بلا رقيب / لعاشقه ديرتها ، كاملة

**Loli.** · 25-07-2011, 08:01 AM

رد: بلا رقيب / لعاشقه ديرتها ، كاملة

الحلقه السادسه والثلاثون
((1))
ميشو

زماني يازماني يازماني
حبيب الروح في الاخر نساني
اعلمه الرمايه كل يوم
وحين اشتد ساعده رماني ...
صرخت بأندهاش ..
ميشو :رائعه انتي ريدا ..
كريمه :ريدا ليش ماتشركين بالستار اكاديمي اضمن لك الستار ..
ردت علينا ريدا وهي تعيد العزف على العود الذي تحتضنه ..
ريدا:تسلمن يالغاليات بس والله ماتليق علي الشهره ..
كراميل :انتي جربي قبل بعدين تعالي قولي تليق عليك اولا بعدين حنا نبي نشتهر عن طريقك عندك مانع ..
ريدا :انا لا .. ميشو عندك مانع ..
ضحكت كثيرا على طريقتها بطرح السؤال ..
ميشو :وماشأني انا ..
ريدا :يقولون انك خويتي ..
ميشو :ومن قال ذالك بالتأكيد لم يعرف حقيقتنا ..
كراميل :عاد بدت فيلسوفة الشله تبدع بالهرج ..
ريدا :حلوه الهرج كثريلي منها .. كراميل ابي اعدل ميزاجي ..
ميشو :هاقد بدأنا بالمحظور ..
ريد :طيب جربي بعدين احكمي ..
ميشو :كلا ياعزيزتي دعيني بعيده .. لست مستعده بعد للأدمان ..
كراميل :دقي على خوينا خليه يجيب ..
ريدا :أي واحد اللي الأول يقولون انه مقبوض عليه ..
كراميل :والله ماقال لي متعب ..
ريدا :تدرين ان متعب هذا بيوديك بالداهيه ..
كراميل :مافيه شي اسمه داهيه بقاموسي .. بعدين ياهلا بالداهيه اللي بيوديني لها توتي ..
ريدا :بهذي صدقتي ..
ميشو :اه توقفا عن ذالك ..
ريدا :تكلمت عدوة الرجال ..
ميشو :يألهي لو تعرفن كيف ينظر أليكن الرجال ماتحدثتنا عنهم بهذه الطريقه ..
كراميل :ايه ميشو لاتلبعين بعقولنا ..
ميشو :هل اصبحت انا من العب بعقولكن .. لقد لعب بها الرجال اشواط واشواط ..
ريدا :بس لعبهم محترف وعلى مستوي ولعبك انتي يغث ويسد النفس ..
ميشو :رائع رائع ايتها الخائنه هل تبيعين رفقة عمر من اجل رجل ..
كراميل :هيي ريدا احترمي حالك واعتذري من ميشو .. ماهي ميشو اللي ينقال لها هالكلام .. بعدين انتي كيف تأمنين على نفسك تقولين لها هالكلام وبيدها كوب قهوه .. نسيتي ان لها سوابق ..
يال الهول هل يسخرن مني .. على حين غفله منهن تسللت لخارج الغرفه ومن ثم خارج الشقه بعد انا انتزعت المفتاح من بابها واقفلت به الباب من الخارج وانا كلي ثقه ان هذا هو المفتاح الوحيد ولاتملك أي منهن في الداخل مفتاح ..
وصلني صراخ احداهن من خلال الجوال بعد نصف ساعه :ميشو يامجنونه ..
ولكني كافئتها بأغلاق الخط ..
ملاك :وش فيك ياجميل جالس لحالك ..
ميشو :لاتخاطبيني بلهجة الذكور ..
ملاك :ايه صح صح نسيت انك انسه ..
ميشو :توقفي عن التهريج واخبريني ماذا تفعلين بغرفتي ..
ملاك :ولاشي بس كنت ماره قلت اطل عليك متي حييتي كذا يعني اشوف اخر اخبارك الحيويه ..
كررت خلفها ..
ميشو :الحيويه ..
ملاك :ايه الحيويه ولاتقولين ماتعرفينها هذي كلمه اخذناها اليوم بالعلوم ...
ميشو :اه .. فهمت .. فهمت .. المدرسه ..
ملاك :يه وخري هنا ياراعية الجامعه ترى كل اللي بينا 6سنوات ..
ميشو :جيد .. ياصاحبة الطموح .. 6سنوات جميله اتمناها لك في دهاليز المدرسه ...
صاحت بي بخوف وكأن دعوتي مستجابه لا محاله ..
ملاك:فال الله وفالك انا قصدي ثلاث سنوات بالثانوي وثلاث بالجامعه ..
وبلحضات لم تكد فيها الكلمات ان تصل لدماغي .. صاحت بأنفعال ..
ملاك :ايييه نسيت مأدري وش ادخل علمي او ادبي بروح اسأل سارا ..
وخرجت من عندي وهي تنادي على سارا ..
كم اتمنى لو احيا حياة ملاك او سارا ..
حياه هادئه مليئه بالحيويه .. والأهم بعيده عن الأنتقام الذي يثقل كاهلي ..ويتعب تفكيري المتعب منذ ولادتي ..

((2))
منير

طلعت من البيت اركض .. حرب اللي داخل حرب .. ليه يتهاوشون حرام عليهم انا احسهم شوي ويذبحون بعض
.. ليش يمه ليش .. ليش ياقيس ..؟!
من قال ان سارا محتاجه له .. ليه امي تظن ان سارا ماراح تزوج بعد مانفصخت خطوبتها
.. تحسب يعني ان زواجها من قيس هو الحل ..
ليش الناس تفكيرها غبي .. قيس وسارا كيف ..
انا خايف على سارا خايف ..
قيس مجنون ماهو طبيعي تو كان بيذبح اللي قدامه من الأنفعال .. وجابر ليش يتدخل ليش يكره قيس ليش يشب النار بين قيس وبين امي ..
شفت قيس يطلع شبه جري من البيت ويركب سيارته اللي حركها بالسرعه تطحن اللي تمر عليه ..
اول ماشفت جابر ركضت له بعرف منه وش صار مع اني كنت مقهور منه الحقير ..
منير :وش صار ..
جابر :ماودعته .. خلاص امي طردته من البيت ..
وجلس يضحك .. مبسوط هو ووجه الحيوان ..
منير :وليش طردته ..
جابر:تقول مافيه رجعه لين يرضى يتزوج بنت الأصل والفصل سويره ..
بعدت عنه لين صار مايقدر يمسكني ..
منير :بنت اصل وفصل غصب عنك يالحقيرررررر ..تفوو عليك ياشراب الدخان ياتاررك الصلاه ..
وحطيت رجلي وهربت .. لأني كنت متأكد لو طحت بيده كان بيذبحني .. مالت عليه وعلى الشينه زوجته وععععع ...
اصلا هو مقهور لأنه ماتزوج سارا اكيد مقهور .. تفوووووووعليه ..
وعد :اوب اوب .. اوب كل هذي عصبيه ..
اووووه هذي وش جابها الجنيه ..
لفيت عليها وانا ودي ازنطها ..
منير :خير انتي وش تبين ..
وعد :وش ابي يعني امش نلعب كوره ..
منير :مالي خلق نواف وينه ..
وعد :راقد ..
راقد غريبه وش عنده الدب ..
منير:وانتي وش عندك طالعه من غيره ..
طالعتني بنص عين وراحت تمشي وخلتني ..
لحقتها .. جلست تركض ..
منير :وعدوووه تعالي ياحماره ..
ناظرت فيني .. وهي تضحك .. وجلست تصارخ ..
وعد :اتحداك تلحقني ... الوعد عند دوار الورد ..
منير :لايالخبله بعيد هذا بتطلعينا من الحاره ..
وعد :بعيد ولاماتقدر يادب خايق اني اهزمك ..
جلست اركض وراها وهي تدخل مع شوارع الحاره يقالها بتختصر الطريق مادرت انها كذا تطوله وانا استمريت بالنفس الشارع ..

**Loli.** · 25-07-2011, 08:07 AM

رد: بلا رقيب / لعاشقه ديرتها ، كاملة

وبعد ماأنقطع نفسي وصلت عند الدوار بمعجزه من السيارات ووقفت وسطه ادورها مالقيتها.. اووووف وين راحت ذي صدق غبيه غبيه غبيه ...
جلست اناديها يمكن هي على الرصيف وانا ماني قادر اشوف الرصيف من زحمة السيارات ..
منير :وعععععععععد .. ياوعععععععععععععععد ..
سمعت صوتها .. ترد علي ..
وعد :تعال منير انت ووجهك خلاص فزت تعال ..
وش فيه صوتها كنها خايفه .. ياليت والله وعدوه تخاف خخخخخخخخخخ ..
قطعت الشارع بالسرعه ولقيتها جالسه على الرصيف كنها شحاده جيت جلست جنبها ..
منير :وش فيك ليه ماجيتي هناك ...
وعد :مالي خلق خفت تصدمني سياره واروح ضحية التهور وأكون عبره ..
منير :وش فيك صايره فهيمه اليوم ..
وعد :خخخخ اقشر فهامه اللي بتلقاها عندي بس اليوم اخذين درس عن الحوادث المروريه وجمعت لي كلمتين منه وجيت اتفيلح فيهم قدامك .. منيررر شوووف هناك ..
لفيت اشوف وين ماده اصبعها وانصدمت هذا فادي ايه هذي سيارته .. بس من هذي اللي معه .. سويت نفسي مافهمت قصدها ..
منير :وين هناك السيارات قصدك ..
وعد :اصلا انت شفته اخوك فاديووه الفاسد لاوراكب سياره كشخه من وين جايبها ..
منير :وانا وش دراني عنه ..
وعد :انت ليه كل أخوانك كذا اغبياء وفاسدين ...
هييي وش تقول الهبلا ذي ..
منير :احترمي حالك من زينك انتي وخواتك ..
وعد :احلى منك على الأقل حنا عندنا وحده عاقله .. انتم البيت كله منتهيه صلاحيتكم ..
منير :هع جدديها .. وهين تشوفين دوري احد يشتريلك من الدكان ..
وعد :يمه خفت عاد انا اشتري ..
منير :ومن وين لك فلوس ..
وعد :ادبر نفسي ..
منير :كيف بتدبرين نفسك يعني .. بتسرقين ..
قلتها بأستهبال ..
وعد :ايه اسرق ليه لا ..
طالعتها احسبها استهبل .. بس كانت نظراتها تثبت صدق حكيها ..
منير :انتي تسرقين ..
وعد :ايه اقولك ماتفهم انت ..
منير :بس ليه ..؟
وعد :يعني ليه الناس تسرق ..
منير :مأدري الناس تسرق عشان اشياء كثيره ..
وعد :خلاص انا مثل هالناس ..
منير :وانتي مصدقه انك من الناس ..
عصبت وحواجبها نطت بنص جبهتها ..
وعد :احترم حالك وش قصدك يعني انا حيوانه ..
ههههههههههههههههههههه ياليتكم بس تشوفون وجها وهي تكلم ..
بتردد جيت بسألها باللي افكر فيه .. وكنت احسبها تفهم وتعرف تفكر ..
منير :وعد بسألك سؤال بس لاتفهمين خطأ ..
ردت علي بأسلوب ابله ..
وعد :بأختصار وش تبغى اسرق لك ..
منير :هذا اللي كان ناقص اطلب منك تسرقين لي ليش مالي يد ..
وعد :اجل وش تبي ..
منير :اصلا انا الغلطان اللي كنت بقولك شي ..
نطت بلقافه وشوي وتجي بحظني ياخي هالبنت ملقوفه بشكل ..
منير :لاتعالي اجلسي هنا احسن ..
وعد :اقول انقلع ياقليل الأدب .. مالت بس اخو قيس وجابر من وين بتجيب الذرابه ..
وقامت مأدري وين بتروح ..
منير :تعالي يالذربه وين بتروحين ..
وعد :بروح الصين انتي شكو ..
منير :تعالي يالخبله تعالي بشتريلك اسكريم ..
لفت علي بالسرعه ..
وعد:احلف ..
منير :بتجين ولاشلون ..
وعد :لاخلاص بجي بس ياويلك لو تكذب والله لأفلقك ببلكه ..
صدق اني غبي يوم فكرت اخبر هالبزر عن حبي لشوق ... اه ياحياتي يالشوق ..

((3))
سارا

يالناس اهه هههههههههههههههههه ماني قادره اوقف ضحك ياربي من المهبوله ذي ملاك .. هبلت بأبو جد الأبله مسكينه بتطلع من الفصل على طول لشهار ..
تعرفون انا وملاك عدونا الأنجليزي والمشكله بهالأبله شايفه حالها بقوه .. عاد ملاك ماتحملت وبدت بأساليب التطفيش حقتها تصوروا من بدت الحصه وهي كل مالفت الأبله على السبوره جلست تقلد صوت مره صوت رجال مره صوت حصان مره صوت مطر ابداع ابداع .. والمعلمه منهبله ووالفصل كلهم مو دارين من اللي يسوي هالحركات ..
سارا :خلاص ملاك والله بتكشفك .. خليها للحصه الجايه ..
ملاك :اوكي بس شوفي وش بسوي ..
وجلست تقلد صوت غراب بصوت قوي ... انا خفت منه ..
الأبله :قلة ادب اللي جالس يصير قمة السخافه ..
المفرروض اللي جالسه تسوي هالحركات وواضح انها ماتبي تحضر الحصه توقف وتقول ماأبي احضر وانا احب ماعلى قلبي اني اسمح لها تطلع برى لأني مستغنيه عن مثل هالأشكال ..
ملاك بهمس لي ..
ملاك :ياحبها لنكد ..
سارا :ولاكأنك مسويه شي ..
ملاك :أنا اعوذبالله وش سويت ..
سارا :ولاشي حياتي انا اللي سويت ..
ملاك :اقول اسكتي العله تطالع فينا ..
سكتنا شوي لين لفت على السبوره ..
ملاك :اووووف وبعدين مع ابو العله هذي ..
سارا :ابوها شكو ..
ملاك :مأدري عنه ..
سارا :ملاك انتي مسخنه ..
ملاك :لابس شوي واصير محمومه مو مسخنه بس من هالعله ..
سارا:اللحين انا ودي افهم الحصه خمس واربعين دقيقه ولا خمس واربعين ساعه ..
تثاوبت ملاك وحطت راسهاعلى الطاوله وهي تقول ..
ملاك :انام ابرك لي من مقابل هالعله ..
قبل مارد عليها دق الجرس وقمنا كلنا مره وحده ومانتبهنا ان الأبله للحين تشرح وماعندها نيه تطلع .. لين قالت ..
الأبله :خير خير ليه واقفين ..
ملاك :يووه انتي للحين فيه خلاص دق الجرس ..
الأبله :ايش ..
سحبت ملاك اجلسها وانا ابتسم للأبله ابتسامه بلها ..
سارا :ولاشي بس كنا نحسبك بتطلعين ..
الأبله :طيب ماطلعت يالله اجلسوا ماني طالعه لين اخلص شرح ...
جلسوا بنات الفصل يترجونها تطلعهم لأنها الأستراحه بس هي ماعانده الا بتكمل شرح عمى بعينها بس والله لنعوضها بالرابعه ماحنا حاضرين ..
اخيراعتقتنا اول ماطلعنا من الفصل لقينا وعد بوجهنا ..
وعد :وينكن كل هذا اجتهاد ..
ملاك :ماتشوفين العله ذي كاتمه على نفسنا ..
وعد :طيب يالله امشوا .. لحضه هذي وش فيها تطالعكم كذا ..
لفيت اشوف من تقصد لقيتها البنت اللي فشلناها ذيك المره يوم جت بتعرف علينا ومن يومها وهي حاقده علينا ودايم تحاول تمصخر علينا بالفصل بالطريقه غير مباشره هي وشلتها ..
ملاك :ايه لتناظرين فيها هذي عدوتنا ..
وعد :احلفن هذي معجبه بنواف ..
ملاك :والله ..
وعد :بس نواف ماهو معطيها وجه ..
تجاهلناها ورحنا للمخبأنا السري وكالعاده لقيناهم ماقصروا بالسرقه بس انا وملاك كنا نأكل من فلوسنا نعطيهم فلوس يشترون لنا فيه مانأكل من سرقتهم ..
ملاك :وين الشاهي ..
وعد :ام خالد غايبه ماعندنا احد يسويلنا شاهي ..
سارا :لاتكفون دبروها انا مأقدر اصبر دقيقه زياده من غير شاهي ..
قالت وعد اللي ماعلى لسانها هاليومين الا السرقه ..
وعد :وش رايكم اروح اسرق لكم من غرفة المعلمات شاهي ...
صقعتها بقوطي العصير اللي معي على راسها ..
سارا :شكلي بعلم عليك ضحى تخبرك كيف تسرقين زين ..
هع ياليتكم معي تشوفون كيف طلعت عيونها قدام من الروعه .. وبكل العصبيه اللي تقدر عليها قالت ..
وعد :قسم بالله لو دريت انك مخبرتها لأقاطعك طول حياتي ..
رميت نفسي على ظهري بحضن ملاك .. وانا حاطه يدي على قلبي واتأوه ..
سارا :لاياربي اه تكفين وعد ابوس رجلك لاتقاطعيني امووووت انا ..
سكتتني وعد بالصرخه ..
وعد :هاه وش قررتم تبون شاهي اولا ..
سارا :سرقه لا ..
وعد :سرقه وانتي بعد تروحين تسرقين معي عشان ماتقدرين تخبرني ضحى علي ..
ضمتني ملاك وقالت ..
ملاك :انقلع انتي ووجهك وش قالوا لك حراميه توأمي ..
وعد:بتصير حراميه على يدي .. والا بطيحكم بورطه تحرمكم من المدرسه ومن مدارس المملكه كلها ..
قلنا انا وملاك بنفس الوقت ..

**Loli.** · 25-07-2011, 08:19 AM

رد: بلا رقيب / لعاشقه ديرتها ، كاملة

ملاك سارا :عز الطلب ..
((4))

تسللت من جنب أختها ونزلت للصاله المظلمه ..سحبت سماعة التيلفون وراحت فيها للمطبخ .. شبكت السلك وصكت الباب وجلست عليه عشان محد يقدر يدخل .. ودقت الرقم اللي رد بعد الرنه الثانيه ..
الطرف الثاني :يالله قفلي انا ادق عليك ..
كانوا يسوون هالحركه كل يوم تقريبا ..
اول ماحطت السماعه من يدها دق ..
:الوو ..
:مرحبا كيفك حبيبتي ..
:كويسه ..
:وش فيه صوتك ..
:ماأبي ادرس اوووف ماأبي اقوم كل يوم ست الصبح ..
:الصراحه ماألومك .. اوف ودعت القومه الصبح من ست سنين ..
:لأنك فاشل ..
بضحكه :اللحين اسمعوا من يتكلم ولاكأنك مودعتها من قبلي ..
:ايه بس رجعت لها .. انت بترجع ..
:انا ارجع ليش اهبل ..
:اوووووف الوليد متى بطلقها ..
سكت :.....
ملاك :ليش سكت ماتبي تطلقها صح ..حرام عليك والله انا اموووت من الغيره كل ساعه ودقيقه يوم اتذكر انها زوجتك وانا ولاشي يربطني فيك ..
الوليد :ملاك هدي تعرفين اني ماأحبك لاتكلمتي بهالطريقه انا قلت لك بطلقها بس مو اللحين انتي ليه ماتفهمين اهلي بيغضبون علي لو طلقتها اللحين ..
ملاك :اجل متى ..متى ..
الوليد :انتي ليه مستعجله اللحين .. مو حنا نقدر نشوف بعض نكلم بعض .. بدون مانخاف من احد ..
ملاك :من قال ماأخاف من احد انا اخاف خواتي يكشفوني اخاف ضحى تدري ..
الوليد :واذا درت اختك هي مو امك المفروض تكونين مرتاحه ماوراك احد يحاسبك ..
ملاك :بس انا ماني مرتاحه ..
الوليد :متى بشوفك ..
ملاك:مأدري اشوف بكره اذا ماكان عندنا اختبار جيت عند خالتي ..
سمعت صوت احد ينزل مع الدرج قفلت بالسرعه حتى قبل ماتودعه وفتحت درج الدولاب وحطت السماعه فيه .. وهي تصك الدرج جاها صوت سارا النعسان ..
سارا :وش تسوين ..
ملاك :ولاشي بس ماجاني نوم جلست احوس بالمطبخ ..
سارا :طيب انا ابي انام ..
ملاك :روحي نامي ..
سارا :يووووه اخاف تعالي معي ..
ملاك :اوكي امشي يابزر ..
ودزت سارا اللي تعثرت بمشيتها من النعاس ..
دخلوا غرفتهم .. اول ماحطت راسها على المخده بدت تفكر باللي كان ممكن يصير لو سارا دخلت عليها وهي للحين تكلم بالتلفون وش بتكون ردة فعلها بتنصدم تزعل وش بتسوي .. وهي نفسها وش بتقول لها بتصارحها اوبترفض انها تقولها الحقيقه وتقول انها امورها الخاصه .. بس سارا ماعمرها خبت عليها شي .. الا خبت عليها سبب اللي خلى جواد يفصخ الخطوبه ...ايه هي تدري ورفضت تقولها ومالها حق انها تحاسبها لأنها هي اللي بدت تخبي عني اسرارها .. اللي تسويه خطأ هي اللي كانت تمنع شهد من هالطريق بكل برود اللحين جالسه تمشي على طريق الضياع ليه تسوي بنفسها كذا وهي داريه عن نهاية هالطريق .. بس هي تحب الوليد تحبه تحبه تحبه تحبه تحبه تحبه تحبه تحبه تحبه ... موكلمه ترددها لاتحبه مشاعر تسيطر عليها تخلي اللي يتكلم عنها لسان ماهو لسانها اللي يفكر عنها عقل ماهو عقلها ..
كانت طالعه من بيت خالتها مصدومه تبكي معقوله الوليد تزوج بنت عمه .. الصدمه ذبحتها .. سارا كانت تدري وماخبرتها لاوكانوا معزومين على الملكه ياليتها درت ياليت كانت راحت وطربقتها على روسهم .. كلام مجرد كلام ماكانت تقدر تسوي شي وبصفتها مين .. لكن كان اهون من الصدمه اللي تلقتها الخبر نزل عليها مثل الصاعقه كانت تضحك وتستهبل مع ود لين قالت جملتها اللي ذبحتها ..
ود :الا تعالي لاتضيعين الموضوع ليش ماجيتوا بملكة عمي الوليد وانا اللي جالسه احتريكم خليتوني شماته للي يسوا واللي مايسوى ..
رددت الجمله وراها ببلاهه ..
ملاك :ملكة مين ..؟!
ود اللي استغربت النبره المخنوقه:ملكة عمي الوليد لاتقولين سارا ماقالت لك ..
ملاك :الوليد عمك ..
ود :ايه الوليد عمي اجل الوليد بن طلال ..
ملاك :ملكته ..
ود :ايه .. تصدقين حاسه انك بتسوين فيني مقلب ماأدري ليش بس انا .................
كلام كثير ماسمعته ملاك .. اللي سحبت عباتها وبدت تلبسها بعيون جامده واطراف ترتجف ..
ود :هي ملاك تعالي وين رايحه ... بنت تعالي ..
بس ملاك اول مافتحت الباب بدت تركض مخنوقه تبغى تبعد عن هالبيت بأي طريقه البيت هذا سبب شقاها هي وأختها دخلوه بنية استغلال اللي فيه وهذا هم يطلعون منه بالام وجراح اقوى من أي استغلال كانوا مفكرين فيه ..
تفكيرها صدمتها دموعها كل هالأشياء منعتها من شوف السياره اللي متوجهه لها ..
ود:ملا اك ..
انشلت حركتها بعد ماشافت السياره اللي متوجهه لها ووقفت على بعد ملي منها ..
جت ود اللي تركض وحطت يدها على كتف ملاك :ملاك وش صار ..
:وش فيكم ..؟!
ود:انت ليش مسرع كنت بتصدمها ..
الوليد :اه اسف ماشفتها ..
ورفع عينه لشباك اللي قدامه على طول وشافها تطالع مع الدريشه ..وبذاكرته صور متفرقه ليوم فيه كان يبكي من القهر لأنها مو قادر يوصل لها وحارمينه منها .. وصوره مثل الفلاش لساعات كان طاير فيها من الفرحه وهو يملك عليها .. وصوت يتردد صداه بأذنه : هو يحب يده وجه وقفى اني رضيت فيه بعد ماحفى وهو يجري وراي ..
مد يده بطريقه غبيه :الا ود ماعرفتينا على بعض ..
تحركت ملاك بعيد عنهم وكأنها متردد باللي بالتسويه وبنفس السرعه اللي كانت تركض فيها قبل كملت طريقها..
ود :وش فيك انت غبي .. وتقلد صوته :الا ود ماعرفتينا على بعض ..وين عايشين فيه حنا لاوماد يده ماأقول الا الحمدالله والشكر ..
بس الوليد ماكان معها كان يراقب طيف ملاك وهو يبتعد بخطوات متعثره ..
الوليد :وش فيها كانت تبكي بعدين وش كل هالركض ماأكل انا..
ود :قليل ادب ليه تناظر فيها ..
الوليد :انا ماناظرت هي اللي فاتشه وجها ... الا صحيح من هذي ..
ود :وانت وش دخلك ..
الوليد :يالله ود لاتكوني عبيطه قولي من هذي .. ولا اقول اركبي بمشيك ..
ود :تمشيني كذا وانا مو لابسه عبايه انت من تزوجت هالمتخلفه وانت مو صاحي ..
الوليد بعصبيه :ووووود ..
ود :لاتصارخ ترى ماأقولك من هذي .. وجلست تسويله حركات بحواجبها ..
الوليد :وش اسمها ..
ود :ملاك .. صح وهي ملاك ..
الوليد :يعني مو مره ..
ود اللي انقهرت منه :اوووووف مالت عليك بس اذا هذي مو ملاك اجل من الملاك شووقوه الصوماليه ..
الوليد وعينه للحين على الشباك اللي طيفها وراه:قربيني منها ولك اللي تبين ..
ود :وش اقربك قسم بالله انك مو صاحي انت عم انت ..
ولفت بتروح عنه .. بس الوليد سحبها مع يدها ..
الوليد :تعالي ودووده .. موانتي ماتحبين الشوق ..خلاص عرفيني على ملاك يمكن احبها واترك شوق وتزوجها ..
ود بنظرة أستخفاف :شايفين هنديه قدامك تلعب عليها ..اقول ابعد بس واذا حاولت تقرب من قريبات جدتي شيماء بخبر عليك ابوي ..
وابعدت عنه بالسرعه .. بس هو ماأبعد الفكره عن راسه ولاراح يبعدها..

((5))

ضحى

سخلت الشمس وانا واقف ادق الباب .. انا ماأدري متى خواتي بيبطلوا حركات العجز هذي عنهم ..
شدن :ماما اظربيهم لفتحوا الباب ..
ضحى :خليهم يفتحونه بالأول وابوك هذا اللي مامنه فايده رمانا وراح ..
شدن :عديم مسئوليه ..
صادقه ياشدن عديم مسئوليه وياليته ماكان كذا .. كان انحلت كل مشاكلنا ..
انفتح الباب وطل وجه وعد من وراه ..
وعد بالصرخه :ضحىىىىىىىىىىىىىىىىىىىىىىىىىىىىىىىىىىىىىىىىىىىىى ..
صرخه صدمتني واللي صدمني اكثر احتضانها لي ..
وعد :انتي يادبى ليش اسبوع كامل ماتجنيا خليتينا لحالنا ..
ضحى :اسفه انشغلت شوي ..
ومع مشاعر وعد اللي صدمتني تحسفت اني اهاوشها ..
ضحى :وين خواتك ..
وعد :انا ودي افهم ليه معلمات الرياضيات عليهم اسأله ماأدري كيف جايه ..
ضحى :ليش وش فيه سؤالي..
وعد :يعني خواتي خوات الفقر والعوزه والحاجه وين بيدجن وهن مفلسات ..
شدن :يمكن يروحن باريس ..
وعد :ياخفة دمك انتي من كثر ماتجلسين مع عسافوه الأقشر طلعتي عليه ..
دخلت ولقيت خوات الفقر على قولة وعد تاركات دراستهن وجالسات على التلفزيون .. اصلا انا ماجيت لهن اليوم الا وانا داريه انهن بيقضن يوم الخميس باللعب والكلام الفاضي ..
بعد السلام ..
ملاك :شهد قومي سوي قهوه ..
شهد :احلفي انتي بس .. انتي الكبيره يعني انتي اللي تقومين تسوين قهوه ..
سارا :لاحبيبتي ماحزرتي هي الكبيره يعني هي تأمر وانتي وخواتك تنفذون ..
هند :الحمدالله انا ماأعرف اسوي .. واللي اسويه ماتحبونه ...
شوق :خلاص انا اقوم اسوي ..
ضحى :ماشاءالله وانتم كل مازاركم احد بتجلس تعازمون كذا من تسوي القهوه ..
ملاك :لاوش دعوى بس قدام اللي انمون عليهم مثلك يعني ..
ضحى :عاد انتم ياكثر ماتمونون على الناس ..
سارا :تونا نقول بسم الله بديتي بالنصايح ..
رديت عليها وانا افصخ عباتي ..
ضحى :بلا هرج فاضي ويالله .. كل وحده تفتح شنطتها تشوف وش فيها ..
صرخات الأستنكار وصياح التمرد .. ايش... لا .. حرام ...اليوم الخميس ..
ضحى :اصلا انتم مافرقت معكم يوم بوسط الأسبوع او اجازه كل ايامكم قاضينها لعب وهبال .. يالله انا ماجيت اليوم الا عشان اخليكم تذاكرون ..
وعد :ضحى حرام عليك تونا بداية السنه والله لو انا صعايده مابدينا نذاكر من اللحين ..
ضحى :انتم ماينفع معك لامذاكره بداية السنه ولا باخره .. جربي مره تصيرين شاطره وتذاكرين كل درسه بوقته ...
ضحى :يالله تفرقين كل وحده تروح لها بجهه وتذاكر وأنا بدور عليكن واشوفكن ..
قامن كلهن الا سارا وملاك اللي مبحلقات بالتلفزيون ..
ضحى :هييي ياحلوات الكلام لكن انتن بعد ولانسيتن انكن تدرسن ..
ملاك :لامانسينا بس حنا ذاكرنا وخلصنا ..صح سارا ..
سارا :ايه صح ذاكرنا ..
سألتهن بالشك .. معقوله يعني ذاكرن ..
ضحى :متأكدات ..
ملاك :قسم بالله اجل وش تحسبين ..
ضحى :والله اجل جيبي اشوف كتابك الرياضيات بكتب لك اسأله فيه ..
سارا :بس حناماذاكرنا رياضيات ...
ضحى :والله ومتى بتذاكرنها ان شاءالله ..
ملاك :بكره ان شاءالله الجمعه بنذاكر رياضيات صح سارا حنا مرتبين جدول للمذاكره اصلا ..
ضحى :طيب جيبي كتاب العلوم بكتب لكم اسأله منه ..
ملاك بتردد :علوم .. لاعلوم صعب ومافهمناه ويوم السبت بنسأل المعلمه عن اللي مافهمناه عشان هي بتعطينا مراجعه ..
ضحى :والله بديت اشك انكم ماذاكرتوا وجالسين تكذبون علي ..
صرخت ملاك ..
ملاك :حرام عليك اللحين اقسم لك بالله وانا اكذب كيف تجي ذي صح اني داجه بس ماأحلف كذب ..
سارا :تعجبني توأمي داجه بس باخلاق ..
ملاك :اكيد طالعه عليك توأمي العزيز ..
سارا :العزيز توأمك احلفي توني ادري ...
ملاك :ولا أنا كنت ادري ..
سارا :اجل كيف دريتي ..
ملاك :توه جاني الألهام منك انا العزيز توأمني ..
ضحى :انتن ماتملن من السخافات اللي تجلسن ترددنها هذي ..
سارا :بالنسبه لي الجواب هو لا ..
ملاك :وبالنسبه لي لا هو الجواب ..
سارا :تدرين ملاك ياعزيزتي وش اللي يعجبني فيك ..
ملاك:وش ياتوأمي العزيز ...
سارا :انا اول مانذاكر درس تجين تطبقينه بالواقع ..
ضحى :ووش الدرس اللي ذاكرتوه وطبقته اختك بالواقع ..
سارا :درس القواعد تقديم المبتدأ وتأخير الخبر ..
ضحى :والله درس تقديم المبتدأ وتأخير الخبر .. من أي موضوع ذاي لقاطتها ..
سارا :وش قصدك ..

**Loli.** · 25-07-2011, 08:19 AM

رد: بلا رقيب / لعاشقه ديرتها ، كاملة

ضحى :قصدي انك حافظه العنوان بس وانا مندهشه كيف حفظتيه وانتي مو داريه وش الكلام اللي تحته ..
سارا :اصلا المفروض انك تصفققين لي وتجيبين لي هديه عشاني حافظه العنوان المعقد ذا المفروض هذا يحطونه سؤال بمسابقه اللي يكرره خمس مرات بالسرعه وورى بعض يأخذ جائزه ..
قالت شوق اللي دخلت علينا ومعها صينية القهوه ..
شوق :كرريها انتي خمس مرات وانا اعطيك الهديه ..
ملاك:والله ووش الهديه اللي بتعطينها ماتصلح لي..
سارا :لا هذي الهديه لي ..
شوق :لا المجال مفتوح للي يبي يشارك ..
سارا :لاظلم انا وبس انا اللي اقترحت الفكره ..
ملاك :لوصارت المسابقه لك تحكمي هذي مسابقة شوق ..
سارا :حرام عليك والله انا اللي جبت الأقتراح مسابقتي ماهي مسابقة شوق ..
ضحى :اقول انثبري انتي وياها بس لامسابقه ولاخرابيط .. وانتي اتركي القهوه انا اعرف اقهوي نفسي .. ورحي ذاكري ..
شوق :لاوين اذاكر والعشاء ..
ضحى :العشاء انا اسويه .. يالله روحي ذاكري .. وانتن ممكن تنازلن وتقولن وش الماده اللي ذاكرتنها عشان اسألكن فيها ..
طالعن بعض .. والله اني كنت عارفه ان ذولي ماهن وجه مذاكره ..
سارا :ذاكرنا ا ..
ضحى :ايه ذاكرتن .. ايش ..؟!
سارا بالسرعه :مطالعه ..
ضحى :ايش مطالعه ..
ملاك :ايه مطالعه لاتجلسين تمسخرين فيها الوزاره ماحطتها من فراغ اكيد انها ماده مهمه ..
سارا :تصوري انك ماتعرفين تقرأين كان صرتي معلمة الرياضيات ..
ملاك :صادقه سارا شفتي وش اهمية المطالعه ..
حقرتهن ورجعت اسألهن ..
ضحى :ووش غيرها ذاكرتن ..؟!
ملاك :ولاشي لأن اليوم يوم مذاكرة المطالعه ..
ضحى :لاياشيخه وفرحانه بنفسك وانتي تقولينها ومن الصبح صراخ وحلوف واخرتها مذاكرات مطالعه .. انقلعن عن وجهي روحن ذاكرن بس مو تروحن تذاكرن فنيه ولا املاء وتقولن ذاكرنا ..
وقامن وهن يسحبن رجولهن انا ودي افهم ليش هالجيل فاشل ..وبالذات هالخوات اللي هن احوج الناس لدراسه والشهاده .. مقضيات حياتهن لعب وهبال واخر تفكيرهن بالدراسه وكأنهن بنات عز ماذاقن الجوع ولايخافن بيوم يذوقنه ..

تحياتي للجميع
عاشقة ديرتها

**Loli.** · 25-07-2011, 08:20 AM

رد: بلا رقيب / لعاشقه ديرتها ، كاملة

الحلقه السابعه والثلاثون ..

[1]

(..ياشقاءي..)

ضحى

نزلت الدفتر اللي كنت اصححه من يدي وطلعت للحوش اشوف وش سالفة هاللي يدق الجرس ..
سألت من ورى الباب ..
ضحى :مين ..
منير :أفتحوا انا منير ..
بعد مافتحت الباب .. غصبت نفسي اهدي اعصابي المنفعله وماطلع حرتي بالمسكين منير ..
ضحى :هلا منير ادخل ..
ووقفت احتريه يدخل بقوله انا خواتي ماهن فاضيات للعب معه وراهن مذاكره ..
دخل بس لحضه من هذي اللي معه ......ام كايد ...!!!!
ضحى :اهلين خالتي ام كايد حياك الله تفضلي ...
ام كايد :ياهلا فيتس وش اخبارتس انتي وخواتس يابنيتي ..
ضحى :الحمدالله طيبين تفضلي ..
ام كايد :زاد فضلك يابنيتي ..رح ياوليدي الله يستر عليك بس لاتبعد عشان ترجعني للبيت ..
منير :ان شاءالله يمه ..
دخلت ومعي ام كايد اللي مستغربه زيارتها...
بعد ماقهويتها وكنت انتظر تقولي سبب هالزياره ..... اللي صدمني بجد ...
جايه تخطب سارا سارا للولدها قيس عاد مالقت لقيس غير سارا ...
ضحى :بس هاللي تطلبينه مستحيل ياخالتي .. سارا ابد ماتصلح للقيس ..
ام كايد :وشلون ماتصلح له يابنيتي هذا اللي اتفقنا عليه انا وجدتس الله يرحمها ...
ضحى :جدتي الله يرحمها ومافيه شي اسمه اتفقتم عليه ..
ام كايد :يابنيتي لاتقطعين نصيب اختس ..
اقطع نصيب اختي انا اقطع نصيب سارا ... اصلا سارا مستحيل ترضى تعرفون وش معنى مستحيل ..
ضحى :وليه اقطع نصيبها اصلا هي بنفسها بترفض ..
ام كايد :المهم تشاورينها ولاتنسين ان هذي رغبة جدتس الله يرحمها ..
معقوله اشاور سارا بقيس مجنونه انا لو سويت كذا عشان تنهبل علي اختي ..
شفت ام كايد توقف بتعب ..
ضحى :وين ياخالتي تو الناس ..
ام كايد :ماعليش يابنتي مستعجله امركم مرة ثانيه ولاتنسين تفكرين زين وانتي بنات ومالكن والي خلي خواتك يروحن بنصيبهن ترى ماهو كل مره بيجيكم خطاب ..مع السلامه ..
ضحى :فمان الله ..
مع اني انفعلت بس حافظت على هدؤي لين طلعت من البيت .. وش قصدها بكلامها ومالكن والي .. والينا الله وهو نعم الوالي .. وش يعني بدون رجال بنضيع الحمدالله هذاحنا عايشين واحسن عيشه وماحفظات على انفسنا احسن بكثير من ملايين وراهن رجال ومسويات البلاوي ..
قيس يخطب سارا اكيد هذي نكتة الموسم ياحليلك ياأم كايد شكلك بالغصب بتزوجين ولدك ..
شدن :ماما خلصت مذاكره اروح اشوف وعد تذاكر او لا ..
ضحى :لاحبيبتي انا اروح بنفسي اشوف ..
شدن:لابليز ماما بروح انا ..
ضحى :شدن خلاص لوبغيت اروح انا بروح بنفسي ..
شدن :طيب لاتصرخين ..
طالعتها بأستغراب وش عندها البنت ..
ضحى :شدن بلاطولة لسان ..
شدن :انتي لاتصرخين علي عشان ماأطول لساني ..
مأدري وش صابني وخلاني اظربها كف تندمت عليه بالسرعه ..
يوم طالعتني شدن بنظرة مصدومه وراحت تركض من عندي وهي تبكي ..
ياربي ماأدري وش فيني هاليوم متوتره بقوه واحس ماني قادره احافظ على هدؤي ..
ضحى :اوووووووووووووووف ..
شديت على اصابعي اللي احسها ترتجف معقوله اللي افكر فيه معقوله اكون حامل .. لامستحيل مستحيل يارررررب ماني ناقصه مصايب وحملي مصيبه خلاص كفايه المصايب اللي عشتها بحياتي ...
ماني مستعده اعيش مؤساه جديد بوصول طفل جديد للحياه .. مستحيل اربط نفسي بعساف ..
اللي ماراح يتواني بأقرب فرصه يتركني انا وبنتي ولو سمح الله المولد الجديد وكأنا شي ماكان بحياته ...
سواها مبارك قبله وسواها هو مع عمتي ومع شدن وماراح يردعه شي انه يسويها معي ومع مولود جديد له ..
ياربي اتوسل لك يارب مايكون شكي بمحله ... ولوكان صدق وأنا حامل يارب يموووووووت يارب يموووووووووت قبل مايعيش حياة الضيم اللي تنتظره .. اه ياشقاي ... ياشقاي ..
وش هالحياه اللي بيلقاها ولدي هم بهم واول شخص بيتضرره منه امه اللي ماتقدر تعطيه من الأمومه شي ..
يالناس الهم شيبني .. الهم بيذبحني ..
انا ماني قادره اذوق الراحه .. وظيفتي من جهه ومشاكلي مع الطالبات والأداره اللي ماتنتهي .. وعساف اللي ماني قادره اتقبله رغم كل محاولاته المستميته انه يكسب رضاي ومحاولاتي وتصبري .. بس ماني قادره اتقبله النفس عايفته ..ومن جهه خواتي وأنا بعيده عنهن كل تفكيري فيهن وبمصايبهن اللي يسوونها والخطر اللي ممكن يتعرضن له ... خواتي بنات ولوحدهم كوابيس تجيني عنهن تحرم عيني النوم .. ضغط وضغط وضغط .. كل شي حولي يضغط علي وهالكابوس الجديد اللي له ليالي حارم عيني النوم ..

[2]

(..سارا والسر الحزين ..)

سارا

طالعت ب ملاك اللي جالسه تذاكر بأندماج وتاركتني اعاني الوحده مع كتاب العلوم .. كورت قطعه من ورقه شقيتها من أخر الكتاب .. ورميتها فيها ..بس البنت ولاداريه .. رميتها بوحده ثانيه والبنت ولاهي معي ..
بديت اشك انها ماتذاكر بس البنت جالسه تكتب وواضح عليها انها تذاكر ولا الواحد ليه يحك جبهته الا اذا كان يفكر واللي يفكر اكيد يذاكر ..
صرخت ..
سارا :ملا اك ...
رفعت ملاك راسها بالسرعه ..
ملاك :وش فيه ..؟!
سارا :قومي يالخبله كنتي بتموتين وانتي مو داريه ..
انخطف لون وجها وواضح عليها الروعه ..
ملاك :ليش وش صار ..؟

**Loli.** · 25-07-2011, 08:21 AM

رد: بلا رقيب / لعاشقه ديرتها ، كاملة

سارا :وتسأليني بعد وش صاير ماتشوفين نفسك وش مسويه لايكون ناويه بس تنتحرين.. غبيه انتي حنا ماصدقنا ان نوف تسنى هالخبال عنها طلعتي لنا انتي ..
ملاك :سارا وش سويت انا حرام عليك جننتيني والله ماكنت اقصد ..
سارا :كل هذا وماتقصدين اجل لو تقصدين وش كنتي بتسوين ..
ملاك :سارررررا قوووولي وش سويت والله كنت سرحانه ماني حاسه بعمري ..
ياويلي من هالبنت وش اللي سرحانه كيف تخش المخ هذي اللي كانت تسويه مايدل على انها سرحانه ...
سارا :كيف تقولين سرحانه وانتي كنتي تذاكرين ..
ملاك :طيب ..
سارا :واللي يشوفك وانتي تذاكرين بالأندماج ذاك يخاف عليك من سكته دماغيه تودي بحياتك ...
ملاك :ياحيوانه اللحين هذا اللي كنتي تقصدينه .. انتي متى بتعقلين خرعتيني وطيحتي قلبي واخرتها تودي بحياتك ...
سارا:ياحياتي من حقي اخاف عليك انتي من متى ماذاكرتي بهالطريقه بجيك شد عصبي مثل الشد العضلي اللي يجي اللاعبين ...
ملاك :تستهبيلين انتي ووجهلك ..
سارا :لا انا ووجهي نستهبل .... يالله عاد ملوكه شكلك غلط وانتي جالسه تذاكرين خلينا نسولف ..
ملاك :نسولف عن ايش ..
سارا :عن أي شي مثل مالاحظتي ان ضحى صايره بطه ..
ملاك :أيه صح سمينه صايره ..
سارا:شفتي طلع عندنا شي نسولف عنه ..
ملاك :طيب لحضه خليني اكمل تعليقي ..
سارا :لاخلينا ندور سالفه ثانيه ..
ملاك :انتي بس تبين تفتحين مواضيع بس ..
سارا :اكيد نضيع فيها ووقت ..
اووووف ليه احس ملاك ماهي معي .. ليه تناظر وراي وماتناظر في ..
سارا :ملاك وبعدين الله يلعن الدراسه هذي اللي سوت فيك كذا ..
ملاك :هي انتي مصدقه ان اللي فيني من الدراسه ..
سارا :اجل يوم انه ماهو من الدراسه من أيش ..؟!
من يوم تغيرت ملامح وجها عرفت عن ايش ياربي حنا ماخلصنا من هالموضوع ..
ملاك :الوليد .. سارا اشتقت له احبه والله احبه ..
قلت لها بأنفعال وبقهر من هالوليد اللي ماكل عقلها .. والله اني فرحت يوم تزوج قلت بتنساه مثل مانسيت جابر يوم تزوج بس طلعت غبيه متخلفه يالناس واحد ماتعرفه بس تشوفه من بعيد لبعيد وش تحب فيه ...
سارا :حبتك القراده ان شاءالله .. غبيه انتي وش تبغين فيه .. خليك مثلي يوم تزوج جابر قلت بلعنه اللي خلاني احبه يخليني احبه غيره...
ملاك :يووووه سارا بس انا مو مثلك انا احبه صدق قلبي احسه بيطلع من مكانه من كثر مايدق لطرى علي ..
سارا :يووووه منك ومن سوالفك السامجه ..اللحين انتي وش مستفيده من حبه على قولتك بس متعبه نفسك وهو ولاداري عنك ..
ملاك:وانتي وش كنتي مستفيده من حبك لجابر..
سارا:استفدت اني اضيع وقتي ..
ملاك :الحب مو بكيف الواحد ..
سارا :بس انا كان بكيفي ..
ملاك:لأنك ماكنتي تحبينه وذاك كان مجرد لعب ..
سارا:واللي تسوينه انتي وشو مو لعب ..
ملاك :لامو لعب والله انا احبه قلبي كذا يحبه ..سارا توقعين يعني انا فيني شي يخلي الواحد يحبني .....
ياربي وش تقول هالخبله .. وانا وش دراني انا اختها وتوأمها ماأصلح احكم عليها لأني ماأعرف كيف الناس يشوفونها وبالنسبه لي كنت بحبها لو حلوه لو شينه لودمها ثقيل لو خفيف شو ماكانت عليه بحبها ..
ملاك :كل هذا تفكير بسؤالي خلاص عرفت الجواب ..
سارا :وش اللي عرفتيه انا ماقلت شي ..
ملاك :خمنت ..
سارا :ماشاءالله خمنتي وين هالشطاره عن الدراسه ..
ملاك :........
سارا:ياشينك وانتي جديه .. اصلا الواحد المفروض يقتنع نفسه مثل ماهو ..يعني لو كنتي شينه ووشيفه ووجهك ماينظر فيه المفروض تحمدين ربك لأنه احتمال فينه ناس اشين منك وشيف اكثر منك ...
ملاك :ابعدي هناك يالحكيمه ...
رجعت على ورى خطوتين ..
سارا :هنا قصدك ..
ملاك :وش اللي هنا ..
سارا :ابعد ..
ملاك :سارا اذا تعبتي من الهبال والأستخفاف تعاليلي ..
وطلعت من الغرفه وانا فاتحه فمي وش عندها الجديه تنافخ ..
طنشتها وفتحت الدريشه وجلست اتفرج على خلق ربي ...
من بين المناظر اللي شفتها طاحت عيني على واحد يظرب أخته كانوا صغار مره تقريبا الولد مايتعدى عمره الست سنين واخته اصغر منه بالسنه ثنتين .. بس كان يظربها بقوه ومن قلب كان ماسكها مع شعرها ويهزها ويعطيها كفوف ..اهتز قلبي من هذا المنظر تذكرت بيوم كنت انا بهالموقف انا اللي كنت اخذ هالعلقات وياليتها من اخوي كان اهون كانت من شخص غريب .. ياليت كان عندي اخو يظربني اذا بيدافع عني اذا مد علي غريب يده ..اه انا وش فيني بديت اهوجس بايام راحت الله لايردها.. اللحين ماأحد يسترجي يمد يده علي ولاحتى الوحش بذات نفسه .. لأني قويه اقوى من قبل بكثير واقسى مايكسرني أي شي ..
هذا القرار اللي اتخذته من بعد ذاك الموقف اللي انكشفت لي فيها حقيقة نفسي ماتوقعت بيوم ان لعبي بينقلب علي وبدال ماألعب انا على جواد هو يلعب علي جرحني ذاك الرفض مع انه ماكان يعني لي أي شي الا خطوبه مؤقت عاجلا ام اجلا بتنفض بس ماهو بذيك الطريقه ولامن طرفه هو يجي الرفض بس انا استاهل هو معه الحق كل الحق انا ماكنت استحق اتزوجه ابدا والمفروض ماقبلت فكرة ملاك واصريت على رفضي للموضوع .. وهذا الشي اللي خلاني ارجع للمدرسه بدرس وبنجح وبأخذ شهاده ماراح اسمح لأحد مره ثانيه يشوف نفسه احسن مني.. للحين اتذكر صدى صوته يردد :موكفايه رضيت فيك وانتي شبه أميه تطلعين بعد .......... ,, انتي كيف مجرد تفكير انك تسوين هالشي وانتي عارفه ان اسمك بينربط بأسمي بيوم من الأيام .. بس غلطتي اللي رضيت اوطي نفسي لوحده من شاكلتك ..

[3]

(..حينما تضحك ميشو ..)

ميشو

كم تضحكني هذه الحماقات التي ترددها سارا وملاك على مسمع ضحى ..
سارا :طيب انتي جربي وش خاسره بس مره تكفين ضحى ..
ضحى :سارا ضفي وجهك عني ..
ملاك :اللحين انتي جايه تجلسين معنا ولاجايه تقلبين بأوراقك ..
لم تجبهما ضحى لأنها كانت مشغوله بالأوراق امامها اضنها تخوض معركة وضع اسئلة الأمتحانات التي اظنها تعشقها ...
ملاك :بهوينك لايطير الورق ..
سارا :الاصدق ضحى انتي مارحتي مع شدن اول يوم بالمدرسه ..
ملاك :ياعزي عنك شدونه رحتي لحالك منينه ..
شدن :منينه بعينك .. ياهبلا انا كبيره لو تحطوني بالعليا وتروحون وتخلوني تجون تلقوني سابقتكم على البيت ..
سارا بتصفير :اعقب ياداني ..
ملاك :من داني هذا يالخاينه بتخوني حبي الكبير ..
سارا :الله يلعن ابليسك يالخبله تكلمين كذا قدام امك صدق ان بنات اليوم مافيهم خير ..
ملاك :يالهوي هو انتي شفتي بنات امس عشان تكلمين عن بنات اليوم تصدقين يقولون انهن اصيع منا على الأقل حنا تربيت افلام اجنبيه هم تربيت افلام عربيه يعني ..
سارا :عارفه فساد ..
توقفا عن ذالك لاتخرجا عن محور الحديث اجيبي سارا من هو داني ..
ملاك :بسم الله عليك يالعاقله ..
سارا:بكل فخر ..
ملاك :صدقتي ..
سارا :لاجالسه احاول بس يقول يتعثر الحصول على الصفحه ..
ملاك :انا من زمان قايله غير مخك هذا الظارب بس انتي ماطعتيني ...
اجابتها سارا بلهجه يائسه ..
سارا :وش اسوي يأختي مالقيت له قطع غيار تناسبه ..
ميشو :استغفرا ربكما ماهذا الحديث ..
ملاك :والله انك صادقه استغفرالله وش قاعدين نقول ..
وعد :وخروا عن كتاب القواعد مسويه فيها متدينه ..
سارا :اموت واعرف وش سر العداوه بينكن ..

**Loli.** · 25-07-2011, 08:22 AM

رد: بلا رقيب / لعاشقه ديرتها ، كاملة

ملاك :هي انتي العبي باللي عندك وانتي ساكته ..ترى ماأسمح لك تغلطين على ميشو ..
ياعزيزتي .. جيد هناك من يدافع عني ..
وعد :وععع اموت واعرف وش تحبون فيها ..
سارا :أنتي كل ماجلست معنا ميشو كررتي هالجمله ترى القراء صاروا يعرفونها قبل ماتكتبها عاشقه ...
ملاك :ضحى تكفييييييين ..
سارا :ايش ..
ملاك :نبيها ترقص لنا نسيتي ...
ميشو :ههههههههههههههههههههههههههههههههههههههههههههههههه هههههههههههههههههههههه ههههههههههههههههههههههههههههههههههههههههه ..
يألهي لأستطيع تخيل ذالك ضحى ترقص هوو مايقاد ..
سارا :يالناس ياعيني ياقلبي ..
وسجدت على الأرض بأتجاه القبله ..
ورفعت يديها لسماء ...
سارا :اشكرك يارب اللهم لك الحمدوأخيرا شفت ميشو تضحك ..
ميشو :توقفي عن ذالك .. ولماذا لاأضحك ..
سارا :بكل صراحه شكلك مايوحي انك تضحكين ..
ملاك :يازين يوحي من فمك ياحياتي ..
تنهدت سارا ويدها على قلبها ثم القت نفسها في احضان ملاك ..
سارا :احبك انا .. اعشقك انا .. مغرمه انا ...
ملاك :بتحبني انا .. تعشقني انا .. مغرمه هيا ...
سارا وملاك :وبحبك مووت ..
تسألت شهد التي كانت تستمع بلعب الورق مع وعد ونواف وهند :وش هالأغنيه اول مره اسمعها ..
نواف :ياهبلا هذي من تأليفهن ..
ملاك :سارا قومي نرقص شكل محد راقص لنا ..
وقفت سارا وهي تتمايل تحت انغام وهميه ..
ملاك :وياحبيلللله ياحبيللللللله ياحبيللللله سارونا المزيونه ياحبيلللللللله ..رقصه وحده رقصه ثنينه رقصه ثلاثه ..
سارا تتراقص بهزه مقصوده وأخرى للسرقة الضحك من افواهنا ..
سارا :خلاص اوووووف تعبت ..
وارتمت على الأرض ..
ملاك :ياويلي على خصرك انكسر من كثر الهز ...
سارا :شفتي كيف انا فدائيه .. ضحيت بخصري عشان اضحكم ..
رنين هاتفي الجوال قاطع حديثهن الممتع تاره وتافهه تارة اخرى ..
ميشو :مرحبا سوسو .. كيف حالك ياعزيزتي .. اجل لابأس انتظريني دقائق وسأخرج اليكي ..
ملاك :لاميشو تكفين وين بتطسين خليك معنا ..
ميشو :بأعتقادي لو انتظرت اكثر لطلبتي انتي مني المغادره ..
سارا :افا والله توقعين اسويها .. مستحيل دنا اموت واتابع برنامج ثقافي مباشر بدون شاشات ...
لأعلم مالذي استشفته من نظراتي .. حتى تصرخ ملاك ..
ملاك :خلاص ميشو روحي هذي خبله ماتعرف تمسك لسانها بليز مانبي نخش مراكز شرطه اليوم ...
ميشو :لابأس سأعفيها هذه المره من دخول مراكز الشرطه فقط لأنها شقيقتي ..
انسحبت من بينهم بهدؤ وسط صخبهم المعتاد ترافقني نظرات ضحى الحاده .. افتقدت هذه النظرات منذ وفاة جدتي ...
تزامن فتحي للباب الشارع مع خروج ذالك المتعجرف بوجهي تراجع الا الوراء وعيناه تحدقان بعيناي التي سرعان ماأرخيتها حينما قال ..
عساف :خلف تعال وانا عمك ...
لأعلم كيف سيطرت على نظراتي لاأرغب برؤيته .. اما الان بعد ماأستقريت بالسياره واصبح بمقدوري رأيته من دون ان يراني لم اتانى عن فعل ذالك خصوصا وانه وقف ينظر الي او بالأحرى الى السياره التي صعدتها ..
..
سوسو :اوب اوب خلف وش يسوي عندكم ..
ميشو :وماأدراني ياعزيزتي خرجت لأجد هذا الموقف لم يكن من صنع يدي ..
سوسو :طيب ليش العصبيه ؟؟
ميشو :لاشيء أخبريني اين سنذهب ..
سوسو :ياويلي عن اخوي طلعنا من الشارع كله وهو للحين يناظر ..
ميشو :حقا .. اخبريني ماذا حدث للتضاريسه ..
طالعتني سوسو بالدهشه .. تحولت لضحكه صاخبه بعدما استطاعت الربط بين مقصدي واسم خطيبة شقيقها ...
سوسو :ههههههههههههههههههههههههههههههههههههههههههههههههه ههههههههههههه هههههههههههههههههههههههههههههههههههههههههههههههههه ه ههههههههههههههههههههههههههههههههههههههههههههه ...
بأبتسامه لم تفارقني اليوم نهرتها ..
ميشو :توقفي عن ذالك تبدين مضحكه ..
سوسو :اه ميشو انتي فضيعه توحفه بجد اه هههه ولاتضاريس ياربيه عليك ...
ميشو :حسنا ماأخر الأحداث ..
سوسو :اخر الأحداث ان الحلوه تدلع تقول ماتبي تزوج الا بالأجازه بين الترمين .. الحلوه تحسب اخوي فاضي لدلعها ماتدري انها متزوجها تسد المكان الفاضي ...
ميشو :يال بذئة لسانك ..
سوسو :هع اعجب انك ..
ميشو :يألهي وكأني اطريتك ..!!
سوسو :يأختي هذي مدحه بهاليومين .. الا صح كل عام وانتي بخير قبل الزحمه ..
فهمت ماتقصده الشهر الفضيل ولكنه لايزال هناك اسبوع يفصلنا عنه ..
ميشو :بعد اسبوع استقبل التهاني وليس الان ..
سوسو :لاحياتي انا قلت لك قبل الزحمه يعني قبل الزحمه ماراح اهنيك فيه مره ثانيه ..
ميشو :انا بغنى عن تهانيك ياعزيزتي ..
سوسو :وععععع لاتطرينها ..
من .. انا لم اتحدث عن؟! .. احد هل اصيبت بالجنون..!! سوسو هذه ..!!
ميشو :انا لم اتحدث عن احد ..؟!
سوسو :مو تقولين تهاني ذكرتيني ..
اجل تهاني زوجة او بالأحرى طليقة اخيها والفضل لدهائي الم تكن السارقه ..كلا لم تكن هي عبير من كانت السارقه مابالي هل اصيب عقلي بخلل ما .. يألهي انا اعترف صورته لاتفارق مخيلتي ..اه يال جمال ذالك الطيف الواقف بثقه التفكير بروعته يكاد يفقدني ماتبقى من صحه في عقلي ..
توقفت سوسو عن ثرثرتها التي لامثيل لها سوى عند سارا وملاك ..

**Loli.** · 25-07-2011, 08:22 AM

رد: بلا رقيب / لعاشقه ديرتها ، كاملة

سوسو :وش فيك ميشو مش معي ..
ميشو :انا بالتأكيد لا اكملي حديثك ياعزيزتي ..
سوسو :وش اكمل ترى انا مو غبيه افهم اذا الواحد معي بالسالفه او لا وانتي واضح انك غارقه لشوشتك تفكرين واكيد تفكرين بواحد ...
ميشو :انتي محقه افكر بشقيقك ..
ميشو :مالك ..
ميشو :كلا .. خلف ..
ميشو :اوف اوف تطورنا قبل كل ماسألتك قلتي مالك واللحين قلبتي على خلف بس وش عندك تفكرين فيه ..
أجبتها بكل براءه ..
ميشو :اكتشفت اني احبه ..
حبست سوسو انفاسها ثم القت بنفسها الى الوراء بخيبة أمل ..
سوسو :هذا اللي كانت خايفه منه .. مو قلت لك .. هذا خلف لاتفرطين فيه اللحين لو تموتين ماراح يرجع يفكر فيك ..
حسنا حسنا اقر بأنك تحدثتي عن ذالك .. ولكن نحن باليوم والحديث عن الأمس لايجدي .. اغيثيني ياسوسو انا في ورطه لقد علقني شقيقك بشباكه ثم رماني .. يال الغبيه صدقوني ستصدقني ...!!!!

**Loli.** · 25-07-2011, 08:23 AM

رد: بلا رقيب / لعاشقه ديرتها ، كاملة

[4]

(.. الحنونه ..)

عساف

سحبت خلف اللي ماهو راضي يدخل وعيونه على السياره ...
عساف :انت متى بتبطل حركات المراهقين هذي عنك خلاص دجت الله لايردها ..
خلف :عساف تكفى لاتدعي ..
عساف :ياويلي عليك ياأبو قلب تعبان انت ادخل .. ادخل .. لأذبحك واذبح نفسي وراك ..لأنا نستاهل الذبح ...
رد علي بضحكه مرضانه مثل خشته ..
خلف بضحكه :انت تستاهل الذبح ولاذابح عمرك عشان معلمه انا لاسمعت طاري مدرسه حسيت اني برجع اللي اكلت ..
مألومه ماعاشه معها ماشاف عنادها قسوتها وحنانها اه من حنانها .. ولاكان ماقال هالشي ..
عساف :انثبر هنا بروح اجيب لنا قهوه ..
طلعت من عنده ودقيت عليها اول مانفتح الخط قلت ..
عساف :جيبوا لنا بالمجلس قهوه وشاهي عندي رجال.. وقفلت ..
كنت بموت واسمع صوتها بس لا انا لازم اقوي نفسي لازم اترك هالضعف عني ولا بكون ضحيتها ..
رجعت لخلف اللي استقبلني بطاريها حتى قبل مأجلس والغيض واضح بالصوته ..
خلف :انت ماهو تقول انها قويه ومشيه خواتها على الصراط المستقيم ليش ماتوقفها هي بعد عن حدها ..
قلت استدرجه .. وأنا متلهف على الضحك ..
عساف :هي مين ..؟!
خلف :مشاعل ..
يالناس تعالوا شوفه انتم كيف يقولها مشاعل وكأنه خايف على الحروف من لسانه يكسرها ..
عساف :مشاعل ...ههههههههههههههههههههههههههههههههههههههههههههههه هههههههه ههههههههههههههههههههههههههههههههههههههههه ...
انفتح الباب علينا بقوه ... خلتنا نسكت غصب ..
دخلت علينا وعد افندي وبيدها صينية القهوه نزلتها بقوه قدامي ..
عساف :خير ان شاءالله ماتعرفين تقولين السلام عليكم وانتي داخله ...
طيرت عيونها فيني ..
وعد :لايكون تدرس دين انت ووجهك ولامطوع المسجد ..
سفهتها ولاكأنها واقفه تنتظر ردي ..
سحبت الصينيه وقهويت خلف وصبيت لي فنجال نزلته قدامي .. ثم نظرت فيها ..
عساف :خير ..
وعد :بكيفي بيتنا ..
عساف :اقول اطلعي بيجينا رجال اللحين ..
وعد :مين قيس عادي كل يوم اشوفه ..؟!!
شفت خلف بيتكلم وعرفت انه بيرد عليها رد بيسكتها لكن قبل بيجرحها ...
عساف :لارجال ثاني اطلعي عيب ..
طالعتني بنظرة شك .. ثم قالت ..
وعد :ياويلك اذا كان قيس ..
وطلعت بالسرعه وشكلها خايفه من خلف ...
خلف :انت كيف تخليها تكلم معك كذا ..
عساف :وانت ماعندك غير الصراخ والمنافخ خليها ماراح تضرني بالشي لو تكلمت معها بهدؤ ..
خلف :لاحسه مخك اختها لايكون هالنتفه تهددك فيهابس ..
سحبت فنجاله صبيت له فيه .. وفتحت موضوع ثاني ينسيه اللي كنا نقوله ..

[5]

(.. أحساس كذاب..)

ملاك

سحبة المغاط بأصبعي لين صار مشدود ثم فكيته .. حبت الفصفص تحلق بالجو ثم تصقع برقبة الأبله ..
الأبله ويدها على رقبتها محل الظربه ..
الأبله :وعممممممممممى ان شاءالله من هي قليلة الأدب والتربايه ... اللي سوت هالحركه قسم بالله مأعديها لها ..
هي تهدد والفصل يضحك .. وأنا اتمطط بتعب ..اه يامحلى النومه ..
ووسط صراخها قمت بكسل ..
ملاك :ابله تسمحين دورة المياه ..
الفصل هدؤ .. والأبله مذهوله .. وفجأه رجعت تصرخ بصوتها المزعج رفعت يدي على اذني قبل ماتنفقع الطبله واصير صمخا ء..
الأبله :ياقليلة التربايه انتي واشكالك ليش تجون المدررررسه .. مسويه فيها يعني ان كلامي مو مهم قايمه تقاطعينه بطلب غبي مثل وجهك .. انثبري بمكانك مافيييييييييه طللللعه ..
جلست بمللل .. طالعت بالسارا اللي تكركر وصقعتها على راسها ..
الأبله :وتظربيني زميلتك بعد انتي وحده قليلة ادب ..
ملاك :ماهي زميلتي اختي هذي ..
الأبله :لاتردين علي ياقليلة الأدب ..
ملاك :لاتقولين قليلة ادب .. بالأول درسونا ادب بعدين تعالي قولي انا قليله فيه اوكثيره ..
الأبله :بررررررررررى اطلعي بررررى روحي للأداره .. انتي وحده غير مقبوله هنا ..
ملاك :ترى حتى لو قلتي الكلام بالصوت واطي بطلع .. ماله داعي تقطعين احبالك الصوتيه ..
رسمت على وجهي ابتسامه رائعه ... وهي تبربر مأدري وش تقول ياهو صوتها مزعج ترى ماسويت الحركه ذيك لأني مشاغبه والله صوتها حاد مزعج يرفع ضغطي ..
كنت امشي بهدوء لين وصلت الباب .. اشرت للبنات باي وهم ماصدقوا انفجروا ضحك .. سخيفات ...
فكرت اروح للأداره ولا اروح للمخبأ السري ..
اروح الأداره احسن اتهاوش شوي مع ابله عطوف وأفشي غلي فيها يمكن تعطيني اوووت قصدي فصل يوم يومين اسبوع على الكثير اللي يجي من الله حياه الله ..
بس شي وقفني .. ذكرى خلتني اعكس سيري بخطوات سريعه للمخبأ وصلته وانا مأسمع غير دقات قلبي المنفعل .. جلست بقوه كسرت ظهري سحبت جوالها وانا مغمضه عيوني اللي اسويه خطأ ..
لو دخلت علي وحده من خواتي اللحين ..!!!!!!
لو ... لو... لو .... الف لو تدور بالراسي ..
واصلا انا الوم شهد انتقدها.. احتقرررررررررر
تصرفاتها ومن نفس جوالها بتصل عليه .. مالي عذر غير اني صادقه وهي تتسلى.......
دقيت الرقم اللي كنت كاتبته على سير ساعتي الجلد البني بقلم اسود ..
سمعت صوته متضايق :نعم ..
:الووو وليد ..
بأندهاش :ملاك ..؟!
طاح الجوال من يدي ... لامستحيل .. شهد .. مستحيل ..
طالعتني بمكر والدهشه للحين على وجها ..
شهد :وش تسويني بجوالي هاه ..
ورفعت الجوال ثواني بس وصفرت ..
شهد :اوب اوب ياخطيره رقم مميز بعد طلعتي مأنتي هينه ...
سحبت الجوال منها بقوه وهي متشبثه فيه مسحت الرقم بالسرعه ورجعته لها ..
ملاك :ياويلك ان قلتي لأحد والله لأذبحك ..
طالعتني بأستخفاف ..
شهد :وليش أعلم يعني انتي عرفتني انا ماليش دعوى بحد .. والأحسن كمان مايكون لأحد شغل فيني .. الووو فهوددي ..
وراحت تمشي لأخر المخبأ وهي تضحك بدلع ..
مسكت راسي غبيه غبيه غبيه غبيه ...زين كذا فضحت نفسي عندها لازم اتسرع وادق عليه ليش ماصبرت لين ارجع للبيت .. وش فيها لو صبرت كم ساعه لين الليل ماني صبرت اسبوع كامل ..
:ملوكه زعلانه مين يراضيها ..
انتفضت يوم سمعت صوتها .. حمدت ربي الف مره يوم شفتها حمدته انها مو هي اللي دخلت علي قبل شوي شهد ولاسارا ..
ملاك :وش طلعك انتي ..
سارا:وادي تقي تطلعي من الفصل وابقى انا هناك والله لو اني قليلة اصل ماخليك لحالك ... مافكرتي تروحين للاداره ..
ملاك :ولاطرى علي ..
سارا:وش فيك زعلانه ترى ماهي اول مره تنطردين فيها من الفصل ..
كنت اناظر بالأرض وانا اكلمها يوم رفعت راسي وشفت كشتها الطايره وتذكرت اللي صار الصبح
جلست اضحك ... طالعت فيني سارا اللي تعرف سبب ضحكتي وعطتني ذاك الكف وانا مازلت اضحك .. حتى الصايعه شهدووه تركت مكالمتها وجلست تضحك معي ...
سارا:بس هي انتي وياها اسكتن الله يأخذ هالأشكال ...
شهد :يوووووووه سارا لو اني منك رجعت للبيت وكملت نومتي على هالدش ...
سارا :ليه ياحياتي هو انا اخذت فرصه استوعب فيها اللي صار ... الله يلع ..ه الحقير الوحش وش يبي فيني هذي ...
قلت استهبل عليها ..
ملاك :يمكن ماكان يقصد ..
سارا :ياحياتي انتي ماشفتي نظراته ولاعرفتي يقصد ولامايقصد انا حسيت انه قاصد التفله تجي بوجهي بعد ...
شهد :لا مأعتقد وين يوم تفل كنتي ركبتي الباص ...
سارا:ايه بس بعد موجهه لي ..
شهد :يوووه انا ودي افهم هو ليش يكرهك ..
ملاك :ياعساه للموت الحقير ... مختفي من العطله ماشفناه ماله حس يجي اليوم يكب عليها مويا قسم بالله انه سخيف ..
سارا :مو بس مويا حتى العبله رماها علي بس انا وخرت يمديني مفلوقه اللحين ..
حسيت كلامها يطلع مخنوق ياحياتي سارا رجعت لها الرعبه منه اليوم صح ماصاحت بس طول الوقت بالباص ترتجف .. ياحياتي الله لايوفقك ياقيسوووووه وين مارحت ...
انا احس انه انسان مريض نفسي .. والله تصرفاته ماهي تصرفات انسان صاحي ...

**Loli.** · 25-07-2011, 08:24 AM

رد: بلا رقيب / لعاشقه ديرتها ، كاملة

هزتني سارا .. وبأسلوبها الطفولي اللي يذبح لصارت خايفه ..
سارا:ملاك اليوم شفتي كيف شكله ..
ياحياتي ياسارا انرعبت من وجهه اللي طالع تقل وجه شيطان اسمر بقوه وعيونه حمر ...
ملاك :لاوش فيه شكله ..
سارا :طالع يخوف ..
ملاك :لا مأعتقد عادي كان شكله بس انتي توسوسين ..
تصدقون بديت احس انه بيقتل سارا والله اني ماأكذب يالناس يكرها والله يكرها احس يكره الأرض اللي فيها سارا ووده يحرق فيها ..
الله يستر لايسوي بأختي شي .. والله افكاري ماهي مجنونه انتم ماشفتوا اللي شفته ... قيس ماهو ناوي على خير .. عندي احساس ان هالسالفه راح تنتهي بمووت .. يارب يكون احساسي كذاب ..

[6]
(..الذئب ..)

مل من المطالع بالجوال ماهي راجعه تتصل .. اصلا هي كيف اقدرت تتصل من المدرسه .. الصراحه هالبنت ينخاف منها .. بس تعجبه الحريه اللي عايشتها لا اب لا ام كذا البنات ولابلاش ذولي اللي يصلحن صديقات ماهن راعيات ابوي مايسمحلي اروح لبيت صديقتي وامي لازم تروح معي لسوق ..لو انها شوي مسويه فيها محترمه
بس هو بيطبخها على نار هاديه تستاهل الواحد يتعب علشانها حلوه وبريئه طازجه تستاهل من يعلمها اصول الحب ..بيحقق فيها ثلاث انتقامت الأنتقام الأول له من حبيبته .. الثاني لأخوه الغالي من اختها .. والثالث لمرة ابوه اللي ماتنزله من زور رغم انها ام افضل اخوانه ..
(توها اتصلت فيني ياحياتي تشكي ضيقها من الدراسه .. قلت لها لو تحبيني اجتهدي بدراستك وانجحي عشان قلبي مو قادر يصبر لليوم اللي بنتزوج فيه ) دور اسمها لين وقف عند حبيبتي الخاينه وارسلها لها ...
اه أحبك يالشووووووووق أحبك ياحقيررره أحبك ياخاينه ..
ليش سويتي بنفسك كذا .. ليه ضيعتي نفسك وضيعتيني معك ... انا الأهبل اللي حبيتك .. كنت فاكر انك بنت عمي يعني اشرف من الشرف نفسه مادريت ان الزباله موجوده بكل مكان حتى ببيوت الحمايل ..
يحترق يموووت يتمنى ينتحر ويريح نفسه يوم يفكر ان بنت عمه رضت فيه بعد ماحفى على قولتها وهو يتمنى رضاها بس عشان تستر نفسها بعد ماضيعت شرفها ..
مسح دمعته اللي نزلت :لايالوليد خلاص انتهى زمن الدموع .. ذولي واطيات مايستاهلن دمعه تنزل عليهن ...

نهاية الحلقه
قراء ممتعه اتمناها لكم .. انتظروني بعد الأمتحانات بحلقات قمه بالتشويق وأحداث لن يصدقها عقل ..

ادعووووولي ..

تقبلوا تحاياي القلبيه ..
عاشقة ديرتها ..

بلا رقيب / لعاشقه ديرتها ، كاملة

تعليق

تعليق

تعليق

تعليق

تعليق

تعليق

تعليق

تعليق

تعليق

تعليق

google Ad Widget