.. زهـايـمر حكـي .~

**تنهيدهـ** · 27-04-2017, 04:38 AM

رد: ✒ .. خآصرة حرف رمآدية

‏انت بـس تحكـي و لا يبقـى أثـر !
لـ الحزن و الهم و الحظ البخيل

ايه احبك وش كثر ..؟ مدري اشكثر
بس احبك حيل و اتمناك حـيـل

**تنهيدهـ** · 28-04-2017, 02:55 AM

رد: ✒ .. خآصرة حرف رمآدية

الحياة أحيانا تعلمك أمور كثير تخليك تتوازن بالتفكير .. والقرارات وما إلى
ذلك .. حتى في مشاعرك تتوازن .. حبك وغيرتك وصدك وجفاك .. يعني
ماتغلو في شي ولا تكون خفيف عقل في آخر ..
ربما أنا تعلمت أشياء تسبق عمري في مجال ما بعد جربته حتى في حياتي
بس كنت أقرأ .. واتعلم من تجارب اللي حولي .. وأقارن بين وجهة نظري
واللي أتمناه .. والواقع .. وأسدد وأقارب بشكل حلو ..

يعني تقريبا في مرحلة المتوسط كنت أقرأ كتب عن فنون التعامل مع الآخرين ..
كنت أقرأ كتب في طرق التربية .. حتى في الحياة الزوجية قرأت

ما كنت أوفر على نفسي في القراءة أبدا .. ومجتهدة في البحث عن
الأمور اللي تصعب علي .. إلى أن وصلت مرحلة من النضج المبكر ..
يعني بعمر 17 سنه انا كنت أدبر أمور نفسي بأشياء يمكن تصعب
على اللي بأعمار 30 سنه .. غير كذا .. ابوي علمنا أمور حلوة
مثل فنون الادخار .. كيف اعتمد على نفسي في بعض المشكلات
اللي تواجهني من الناس خارج أسوار بيتنا ..

أما الطبخ وأمور البيت تعلمتها من نفسي .. كانت مامي الله يحفظها
تطردني من المطبخ لأن صغيرة .. شوي تلاقيني رجعت وراها اشوف
كيف تسوي هذا وكيف تنظف هذا .. لين انغثت مني وخلتني اتابع ..
وصرت مسؤوله عن قهوة العصر .. في عمر صغير جدا .. اللي ابي
اصل له .. شي معين .. انوه :
اذا كانت عندك إرادة داخليه في صنع نفسك وإعادة تهيئتها من جديد
واكتساب مهارات إبداعية .. إقرأ وبادر بالتغيير .. وانوي هالأمر في
داخلك .. " إن الله لايغير ما بقوم حتى يغيروا ما بأنفسهم "
حنا ماعندنا ثقافة التغيير اللي أساسها وش علي من الناس .. نتلفت
كل ما حاولنا نسوي بأنفسنا خير .. من هم الناس !
أنت تبي تقلب حياتك من شي إلى آخر .. تطمح للأفضل .. عندك
رؤية مستقبلية لنفسك في أمر ما .. سو اللي براسك اذا شايف
هنا راحتك وصلاح نفسك .. والناس راح تنقدك يومين وترجع تقول
شف فلان والله زانت حياته وتقلدك .. بس مب كل تقليد ناجح ..
كلن وشخصيته عاد ..

الزبدة .. إن لنفسك عليك حق .. شي مب راضي عنه في ذاتك وودك
تغيره .. امش على أسس التغيير خطوة بخطوة .. واقرأ ثم اقرأ ثم
اقرأ .. القراءة عنوان حياة ..

وبس والله ،،

**تنهيدهـ** · 30-04-2017, 09:37 AM

رد: ✒ .. خآصرة حرف رمآدية

صباح الحب ،،

أحيانا الإنسان بمجرد اعجابه بشخص ما .. يحاول تسخير مشاعره
وتطويعها .. في سبيل إقناع نفسه أنه هذا حب .. وهو لا حب ولا
هم يحزنون .. مجرد فكر اعجبه وحرف لبق وكذا ..
انا اشوف انه الحب اللي أحس انه حب من جواااا فعلا .. هو اللي يكون
بلا تصنع .. شفاف .. واضح .. بسيط .. فيه صراحه لأبعد حد ..
واللي تكون فيه ظروف كلا الطرفين واضحه بشكل دقيق .. هنا اقدر
اقول انك تحب لأنك تحب .. مب لأن فلان صنع له وجه وحياة علشان
يعجبك ومرت عليك وطحت في عمق الكذبه ..

كثير من الأشخاص يدخلون حياة بعض الأطراف لأن بس فيهم فضول
يعرفون حياة هالانسان كيف صايره .. ولما يعرفون وضعه كيف
جاي .. تحس يبرد الفضول اللي فيهم .. ويختلقون أعذار واهيه
على أساس يرجعون العلاقة مثل قبل كأنهم ماعرفوه ولا تطفلو على
خصوصياته .. وإن حشرتهم قالو مب هالشخص اللي يرتقي لمستوى
طموحي .. طيب اذا كنت تبي شخص على مستوى طموحك هذا تقدر
تلاقيه عند خطابه مثلا ولا اطلبه من نمشي

لا جد .. الشخص اللي كذا وعنده شروط معينه هذا ما يدخل في نطاق
الحب ولا يفكر في حياة مستمرة .. كل اللي همه شخص يكون مطابق
لهيئة المواصفات والمقاييس اللي ترضي غروره وبس ..

إذا كنت ما تحب ذاك الحب اللي يجي بدون تشرط وقلبك قنوع وقنوع جدا
بالشخص اللي مال له قلبك .. ومهما كانت ظروفك أو ظروفه راح تواجه
بشكل حلو .. علشان تنهيه بنهاية حلوة .. خل قلبك يستريح على أقرب
مركى .. وتفرج على الناس .. راح تمر نماذج مثلك تتشرط ونماذج احسن
منك عاشت على أبسط مايكون .. وراح تشوف الفرق بين النتيجتين كيف..
وإذا كنت مب مقتنع من داخلك انه كل شخص يعرف كيف يختار لنفسه
شخص يشبه أناقة روحه .. فاعرف انه لازمك كف علشان تجرب غصات
كثير .. فيه كف يكرهك الحب وسنينه .. وكف يدلك على مسارات حلوه
وكف يخلي عندك نظرة ثاقبة بالأشخاص .. وكف يخليك تحب الطبيعه
وبس .. عاد انت وحظك وش يطلع لك

شغف المعرفه اللي داخلنا أحيان لشخص .. وحبنا لروحه .. ربما يكون
أفضل انه يتوج بالصداقة والأخوة .. مش كل شغف حب على فكرة ..
ولما اقول تراي أحبك .. وياعمري وياروحي ووو .. يعني كلام حلو
مثل قلبي .. فهو يدل على اني ربيت نفسي على هالاسلوب ..
مب معناه اني خاقه مممرا .. وغالبا تقال في السياق غير متعمده ..

يعني انا ممرا كنت بالسوق ومعي ابوي .. وأسأل صاحب المحل عن
شي وقلت له يا قلبي

.. ابوي قال لي انتي وش تبين بس ..
اختاريه وانا اجيبه لك .. وين حنا فيه تقولين له ياقلبي أجل

وش اسوي بي لساني ماعليه إلا الكلام الحلو وكذا .. وهذا تعودت
عليه .. يعني مشكله لما تكون رقتك طاغية على تصرفاتك << تنهيده وخري

المهم .. بما اننا دخلنا في الحب وطواريه .. وراه ما نطبق الكلام
اللي نقوله وبلاش تنظير يعني .. خلونا حلوين بالحب والحب حلو بينا ..

ولا لا ،،

**تنهيدهـ** · 30-04-2017, 05:30 PM

رد: ✒ .. خآصرة حرف رمآدية

مدري صار لي فتره مب هينه هاجده حبتين .. بسبب يعني شوي تنظيمي
يعني صح انا وحده نشيطه بهالمكان واذا ركدت شوي يبين علي .. لكن
مب لدرجة تحليل زواج

ورومنس .. وعقل شياب مممرا .. يعني
كذا أوفر يا جماعه

..
يعني لهالدرجه واضح علي مود العشاق

اتقوا الله في قلبي شويتين
غيرو رايكم من هنا ولا مناك .. الواحد أحيانا يغيب يرتب حياته شوي
نظام نوم وأكل حتى الناس يرتبهم .. خصوصا الالكترونيين مالهم أمان
إلى الآن اللي أثق في صحبتهم خمس أشخاص واثق اني لو أغيب
راح يحفظوني وكأني موجوده .. لأني شفت أشخاص غابو وقيل عنهم
اللي ما يقال في الوجه ..

وأشخاص مالي بهم علاقه واساؤو لي بشكل ممرا يحزن .. والحزن
هنا عليهم مب من كلامهم .. بس والله جدا عادي لأن العابر ما يأثر
بشي والدنيا سهالات ..
عموما .. صح تواجدي مب مثل قبل وثقل دمي شوي وماعرفتوني
وانا اتكلم عن الحب بفلسفة عميقة بس جربوني بمود المتزوجات يمكن
اجوز لكم وتطالبوني بالاستمرار

لا وفوق هذا راجعه للفصحى بقوة وثقل دمي زود على ثقله

بس اللي ماتعرفونه اني مكثره من بهارات القراءة .. وراجعه
أن شاء الله للجانب الأدبي بعمق مش سهل .. بس شوية وقت ..

الحين انا عرفت اني أحب بس ما عرفت مين اللي أحب .. عطونا
اقتراحات يا جماعه يمكن يجوز لي الحب وتاخذون فيني حسنات

الله يقطع سواليفكم النايمه ..

برب ،،

**تنهيدهـ** · 02-05-2017, 09:49 AM

رد: ✒ .. خآصرة حرف رمآدية

صباحكم أروق وأرق وأجمل صباح مر علي ب 2017

مدري الصباح حلو ولا أنا اللي محليته

بس جد مممرا غير ومممرا مبسوطه ..
ريحة بخور وعطر أحبه وقهوة فرنسيه وميوزك هاديه ..وقلبي يحس بلطافة
الناس اللي حواليني زايده ..
أمس فقدتكم ما أمداني أروق على عبير وأمخمخ وكذا .. بس شفت
مستهلكين موضوع التعدد بشكل منتاز ..
بس خلوني آخذ فره على مدوناتكم وفكره عن موضوع وزير السلطان
وارجع اقول لكم وش رسيت عليه ..
بس شفت الوسمي داخل دخله مب صاحيه

مدري وراه مب مركز
شفيك شفيك يممه شوي شوي لين اعطيك الزبده ..
شهرزاد خلينا شوي ريلاكس بس حلو الواقع صح عليك ..
طيف مبسوطه مممرا أما نفر باينه عليه الراحه مايحتاج نسأل عن رايه
وعز ماوده يخربها خلوه مبسوط بالدوري المزروف

المهم تبون رايي ولا مب لازم .. لا لا بقوله علشان اللي ناوي
مايتردد ههههه ..
ماعلينا .. وش رايكم نقترح على شركة سدافكو تغير لون حليب
السعودية اللي بالفراوله .. ماصارت كل مارحت ابيه
اخذ قليل الدسم بدون نكهه وارجع مصدومه هففف .. والله جد ..
وصباحكم حلو يااارب ..

**تنهيدهـ** · 02-05-2017, 11:47 AM

رد: ✒ .. خآصرة حرف رمآدية

أعجبتني ملكه بشموخي هي ونظامها تقول عادي ثمن تقول تسحب عليه
هههههههه الغيره واضحه ترى ماعرفتي تخبينها أبد ..

بس خلوني أعطيكم خلاصة حلوة ورايقه .. بس نبيها ريلاكس ..
ولا نميل كفة الميزان على كفه .. وايضا خلونا خارج نطاق الدين واحكامه لأنها واضحه
للجميع ولا فيها خلل .. الحمدلله على نعمة الإسلام ..
لكن .. متى يفكر الرجل إنه يعدد ومتى يكون للبنت حق انها تعترض وتأخر حكم
الجلسه يعني ..
لو جينا من ناحية التوزيع الرباني للمهام الزوجيه نلقاها عادله .. لكن طريقة التطبيق
مممرا لأ .. من الطرفين طبعا ولا نجحف حق أحد ..
كل واحد في الحياة يحب نفسه ووده لو يختار لنفسه أعذب إختيار لكن
مافيه شخص كامل .. لو نتفكر في هالنقطة نعرف دورنا في مرحلتنا الانتقاليه
الجديده .. لكن كل يحس انه يستحق الأفضل ..
الله خلقنا نكمل بعض مش ند لبعض في كل أمر .. يعني من حق الرجل لو
شاف انه ما اكتمل بأول زواج إنه يكمل نفسه بشكل ما .. ليه أزعل إذا كنت
أنا مب ذاك الزود بالاهتمام .. ونفس الشي إذا هي ما اكتملت
تقدر تنفصل وتشوف حياتها في زاويه أخرى ..
الدين يسر والحياة سهله إذا اتسمت وتميزت بالتنظيم والالتزام .. ليه اتزوج دام أنا
مب على قدر من المسؤوليه ولا أقدر الأمانه اللي منحني ربي إياها ..
أكبر مشكله نواجهها هالفترة المطالبة بالمساواة في المسؤوليات الاجتماعيه ..
كلمة مساواة لا تدخل في علاقاتنا لأن نهايتها نديه ..
حلوه الأمور اذا جات على هيئة شراكه .. ويصير فيه نقاش وتفاهم في جميع زوايا
هالشركه وعن جميع أفرادها .. والتعاون يخلق جو رايق جدا ...
وأنت إذا أهملت شركتك تستاهل كل الخساير اللي تجيك .. كل شي قام على
أساس وعهد فهو يستحق الاهتمام ..

صح فيه بعض الامور مب من الواجبات اللازمه .. لكن تدخل في التودد
اهتمي ببيتك برجلك بأطفالك وبنفسك أولا وآخرآ .. واذا كنتي مهتمه بكل التفاصيل
هنا يحق لك تعتبين لكن بأسلوب .. مب تشيلين قشك وتروحين عند أهلك بدون نقاش
ودي .. الحياة تمشي إذا أخذناها ببساطه .. ليه التكلف في علاقة هي
من أقرب العلاقات في حياتنا .. ومافيه أحد يرضى يعيش هالعلاقة كهامش ..
صحيح الغيرة أحيانا تسلكنا مسلك بايخ .. لكن بعد الهدوء والرويه نميز أخطاءنا بشكل
أدق .. وبدون أي حسابات صعبه ..

بودي تطغى الفكرة الحلوة عن التعدد .. لكن للأسف نشوف الوضع تخويف
وتهويل .. وصدااااع .. وسحر ... وسواليف محبوكه بشكل يخوف ..
وكأن الواحد مخلد في الحياة ..
الحياة بشكل عام إذا ماكان جذرها وأساسها الخوف من الله فهي حياة مهزوزه
امش على الرسائل الربانيه وريح راسك ..
ماتقدر تعدل العدل الواجب خل بنت الناس في بيت أهلها .. لكن مانلوم
الرجل إذا مال قلبه للي تهتم به بشكل أدق .. ربي يميزنا بأعمالنا
وعلى قدر نوايانا يعطينا ..

الزبدة .. كل شخص فينا يهدي الطرف الثاني عيوبه بغرض تطوير الذات
مب تشمت .. أو أذى حسي .. اللين ماكان في شيء إلا زانه ..
ودايما يقولون وراء كل رجل عظيم امرأة ..
أبوي دايما يقول لنا تعرف حال زوجة الرجال في بيته من هيئته
حتى لو كان هو مهتم بنفسه تلاقي ثغره تبين لك الحال بشكل
عام .. خلونا حلوين بالاهتمام .. والحب ..

وبسسس والله ..

**تنهيدهـ** · 02-05-2017, 12:41 PM

رد: ✒ .. خآصرة حرف رمآدية

وش ذا كل كلامكم عن التعدد يعصب الواحد

هه لا جد .. الحين انت تاكي في قصص العشاق ومحدن جاك ..
مليت بسرعه من التعدد علشانك مبسوط يعني

والله مدري منهو الغرقان في الحب .. بس عوافي .. خلونا على نظرة اللي
شايف اني ذايبه ومختبصه مممرا ..

انا خلوني بس احكي لكم كيف كان يومي أمس .. وانطباعي عن الحياة
بوجود ناس حلوين فيها يهدونك لطافتهم بشكل مممرا أنيق ..
كان فطوري برااا لكن مب المعتاد يعني .. عدد أقل وروقان أكثثر
والفول متسيد على المائدة مع كبده وشويتين بيض ..
بس القهوة كانت بالقطاره .. والحلى أنا الحلى ..
بس فعلا تغيير وجوه وشخصيات في الصباح يعطي انطباع صباحي جميل ..
للأبد أحب الصباح .. أحس انه يتيح لك مجال تنجز كل شي بروقاااان
وتكون أصفى قلبا وقالبا .. الليل حلو بس مع زحمة الرياض
وأصوات الناس اللي تتجاوز صوت النوافير لأذنك مزعجه ..
صار خياري الثاني ..
خلونا نحب بروقااان ليه لأ

من جد مسكتوا سالفة الحب علي وشكلها أعجبتكم ممرا ..
بس يلا انبسطوا .. كلي لكم يا آل عبير الباذخين

مساآئكم تعدد .. قصدي حب

**تنهيدهـ** · 02-05-2017, 01:31 PM

رد: ✒ .. خآصرة حرف رمآدية

‏احب اسمع اذا بتحكي
واحب اسمع حديث العين

و احب اني آنا احبك
قسم اكثر من الثنتين

**تنهيدهـ** · 02-05-2017, 07:42 PM

رد: ✒ .. خآصرة حرف رمآدية

فصلة طيف العقلانية ما جات إلا على الوسمي

أنا معلمتكم من
زمان إنها ذات منطق حلو بس محد عطاني وجه .. بس حبيت وقسم ..
طحنت الوسمي طحن مب صاحي .. هيا خذ لك

لكن بشكل عام الكلام منطقي جدا .. بس لو تصير رقيقه مثلي حبتين
وتتكلم نفس السناب << ياويلك منها

فعلا لو رجعنا نتكلم عن التعدد له جوانب كثيرة .. وكل شخص أخذها
من زاويه بدءا من وزير السلطان لين طيف .. بس الوسمي اللي
أكلها يوم تكلم عن فصل .. تعدد وخذ لك حربيه دام الجيب مليان ..
ها كيف بس وضعك عسى ما انحشرت مراااا

التعدد له أسباب ومسببات .. إما أنها تكون مبنيه على وضعك الحياتي
وصعوبته .. أو غريزي فقط .. ولا تعدد لأنك تبي تعدد .. وتتعذر
بالجانب الثاني بشكل مخجل عاد تستاهل ما جاك .. لو تقلب عليك
الحياة قلبتن شينه .. حتى لو تآمرو المساكين عليك .. تستاهل عاد
انهم يخططون عليك وياخذون ماوراك ودونك ويخلعونك ممرا وحده
بحجة إنك ما تنحب ويع

للأبد أكره اللي نظامه تجميعي ولا عنده سبب واضح للتعدد .. وكل
همه يبين للناس انه مقتدر ماديا وفاهم الدين ممرا << كف ياتنهيده

المهم بالله لحد يتكلم عن التعدد إلا اللي يحتاجونه .. وخلوني اختمه
وأقول .. قبل تعدد انظر لكل زوايا حياتك ونفسك .. هل تستحق
انك تعدد .. ولا وضعك سليم .. ولحد يقول البنات عنسوا خلونا
نعرس من باب الرأفه وهو بنفسه محتاج أحد يرأف بتفكيره ..
رجاء قفلو على موضوع التعدد .. واللي بيعدد يعدد بثقافه حلوة
مب خبط لزق .. جعل الحظ الحلو يخبطكم خبطتن زينه ..
ولا خلونا ندخل في فصل .. تزوج جنوبية تعيش عيشه هنيه من
باب التسويق للمنطقة كاملة

لو هي على الدعاية والاعلان
حنا ما نحتاج دعايات من الله الملح مقطعنا << تنهيده نامي بالله

يلا خلوكم من التعدد ترى الوضع مايحتمل إلا فصول العشق اللي
ماعاد له صرفه مثل وضعي يعني هههههههه .. شرايكم بي بس
وانا ماشيه معكم بشكل حلو

..

خلاصة الموضوع .. اللي مب قد الحب وتضحياته لا يحب خلوه على
نظام خذوه فغلوه ترى يستاهله ممرا .. واللي مب قد التعدد لا
يتفلسف بثقافة دينيه ينحشر فيها بسرعه .. ترى ياخذ له كف مب
صاحي والله ويقعد بها

.. خلوكم حلوين وعلى قدراتكم عيشوا
اصرف لكم .. يا آخر حبه ياللي بنموت إذا عددت .. وخرو بالله بتنفس :)

برب ،،

**تنهيدهـ** · 02-05-2017, 10:00 PM

رد: ✒ .. خآصرة حرف رمآدية

‏اكسب اللي في شديد الوقت هلا
واخسر اللي في المصايب م وقفوا

لا تبقي في حياتك شخص الا.. /
الكفو .. ثم الكفو .. ثم الكفو

.. زهـايـمر حكـي .~

تعليق

تعليق

تعليق

تعليق

تعليق

تعليق

تعليق

تعليق

تعليق

تعليق

google Ad Widget