل الاسامي

عبدالعزيز اللي على ابوه سماه
المجد له في كل الاحوال ضامي )

الشبل من ذاك الأسد لاعدمناه
الحر ينجب حر مثله قطامي

ان جيت أبوصف شي من فعل يمناه
ألقى سموه فوق الاشعار سامي

من شّبته والخير حليف لاخطاه
واصبح حديث الناس شرقاً وشامي

كم فعّلت يمناه بالمال والجاه
وكم مسلمٍ فكه وحكمه اعدامي

وكم مسلمٍ من عْل الابدان داواه
واحاط به برعايته باهتمامي

ياكم ؟ كم ؟ وكم من خير سواه
وياكم دعوله بالحرم والصيامي

ماجيت أبكتب لاجل أعّدد مزاياه
جيت أبسجل له جزيل أحترامي

وأقول لكم يقال : من يشبه اباه
صبحاً تجلى في قدومه ظلامي

رمز ومهابه

كان الوطن حلم ومقابيس وهلال
كان الوطن قوس وقصيد وربابه

كان الوطن هجن ومعازيم ودلال
كان الوطن صحراء ونفود وسحابه

صار الوطن ثروة من سهول وجبال
وصار الوطن أروع سؤال وجوابه

صار الوطن كل المعاني والامثال
وكل الخواطر والشعر والكتابه

صار الوطن كل الملامح والاشكال
جيلٍ يوَّّرث جيل زهرة شبابه

وصار الوطن كل الاماني والامال
مثل الخواطر ، والخواطر تشابه

وعاش الوطن مجد وتراثٍ للاجيال
للعلم والتاريخ رمز ومهابه

دخيلك

سألتك واستباحت ارض انسانك من الاخلاق
خلاص أرجوك جاوب حيرتي والا أشتبي فيني

أعيش الموت كان الموت في دنياك ماينطاق
علامك يوم أفكر أبتعد بالوصل تغريني ؟

أحس انك ملاك الارض اشوفك للهوى ميثاق
كثر ماصارت الفرقا مع الايام تعنيني

حبيبي والمعاني من لساني كنها تنساق
ولا تنساق لو مانت بخيالي يانظر عيني

ترى ماكل شمسٍ لاشرقت يصفي بها الأشراق
وكم صبحٍ نهارك به يضيع ولا يقديني

انا كنت أحْسَب ان الهم دمعة تستبيح احداق
ولكني لقيتك عبرةٍ باقصى شراييني

دخيلك وش يفيد اللي كتبته يوم صدري ضاق
وانا حرفي تقفاه الحنين وغربة سنيني

دخيلك والخفوق اللي نزف جرحه من الأعماق
لا شاف ان الوفا بدموع عينك ما يعّزيني

دخيلك وش بقى للعشق ياول واخر الاشواق
بعد ما ضاعت احلام الهوى ما بينك وبيني

الصدى للشاعر القدير محمد العمري -خواطر شاعر

لقيت الشعر باشكاله على ما تشتهي لذواق
مسطر في ورق واشرق سماء كل الدواويني

لقيته واضح المعنى وفي فن الحكم سباق
صراحة لو بغيت الصدق يا مشعل خطف عيني

سألت وقلت من هو يا ترا هالشاعر العملاق
ومن هو فارس القاف الذي خاض المياديني

أجابتني حروف القاف قالت شف سما الأفاق
ينابيع السبيعي سطرتني واعتنت فيني

رجعت وقلت ماشالله جل الواحد الرزاق
عظيم الشأن له صومي وله حجي وله ديني

بعدها جيت أباكتب رد هذا القاف فالأوراق
ويبقى لي شرف لوما كتبنا غير حرفيني

ينابيع الحقيقة ماجتماع إلا وراه افراق
وهذا حال دنيانا تعاملنا بوجهيني

كم انسان شكى منها وكأس المر منها ذاق
بكى غالية يابنت العرب والناس ممسيني

تهور في متاهات(ن) وصابه سومها الحراق
كوت قلبه وناس من بلاويها مجانيني

داريت همّي

وين الوليف اللي به القلب مسرور
أقفى واضمى خافقي من غيابه

مشيت من شانه مسافات وخطور
وازريت احدد خطوتي في سرابه

هلّت دموع الوجد والقلب مكسور
ليته يبدد ضيقتي في عتابه

صوبني بسهمٍ فتك قلب مأسور
وخلاني اتجرع مرارة عذابه

شكيته اشعاري من ايّام وشهور
وداريت همّي في بحور الكتابه

دام الوفا مابيننا صادق شعور
والعز معنى والمبادي مهابه

قلبي له الملفى وحبي له السور
وفي محجر عيوني لحبه رحابه

اتعبني بغيابٍ تبنّاه مغرور
مغرور من زينه ولذّة جوابه

عذبني بغيابه وانا اقول ذا جور
ولا من حجب صوته تجيني كابه

ليته يجي ويضمد القلب بزهور
ويثج في رمضى خفوقي سحابه

ما شفت مثله وبكذا صرت معذور
معذور في حبٍ تباها وزها به

خلٍّ سكنّي وشيّد بقلبي قصور
قادر يموتني بحضرة جنابه

قلبٍ عسف في غيبته لجة النور
وحب الظلام وشوفته في حجابه

كونه معي وسط الحشا حرف وسطور
ياخذ من احساس الشعر في نصابه

بيت كتبته يتبع القلب بعطور
وبيتٍ يعانق ونتي بالربابه

رفعت كفي للذي أفلج النور
وطلبته الله مالغيره إستجابه

إنه يبدل غيبته فرحة حضور
ويبدل احزاني أمل باللقا به

تشرفني تجي صادق

انا احسب اني ليا جيت أشوفك تفرح لشوفي
ولكن مابدر مّنك رسم لي عكس تصويري

أنا مالي عليك حقوق ولاني طالبه توفي
حقيقة واقعك يطغى عليها حد تعبيري

سلاسة حرفك الراقي توقف عندها حروفي
وعطيتك دون ماتدري مع الإعجاب تقديري

ولكن يوم صافحتك بعد ماجادت ظروفي
تبيّن كل ماتخفي وسمعته عنك من غيري

حشى لله ماودي تطفي يالغلا طيوفي
ولا ودي يحيد الحق عن دربي ولا سيري

ترى ماهو لاجل غايه ولا التبرير مكلوفي
على الله جبرة الخاطر ولا تحتاج تفسيري

تشرفني تجي صادق ومقرك داخل الجوفي
أقدم لك من الواجب وفاي وكل تفكيري

كتبتك يوم صادفتك ولابي منك معروفي
أعز النفس وارفعها عن اللي مابهم خيري

حسايف كنت أحسْبِنّك تعانق بالغلا حروفي
ولكن مابدر منك رسم لي عكس تصويري

إيه احبك

إيه احبك كلمه اقراها بعيونك
إيه احبك غارقه باقصى مداك

كل ما فيني يتادي لك يا عونك
إيه احبك.إيه احبك.يا ملاك

لا تغيب اشتاق مرباعك ضعونك
لا تغيب اهواك واتنفس هواك

واستعيد الروح من همسة شجونك
واستشف البوح من همسة غلاك

إيه احبك واشتهي غيمة مزونك
ارتشف حبك واشارك في عناك

لا تقول ابعد ابد للي يصونك
بالجفا ارجوك لا تنطق شفاك

لا تخون اللي بقلبه ما يخونك
ينتشي نبضه يحلق في سماك

اسقني حبك وانا بروي غصونك
في حديقة قلبك ارعى من رعاك

ما عرفت الحب الا في لحونك
ولا حملت الشوق الا في رجاك

لك خضع حرفي باشواقه يبونك
يتبعونك في محبتك ورضاك

اقتل احساسي لو لحظه يخونك
واشتعل غيره إذا طول جفاك

خوفي العذال مرّه يشغلونك
وانا قلبي ما تعلق في سواك

روحي مع قلبي/عقلي يتبعونك
قربك الشافي وهجرانك هلاك

حبني بالحيل تلقاني بعونك
وانا احبك فرحتي لحظة لقاك

بنسج الذكرى قصايد يندهونك
والوفا صوره يجسدها وفاك

لا ندهت القلب في لحظة سكونك
قال لك لبيك من حبّه وجاك

بس اوعدني إذا خابت ظنونك
تبتعد تنسى لمن قلبه عطاك

وانتبه الاصحاب لو مرّه يجونك
لا تعيد ارجوك لحظاتي معاك

أمل حياتي

أ . اعاني لوعة الفرقا من الغالي وأترجمها
على وجه الورق يصرخ صداها ليت يسمعني

م . محبه للوفا تشكي من الفرقا معالمها
أخاف دروب خلاّني مع الحرمان تقطعني

ل . ليالي عشتها حيرة وروحي عند ظالمها
مشيت وتاهت الخطوه . رجعت الشوق لوعني

ح . حبست الدمعه بعيني ونادتني مواسمها
وقفت أنخى له الخطوه وعيت لا تطاوعني

ي . يموت الصبر ماتظهر لي الصوره واكلمها
وش اللي ولعه فيني ؟ وش اللي فيه ولعني؟

ا . الاقي صورته بعيني تنادمني وانادمها
غيابه شتت احلامي بها الصوره يبعثرني

ت . توارى لي ودمعاته بسلك الروح ينظمها
يبددني على شوفه . على الكفين يجمعني

ي . يعلمني بها الواقع مثل صورة أنا أرسمها
مثل كل الظروف اللي عن الميعاد تمنعني