رد: "قلــــوب مرهقـــــة" .. رواية جديدة بقلمي

الساعه 9 بالليل..


أتصلت ريم على حور بس ما ترد لأنها كانت نايمه .. ترددت شوي وأتصلت على راكان وعلى اخر رنه رد عليها وهو كان نايم..
راكان: همممممممم.
ريم:....نايم؟.
راكان: لا جالس أرقص..وش تبين ريم.
ريم: أنا اسفه خلاص ارجع نام.
راكان: لا ياشيخه تصحيني وبالأخير تقولي نام...تكلمي وش تبين.
ريم: ما أدري.
راكان: شلون ما تدرين.
ريم: إيه ما أدري..بس حسيت أني أبي أسمع صوتك.
راكان: ريم أنتي متضايقه؟.
ريم تبكي: إيه..كثييييير.
راكان: وش فيك حبيبتي قولي.
ريم: ما أدري..ما أدري.
راكان يقوم: طيب أنا جايك الحين انزلي لي.
ريم: لالالا.
راكان: طيب وش فيك.
ريم: كنت أبي أمي جنبي في هالأيام.
راكان: هدي نفسك أمك عند ربها وإن شاء الله حالها أحسن من حالي وحالك بالدنيا.
ريم: الله يرحمها.
راكان: ريمي..أنا أمي وأبوي توفوا في نس السنه وأنا كنت صغير ماعرفتهم أبد رباني أخوي الكبير وزوجته ومع كذا ما بكيت عليهم لأن أخوي عوضني..وأنتي زوجة أبوك معك وأنتي تقولي أنها طيبه.
ريم: الله يرحمهم..إيه زوجة أبوي مره طيبه وقلبها كبير بس مو أمي.
راكان: هدي نفسك..عاجبك الحين طيرتني النوم من عيوني وأنا تعبان يومين مو نايم.
ريم: أنا اسفه.
راكان: ريم.
ريم: هلا.
راكان: أحبك.
(سكتت ريم انحرجت منه)
راكان: هذا إللي أستغرب منه شلون دفشه وقويه وتستحين هههههههه.
ريم: ههههههه ..خلاص نام أستئذنك.
راكان: الله معك..






بعد ما كلمته حست براحه شوي.. وحطت راسها ع المخده وغمضت عيونها كووود تهدأ أفكارها وتقدر تنام..










في هالوقت رجع محمد لبيته وهو ماله نفس يقابل رانيا..
محمد: السلام عليكم.
رانيا: من بعد إللي سويته باقي سلامه.
محمد: خير وش أنا مسوي؟.
رانيا: مومعقول طول اليوم من الفجر للحين عند حور..أكيد كانت معك بنت وتعطيني مشغول على طول.
محمد: اللهم طولك يا روح..إيه إيه كانت معي بنت ارتحتي الحين.
رانيا: يعني ..يعني تعرف بنت غيري.
محمد: إيه وأموووت عليها أحبها أكثر منك بكثيييير.
رانيا تمسكه مع ثوبه: من هي.. من هي تكلم.
محمد يفك ثوبه ويدفها بقوه ألين طاحت: أختي ..هي أختي وأضن أنك تعرفي أني أحبها أكثر منك.
رانيا توقف: هات جوالك أكلها الحين أتأكد.
محمد: رانيا انقلعي من قدامي أحسن لك.
رانيا: أبي أتأكد ويتطمن قلبي ..هات جوالك.
محمد: أتصلي على أبوك يجي ياخذك لبيته ما أبي أشوف وجهك بس أطلع من الحمام.
رانيا تجي وتمسك يده: لالا تكفى ما أبي بيت أهلي والله ما أسوي شي بس خلني معك.
محمد: نفسيتي تعبانه أنقلعي لبيت أهلك من الحين ألين يخلص زواج أخوك ثم أرجعي ونكدي علي.
رانيا: محمد أرجوووك..
قاطعها: أنا قلت كلامي .. ما أبي أشوف وجهك ...يالله خذي السواق أو أتصلي بأهلك.
رانيا: حاضر..بس كل شوي كلمني.
محمد: لا ..يالله روحي أبي أنام.






أخذت رانيا أغراضها وهي زعلانه وأخذت السواق وراحت لبيت أهلها وأول ما دخلت البيت...
هبه: شو جايبك بالليل وزوجك منو معك.
رانيا: أبدا ماما جيت بساعدكم قبل الزواج.
هبه: أها.. أوك حبيبتي روحي حطي أغراضك بغرفة رنا لأنوا غرفتك مو جاهزه.
رانيا: حاضر ماما..أنا بأنام الحين.
هبه: لساتنا بدري وما تعشينا أتصلي بمحمد يجي ع العشا.
رانيا: ماما ا محمد نايم الحين ما أبي أزعجه.
هبه: أوكي حطي أغراضك ونادي رنا وأنزلي للعشا.
رانيا: حاضر ماما.


(وطلعت غرفة رنا.. وأول ما شافتها رنا ارتبكت لأنها كانت حاطه صورة محمد في الكتاب وتناظر له)
رانيا: وش فيك انخرعتي جنيه أنا.
رنا: وش هالدخله الناس تطق الباب أول.
رانيا:والله ماما قالت لي أنام هنا اليوم..يعني معتبره نفسي داخله لغرفتي أنا.
رنا: لا وش تنامي عندي..أنا بأذاكر عندي أمتحانات وأنتي نايمه هنا لا الله يرضى عليك روحي غرفة ثانيه.
رانيا: والله قولي لماما مو تقولين لي..يالله طفي النور أبي أنام.
رنا: رانيا بدون قلة أدب أطلعي وخليني أذاكر.
رانيا أخذت الكتاب ورمته ع المكتب: هذي هي قلة الأدب..يالله أبي أنام.
(رنا ألتفتت شافت طرف الصوره طالع من الكتاب وخافت تشوفها رانيا قامت أخذت الكتاب وضمته)
رنا: أنتي ما تستحين..أنا بقول لأمي تطلعك...(وراحت لأمها وجت بعد دقايق معها)
هبه: إختك معها حق يالله قومي روحي لغرفة فارس فاضيه.
رانيا: أووووف هي لعبه كل أحد منكم يقولي أروح لمكان محمد وماما وتجين أنتي تكمليها يالكلبه..ماما غرفة فارس لونها مو حلو ما أحبها.
رنا: قليلة أدب يالله برا.
هبه: لحظه لحظه..محمد لوين قالك تطلعي.
رانيا: هاه لا ولا شي قصدي محمد ترتكته لحاله حبيبي وجيت عندكم.
هبه: متأكده.
رانيا: إيه أكيد..(وتأشر على رنا)..أنتي يالشغاله خذي أغراضي وطلعيها لغرفة فارس.
رنا تمسك رانيا من شعرها وتشده: وش قلتي.. عيدي إللي قلتيه يالله..ناسيه أني أختك الكبيره.
رانيا: اه ماما شوفيها.
هبه: ما يخصني فيكم أنتي طولتي لسانك خليها تأدبك.
رنا: عيدي إللي قلتيه..وأنا أعلمك شلون يكون الأدب.
رانيا: اه فكي شعري يالكلبه.
(رنا فكت شعرها وعطتها كف من قوته رجعت لورى)
رانيا: تضربيني أنا..الله لا يوفقك الله لا يوفقك..أنا أعلمك أعلمكم كلكم..(ومشت تبي تطلع من الغرفه)
رنا: لحظه..خذي زبالتك معك قبل ما توسخ غرفتي..يالله.


(أخذت رانيا أغراضها وطلعت من الغرفه..رنا قفلت الباب بالمفتاح وأنسدحت ع السرير وفتحت الصوره وجلست تتكلم معها بهدوء..
..شفت شلون يا محمد..أخذت حقك منها..بردت حرتي وحرتك شوي..كان نفسي أضربها أكثر بس ما قدرت لكن الأيام جايه حبيبي)
وأخذت الصوره وخبتها في الخزنه وقفلت الدولاب ..












الساعه الان 1 ليلا..


البيت هدوء إلا من صوت خطواته الخفيفه طلع لغرفة النوم بهدوء ما يبي يصحيها..دخل كانت نايمه وقف يتأملها شوي ..بريئه حيييل عكس واقعها..
جلس ع الكنبه تضايق من ملابسه بس مو عارف يشيل الجاكيت لأن كتفه مجروح ويوجعه..وهو يحاول يشيل الجاكيت كان يشوف حور تتقلب بنومه وفيه شي يلمع بعيونها ..دموووع..
سمعها وهي تردد كلام نصه ما فهمه بس إللي فهمه هو (لا تخليني..هشام)..ما حب يزعجها بس ما حب يخليها تتوجع حتى وهي بنومها.. قرب منها وجلس ع السرير جنبها.. وبدأ يهزها..


هشام: حووور..حور حبيبتي قومي أنا جنبك هنا..حووور.
(فتحت عيونها بتعب وأول ما شافته نزلت دموعها)
حور: أنت وين كنت؟ كنت خايفه لحالي.
هشام: أنا اسف كان عندي شغل.
حور: شغل تخبرني مو تخليني خايفه وأحاتي.
هشام: كتبت لك رساله ما شفتيها.
حور: رساله!!..بس أنا مالقيت أي رساله.
هشام: والله كتبت الرساله وحطيتها بالصاله.
حور وهي للحين تبكي: يعني ما تعرف أن الشغاله تطلع كل يوم تنظف.
هشام وهي يمسح دموعها: خلاص لا تبكي هذا أنا هنا الحين.
حور تنتبه للدم وملابسه الممزقه: وش هذا؟.. أنت متهاوش مع أحد أو أحد طاقك.
هشام: هههههههههه هو أحد يقدر.
حور: أجل وش صار لك.
هشام: طلعنا في مهمة مواجهه مع مهربين قبل أمس وصابتني رصاصه في كتفي.
حور: رصاصه!!..(نزلت دمعتها)..توجعت؟؟.
هشام: الرجال ما يتوجعون.
حور: الرصاصه ما توجع بس العقال يوجع صح.
هشام: من هالناحيه صح ههههههههه.
حور: عشان ذا كان قلبي مو متطمن وحاسه أنه صار لك شي..طيب شلون يدك الحين؟.
هشام: أها قلبك مو متطمن..يعني تحبيني اعترفي.
حور: لا ما أحبك.
هشام يقوم : أجل بأطلع مهمه جديده.
حور تتزايد دموعهاوتمسكه مع كمه: لا لا تروح لا تخليني.
هشام: قولي أحبك وأنا ما أروح.
حور: احبك احبك بس لا تخليني.
هشام يبوس جبينها ويمسح دمعاتها: وعشان أحبك هذي أنا قدمت تقاعد.
حور: تقاعد..عشاني أنا.
هشام: وعشان نفسي بعد.
حور: أنت مقتنع باقي قدامك عمر طويل.
هشام: وأنا بأقضيه هالعمر الطويل معك مو مع الشغل.
حور: أخاف تمل مني.
هشام: مافي أحد يمل من قلبه..وأنتي قلبي أنتي إللي تحييني.
حور تبتسم: قرارك هذا أسعدني كثيييير..ماأبي أضل لوحدي أبيك تضل جنبي على طول.
هشام: على كذا أنتي راح تملي مني.
حور تضربه على كتفه المصاب وتقلد صوته: أحد يمل من قلبه.
هشام: اه..أنتي أنثى وين الرقه.
حور: أها أجل الرجال ما يتوجعون.
هشام: ساعديني أبدل ملابسي ما قدرت.
حور: ملابسك؟؟..لالا بدلها لحالك.
هشام: أقولك ما عرفت أبدلها لوحدي يدي مجروحه.
حور: نام بملابسك هذي ألين يشفى جرحك.
هشام: يومين وأنا لابسها والدم فيها..يالله عاد.
حور: لحظه..(وطفت النور ورجعت له)..غمض عيونك.
هشام: هههههههه أصلا كذا ولا كذا ما أشوف شي.


(ساعدته وبدل ملابسه جا بينام على الكنبه بس رفضت وقومته)
حور: لالا تعال ع السرير أنت تعبان..أنا أنام ع الكنبه.
هشام: لا جنبي..ولا ترى ما أقرب للسرير..قلت لك أستوحش في السرير إذا نمت لوحدي.
حور: طيب بس أنسدح..يالله.
هشام: أحلا نومه هذي.
حور: ليه؟.
هشام: نايم جنب القمر.
حور استحت: يالله نام.








بعد أربعه أيام..


اليوم يوم الزواج..


ريم نايمه في غرفتها وعاليه جت خلت عليها بقوه..
عاليه: قومي قومي اليوم زواجك ونايمه.
ريم: أووووف..وإذا زواجي ما أنام يعني.
عاليه: لا تقومين تتكشخين.
ريم: ترى الساعه 10 الصبح والزواج بالليل خليني أنام الحين.
عاليه: ههههههههه طيب قومي أفطري.
ريم: تبين أصير دبا والفستان ما يجي مقاسي..روحي خليني أنام الحين.


(عاليه سحبت عنها اللحاف وهربت وريم قامت تجري وراها تبي تمسكها..كانت تجي عاليه في كل البيت ولما جت بتطلع للحوش طاحت من على 3 درجات كانوا موجودين في المدخل)
ريم: عاليه قومي يالله.
عاليه تبكي: اي رجلي ما أقدر أقوم.
ريم: تعالي أنا أساعدك..بس تستاهلي لأنك صحيتيني هههه.
عاليه: ريم وجع اسكتي.

(طلع أبوهم على أصواتهم)
أحمد: وش إللي صاير اليوم زواجكم متى بتعقلون.
ريم: يبه كانت تجري وطاحت تقول رجلها توجعها.
أحمد: روحي جيبي عباتها وألحقوني للسياره أوديها المستشفى..الله المستعان عليكم مافي عقول أبدا.




(راحوا المستشفى قالوا لها مافي كسر بس رضه خفيفه وبتروح بعد يومين أو ثلاثه.. وعاليه رفضت تنزف وهي تعرج..
أتصل أبوها على فارس عشان يعلمه)


أحمد: هلا فارس.
فارس: هلا عمي شلونك.
أحمد: أنا طيب بس زوجتك لا.
فارس: عاليه وش فيها.
أحمد: والله من هبلها كانت تجري وطاحت وجتها رضه خفيفه في رجلها وأصرت ما تنزف اليوم وهي تعرج.
فارس: موبكيفها اليوم الزواج يعني اليوم هي مو لعبه.
أحمد: والله موبموافقه البنت.
فارس: أجل قول لها الله يوفقها ماعاد نبي..أنا مو لعبه بيدها.












إلى اللقاء في البارت القادم ^^




تحياتي..
الكاتبه..الأريج..

رد: "قلــــوب مرهقـــــة" .. رواية جديدة بقلمي

البارت الثامن عشر...












(راحوا المستشفى قالوا لها مافي كسر بس رضه خفيفه وبتروح بعد يومين أو ثلاثه.. وعاليه رفضت تنزف وهي تعرج..
أتصل أبوها على فارس عشان يعلمه)


أحمد: هلا فارس.
فارس: هلا عمي شلونك.
أحمد: أنا طيب بس زوجتك لا.
فارس: عاليه وش فيها.
أحمد: والله من هبلها كانت تجري وطاحت وجتها رضه خفيفه في رجلها وأصرت ما تنزف اليوم وهي تعرج.
فارس: موبكيفها اليوم الزواج يعني اليوم هي مو لعبه.
أحمد: والله موبموافقه البنت.
فارس: أجل قول لها الله يوفقها ماعاد نبي..أنا مو لعبه بيدها.
أحمد: تعوذ من الشيطان ياولدي.
فارس: أعوذ بالله من الشيطان..أنا كنت أقصد قولها كمزحه أكيد راح تقول لا تأجل.
أحمد: طيب تعال أنت تفاهم معها..ماعاد به وقت صرنا داخلين على الظهر..الحين احنا راجعين ع البيت.
فارس: طيب طيب مسافة الطريق بس وأكون عندكم.




بالسياره..


عاليه: كله من ريموه يالخايسه.
ريم: هههههههه أحد قال لك تصحيني.
أحمد: كله منكم أنتم الثنتين..إللي يشوفكم ما يقول اليوم بنزوجكم.
ريم: يبه هي مو أنا.
عاليه: يبه هي إللي ما صحت بدري رحت أصحيها.
أحمد: اعقلوا واركدوا أنتي وأياها صدق عقولكم صغار الله يعين أزواجكم..أنتي ياريم.
ريم: هاه.
أحمد: هويتي في قاع قولي امين.
عاليه: ههههههههه عادي راكان يطلعها.
ريم: عاليه وجع والله أكسر لك رجلك هالمره.
أحمد: الساعه 11 الحين والرجال منتظرنا عند المحكمه نبي نوصل هالبزر للبيت ونروح نملك.
ريم: لا محد قال لي طيب يبه بس أنزل أغير ملابس النوم حتى وجهي للحين ما غسلته حسبي الله عليك يا عاليه.
عاليه: هههههههه أول مره يشوفك وأنتي كذا حالتك..ههههههه يامسكين يا راكان.
أحمد: عن الكلام الزايد لك دقيقتين أنزلي وأرجعي بسرعه تأخرنا عن الرجال.


قبل يوصلون البيت ريم رسلت لراكان رساله (ياويلك تقول تبي تشوفني ما أنصحك أبدا)






وصلوا البيت وريم نست عاليه ونزلت تسابق الريح عشان تتجهز..


عاليه: ريم..ريمووووه الله ياخذك تعالي ساعديني أمشي.
فارس طلع من سيارته: أنا أساعدك ..هات يدك.
أحمد: هذي زوجتك تفاهم معها.
فارس وهو يساعد عاليه تمشي: ولا يهمك ياعم.
(وهم ماشين بالطريق لمجلس الرجال)
فارس بهمس: تستاهلين ما جاك.
عاليه تناظر فيه وتبتسم: الله يسلمك يارب.
فارس: يالخبله ..أحد يسوي كذا بيوم زواجه.
عاليه: هههههه مو ذنبي ذنب ريم.
(يدخلون المجلس)
فارس: اجلسي اجلسي..اسمعي عاليه التأجيل تحلمين فيه..أنا قلت لك طيحي وتعوري؟..تأجيل مستحيل.
عاليه: بس فارس..
فارس يقاطعها: ولا كلمه..أنا الرجال وأقول مافي تأجيل..وش هالدلع فيكم.
عاليه تنزل راسها: بس شلون أمشي وأنزف.
فارس: يساعدونك صديقاتك ولا أنا أجي معك أنزف وأساعدك في أحلا من كذا زفه.
عاليه: لالا ما يصير كذا أبي نأجله.
فارس: أجل قومي لبيتنا على طول إذا بتأجلين أقولك مافي زواج أبد وباخذك بثيابك هذي.
عاليه: من جدك أنت!!..
فارس: إيه والله جد..إذا تبين تأجيل أنا بألغي الزواج مره وحدهواخذك الحين.
عاليه: فارس..
فارس:...لا فارس ولا خيال هههههه تنزفين اليوم ولاخذك الحين.
عاليه: أوووووووف..وين أبوي لو كان هنا كان ينصفني الحين.
فارس: كلميه الحين يالله..ترى أنا كلمته قبلك وكان هذا شوره هههههه.
عاليه: يعني كلكم علي.
فارس: مافي مجال قدامك الحين وافقي وتوكلي على الله.
عاليه: خلاص موافقه أنزف كذا وبس ...أصلا أنت وش جابك المفروض ما تشوفني إلا الليل.
فارس: سواياك جابتني لعنبوا بليسك.. يالله تبين أدخلك البيت ولاأروح.
عاليه: لا روح أنا بأتعود أمشي لوحدي.
فارس: أجل يالله أنا وراي شغل ومشاوير بأخلصها وبأروح أودع خويتي..(وهرب عنها شوي)
عاليه قامت تبي تجري تمسكه بس ما قدرت: تعال هنا يا جبان.
فارس: ههههههه بتذبحيني بعد الزواج لاحقه لاحقه.
عاليه: أنا أوريك يالله الحين لا أشوف وجهك.
فارس يجري للسياره: باي ..راح لها.
عاليه: هين هين.
(ومشت شوي شوي ألين دخلت البيت)








بعدماطلعت ريم مع أبوها بطريقهم للمحكمه..
أحمد: ترى الرجال توه كلمني يبي يعزمك ع الغدا بعد ما تملكون.
ريم: نعم!!..وأنت وش قلت له.
أحمد: وش بقول له يعني بتصيرين زوجته ليه أمنعه.
ريم: بس يبه أنا ما أبي.
أحمد: ما أبي هذي قوليها له مو لي أنا...وصلنا يالله أنزلي.
(ريم قبل تنزل رسلت لراكان رساله..أنا أعلمك هين..ونزلت ورى)




أول ما نزلوا سلم أبوها على راكان وأخوانه الثلاثه..ودخلوا للمحكمه وخلصوا العقد وصار راكان زوجها..
راكان: يالله يا عم نادي بنتك عشان ما نتأخر.
أحمد: يا بنت تعالي هنا.
ريم: هلا يبه.
أحمد: يالله زوجك يبيك روحي معه.
ريم تهمس له: بس يبه..
أحمد يقاطعها: خليك مره عاقله وروحي معه.
ريم: طيب أنت تعال معنا.
أحمد: هههههه قولي بعد أجي أسكن معكم بنفس الغرفه روحي روحي الله يهديك ياريم.




مشت ريم لعند راكان وهومبتسم ابتسامه عريضه..
ريم تهمس له وهي تمشي: وتبتسم بعد..هين أعلمك.
راكان: هههههه من هنا السياره تعالي...أجل أنا تأمريني وتقولين لي ياويلك.
ريم: وين بتودينا إن شاء الله.
راكان: ما تتدخلين أنا عازمك يعني تسكتين.
ريم: طيب بنسكت..(وبعد ثواني)..راكان.
راكان: اجل الحين أنتي ساكته.
ريم: ههههه لا بس بأسأل كل هذولا هم أخوانك.
راكان: إيه الشايب أخوي الكبير سالم والثاني فيصل والثالث إللي يشبهني سلطان.
ريم: أنت وش ترتيبك فيهم؟..ومتزوجين أو لا.
راكان: أنا أصغرهم..سالم وفيصل متزوجين وعندم أولاد بس سلطان لا توه يدور عروس.
ريم: مره يشبهك هذا بس أنت أسمر منه.
راكان: هههههه لأنه توأمي الكبير وأنا أصغر منه بربع ساعه..ومن ناحية السمار هو أستاذ ومرتاح وأنا عسكري كل وقتي بالشمس.
ريم: عندك توأم ماقلت لي من قبل.
راكان: لأنك ما سألتي ههههههه..جا دوري الحين كم عندك أخوان.
ريم: أكبر مني طلال وطارق وأصغر مني سحر..اه وعاليه أختي بالرضاعه وبنت زوجة أبوي وابوي مربيها.
راكان: إيه عارف أبوك حاكي لي كل شي...سحر حلوه مثلك.
ريم: لا شينه وش تبي تسأل عنها هاه.
راكان: ههههههههه أختك وش أبي فيها..وصلنا يالله أنزلي.
ريم: وين أنزل؟.
راكان: المطعم وين يعني يالله.
ريم: لا تبيني اكل عشان الفستان ما يجي مقاسي حتى الفطور ما رضيت أفطر.
راكان: أنا أبيك دبدوبه يالله عاد كذا بتأخرينا وتتأخرين أنتي.
ريم: طيب بس سلطات مراح اكل كثير.
راكان: زين يالله أنزلي وأنا بأصف السياره وأجيك.
(وقفت ريم تنتظره وهي ما تحب توقف لحالها وكان الرجال يمشون ويناظرون فيها..ثواني ووصل راكان عندها)
ريم: وينك تأخرت ما أحب أوقف لوحدي بمكان زي كذا.
راكان: مو لوحدك ياقلبي أنا هنا بالسياره يالله تفضلي.
(ودخلوا المطلع وأخذوا طاوله وجلسوا)
راكان: يالله اكشفي ترى مافي أحد وأنا صرت زوجك الحين.
ريم: لا خلني كذا..أنا حذرتك ما تقول تبي تشوفني.
راكان: وأنا أبي أعرف ليه هالتحذير أبي أشوفك.
ريم: توي صاحيه من النوم ثم رحنا للمستشفى ههههههه عاليه طاحت كنت أجري وراها تستاهل..وبعدها أبوي فاجئني وقال الحين بنروح للمحكمه وأنا ما كنت أدري قبل.
راكان: كذا ولا كذا بشوفك بكل حالاتك يعني مصيري أنفجع ههههههه يالله اكشفي.
ريم تفتح الغطا عن وجهها: زين لا تناظر.
راكان: طيب هذا أنتي قمر عادي وش فيه وجهك..صح مو قمر مكتمل بس نمشي الحال.
ريم: حاصلك عاد وحده بحلاتي.
راكان: هههههههههه أسافر باريس وأحصل بنات أشكال وألوان.
ريم: مراح أمنعك..بس مصيرك ترجع لي ووقتها أنا بأطردك.
راكان: يالله عاد تغدي عشان ما نتأخر عندي أشغال كثير أقضيها..إلا ما سألتي خويتك هذيك بتحضر أو لا..لأن هشام ما يرد علي من الصبح.
ريم: إيه أمس قالت بيحضرون بس اليوم ما كلمتها.
راكان: تدرين ريم أبوك فاجئك بالملكه وأنا بأفاجئك بشي أكبر بس مو الحين تعرفينه.
ريم: إذا ما تبي تقوله ليه أجل تبدأ بالسالفه وأنت تعرف أني ملقوفه أبي أعرف كل شي بسرعه.
راكان: هههههههههه أسلوب تشويق.


(كملوا غداهم ووصلها للبيت وراح يجهز للمفاجئه إللي بيجهزها لريم حبيبته)










بعد العصر الساعه 5...


في بيت حور وهشام..


هشام: اه وجعتيني.
حور: تبي تروح للمرضه إللي رحت لها قبل يومين؟..لا أنا أغير لك على الجرح هنا.
هشام: الممرضه يدها أنعم منك.
حور: عشان كذا ما أبيك تروح..اسكت وإلا وجعتك أكثر.
هشام يغمز لها: تغارين؟.
حور: أغار عليك أنت يالشايب ههههه.
هشام: والله محد مشيب بي غيرك..توني صغير 30 سنه بس.
حور: وأنا كم؟..19 سنه يعني أصغر منك ب11سنه ..يعني أنت بالنسبه لي شايب..اسكت الحين خلني أعرف أربط الضماد.
هشام: جوالك يرن روحي ردي.. خليني أنا أكمل.
حور: هشام اسكت خلني أكمل شغلي وأرد بعدين.
هشام: أووووف.
حور: هههههههه محد قالك تزوجني.
هشام: وعلى إيش متزوجك ..عشان أنام ع الكنبه.
حور: والله للحين ما خلص الشهر المهله..وللحين ما خليتني أحبك.
هشام: يعني كل هذاك الخوف علي مو حب ولما قلتيها مو حب.
حور: هههههههه أحبك زي أخوي..خلصنا..يالله الحين هات الحساب.
هشام: أي حساب كل الممرضات فيهم حنيه بس أنتي لا..أعوذ بالله عربجيه.
حور: طيب روح للممرضه تبعك بس لا أشوفك ترجع الغرفه بعدها.
هشام: لالا خلاص ما صدقنا ترضين علينا.
حور ترد على جوالها: ألووو... إيه نفس العنوان إللي عطيتك أمس..أنتظرك..أوكي مع السلامه...(تكلم هشام)..يالله برا الكوفيره جايه هنا.
هشام: الله وناسه أجل بأجل هنا.
حور: تبي تجلس بشرط..أفقع عيونك عشان ما تشوف شي.
هشام: لالا خلاص بأطلع لراكان أساعده.
حور: ولارجع ألين أتصل أنا عليك.
هشام: على أمرك طال عمرك.




(طلع هشام من البيت وحور تنتظر الكوفيره تجيها)

رد: "قلــــوب مرهقـــــة" .. رواية جديدة بقلمي

في بيت العرايس..
ريم: شلون رجلك الحين ههههههههه.
عاليه: كله بسببك كيف بيكون شكلي وأنا أعرج ولابسه الفستان.
ريم: تحفه ههههههههههه.
عاليه: أنقلعي..أنتي السبب.
حصه: حطي رجلك بالمويه الحاره هذي وبتصير أحسن إن شاء الله.
ريم: خاله متى بتجي الكوفيره.
عاليه: كوفيره وحده شلون تلحق علينا.
حصه: لا مو وحده أنتم كل وحده لها كوفيره وأنا وسحر لنا كوفيره.
ريم: أووووووووه أجل اليوم أنتي بعد عروسه يا حظ أبوي.
حصه: هههههههههه عروسه وبطني قدامي ما تشوفيه الله يهديك.
عاليه: كم باقي ع الولاده يمه.
حصه: باقي شهر ونص تقريبا.
ريم: ما شفتي وش جنس الولد.
حصه: لا قلنا نبيه يكون مفاجئه.
ريم: بنت بنت أكيييييييد.
حصه: إللي يجي من الله حياه الله.
ريم: عاليووووووووه.
عاليه: هاه.
ريم: وين بتروحون عقب العرس.
عاليه: قصدك شهر العسل..حاجزين على ماليزيا بعد بكره ان شاء الله..وأنتي؟.
ريم: ههههه أنا يا حسره علي الثمامه وأحمد ربي.
عاليه: ههههههههه يا حرام..تبين اخذك معي.
ريم: والله.
حصه: وين وين..وأنتي صدقتي أنها بتاخذك بوجود فارس مراحتشوف وجهك أبد.
ريم: وأنا أبي أسافر اهئ اهئ.
حصه: كلمي رجلك يوديك.
ريم: تونا مملكين وش اقوله ههههه.
سحر: خاله كوفيرتنا وصلت يالله أنتي الأولى عشان تروحين للقصر بدري.
حصه: يالله جايه جايه..وأنتم الثنتين أعقلوا الليله بنزفكم يابزران.








في بيت جنان..


جنان: يعني محد بيوديني للمشغل.
أمها: أووووف كم مره نعيد الكلام خلاص مافي طلعه تعدلي بالبيت.
جنان: بس يمه هذولا صديقاتي لازم أروح للمشغل.
أمها: دبري نفسك بالبيت وأسكتي أزعجتيني.
جنان: هذي مو حاله والله..


(طلعت لغرفتها وأخذت جوالها قلبت بين الأرقام فتحت رقم طلال إللي أخذته من جوال ريم وأتصلت)
طلال: ألووو.
جنان بتردد: أنت طلال.
طلال: أيوه..من معي.
جنان: أنا...جنان.
طلال: ج ن ا ن ..امري.
جنان: ماعدت أتحمل هالوضع..(وقامت تبكي)..والله ماأتحمل تعال الحين.
طلال: طيب مسافة الطريق بس..مع السلامه..(وقفل السماعه قبل يسمع ردها)






في سيارة طلال..


بعد مكالمتها أتصل على أبوه وقاله بالموضوع وأبوه كان جدا متفهم ومر عليه وأخذه معه عشان يروحون لأبو جنان..
أحمد: أنت ليه ما حكيت من قبل عشان يكون زواجك مع زواج أخواتك.
طلال: يبه وش أسوي هي توها توافق.
أحمد: وحصه بعد ما علمتني كل هالسالفه من وراي.
طلال: يبه كلم أبوها الحين وقوله بنجيب المملك معنا.
أحمد: دقيقه أدور لرقمه..إيه هذا هو ..(وأتصل عليه..)


ابراهيم أبو جنان: هلا أبو طلال حيا الله هالصوت.
أحمد: هلابك زود ياخوي شلونك.
ابراهيم: بخير طاب لونك..مبروووك زواج بناتك اليوم.
أحمد: يبارك فيك يارب..وأحنا عاد نبي منك تكمل فرحتنا اليوم وتعطينا طلبنا.
ابراهيم: عطيتك وأنا أخوك امر.
أحمد: نبي بنتك جنان لولدنا طلال هاه وش قلت؟.
ابراهيم: والله ما نلاقي أحسن منكم بس لازم ناخذ شور البنت.
أحمد: بس تكفى ياخوي الحين احنا بطريقنا لك وبنجيب المملك معنا.
ابراهيم: جيبوووه والله ما أردكم والبنت شورها من شوري..بس لازم تعرفون أن البنيه مطلقه.
أحمد: نعرف كل شي وأنا أخوك.. جهزوا لنا البنيه بناخذها معنا اليوم.
ابراهيم: بس ما يصير كذا بدون عرس.
أحمد: عرسها اليوم مع صديقاتها إن شاء الله.
ابراهيم: تم تم..ننتظركم.
أحمد:على بركة الله..يالله مسافة الطريق ونكون عندكم...مع السلامه..(وقفل المكالمه)


طلال: مشكوور يبه ما تقصر.
أحمد: استعجل شوي عشان تاخذها بعد الملكه تجيبون الفستان عرسها اليوم وبتنزف مع أخواتك.
طلال: حاضر بس أتصل بالمملك نمر عليه الحين.
أحمد: لا تخاف خلاص بتصير لك..بس ماقلت لي أنت بتاخذها عشان راحمها وبس.
طلال: والله يا يبه...هههههههه أنت فاهم الوضع.
أحمد: إيه إيه أدري أنك غرقان.


طلال أخذ جواله وأرسل على رقمها رساله..(جهزي شنطتك)
وبعدها أتصل على محمد وقال له الموضوع عشان يجي ويكون جنبه..










في غرفة جنان..
شافت رسالة طلال وما صدقت أنه جا بهذي السرعه ومع كذا قامت فتحت شنطتها وجلست تلم أغراضها.. تبي تخلص من هالحبس إللي عايشه فيه..


شوي ودخل عندها أبوها..
ابراهيم: شوفي يابنتي من شوي جوك خطاب وأنا وافقت الرجال ما ينعاب والحين هم بالطريق بيملكون وياخذونك على طول.
جنان: اللي تشوفه يبه..أنت وافقت وأنا مراح أفشلك قدامهم.
ابراهيم: الله يرضى عليك يابنيتي..جهزي نفسك اليوم عرسك مع عرس خوياتك كلمنا كل الأهل وبيحضرون.
جنان: لالا ما أبي عرس بروح معه كذا.
ابراهيم: مايصير خلاص كلمنا كل الأهل وجايين.
جنان: بس يبه أنا ما أبي.
ابراهيم: جنان أنا قلت كلمتي وخلاص...جهزي نفسك لا تفشلينا.








قبل أذان المغرب بربع ساعه..


وصلوا طلال وأبوه.. وبعده بدقايق محمد ومعه المملك.. كتبوا العقد وأنتهوا وصلوا المغرب جماعه..ثم طلب طلال من أبو جنان يناديها عشان يروحون يجيبون الفستان وتتجهز بسرعه..
نزلت جنان والشغاله نزلت شنطتها من قبلوأستئذن طلال ومشوا..


في السياره..
جنان: مشكور.
طلال يبتسم: مو ببلاش ترى.
جنان: وش إللي مو ببلاش.
طلال: بعدين تعرفي.. الحين احجزي كوفيره وبعد العشا على طول أوديك لها.
جنان: من أمس حاجزه..بس ليه العرس انا قلت ما أبي.
طلال: والله رغبة أبوي وأبوك وأنا ما أقدر أقول لهم لا..يعني أنتي ما ودك تصيرين عروسه حالك حال الناس.
جنان: زمان كان ودي..بس الحين لا.
طلال: أصابعك مو سوا.
جنان: وش يعني؟.
طلال: يعني أنا مو عبدالله..أنا طلال.
جنان تنزل راسها: لا تذكر لي إسمه.
طلال: وأنتي لا تقارني بيني وبينه أنا غير وهو غير.
جنان: أدري بسسسس..خايفه.
طلال: الزمن بيثبت لك...اه صح سمعت أنك تبين تدخلين طب.
جنان: من وين سمعت؟؟؟...من إللي قال لك.
طلال: هاه..ههههههه كنت أتسمع لكم لما تجين بيتنا.
جنان: يعني تحب سوالف البنات هاه.
طلال: لالالا..بس سوالفك أنتي.
جنان: أوووووف.
طلال: وش فيك تأففين.
جنان: شلون بأطلع للناس وأنزف..بتكون مفاجئه للناس.
طلال: تبيني أنزف معك مو مشكله.
جنان: إيه ما أبيهم يقولون هذي من تزوجت وبأي صفه تنزف.
طلال: جنان.
جنان: هلا.
طلال: أنزلي واختاري فستان وأنا أصف السياره وأجيك.
جنان: طيب.
طلال: بس بسرعه تكفين ما أبي نفس تأخير ريم وعاليه بالسوق.


(نزلت جنان للسوق جلست تناظر الفساتين وتختار..تأخر عليها طلال ربع ساعه..اختارت فستان هادئ وطرحه ومكملات الفستان اكسسوارات وكعب وعلبة مكياج متكامله ..طبعا المهر كان معها أعطاها أبوها جت بتدفع بس جا طلال ومنعها)
طلال: خلصتي كل شي.
جنان: إيه خلصت..يالله الحين يأذن العشا..بس أنت وين كنت تأخرت.
طلال: كنت أتسوق شوي..يالله مشينا.




وصلوا للسياره وركبت جنان وطلال يحط الأغراض بالسياره شوي وجا عامل شايل أكياس كثيره وأعطاها طلال..سكتت وما سألته عن شي عشان ما يقول ملقوفه..
أعطته عنوان المشغل ونزلت بس نست الفستان بالسياره..










بيت العرايس..


في الصاله العلويه عاليه وريم وكل وحده عندها كوفيره يسوون التسريحات وباقي المكياج..


حصه تكلم بالجوال: هلا أبو طلال..جد..الله يبارك له أجل اليوم بيكون عندنا ثلاث عرايس..(هنا ألتفتوا عاليه وريم متفاجئات)..إيه إن شاء الله لا الفندق أحس ..احجز لهم في نفس الفندق إللي بنسوي به العرس..الله معك..
عاليه: يمه وش الموضوع؟.
ريم: من تزوج ..ومن جدكم فيه عروسه ثالثه معنا.
حصه: شوي شوي علي أكلتوني بقشوري..أبشركم طلال تزوج اليوم وبنزف عروسته معكم اليوم.
ريم: طلال..تزوج؟؟...شلوووون.
عاليه: ومن هي العروسه.
حصه: تدرون عاد أخليكم بناركم وماني بمجاوبه ..خلوها مفاجئه...يالله سحر خلصتي خلينا نروح للقاعه قبل الظيوف.


(طلعوا حصه وسحر ..شوي ودخلوا طلال وطارق وهم يضحكون ومبسوطين سمعت ريم صوتهم ونزلت لهم بسرعه)
ريم: طلال..متى وشلون ومن هي؟.
طلال: بس الله من وين طلعتي أنتي.
طارق: إلاقول أعوذ بالله هههههه وش هالمكياج.
طلال: إيه والله أعوذ بالله هههههههه.
ريم: جاوبني تكفى..خالتي حصه ما رضت تعلمنا.
طلال: وأنا مو مجاوبك بعد ههههه.
طارق: روحي يالله اخلصوا علينا ترى أنا إللي بوصلك للقاعه أنتي وإياها.
ريم: ساعه ونخلص.
طارق: الله يصبرني بس أبوكم يخلف وأنا أبتلش فيكم.
ريم: حاصلك توصل القمر للقاعه وتتحلطم بعد.
طارق: أي قمر أعوذ بالله من هالأشكال هههههه بويه مو مكياج يالله عاد اخلصوا علي.
طلال: الله يعينك عليهم..يالله أنا رايح لزوجتي إللي ما تعرفونها ههههههه.
ريم: يعني ما تبي تقول من هي.
طلال وهو ماشي: لا.










في بيت رانيا...


فارس: يمه أنا رايح دبروا أنفسكم أنتم..أبوي يقول الرجال بدأوا يجوون.
هبه: ومع مين بدنا نروح يعني لا أنت ولا أبوك.
فارس: أتصلوا بمحمد أنا رايح ..مع السلامه ..(وطلع من البيت)
هبه: رانيا اتصلي بمحمد قولي له يجي يودينا للقاعه.
رانيا: والسواق وينه؟.
هبه: بدك يانا نروح مع سواق واحنا متزينين هيك..يالله الله يرضى عليك كلميه.
رانيا: طيب ..(تتصل عليه وعلى اخر رنه رد)..هلا حبيبي.
محمد: هلا رانيا..تبين شي.
رانيا تبعد عن أمها: محمد..والله اشتقت لك ليه ما تسأل عني.
محمد: إذا صرتي مؤدبه معي أسأل عنك.
رانيا: خلاص والله أسوي إللي تبيه ومراح أعذبك.
محمد: نشوووف..اليوم باخذك معي.
رانيا: والله..مو مصدقه..تسلم لي حبيبي.
محمد: رانيا أنا مشغول تبين شي الحين.
رانيا: إيييه تذكرت..ماما قالت لي أقولك تجي توصلنا لأنه ما عندنا أحد يوصلنا.
محمد: طيب أنتم جاهزين الحين.
رانيا: إيه خالصين كلنا.
محمد: طيب أنا خلص شغلي مع طلال ربع ساعه وأكون عندكم.
رانيا: أوكي ننتظرك حبيبي.
محمد: مع السلامه.


رانيا راحت لأمها: ربع ساعه وجاي.
رنا دخلت عليهم: ماما تعالي ساعديني الفستان واسع علي صلحيه.
(رانيا ناظرت أختها كانت أحلا منها بكثييير واغتاضت وفكرت كيف بتركب هذي مع محمد مستحيل)
رانيا: ماما سيارة محمد ما تكفي بس أنا وأنتي وغدير الشغالات مالهم مكان.
هبه: خلاص نروح والباقين أول ما نوصل نرسل لهم أي سواق من هناك.
رنا عرفت مقصد رانيا: يالله ماما ساعديني قبل تروحون.
هبه: إيه جايه جايه.




بعد ربع ساعه وصل محمد وركبوا رانيا وأمها والصغيره غدير..ومشوا للقاعه..








عند حور..


خلصت حور ولبست وخلصت وأتصلت على هشام يجي..


أول ما دخل الغرفه..
هشام: أنا وين دخلت ..(يتلفت)..أنا داخل بيتنا؟.
حور وهي قدام المرايه تعدل شعرها: يالله ملابسك جاهزه روح البس ازم أوصل بدري.
هشام: بالله لفي علي شوي.
حور لفت وتناظره: وش تبي.
هشام يصفر: وراك ما تتكشخين بالبيت كذا.
حور: شايفني بهالظروف رايقه أتكشخ..يالله اخلص علي.
هشام: لحظه لحظه..بتروحي بالشكل لالا مستحيل أخليك تروحين.
حور: ليه وش فيه شكلي ..فيه شي غلط؟.
هشام يغمز لها: مو خايفه على نفسك يحسدوك.
(حور استحت ورجعت للمرايه)
هشام: دقيقه..(وراح للمكتب طلع الكاميرا)..أوووه مافيها شحن..أشبكها بس ألين ما اخذ دوش وأطلع.
حور: ههههه لا يكون بتصورني.
هشام: إيه يعني أنا أقدر أفوت هالحلا وما اخذ له صوره.
حور: يالله اخلص علي أبي أروح بدري.
هشام : طيب طيب..(ودخل ياخذ دوش)










وصلوا رانيا وأمها الفندق إللي فيه القاعه..
هبه: محمد قول لعمك يرسل السواق للباقي إللي بالبيت.
محمد: حاضر ياعمه.
رانيا: راح أشتاق لك حبيبي.
محمد ابتسم لها مجامله: يالله أنزلي الحين.






راح محمد قاعة الرجال وقال لعمه..
حسين أبو رانيا: وراهم ما جو كلهم مره وحده ..السياره خربت علينا وفارس مستحيل يروح لهم الحين.
محمد: والله مدري ياعم قول لهم ياخذون تاكسي.
حسين: أنت من جبت منهم؟.
محمد: رانيا وعمتي وغدير بس.
حسين: والله البلشه..رنا بالبيت يعني..دام رنا معهم صعب أخليهم ياخذون تكسي لو هم بس الشغالات كان عادي.
محمد: تبيني أروح أجيبهم ياعم.
حسين: إيه والله تسوي خير..خذ السواق معك يكون محرم لزوجته الشغاله وخذوا رنا والشغاله الثانيه بعد.
محمد: تكرم ياعم..الحين أروح لهم.
حسين: الله يقويك ياولدي..مشكور تعبناك معنا.
محمد: لا ولو أخدمكم بعيوني.


(وأخذ السواق معه وطلعوا لبيت رانيا مره ثانيه)

رد: "قلــــوب مرهقـــــة" .. رواية جديدة بقلمي

عند حور ..


جالسه تنتظره بالصاله على ما يخلص لبس..أول ما خلص أخذ جواله والكاميرا وطلع لها كان ماسكه البخور بيدها تبي تجهزه له...
حور: يالله تبخر.
هشام: بتخنقيني.
حور: ولا كلمه خلني أصير مره سنعه بعدين هذا أحسن من ريحة الدخان.
هشام: اسمعي بكره نبي نطلع للشرقيه نغير جو.
حور وهي تبخره: ليه الشرقيه..الجو صار بارد وحلو..نطلع للمزرعه.
هشام: أي مزرعه قصدك بالحوش.
حور: لا مزرعتي إللي أبوي أهداني اياها..للحين ما شفتها.
هشام: أجل نطلع للمزرعه تم..يالله الحين بأصورك.
حور: صدق فاضي يالله مشينا.
هشام: ماأمشي ألين أصورك هذا اخر كلام.
حور: ملزم؟؟؟.
هشام: ايه ملزم وبقوه بعد.
حور: شلون بتصورني أجلس أو أوقف.
هشام: خليك واقفه كذا..أيوه..ابتسمي..الحين اجلسي وحطي رجل على رجل..(وبعد ما صورها كم صوره)..خذي صوريني.
حور: بس ما أعرف للكاميرا هذي.
هشام: تعالي أعلمك مره سهله..(كان يمسك يدها ويحطها على الكاميرا ويعلمها وهو مره مستانس)..يالله صوريني.
(وبعد ما صورته كم صوره..هشام نادى ع الشغاله عشان تصورهم سوا..مره يحط يده على كتفها ومره على خصرها ومره ماسك يدها..صح كان غصب عنها بس هي تبي يخلص بسرعه عشان يمشون)
حور: يالله عاد تأخرنا.
هشام: يالله يالله..أنزلي وأنا جاي.


(وطلعوا هشام وحور للفندق إللي بيصير فيه الزواج)










وصل محمد بيت رانيا..


طلعوا الشغالتين وبعدهم بدقيقه طلعت رنا وهي ما تدري أن هذا محمد كانت جالسه وراه مباشرة وماسكه اللثمه بيدها عشان ما يخترب مكياجها..
محمد لمح عيونها بالمرايه تذكر أنها نفس عيون إللي صدمت فيه بالمستشفى هذي رنا أكيد.. بعد دقايق كانت رنا تتلفت وتدور حولها ..
الشغاله: عن إيش دور مس رنا؟.
رنا: لانا وين شنطتي جبتيها.
الشغاله: شنطة حقك ورى مع باقي أغراض.
رنا: خلاص بعدين اخذها.
(محمد سمع صوتها حس أنه يعرف هالصوت..فكر شوي..يشبه صوت ملاكه بس مو متأكد)
محمد يكلم السواق وعيونه ع المرايه يبي يشوف ردة فعلها: ما نسيتم شي كل شي جبتوه؟.
السواق: كل شي موجود بابا محمد.
(هنا رنا فتحت عيونها وارتبكت وصار جسمها بارد ناظرت قدام وشافت عيونه بالمرايه ويناظرها نظرات مو طبيعيه..وبهاللحظه تأكد محمد أنها هي)




بعد ما وصلوا الفندق..


نزلوا الشغاله والسواق ودخلوا ورنا كانت تاخذ أغراضها وشنطتها من السياره وهي ترتجف..فجأه سمعت صوت محمد وراها..
محمد: ملاكي.
(التفتت له رنا وهي للحين ترتجف..شافت ملامح حاده ووجه جدي..وماقدرت ترد عليه بس كانت تحاول تاخذ أغراضها)
محمد: إيه أنتي..عرفتك...(ولما ماردت عليه كمل كلامه)..ماتوقعت تكوني أنتي أبد.
رنا: أنت..أنت وش تقصد ما فهمتك.
محمد: لا فاهمتني..ياملاكي..فاهمتني.
رنا أخذت شنطتها: أنا تأخرت..(وجت بتمشي بس كانت ترتجف ما قدرت تاخذ الأغراض الكثيره)
محمد: خليها أنا أشيلها.
(رنا تركت الأغراض وأخذت شنطتها وراحت..أول ماركبت الأصنصير بتروح للقاعه بالدور الثالث فجأه دخل محمد معها وتقفل الباب عليهم..كان يناظرها بنظرات ماعرفت تفسرها)
محمد: وش إللي صار لك.
رنا: مافيني شي.
محمد: وليه الرجفه هذي..لأنه فعلا أنتي.
رنا: مو فاهمه قصدك.
محمد: حطي عيونك بعيوني وانكري أنك أنتي ملاكي..علقتيني فيك وتركتيني.
رنا قررت تحسم الموقف: أنت زوج أختي ع الأقل احترم هالعلاقه وتأدب.
محمد متأكد أنها هي بس حب يقفل الموضوع مؤقتا: أمرك يا أخت زوجتي.


(وصلوا القاعه وأخذت منه الأغراض بدون أي كلمه ودخلت وبنفس الوقت وصلت حور وشافت محمد عند الباب)
حور: حمووود.
محمد: ولدك أنا تناديني قدام الرجال حمود.
هشام: هههههههه أنا داخل وأنت خلص نفسك..(وتركهم ودخل)
حور تضمه: وحشتني.
محمد: حور فضحتينا.
حور: ههههههه طيب بس بقولك بكره نبي نروح لمزرعتي تعال أنت بعد.
محمد: طيب بس باخذ رانيا وأهلها موافقه..(بس عشان يشوف رنا)
حور: أوكي عادي حبيبي بس دامهم جايين خلها لبعد بكره عشان أجهز كل شي.
محمد: خلاص الحين ادخلي فشلتيني.
حور: هههههههه من عيوني حمووودي حبيبي.
محمد: والله لو احنا بالبيت ما قلتي لي كذا..ياحبك للفضايح...(وكل منهم راح لقاعته)






داخل قاعة الحريم..
عاليه وريم جاهزات شوي ودخلت عليهم جنان طبعا الفستان للحين ما جابه طلال..


عاليه: أوووووه وش هالحلا راح يقولون أنتي العروسه اسم الله عليك.
ريم: إيه والله محلوه كثيييير يابنت.
جنان مو عارفه شلون تقول لهم: لالا أنتم أحلى بكثير..إيه صح نسيت عاليه خالتي حصه تقول روحي لغرفة التصوير فارس ينتظرك.
عاليه: إيه الحين بروح..شلون مكياجي ضبط؟.
حور دخلت عليهم: يا حلوكم كلكم شوقتوني أسوي عرس وألبس مثلكم بس خلاص راحت علي.
عاليه: ههههههههه وش رايكم نصير أربع عرايس اليوم.
حور: أربع..بس أنتي وريم ترى.
ريم: لالا فيه وحده معنا للحين ما عرفناها زوجة طلال كلهم مو راضين يعلمونا من هي.
جنان: هههههههه يا أنكم بتتفاجئون فيها مفاجئه غير شكل.
ريم: الله يستر لا يكون شريره مثله.


دخلت عليهم أم عاليه..
حصه: عاليه يالله اخلصي باقي ريم بعدك وبعدها زوجة طلال..جنان يمه ممكن تجين تساعديني شوي.
حور: أجي أساعدكم بعد يا خاله.
حصه: لالا خليك مع ريم عقليها شوي..




وطلعوا جنان وحصه وجابوا الفستان لغرفة الملابس وساعدتها بالفستان وضبطت لها الطرحه وقالت لها ماتروح عندهم ما تبيهم يعرفونها..


وبعد أخذ الصور لعاليه وفارس..وراكان وريم..وطلال وجنان.. جا وقت الزفه..


أول زفه كانت ريم لأنها طلبت كذا..
كانت لابسه فستان أبيض توب مع طرز لؤلؤ في فوق ومن تحت دانتيل منفوش شوي طالعه حلوه كثيييير.
وانزفت على نغمات أغنيه ساخبه كانت جريئه شوي تمشي شوي وترقص ألين وصلت..




وبعدها زفة عاليه..
كانت لابسه فستان حوريه يبرز جمال جسمها ورشاقتها طبعا تخلت عن الكعب لأن رجلها توجعها ومراح تعرف تمشي به..
وانزفت على نغمات رومنسيه وكانت هادئه جدا .. بس كانت ريم ميته ضحك على مشيتها ..هي طلبت تكون زفتها الأولى بس عشان تضحك على عاليه..ووصلت عاليه وجلست..


عاليه: أنا أعلمك يالكلبه.
ريم: ههههههههههه بتشوفين شريط الزفه وتموتين ضحك بعدين.
عاليه: وأنا أقول ليه طلبت تكون زفتها الأولى تبين تشمتين بس.
ريم: ههههههه اليوم كله وناسه وشماته فيك من ساعة طيحتك الصبح ألين الحين.
عاليه: أقوووووول..متى بتجي زفة طلال.
ريم: خالتي قالتي بعد شوي بس يخلصون التصوير وبينزف معها.
عاليه: ليه طلال ينزف معها وفارس ما يجي معي ..وين العدل.
ريم: يالثوره..شلون يجي وأنا وين أروح..طلال عادي لأننا كلنا أخواته.
عاليه: إيه صح..ريم شوفي شلون الناس تناظرنا.
ريم: إيه يقولون ياحظ إللي أخذ هالقمر ريم.
عاليه: ترى أنا طالعه أحلا منك.
ريم: اسكتي ممكن تكون زوجة طلال أحلى مننا كلنا.


حور جت عندهم: اعقلوا شوي أنتم العرايس والعين عليكم.
ريم: وين هي جنان.
حور: والله مدري من راحت من أمك ما شفتها.
عاليه: ورانيا ما أشوفها.
حور: رانيا شفتها مع أمها من شوي.
عاليه: ناديها عشان نتصور سوا وبعد دوري على جنان.
حور: طيب بس اعقلوا شوي.


(حور راحت تدور على رانيا لقتها مع أمها جالسه وسلمت عليهم وجلست معهم)
هبه: وين الحلوه مختفيه مو كأننا أهل ليه ما تزورينا.
حور: والله يا خاله تدرين مشاغل وظروف..إلا يا خاله بأعزمكم بعد بكره أن شاء الله على المزرعه أبيكم تشرفوني كلكم بنجلس أسبوع هناك.
هبه: والله أحلا عزيمه نغير جو فيها ..أوكي أنا أعلم أبو رامي وإن شاء الله يصير خير.
حور: شلونك رانيا؟.
رانيا: بخير.
حور: وحشتيني.
رانيا ما تبي أمها تلاحظ شي: وأنتي بعد.
حور: بعد الزفه الجايه بنروح نتصور كلنا مع البنات هم قالوا لي.
هبه: أي زفه هيك خلصنا عاليه وريم وبس.
حور: لا يا خاله كمان زفة زوجة طلال أخو البنات.
هبه: ومن هي العروسه؟.
حور: والله للحين مو عارفين.
رانيا: طفوا الأنوار..الحين بتنزف ونشوفها.








عاليه وريم ينتظرون يبون يشوفوها..


نزل طلال درجتين ومد يده لها ومدت يدها ونزل وهي معه ويده بيها وهي مرتبكه مره ومنزله عيونها..
ريم: مو مصدقه عيوني..عاليه عاليه.
عاليه: هاه.
ريم: قولي لي أن هذي الكاميرا الخفيه.
عاليه: ريم..هذي مين.. لا تقولين......(وسكتت)
ريم: لالا تشبهها أكييييد.
عاليه: جنان.
ريم: إيه والله هي..جنان.
عاليه: بس شلوووون.
ريم: مدري مدري..خليهم يقربون ونتأكد من هذي أكيد مو جنان.






وعلى أحد الطاولات..
رانيا: جنان..مستحيييييل.
حور: لالا مو جنان هذي..شلوووون صار كذا.
رانيا: قومي نتأكد..(وبعفويه سحبت يد حور وقربوا من الكوشه شوي)


وصلوا طلال وجنان للكوشه وعاليه وريم للحين مو مصدقين ورانيا وحور من تحت محتارين..


طلال: هههههه أنتم شايفين أشكالكم كيف صايره سعابيلكم واصله لاخر الصاله.
ريم: جنان.
عاليه: إيه والله هي.
طلال: بسم الله عليكم..إيه هي جنان...يالله قوموا اوقفوا أبي أتصور معكم كلكم.
(وبعد ما أخذوا كم صوره سوا وجلسوا كل وحده مكانها)
ريم: جنان يالنذله.
جنان: وش فيكم تناظروني كذا ترى والله مره منحرجه لا تزيدوني.
عاليه: ليه ماعلمتينا.
جنان: لأن كل شي صار اليوم وأنا ماكنت عامله حسابي لشي.
ريم: بس شلون أنتي وطلال..تركيبه عجيبه..شلون تجمعتي.
جنان: ما أدري بس النصيب كذا..أمك كانت تعرف كل شي.
عاليه: أمي بعد ما قالت شي لنا.
ريم: حور ..رانيا ...تعالوا نبي نتصور سوا كلنا الشله.
حور: ألف مبروووك جنووون..والله كنت غاسله يدي منك هههههه.
رانيا: ههههههه صرنا كلنا متزوجات الحين.


(وبعد ما تصورا كم صوره وكل وحده منهم طلبت نسخه من الصور.. حست رانيا انها بجد افتقدت صديقتها حور وقررت انها تحاول ما تغار منها.. رقصوا حور ورانيا وراحوا سحبوا العرايس معهم ورقصوهم..)






خلص الزواج وصارت الحين الساعه 3 الفجر عاليه راحت مع فارس على بيتهم وريم بعد راحت مع راكان وجنان كانوا حاجزين بنفس الفندق وطلعوا لغرفتهم..

رد: "قلــــوب مرهقـــــة" .. رواية جديدة بقلمي

جنان: وين شنطتي.
طلال: داخل شوفيها.
جنان: فيه شنطه بس مو شنطتي أنا.
طلال: وهذي بعد شنطتك أنا جبتها لك البسي منها.
(راحت جنان فتحت الشنطه وما عجبها إللي جابه كله حق متزوجات)
جنان: لا ما أبي ألبس منها جيب لي شنطتي.
طلال: نسيتها بالسياره الظاهر.
جنان: انزل جيبها.
طلال: السياره مع أبوي مو تحت.
جنان: أوووف وش أسوي الحين.
طلال يبتسم بنذاله: ألبسي من هذي الشنطه.
جنان: وش ألبس..مافيها شي حلو.
طلال: أفا ترى هذا ذوقي.
جنان سكتت شوي: ذوقك قليل أدب.
طلال: ههههههههه أجل نامي بفستانك..(يوقف ويقرب منها)..كذا أحلا .
جنان: بس الفستان حار..تكفى جيب لي شنطتي.
طلال: قلت لك السياره مع أبوي مو معي.
جنان: أوووف شلون الحين.
طلال: قلت لك الحل بس ما سمعتي كلامي.
جنان: بروح ألبس وأمري لله.
(راح تدور في الشنطه لقت قميص نوم لنص الساق بس عليه روب طويل يسترها..لبسته وجلست ع السرير تنتظر الاذان تبي تصل وتنام..شوي ودخل عليها طلال)
طلال: ماتبين عشا أكيد جوعانه.
جنان: لا ما أبي.
طلال يمد لها يده: يالله قومي مراح اكل بدونك.
جنان: بس أنا ما أبي مالي نفس.
طلال: أنا جوعان يعني ما تبيني اكل.
جنان: خلاص أنت روح وأنا ألحقك.
طلال: لا ما أمشي بدونك.
(جنان نزلت من السرير وهي تحاول أنه ما يبين شي من سيقانها..بس تعثرت وطاحت جنب السرير لأن لحاف السرير علق برجلها)


جنان: اه.
طلال جا يجري: صار لك شي.
جنان: لالا.
طلال يناظرها: وش أسوي أنا لو صار لك شي الله يهديك أنتبهي.
جنان: ابعد شوي أبي أقوم.
طلال: وإذا ما بعدت.
جنان: طلال لا تحرجني ابعد شوي.
(طلال فجأه شالها ومشى للصاله)
جنان وهي لافه يدينها على رقبته: نزلني..
طلال: لا هذي مو أول مره أشيلك.
جنان: أخاف أطيح نزلني.
طلال: ليه أنا طويل لهالدرجه ولا مو واثقه بقوتي ترى أنا ألعب حديد.
جنان: خايفه تكفى نزلني.
طلال ينزلها على الكنبه في الصاله: خلاص نزلتي هههه خوافه.
جنان: عندي فوبيا الأماكن المرتفعه عشان كذا أخاف..أنت شايف كم طولك.
طلال: هههههههه حسستيني أني عملاق..بس من وشو الفوبيا.
جنان: وأنا صغيره طلعت فوق الدولاب وأخواني ابعدوا السلم وعلقت فوق من يومها صرت أخاف..ماشفتني في الأصنصير شلون كنت أرتجف.
طلال بحالميه: بس المفروض ما تخافي وأنتي بيدين إللي يموت فيك.
جنان: وش محببك فيني طلال أنا عاديه جدا.
طلال: اسألي قلبي لا تسأليني..بعدين من قال أنك عاديه..أنتي عندي أحلى بنت بالدنيا.
جنان: ربي يجبر بخاطرك.
طلال: يالله تعشي الحين وبعدها نقوم نصلي الفجر وننام بكره عندنا سفر.
جنان: سفر لوين؟..ووش السبب.
طلال: السبب شهر العسل..لوين على دبي ياقلبي.
جنان: دبي وناسه من زمان كان ودي أروح لها.
طلال: وهذا أنا حققت أمنيتك.
جنان: مشكووور طلال..خلصتني من سجن كان معذبني حيل.
طلال: ولو أنك وافقتي من أول كنت من زمان مخلصك.
جنان: كنت أحسب ل الرجال سوا.
طلال: كل الرجال غييير.. وأنا معك غيييير.
(جنان حست بخجل كبييير منه ومن نبله)










راكان وريم بالسياره..


ريم: مو كأنه الطريق صار طويل للبيت.
راكان: لأنه يا حياتي احنا مو رايحين للبيت.
ريم: أجل لوين..راكان أنا تعبانه حييييل أبي أرتاح.
راكان: يعني نكنسل السفر خلاص؟.
ريم: سفر..يعني احنا الحين مسافرين...وناسه ليه ما علمتني.
راكان: كانت هذي هي المفاجئه شلون تبيني أعلمك.
ريم: تسلم لي حبيبي ربي يخليك..طيب على وين مسافرين.
راكان: باريس.
ريم: واو مو مصدقه.
راكان: ههههههههههه شوفي التذاكر بالدرج عندك وتأكدي.
ريم تطلع التذاكر وتشوفها: باريس..إيه والله صح.. شلون جا في بالك فكرة السفر.
راكان: حبيبتي كل شي لك وعشانك توقعي أسويه ولو كان صعب علي.
ريم: حياتي أحبك أحبك أحبك.
راكان: ههههههههههه أول مره تقوليها..مو عشاني أكيد عشان باريس.
ريم: ههههههه والله لو أنك موديني الشرقيه كنت بأقولها.
راكان: وصلنا المطار أول شي بالحمامات بدلي الفستان والبسي شي مريح وامسحي المكياج ورنا رحله طويله...هذا الكيس جبت لك بجامه خذي البسيها وأنا بأروح أخلص الحجز.
ريم: طيب ..(أخذت الكيس ونزلت للحمامات).








بالنسبه لعاليه وفارس .. راحوا لبيتهم واليوم الثاني كانت رحلتهم لماليزيا..










في السياره في الحوش وقبل ما ينزلون..


هشام: عسى ما تعبتي اليوم.
حور: إيه والله كان تعب..بس استانست.
هشام: دوووم الوناسه حياتي.
حور: أنا حياتك!!!...(ونزلت وقفلت باب السياره بقوه).




هشام نزل وكان يناظرها يبي يشوف ردة فعلها لأنه مسوي لها مفاجئه..
شالت عبايتها علقتها في المدخل وفتحت الباب ودخلت ..وقفت مكانها مذهوله.. الشموع ترسم لها الطريق..كانتت تتبعها وتمشي شمعه شمعه وهشام مبتسم ويمشي وراها بهدوء...
طلعت الدرج وللحين الشموع ما خلصت كانت تمشي وراها لاخر الممر كانت تتوقع أنها لغرفة النوم بس خانها توقعها كانت الشموع تودي لغرفه في اخر الممر كانت دائما مغلقه وفاضيه.. فتحت الباب وزاد ذهولها..
كانت بتلات ورود حمرا على شكل قلب وداخله مكتوب اسمها..وبالونات على شكل قلب طاير بكل الغرفه.. وباخر الغرفه كانت كنبه طويله بيضا ومنثور عليها بتلات ورد أحمر وجنبها من اليمين طاوله عليها علب هدايا مغلفه وباقة ورد كبيره..
ومن الجهه الأخرى طاوله ثانيه عليها كيكه فيها صورتهم إللي اليوم تصووروها سوا وعصير وحاجات كثيييره..


حور كانت تمشي بكل الغرفه منبهره ومتفاجئه بإللي تشوفه..


هشام وهو يقرب منها: شفتي إيش كثر حبيتك.
حور تلتفت له: أنت..إللي سويت كل هذا.. ولي أنا!!.
هشام: إيه لك..اليوم زفيتي صديقاتك..وهذي زفتك أنتي الحين.
حور بدت عيونها تدمع: كل هذا لي.
هشام يمسح دمعتها: إيه لك أكيد..بس ليه الدموع ما أبي أشوف دموعك من اليوم.
حور تبتسم: فرحانه.
هشام: يعني خلاص رضيتي عني.
حور: وأنا أقدر بعد هالمشاعر كلها ما أرضى.
(هشام يشيلها ويلف بها من فرحته)
حور: مجنووون ..نزلني الحين ينزف كتفك.
هشام وهو ينزلها: اجلسي وشوفي الهدايا.
حور تفتح أول هديه: واو طقم ألماس..شكله غالي.
هشام: ما يغلى عليك والله.
حور حطت الهديه: تدري ما أبي الهدايا خلاص اكتفيت.
هشام: بإيش اكتفيتي بالطقم؟؟.
حور: لا..وجودك كان أحلا هديه صدقني.
هشام: كذا أروووح فيها أنا.
حور: كافي أنك بتضل جنبي على طول.
هشام: أوووه هنا جينا للنكد..ترى رفضوا تقاعدي..يقولون ما يستغنون عن خدماتي.
حور: لييييييييييه كذا..لا أنا أبيك مو هم.
هشام: عندي شهر إجازه وبارجع للشغل.
حور: شهر بسسس..
هشام: وش أسوي هذا واجبي للدوله هههههههه.
حور: وواجبك لي وينه؟.
هشام: لك شهر وباقي السنه للدوله.
حور: أصلا حتى أنا مراح أكون فاضيه لك عندي جامعه.
هشام: تكفين لا تدخلين طب تراك مو حنونه أبد.
حور: وجع..لا أبي اعلام..أحب الصحافه.
هشام: الله يوفقك أهم شي داخل الرياض مانبي تغريب.
حور: تطمن على قلوبكم جالسه أنا.










في سيارة محمد..


لأن سيارة أبو رانيا تعطلت أخذهم محمد معاه.. أبو رانيا قدام ووراه هبه زوجته وشايله غدير على رجلها ورانيا بالنص وورى محمد رنا..
حسين أبو رانيا: أتعبنا هالعرس الحين بس ندور للفراش من التعب.
محمد: إيه والله حتى بعرسي ما صار كل هذا التعب.
هبه: أبو رامي..حور قالت لي عازمتنا ع المزرعه بعد بكره وتبي مننا كلنا نروح نقضي أسبوع هناك.
حسين: إيه والله ما قصرت بنت الأصل واحنا محتاجين نشم هوا..بإذن الله ما نردها خبروها اننا جايين بإذن الله.
محمد: الله يحيكم يا عم عيوننا لكم.
رانيا: وناسه من زمان ما طلعنا صح حبيبي.
محمد وهو يناظر بالمرايه لرنا: إيه صح حياتي.
(رنا حست بنظراته وما أبدت أي ردة فعل)
حسين: أجل توكلنا على الله خبرهم ياولدي بنمشي بعد بكره الصبح.
رنا همست لأمها من ورى ظهر رانيا: ماما.
هبه: أيوه ماما بدك شي.
رنا: عارفين أني أدرس تيرم صيفي عندي دوام ما أقدر أروح عندي امتحان بعد بكره.
هبه: ايه والله نسينا ..لحظه أنا أعلم أبوك...يا أبو رامي.
حسين: سمي.
هبه: نسينا رنا تدرس تيرم صيفي وبعد بكره عندها امتحان.
رانيا: مو لازم تروح تجلس بالبيت مع الشغالات.
حسين: أوووه إيه والله نسينا..خلاص تداوم واحنا نمشي ثم نرسل لها السواق يجيبها مستحيل تجلس بالبيت لحالها.
رنا بهمس: ماما بس أنا ما أبي أروح.
هبه: سمعتي أبوك ما يقدر يتركك لحالك بالبيت وكلنا طالعين.
رنا: أووووووووووف..(بالصدفه شافت المرايه وشافت عيون محمد يناظرها وواضح من عيونه أنه كان مبتسم)






وصلهم البيت ونزلوا كلهم ورانيا جلست جنبه قدام..
رانيا: حبيبي ما اشتقت لي.
محمد: لا.
رانيا: لا تمزح قول الصدق.
محمد: والصدق لا..وش إللي يخليني أشتاق لك.
رانيا: حلاتي وصوتي وكلماتي.
محمد: مو مهمه عشان أشتاق لها.
رانيا: وقلبي إللي يموت عليك.
محمد: محد معذبني إلا قلبك.
رانيا: يعني أنت ماعاد تحبني.
محمد: رانيا قفلي الموضوع مالي خلق الحين.
رانيا بزعل: أجل ليه قايل لي تبي ترجعني معك البيت.
محمد: لأني شفقت عليك.
رانيا: شفقه..نزلني الحين ..نزلني..(وفتحت الباب والسياره تمشي تبي تنزل)
محمد وهو يمسك يدها: مجنونه أنتي..قفلي الباب بسرعه.
رانيا: لا نزلني هنا.
(محمد يوقف السياره على جنب ويعطيها كف ونزل قفل الباب ورجع يسوق ورانيا سكتت)
رانيا: أنا مو حيوانه كل شوي تضربني.
محمد: لأنك لأنتي ما تأدبتي..ضرب وضربتك ..وبعد هجرتك وباقي على نفس الأسلوب ونفس التصرفات.
رانيا: أنا أحبك..بس أنت ما صرت تحبني وتبي غيري.
محمد: رانيا يرحم والدينك اسكتي أبي أعيش بهدوء شوي.




(سكتت رانيا وراحوا للبيت وسط جو من الشحنات بينهم)








ناموا جميعا بعد ليلة كانت متعبه..










اليوم الثاني..


الساعه12 ظهرا..


صحى من نومه على صوت صراخا وألمها..
ألم غريب صحاها من نومها وصحى زوجها على صوت صراخها..
.....: وش فيك قولي لي ..وش إللي يوجعك؟.
....: اه بطني مو قادرة أتحمل.










إلى اللقاء في البارت القادم ^^


تحياتي ...
الكاتبه..الأريج

رد: "قلــــوب مرهقـــــة" .. رواية جديدة بقلمي

أنتظروا البارت القادم مشوق وخطير جدا :)

رد: "قلــــوب مرهقـــــة" .. رواية جديدة بقلمي

مشكوووووووووووووره ي قلبي انك نزلي البارتات
تحمسسست بقووووووه حرام
المهم اتووقع انو حوور هي اللي توجع
وننتظر البارت القادم على احر من الجممر

رد: "قلــــوب مرهقـــــة" .. رواية جديدة بقلمي

متى يجي البارت القادم متحمسه

رد: "قلــــوب مرهقـــــة" .. رواية جديدة بقلمي

بارت رائع جدا
بانتظار البارت القادم
تحياتي ولا تطيلي

رد: "قلــــوب مرهقـــــة" .. رواية جديدة بقلمي

الحين ينزل البارت حبايبي..