رد: رواية حبه لبسني لبس يني لبس الخواتم فالصبع تم

تسسسسسلمين الغلا
وما طبتي ان شاءالله التكمله واصله
هاله هاله بالرررد السنع

رد: رواية حبه لبسني لبس يني لبس الخواتم فالصبع تم

السلام عليكم ورحمة الله وبركاته
حبه لبسني لبس يني..لبس الخاوتم فالصبع تم
روايتيه الرومنسية والغامضة
البارت الثاني عشر
..
اللهم ادم دولتنا الحبيبه بخير وسلام وجميع الدول العربيه
يالله ادم خليجنا واحد متحد .. يالله انعمنا بالامن والامان .. يالله يا ذا الجلال
والإكرام احفظ خليجنا من كل مكروه وانصرنا على اعدائنا .. اللهم إنا نسألك ان
تديم عينا نعمه الاسلام .. فثبتنا علينا ديننا وارحمنا واغفر لنا.
..
قال العرب في احد امثالهم:
«الوطن تميته الدموع و تحييه الدماء»
رجعنا لوطننا الحبيب قبل اسبوع بالضبط بعد مغادرة غلا ومايد
..
اول عائله رح نشطبها
اللي هي زايد وامه وشواخ بدو حياه يديده بدون ابوهم ففله زايد
رناد الله يرحمها وسلامه عرست وانتهت قضيتهم
(ملف مغلق ).
والعوائل خوال غلا بنحذفهم وبنخلي اميره واهلها بس
في بيت سالم
سعدوش مجتف ايدينه: متى بنسافر
هناد: يوم تكبر
سعدوش : ليش ياهل تجوفني
هناد: جب اقول .وين غاليه
سعدوش: فحيرتها
هناد قام
سعدوش: اول مره اشوف ريال يلاحق اخته الياهل
هناد طنشه ببرود وراح حيره غاليه
دق الباب وحدر وشافها قابظه كتاب
هناد: شو تقرين
غاليه: Loves Labours Lost
هناد: شكسبير
غاليه: يب
غاليه حطت الكتاب ويلشت ع الشبريه ودقت عليها بمعنى تعال ايلس
فهامته وعارفه انه يبا يرمس
يلس هناد بشرود: غاليه
غاليه: همممم
هناد: تتوقعين بتوافق
غاليه: ان شاء الله
هناد: ياخي تعبت وانا افكر
غاليه: افاااا ي هناد وهذا انت العاقل البطران صاير جنك روميو
هناد يطالعها : لا والله بطررران!!
غاليه بابتسامه: هب إلا انا اقول اصلا كل العايله يسمونك البطران
هناد: صدق !!!
غاليه: هيه لانك م تفيس حد
هناد وجنه مصدوم كلهم يقولون جي من وراه
غاليه: عكس ميود كلهم يحبونه وودهم يلسون وياه
هناد بغيره: وشعنه يعني
غاليه: لان سوالفه حلوه ويتمصخر ويا الكل صح انه نذل لكن ينحب
هناد: وانا م انحب يعني
غاليه: م ادري ليش لكنك انته عزول عسب جي اكيد م رح يترقربونك شرات ميود
هناد: يعني مايد احسن منيه
غاليه: هب احسن منك انته لك طبعك وهو له طبعه
هناد سرحان: يعني قولج حتى هي تفكر جي
غاليه: امم اكيد لكن اذ تحبك ها شي ثاني
هناد: تصدقين هي وايد تغيرت
غاليه: هيه والله كلهم ملاحضين جانت هاديه وتستحي وايد ومطوعه الحينه دفشه وخبله
هناد: ايه ايه عن الغلط ع حرمتيه
غاليه: ههههههه يحظج ي ميروه
هناد: ليتها بس تعرف
غاليه: ما تقول انك خبرتها بطريقه غير مباشره
هناد: بس هي من ذاج اليوم متغيره قبل جنت احسها كله تبا تيلس ويايه حتى لو تستحي وكله مبتسمه وتتريانيه ارمس لكنها الحين تضحك ولا جنها جايفنتيه ما تعبرنيه مول
غاليه: انت شوق لتلها ذاج اليوم
هناد: قلت لها انيه احب وحده و..
غاليه قاطعته وهي تشهق: شووووو
هناد: بسم الله بلاج
غاليه: شعنه قلت جي
هناد: عسب تعرف انيه اباها
غاليه: وانااا اقول شعنه متغيره االبنت
هناد: م فهمت
غاليه: الله يهديك ي هناد هي اكيد فكرت انك تبا غيرها عسب جي ودرتك
هناد الحين استوعب غلطته: افففف
غاليه: انزين قولها جي فيس تو فيس انك تحبها
هناد: ومنو قال انيه احبها
غاليه مصدومه: واللي تقوله من الصبح شو
هناد بغرور: انا قلت ابااها بسسس يعني لو رفضتنيه م عندي مانع ميه بنت تبانيه
غاليه تهز راسها بأسى: مشكلتهك غرورك شقايل تلومهم وانته جيه
هناد وقف وببرود: م يهمنيه يقولون اللي يبونه
ظهر من الحيره ببرود يججججتل
غاليه: اففف منك ي هناد متى بتعترف انك تحبها
..
نروح لبيت ابو طارق
اميره يلس: اميه بتي منوره اليوم
ام طارق: هيه
اميره: اشتقت لهاااا
ام طارق: هب جنج امس جايفتنها فالعرس
اميره: م يلست وياها مول .. بتبات صح؟
ام طارق: ما قالت
اميره سرحانه: ياله متى بتحمل وبتربي وبصير خاله
ام طارق: تو الناس .. صح سمعي بقولج
اميره: هاه
ام طارق: قولي نعم هب هاااه
اميره: نعم آمري
ام طارق: اتصلت خالتج قبل جم يوم
اميره قلبها يدق بسرعه
ام طارق: يبون اييون يخطبونج حق سعود
اميره م انصدمت لكن ودها تصيح
ام طارق: انا رمست ابوج وقال ما عنده مانع اذ انتي موافقه
اميره ودها تنتحر هاللحظه ودها تنتهي ولا تعيش هالموقف
ام طارق: ها شو رايج
اميره ترمس بصعوبه: الشور شورج انتي وابويه
ام طارق: نحن موافقين اذ انتي موافقه وانتي تعرفين معزه سعود عنديه
اميره صاخه بجمود
ام طارق: انتي استخيري اليوم وقولي رايج باجر جانج موافقه بييون يخطبونج رسمي
اميره قامت: ان شاء الله
ورقت حيرتها تصيححح
ودها ترمس حد وتفضفض له لكن غلا مسافره وقبل م قدرت تقولها عسب م تخرب فرحتها
تمت تصيح لين ما ياها النوم ونامت
..
في بيت سيف
ميره ملانه ويالسه فالصاله تلعب باطراف المخده
حدرت امها: شتسوين
ميره: طفشاااانه
ام مايد: ياله بالستر مسرعج
ميره: اميه ما يستوي اطلع ويا خمايل
ام مايد: طبعا لا منقوود
ميره تتأفف: ملل انزين
ام مايد: شسويلج يعني .. وين سوير
ميره تضايجت: منخدره فحيرتها ..انزين اميه قومي انا وياج نتسوق
ام مايد: ومنو بيشلنا ي حظي ابوج من صباح الله خير فالعزبه ومايد محد
ميره: آآىه ي مااايد والله جان مسوي لنا جو فالبيت
ام مايد: الله يردهم بالسلامه
ميره بحماس: ياااااااااااي انا وغلا بنفس البيت
ام مايد: ياله بالستر جىه غلا متيوزتنج انتي ولا اخوج
ميره: امـــيه عاااد لازم تخرب حماسي
ام مايد: صخي اقول صخي
ميره سكتت شوي عقب: ملل
ام مايد: ياهي طفره هالبنت
ميره سكتت شوي عقب: والله العظيم ملل
ام مايد زعجت: ميررره قومي ذلفي من ويهي قووومي
ميره قامت محرجه وراحت تغصص بآيه
..
فبيت خالد
ابو ناصر يالس فالصاله ويت ميسا شاله القهوه
يلسو يتقهويون عقب يت ام ناصر
ام ناصر: وين منصور م جفته
ابو ناصر: والله من صلاه الفير م جفته
ام ناصر: الحمدلله يوم ان الله هداه هالولد
منصور سمع رمستهم وتذكر بالمده اللي طافت
" جان يالس ع البحر فدبي ويا ربعه كالعاده واتصل به مايد وقاله بييه
مايد: هلا بالذيــب
منصور: ي مرحبابك قرب
مايد يلس حذاله مجابلين البحر: عيل وين ربعك
منصور: ودرتهم بيتمشون عقب برجع لهم
مايد: اهااا منو ربعك غير برهوم
منصور: صقر وحامد وعزوز وخالد
مايد: كلهم من العين
منصور: لا حامد منا . شالسالفه تحقيق هو
مايد: سمع بقولك سالفه عقب ارمس.
يخبرني واحد من الربع عن واحد من اهله جان آدمي سنع ومحترم وشاطر فدراسته وجان يبا يدرس وصدق درس برع وهالولد ع قد حاله لكنه شو عاد اخلاق وعلم والحساد وايد منهم عرفه واحد من هالمستهترين وحطه براسه وتعرف عليه ع اساس انه بيدرس وياه ويصير شراته وهو يتصنع الطيب والاخلاق وقام كل ليله يسير لذاج الريال وهو يسقيه من هالجاهي وكل يوم يتأخر اكثر عن يامعته وطلع الريال يحط له مخدرات لين م ادمنها وطب كل حمله .. عقب فتره ماتو امه وابوه ويت اخته تدوره وقالولها انه انفصل من الكليه اساسا وصادفت بالطريج نفس الربيع اللي دمر هالولد وشلها ع اساس انه يعرف عادل وجي ونهاها وعقب قال للولد تعال برويك شي ووداه بيت منتهي حاله وحدره ع البنت وهو مسوي نفسه وشلته الصدمه يوم جاف ويه اخته اللي نهاينها ربيعه وقام يدور بالشواع وهو يخبر الناس عن سالفته
" هالقصه حقيقيه قرأتها في احد المنتديات"
منصور مصدوم معقول انسان يسوي جي بحد من ربعه
مايد حط ايده ع جتف منصور: ي منصور انته توك صغير وهالربع دام انهم مبعدينك عن ربك واهلك فلا تتريا وراهم خير
منصور: بس ذيلا ربعي
مايد: شوف انا بقولك شي وعقبه سوا اللي تبيه
منصور صاخ ويسمع باهتمام
مايد: لو الحينه واحد منهم طاح بورطه انته بتفزع له ولا
منصور: اكيد
مايد: انزين جوف الحين تتصل فيهم واحد واحد وتقولهم ان الشرطه ماسكينك بقضيه مخدرات وانك بريء وجوف جان واحد منهم بيفكر يورط عمره وياك
منصور: زين
مايد: اذ ولا واحد منهم يا شو بتسوي
منصور: ويمين يكون آخر يوم اجوفهم فيه
مايد: ياله
اتصل باغلى ربعه ابراهيم وعطا مايد الفون
مايد يتصنع الخوف : ابرااااهيم
ابراهيم: هلا ميود شو صاير وين منصور
مايد: منصور فالمخفر الحينه قابضينه الشرطه
ابراهيم انصدم: شووووو
مايد: يقولون انه يتعاطى مخدرات اباك تفزعله ي خووي
ابراهيم ارتبك: و وانا ش شسوي
مايد: روح له مخفر الشرطه وييب الربع وانا بلاقيكم هناك
ابراهيم: أا مايد سمحليه انا الحينه هب ويا الشله وو واميه متصله فنيه مريضه م اقدر اودرها
مايد هز راسه باسى وهو محطي الفون سبيكر: ماعليه برهوم بتصل بالباجي
صكر منه ومنصور كل علامات الدهشه بويهه
لرمس والصدمه ثجيله عليه: اممه ميته
مايد: حسبنا الله ونعم الوكيل
قام يتصل فيهم واحد واحد وكلهم وصكرين فوناتهم
منصور بغضضضب: اكيد خبرهم
مايد قام: لا تتهور ي منصور هذول ما يستاهلون ربعتك
يلس يفكر وقت طوويل ع البحر وسمح ارقام ربعه وعرف شقد هو غلطان وهو مبتعد عن ربه واهله
ومن ذاج اليوم منصور ما يفوت ولا فرض ولا يطلع من البيت الا قليل ومهتم فامه واخته وغدى ريال
..
ابتسم وحدر عليهم وسلم ويلس وياهم
..
ولما قسا قلبي وضاقت مذاهبي جعلت الرجا ربي لعفوك سلما
تعـاظمني ذنــبي فـلما قــرنته بعفوك ربي صار عفوك أعظما
..

رد: رواية حبه لبسني لبس يني لبس الخواتم فالصبع تم

وها كل شي نقدر نقوله صار فهالاسبوع
يوم اليمعه الساعه ثمان الصبح فبيت سالم
حدر ريلها: السلام عليكم ورحمه الله وبركاته
عايشه: وعليكم السلام
يلس: وين غريبه>اخت غلا حرمه سيف>
عايشه: راحت تسبح بنتها وبتي الا من وين ضاوي من الصبح
سالم: رحت العزبه مودي نفيعه
عايشه: ي حيك
سالم: وصلوا المعاريس ولا بعدهم
عايشه: وصلوا وراقدين بقسمهم
ميره وجنها زاعج: صبااااااااااااااااح الخير
سالم: صباح النور منوره بنتيه اليوم
ميره حضنته: نشيطططططططه باباااااتي نشيطه
عايشه: الا مستخفه الناس تسلم وتحب الراس هب هالخبال
ميره حضنتها: ادريبج غيرانه
عايشه: هههههههه انزين جان سحيتي كشتج
ميره: اصلا انا ياله ياله بدلت البيجامه ولبست الكندوره ..اميه شرايج اقص شعري تراه معذبنيه
سالم: خل عنج ي حلو البنيه بالشعر الطويل
ميره: بليززززز دادي تراه مصخها هالشعر بيدق فالارض
عايشه: يويلج تقصينه حمد ربج ناس يتمنونه الشعر الطويل
سالم: وبعدين شعرج ولله الحمد نعيم بعد الشو له تقصينه
غريبه تحب راس ابوها: صبحكم الله بالخير
عايشه: ي صباح النور هاتيها عنج
عواش: نانـــه تيب حاواو
غريبه: جم مره اقولج قولي يدوووه
عواش : ناااااانه
عايشه: خليهااا خليهاا
غريبه: عموووه لا تدلعينها
سالم: وين علاوي
غريبه: راقد ذاج ما ينش
ساره ماسكه علاوي بايده: نحن هووووووووووووونااااا
ميره: عجيبه الشيخ ناش
علاوي: غلااااااااا بتيي
غريبه: خالتك ي الطفس خالتك
ساره توايهه اهلها: شصبحتوا
سالم: بخير ونعمه
ميره: اكيد المعاريس بعدهم نايمين
عايشه: خليهم اكيد تعبانين من طريج الطياره
ميره: امييييه شفيج اليوم عليه
عايشه: ما فينيه شي سيري امري ع الشغالات اييبن الريوق
حدرت غلا لابسه مغربي ذهبي وميكب خفيف وابتسامه ناعمه ع شفايفها: السلام عليكم
كلهم: وعليكم السلام
رجعت ميره وزعجت تحصنها: غلااااااااااااااااااااااااااااااااااا
غلا تحضنها وهي تضحك: اشتقت لج ي جلبه
غلا: عيب عمي هنيه
ميره تبوس خودها: عادي عادي
رجعت تحضنها .غلا: اييي ميروووه بتصيحينيه
سلمت ع غريبه وساره عقب ما باست راس عمها وخالتها اللي صارت عمتها
سالم: ي حي ذا الشووووف والله
ساره: وين ميووود
غلا: جان يسبح
عايشه تمسح دمعتها: عيل ما رقدتوا
غلا يلست حذالها: رقدنا فالطياره عمووه لا تصيحين
عايشه: تحضنها: واخيراا يا اليوم اللي اشوفكم فيه معرسين
مايد: الله الله واناااا وين
قامن خواته يسلمن عليه وجبس ع ابوه يبوس راسه وحضن امه: اممممميه شكلج بتستغنين عنيه
عايشه: ما عااااش من يستغنى عنك "وهي تمسح ع لحيته" انته بجررري الغالي
مايد: يوووه ي اميه افلام هنديه ما تسوا علينا عرسنا
كلهم ضحكوا
ميره: وانته ما تتغير خلاص عقل
مايد: لو مزوجيني عاقله يمكن لكن زدتوني خبال بهالهبله
غلا فاجه حلجها: اننااااااا
كلهم: هههههههههههههههههههه
مايد يلس حذال غلا: لا حوووبي هب انتي منو قال اصلا
ساره: عاد بديناااا
سالم: هههههه ياله نتريق
سعدوش: ونحححححححن
ايهم: السلام عليكم
ردو السلام
يلسوا كلهم يسولفون ويضحكون ومايد كله يحرج غلا والعيون عليهم
عايشه: الله يحفظكم ي ررررب
سالم: حالن مديم ان شاء الله
مايد: غلا ترا من الحين اقولج ماشي سيره عند اهلج اليوم
غلا: ليــــش
مايد: رمست هناد باجر مسوين عزيمه وبنسير اليوم بطلع خواتي
ميره: علنــــــــــــــي فداكك انااا
ساره: من وين انييب شراتك نحن ههههه
 منو ما يبا خوان جي ههه
مايد: هيه الا حق المصلحه انتي وياها
وها موالهم.
الظهر بعد الغدا توجهوا لقسمهم
مايد يالس ع الغنفه: الا ما قلتيلي شرايج بذوقي
غلا: حلو
مايد: بس جي "يقلدها: حلو
غلا: ههههه شتبانيه اقول يعني
مايد فتح ايديه: لا تقولين شي بس تعالي
غلا مشت جداه: ابا انام
حطت راسها ع صدره: وانا مابا انام
غلا وقفت زايغه: مايد هب وقتج
مايد: ههههههههههه هدي هدي بسامحج لانج تعبانه
غلا مسكت ايده تيره: تعال ننام
مايد: مافيني نوم انزين
غلا: ما يخصنيه
مايد انسدح ع شبريته قابض فونه
غلا وهي تبطل شعرها جدام المرايا: ابعرف شتسوي دوم فالفون
مايد: اطالع سنابات الخلق
غلا: تصدق انا هالسناب حتى ما فكرت افتحه
مايد: احسن لج
غلا: وانته شتسوابه
مايد: اطالع شو بعد
غلا راحت جداه: اشوف منو ضايف
مايد: ههههههههه يؤبرني الغيااار
غلا: ياله اشوف اشوف
مايد ضم الفون: شتسوفين
غلا تخصرت: جم بنت تطالع فالسناب
مايد حابس ضحكته: امممم عشرين ثلاثين جي يعني
غلا: ممثلات!
مايد: لا
غلا: اجنبيات
مايد: نووو
غلا: عيل شوو
مايد: اماراتيات
غلا بتحترق: منو هن
مايد: ما ادري عاد ما عندي السيفي مالهن
غلا: ويحطن صورهن؟
مايد: لا
غلا: جذااااب عيل شحقه ضايفنهن
مايد ما قدر يتحمل اكثر: هههههههههههههههههههههههههههه فديت اللي يغاروون
غلا: حيوان ما يضحك
مايد: هههههه تعالي تعالي
غلا: مابا
مايد: هههههههههههههههههآآآآخخخخ بطني ههههههههههههههههههههه
غلا تضربه: بس ججججججبببب
مايد: ههههههه اوكيه خهههههههههههههه خلا ص سك ككت ههه
غلا: سخيف بايخخخ
مايد: يعني الشوله هالغيره انا حتى ميروه ما ضايفنها الشو ابا بنات خلق الله اضيفهن
غلا: صدق!
مايد: والله اصلا شو اباهن وانا عندي الزين كله
غلا: اشوف انزين
مايد: ي ررررربيه ما تصدقين يعني
غلا: لا ما اصدق
مايد: اوكيه خلاص عندي بنات شكثرهن لكن ما اطالع سناباتهن
غلا: اهاااااااااااااااااااا
مايد: هههه والله العظيم ما اجذب اصلا ما يصورن عمارهن فالستوري
غلا: م ترمس ولا وحده
مايد يسند راسه ع الشبريه : لا ودرتهن كلهن الا عوآشي ما اقدر عليهااا
غلا دق الكيج آآخر: وتقولها جي عاادي
مايد: شو تبينيه اجذب يعني
غلا: انججججلع
راحت عنه تطلع ملابس وهو يطالعها: غلاااااااااااوي
مطنشه..
مايد: غلاااا امزح والله
غلا" ما عليه جان ما دوخت فيك
مايد: بالله عليج لو ارمس بقلولج جي عواشي
غلا شلت ملابس وحدرت الحمام ساحبه عليه
مايد : اففففف ي الدددلع
طنش السالفه وكمل ففونه
انتبه ع صوت باب الحمام لكن ما لف
غلا بدلع ماصخ: وين بنسير اليوم
رفع راسه وفجججج حلجه ع الاخر وهو يشوفها
تلعب بشعرها ولابسه قميص بدون ايدين بس خط والبنطلون شابك فيه لكن جنها ما لابسه شي لانه قصيرررررر فوق الركبه بواااايد وردي وفيه ورود بيضا مبين بياضها وبشرتها الصافيه ع شعرها الكستنائي وويهها بدون مكياج
غلا تكمل بنفس الدلع: احممم ارمسك انااا
مايد فهى: لبيه
غلا اونها زعلانه : اقول خلاص ما بسير وياكم شل خواتك وروح
مايد عق الفون ومشى جداها: افاااا
غلا بغنج الدنيا كله صدت عنه
مايد: ما ارووووم انا ازر بدونج <ازر:اتحرك>
غلا وبعدها صاده ويهها : لا تحاول مابا
مايد مسكها بخصرها: شعنه الحلووو زعلان
غلا مبوزمه : اونك ما تعرف
مايد: لعنبو ام السناب وشكله وسابع يدوده وجان تبين الحين احذفه
غلا تتلغن: لا لا تمسحه بس هاي عايشه مادل منوه ماباها
مايد: لا عايشه ولا غيرها تعالي انتي بس
"............................"
العصر كلهم زاهبين غلا زهبت وع طول طيران عند ميروه ما تدل من وين يتها الجرأه تسوي جي
شلهن وغلا متقبضه بميره طول الطريج يسولفون وهي صاخه ما قادره تحط عينها بعينه
فالعين مول.
نزلوا وغلا سارت صوب ميره ع طول واقفات بثلاثتهن
مايد يسحب غلا: هاه ميروه هالبيزات حقكن نحن بنتحوط وبتصل فيج خذن راحتكن
ميره: هذول حق هنيه بس
مايد: هيه بدلعكن هب كل يوم العيد
ساره: يااااربااه من وين هالكرم فجأه
مايد قابض ايد غلا: ياله ياله فارجن عن اتعايز
ميره: اها جي السالف هيبا يشل حرمته ويفتكون منا
مايد: زين فهمتيها ياله فارجن
راحن وهن يضحكن وغلا مستحيييييه
مايد عايبنه الوضع يتمشى وياها وهي صاااخه
ع اذان المغرب سارو يبل حفيت ووصلوا آخررر شي
نزلوا يصورون وها وعقب توجهوا للمبزره
يلسوا هناك وتعشوا و ع الساعه 11 هم راجعين
فالطريج مايد يالس يصور سناب وساره وميره شبه نايمات ورا
غلا فتحت فونها وشافت مسجات من رقم غريب نست انها مسحته
: هلا والله بغلا
: عسى مستانسه وايد ويا مايد
: والله ما اخليج انتي لي انااا وبسس
: ردي عليه بسرعه قبل لا يخلص صبري
: حبيبج هزاع
من خلصت قرايه صدت ع مايد ع طول لكنه هب منتبه يالس يغني ويا الغنيه مركبنها بسماعات ففونه عسب يرقدن وهو يطالع الفون ويسوق
فعيونها دموع هب قادره تظهر تحس ان مايد بيشوفها ترتجف
قبضت الفون : شو تبا
هزاع رد ع طول: اباج
غلا: انا متزوجه وانت متزوج خلاااص ياخي خلانيه بحالي
هزاع: تبيني اخلج عقب ما شفتج تطيحين جدام عيونيه
غلا: انا مابيك خلاص انا احب مايد <تجذب
هزاع: جذاااابه انتي تحبينيه وانا احبج شعنه نجذب ع بعض
غلا: ي ولد الناس فجنيه انا مابيك ياخي قدر انيه ع ذمه ريال وهب مستعده اخونه
هزاع: تطلقي
غلا: نعممممم
هزاع: غلا انا ادري انج تحبينيه وانج ما تبينه لا تقصين ع عمرج نحن لبعض
غلا: انا هب وانته هب لي افهم عاد ولا تطرش شي
هزاع: غلا انا احبج
غلا: جذاب حقيرررر صدقتك مره ولا تحلم بالثانيه
هزاع: تراج تغلطين بحقي انتي ما تعرفين شي
غلا: ولا ابي اسمع اعذار الحين تمسح رقميه وتفجنيه من شرك
هزاع: مستحيل
غلا: وانا مستحيل اودر مايد
هزاع: بتودرينه والوعد جدام
بندت الفون بكبره من الغصه وهي تتامل مايد وهو مندمج فالاغنيه
غلا تبي تنسي عمرها: شو تسمع
ما سمعها
غلا هزت جتفه وخوز السماعه: شو قاعد تسمع
مايد: احلى اغنيه عندي سمعي
ركبها باذنها اغنيه انه ليس الوداع الايطاليه
صخوا ع الحان الاغنيه الرومنسيه
غلا تشوف مايد بنظره غيررر انسان ثاني غير اللي تعرفه هب نفسه البطران هذا شخص ثاني رومنسي وناعم اما اللي ما تغير فيه ضحكته اللي تعذب البنات
ابتسمت وهي تطالعه وبانت غمازتها
وقف السياره وباسها ع الغمازه وهمس فاذنها: حلوه
جانت تتوقع يقولها احبج وخابت ضنونها وهي تسمع صوت ابواب السياره
فتح لها الباب : هب ناويه تنزلين
غلا ابتسمت: دوختنيه
مايد: هههههه علنيه فداج بسس
ميره وهي تحدر البيت : ع فكره ترا نحن هنا
مشوا وراها
غلا: ههههههههههههه
مايد: طبيها غيرانه تبا تعرس
ميره: سمعتك
مايد: اههببببب هب اذنين عليج
غلا: هههههه حرام خلها تبا ترقد
حدرو قسمهم مايد: آآخخخ جسمي مكسر
غلا: ياله بس من سبع ساعات نحقص
مايد: لا والله وهب وايد يعني
غلا: ههههه لا
مايد عق بعمره ع الفراش بكندورته
غلا: عقبال ما نحقص فالقريه العالميه
مايد: هيه عيل جان حصلت اجازه
غلا: ما يعطونك
مايد: حمدي ربج انتي
غلا: متى تداوم
مايد: ورا باجر العصر
ونامواا
..
فبيت ثاني والنوم مجافيها ما تصيح ولا تضحك سرحانه وبس
يالسه فالحوي بروحها
حدر حمدان: اميره!
اميره: انته من وين ياي هالحزه
حمدان: ماشي عند الدكان
اميره: اها سير نام عن تحصل مهازب باجر
حمدان: بعد حق شو الحمدلله مدرسه وخلصنا
اميره: انزين فارج
حمدان يلس حذالها: شو فيج انتي
اميره سرحانه: سعود خطبني
حمدان: شووووووووووو؟! ذاج السسسقم ما تبينه
اميره صاخه
حمدان: صدق اميره ما تبينه انا اعرفه ها واحد خايس
اميره تسمع ولكنها بعالم ثاني
حمدان اول مره يشوف اخته هاديه جي: اميره اصلا لو تشوفين حسابه بالانستا بتكرهينه جنه محد عنده لحيه وغتره غيره
اميره ضحكت ع تفكير اخوها : ههههههههه شدخل لحيته
حمدان: ترا هو دوم يصور عمره هذا وهو شين الله يعين لو حلو
اميره بصدق: عاد هبب شين
حمدان انصدم: يعنننننننننني انتي موافقه
اميره: ما ادري
حمدان: ي حرمه شو تبينه ها واحد صايع حتى
اميره: صايع!
حمدان: ما مخلي وحده ما مرمسنها
اميره باستهزاء: الحينه لانه يرمس صار صايع
حمدان بجديه: عيل شو
اميره: انا اقول سير نام ابرك اونك انته اللي ما ترمس
حمدان تففشل: ياخي انتي شعنه ترمسينيه جيه ولا بس لانج اكبر من متى انتيص ايره نفسيه جذا
اميره عصبت: ياااااخي فجنا اللي فيني مكفيني هب ناقصتك
حمدان نش: اففف
اميره طنشته ورجعت تسرح تعرفون شو اللي شاغل بالها
هو اكيد سعود سعود فالشكل ما عليه جلام لكن من داخل ودها تفهم سعود اللي تعرفه انه انسان اناني ومتسلط لكن اللي محيرنها شعنه تغير فجاه وعقب رد
ما لها غير انسانه وحده تثق فيها طرشت لها مسح
" غلا ادريبج راقده لكن من تقومين رمسينيه اباج فموضوع مهم "
ما جان ودها تزعجها قبل خصوصا من يوم اتصلت فيها وهي مسافره جان ما لها خلق مول عسب جيه بتعتذر منها وبتقولها السالفه وهي قاعده تماطل وتمدد ويا امها اللي متفشله من تاخيرهم فالرد . صلت استخاره وما حلمت شي لا هي مرتاحه ولا هب مرتاحه , ما عارفه شتسوي!
..
الحياة أمل، فمن فقد الأمل فقد الحياة. - افلاطون

رد: رواية حبه لبسني لبس يني لبس الخواتم فالصبع تم

..
في صباح يوم السبت اليوم المنتظر في بيت يدهم
غلا ناشه بوقت متحمسه تبا تجابل اهلها والبنات واللمه
لبست كندوره عنابيه مخوره مع شيله سوداء لبست مرتعشه <هاي الثجيله اللي يحطونها فالرقبه وشكلها كشخه هي طوق بشكل عام > وشغابات <يسمونه حلق الاغلبيه المهم هو اللي يحطونه فالاذن> وكله ذهب
تجحلت باسود والايلينر مع الماسكرا وروج غامج مايل ع العنابي طالعه مزيونه خصوصا وان الكندوره مخصره . ما تحب الخواتم عسب جي لبست ساعه سودا فخمه سودا مع اسور ذهب
ظهر مايد من الحمام: هالله هالله
غلا ترش من عطرها المفضل" j'adore " من ديور: حلوه؟
مايد مشش شعره بالفوطه : هيه طلعت الكشخه حق اهلها
غلا صدت جداه: افاا انا دوم كشخه اصلا
مايد: جذابه هب كل يوم جي
غلا تعقم كندورته>معاقم اعتقد يسمونهن قلاب<: عاد غير البنات ومامي وها
مايد يخوز خصله من قصتها اللي مستونها بفعن ويهها: هيه اعترفي اعترفي
غلا: هههههههه ولا يهمك كل يوم اتعدل جي
مايد سرحان فعيونها: هب مهم جي ولا جي حلوه
غلابابتسامه رايقه : حلوه التعزيزات ع الصبح
مايد: احلى هالابتسامه ع الصبح
غلا تلعب بطربوشته: بس عااااد
مايد مسك خدودها: اونه اليستحون
غلا: ايييييه خربت مكياجي
مايد: لعنبو سابع المكياج جان ما بيخلينيه اصكج
غلا: ياله ياله نسير نتريق
مايد: طبيهم بنتريق بالطريج
غلا: ههههههه حرام البنات قايلات بيسيرن ويايه
مايد: لحووووول ما تسوى علينا جان بتمين دوم ويا ساره وميروه
غلا تدلع: ميووود
مايد: لا ميود ولا يده ياله جدامي بنسير بروحنا بتجابليهن هناك
غلا: اششششتقت حق يدي حبيبي
مايد: انا حبيبج هب هو لا تخليني اصير عدوه
غلا: هههههههههه علني فداكم اثنيناتكم
مايد تجدم جداها وهي ترتب جنطتها : ياله انا فالسياره
غلا يوم شافته ع شو ناوي: لا لا لا بيخترب روجي
مايد: ههههه حطي غيره
^_^
غلا استحت وهو جان بيظر: صبر صبر
مايد لف: ها تبين ثانيه
غلا ذااااابت ومدت له الكلينكس بشويش: لا مش اثمك عن الروج
مايد: هههههههههههههههههههههههههه >وظهر
غلا غطت ويهها بايديها وهي جدام المرايا: اييييي يذبححححح الجلب
خازت ايديها وهي مستحيه من عمرها ضبطت الروج وشلت جنطتها وظهرت
راحت الصاله لقت عمتها: السلام عليكم
ام مايد: وعليكم السلام حي الله بغلاوي
غلا : عموه نحن بنسير الحين
ام مايد: ماعليه نحن وراكم اترياهن ينزلن بس
غلا: تمام
ام مايد: ما تريقتوا
غلا: مايد يقول بنتريق بالطريج
ام مايد: ياله عيل عن يتقحطن عليج ما يحب التاخير
غلا:ههههههه ان شاء الله
وراحت عند ريلها
مشوا متجهين لبيت يدهم ع الحان اغنيه انا بلياك بصوت رجاء
مايد وقف: الحين برجع
نزل وعيونها تلاحقه" الله لا يحرمنيه منك
فتحت فونها وشافت مسج من هزاع
" صباح الخير حوووووبي اترياج فبيت يدج ^_*
انقبض قلبها ولا ردت عليه استغصت ودها تقول لمايد لكنها خيفانه من رده فعله تبيه ولا تبي تخسره وبنفس الوقت تبا هزاع وتحبه لكنه متزوج
شافت مسج اميره واتصلت فيها
اميره ردت من اول رنه: هلا وغلا بالعروس
غلا: وااااو شهالمعنويات المرتفعه
اميره: ههههههههههه الله خلفنيه جيه ما احب انكد ع عمريه
غلا: الله يديم هالضحكه الا خوفتينيه شالسالفه
اميره: لا بس حبيت اعتذر عن ذيج المره
غلا: ما عرفتج ههههههههههههه عادي حبييتي
اميره:هههههههههه
غلا: الا ما قلتيلي شو اللي مضايقج
اميره: انتي وين
غلا: سايرين بيت يدي
اميره: صدق! وانا سايره ويا حمدان نتحوط
غلا: اوب اوب الشيخ حمدان راضي عنج
اميره: هههههههه شافني متضايجه البارحه
غلا: ها حمدان وايهم لحد يرمسهم طينه وحده ههههههه
اميره: هههههههههه
غلا: قوليليه شو مضايجنج
اميره بغصه: سعود خطبنيه
غلا : شووووووووو!!!
اميره: ما اقدر ارفض
غلا: بس بس ما جان مودرنج
اميره: هددني مره ثانيه اذ رفضت ما ادري شبلاه ورجع ع حالته
غلا: انا اعرف
اميره منصدمه: شعنننه
غلا: ذيج الايام قبل ما يودرج انا جنت ارمس هزاع وقلت له السالفه وقال خليها عليه وعقبها انتي قلتي ليه انه ودر حركاته
اميره والدمع فعيونها لكنها تكابر: معناته من ودرتيه ودر سعود
غلا: شكله جي , انتي لا تضايجين عمرج
اميره اللي مستحيل تبين ضيجها: ههههههههههه لا تخافي انا تمام التمام
غلا ومايد فتح الباب: ياله عيل مايد يا
اميره: سيووو
غلا: سيو تو بيبي
..
مايد مصغر عيونه: منو هاي بيبي
غلا: ههههه اميره
مايد: ما تقولين لها بيبي
غلا: خل عنك اميره وشهالريحه الطيبه
مايد: بنتريق برع
غلا فرحانه: يااااي جوو
مايد ابتسم بعذوبه وضيج بنفس الوقت
غلا: بس اليماعه
مايد بدا يسوق: ما عليه م رح نتاخر
نزلوا عند بحيره خالد
مايد شال الجيس بايد وقابض ايدها بالثانيه: حلو الجو
غلا: مع انه فالقيض <الصيف
مشو لحد ما تقربوا من سور البحيره شوي ويلسوا ع العشب
تريقوا وجان ريوق خفيف وصوت الهواء يحرك النخل والغربان فوقهم
غلا: الحمدلله
مايد: هاج الماي
غسلت ايديها ومششتهن ولمت مالها فجيس خلص مايد ونفس الشي
غلا اتجهت للبحيره وماي يعق الجيس فاقرب زباله
وقف حذالها
غلا بهدوء: حلو المنظر
جان وراهم معشب وفيه نخل وجدامهم البحيره ووراها عماير وبنايات ضخمه منظر ما يتفوت خصوصا ان بنص البحيره شرات الجزيره الصغيره عليها شير واصوات الطيور والشمس ما بعد حرت
يلسوا صاخين شوي عقب رجعوا لسيارتهم وتجوها لبيت يدهم
ع الساعه تسع وشوي هم واصلين
اول ما حدروا البيت بويههم العيال يراكضون ساروا ع طول عند يلسه يدهم خاري
لقوا اليماعه كلها واصله عاد تعرفون سلامات وسوالف وضحك ووو
ها جان جدا عمومتها ويدها استاذنت منهم وحدرت عند الحريم
حدرت وسلمت ع الحريم: الا وين البنات
ام عبدالله: سمعي حشرتهن يمكن فوق
راحت فوق ع طول وفتحت باب حيرتهن بقوه : هلووووووووووو
هدوووء والحيره هب عفسه كالعاده شالسالفه حدرت يمكن يستهبل ياخي شو ها ماشي حس لفت صوب الباب عقب ما تسكر: منوه
تجدمت للباب حاولت تفتحه وما فتح: هيييييييي حووووووووووه انا هنيه
محد يرد شو ها: بنااااااااااااااااات ياخي لا تستهبلن
ظهرن بستتهن من الحمام وزاغت غلا: يمممممممممممممممه
ساره: شهالاستعباط نحن ناوين نسوي فيج مقلب منو سكر الباب
غلا: والخيبه كلكن فالحمام
ميثوه تحضنها: ي حيواااانه اشتقت لجج
غلا: مي توووو عمري
سلمت ع مهره ومياسه وغاليه
غلا: عيل منوه سكر الباب
ميره تحاول تفتحه: ما ادري
مياسه فتحت الدريشه لكن ما تنشاف اليلسه بس اصوات: اصوات الشباب تحت معناته هب هم
ميثوه تدق الباب: ي حيووووووونااااات فتحواااا البااااب
قامن يزاعجن وما من رد لان الامهات ظهرن خاري!
ساره: والله لو حد من اليهال يوووويلكم
غلا: فتحووووووووا عاااد
وتمن ربع ساعه يحاولن
عقب يأسن ويلسن يسولفن لساعه 11 !!
عقب اننفتح الباب فزن كلهن ويوم اظهرن ما شافن حد
مهره: اووويه بيت يدي فيه ين
غلا ارتعش جسمها من هالطاري لا لا هب معقوله لا هب لهدرجه شهالافكار الغبيه غلا هدي شوي ونعرف منو السخيف اللي مسوي هالحركه
نزلن تحت محد لقن الامهات واليد وايده خاري: ما شفتوا حد يحدر داخل
ام هناد : لا بويه ما شفنا حد
ميثوه: قومن نشوف منوه
غلا حاضنه ظهر امها : سيرن انتن انا بيل سويا اميه
مهره: انا يوعانه بيلس اكل
غاليه: وانا وياج
سارن ميثوه وميره وساره
فتحن باب ميلس الريايل الشباب محد!
ساره زعجت: اممممميه وينهم
ام مايد: فحيرتهم اظني
حدرو البيت وسمعوا صوتهم فالحيره اللي هي امرره حذال الباب
فتحن الباب بقووووه
ميره: انتوووووو صحح
عبدالله: شالسالفه
ساره صخت من سمعت حس عبدالله
ميثوه تخصرت: منو مسكر علينا الباب
ناصر: انتن بلاكن مستخفات شو بابه
مياسه: لا والله حركات استهبال هيه
سعيد جاسم: بلاكن نحن هنيه من ساعتين وشي محد تحرك
ميره: عيل منوه مخيسنا فالحيره من الساعه ثمان
منصور: ههههههههههههههههههههههههههههههههههههههههههه
مياسه : محد غيره هالجلب
منصور: بلاج النونوو هههه والله مب اناا
ساره: عيل شعنه تضحك
منصور: لانه ذكي اللي مسوي هالحركه
مايد شبه منسدح: اففف الحين انتن شعندكن
ميثوه: حلفوا هب انتو
هناد: ياخي بلاكن والله العظيم نحن يالسين هنيه من الصبح
ميره: خلاص سامحناكم
سكرت الباب: منو عيل
ميثوه: ماشي غير اليهالوه
راحن يدورنهم لقوا ايهم"اخو هناد" وسعدوش"اخو هناد " وآيه " اخت مايد " وعلاوي " ولد سيف وغريبه"
لتذكير:
هناد اخو غلا وغاليه
مايد اخو ميره وساره وآيه
عبدالله اخو ميسا ومياسه
ناصر ومنصور خوان ميثوه
..
لقنهم بالمطبخ يتكركرون
ميثوه: اهااااااااا زخيناكم
آيه الدلوعه سرعه اعترفت: انا ما يخصني .وشرت من المطبخ بكبره
ميره بشر: فكره منو هاي
كل واحد ياشر ع الثاني
غلا يت: شالسالفه
مياسه: تصدقين هالفناعيص هم مسوين هالحركه
ايهم: سعدوش خلك ريال واعترف
سعيد:لا والله وشعنه انته ما تعترف
علاوي: قلا ما تضربونا سحح
علي: سح ولا جامي خخخ
غلا: تعال فديت قبل خالته
غلاوي ركض عند غلا
ميره: غلاوي عن الواسطات حاله حالهم
غلا: لا ما يصير هو صغير هاي افكارهم
علاوي: انا مايخثني
ايهم: ويا هالخش عمرك ست سنين مشلول ولا يعرف يرمس بعد
غلا: ايهموووه احترم نفسك هب ع علاوي
ايهم: هاها خفت انا
سعيد: قوموا قوموا
ساره: شو ها الله يغشكم
الارضيه كلها قشار لومي
علي: ناكل شو بعد
ميره: وعععع وعع لومي عاااد
غلا وهي شاله علاوي: عطني وحده
عطاها ايهم وحده
غلا: ياله عيل حياكم
ميثوه: نعم نعم ووووين تبين تظهرين نزليه هالفنعوص خل نادبه وياهم
غلا: هاها تحلمين ها الحب محد يمسه
مياسه: هاي عنصريه
غلا دزتهن: ياله منااااك
قبل ما يزخنها: يوووويلكن
ميره : خفنااا عاد
مسكنها ساره وميثه
غلا: لااااا لااا علاوي لاااا
مياسه تسحب علاوي وهو يزاعج
غلا: والله اخبر ميووود ودرنيه لااااااااااااه
سدكن عليها فالارض ومياسه وميره يكفخن العيال
سعيد بما انه عود شوي قدر يشرد وراح يخبر مايد
يا مايد عن يفوته الحماس نقع من الضحك يوم شافن ميره وميثوه يركضن ورا اليهال لكنه عج يوم شاف ساره ومياسه فوق غلا وهي تصارخ
مايد: ي حيوااانات خوزن عنهاااا
ساره: رجاء لا تتدخل
مايد سحب ساره: وانتي خوزي لا اصفج
مياسه تسدك ع غلا: لا تحلم وصكني جان فيك هبه
ماصكها لاكنه دز ساره ع مياسه وطاحن ثنتيناتهن ووقفن ميره وميثه والسهال يطالعون مياسه واااايد ضعيفه عسب جيه سرعه طاحت قوم غلا وهم يضحكون
مياسه وساره يتويعن
الباجي يضحكون
ظهروا مايد وغلا من المطبخ وهو قابضنها
راحوا برع جدا النخل
غلا: وين بنسير
مايد: برع عن الصدعه
غلا: ميود ما يلست وياهم
مايد: نحن بنطلع عقب الغدا بتيلسين وياهم ع راحتج
غلا متردده: مايد
مايد ابتسم: هلا
غلا تعايزت: لا خلاص ماشي
ما حب يضغط عليها وتموا يمشون ويسولفون
الساعه وحده وشي تغدوا وراحوا الشباب تمن البنات فوق
وبدا الديسكوا شغلن اغاني عراقيه وقامن يرقصن وخبال وضحك
ع اذان العصر بندن الغنا صلن ونزلن تحت
غلا: انا يووووووووووعانه
ميثوه تطنز: ما قلتي حق ميودج اييب لج شي
غلا: جب ما يضحك اصلا لو اقوله ما يقصر فديته
ميره: الله الله اسمنكم حاله
ساره يت: بناااااااااااات
مياسه: هلا والله بالاخبار الحلوه
ميثوه: فديت ساره انا ما اتيي الا بالاخبار الحلوه
غلا: عيل سي ان ان ع الفاضي
ميره: ياله سرعه شوع ندج
ساره: الشباب محد
غاليه: جددددديمه
ساره: صبرن صبرن والعيال يلعبون فالحاره
يسمعن بحماس
ساره زعجت: والامهات سااااااااااااااارن عند اليرااااااان وميسا وغريبه ويا سيفففف
زعجن كلهن مره وحده فرحه
غلا: هيه والله حي الله
ميثوه ترقص: عاشووووو عاششووو
ميره: احلااااااااااااااااااااا الحفله ع اصول
غاليه: اخيه خبلات
مهره: قومي غاليه هذول مافيهن عقل
سارن غاليه ومهره
مياسه: عندي فكره لا صارت ولا استوت
غلا: فديت ام الافكار اطربينا
مياسه: سمعن
" وبدت تقولهن

رد: رواية حبه لبسني لبس يني لبس الخواتم فالصبع تم

بعد دقايق وهن حادرات المستودع
ميثوه تكح: غبار
غلا: ياله هانت هانت عشان الحفل
عقب نص ساعه وهن مخلصات
وقفن فاليانب الثاني من البيت تعبانات
شافن المنظر جدامهن وهن حاسات برضا
يايبات دواشق طبيات كبار وصافاتنهن حذال بعض بمساحه كبيره تحت اليدار
ومولفات مخاد البيت كله ع الدواشق اضافه الى الفراشات والبطاطين
ميثوه زعجت: انننننننننااااااااااااااااااااا اوووووووووووول
وركضن كلهن فوق لحيرتهن
يتضاربن منوه اول ميثوه سبقت: ياله بسم الله
وقف ع الدريشه مال الحيره
تخيلوا انهن بطلن الشبابيك!!
البنات يزاعجن: وااااااااااحدددد اثنينننننن ثلاااااااااااااااااااااثهه
وقفزت ميثوه من الطابق الثاني تحت والبنات كلهن يطالعنها من الدريشه وصخن يوم ما سمعن لها حس
ميثوه تيبست تحت
غلا: عن يكون شي ياها
مياسه: ي ربيييييه
ساره: بلاها ما تتحرك
ميره: اخخخ قلبي
غلا: ميثووووووووه ميثووووه شي ياج
مياسه: عن يكون شي ياها
ميثوه نقعت ضحك تحت
غلا: ي حيوانه خوفتينااااا
ميثوه تاشر لهن قفزن وتضحك
ساره : اناااا انااا
ميره: لااااا انااااا
غلا: ميروه من متى شجاعه
مياسه: تحيدنها يوم جانت مطوعه وخوافه
ميره تذهن: خوزن بس خوزن ذاج زمان وولى
قفت ميره بشجاعه وهي تصرخ : ووووووووووييييييووووووو
وتمن يعفدن وحده ورا الثانيه
تمن يضحكن تحت
غاليه ومهره شهقن عند الدريشه: هيييي شو تسوووون
مياسه: قفزن قفزن
غاليه الرقيقيه : نوووو وى قفزتن من هنيه
مهره: غسلت ايدي من هالمخبل
ساره: قفزن ي الخوافات
ميثوه وهي منسدحه: تصدقن غاليه تذكرني برناد نفس الرقه والانوثه
غلا تتنهد: الله يرحمها
ميره: صدق لو هي ويانا ما رح تقفز
مياسه: لا بتقفز تذكرن آخر مره قبل العرس جانت حماسيه وتمت تضارب ويانا
غلا: سبحان الله جنها حاسه
مهره زعجت: انا بقفز
تمن البنات يزاعج يشجعنها وقفزت
ما حسن باليران اللي تضايجوا بهالاصوات
رقن كلهن فوق مره ثانيه وتمن يعفدن
غلا قبل لا تعفد وهي جانت آخر وحده: غاليه جربي
غاليه: نوو
غلا: تعالي شوي
استغربن البنات بلاها غلا اتخرت وتمن يسولفن ويضحكن
غاليه: لا تحاولين انا هب خبله
غلا: حبيبتي ها هب خبال عيشي حياتج ياخي وبعدين كلنا عفدنا ما يانا شي شعنه خايفه
غاليه: نوو
غلا : واذ ع شعرج انتي شعرج نعيم م رح يخترب وشوي كلنا بطلنا كشيشنا
غاليه: نو لا تحاولين
غلا: تحيدين رناد جانت جيه شراتج ولما عرفت انها مريضه قامت تسوي شراتنا مثل ها اللي تسمينه خبال لا تضيعي طفولتج انتي بعدج صغيره
غاليه: وانتن هب يهال شعنه تسون جيه
غلا: لانا في يوم بنصير شرات امهاتنا وبنتم مملين
غاليه: ماابي
غلا فاهمتنها: تخافين البرستيج يخترب
غاليه تغير السالفه: الحين انتي شدخلج فيني تبين تعفدين عفدي
غلا: بكيفج
وعفدت غلا
غاليه تمت شوي تفكر بعدين ما لقت عمرها الا وهي تبطل شعرها وتعلق الشباصات فالشيله فرتها تحت
صرخن كلهن: غاليه بتعفد
فررررحن كلهن ان غاليه تشجت وخازن عنها
غاليه وقفت ع الدريشه وهن يزاعجن يلااااااا غاليه يلااااا
خافت اول شي بس يوم شافت البنات تحمست وعقت بعمرها
وتمن كلهن يضحكن
عادن الحركه جم مره
انصدمن يوم شافن البشاكير عندهن ويضحكن وياهن
غلا : ياله سون شراتنا
كلهن ما طاعن
مياسه تسحب سيريتا: ياله ياله
سحبتها وهي تضحك راحن فوق كلهن وقامن يحمسن الشغالات فوق خمس شغالات وبالاخير عفدت سايرا الفلبينيه وزعجن البنات بفرحه وقامن شغاله وبنت شغاله وبنت والشغالات مستانسات عقب يلسن يضحكن
غلا منسدحه ع الدوشق: تعبتتتت
ميثووه: عطششش
مياسه: بسير اييب لي ماي حد يبا
كلهن قالن هيه
مياسه: اوكيه عيل عن اييب لكن كلكن بس
غلا: ادريبها هاي نذله وحده منكن تسير اتييب
وقفت هاجر>بنقاليه> : انا في اييب منو يريد
كلهن قالن هيه
ميره: ميري انتي سوي لنا عصير
ويلسن يشربن ويا حلويات وبسكوت ويا الشغالات
مياسه قابضه فوز الماي>البيب او الانبوب الطويللل> :منو قال يبا ماي
كلهن زعجن: لااااااااااااااااااااااااا
قامت مياسه ترشهن وحده وحده وسبحتهن كلهن ماااي عقب قامن يتضاربن ع الفوز
ويلسن ينشفن عمارهن قبل المغرب
ميثوه: ما اسمك انتي
رينا >بشكاره قم مياسه الثانيه>: رينا
ميثوه: هيا قومي يا رينا سوف اتصارع معك
رينا هزت راسها بلا وهي مستحيه
سريتا بعد مالت قم مياسه ومياسه معودتنها ع الخبال: انا في يزارب
مياسه: عاااااااااااااااشت سريتاااا رويها الادب
ورقن ع الدواشق وقامن يتضاربن ميثوه وسريتا والبنات ناقعات ضحك
ميري تحمست ودشت وياهن عقب ساره وتمت يتعاصدن
المنظر يفطس من الضحك
غلا: حوووه حوووه
وقفن ضرابه تعبانات
ميره: بنات بياذن المغرب ياله ندخل الدواشق
تيلسن البنات وقامن البشكارات يرتب مساجين ردت ع راسهن
يوم اذن المغرب
يالسات يلبسن شيلهن
غاليه: وين نعالي
ميره: ههههههههههه ميثوه شاتتها فوق وطاحت فذيج الشيره
صدن البنات ع الروله<نوع من الشير> فبيت يرانهم لكنها لاصقه فيدارهم
غاليه: سيري يبيها
ميثوه: عندج غيرها
غاليه: مستحيل امشي حافيه ياله سيري هاتيها ما عندي غيرها هنيه
ميثوه تغايض : هيه تبينيه اروح بيت اليران اقولهم لو سمحتوا هاتو نعال الشيخه غاليه من رولتكم
غاليه عضصبت: ما يخصنيه شوفيلج صرفه ويبيها
قامن يتهازبن
زعجت غلا: بسسسسسسسسسسسسسسسس
ميره: انا بييبها
كلهن شهقن
ميره: بلاكن لا تطالعنيه جذا بركب ع اليدار وبييبها

رد: رواية حبه لبسني لبس يني لبس الخواتم فالصبع تم

.اذن المغرب
مياسه: لا ميروه عن تطيحين ما تسوى الا نعال
غلا: غاليه خلاص لبسي شبشوبه
غاليه بوزمت: لا والله
ميثوه: بعد هالبزيا بروحها راس
غاليه مشت عنهن محرجه
جونا بشكاره بيت يدهم: سو في
مياسه تستهبل: حذاء الاميره غاليه في تلك الشجره جان فيج هبه سيري هاتيه
جونا: اسير بيت يران
ساره: ي حااافظ ع راعيه الفزعه
ميثوه: اقول قري مكانج عن الفضايح
ميره: افف ياله ساعدنيه اركب اليدار
ميثوه: انت يخبله تطاطي فو اليدران عشان هالدلوعه
غاليه من وراهن: ما الدلوعه غيرج
شافنها شاله دري: ياله ميره
ميره ضحكت وشلت الدري<الدرج السلم المتنقل
ميره: ياله مسكنه ليه
قبظنه عسب ما يتحرك لان اليدار شوي مرتفع
المكان اللي هن فيه يصير ع يانب البيت مب جدا النخل خاري ولا جدا الدروازه اللي هي الباب الكبير
لكن الشيره تصير فزاويه البيت اللي تجابل الدروازه
والله خب عارفه شقايل اشرح لكن الزبده انه لو حد حدر البيت بيشوف اللي عند الشيره لكن ما يشوف جدا يلستهن
مشت ميره بشويش ع اليدار ووصلت عن الشيره
مدت ايدها لنعال اللي فالعود لكن ما لحقتها
تمت تحاول والبنات يقولن لها سرعه عن حد ايي
ميره: بلاكن ما اقدر بعيده شوي
يالسات يرمس ولا يشوفن المخلوقين اللي يراقبونهن من اول ما وصلن الشيره
ميره شوي وبتوصلها وزعجت: مسكتهااااااا
شلت النعال وتنصدم بريال واقف فبيت يرانهم يطالع هالخبله شتسوي جان تصرخ ويت بتطيح لكن من حسن حظها ان الثاني اللي يطالعهن مسكها قبل ما تدق بالارض وطاح وياها
كلهن زعجن: هناااااااااااااااااااااااااد
هناد طايح وفوق ميره: آخخخخ
ميره خازت عنه وكل انواع الاحراجات بويهها
منصور: زخينااااااااااااكمممم شتسوون
مايد زاغ: والخيبه الشو فيه ها جي متبطح
هناد: آآآخخخ ظهري ميود رفعني
مايد رفعه من ع الارض
وميره من شده الفشله صاحت وركضت داخل
عبدالله وصل: بلاها ميره
جان ينقعن البنات من الضحك
سعيد: استخفن هذيلا
غلا ناقعه من الضحك وهي قابضه نعال غاليه: كله عشان هالنعال
هناد معصب: يعني البنت طقت من فوق عشان نعاال
ميثوه: والله قلنالها هي مسويه فيها طرزان
عبدالله وسعيد جنهم طرشان فالزفه: شالسالفه
مايد: يعني عشان جيه تصيح
ساره: استحت المسكينه
هناد عصب: وانتن شعنه مبللات جيه
غلا: والله جنا نتمصخر
هناد واصله حده: لا والله
مايد اير غلا: لو سمحت خلك بعيد عن حرمتيه هازب الباجيات
مشوا وطاح المنازع ع الباجيات
غلا: هههههههههه ي حرام شوي فجهن من هناد هالحينه
مايد: لا تخافين عليهن لسنتهن تشتغل خافي ع عمرج
غلا رافعه حياتها: من شو
مايد رافع واحد من حياته : تعالي
غلا وهم يمشون لداخل: ياخي شقايل ترفعون حايب واحد
مايد: هه ههههه خبره
غلا: وين سايرين
مايد سكر باب الحيره الفاضيه اللي فالصاله وقفله
غلا مفهيه: شتسوا
مايد حضنها: اشتقت لجج
غلا زاغت: ترا والله هب وقتك موووووليه
مايد: الا وقتي ونصص
غلا: ميود شفيك انا وياك طول العمر
مايد خاز: بس انا بعد دوام باجر بسير دبي وبتم اسبوع
غلا: دددددددبيي!!
مايد: شسوي والله ها الشغل
غلا بوزمت: اسبوع!.
مايد: والله م بودي اسير لكن تعرفين اجازتيه وخلصت وها شغلنا عاد
غلا: افف انزين مابا الحين
مايد: اوكيه عندي حل ثاني
غلا: شو
مايد: صليتي المغرب
غلا شهقت: اوووووووووووه
مايد: صلي عقب بقولج
غلا: لا لا بتم افكر فالصلاه
مايد: وما زين تتاخرين اكثر عن جيه ما يسد يالسات تلعبن
غلا: انزين ياله
حدرت الحمام اللي بنفس الغرفه وتوضت وصلت ومايد يطالعها
عقب م خلصت
مايد: بشو تدعين
غلا: بووووواااايد
مايد حاط ريل ع ريل وساند ظهره وايديه ع حواف الكرسي المنفرد: مثل؟
غلا يلست ع كرسي ثاني: خل عنك هالسوالف الحينه وقول
مايد جنه يرمس ياهل كلمه كلمه : الحين بنطلع انا وياج .. وبنسلم ع اليماعه اللي خاري .. وبنستاذنهم .. وبنروح بيتنااااا
غلا: شوووووو بس انا بعدنيه ما يلست
مايد: شو تفر يعني الحينه ولا عقب العشا ترا جذا ولا جذا نحن سايرين ولا نسيتي انه عندج جامعه باجر
غلا: يووووه
مايد: ياله ياله شلي قشارج
غلا: انزين ع الاقل نتعشى وياهم
مايد: لا وانا ابا ايلس وياج وشبع عيونيه قبل م اسير
غلا تتنهد: ادريبك ما الا عيونك
مايد: هههههههههههههههه دام انج فاهمه السالفه توكلنا عيل
غلا: انزين عادي نتعشى ونرجع بيتنا واء اء اء
مايد: هههههههههه حلوه اء اء لا حياتي ما اقدر اسهر وانا ع طول دوام وعقب الدوام درب مافينيه
غلا: مصر يعني
مايد: اكيددد
غلا ماده البوز شبرين: انزين ما لازم الاء اء
مايد: هههههههههههههههههههههههههههههههههههههههههه اخخخ بطني هههههههه لا هههههههههههههه لازمهههههههههههههه
غلا: اوووف
مايد: هههههههههههههههههه
وقف ومسك خدودها: فديت والله
غلا : ايي انزين خل غزوزي فعصتهم ترا
مايد: شسوي يوم هن يعيبنيه
غلا: ياله ياله نسير
مايد: ههههههههه توج ما تبين تتحركين
غلا جنها ياهل: ادريبك ما تيلس عاقل
مايد: اخخخخخخ هههه ياله عيل دامنيه قابض عمري
غلا وهي تفتح الباب: الحمدلله والشكر متيوزه مينون
مايد يضحك
غلا: انزين بس ربع ساعه بيلس ويا يدي
مايد: ما يلستي وياه من قبل
سارت عند يدها ويلست وياه شوي وهي يالسه ترمسه
وصلها صوت المسج فتحته واختفت ابتسامتها وقامت تنتفض من فوق لتحت
وغرقت عيونها بالدموع وهي تقرا محتواه من اكثر انسان تحبه بهالدنيا
..

ألا أيها الباكي فديتك باكيا .. علام وفيما تستحث المآقيا ؟ , رويدك ما أرضى لك الحزن خلة .. وهيهات أن أرضاك بالحزن راضيا. - إيليا أبو ماضي

..
انتـــــــــــــــــهى البآرت
مقتطفات من البارت الثالث عشر.
.. !! .. انته شو من انواع البشر انته احقررر انسان شفته
.. !! .. سكرت ع ويهها وهي تصيح والندم يقطعها
.. !! .. انته واحد جذاب انته ما تحبنيه
.. !! .. سمع صوت خفيف فالضلام منو هناا؟!
.. !! .. هههههههههههههههههههههههههههههه مقلب ي الجبااااان
.. !! .. قبض ايدها بنعف وقسوه: اناااا تعطينيه كف ي بنت الجـــلب
.. !! .. لا لا تسير بليز خلك ويايه لا تسير
.. !! .. سمع المصيبه ووده دموعه تصيح بدالها يعطيها كف ولا يحضنها
.. !! .. وصوتها رايح من كثر الصياح: ساعدنيه دخيلج ساااعدينه اناااا اباه اشتقت له ما اقددددر ما اقدر
والكثيرررررررر وان شاء الله البارت الياي رح يكون اطول من ها.
اشكر كل اللي يتفاعلون ويايه وليت انشوف تعليكاتكم وملاحضاتكم ع الروايه
وسمحوليه ع القصور وودي تجاوبون ع هالسوال:
السر الكبير اللي هو هزاااع شو مصيره تضنون انه رح يختفي نهائيا ولا دوره ما يموت بروايتنا الغامضه . فيا ترى غلا بالنهايه لمايد او هزاع؟
اتمنى اشوف الرد ولا تنسون اللايك
البارت الياي بيكون يوم الجمعه 5/8
تحياتي ومحبتي/ بنت الأياآويد

رد: رواية حبه لبسني لبس يني لبس الخواتم فالصبع تم

يممممممه البارت حماااس
امه عن السر الكبير ما اظني هزاع بيختفي من الروايه

رد: رواية حبه لبسني لبس يني لبس الخواتم فالصبع تم

تسسسسسسسلمين الغلا ع المرور الطيب
والله م تقصرين كثر الله من امثالج
اتريا ردودج اليايه

رد: رواية حبه لبسني لبس يني لبس الخواتم فالصبع تم

قايز وين الردود

رد: رواية حبه لبسني لبس يني لبس الخواتم فالصبع تم

الله الروايه جنااان كملي