اجمل ( حقيقة حلم ) فوق الخيال
من جيت لي صار بحضورك حضور

همسك يزلزل بقلبي راسيات الجبال
وصوتك يفيض بعذوبه ويتفجر غرور

حاولت أوصّف شعوري بس مامن مجال
اصل الشعور الحقيقي ينفهم بالشعور

كانت حياتي ظلامٍ فوق كل احتمال
واليوم صارت نهارٍ كل مافيه نور

بدايتي حيل حلوه واتمنى الكمال
ليتها بك تعّدل !! وبي تغيّر أمور

من عرفتك حبيبي في مقاس الليال
كنها عند قلبي تنحسب بالدهور

من عرفتك وقلبي تايهٍ بالسؤال ؟ !
من عرفتك وقلبي ممتلي بالسرور

من عرفتك أعيشك حلم صعب المنال
ويحتويني شعورٍ .. ما تحدّه بحور

تبتسم لي حياتي لا لقيتك وصال
وان فقدتك حياتي مالها أي دور

دام همسك يزلزل راسيات الجبال
وصوتك يفيض بعذوبه ويتفجر غرور

أفكاري البيضا

حاولت نسيانه ولاشك مافاد
كل ماتناسيته نسيت وتذكرت

أخذت لي مع هاجس الشوق ميعاد
لاغرب الهاجس مع الشوق شّرقت

رسمت لوحة حْب في كل الابعاد
في رسمها ياما تخيلت وابحرت

من كل جانب ساحة الفكر تزداد
حتى اكتمل منظر خيالي وبلورت

افكاري البيضاء مسافات وأبلاد
وتحكي شجون الذاكره لا تحيّرت

أذكر ملامح باقيه حي وجماد
وأشياء ثانويّه عليها تعّرفت

فيها الزوايا طيش واشواق وعناد
وان جْمعتني بالمواعيد فرقت

له بخيالي صورةٍ ظلها ناد
في وصفها ياما تمعّنت وأحترت

وأن زاد شوقه بالحشا والغلا زاد
لاصغر تفاصيل المحبه تطرقت

يا اجمل شعورً يحتوي كل الاضداد
وانقى شعورٍ لا نسيته تذكرت

أحبه واترك الهوجاس

سيد البشر هاويني
...................هو يامر على عيني

وفا واخلاص يعطيني
...................ولا لي بالبشر غيره

انا فكره و الهامه
................اعيش بعالم احلامه

غلايه بصمة ابهامه
...................لقيته بالوفا ديره

أحبه واترك الهوجاس
..................ولا أسمع كلام الناس

أبوح بصادق الاحساس
....................خيال يزين تصويره

صراحه بي غرس حبه
.................ولا لي بالهوى سبّه

جمعنا ربي وربّه
................بِيَْده الفلك وتدويره

غلاه بداخل اعماقي
..................وطيفه فايض اشواقي

هواه الورد والساقي
.....................واحب اتبع مشاويره

أخاف ابعد وينساني
....................اخاف اثقل ويجفاني

ولا لي بالغلا ثاني
.................وانا وياه في حِيره

طلبت الله يسعدنا
..................ولا حاسد يفرقنا

عن العذال يبعدنا
.................ويجمعنا على خِيره

يا يمّه

شوفتك بسمه على شفاة العليل
وانتي لياسي بها الدنيا أمل

أنتي اللي مالك بعمري مثيل
ربي الواحد ضرب فيك المثل

من تحِْت أقدامك الجنه تسيل
والنهر كنه على كف ا لاجل

كم عطاكِ الله من الراي الجزيل
والصعيب يصير ( يايمه ) سهل

لو يجيك القال ماينطق بقيل
كم شكاك الصمت علمٍٍ ماوصل

مايتوه العقل وانتي له دليل
راعيه للعلم لو صابه جهل

العقل عندكِ يصّحي له هبيل
وتجمعين الحلم في لحظة زعل

تزرعين الظل في شمس المقيل
ومن دفاكِ البرد مايلقى محل

ترخصين المد لاصاح البخيل
وتوقظين الليل لو يبكي طفل

لو وصفتك بالشعر جيلٍ وجيل
مايساوي خوفك بلحظة وجُل

وشوفتك بسمه على شفاة العليل
وانتي لياسي بها الدنيا أمل

دمعه يتيمه

مرحوم ياللي سمعته ترفع الرأس
نوماس علمه للنفوس العليله

علمه ينومس بالفخر طير قرناس
حرٍ نهار الضيق كلن يجيله

له موقفً مثل الفرح حزة الياس
بالهقوه اللي كل بارق تخيله

أبويه اللي للمواجيب نبراس
له سمعةٍ ترفع مقام القبيله

له الوفا والطيب مبدى ونوماس
درب المراجل مايضّيع دليله

صادق مشاعر يحتوي قوة الباس
ماعاش في دنياه لحظه ذليله

خبر وفاته أودع الفكر منحاس
وأنشل فكرً ماقوى نزف قيله

يوم الفجيعه أعتلت ضيق الانفاس
مالوم من عّيت عظامه تشيله

قالوا توفى وجاوبت هزة الراس
مع سقطة الدمعه وفوح المليله

احساس صادق وأنجرف دون مقياس
فيض الحنان اللي سكن بي رحيله

في داخل أعماقه كما طفل حّساس
أستوطن أعماقي وصرت أنتمي له

كتبت شعري دم بكفوف قرطاس
دمعة يتيمه تذكره كل ليله

رغم البطا ، رغم الزمن ، رغم الارماس
باقي معي للحين صوره جميله

ضميتها . حطيتها . بين الاقواس
لاضاق منها الكون صدري يشيله

صوره لها نبضي ودمعي والاحساس
صورة شموخ وللمبادي فضيله

جعل العوض بقلوب ماتعرف الياس
تدعي له الرَحمن منجي دخيله

تطلب له الرحمه من الله ولا باس
أعداد من لبا وصلى النفيله

عد النجوم وعد ماهب نسناس
عد الشجر وأعداد بارق مخيله

في جاه منهو عالمٍ غيب الانفاس
في جنة الفردوس يصبح مقيله

رد على القصيدة من الشاعر الرائع
سلطان الرويلي جزاه الله عني كل خير يقول فيها:

حي القصيد يشتت الهم وادماس
حيّه عدد برق السما اللي نخيله

حيّه عدد لمع الدرر لول ٍ وماس
واعداد سكّان العراق ونخيله

واعداد ماذاعوا برويتر معه واس
واعداد كل الوقت واللي يشيله

واعداد كيف الهيل بن ٍ ومحماس
واعداد ماغنّى الحمام بهديله

واعداد ماقيل الشعر ذوق باحساس
وعد المزن تعداد وابل هميله

وعد المعاني دون حصر ٍ ومقياس
واعداد مادل ّ المعنّى دليله

واعداد مانتي للشعر دوم نبراس
نبراس ذوق وذوق والله قليله

واعداد كل الذوق من راس ٍ لساس
واعداد مالا عد واعداد كيله

واعداد لمع الماس في لمعة الماس
واعداد كل الخيل واللي أصيله

واعداد حصن الأرض واعداد الأفراس
تعداد حَرّ القيض وأيضاً مقيله

واعداد من صلّى وتحيزم معه فاس
يطلب رضا الله مايدوّر بديله

واعداد من طاف الحرم واللي جلاّس
برّا الحرم والطوف عنده حصيله

يخاف يوم ٍ فيه يعلن بالافلاس
للي عصى الله بالذنوب الثقيله

واعداد ذكر الله جهر ٍ وكراس
عد السحاب وعد ماسال سيله

واعداد مادق الزمن صوت الاجراس
واعداد كل فانوس وايضا ً فتيله

الله يرحم والدك رافع الراس
في سمعته رافع نفوس ٍ عليله

رجل ٍ كريم وطيّب الذكر والساس
عساه بالفردوس ظل وظليله

وصلاة ربي عد ماقيل بقياس
وأضعافهم أضعاف ماهي قليله

على النبي محمّد الشافع لناس
يوم الحشر نرجي الشفاعه وسيله

رد من الشاعر الرائع عبدالله بن سمحان جزاه الله عني الف خير

الله يرحم طيب الذكر .. و.. الساس
يا رحمتي لأهله ويا رحمتي له

ما مات من خلف ينابيع الأحساس
وتصدقي عن والدك وأدعي له

هذا القدر يده على دق الأجراس
ضيف عبوس ومالنا فيه حيله

أقولها من قلب وانا ولد ناس
ماهمه العاذل وقلبه دليله