تغريدة صباح } ..

**ShahrzaD** · 19-07-2016, 02:21 PM

رد: تغريدة صباح } ..

وردة الأمل بخير وان شاء الله انها مبسوطه ومستمتعه :)
مشغوله في بريطانيا بالدراسه وأوقات تنشغل بالتنقل والسفر.
ماهي مطوله هناك ممكن شهرين ثلاثه بالكثير.. معلومه مش دقيقه مره ^^
باقي طيف اللي مالها حس مرره ربي يطمنا عليها وتكون بخير وأحسن حال.

**ShahrzaD** · 21-07-2016, 01:37 PM

رد: تغريدة صباح } ..

وراحت إجابتي في جبهتي .
يكفيني شرف المحاولة ^^
والله الاجابة الصحيحة جت ببالي وقلت اش هالقراءة البنقالية، مشكلة التسرع

كان تحدي جميل ومفيد صراحة ان شاء الله مايكون الأخير.

**ShahrzaD** · 25-07-2016, 03:59 AM

رد: تغريدة صباح } ..

صباح الفل

أتمنى تكونو سعيدين ومستمتعين بهالإجازة الطويلة أما بالنسبة للي بدو دواماتهم أقوللهم مافاتكم شي، ملل
بتقولون نبغى نشبع نوم بقول لكم " والله مشكلتكم مو مشكلتي" هههههههه ، تذكرت حوار دار بيني وبين بنتين في أولى إبتدائي،
قالو انتي سنه كم ؟ قلت أنا خلصت المدرسه كلللها، طالعو في بعض في دهشة وقالو الله نبغى نكون كذا ننام وناكل وبس ماورانا مدرسه، وقتها حسيت في النعيم اللي انا فيه

صراحه مفتقده أولاد أختي، كل ما أكتئب شوفتهم تجيب لي العافية

.. مو بس أنا حتى أبوية مو طايق فراقهم.. البيت أصبح ممل بدونهم.

**ShahrzaD** · 25-07-2016, 04:21 AM

رد: تغريدة صباح } ..

( إلى من يحتاج أن يتعرف على قدرات المرأة،، فليراقب الأم )
- Shahrzad ^_

أتعجب من سرعة ردة فعل أمي وردودها الحكيمة، كلنا أخذنا دروس غيرت أسلوبنا وطباعنا بمجرد إنها تقول الكلمة المناسبة في وقتها وفي الزمن الصحيح. أتذكر لما راحت تعتمر مع أخوي وزوجته وهو يلاحقها ويقول " أمي لا تضيعين " ألتفتت له وبنظرة ساخرة وقالت " ارعيت بك وانتبهت لك طول السنين والحين أنا اللي أضيع ؟" ههههههههه قال " ايه صح

اصلا امي ماشاء الله تحفظ الطرق وتخارج نفسها من أي شي في الحياة ربي يحفظها . أما أنا من كثر ما كنت أتلقى الثناء في شخصيتي ورزانتي في سن صغيرة فأخذت مقلب في نفسي، وفي وسط حديث بيني وبين أمي طلع الغرور حقي

طبعا جت نظرتها الي تجي بعدها الدروس ههههههه وقالت كلام معناه " على مهلك تراك شطحتي " واستحيت على دمي وتبخر الغرور

. والأحلى إنها ما تصدم معانا إذا تهورنا أو فكرنا بشي ما تتوقعه.. تساير وتسلك وتكون معانا لين تشوف آخرتها ودايما ربي يكون معها بحيث تلاقي النتيجة اللي تسرها ، واللي تخاف منه يروح. لما أتابع المتحدثين المتخصصين في المجال النفسي كانو يثنون ع الأم اللي تتصرف كذا مو تهجم على الأولاد وقت الخطا إلا تتقرب منهم أكثر في هالوقت وبكذا نفسياتهم تكون متزنة وطبيعية ويتعلمون من تجاربهم بشكل صحي.

في متخصص في التربية يقول كل السنين اللي تعلمتها في التربية، لما جبت أولاد ما طبقت هالدروس لكن كل واحد فيهم تعاملت معه باستراتيجية مختلفة، يعني باللي ناسبه ويقدر يلاقي نتيجة معاه، وهو صادق لان كل طفل له شخصية واسلوب تعامل أنسب وأكثر فعالية، وسبحانه اللي يلهم الأم أو الأب التعامل الأسلم والأصح :)

**ShahrzaD** · 29-07-2016, 03:52 PM

رد: تغريدة صباح } ..

مساء الورد

الماما مسافره.. وخيو وأهله بيسافرون اليوم.. ونص المصيفين الموجودين مسافرين اليوم ولا لحقت اشوفهم.
تمنيت معي باص ألف على شلتي اللي جو يصيفون وزميلات الدراسة وقريباتي وأعمل لهم رحلة سياحية هستيريه.. في المناطق الجميلة في ديرتي والديار المجاورة والمتاحف والملاهي والشاليهات الجديدة.. وبكذا أكون شفتهم وشبعت منهم وجمعتهم وبسطتهم.. وياسلام ع الأحلام :) .

البارح كان عندي ٣ عزايم في يوم واحد.. غدا وعصرية وعشا.. ما أبالغ والله. لكن رحت بدال أمي لعزيمة الغدا وبرضو رحت لعزيمة العصرية لكنها كانت في النماص يعني مدينة مجاورة والضباااب كثيف من باب بيتنا لين باب اللي رحت لهم .. بدال ما أوصل في نص ساعة، اخذت ساعة وربع من شدة الضباب ومعاه شوية مطر. أما عزيمة الليل والله مافيني هههههههه وكمان رايحة اللي في العصر بدون استئذان أو مشاوره لأبويه عشان ما أسمع كلمة " لا"

إتصل يسأل ويني عشان اروح معاه لعزيمة الليل قلت أنا في النماص معزومة ( صدقت اني أمي وشطحت في الدور

) قال اش وداك ؟! لاحول ولا قوة الا بالله ههههههههه المهم تم تحلليل اليوم بنجاح.
هو معاني من أختي اللي ما تطلع مررررره وأنا ما اجلس، يعني مافي وسط، أساسا أنا مقروده واحب البيت لكن أغصب نفسي لبعض الطلعات عشان ما أكتشف إني كنت في روتين ممل لفترة طويلة وأكتئب. وشكلو مافي طلعات ولا روحات وجيات مادام المصيفين رجعو للدوامات :).
فرصة للعودة للرياضة وباقي الشغلات المتراكمة..

..سلام ..

**ShahrzaD** · 01-08-2016, 05:34 PM

رد: تغريدة صباح } ..

سلام عليكم جميعا

الحمد لله اليوم مروقه مع الأجواء الماطرة.. امطار وضباب مستمرة أنام وأصحى وهي باقي يارب لك الحمد والشكر عقبال المدن الي تطبخ الحين

مع الأمطار جا برد يعني درجات الحرارة في الطعش طعش يعني تحت ال ٢٠ والان لابسه شيلة راسي بيصدع من البرد زي منتو عارفين انا صديقة الدفا ^^.

والله النفسية ودي أبخ عليها مثبت عشان ما تتغير.. الله يديمه من روقان

البارح مدري قبله كله منفسنه واكلم بنت عمي الي على طول كئيبه وكل سوالفنا " الجنة الجنة " كاننا عجايز ههههههههه بس صراحة لا سولفنا بس نضحك من أول ما ترد لين أقفل بوجهها،، لان تعرفون لا جينا نتوادع فجأة يطول الوداع والدعوات فأختصر وأقفل وأنا ممهدة اني بقفل اذا زودتها

اللي مايعرف ناس يمون عليهم كذا مسكين.

أظن مو بس أنا اللي روقت حتى أبويه.. الفترة اللي راحت ناس من الجماعة ضيقو صدره وطولو لسانهم معاه وهو مايرد عليهم.. والبارح جا شايب من قبيلة ثانية يهديه درع نيابة عن قبيلته يشكرونه على مجهوداته.. قال لي تعالي شوفي الهدية والكلام الحلو مو مثل قبيلتك ! قلت أنا ؟! مين قبيلتي هههههههههه أنا مش عارفني

. أنا وأختي لما يجي موقف يزعل أبويه من اللي حولنا، نفرح نبغاه يودينا جده

بس ماش صامد ويحب ديرته.

**ShahrzaD** · 01-08-2016, 07:53 PM

رد: تغريدة صباح } ..

أقتبس موضوع طرحة أخوي " لاشيء يستحق"
وبعلق عليه...

السلام عليكم
في موضوع يقرقرع في داخلي
يخص بنات حواء ,’
ولا مانع اشوف تأييد كلامي او رفض من بنو جلدتي.,’

الحين يابنات هل مدى الغيرة عندكم
لها حد
ولا مافي أمل يكون لها حد لدرجة
أن لو يقول زوجك ولا اخوك لزوجته قدامك
من كلام الي تستحقه كل زوجه
من زوجها او اخوها تنقلب الحال
وتصيري نفسيه وتزعلي.,!!
وانا هنا اقصد بكلامي عن الغيرة
يازوجة الغيرة العمياء على زوجك
صدقيني وانا اعتبرها مساعدة مني لكم
لو زوجك ابتعد عن اشياء امامك
علشان يفتك من صليط لسانك
تلاقينه من وراك سرداحي مرداحي
فاحسلك اجذبي زوجك
وخلي الثقه والبساط الاحمدي بينكم
واكيد ان الزوج راح يعرف الي عليه والي له.,
اتجاه تصرافته وكيف يراعي مشاعرك
لكن انه يمسك بنت اخته او اخوه ولا اخته الي عمرها اقل من سنه
ويقولها الكلام الي تستحق كل طفله من دلع
ترزئين عليه بؤوزك الي لو يمر احد من قدامك
تعكرف من طوله كذا لا قوييه
الزعل الي ماله أي فائدة
وش الحل وش الطريقة
لحل هذا المشكلة الي اشوفها
مشكله طالعه بشكل زاياد اليومين هذي
.,

المهم شي طلعة في قلبي
مادري هو انا لحالي الي اشوفه كذا
ولا انتو معي ,’
والي زعل من كلامي هذا
ادري انه من أهل
#حزب-الغيرة-الي-مالها-سنع

أول ما قرأته تنرفزت من موضوع الغيره اللي كذا بالذات وكويس إني ما أستعجلت بتعليقي وانشغلت لين تذكرت شغلات عن هالموضوع، تذكرت مواقف زي كذا بس حصلت من الرجل بعد يعني مو بس من الانثى،، وكمان حصلت بيني وبين صديقة الطفولة يعني مو شرط بين زوجين،، أول ما يحصل لنا موقف كذا نستنكره ونتضايق واحنا ما ننلام صراحة .. يعني صديقتي هذي كانت تزعل وتتنرفز اذا بس حست اني انشغلت ببنت غيرها وحست ان في احد ينافسها بوقتي ومحبتي.. صحت عليها قلت خير؟! حسستيني اني زوجك وش دخلك هههههه بس بعدين والله فهمت انه من قوة محبتها لي وما يتصرف كذا الا اللي يحبك بجد رغم ان فيها تمادي لكن يخرج أحيان الشخص بتصرفات ما ينتبه لنفسه انه بالغ في غيرته وكذا.. اذكر امي قالت لي أن أبويه كان يغار من أخوية الكبير لما جالهم ونطق بكلام يضحك بس بين قد ايش انه كان يغار. المهم اني تعلمت انو محد يخرج بتصرف غبي شوي في غيرته إلا من شدة الحب، لكن اللي علينا إنه نرد بأسلوب يبين انه غيرتك هذي مو في مكانها إنتي مكانتك بقلبي ومن هالخراط اللي يبدع فيه البعض

وممكن يكون الرد ساخر بلطف عشان اللي غار يصحصح شوي ويرجع لعقله.. مو زي ردي الجارح لصديقتي بس كنت مستنكره هالاصرف ومو مستوعبته لكن الحمد لله ماتغيرت محبتنا ولازالت باقية.
أتطلع لرأي البقيه كمان :)

**ShahrzaD** · 07-08-2016, 03:20 AM

رد: تغريدة صباح } ..

" ‏مابين -كبر الطموح- وقلة الحيله
‏تمر الأحلام مدري كيف احققها ! "

**ShahrzaD** · 07-08-2016, 03:29 AM

رد: تغريدة صباح } ..

أنا هالفترة برعاية "مالي خلق".
لذلك متحاشية المدونة ما أحب أعدي أحد عدوى مو زينة، أحب أعديكم بشغلات حلوة فقط.
بالنسبة لموضوع أنة حرف الرائع ما أذكر انو في أديب أفضله، رغم اني أكثر من المطالعة والقرائة لكني أميل للاطلاع على المعلومات والفائدة، ما أذكر ان في كاتب أدمنته وكذا. لكن جاري البحث في مخي ممكن في أديب غايب عن بالي حاليا، خصوصا ان مخي تراجع في قدراته وسار يخوفني عليه.

أبشركم تم قبول أختي في أبها الحمد لله وراح تعيش مع صاحبتها هناك ويجريو يكونو مسؤولات عن انفسهم لأول مره، المطمن أن اختي الكبيره معهم بنفس الديره لكن أختيني هذول ما يتفقون

لذلك بتكون أختي مع صاحبتها في سكن عند الكلية ان شاء الله.

أما أنا لا جديد، ما غير انحف خمسة كيلو وأردها اذا طفشت ^^"
يالله سلام

**ShahrzaD** · 08-08-2016, 09:22 PM

رد: تغريدة صباح } ..

مساء الخيرات

ياجميلين .. الاجازة طويييلة لا تضيعونها فقط في الترفيه والكسل، فيه فرص حلوة أكيد وما تتفوت، مثل الدورات المجانية عن بعد من برنامج "دروب" ،، من هنا

برنامج التدريب الإلكتروني

https://www.doroob.sa/ar/individuals/summerecamp/?utm_source=Hafiz&utm_medium=Email&utm_campaign=eSummer%20Camp#available-courses

'برنامج دروب' برنامج وطني ترعاه وزارة العمل، يقدم الدعم التدريبي للراغبين في زيادة فرصهم التوظيفية في سوق العمل. يحقّق برنامج دروب ذلك من خلال تقديم مقرّرات إلكترونية تهدف إلى تطوير المتدربين في عدد من المهارات العملية التي يشتد الطلب عليها في سوق العمل، كما و يمنح برنامج دروب شهادات معتمدة لدى عدد من كبار الشركات السعودية تصادق على المهارات التي اكتسبها الأفراد المشاركون في الدورات التدريبية

فيه أفكار روعه أكيد لكن اللي جبتها لكم هي هذي الفرصة، برضو في طرق كثيرة تستغلو بها الوقت وتغتنموه بأمور تضيف لك قدرات ومهارات وتزيد من رصيدك المعرفي.. أندية رياضية مثلا لتعلم رياضة معينة أو تطوير رياضة تحبونها، أو التطوع في أحد المؤسسات منها تجربة تضيف لك وتفيدك فائدة معنوية وتضيف لشخصيتك، برضو في وظايف موسمية مثل عندنا بالسعودية حاليا موسم الحج جاي وفيه وظايف للنساء والرجال.. مافي أجمل من خدمة ضيوف الرحمان والرواتب مغرية كمان. فيه شغلات كثيرة نستاهل نعيشها قبل تروح هالاجازة الكبييييره عالفاضي.. وما أنسى برضو معارض الفنون والمشاركة فيها.
بالنسبة لي خلصت دورتين من موقع بريطاني كانت أول تجربة لي ي حضور دورات عن بعد وصراحة ضاعت بعض الدروس عني يعني احرصو تتعلمو تكونو منضبطين مع انفسكم لان الحضور عن بعد بكيفنا إحنا.. لا حسيب ولا رقيب فالإهمال أو النسيان وارد.. والان اتمنى أستفيد من برامج دروب وتضيف لي. اللي يشوفون انفسهم شاطرين في التصميم انصحهم يستثمرو هالمهارة ويطورونها ويتابعو دروس ويكونو ملمين بشكل يأهلهم للوظايف المنتشرة كثير.. الاحظ أغلب الوظايف اللي عن بعد للمصممين والربح مو هين :).

احنا شباب وفينا طاقة حرام نهدرها بمتابعة المسلسلات والنوم والترفيه المتواصل لحد الملل.. بكرة بنكبر وتضعف قدراتنا تدريجيا ونقول والله كنت ذكي في المجال الفلاني بس ما سويت لي انجازات،، والله كنت ماهره في الشي الفلاني بس اهملت مهاراتي واهدرتها.. ونفكر نسوي اللي فاتنا لكن لا صحة ولا قدرات تسعفنا زي لما كنا في شبابنا.

لذلك حاولو تصنعون سيرة لكم خاصة فيكم مليانة لحظات حلوة عشتوها من تجربة لتجربة، من انجاز لانجاز ، اكيد راح تلاقو أثر في انفسكم وثقتكم وبرضو في الفرص اللي راح تكون قدامكم لانكم اثبتو انكم قد أي تجربة ومعاكم خبرات مو بسيطة ^_.

خطاب تحفيزي وأتمنى التوفيق لي ولكم..

تغريدة صباح } ..

تعليق

تعليق

تعليق

تعليق

تعليق

تعليق

تعليق

تعليق

تعليق

تعليق

google Ad Widget