سلام عليكم
كيفكم طيبين منيحين منتازين ؟
ماتلاحظون ان حتى اللي ماعندهم امتحانات إكتأبو .. السبب
ان غياب الشعب اللي اختفو عشان اختباراتهم جاب لنا التوحد
كل البرامج والمنتدى.. قل النشاط ومافي أكشنات..
حتى أختي أعتكفت في غرفتها يومين.. جيت زرتها اسلم عليها على عكس العاده
كانت هي اللي تسير علي،، بس هالمره مريتها قبل اداوم .. قالت خير ؟ هههههه
قلت لا بس اشتقت لك يعني ما طلعتي ولا شفتك وجيت أتأكد إنك على قيد الحياة.

بأقول لكم موجز أهم الأنباء اللي تخصني:
سلمى سددت نص الدين وباقي نصه. << اللي مايذكر السالفه مو شرط ترا
مشكلة الفلوس اللي اختفت في المحل .. سددناها بالنص انا وزميلتي.
القصه ومافيها.. كانت الغلطانه فيها ( أنا )
وأحكيها لكم للعظة والعبرة. قبل ٣ شهور زميلتي كانت هي مديرة المكان..
وهي اللي دربتني وماشفت منها الا الانسانة الحريصة وعلمتني بكل أمانة ما بخلت علي بشي
هذا الكلام تقريبا لأسبوع او ١٠ ايام وطلبت اجازة شهر وبتسلمني المحل بدالها..
وجا وقت إنها توقعني على ورقة انو تخلي مسؤوليتها من المحل بما فيه وأوقع أنا بإني أستلمت كل شي كامل.
ومن الامور اللي اوقع عليها.. اني استلمت عهدة المحل وهي ٢٥٠٠.. وهي ما تطلع من المحل أبدا وممنوع تنقص او تزيد.. نستخدمها للصرف وقت البيع.
ومن هنا بدأت سلسلة أغلاطي.. الأولى إني وقعت اني استلمت العهده وأنا ماعديتها بنفسي وتأكدت انها كامله.
ولما مشت زميلتي وجا اليوم الثاني طلعت الفلوس لقيتها ناقصة ١٧٠٢ !!
جاني دوار البحر من الصدمه.. كيف ومين وليه ؟!.. اتصلت على زميلتي وسجلت المكالمه لأن وقتها فقدت الثقه حتى في اكسجين الجو.. طبعا هي انصدمت وماعندها فكره عن السبب وقلت لها ما بلغت الادارة لين افهم منك هل انتي حطيتيها ناقصه والا كيف..
قالت اكيد كامله.. اصبري استشير الينات وأرد عليك.
وأختفت من بعدها لأن اجازتها اصلا مرضيه.. راحت تسوي عمليه وتقفل جوالها واختفت شهر وزياده.
وسددتها في حينها .. استلفتها لأن ما عندي راتب وقتها.. وهذي غلطتي الثانيه اني مابلغت الادارة في حينها عشان يتحرون ويطلعون الحقيقة.. وغرمت نفسي وانا مالي دخل.
بس تصرفي هذا ليه ؟ ما كان ودي تتبهذل زميلتي في شرطة وقلة حيا.. كنت أبغاها تقول لي اذا هي أخذتها ونحلها بيننا.
برضو غلطت لأن لما رجعت فتحت القضيه وعلمت الاداره ان هالأمر حصل بس بعد ما رجعت هي بفتره..
كانت المشكله اني تأخرت.. لو تكلمت في حينها كان قدرو يتحرون ويطلعون الحقيقة.
لأنهم مصدقيننا الثنتين بإنا ما أخذنا من هالفلوس شي.. لكن مابيدهم حيلة 
وخزنة الفلوس مالها اللا النسخة اللي سلمتني اياها زميلتي.
لذلك احنا اللي سددناها بالنص.


الدرس اللي تعلمته:
ما أوقع على استلام شي لين اتفحصة كامل حتى لو كان اللي مسلمته لي أمي.. لأن ممكن تحسب انه كامل وسليم ويطلع العكس.
برضو بهالموقف المفروض أبلغ المسؤولين وما أتصرف تحت تأثير عواطفي.
والله لا يعيده من موقف.
ولا تناقشوني بهالموضوع تكفون ماصدقت انه تقفل.. راحة البال أهم