لأنني خادمه/ روايه اماراتيه رائعه /كامله

**لحن آلأمل** · 16-03-2011, 02:50 PM

رد: لأننـــي خادمــــــه/ روايه اماراتيه رائعه /كامله

الجزء الرابع // الفصل الأول

سالم يأشر على منوة : هكي جوفها ..

هني منوة انتبهت لهم .. ابتسمت ف ويه سيف بحرقة وطالعته .. ونشت ..

سيف كان يطالعها بذهول وهو مب مصدق اللي يستوي ..

ادرك ان اللي جافه واقع من رد طالع الرسالة .. وتلاشت منوة بين زحمة الحريم عند مخرج القاعة ..

سيف نش من مكانة وصرخ بأعلى ما عنده وبتجاهل للكل : صوفي !!!

.

بعد صرخة سيف القوية .. وظهرة منوة من القاعة ...

.

ما كان الفضول من اهتمامات منوة فهاللحظة .. ولا كان ينتابها أي اهتمام انها تعرف شو بيستوي ف سيف اكثر عن جيه ..

ما حطت أي أدنى اعتبار لسالفة ريم .. ولا مزون .. ولا حد ثاني ..

المهم هي حست بنشوة الانتصار ولأول مرة ف شي بغته ..

.

الإشاعات بدت تنتشر فهالعرس ال "شبه مشؤوم"

اللي يقول ان اسمها روضة وسيف يدلعها روضي ..

واللي قالت انها سمعت بإذنيها يوم سيف قال " نوفي" ..

واللي ادعت انها كانت على علم تام بعلاقة سيف بهالبنت المجهولة .. وانهم كانوا يحبون بعض بجنون ..

بس لانها مزون كانت غيرانه منها .. زوجته ريم .. البنت اللي تكبره ب 5 سنين ..

.

في وسط هالمسلسل الدرامي البحت ..

اضطرت مزون انها تركب الكوشة و ترد سيف لمكانه الطبيعي واللي " المفروض" يكون يالس فيه ع الكوشة.. وسط صدمته برحيل صوفي .. اكيد ما راح ترجع ..

اكيد ..

بس اذا تبون الصج ..

سيف ما كان يحب صوفي .. لأنها منوة ..

كان يحب صوفي لأنها خادمة حلوة وفقيرة ..

سيف صاحب شخصية ضعيفة .. وبغى يتزوج اللي "ظنها" ضعيفة عسب يسلط نفوذه عليها !! ..

سيف كان ضحية تسلط الإخت ورغبتها في إنها تكون الأفضل ..

زوجته وحدة من معارفهم .. شافتها ميتة على سيف على الرغم من انها اكبر عنه .!!

بتقولون شحقه ؟؟

لأن سيف كان عايش احلى علاقة حب مع بنت عمه ..

لكن مزون كانت تكرهها .. واثارت الفتنه بينه وبينها ..

وصلت لدرجة الطلاق بعد الملجة ..

وانتقاما منها .. و بدون أي " وعي " أو "إدراك" .. وافق انه ياخذ ريم .. !!

على الرغم من كل هذا ...

خلاص .. انتهى كل شي ..

وانطوت صفحة مزون وسيف وسالم وسلامة .. و ريم ..

للأبد ؟؟!!!

يمكن ..!!

مشت منوة بخطى هادية بعد ما ظهرت من القاعة ..

ركبت التاكسي .. وطلبت منه يردها بيت فتحية ..

حست بالقهر من نفسها ع الحركة اللي سوتها ..

عيب اللي سوته !! ..

هي مستحيل ترضى على نفسها ان "زوجها" يسويبها جيه .. كيف رضت على ريم .. كيف ؟؟!!!..

دخلت البيت .. وفتحية اللي لأول مرة بادي القلق عليها ..

فتحية بغيط : ليش تأخرتي هالكثر ؟

منوة بلا مبالاة ك انا هب متفيجة لأسألتج .. ابغي أرقد ..

فتحية وهي تشد بكلامها : انتي ما تدري انج سببتي لي قلق مب طبيعي ..؟؟ صوفي انتي بعدج صغيرة .. الدنيا ما منها أمان ..

تنهدت منوة : خلاص ما بعيدها .. بس انتي لا تحرقين اعصابي ..

فتحية : زين .. روحي نامي ..

.

"متناقضة كالشمعة .. تكون حارقة وجارحة متى أردات .. وباردة حنونة كيفما شاءت .. ولكن مهما كان .. فإني أحبك يا فتحية !! ألست ملاذي الوحيد ؟؟ "

سكرت دفترها .. غسلت ويهها من اثار المكياج المتبقية ..

عقبها راحت ف سابع نومة ..

**لحن آلأمل** · 16-03-2011, 02:51 PM

رد: لأننـــي خادمــــــه/ روايه اماراتيه رائعه /كامله

اليوم الثاني نشت بتكاسل الساعة 12 ..

ما كانت بلبس الخدم .. بالعكس كانت بعباتها اللي سارت فيها العرس ..

طلعت من الحجرة وهي تتمدد من الخاطر ..

يت بتزقر فتحية ..

بس انصدمت بالريال الموجود ..

ردت ركضت لحجرتها ..

لبست ملابس الخدم مع الحجاب وردت طلعت ..

بعد ما ظهرت لهم انتبهت ان في حرمة مع الريال ..

كان باين من شكلهم انهم معاريس يداد ..

فتحية : انتوا تدرون ان هالوقت ما اييب خدم .. يعني باقي وقت لين ما اييب خدم يداد ..

شهد : لالالالالا سووووووري .. نحن رمسناج بارحة وقلتيلنا حياكم الله ..

عمر : هيه صدق ..

فتحية وهي تطالع منوة : اوكيه انا ما عندي مشكلة .. وانا قلتلكم حياكم الله صح .. بس اليوم تقولولي انكم تبونها فوق ال 45 .. وانا اللي عندي عمرها 20 ..

شهد : انزين عادي ..

عمر صد لها بتأنيب : شهودة شو عشرين سنة .. لا وايد صغيرة هاي ..

شهد بلوم : حبيبي قولو انك متعايز تدفع هالكم بيزة عليها ؟؟؟

عمر : يا حبيبتي اشحقه الخساير .. نتريى اسبوع ثاني ..

شهد بضيج : انا مب مستعدة استغل .. كفاية الأسبوع اللي طاف .. (تراويه ايديها) شوف ايديه اختربن من غسال الصحون ..

عمر بقهر : اللي يسمع نحن ناكل اكل البيت كل يوم .. الا هي مرة ..

فتحية بغباء : شو بتتريون ؟؟

شهد : خلاص نباها .. بعد اسبوع بني ناخذ بشكارتنا الثانية ..

فتحية : ما تبون تجوفونها ؟؟

شهد بثقة : اكيد ..

عمر عاقد حاجبه : انا ما يخصني اذا غرتي منها لانها اصغر عنج ..

شهد بغيرة : يالله عادة ... الخدامات اللي يايات من هناك يبينون اكبر عني ب 20 سنة .. وبعدين انا واثقة من جمالي .. اشحقه اغار ؟؟

اشرت فتحية لمنوة انها اتي ..

يت منوة صوبهم وبحيا : Hi Madam, Hi sir....

شهد ترمس فتحية : هاي من وين ؟؟

فتحية بتوتر : من الهند .. بس عاشت هني من صغرها ..

شهد بغيرة ترمس ريلها : عموري شو رايك فيها ؟؟

عمر عسب يطفي نار الغيرة فيها : تلوع بالجبد ..!!

شهد ارتاحت : خلاص عيل بناخذها ..

فتحية : صوفي .. لمي اغراضج وتعالي ..

شهد بإصرار : لالالا .. ما تشل شي .. خلها اتي جيه ..

منوة :Mum I need my clothes!!..

شهد : الحينه بوديج تتشرين بلاج ؟؟

منوة تذكرت دفترها : No thanks mum I need my clothes..

شهد غيظت : هاي شبلاها ؟؟

عمر : خليها شهودة .. لازم تخسريني يعني ..

شهد : لا والله .. واذا حطت لنا سوا ؟

منوة تنرفزت : I'm not from Indonesia to do that !!...

شهد : نشي بسرعة بدون رمسه .. نشي ..

منوة طالعت فتحية بحزن وسارت ..

هالمرة بتسير منوة بليا دفترها الغالي ..

هالمرة راح تضطر تماشيهم وتسكت عن قهرها ..

هالمرة ما راح تروم تصب جام غضبها ف دفترها ..

ما في أي خيال ممكن يسعفها ويهديها ..

عقلها هو الشي الوحيد اللي بينجدها ..

!!

يتبع //

**لحن آلأمل** · 16-03-2011, 02:53 PM

رد: لأننـــي خادمــــــه/ روايه اماراتيه رائعه /كامله

الجزء الرابع // الفصل الثاني

منوة تنرفزت : I'm not from Indonesia to do that !!...

شهد : نشي بسرعة بدون رمسه .. نشي ..

طول الدرب وهي ف السيارة يالسة تسمع نقاشاتهم ..

تبا تاخذ فكرة .. ولو بسيطة عنهم ...

عمر : انزين شحقه نغير الأثاث .. نحن الا شارينه من فترة !!

شهد : عمور يعني انته تدري اني ما حب اتم ع نفس الوتيرة !!!..

عمر : إلا قولي تحبين تخسريني ..

شهد : والله الريال لازم يضحي عسب حرمته مثل ما هي ضحت عشانه ..

عمر : لا والله ؟؟ وانتي بشو ضحيتي يا حسرة !!؟؟

شهد : كفاية اني ظهرت من قصر ابوي وسكنت ف بيتك العادي ..

عمر بقهر : يالله عدال يا بنت العز .. جان خليتي ابوج يشتري لج بيت على هواج ؟؟

شهد : ليش ابويه مكلف يصرف عليه حتى بعد عرسي .. الحين بتغير الأثاث يعني يتغيره ..

عمر : خل ابوج يعطيني 50 ألف عقب تشرطي شرات ما تبين ..

شهد : لا والله .. ابويه ولا ابوك ؟؟

عمر : والله محد قاله يطلب مهر 300 ألف .. لو ماخذ لي سيارة فخمة مب احسن ؟؟!!

شهد بقهر : اعترف انك كارهني ..

عمر : شهودة انا ما اكرهج .. لو اني اكرهج جان ما رضيت بمهر ابوج الخيالي .. انا اكره تصرفاتج ..

شهد : اووفففف يا خي بلاك عليه ؟؟

عمر : اقول صكي السالفة .. البشكارة عرفت كل فضايحنا ..

شهد بقهر اكبر : اووووووووف !!!

كان النقاش بالنسبة لمنوة ممل ورتيب ..

ببساطة قدرت تكون فكرة عن هالشخصين ..

عمر .. شاب حب شهد وتزوجها .. لكن بعد الزواج اكتشف انها عكس ما تمناه ..

أما شهد .. في اللي تحدث أهلها عسب تاخذ عمر .. لكنها حاليا مصدومة ان وضعه الإجتماعي اقل بوايد من الوضع اللي هي تربت عليه ..

بعكس ما توقعت ..

البيت كان حلو وفخم من برع ...

صح انه ب "طابق" واحد .. لكن في بيون تفرض على الناس روعتها حتى لو كانت بطابق أرضي واحد ..

يمكن العيب الوحيد اللي حصلته فيه ان الحوش وايد صغير ..

و مافيه ملحق ولا مطبخ خارجي ..

شكلها شهد اكتفت بالمطبخ التحضيري داخل ..

شهد : صوفي ترى انتي مالج حجرة ..

عمر بقهر : شهودة خلها تيلس ف غرفة الكوي ..

شهد : لا والله .. تيلس يعني بليا تلفزيون ولا شي ؟؟

عمر يرمس بصوت واطي بس هو مسموع لمنوة : الا هي بشكارة ..

شهد : لا حوووول .. اقولك ترى اللي تخدم شهودة احسن عن كل الخدم ..

منوة طالعتهم بحيرة ..

هذيل شو سالفتهم ؟؟

لازم يعني يطولون السالفة وهي قصيرة ..

عمر عصب : اوووه كيفج انا اش لي ؟؟

وسار الحجرة ..

شهد : اوكي صوفي .. اسمعيني .. انتي بتنامين ف الصالة .. بحيث ان في تلفزيون .. اوكيه ؟؟

منوة : ok mum ..

شهد : ابغيجاول ما تنشين الصبح تخمين الصالة وتلمعين اللوحات والتحف .. عقب تروحين للمطبخ التحضيري تجهزين الريوق .. ممم يوم تسوين لنا سندويج بيض مقلاي .. ويوم سندويشات جبن وعسل ..

منوة :as you like mum..

شهد : بعد ما تخلصين من الريوق .. سيري اغسلي الثياب ف الحجرة اللي مجابلة حجرتي (تأشر) هاي يعني .. الثياب مب وايد .. بس أبغيج تكوينهم عدل .. ما بغي أجوف جسفات ع الكنادير ..

منوة : ان شا الله (سكتت) ok Mum ..

شهد وهي مب منتبهة له : عقبها عندج بريك لمدة نص ساعة تريحين فيه ..

منوة هزت لها راسها بإيجاب ..

**لحن آلأمل** · 16-03-2011, 02:54 PM

رد: لأننـــي خادمــــــه/ روايه اماراتيه رائعه /كامله

شهد : مم هذا تقريبا اللي عندي لين الحين .. الحين اطبخي لج أي شي تبينه حق الغدا .. انا وبابا بنظهر ..

منوة : Ok Mum ....

شهد : أي شي ينقص ف الثلاجة خبريني ع طول ..

منوة :As you like Mum..

كان الوقت ظهر تقريبا .. بالكاد قدرت منوة تسمع تحرطيم عمر ع الطلعة المفاجأة ..

بعد ما ظهروا .. استلمت المطبخ وسوت لها سندويجات نقانق .. حصلت ببسي قوم بو غراش ف الثلاجة .. حطته ف قلاص مليان ثلج .. وشربته بانتعاش ..

سارت صوب غرفة الغسيل .. وانتبهت للغسيل المتكوم ..

غسلته .. ونشفته ع السريع .. وسارت ..

ردت داخل البيت .. وخذت أدوات التنظيف من غرفة الغسيل ..

نظفت الصالة والميلس ..

ترددت تدخل حجرة شهد وعمر ..

بس عقب تشجعت وسارت ..

انتبهت ل 500 درهم طايحة ع الأرض ..

شلتها وحطتها ع التواليت ..

لمت الفراش ونظفت الحجرة والحمام .. وظهرت ..

انتبهت للمدخن والفحم والعود ..

ولعت الفحم وحطت العود عليه ..

ركزت على حجرة شهد وعمر .. ودخنتها ...

عقب دخنت الصالة .. وشوي شوي كل البيت ...

بعد ما خلصت خذت لها بريك ساعة .. وطالعت حلقة من حلقات مسلسل خليجي ما عرفت شو سالفته ..

مع مرور الوقت ...

استوى الوقت عصر .. يعني تقريبا 5 ونص ..

ردت منوة للثياب تتأكد جانهم نشفوا عدل ولا لاء ..

بعد ما لمت الثياب .. قررت تسير حجرة الكوي وتكويهم ..

وهي يالسة تكوي .. سمعت صوت مفاتيح ..

عرفت ان شهد وعمر يوا .. تسمع صوت صريخ .. اكيد يتضاربون !!!..

شهد : يعني شو فيها لو عطيته كوميشن ؟؟

عمر : انتي صاحية بالله عليج ؟؟؟ كفاية ان الحساب روحه 700 درهم .. والله لو عازم فريج ف مطعم ثاني جان كفاهم وزاد حتى ..!!

شهد : اوووف .. والحين طول الدرب تضاربني عسب هالسالفة ؟؟

عمر : انتي أصلا ما تحسين .. يا شهد نحن ما صار لنا شهور من عرسنا .. وانتي كله تقولين هات وهات ..

شهد بغيظ : يعني شو .. اقولك خذ خذ ؟؟

عمر : لا تعطيني شي .. بس ع الأقل خففي عزايم وخرابيط !!

شهد : شو قصدك يعني ؟؟

عمر : كل يوم عازمة حد .. واذا انعزمتي بعد تخسريني ..!!! جنه لازم تشترين هدية حق اللي يعزمونج كل مرة !!

شهد : اووووف انته العيشة وياك تقصر العمر !!

عمر : عيل انا شو اقول ؟؟

شهد بغيظ: نعم نعم .. شو تقصد يعني ؟

عمر : اوووه .. بدت الحين انسة حساسة

شهد : اوف (بتجاهل) صوفي .. صوفي ..

منوة يت لها ركض : yes mum ?..

شهد تطالع عمر بنرفزة : شو ميلسنك هنيه .. سير الحجرة ..

عمر يبا يقهرها : مب ناش .. بطالع التلفزيون ..

شهد بقهر : اوكيه .. اليوم بنتعشى ف البيت .. سويلنا ..

عمر يقاطعها : لا انا اليوم بظهر ويا ربعي ..

شهد تنرفزت : جفت ؟؟ كله ربعي وربعي .. واتقول اني مخسرتنك !!أصلا انته كل حياتك ويا ربعك !!

عمر : انا مجابلنج يوووومييييين .. خليني استانس ويا ربعي !!

شهد : يا حليلك والله .. جان تزوجت ربعك احسن ..

ضحكت منوة ع التعليق ..

عمر بعد ما انتبه لضحكة منوة : اوووه سيري لا ( وسار الحجرة)..

شهد تطالعه بقهر : سخيف .. صوفي listen to me..

منوة : yes mum ?..

شهد : انا بظهر اليوم .. يعني دبري نفسج حق العشا .. واذا احتجتي شي اتصلي ع رقمي .. موجود ف دفتر التلفونات ..

منوة :ok madam , thanks..

شهد : you're welcome..

سارت شهد عنها ..

دشت منوة غرفة الكوي ..

وخلال انشغالها بالكوي .. سمعتهم يطرون اسمها ..

شهد : جفت ؟؟ يوم قلتلك انها زينه ..

عمر : متى قلتي ؟؟

شهد : اوووف قلت .. جوف تنظيفها وايد اوكيه .. ماشا الله عرفت كيف ترتب الفراش حسب الطريقة اللي انا احبها .. وفوق هذا ال 500 درهم حتى ما فكرت تشلها !! ..

**لحن آلأمل** · 16-03-2011, 02:57 PM

رد: لأننـــي خادمــــــه/ روايه اماراتيه رائعه /كامله

عمر : بسج مديح حقها .. عن عقب تخورها ..

عمر : ما تم شي 6 ايام وبترد بلادها ..

عمر : بس حطي ف بالج ان يوم بتي اليديدة ما بناكل من برع كل يوم !!..

شهد : اووووف !!..

ارتاحت منوة م نالشغل جزئيا ف بيت شهد وعمر ..

كانت حاسة ان هالمرة الوحيدة اللي هي عايشة بها بدون تنغيصات ..

لا راجو ولا محمد ولا سيف ..

سيف !!! اللي كانت تظن ف يوم انها تحبه ...

بس الأيام كشفت ان هالحب زال ...

مب هالأسبوع بكل سلام على منوة ..

ويت لاخر يوم لها فهالبيت ..

كان وقت تجهيز أغراضها ..وما كانت متحمسة ترد لبيت فتحية !!

ما هان عليها تودر ملابسهم جيه !! ..كوتها عدل .. وكتبت الناقص من الأغراض حق المطبخ ..

وهي ماشية صوب حجرة شهد وعمر بدت تسمع اصواتهم وهم يزاعجون .

شو السالفة .. بعد ردوا تضاربوا ؟؟؟

شهد : منو هاي ؟؟

محمد بتوتر : اقولج ماعرفها ..

شهد والدمعة ف عينها : ما تعرفها وتطرش لك مسجات باسمك ؟!!!

عمر : بلاج ما تصدقيني ؟؟

شهد ودموعها اعلنت الانهيار : انا شو قصرت ف حقك عسب تخونني ؟؟

عمر : يا شهد .. يا عمري .. صدقيني ما خنتج .. ليش مب طايعة تسمعيني ؟؟

شهد : لا تحاول تقنعني .. الحين بس عرفت ليش اختي حذرتني منك ..

حطت منوة ايديها ع حلجها من الصدمة ..

ما كانت متوقعة ان حياة زوجين يداد بعدهم .. يستوي بها جيه ...

ما كانت متحملة تنصدم أكثر ..

هي كانت سعيدة لأن اللي عاملوها بطيب كانوا على حسب ما ظنت سعيدين ..

كيف جيه !!!!

حزتها حست منوة ان الرياييل ما منهم أمان ..

ولا شو مصلحة واحد عايش مع حرمته بالحلال ويدور الحرام ...

بغض النظر عن اسرافها .. بس هو علم علم كافي انها طيبة وايد ...

ليش يخونها ؟؟ ليش يجرح مشاعرها ؟؟؟

هو يرضاها على نفسه اذا حرمته خانته ؟؟

هو مستقوي اكيد لانه واثق انها مستحيل تسويها ..

يرضى يكتشف شهد خانته مع شخص ثاني ؟؟

اكيد بيطلقها ..

بس ف حالة شهد .. تروم تطلقه ؟؟ تضربه !!! .. طبعا لاء ...

المطلوب منها بس تسكت وتقهر عمرها ...

لمت منوة ملابسها .. وهي كلها أسف ع اللي صابهم ..

سمعت توسل عمر لها انها تسامحه ..

ما تكلمت ..

بس اكتفت انها تقوله يوصل منوة واييب البشكارة الثانية ..

طول الدرب ... ومنوة تفكر ف الحل الشافي اللي بيحل أزمة عمر وشهد ..

بس ما في أي حل !!!

بعد ما وصلها عمر لبيت فتحية ..

منوة بحيا : بابا هادا ورقة هق مطبخ مال انته ..

زخ عمر الوقة بدون نفس ..

منوة : بابا سوري سلام هق ماما شهد ..

عمر طالعها بيأس ..

نزلت منوة ..

بعد ما استشقت هوا هالفريج ....

وكأن الأقدار تاخذها عسب تردها مرة ثانية لهالمكان .. !!!

على طول فتحية طرشت بشكارة لسيارة عمر ..

ومنوة لازالت تطالع عمر وويهه اليائس ..

مب هذا الويه اللي تعودت تجوفه طول هالأسبوعين ..

حرك السيارة ..

انتبهت منوة بنباهة لعمر .. وهو يفر ورقة لبرع السيارة بعد ما جسفها ..

فضولها عماها وسارت بسرعة صوب الورقة تجوف محتواها ..

للأسف .. كانت نفسها ورقة الطلبات اللي عطته اياها !!!!

ما وحى لها تفكر بشي ..

لان فتحية شنت هجوم " غير طبيعي" عليها ..

فتحية متخصرة : شوووو .. السندريلا بعدها ؟؟

منوة بغيظ : لا اله الا الله .. توني توني ياية بلاج عليه انتي ؟؟؟

فتحية: دشي دشي الشيخة .. وراج شغل ...

منوة : قولي جيه يالمنافقة .. اكيد البيت زبالة ..

وبجيه .. انطوت صفحة عمر وشهد ..

وظلت معانا منوة بقلبها وعقلها !! ..

ومع .. مزبلة الدهر فتحية ..

/

\

/

\

نهاية الجزء الرابع ...

**لحن آلأمل** · 16-03-2011, 02:58 PM

رد: لأننـــي خادمــــــه/ روايه اماراتيه رائعه /كامله

الجزء الخامس // الفصل الأول

" غياب طويل وفصل قصير !!" ..

( لا تزعلون الفصل الثاني بيكون أطول .. لكم مني وعد انه اطول عن هذا)

من بعد حياة منوة مع شهد وعمر ..

والموقف السخيفة اللي استوى يوم فر عمر لستة الطلبات ..

ما وحى لها تفكر بشي ..

لان فتحية شنت هجوم " غير طبيعي" عليها ..

فتحية متخصرة : شوووو .. السندريلا بعدها ؟؟

منوة بغيظ : لا اله الا الله .. توني توني ياية بلاج عليه انتي ؟؟؟

فتحية: دشي دشي الشيخة .. وراج شغل ...

منوة : قولي جيه يالمنافقة .. اكيد البيت زبالة ..

وبجيه .. انطوت صفحة عمر وشهد ..

وظلت معانا منوة بقلبها وعقلها !! ..

ومع .. مزبلة الدهر فتحية ..

.

من ردت منوة للبيت "بيت فتحية" .. وهي حاسة ان فتحية متغيرة ..

يعني تغير اسلوبها وياها ..

حست ان هالتغير كان للاحسن ..

قبل هالتغير كان من المستحيل ان يرمسون ويا بعض او يتناقشون ف شي..

وكل هذا تغير ..

الحين فتحية عاطتنها اكبر مجال ..

لكن ما يخفى عليكم ضرايبهم بين الحين والاخر ..!!

" عجيب أمرك يا دنيا ... يا مضحكة .. يا مبكية .. يا مفرحة .. يا محزنة ..

بالسابق استحوذ عمر عمر وشهد تفكيري في قضيتهما ..

ولكن منذ ان عدت إلى هنا .. وجدت نفسي مرة أخرى انساهما !! "

.

فتحية : صوفيو اشحقه ما تردين عليه وانا ازقرج ؟؟ ها ؟؟

منوة تنهدت : يا فتحية الله يهديج .. الا تدوريلي العلة عسب تضاربيني ؟؟

فتحية : انا ما قلت شي .. تحركي وسوي لي شي اكله ..

منوة بدون نفس : اوكيه ..

دشت منوة المطبخ .. والسرحان مالي عقلها بكبره ...

كل ما اشتغلت عند حد .. تفكيرها تشتت أكثر ..

ما كانت تتخيل نفسها انها بتكون وسواسية جيه !!! ..

بس هاللي استوى !!

سوت لفتحية بيض وطماط ..

دقته من الخاطر وهي ف قمة سرحانها ..

حطته ف صحن ووياه خبز لبناني ..

وسارت عند فتحية اللي متمددة ف حجرتها ..

منوة : هيه صح تعالي .. مب جنه وقت وصول خدمج الحين ؟؟

فتحية : لا انا مضطرة هالكم شهر ما اييب حد ..

منوة باستغراب : ليش ؟؟

فتحية : امسات يتني ام بلال وسوت لي فضيحة عسب ان البشكارة قالت لها يا حيوانه ..

منوة فجت عينها بصدمة : حيوانة مرة واحدة ؟؟

فتحية : عاد اوني عسب اهدي ام بلال هزبت البشكارة جدامها ..ومنو يقول .. على طول البشكارة شلت بعمرها وظهرت .. عقب كمن يوم اتصلت حق العملا اللي عندي .. قالي لازم اوقف هالأيام .. لان مشكوك فينا ..

منوة بخوف : يعني اللي تسوونه حرام ..؟

فتحية : حد الله بيننا وبين الحرام .. بس شغلتنا تخالف القانون .. والسالفة عليها حبس ..

منوة : محد جبرج تشتغلين هالشغلة !!

فتحية : وشرات ما انتي استويتي بشكارة انا استويت جيه .

منوة بغيظ: انا ما اعترضت انزين ؟؟

فتحية : والله مالي خلق لج .. تدرين شو اللي مخلني استحملج ؟؟

منوة تطالعها بطرف عينها : شو ؟؟

فتحية : اكلج اللي قمتي تغلبيني فيه ..

صحيح ان منوة ما كانت تطبخ ف البيوت اللي اشتغلت فيها ..

بس يلستها ف بيت شهد وبعض وصفات فتحية كان لها الأثر الكبير في إنها تحرك موهبة الطبخ عندها .. وعسب تثبت لفتحية اللي استهانت بحاستها السادسة ان هي عندها نفس في الطبخ ..

منوة ابتسمت لها : بس باقي أتعلم كيف أسوي عيوش ومجابيس ..

فتحية : محد قام ياكل هالسوالف الثجيلة وايد الا ف الأعياد والعزايم .. سوي سوالف يديدة ..

**لحن آلأمل** · 16-03-2011, 02:58 PM

رد: لأننـــي خادمــــــه/ روايه اماراتيه رائعه /كامله

منوة : ان شا الله ..

.

مرت أسابيع على منوة ..

تحقق فيها حلمها انها تتعلم تسوي المجبوس ( الفوقة ) ..

مع ان شرات ما قلنا قبل .. فتحية ما كان اكلها لين ذاك الزود ..

بس منوة قدرت انها تغير شوي من مقادير الطبخة اللي أثبتت جدارتها فيما بعد ..

هالشي طبعا خلى فتحية تتنازل لها عن المطبخ .. وتهتم بالتنظيف ..

/

مع مرور الأيام ..

دش ريال كبير ف السن ..

يعني ف حدود الخمسين ..

فتحية : حياك الله بوخالد .. ارتاح ..

بوخالد: ما عليه مب مشكلة .. انا مستعيل .. وينها الخدامة اللي كلمتي ام خالد عنها ؟

فتحية : يالسة تجهز أغراضها .. ثواني وبييبها ..

دشت فتحية على منوة اللي كانت يالسة تكتب كالعادة ف دفترها ..

فتحية : صوفيووو ودري كل شي عنج ..

منوة تسكر دفترها وتطالعها : خير ان شا الله شو مستوي ؟

فتحية : لقيت لج بيت ناس عز .. كبارية تخدمينهم ..

منوة باستغراب : كبارية ويايين عندج ؟!!

فتحية : الحرمة مسوية حادث من كم سنة ويتها اعاقة ف ريلها اليمين .. وانا تعرفت عليها من فترة .. واستوت ربيعتي .. عاد خبرتها عنج وعن نظافتج وجيه ..فقالت لي انها تباج ..

منوة بخوف : انتي صاحية ؟؟؟!!

فتحية : بلاج ؟

منوة : شقايل تبيني اشتغل في بيت تجار روحي ؟

فتحية تأشر لها بما معناه " مالت" : ويه عندهم وايد خدم .. مالت ..

منوة : وانا شو يبون فيه ؟

فتحية : صوفيو بلا رمسة زايدة .. سيري لبسي اليونيفورم بسرعة ..

منوة باكتئاب : كم بتم بعد عندهم ؟ اسبوعين ؟؟

فتحية : لا بويه زمان العز ولى وراح .. حالج حال باجي الخدم اللي يبتهم قبل .. سنتين كاملات ..

منوة بصدمة : بيكشفووووني !!

فتحية : ليش انتي ناوية تخبرينهم انج مواطنة يا حسرة !!

منوة : يمكن أغلط وارمس بالعربي ..

فتحية تنغزها : ولو .. عادي .. تراج ما تعتبرين مواطنة ..

منوة بصدمة : شو تقصدين ؟

فتحية : ماشي لا جواز ولا جنسية .. بعد شو ؟

منوة وهي مرتبكة من رمستها : انتي .. انتي كيف تتجرإين تقولين لي هالرمسة ؟؟

فتحية : لا تقوليلي انج ما كنتي تعرفين ... والحين عرفتي ؟؟

منوة بحزن : اعرف ..

فتحية : يلا عيل .. خلج شرات باقي الخدم الشطار .. بسرعة نشي وجهزي أغراضج ..

منوة بيأس : ان شا الله ..

جهزت منوة الشنطة وهي حاسة باكتئاب فظييييع ..

من بعدها ظهرت لهم ..

منوة : السلام عليكم ..

بو خالد : ما شا الله .. وعليكم السلام ورحمة الله وبركاته ..

.

يتبع //

**لحن آلأمل** · 16-03-2011, 03:00 PM

رد: لأننـــي خادمــــــه/ روايه اماراتيه رائعه /كامله

الجزء الخامس // الفصل الثاني

جهزت منوة الشنطة وهي حاسة باكتئاب فظييييع ..

من بعدها ظهرت لهم ..

منوة : السلام عليكم ..

بو خالد : ما شا الله .. وعليكم السلام ورحمة الله وبركاته ..

فتحية : هذي الخدامة .. وسلم على ام خالد ..

بو خالد : ان شا الله .. يلا تعالي ..

.

ركبت منوة سيارة بو خالد وهي حاسة بارتباك شويه ..

لكن هالارتباك مسرع ما زال ..

يوم سمعت صوت القران عالي ف السيارة ..

بو خالد كان ريال ملتحي ..

وباين عليه انه عود .. وعنده عيال كبار ..

ارتاحت منوة له شوي ..

واللي ريحها انه كان ساكت وما تكلم وياها ..

اول ما دخل السيارة ف البيت ..

انصدمت بهالقصر الروعة ..

كان فعلا شي فخم .. ولا كل سيارة موقفة ع الباركنج أفخم عن الثانية ..

كانت مندهشة من اللي تجوفه ..

بس ما تدري ليش حست بنغزة ف قلبها ..

يمكن لانها تذكرت القصر اللي كانت تلعب فيه وهي صغيرة ..

تنهدت بأسف .. ويت بتنزل ..

تمت تطالع بو خالد بحيرة ..

بو خالد : جوفي يا ..

منوة : صوفي ..

بو خالد : يا صوفي .. الحجرة مالتج بتكون هني ( يأشر لها على ملحق ) .. وياج 3 غيرج .. سيري لهم وتعرفي عليهم .. واذا بغيناج بنطرش عليج ..

منوة : ان شا الله بابا ..

الفضول كان سيد الموقف بالنسبة لمنوة ..

كانت رغبتها ملحة انها تدش داخل وتجوف هل البيت ..

يمكن لأن عندها بؤرة من الأمل انها تجوف شي يذكرها بهلها ..

راحت صوب حجرة الخدم ..

والخوف محتل جزء من قلبها ..

خايفة تظهر لها وحدة هندية تكشفها ..

لكن لحسن حظها .. ان الخدامات كانن من 3 جنسيات مختلفة ..

اندونيسية / فلبينية / سيلانية ..

الاندونيسية "زوبا" واللي كانت للمطبخ .. بشكلها المرعب وحواجبها المنتفة وعيونها الصغار .. قدرت تخلي ف بال منوة فكرة ان ممكن تكون ساحرة .. مب شكلها يساعد ؟! ..

أما السيلانية "كوماري" واللي يابوها عسب التنظيف .. واللي من شكلها تبين خبيثة ومن تحت ل تحت .. لكن شكلها الظاهري يبين ادعاءها للسذاجة .. عسب تكسب رضا المدام ..

أخيرا الفلبينية " روز" وهاي اللي جمعوها بين التنظيف والمطبخ .. ع قولتهم تعين وتعاون .. وارمة ونظراتها حادة تبين مدى غموضها الغريب !! ..

ابتسمت منوة ف خاطرها وهي تسمعهم يعرفون بعمارهم .. و حطت ف بالها ان هالتعدد المتعمد للجنسيات ف بيت واحد ما يا من جراء صدفة .. انما كان متعمد ... وسبته امور وايدة ..

اهمها انهم يضمنون ان ولا وحدة بتتامر مع الثانية عسب تكيد لهم ..

والحين انضمت الجنسية الرابعة .. هندية بمرتبة الشرف !! ..

للعلم ان روز الوحيدة كانت تعرف تتكلم انجليزي ..

روز اونها عاد متشطرة ع الباقيات : Do you know How to talk in English?..

منوة باستغراب : actually yes I do ..

روز : but you are Indian!! ..

منوة عقدت حواجبها : so what ?? I dont think that it is a strange thing !! ..

كوماري : انته سو في قول كله قرقر واجد ؟

منوة ضحكت لها : هادي روز ما يعرف شنو يقول ..

زوبا : هدي روز مجنون جداب ما يعرف ساس من راس ..

**لحن آلأمل** · 16-03-2011, 03:01 PM

رد: لأننـــي خادمــــــه/ روايه اماراتيه رائعه /كامله

منوة : هههههههههههه .. هادا بيت في زين ؟

زوبا : ماما واجد جين .. بس بابا سوي في سوي جنجال ..

كوماري : بابا سوي جنجال يوم زوبا ما في سوي اكل زين .. يوم انا ما يعرف ينظف زين ..0

منوة : كل يوم يسوي جنجال ؟

كوماري : لا بابا واجد جين .. بس كم يوم مخ مال هوا في خراب ..

منوة بفضول : كم في نفر في هادا بيت ؟

زوبا : 5 نفر بس ..

منوة : 5 نفر و4 بشكار ؟

كوماري : بيت كلو كبير ما في صغير ..

روز : Can you shut your mouths for a moment ?..

منوة بغيظ : what a shame to talk with other in this impolitely way ..

روز : What do you mean by this says ?? ..

منوة : i dont mean any thing bad ..

روز : stubit indian!! ..

منوة بغيظ : If you dont know How to respect others , I will teach you ..

روز طالعتها بغيظ ..

منوة :What are you looking for ?..

روز صدت بويهها وتمت تتحرطم بلهجتها ..

منوة بغيظ : هادي شنو مجنون ؟

كوماري : هادي كلو جدي .. ما في هو انا ..

زوبا : خلي ولي .. هومارة هادي ..

منوة : ههههههه .. الا تيسة وبقرة ( تذكرت عمرها ) .. مجنون مجنون ..

كان السوالف امبينهم حلوة ..

بس عيبها عدم التجانس الفكري .. !!!

كل وحدة من بلاد ..

وصعب انهم يتفاهمون دوم ..

.

بعد مرور الوقت ..

استوى الوقت عصر ..

ظهرن ال اربع بشاكير عسب يخمن الحوش ..

منوة كانت تتحاشى توقف اخر الحوش .. بينما المنافسة واصلة لأشد حدودها بين زوبا وكوماري وروز وبين منو اللي فيهم بتروم تحظى بنصيب شوفة العمال اللي برع البيت !! ..

.

صاب الملل منوة . . خصوصا انها ما تعودت تنظف بدون ما حد يونسها ويرمسها ..

حتى لو ما كانت ترمس ويا فتحية .. ع الأقل تنشغل بالصراصير وتراقب تحركاتهم عن يتجربون منها !! ..

.

تهلل ويه منوة باللي فتح باب الصالة .. بس كان نفسه بو خالد اللي ظاهر عسب يشغل سيارته ..

تونست يوم شافته يهزب هالثلاث المستخفات وخلاهن ينظفن داخل ..

.

بعد دقايق ..

ظهرت بنت حليوة زقرت زوبا .. ورمستها بصوت واطي ..

وبدورها زوبا يت لمنوة ..

زوبا : يلا روهي ماما يبي انتي ..

منوة بخوف : شنو يبي ماما ؟

زوبا : يبي ياكل انته !! شنو هادا روهي ماما ينطر انتي ..

مشت منوة ودخلت من بوابة الصالة ..

والبنت تترياها ..

كان البنت هي نفسها أسما .. أصغر بنات أم خالد .. بملامح رقيقة .. وتدش القلب على طول ..

منوة كانت مندهشة من كل هالفخامة اللي مالية المكان ..

مشتها اسما لين ما دخلتها لقسم داخلي فرعي من الصالة ..

استنتجت ان هالحرمة العودة هي أم خالد ..

وكان في ولد ثاني منسدح ع القنفة وعيونه ع التلفزيون ..

استحت منوة وخصوصا ان الولد كان يطالعها بنظرات على اساس انها خدامة يديدة ..

طالعتها أم خالد بحنان ..

ابتسمت لها منوه ..

أسما : خلاص امي أسير ؟ ولا تبين شي بعد ؟

ام خالد : خلاص اسومة سيري .. ( تطالع منوة) اسمج صوفي صح ؟

منوة : ايوة ..

**لحن آلأمل** · 16-03-2011, 03:03 PM

رد: لأننـــي خادمــــــه/ روايه اماراتيه رائعه /كامله

ام خالد : انزين يا صوفي خبريني .. شو تعرفين تطبخين ؟

منوة : ماما انا يعرف سوي رز .. لحم .. سمك .. دجاج ..

ام خالد : يعني لو أقولج سويلنا عشا بتعرفين تسوين ؟

منوة هزت راسها شرات الهنود : ان شا الله ماما ..

ام خالد : انزين خبريني كم عمرج ؟

منوة بحيا : 20 ..

ام خالد باستغراب : قالتلي فتحية انج صغيرة . بس توقعت 30 ولا 35 ..

الولد : لا تصدقين امي تقصد ان عمرها الصعف ..

منوة طالعته باستخفاف ..

ام خالد : عيب رشود شو ها ؟

منوة : ماما انا صغير بس يعرف سوي كل شي ..

راشد باستغراب : اميه هاي جنها ممثلة هندية ؟!!!

ام خالد تنغزه : رشود تأدب .. هي مب بهيمة عسب ما تفهمك !! ..

راشد : لا تحاتين امي كلهن جيه .. قوليلهم سووا عيش بيسوون معكرونة ..

منوة طالعته بقهر وراشد انتبه لها ..

ام خالد : خلاص امي سيري .. ع الساعة 7 تعالي المطبخ وسويلنا شي ..

منوة : شنو يبي ماما ؟

راشد باستخفاف : عيش ..

منوة لا اراديا : عشان يسوي معكرونة ؟!!

راشد فقط وسكت ..

ام خالد : هههههه سوي اللي يعيبج .. نبا نجربج اليوم ..

منوة : ان شا الله ماما ..

وسارت عنهم ..

راشد : امي ادبيها من الحينه هاي داهية وملسونه ..

ام خالد : مسكينة ترمس شرات الأوادم .. وفاهمتني بعد ..

راشد : بس طاعي شقايل رمستني !! ..

ام خالد : دواك .. محد قالك تسبها ..

راشد 15 سنة .. أخر العنقود .. بس لسانه ما في أطول عنه خخ ..

ظهر راشد من عند امه وسار فوق عند اخته عذبة ..

راشد : عذبو لحقي .. البشكارة قدج ..

عذبة تطالعه باحتقار : رشود اظهر احسن لك هب فاضية لسخافاتك ..

راشد : والله اني ارمس جد ..

عذبة : واشعنه امي يايبة علة رابعة ؟!!

راشد: عسب تكون قدج ..

عذبة بغيظ : رشود اظهر احسن لك ولا والله ..

راشد : ويه وييييه البشكارة احلى عنج ..

عذبة غيظت : ف عينك يا الهرم .. قوم يالنحس قوم .. اذلف عن ويهي ..

راشد : مالت عليج يالخسفة ..

عذبة ..20 سنة .. مالجة وماخذه حميد .. وقريب عرسها ..

انتقل راشد شرات الذبابة وسار عند قسم اخوه أحمد ..

فتح الباب بطريقة همجية ..

راشد : يابوا بشكارة يديدة ..

أحمد يطالعه بغباء : ارقص لك يعني ؟

راشد : ياخي قد عذبو ..

أحمد يلتفت له ويودر اللابتوب : بذمتك ؟

راشد : لا بعد خقاقة ياخي ..

أحمد : اقول اذلف يالخراط .. تحسبني صدقتك الحينه ؟

راشد : انا هب خراط انزين .. كيفك لا تصدق ..

أحمد : مالت عليك ..

راشد : عليك انته يا أسد اللابتوب ..

أحمد .. 23 سنة .. خريج هندسة طيران من سنة ..

.

يا وقت المغرب ..

وصلت منوة فرضها وعقبها اتجهت للباب الفرعي من الفيلا عسب تطبخ في المطبخ التحضيري ..

بس زوبا سحبتها وودتها المطبخ الخارجي .. ^_^..

ماعرفت شو تسوي بالضبط ..

سإلت زوبا عن الوجبات اللي تنإكل ع العشا ..

فقالتلها انها بحدود الثلاث .. غير الحلاوة والسلطة ..

ردت الحيرة لها ..

سوت معكرونة بيضا ايطالية قرت وصفتها ف دفتر طبخات شهد .. ومحاشي كوسا وملفوف وورق عنب ساعدتها زوبا ف الحشو واللف ..

ما نست تسوي تبولة أم فايز الشهيرة خصوصا ان ام فايز شامية .. وطبيعي تكون خبيرة في " هيك طبخات"..

أخيرا سوت لهم ايسكريم ك حلو يحلون به عقب العشا ..

.

جهزت صحون التقديم .. وعلى ما خلصت .. استوت الساعة 9 ..

سإلت زوبا عن وقت عشاهم .. فخبرتها انهم يتعشون الساعة 10 ..

لأن كل اهل البيت يكونون موجودين فهالوقت ..

انتهزت منوه الفرصة وسارت تسبحت ( تعيبني كلمة تروشت :) )

وبعد ما ظهرت نشفت شعرها ع السريع وسارت المطبخ ..

شلت الصحون بمعاونة زوبا .. وودوهم لطاولة الطعام ..

أما كوماري وروز فكانوا مشغولين بالكوي وتوزيع الملابس ..

.

ف غرفة الطعام ..

ام خالد تطالع منوة بحنان : ها .. عسى سويتي شي زين ؟

منوة ابتسمت لها بحب : ان شا الله ماما كلو في جين ..

ام خالد : يلا استعيلي .. وحطي الأكل ..

منوة : ان شا الله .. ماما يبي سويت مع عشا ؟

ام خالد : لا .. بعد العشا ييبيه ويا دلة القهوة والجاهي ..

.

حطت صحن المعكرونة واللي كان الطبق الرئيسي ف النص ..

ومن عقبه المحاشي واللي تفرعوا من كل صوب ..

وخذت وقت لين ما وزعت التبولة ف الملال ..

اول ما يت بالصينية تفاجأت بأن كلهم يالسين ..

سارت صوب ام خالد ..

ام خالد : هي حبيبتي .. هالملال حطيها جدام كل واحد يالس ..

انحرجت منوة شوي .. خصوصا مع نظرات رشود وأحمد الفاحصة الها ..

يوم وصلت لراشد سمعته يقول : جوفوا جوفوا .. بذمتكم انا خراط ؟

أحمد يطالعها بذهول : يا خي ظهرت حليوة بعد ..

تسمرت منوة ف مكانها من هول الموقف ..

/

\

/

\

نهاية الجزء الخامس ...

لأنني خادمه/ روايه اماراتيه رائعه /كامله

تعليق

تعليق

تعليق

تعليق

تعليق

تعليق

تعليق

تعليق

تعليق

تعليق

google Ad Widget