مسيناكم مسونا
وعلى لبوابة لائونا
وان زقفتو كتيير كتيير
طاع طاع طااطااااطع
بتكونو بتحبونا

لالالا نغيرها لصباح مو مساء
صبحناكم >>بغيت اقول صباحكم الله بالخير يالعماله العماليه جينا نخطب بنتكم مدري وش بعده اغنيه الطفوله
نعيد من جديد لاتضيع الكلمات من راسي
احم احم

صبحناكم صبحونا
وعلى عبير لائونا
وأن شخبطتو بمدوناتكم كتير كتير
طاع طاع ططاطع>>صوت تصفيق
بتكونوا بتحوبونا

تصدقون اني انخرشت يوم دشيت عبير اعتقد امس او قبله
من التنبهيات قلت وش انا مسويه ماسويت شيء
اخرتها لاياكاتو وحركتاتو
وفي منها تقييم للاخ طير شلوى مدري طير القوافي
خلاني ابتسم دقايق اجيبه>>هالبنت فضيحه كل شيء تجيبه في مدونتها نكبه

جست منت بيبووول اند شيييييز ياتعيييس

انا معي كهرباء زايده احيان امشي في الممشى واي شي المسه يكهربني
ورايم اسوي حركات في اللي حولي يعني اكهربهم امشي واحاول امسكهم ويتكهربون

اول ماقريت التقييم ابتسمت بعدها طارت عيوني بعدها فطست ضحك

ابتسمت ببدايه الكلام انو فاهم غلط يابرذر انا ما عندي كهرب بجسمي
لا ..شيء ما سكن يدي منذ بضع سنين
ورايحه للمشفى يكهربوني يتاكدون من سلامه الاعصاب هل تضررت او لا فهمت يابرذر

اما ليه طارت عيوني
طارت يوم تقول امشي بالممشى واي شي المسه يتكهرب مدري يكهربك
طارت عيوني لانها تصير لي احيانا
بس الطيران الحقيقي وشهوله تلمس الخلق في الممشى ياقليل الادب
رايح تمشي ولا تكهرب خلق الله وتلمسهم

واخرتها تكهربهم وبعدين تعتذر لهم وتكتب فيهم قصايد
هههههههههههههههههههه>>دوعابه اخويه
واترك الناس بحالهم ياسيد كهرباء

ماكو شيء اخربش فيه بس
برفع مدونتي فوق مع الدوافير

اممم والله انو
مالي خلق اسولف تو جايه من المستشفى
ومرتفع ضغطي من واحد كان ودي ازفه زف يحرم بعدها يتكلم مع اي بنت في الحياه
قلة ادب وربي عصبني
خساره الوظيفه فيه وبامثاله

قبلها موظفة بالرسبشن تتكلم مع موظف
ويسالها عن بنت
يقول هي بنت ولامتزوجه؟؟!!!!
وهي تجاوب وتستظرف وياه؟؟!!!
وساحبه علي طيب كمل شغلك بعدها كملي سواليفك الماصخه
اصلا ليه تسولفين وياه خلاص زميل عميل يجلس مكانه وانا مكاني
مو اطقها حنك ويعنني فله

واخرتها ذاك الياع الحيوان بسوي موعد وابيه اليوم
بدل ما اسجل موعد ثاني وروحي وتعالي
فارحت لشؤون الموظفين وكان محترم وقال هاتي بطاقتك وانتظري بصاله الانتظار

جاء ذا الي مايستحي ونادا باسمي شوي ويدخل بقسم النساء
بفهم انا قلت اي نعم وبطلع مدخل راسك ليه؟.
وفوقها سالني كم عمرك وجاوبته وهو يمشي يقول وش مشكلتك
المهم اسلوبه ينزفر ماعجبني
سد نفسي الله يسد نفسه
ودخل غرفه القسم وانا عند الباب ويتكلم مدري كيف وضعه ماحبيته
رجع سالني عن عمري مرا ثانيه وناظرني نظره تامليه سريعه
وسواء حركه براسه يعني كيف كذا وكانه يقول كذابه ؟؟!!قال مو باين ماشاء الله كانه مكذبني

اصلا ماطلبت رايك ياحيوان قلة ادب والله
ويكلمني باسلوب مياعه وانا اكلمه بسرعه بطلع مو فاضيه له
شوي يقول حاولي اذا ماعندك شيء مهم تاجلين مواعيدك تعرفين وضع الكورونا وكذا
مابقي الا يقول خايف عليك
بس عشانك بدخلك عند الكتوره الحين واذا تبين اي شي اتصلي علي

خييييييييييييييييييييير سلااااااامااااااااااات مابقي الا يقول خذي الرقم واحبك
قلة ادددب وربي عصبني حييييييييل الديناصور
ماخذ الدنيا سبهلله حضرته... ولا ع باله من الموظفات المياعات الي متعود عليهم
خيييييييييييير هذا وانا مو معطيته ويه موليه
مسوي فيها يعنني خلاص بسوي لك موعد فعادي استظرف معك قليل ادب
والله لو مو خايفه يسحب علي ويخلي موعدي بعد 3 تشهر
كان علمته الادب المقرف الياع
اروح انام احسن ماعصب افضل

عمتم مساءا جميعا

أتمنى الكل يكونوا بخير
طمنوني بأخباركم بمدونتاكم

اممم جهازي صاير حيل ثقيل
يادوب يفتح
خلوني اخلص من محاضره واختبار وادور لي يوم اخربش فيه هنا
صايره احضر محاضرات للخلق واختبر واسوي ابحاث وانا متخرجه
المفروض أنا الي اخذ الوثيقه بدل الي يلعب ونايم وماخذها اجازه

هذه الروح تشتاق اليك
هذه الروح لك تشتاق

هى الروح
هى الروح
هى الروح
تشتااااااق

اي والله تشتاق لصوت المأذن ورفع الصوت بالصلوات
تشتاق لصخب المدينه
تشتاق لترتيب الأوراق
تشتاق للمحاسبه
تشتاق للحياااااة

تشتاق لكل شيء حتى لمدونتي>>احد عنده مانع
اي والله اشتقت اخربش في ذا كله من محاضرات اخوي ما لحق حتى استمتع اجلس مع نفسي
تقولون احد معاقبني
وكله كوووم واستاذ الانقلش كووووووم يكتلني ضحك وربي
اول محاضره حضرتها له اسمع كلمات عجيبه غريبه
غير الاكسنت المضررروووووووب
واقول بنفسي شنو ياربي وش هالكلمات اول مرا اسمعها ماقد مرت علي بالانقلش
طلع المشكله مو عندي بلهجته اهوا

اول كلمه باول محاضره كان يقول كولييق شنو بضم الكاف والواو وكسر الياء بالتشديد
وانا احاول اعصر مخي واستحضر قاموس مفرداتي باللغه
واقول ياربي شنو
كولييق شنو ماعمرها مرت علي
طلعت الكلمه كولق يعني كليه وينطقها كولييق
وشنو طلعت لهجته سودانيه وانا ع بالي كلمه انجليزيه كامله لاحول ولا قوه الا بالله
وكلمه سينقولا ياربي وش تطلع ذي بعد الي اعرفه كلمه سنقل
سنقولا ذي للحين مو عارفه وش تطلع
واليوم فاذر صار فازر الاعدادات فيها شويه انحرافات عنده
ربي يسعده هالدكتور يكتلني كتل

تخيلوا مره جاوبت طبعا بدل اخوي ع الشاتنق اتحمس واشارك
والطلاب ساحبين عليه
ومع كل اجابه اجاوبها يتحمس الدكتور ويقول اللـــــــــــــــــــــه عليك ياولد
ويقولها بحماس ياوووولددد>> الله لو تدري اني اخت الولد
لان محد يعطيه ويه ويجاوب الا انا وواحد من الطلاب اي كلمه اكتبها ينسخها ويجاوب وراي
يضحكون وربي رحمتهم ههههههههههههههههه

ربي يسعده يضحكني من قلب امتع محاضره ع قلببي والله
لا وتومورا في اختبار فاجهزوا لي 10 جمل عن فيفورت روم
واور هاوس>>وش دخلنا فيك عشان نكتب لك
>>دخلكم انكم ماراح تجوفوني بمدونتي لحد مااخلص جامعتي الكذبيه
ههههههههههههههههه
والله المفروض انا الي اخذ الوثيقه


اما محاضره الثقافه وقسم احيانا اخاف اخربها واجيب العيد
بالذات ذاك الولد الي اسمه خالد ودي اعطيه طراق ع راسه
حتى دكتورهم احيانا يعصبني ولو مااخاف انكشف كان طلعت عليهم جنوني كله
امس كانت عن الطلاق وانو شلون اذا صارت تطلبك تسفرها مثل اختها والى اخره
قام ذاك قال حرمه بنص عقل
وربي يديني كانت ع الكي بورد اجهز له اكبر قصف صاروخي متفجر بيبهته
بس ما مسكني الا اسم اخوي ولا والله كان تحولت الى اسد عصبني
وبس والله خلوني ساكته ازين
وجهزوا لي الموضوعين الي قلتها لكم بالانقلش كل موضوع 10 جمل
ولا ماراح تجوفون خشتي في ذا >>اخيس تهديد في الحياه روحي مناك ببس

مبارك عليكم الشهر ولو انها متاخره
بس داشه ع السريع بقول لكم شي واطلع

في دوره عن التخطيط الاستراتيجي جدااا رائعه وحلوه ومفيده
تلاقونها ببث محفوظ ع انستا اكاديميه التبيان
روحوا جوفوها قبل تنتهي
ولنفس المحاضره الي القتها

بتنزل محاضره على تطبيق الزوم اسمها التخطيط المالي اليوم بحضرها
كمان لاتطوفكم من الساعه 10 الى12

هم هذا الحساب على السناب
3hod94
تنزل دورات مجانيه اختاروا الي يعجبكم ودشوها
وانتهبوا للتواريخ
واهم شي للكام والصوت
بعض الناس طلعوا من حيث لايعلمون والخلق يترفجون

وبس وسلامتكم
وتقبل الله منا ومنكم الصيام والقيام وصالح الاعمال واعتقنا ووالدينا واياكم من النار
استودعكم الله

السلام عليكم

مجموعه دورات بجامعه جده مجانيه
والي يبون شهاده عليها رسوم
100
حبيت لكم الاستفاده
واممم الدوره الي حابين تاخذونها ناظروا اول بتاريخ الدوره ميلادي
وجوفوا وافق كم بالهجري وادخلوا بنفس اليوم يفتح لكم قبل الوقت ب3 دقايق ويفتح
غيره نو


وبس والله
واشتقت لكم برشا
بباي

وشكرا يا جميله ع التقييم اهم شيء انك تنبسطين


لحظه نسيت بعد في سناب اسمو سند
كله وظائف ودورات
للي يدورون ع الوظايف
ولاتنسوني من دعواتكم بعد