أحساء النخيل

أحساء يا عبقاً هتَّان أورقةً
بين الحنايا عبيرٌ بات عنوانا

أحساء يا ماضياً عشناه حاضرنَا
ثبنا نؤرخه للدّهر ألحانا

أنت العلوم ومنك الفن منبعه
وكنت من قبل للاداب ميدانا

فيك الثقافة يا أحساء ساطعةً
نور الثريا ضياءَ الروح أهدانا

أحساء عطر إذا هبّت نسائمه
تمايل النخل بالأزهار نشوانا

فيك البساتين ريح المسك فائحة
مثل البخور إذا ما فاح أزكانا

احساء أنت لداء النفس بلسمه
أنت الدواء وماء الورد أغرانا

فيك العيون ينابيع وأودية
تسقي القريب ومن في البعد عطشانا

تنساق أقلامنا باللحن منشدة
تنساب أصواتنا بالشعر ألحانا

فيك القصائد ما غنت بلابلها
إلا إليك جمالا صيغ أوزانا

فيك الدعاة لدين الله قد جعلوا
فيك العقيدة لا تختل ميزانا

أحساء يا بلداً للنخل معذرةً
فالقلب يحيي وداداً فيك أزمانا

"يا خاين العشره"

ياخاين العشره عسى الله يجازيك
على فعايلك الغريبه ومبداك

غدرت في قلبٍ يحبك ويغليك
خنت العهد والنور ضاع بزواياك

لا تدعي بالصدق ماعاد يمديك
يوم انكشف معدنك والوقت عراك

إحساسك اقبح من سذاجة مباديك
والزيف بسلوبك كشف لي نواياك

مايذكرك قلبي ولا جاب طاريك
أصدق وفاي أحرقت كرته بيمناك

نفسي عزيزه عنك مافكَّرتْ فيك
خلاص أنا ماعاد يعنيني أرضاك

حطمت منهو بالليالي يداريك
وارخصت قلبن بالمحبه تمناك

قلبن عشق نبضك وهاجس طواريك
يكتبك بحروف القوافي ويقراك

أيام فاتت بالأماني يناجيك
يسقيك من فايض حنانه ويضماك

مافاد صوتٍ بالقصايد يناديك
ولا فاد حلمٍ يقتفي ليل مسراك

الشعر حرفه مايجسد معانيك
والفرق شاسع لا تهجيت معناك

مبطي يقولون العرب نوب مغليك
يصبح مع الايام من جملة أعداك

واللي يخون بعشرته لو يصافيك
لابد مايطعن خفوقك ويجفاك

عهدٍ قطعته ماتناسى تجافيك
واقسمت باللي يعلم الغيب لانساك

مادام قلبك يحتفي في معاديك
واللي يحبك صار أول ضحاياك

خلك على فالك برجوى أمانيك
تسهر ليالي في متاهات ذكراك

وياخاين العشره ترى القلب ناسيك
والله مايستاهل الحب شرواك

وينك بفضفض لك بمكنون صدري
صدك بنى في خافقي مستحيله

حتى غدى عرق الحزن سيل حبري
ودموع مكنون الغلا في هميله

كل ما ابتعدت القاك باعماق جذري
حروف شعرك بالمفارق وسيله

موجات حبك بين مدي وجزري
وغيوم صدك عتمةٍ فيك خيله

ابسألك .وش اللي رحل فيك بدري!؟
واللي بقى من ذكرياتك حصيله

وليه انبنى في خافقي ليه مدري؟!
وأنين بعدك بالضماير صهيله

وشحيلتي وانت على ما انت خبري
أعطيت من صدك عطايا جزيله

رزنامة ايامي مضت دون عذري
والحب يسري بالضلوع النحيله

وانت الذي بيديك حفرت قبري
وشيَّعت جثماني وغيرك يشيله

مصيبةٍ يا كبرها وانت تدري
منك الجروح النازفه كل ليله

هذي حقيقه صاغها فيك فكري
أبيات شعرٍ كالجواهر أصيله

صبرت صبر( ايوب)مافاد صبري
حملي ثقيلٍ حيل ما فيه حيله

هذي النهايه ترجمت بوح شعري
تبقى على مر السنين الطويله

ذكرى غلا من زود قدرك وقدري
بين الأماني والليال الجميله

واسف ولا لي غيرها منك أدري!
وانا على جمر الغضى و المليله

سلمت لله في سواياك أمري
وجمر اشتياقي في غيابك فتيله

"ولد صقر الجزيرة"
إهداء لسمو وزير الداخلية سمو الأمير
نايف بن عبد العزيز حفظه الله ورعاه

يا قصيدي لا عدمتك وصل المكتوب نايف
بلغه مني تحيه وسلّمه المكتوب بيده

(بو سعود)اللي يخصه عندنا ما به كلايف
كل ابونا فدوةٍ له..نتبعه وين ما يريده

صادقه بمدحي وقولي ماهو هرج وقول زايف
ما دخلنا قول زور وصادقه عندي عقيده

سيدي والله عزيز وشامخ بروس النوايف
صاحب اليد الكريمه..ارواحنا دونه شهيده

هُوْ ولد صقر الجزيره ما يهزه قول هايف
السفيه اللي يسبه جعل يبلى في وريده

عزنا يا مملكتنا..ما تلوثها الهدايف
من يحاول زعزعتها دونها رجالٍ شديده

كل خاين خان أرضه ما عليه والله حسايف
ومن حفر للكيد حفره طاح بشباك المكيده

مرخصٍ دينه وعرضه..منعمي ما هوب شايف
كل من فكر وخلا هالخيانه هي رصيده

دمنا للأرض فدوه وكلنا لعيون نايف
والمعزّه لمملكتنا ولحكومتنا الرشيده

"من يقول ان اللقا لحظة قرار"

يوم زاحو دونها وجه الستار
وانتفض من عينها برق الرجوع

انتثر من طرفها اللاذع شرار
واعتلت بلحونها عرش الدموع

من يمين الكف والكف اليسار
أحترقت لنارها جمر وطبوع

وابتدت ايامها الحلوة تغار
من كثافة ليلها ضحك وشموع

في حنايا الليل واطراف النهار
ماوقف للصبح تغريد الضلوع

من يرد لفاقد الشيء .. اعتبار
كان صدره ضاق والموقف يروع

من يقول ان اللقا لحظة قرار
اعتقد ماهو مثل غيره قنوع

الحياة .. وعزة النفس .. انتصار
كيف أجامل واختفي بين الجموع

يوم زاحو دونها وجه الستار
وانتفض من عينها برق الرجوع

"بصمة ابهام"

واللي على خلقه فرض دين الاسلام
ما مرني طيف الفرح في زماني

أسيرة الأوهام عامٍ ورى عام
ما عشت لحظات الهنا لو ثواني

شكواي لله ..عيشتي عيشة ايتام
واحلام عمري تحتظر في كياني

حالي من اللوعه غدى جلد وعظام
الليل موحش والمواجع مكاني

كني بقايا تنتظر عفو الاعدام
وسيف الزمن باقصى ضلوع المحاني

صرح الأماني حطمه زيف الاوهام
واللي حسبته لي ذرى منه اعاني

ياما لقيته هاجس ونبض والهام
طيفٍ سكني بالغلا واحتواني

من اول ايامي معه لاخر احلام
ياما سقيته بالوفا ما سقاني!!

يوم استعيد الذاكره حفنة اعوام
هاجس خيالي بالأمل والأماني

واليوم نزفي يعتلي رووس الاقلام
واللي بكيته بالغلا.. ما بكاني!!

يوم انتحى بيديه زرع لي الغام
واحرق حروف الحب والشمعداني

قصة حياتي من تباريح وهيام
مضمونها نزف الألم بالمعاني

وجروح قلبي كلها بصمة ابهام
الحلم مرسى والمفارق مواني

بين المسافه والتراجع والاقدام
من صد عني ما عطيته حناني!!

لو القلم نزفٍ تغذيه الالام
وطيف الفرح ما مرني في زماني

ماحلا الريضان وبيوت الشعر
ماحلا الغدران في وقت الربيع

ونسمةٍ بالصبح عطرها الزهر
تلمس الاحساس بالمعنى الفظيع

والندى ياوي على أوراق الشجر
كنه اللؤلؤ مع الفجر البديع

والنفل ترويه رشات المطر
حوله الاعشاب يرعاها القطيع

ماحلا السهرات مع نور القمر
وشبة النيران وأحبابك جميع

السعادة حلم والحلم أندثر
ماتحقق غير معناه الرفيع

ليت نومي طال مع طول الدهر
دام حلمي لابدى صبحي يضيع