مسهم بالخير والسعاده


أختكم في الله رئيسة موظفات من شهور.. وعلى غير عادة الرئيسات الحريم كنت أغطي كثير عن زميلاتي لاغابو والا تأخرو، رغم ان فيه بصمه بس وحده منهم لسى ماتفعلت بصمته وإلى الان حره طليقه. كنت اغطي كثير بس لأني أعرف ظروفهم ومادام المدير مادق وسأل عنهم ف هم مستورين لذلك ماكنت ارسل خصومات او اقول شي. لكن كل المحلات اللي حولنا مقهورين من فريقنا ان مابينهم مشاكل وامورنا طيبه، واللي يقولون لمديراتهم ليه ماتغطين علينا زيهم وكذا.
بصراحه اللي أسويه أنا مو عدل وضميري مومرتاح.. وكلمت زميلاتي وقلت لهم لما اغطي عن وحده انا كذا اظلم الثانيه، ف ياريت تصلحون ظروفكم وكذا.
اخر الحلقه من المسلسل هذا ان المدير جاه خبر من برا ان البنات لما يغيبو ما اقله.. بس هو من ثقته فيني ماسألتي يتأكد لكن قال هم يقولو كذا لكن أنا قلت لهم انك تعلميني اول بأول ( كنت اعلمه في الحالات اللي يقدرو البنات يجيبو فيها عذر) لذلك كذبهم وصدقني.
انا ماكذبت عليه الحمد لله لأنه ما سألني هل كلامهم صحيح او لا لأني والله مقدر اكذب عليه خصوصا انه واثق فيني والخيبه مؤلمه شوي . الحمد لله عدت ربي سهلها.
من بعدها قلت للبنات والله يابنات أنا أخذت درس من هالموقف البايخ، ولازم ألتزم بالنظام أكثر وما أصدم المدير بخيبه دامه يقول ثقته فيني عميا.. حطو نفسكم مكاني وكذا. لذلك بقوم بعملي زي ماهو..مادمت مؤتمنه على سير النظام هنا راح أطبقه زي ماهو مطلوب مني. البنات قدرو هالشي ومتفهمين لكن مره ماحبيتني وانا ارسل خصم في وحده غابت الصباح اليوم :(
الله يزين ظروفهم ويعيني على أداء الأمانه بكل عدل وصدق.

كل يوم أتعلم درس جديد في وظيفتي ودوري هذا.. وأنا قبلت أكون مسؤوله عشان أعرفني كمسؤوله ، هل أنا أعرف أتصرف والا لا، هل أعرف أقرر في المواقف وأكون حياديه وعقلانيه أو لا. وكل يوم درس حتى من نفس العمل والإداره.