.. زهـايـمر حكـي .~

**تنهيدهـ** · 01-03-2017, 07:56 AM

رد: ✒ .. خآصرة حرف رمآدية

بعض الناس مثيره للشفقه في اسلوبها في طريقة تعاملها مع الغير
في كلماتها المنتقاة يعني باللهجه العاميه نقول لها هياط .. وهالنوع
من الهياط غريب حبتين .. كيف يعني !!
تعرفون اللي يهايط وماعنده شي يستند عليه .. مثل الطفل اللي
يهايط على راسك بسلاح من محل العاب

هالنوعيه طبعا نقول عنها جاهله مش بمعنى الجهل اللي ضد العلم
واللي معناته عدم المعرفه لأ .. مب هذا أبد ..
نوعية الجهل هذي منفرده مالها حل .. يعني هالشخص جهله معناته
انه فتحت له أبواب المعرفه ورفض الدخول مره ومرتين وثلاث ..
ظنا منه أنه خلاص مكتفي مب بحاجه لعلم أكثر فيه غطرسة وغرور ..
طبعا نقاش هالنوعيات مرفوض لأنه صح وكلامه هو اللي يمشي
واللي ماعليه غبار والبقية كلهم غلط مب مشكلته ..
مب قوة شخصية ولا نوع من الشر اللي به لأن ماعنده ماعند جدته
ممكن تكون هالشخصيه مرتع للشر لكن مش شر ..
لأن الشر محتاج علم ودهاء وفطنه وتزود بخطط واستراجيات عليها
القيمه ..
لكن هالجاهل مايملك من الشر إلا العبثيه والخبطات العشوائيه الدلخه
والدلخه مرااااا

علشان كذا أحب أضيف له نقطه مهمه انه مايخطئ لأنه أساسا بكبره خطأ
ولايظن لأنه يعتقد واعتقاداته بالنسبه له صحيحه ميتين بالميه ولحد
يحاول يناقش مثل ماقلت سابقا

هالنوعيه موجوده في الحياة الواقعيه وموجوده في مواقع التواصل
الاجتماعي .. ودائما وأبدا حلها واحد ماله حل ثاني ويستحيل ..
اللي هو التجاهل أو التغافل .. بمعنى انك تخليه يفند ويبحث ويحلل
ويتتبع ويطلع بنتيجه يستفزك بها .. لكن إذا طنشته ياكل نفسه ..
لأنك تعاملت مع الغباء بشكل منطقي .. ومعقول وتسذا ..

بعضهم يسعى انه يلفت الانتباه شوفو فلان به كذا وكذا وكذا .. أي
طيب وبعدين !! انا وش دخلني بالسالفه هو حر

لكن حتى لو كان ردك كذا مايتحطم لأنه محترف منغصات ويعنني
انا اللي أفهم انت شدراك

بيرجع لك بسالفه جديده وبرضه
دلخه لأن مافيه أمل تجي منه سوالف مافيها ثغرات مرااااا مافيه أمل ..
الزبدة نقول حلهم التطنيش ومابه حل غيره ..

بعضهم يطنش هالنوعيات ويبقى بقلبه شي لكن لو وضعهم موضع المرضى
اللي يستحقون الشفقه والدعاء .. له أجر الدعاء لهم .. وكسب طهارة
قلبه من كل سوء .. خذو المعنى الحرفي لكلمة مرضى والله مايبقى
في قلوبكم شي وتشعرون براحه عظيمه ورضا عن ذواتكم ..

ومثل ما يقولونها البدو في قديم الزمان في نصيحتهم المشهوره :
لا تتورط بكيس فحم إن وقعت عليه اتسخت ثيابك وإن وقع عليك اتسخت ثيابك ..

يعني في كلا الحالتين السوء لك .. وانت ابخص عاد ..

وبس والله ..~

**تنهيدهـ** · 02-03-2017, 11:23 PM

رد: ✒ .. خآصرة حرف رمآدية

أحس قلبي فيك حي

**تنهيدهـ** · 05-03-2017, 01:39 AM

رد: ✒ .. خآصرة حرف رمآدية

صبحكم الله بالخير يا آل عبير ..

صار لي فتره نفسيه مرااا ما اكتب بشكل طبيعي ومدري وش صايبني بس
ماعليه ترى زانت الحين وبديت اقول لنفسي هاه وش تحسين وكأنها بدت
تفهم علي وتسذا

ابوي زمان ويوم كنت في سن 14 سنه و 15 كان يقول لامي اللي بيتزوج
تنهيده ياحظه

.. وأنا كنت أعطي خواتي نظرة الـ اسمعو وش يقول عني
واشوف نفسي عليهم

بس يعني والله للآن فعلا يا حظه ويحمد ربه
على انه بتحبه وحدتن مثلي وتقول به هه

..
باقي نزعة الثقه مسيطره علي .. بالرغم من أنه خفت كلمات ابوي وايحاءاته لي ..
لأنه حس اني مستحيل اتغير في نظرتي اللي تقول اني مب لازم أتزوج
شخص مراا واو لأني مب واو اصلا .. على قولة وحده من صديقاتي
ليتني مب قبيليه والله انه اصرف لنا

لأنهم ماعندهم نظرة الـ وش يقولون
عنا ال فلان ومسارهم منتاز بالمرااا .. غالبية اللي أعرفهم سذا .. بس
ما أنكر انه في قبايل لهم نفس النظره بس قله وحنا مب منهم طبعا

المهم ومالكم بالطويله .. اللي تغير اني صرت اشوف الحياة بشكل ابسط
مما هي عليه ..
يعني الحياة عباره عن قصه قصيره مش مهمه تفاصيلها الأصولية بقدر مايهم فيها
انك تكون انسان بمعنى كلمة انسان .. ترتقي بنفسك بشكل يرفع
قدرك عند الله ولا ترى الباقي جداااا سهالات ..

سبق واسلفت انوه كنت أقول أنه الأجنبي أفضل من السعودي بشكل خاص
والخليجي بشكل عام والعربي بشكل أعم ..
لكن مع الأيام اكتشفت انوه تفكيري كان محدود ومحدود جدا جدا .. لأن جلست
فتره أقرأ واتمعن في طريقة حياة بعض المجتمعات أجد إن النوعيات كلها
اللي اشمئز منها واكرهها ومنبوذه في المجتمع اللي اعيشه .. موجودة
بجميع المجتمعات في شتى بقاع العالم ..

فآمنت انه الظروف الملقاة على عاتق كل شخص من مجتمعه والأيام السيئة
مع الحسنه .. مع مقدار ما يثقف به الشخص نفسه .. كفيله بتشكيل شخصياتنا ..
وانه الحكم على مجتمع بعموميه ظالمه هي من الجهل اللي ما نلقي له بال
طول عمري كنت أسأل سؤال واحد بس وماعرفت اجابته إلا بعد بحث طويل
وتناسبت هالاجابه مع قناعاتي اللي ما أخجل من إظهارها ..

سؤالي الدايم كنت أقول ليه البعض يشوف انه فلان وفلان أقل منه حسب
ونسب وأنه المفروض القبيله الفلانية هي اللي تتصدر الكون باستحقاق !!
كلن عاد يجاوب بنفسه جوابه البديهي اللي دايم يردده .. على بال ما
اتقهوى واروق للتدوينه الجايه لأن ذي طاااالت مرااا

برب ،،

**تنهيدهـ** · 05-03-2017, 05:24 AM

رد: ✒ .. خآصرة حرف رمآدية

طبعا اول شخص دايم تسأله عن هالمواضيع اللي تكون أنت مستاء منها
داخلك وحاب تلاقي جواب مقنع وبنفس الوقت إنساني وبسيط .. لازم
يكون من أهلك حتى لو طرحت السؤال بشكل غير جدي المهم انك تسمع
اجابه تخليك تفهم كيف يفكر اللي حولك ..
فأول واحد طرحت عليه سؤالي السابق كان بابا طبعا .. ف كان رده
المشهور .. إنه الله سبحانه وتعالى قال " ورفع بعضكم فوق بعض
درجات " وناقشني فيها نقاش بعيد كل البعد عن ماترمي له الآية ..
أو عن المعنى الحقيقي للآية ..

هو عارف اني مجهزة ردي دايما .. ومازلنا كل شخص فينا على نفس
فكرته ومتعايشين ..
طبعا انا قلت له لو تلاحظ .. لمأ تكلم الله عن الرفعه وعن الدرجات
والفوارق كانت لام السببيه تشتغل على طول وتوضح أسباب الرفعه
وبطريقه واضحه جداااا ..

راح أجيب لكم الآيتين علشان تكون واضحة أكثر ..

في سورة الأنعام قوله تعالى :

وهو الذي جعلكم خلائف الأرض ورفع بعضكم فوق بعض درجات
ليبلوكم في ما آتاكم ۗ إن ربك سريع العقاب وإنه لغفور رحيم ..

وفي سورة الزخرف قوله تعالى :

أهم يقسمون رحمت ربك ۚ نحن قسمنا بينهم معيشتهم في الحياة الدنيا
ۚ ورفعنا بعضهم فوق بعض درجات ليتخذ بعضهم بعضا سخريا ۗ
ورحمت ربك خير مما يجمعون "

طيب هذي الآيتين وواضح لكم فيها أسباب الاختلاف والفوارق وأنه ابتلاء
مش أكثر .. لكن فيه ايه بنفس المعنى وكان فيها السبب الابسط والختام
اللي يحتاج تفكر ..

في قوله تعالى في سورة الحجرات :
يا أيها الناس إنا خلقناكم من ذكر وأنثى وجعلناكم شعوبا وقبائل
لتعارفوا إن أكرمكم عند الله أتقاكم "

ومعنى التعارف هنا يعني نعرف فلان من بني فلان وبس .. ولو كان
الهدف منها الفخر والاعتزاز وشوفة النفس ماكانت صعبه على الله
أن يقول لتفاخرو .. لكن المغزى واضح في ختام الآية لأن البعض
بيكون متحجر ويتفاخر بنفسه بشكل سخيف وسيء جدا ..

وترى كد طحت في ناس تجادل وآخر الجدل تجي تقول لك اعرف هذا
ومقتنع به لكن الناس والعادات والتقاليد هو اللي ماشي سوقها ..
وانتي أدرى اعذريني

..
نفس فكرة الجاهليين اللي كانو يقولون هذا ماوجدنا عليه اباءنا وكانت
العادات أقوى من انها تغير دينهم .. وماتو عليها .. والله العالم
فيهم وفي مصيرهم الآن ..

مدري اذا انتم فاهميني ولا لا بعد .. الزبدة ومن الآخر ..
خودافس

**تنهيدهـ** · 06-03-2017, 10:13 AM

رد: ✒ .. خآصرة حرف رمآدية

‏‎

تدري وش اللي أذكره لك ولاهان
رعودك اللي دمرت لي هضابي

كنت الوطن بالرغم من كثر الاوطان
و يا كثرها عقبك حكايا اغترابي

بوح ..

**تنهيدهـ** · 08-03-2017, 01:19 AM

رد: ✒ .. خآصرة حرف رمآدية

كل العلاقات اللي نبتديها في حياتنا بشكل جديد صداقه أو عمل أو
أي شي آخر يصادف معرفتنا ببعض الأفراد في المجتمع تكون بدايتها
هاديه جميله ومافيها أي سوء ..
طبعا هذي البدايات ولابد انه يسبقها إعجاب بالشخصية وما إلى ذلك
وانتم أدرى يعني بالشعور الأول ..

البعض مع أول شعور يحسه ومع اول إعجاب يفهم أن إحساسه وشغفه
هذا حب .. لا ترى مب كذا .. انت قاعد تدخل نفسك في متاهه مالها
أي نهايه .. وتتعب نفسيتك جدآ ..
الحب يكون له طريقه ثانيه بعيده كل البعد عن أول شعور وأول شوف
وأول كذبه وأول حرف وووو .. لحد يستهلك كلمة حب بالطريقه هذي
وفي الآخر يجي يقول خيانه وموت ضمير وما إلى ذلك ..

لأن البدايه كانت منك .. انت اللي اسأت فتحمل نتيجة اساءتك .. ولا
الطرف الآخر عادي شافك ساذج وحب يتسلى ومشت عليك انت ..
هالشي بالنسبه له عادي لأن هذي أخلاقه اللي استعجلت انت وما
عرفتها .. ولا انتظرت إن المواقف تثبتها لك .. لأن مب كل شي
في الحياة مبني على الصدق ومب كل الناس راح تعاملك على انك
ملاك ونازل من السما ..

الأفضل ان الشخص يتروى قبل ما يزج بقلبه في الهاويه .. وش معجلك
على الأيام السيئة والهم اللي تبي تعيشه .. يعني كل هذا فراغ عاطفي
أو مراااا ماعندك شي تسويه ..
ابدأ علاقاتك بصداقه .. بأي شي ثاني .. اكتشف فيها الشخص اللي
انت تميل له .. وكون فكره .. عن أسلوبه وعن طريقة تفكيره ..
ولاحق على السوء .. وانت ابخص عاد بنفسك ..

وبس والله ..~

**تنهيدهـ** · 09-03-2017, 09:36 AM

رد: ✒ .. خآصرة حرف رمآدية

صدمني البعض بتعليقه على تدوينة الحب وحسيت قد ايش يعني
مبينه لكم اني بدون إحساس

.. يعني انا اصلا مب ضد هالشي
لكن كل شي له حدود .. وله هدف .. مب الواحد يتجاوز ويقول فلانه
قالت .. عاد والله من جد انا مالي دخل في كل ماهو بعيد عن الحب
الحقيقي واللامشروع إنسانيا وانتو بكيفكم ..

ءءءءانتي قد حبيتي من قبل أحسك ماتعرفين تحبين

هنا مدري ارد على الجزئية الأولى ولا الثانيه ^-^ .. بس جايزه
لي الثانيه لأن سبق ورديت على الأولى وما حب أكررها كثير لأن
مالها استحقاق يخليها سالفه أو حتى ربع سالفه ..
المهم .. على طاري ماعرف أحب .. أي والله ما أعرف أحب كل
يومين واجدد .. ولا اعرف اتسلى .. ولا اقدر أكون مش واضحه
لنفسي وللشخص المقابل .. بعدين مب لازم أحب علشان أكون
مستانسه ومروقه .. راح يصل البعض لعمر معين يعرف فيه
قد ايش خاطره وقلبه غاليين عليه .. وإن هالامور إن جات من
شخص يستاهلنا ولا مب لازم تجي .. مدري شفيكم رومنص
بزيادة ترى قلة قليله ونادرة جدا جدا جدا جدا اللي تعرف معنى
الكلمه واتوقع انها شبه منقرضه ..

خفو علينا يالقيسيين

.. والله ويسرني اني ماعرف أحب إلا
اللي أحسهم من جد يستاهلون .. هنا اقدر اقول الناس درجات
ولا ترى انا مبسوطه اني جحفه ترى مانسيتها

وازيدكم من الشعر بيت اذا أفكر بمشروع بشتري لي كم حبة ناقه
مع عيالها واكرمهم كم شهر وابيعهم واسكن في البر واشري
لي شاص علشان مشاوير مراكز الاهتمام بالبشره والشعر ما ابي
أسود بسرعه من الشمس

يعني حلو نكون بس بالويكند بالبر
وباقي الأيام في لندن << يالتاجره انتي ..

ويا حبيبيه صباح الخير

**تنهيدهـ** · 09-03-2017, 10:00 AM

رد: ✒ .. خآصرة حرف رمآدية

عن الله أحدثك

**تنهيدهـ** · 12-03-2017, 02:48 AM

رد: ✒ .. خآصرة حرف رمآدية

رحم الله امرءا أهدى إلي عيوبي

برضه الكلمه الطيبه صدقه

وانتو ابخص عاد ..

Okoul

https://tan5.sarahah.com

The Link of YOU

برب ،،

**تنهيدهـ** · 12-03-2017, 03:38 AM

رد: ✒ .. خآصرة حرف رمآدية

آخر اللحظات صرت أحاول النهوض بنفسي للأفضل .. من جميع النواحي
يعني .. لكن سبحان الله من كثر الضغط على نفسي ومساير الناس
صرت كل ما ابتسم وانا اداري شعور مكبوت يبين على بشرتي إرهاق
الف عام من التفكير وآخرتها عمتي اليوم تقول لي خلاص ماعاد بقلبك
وسع بكسر الواو طبعا .. يعني اني ارهقت لدرجة أنوه خلاص لاتحسسين
أحد انك تمام وتبلعينها ترى واضح عليك ..

المشكله اني جوزائيه وقراراتي دايما تحب تفشلني من نفسي ...
عادي جدا الاقي نفسي احلف ما أكلم شخص أحبه وبعد دقيقه اكتب
وشلونك :) .. قلبي رهيف وبسرعة يحن .. لكن مب دايما والله
أوقات يجيني شعور اللي أقسى قسوة شينه وفي داخلي ألف صوت
يقول لي ترى انتي الحنونه اللي واللي .. لكن قسوتي تعزز لي
وتذكرني انه مب لازم اتساهل باحساس نفسي واجرحني زود ..
واكمل بدون ما التفت لأني مؤمنه جدا إن راحتي في تجاهل أشخاص
وكلام .. ومواقف وذكريات وماضي ..

الحياة علمتني أمد يدي للكل وقلبي للي أشعر انه يستاهل قلبي بدون
أي مقابل ولا انتظر مقابل .. لكن أن لقيت صفعه أو إهمال .. على
أول رحلة في مراكب اللاعودة أحجز لي مكان .. صبري وتغافلي دايما
حاضر لكن في الوقت اللي ما يتوقع الشخص اني بغادره .. أغادر بدون
علم مسبق .. لأن مافيني اشرح ولا ابرر ولا اسمع بما انوه كل شي
واضح وضوح الشمس .. وانا اللي كنت احسسك اني ما اشوف بمزاجي

الزبدة .. أحب أعطي نبذه عن طبعي اللي يجوز لي ومايحوز لي أحيان
لكن عندي قناعه تامه اني متوازنه حتى لو طبعي شين .. لأن وبكل
بساطه مابوه حدا كامل ..

خودافس ،،

.. زهـايـمر حكـي .~

تعليق

تعليق

تعليق

تعليق

تعليق

تعليق

تعليق

تعليق

تعليق

تعليق

google Ad Widget