صبح صبح
كيفي والله راسي مصدع وعادي الوقت يعتبر صباح حتى لو هو عصر
بعدين وش سالفتكم يا آل عبير تنطون وتجون باحلامي ها
لاتكونون تسوون تخاطر عن بعد مع مخي وترسلون مسجات عبر بريد احلامي
ياحبي لكم والله فردا فردا
يو ار اوول فامليتو


ودي اسولف واتحطلم وادون اشياء كثير
بس لي فتره الصداع مسوي وياي اشتراك اسبوعي اذا مو يومي
انام مصدعه اصحى مصدعه كل شوي صداع راسي بينبط ياجماعه


الي يضحك بالموضوع اني ادوون وارسل واكتب بعبير
بس بمخي بدون اتصال بعبير فعليا ولا اضحك بعد الحمد لله والشكر
فاتحمولي غيابي لحد مايتعدل حال مخي شوي
>> لا تكفين الي بنموت اذا غبتي مناك بس<< قليلن خاتمه ماينشره عليكم

المهم بختصر الموضوع واسالكم سؤال
لان بجد صداعي لايتحمل ينتقل من مكان لمكان ويصدع على كيفه

ياقلبوشيني يا ماي فملي العبيريه
تقدمت ع وظيفه مساعد اداري بالجامعه وطلعت الاسماء
والاختبار قريب وماعندي اي خليفه عن الاختبار ولا عن شنو بعد
فحابه استعد واخذ فكره عن الاساله اذا كان عندكم خلفيه لها
لان روحي طقت من جلسه البيت وبديت اعصب واتوحش ونفسيتي
صايره حفله بدون هدايا>>فاضيه انكت والله

المهم اذا عندكم خلفيه او تعرفون احد تقدم لهالوظيفه وشنو نوعيه الاساله
ياليت تفيدوني وتساعدوني لان الاختبار بعد عشره تيام
غير كذا محتاجه الوظيفه لان بجد نفسيتي صارت وع
من شهر 4 وانا حاسه اعصابي مضغوووطه مثل قدر الضغط باي لحظه ينفجر
هو بأي لحظه الا قولوا صارت انفجارات طفيفه
عاد الانفجار الكبير مدري متى يصير الله يستر

واول الانفجارات لما جاء واحد يخطب طبعا ماحدد اسم بس يبي تيزوج وبس
مطلق بنت عمه عشان تروح كافيهات ويا صاحبتها وانسانه طموحه وماتحب الحكره بالبيت
ويبونا نتزوجه بالله ذا منطق
ولا كل واحد يحاول يقنع كل وحده فينا بعد
وانفجرت الصراحه واعطيتهم بالويه
شيء يعصب بصراحه
ياخوفي يجي اليوم الي انجبر فيه انا او وحده من اخواتي وع اخس الناس بعد
المشكله هم يجوفونه واو انه رجال وحرمته قليله ادب
قمت خربتها وقلتها بويه ابوي انت تبيني اتطلق ومعاي ولد ولا بنت وبدال ماكون وحده نكون 2
واحد طلق بنت عمه لانها تبي الحياه وانتم تبون تدفنوني فيها
وولدك الي جاي الخاطب عن طريقه يروح ويسافر ويجي وعندنا يالبنات ممنوع
ونتزوج عشان الزواج وبس لااااا والف لا

صايره اعصب ياجماعه كثير واغلط بكلامي
انا مااقدر اتزوج واحد مخه قفل معدوم يجوف الانثى عار وعوره
ولازم ماتعيش ولا تروح وتجي

لا واذا قلت لهم الوحده فينا تبي تعيش باستقرار وحريه واحترام
قالوا ماشاء الله انت منتي بصاحيه تبين علماني ولا ديوث ماعنده خيره

صارت المطالبه بابسط الحقوق الحريه باحترام شيء خارج عن الدين
لاحول ولاقوه الا بالله العلي العظيم
انا عقليتي طيب غير ماقدر اعيش ولا احترم اي رجل بالكره الارضيه يهمش الانثى وانها فضيحه وجع
راسي صدع بزياده
خلونا من هالسالفه لان في عرق بدا ينبض بقوه عند اذني من زياده الصداع والموضوع بعد

المهم ياجملين الي عندهم خبره عن طبيعه الاختبار ارسلوا لي ع الخاص
او بالصراحه ضروري خلال هاليومين
وبس والله دمتم سالمين
بعد الحفله والتحلطيم والتخبيص

سبحانك اللهم وبحمدك اشهد ان لا اله الا انت استغفرك واتوب اليك

أولى
كومو استاس؟

هلاسبوع حافلون بالانفجارات الكبرى
يتبعها نوافير مائية
اطول من نافورة جدة

ع كثر ما احاول اهدي نفسي
واقرا كتب واقول خلاص وصلت للمرحلة الملكيه شطورة يا أنا
إلا مايطلعون الي حولك يخلونك قدر ضغط طائر ياللهووول

قال ملكية قال
الا قولوا انفجارات بركانيه
اي والله

ع كثر ماكنت اقول الواحد لازم يقوي نفسه بنفسه
وكنت اعاتب الي يكونون مسلمين بالفطره ويلحدون بالتربيه
ع كثر ماايقنت ان السبب الرئيسي في الالحاد مو تأثر بفكر الملحدين
ع كثر ماهو بسبب الكبت والتدليس
وتأليه العادات والتقاليد شوي يعبدونها عباده عشان بس كلام الناس
يقتلون طموح
يتقلون فكر
يقتلون حياة
يقتلون كل شيء جميل بالحياه
بشيء اساسا مو من الدين نفسه
كل شيء كذب في كذب

واصله معاي للاخر
لدرجه اخر انفجار والله لو مانبيبي بعقلي
وهاينه علي احترامي لنفسي
كان تركت بلاد العرب لهم ورحت لافريقيا ياكلني اسد ويريحني من القرف الي قاعده اجوفه
ومفروض انا نعيشه غصب عنا
انتبهوا قلت نعيشه مو نتعايش وياه في اشياء تقدر تمشيها حتى لو هي غصب عليك
بس في اشياء حق من حقوقك تسلب منك سلب عشانك بنت
او عشان الناس او عشان هم تربوا كذا

الله ياخذ الناس ع الي عايش وياهم بعد على الي بيخلي حياتي قفص اسود
وهو حر طليق يلعب ع كيفه


ماعلينا بالحطمه كنت جايه اكتب شيء
ونفست بشيء فيس نص يضحك حتى الضحك مالي خلقه كيفي

الاقيها من اختبار القدرات التعجيزيه
ولا من افلام حياتي الهنديه هفف ماعلينا

سمعوا بس خلوني اطلع من الجو المقرف الي اخربش فيه
شكلي بفتح قناة تليقرام واسحبكم بحواجبكم وياي هناك
ماراح اخليكم لحالكم وانا امكم هنا يمكن يجيكم الذيب ياكلكم

لا والله جد احتسي
يمكن اسوي قناه لان وضعي عبير صار بالقطاره
احس انو فجاءه بختفي ويختفي الكل معاه فيس حزين

الفكره في بالي بس ماقررت قرار نهائي>>عفيه ع اساس اذا قررتي بنجيك يعني
>> كيفكم عاد انتم الخسرانين
بس بالقناه ماكو سوالف وخرابيط ولا فيسات ولا حركتات طيف
ولا قطار سريع

السؤال هل انتم مع او ضد ؟