رد: رواية:ما قدرت على فراقك

أهلا بيك في روايتي
انتي الأروع ان شاء الله باقي الرواية تنال اعجابك
تحياتي لك

رد: رواية:ما قدرت على فراقك

البارت الثاني

وصلت هديل لباب المكتب ودقت على الباب,سمعت صوت المدير وهو يقول:تفضل
دخلت هديل المكتب ولقت المدير جالس على الكرسي خلف المكتب البني الفخم, وكان فيه على جنب مكتب المدير مكتبة فيها كتب كثيرة مرتبة بطريقة حلوة
هديل:السلام عليكم
المدير وهو يأشر على الكرسي الي قدام المكتب:وعليكم السلام,تفضلي إجلسي
هديل جلست على الكرسي:خير يا مدير بغيتني
المدير:اليوم متى وصلتي لشركة
هديل نزلت راسها لانها اليوم جت متأخرة:اسفة يا سعادت المدير على تأخيري اليوم
المدير:لا ما عليك هذي اول مرة وياليت ماتتكررمرة ثانية
هديل:ان شاء الله تكون هذي أخر مرة اتأخر
المدير:المهم هذا ماهو الموضوع الي أبغاك فيه
هديل:خير ان شاء الله
المدير:هديل محمد ال.......إحنا نقدر لك مجهوداتك وعملك معنا بكل جهد ونشاط وتقديرا لعملك قررت اني أعطيك ترقية على مجهوداتك الاكثر من رائعة
هديل بفرح:بارك الله فيك وان شاء الله اني اكون عند حسن الظن
المدير:بإذن الله غدا تباشري بعملك الجديد,تقدري ترجعي لمكتبك
هديل قامت من على الكرسي وطلعت من مكتب المدير وهي فرحانة
هديل في نفسها:الحمد الله إني حصلت ترقية وان شاء الله اني اكون بنفس النشاط والمجهود
سمعت الصوت في داخلها يقول:هديل هديل,اوووف من هذي الي إسمها هديل الي قاعد اسمها في راسي وحتى لو كانت مصممة في اما شركة تشتغل
هديل وهي تكلم نفسها:تبي تعرف في اما شركة اشتغل في شركة.........(ضحكت بسخرية على نفسها)هه بالله قاعدة حتى اقول اسم الشركة والله شكلي انجنيت,سكتت شوي وهي تنتظر تسمع الصوت وش بيقول بس ما سمعته
بعد ماخلص دوام هديل طلعت وركبت السيارة
راجو:على وين مدام
هديل:على البيت,سكتت وهي تناظر الشارع من النافذة
سمعت الصوت يقول:هديل والشركة,انا لازم اروح ل الشركة وادور على البنت الي اسمها هديل
هديل غمضت عيونها وقالت في نفسها:احس نفسي مخنوقة انا لازم اروح لدكتورة نفسية,سكتت وهي تفكر,لالا وش دكتورة نفسية وش بيقولوا الناس علي,انسي شي اسمه دكتورة نفسية ,اروح لصديقتي وافضفض لها احسن شي
وصلت هديل لبيتها عبارة عن بيت دورين الدور الاول فيه صالة كبيرة وبوسطها درج لونها بيج وفيها كنبة كبيرة باللون البني وعليها وسادات باللون البيج وبجنبها كراسي باللون البني والبيج,و بجنب الصالة مطبخ,وفيه حمام (الله يكرمكم)وبالدور الثاني فيه غرفة نوم رئيسية مغلقة وفيه بجنبها غرفت نوم وفيه صالة صغيرة
دخلت هديل البيت,طلعت لدور الثاني ودخلت غرفة النوم الي بجنب غرفة النوم الرئيسية ,فسخت عبايتها ودخلت الحمام(الله يكرمكم)وتروشت بسرعة وبعدها نامت




نروح لجهة ثانية
فهد:أستاذ أحمد
أحمد:خير يا فهد
فهد:الشركة الي كلمتني عليها تبغاني اكلمهم وانسق معاهم
أحمد:لا مو لازم تكلمهم الحين
فهد:على امرك يا طويل العمر,تبغى شي ثاني
أحمد:لا تقدر تتفضل

من الشخصية الجديدة ؟وهل سيكون من أبطال الرواية؟
يتبع

تفاعلكم معي يهمني كثير ويسعدني ويشجعني اني اكمل الرواية
تحياتي اسيرة الذكريات الحزينة

رد: رواية:ما قدرت على فراقك


السلام عليكم
البارت الثالث

بعد ما طلع فهد,أسند أحمد راسه على الكرسي وهو يكلم نفسه:الشركة لقيتها بس ما أبي أحد يدري على إلي أدور عليه فيها,ضروري يتقفل الموضوع ضروري



جالسة على السرير وتناظر الساعة
هديل:الساعة ستة,بكلم صديقتي وأقول لها اني جاية عندها
أخذت جولها المرمي على السرير واتصلت على صديقتها
هديل بتعب بس ما بينت:السلام عليكم
أميرة:وعليكم السلام,هلا بهديل كيف حالك
هديل:الحمد الله,أقول أميرة إنتي في البيت
أميرة:إيه أنا في البيت وين تبيني أكون
هديل:طيب اقدر أجيك
أميرة:أكيد البيت بيتك
هديل:اجل مسافة الطريق وأكون عندك
اميرة:مع السلامة
هديل:في أمان الله
قامت هديل من على السرير وبدلت ملابسها وتوجهت لبيت أميرة



جالس على كرسي الجلد وقدامة مكتبة البني وعليه مجموعة من الملفات إلي تخص شركة,رفع سماعة الهاتف الخاصة بالمكتب على اذنة وشوي وجاه رد قال بصوت امر:فهد تعال للمكتب
ما مرت دقائق إلاويسمع صوت الباب يدق
قال بصوته الواثق:أدخل
فهد:نعم يا طويل العمر
أحمد:انا راجع للبيت(وهو يأشر على المكتب)هذي ملفات الموظفين الجدد,أبغاك تجتمع بيهم وتوضح لهم شغلهم,ولا تنسى تعلمهم بشروط الشركة,ممنو التأخر عن الدوام,ممنوع التكاسل,واي خطأ بسيط يكون معرض للفصل
فهد وهو يشيل الملفات من على المكتب:أمرك يا طويل العمر
طلع أحمد من المكتب ووراه طلع فهد
كان يمشي بهيبته وثقته المعروفة بين الموظفين واي أحد يشوفة غصبن عنة يحترمة,طلع أحمد من الشركة توجه لسيارتة الفخمة
السواق وهو يفتح الباب:تفضل يا طويل العمر
أحمد وهو يدخل السيارة,أمر السواق يوديه لبيته او بالأصح قصرة
أحمد وهو سرحان قال في نفسة:ضروري استعجل بإقامة الحفلة,مع ان الحفلة بسيطة وما تستحق مني كل التفكير,بس وش أسوي هالبنت أشغلتني ,قطع تفكيرة السواق وهو يفتح الباب
نزل أحمد من السيارة وتوجه لباب القصر(كان أما باب القصر ورود كثيرة وموزعة بطريقة حلوة وعلى الجنب كان فيه حوض سباحة كبير والارض كلها خضراء)دخل أحمد القصر ومشى لين الصالة(الصالة كانت كبيرة وموزعة فيها كنبات وكان في وسط الصالة نافورة ومتناثر عليها الورد بشكل جميل وعلى جنب الصالة كان في درج وفي زاوية الصالة كان فيه مطبخ)دخل أحمد الصالة شاف أمه جالسة على الكنبة
أحمد:السلام عليكم
ام أحمد:وعليكم السلام
احمد وهو يقبل جبينها:كيف حالك يا امي
أم أحمد:بخير الحمد الله,كيف حالك أنت وحال الشغل معك
أحمد وهو يجلس:الحمد الله,كل شي تمام
دخلت عليهم أخت أحمد
أسماء:هلا وغلا باخوي الغالي
أحمد:الي يسمع ترحيبك يقول إني مو عايش معاكم
أسماء:بس انت من الصبح مو موجود بالبيت
أحمد:وش اسوي يأسماء الشغل ماخذ وقتي
أم أحمد:خلاص يا أسماء خلي أخوك وانتي سوالفك ما تنتهي لو تتكلمي من اليوم لبكرة
أسماء تتصنع الزعل:انا ياأمي الغالية سولفي ما تنتهي,خلاص من اليوم ما تسمعون صوتي أبد
أحمد:أقول أسماء وين سارة
أسماء مطنشته:.............
أحمد:أسماء أكلمك
أسماء على نفس وضعها:............
أم أحمد:انت يا بنت أخوك يكلمك
أسماء:انت مو قلتي لي لا تتكلمي,خلاص ما اتكلم
أم أحمد وهي تقوم تبي تضرب أسماء:ماتبي تتكلمي ها,أنا أوريك
أسماء وهي تهرب من أمها:خلاص يالغالية,أحمد سارة في غرفتها
أم أحمد وهي ترجع لمكانها:ناس ما تمشي الا بالعين الحمرة
..........:السلام عليكم
الكل:وعليكم السلام
أسماء:وينك من الصبح ما نزلتي ,أبغى أعرف وش تسوين بالغرفة
سارة ببرود:وانتي وش دخلك
أم أحمد:أقول أحمد قوم يا ولدي ارتاح من الصبح وانت مو في البيت أكيد تعبان
أحمد سرحان:...........
أم أحمد:أحمد,أحمد أكلمك أنا
أحمد:خير يمه
أم أحمد:خير يا ولدي فيك شي قاعدة اكلمك من الصبح وانت ما ترد علي
أحمد:السموحة منك يا أمي بس تاعب من الشغل,عن إذنكم بروح أنام
أم أحمد:الله يوفقك يا ولدي,قام أحمد وتوجه لجناحه
(تعريف الشخصيات أبو أحمد:رجل أعمال كبير دايما يسافر بسبب شغله بس مو هامل بيته ديما يتصل عليهم إذا كان مسافر ويتطمن عليهم
أم أحمد:طيبة وحنونة معروفة بأناقتها بس مو متكبرة تتاثر بسرعة وبنفس الوقت قوية
أحمد:26سنة طيب بس ما يظهر طيبته كثير,كتوم وما يقول أسراره الالصديق طفولته عزام منتعرف عليه بعدين بإذن الله طويل وكتافه عراض شعره أسود ,عيونة رمادية بشرته بيضاء
سارة:24سنة كتومة مثل أحمد,منعزلة عن الناس,ما تحب تتكلم كثير,ما توضح مشاعرها لاحد شعارها هو لاتثق في أحد حتى لو كان أحب الناس إليك بشرتها بيضاء قصيرة بس مو مرة, ضعيفة,عيونها سوداء,شعرها أسود يوصل لنص ظهرها
ركان:20سنة مرح و يمزح,متكبر,يحب دراسته كثير, طويل وجسمه رياضي شعره بني غامق عيونه رمادية لون بشرته سمراء بس موكثير
أسماء:18سنة مثل ركان مرحة وتمزح كثير ما تحب تضعف أمام أحد ما تحب تدرس مع ان اخوتها كلهم يحبوا الدراسة طويلة وضعيفة بيضاء بس مو أبيض من سارة عيونها عسلية شعرها لنهاية ظهرها لونه أسود)


بعد مسافة الطريق وصلت للبيت إلي تقصدة
السواق:أنتظرك مدام
هديل:لا روح ولما أبي أرجع للبيت أكلمك
السواق:أوكي مدام
نزلت هديل من السيارة,رنت الجرس ماهي إلا ثواني وانفتح الباب
إنفجعت وهي تشوف أخو أميرة هو الي يفتح الباب
هديل وهي منزله راسها:معليش أميرة موجودة
أخو أميرة سالم وهو يبتعد عن الباب:ايه موجودة تفضلي
هديل دخلت للبيت وتوجهت لصالة وهي تنادي على اميرة
أميرة وهي تدخل الصالة:السلام عليكم
هديل:وعليكم السلام
أميرة:تضلي إجلسي
هديل وهي تجلس:كيف حالك وحال أخوك
أميرة:الحمد الله,كيف حالك إنتي
هديل نزلت راسها وقالت وهي تتنهد:الحمد الله
أميرة بحكم أن هديل صديقتها من كانت صغيرة عرفت ان هديل فيها شي:وش فيك يا هديل عسى ماشر
هديل والدموع مو قادة تسيطر عليها قالت ببكاء:أميرة أنا واقعة بمشكلة ومو عارفة وش أسوي ساعديني يا أميرة
أميرة بخوف:وش هي المشكلة خوفتيني عليك
هديل:هي من سنتين تقريبا بس الفترة هذي أكثر من قبل
أميرة بخوف وقلق:كملي وش هي المشكلة
هديل:كل ما أكون سرحانة أسمع شخص يتكلم جواتي,أحس أني مجنونة أو....أو مسكونة,ساعديني يا أميرة قولي لي وش أسوي
أميرة:طيب الصوت ذا وش يقولك
هديل:اسمع شخص يتكلم عن حياته الشخصية,كأي أحد يتكلم مع نفسه
أميرة بعد تفكير:طيب ليه ما تروحي لدكتورة نفسية
هديل زادت في البكاء:وش بيقولو الناس علي,يقولوا هديل بنت محمد ال......مجنونة او عندها مرض نفسي
أميرة وهي تضم هديل:إهدي يا هديل ان شاء الله كل مشكلة وليها حل,وأنا بساعدك وأكون معك وما أتركك ابد
هديل بصوت مخنوق من العبرة:بارك الله فيك يا أميرة وقفتك معاي ما أنساها أبد
بعد مرور الوقت على هديل وأميرة
هديل وهي توقف:أستأذنك الحين
أميرة:أقعدي شوي الوقت مو متأخر
هديل:لا ما أقدر يا أميرة عندي أشغال ضروري أكملها اليوم
أميرة:على راحتك,بس خليك على إتصال
هديل:أوكي



منسدح على سريرة, فجأة يسمع صوت جوالة يرن
أحمد:السلام عليكم
......:وعليكم السلام
أحمد:كيف حالك وحال الدراسة
ركان:بخير الحمد الله,كيف حالك انت وأمي واخواتي
أحمد:الحمد الله ما ناقصنا غير شوفتك سالم انت وابوي
ركان:ان شاء الله كم شهر ونكون معاكم,أحمد وين أمي أبغى أكلمها جوالها ما ترد عليه
أحمد:أمي بغرفتها,ممكن تكون نايمة
ركان:أجل أكلمها بكرا,والله اني مشتاق لكم
أحمد:واحنا كمان مشتاقين لكم
ركان:توصي على شي
أحمد:سلملي على ابوي
ركان:يوصل,في أمان الله
أحمد:انتبه على نفسك

وش يدور عليه احمد في الشركة ؟
وهل اميرة بتلاقي حل لمشكلة هديل؟
يتبع


تفاعلكم معاي يهمني ويحمسني اني أكمل الرواية
تحياتي اسيرة الذكريات الحزينة

رد: رواية:ما قدرت على فراقك

البارت الراب(4) ع

قامت من نومها ودخلت الحمام(الله يكرمكم)وتروشت ولبست ملابسها وراحت لشغلها وهي بالسيارة تكلم نفسها:اليوم ببدأ بشغلي الجديد ان شاء الله اني أكون عند حسن الظن وأخذ ترقية ثانية
سمعت الصوت بداخلها يقول:هه وإنتي تحلمي حتى تحصلي ترقية ثانية احمدي ربك على هالترقية,اوووف وش صارلك يا احمد تخاطب نفسك,وش هالجنون وش بيقولوا الناس عنك اذا عرفوا
هديل:انت وش دخلك فيا اذا أخذت ترقية اولا,وبعدين من أحمد هذا(ضحكت بسخرية على نفسها)هه أنا مجنونة بجد,بالله عليك يا هديل تكلمي نفسك وكأنك تكلمي في شخص
الصوت:إنتي ما تعرفي من هو أحمد خالد ال.......,هه قاعد أعرف نفسي على نفسي أنا بجد انجنيت
هديل:من أحمد هذا,يا ربي وش هالصوت(بعد فترة تغيرت ملامح وجهها للخوف )هل ممكن اني أكون مسكونة هزت راسها لا لا وش هالتفكير يا هديل
قطع تفكيرها السواق:تفضلي مدام
هديل ووجها باين عليه الخوف ناظرت السواق الي فاتح الباب وبعدها ناظرت باب الشركة
السواق:فيه شي مدام
هديل انتبهت لنفسها وبسرعة قالت:لا ولا شي,نزلت من السيارة وتوجهت لمكتبها الجديد وهي تمشي صدمت بكتف بنت
.......:انت شوفي قدامك
هديل:أسفة مكان قصدي,وصلت هديل للمكتب دخلت المكتب وجلست على الكرسي,بعد فترة دخلت عليها نفس البنت الي صدمتها
البنت بغضب:انتي وش تسوين هنا
هديل بهدوء:هذا مكتبي الجديد, طلعت البنت من المكتب بغضب
هديل:وش فيها هذي














جالس على الكرسي وبصوت واثق:فهد
فهد:سم طال عمرك
أحمد:بكرا روح لشركة وقول لهم يجو ينظموا القاعة للحفلة
فهد:تم طال عمرك,تبي شي ثاني
أحمد:لا تقدر تتفضل
بعد ماطلع فهد,أحمد يكلم نفسه:غدا بيتضح كل شي,بس المشكلة كيف راح أقابلها,يعني أقول لهم أبي أشوف هديل,أصلا انا ما ادري هل هديل هذي حقيقة او لا,تنهد وبعدها قال خلني أكمل شغلي أحسن لي بعداها اروح للبيت وأرتاح










جالسة على الكنبة الي بغرفتها وتفكر:طيب وش أسوي ما أعرف حل غير إني أبقى جانبها,لان الحل الوحيد هو الدكتورة النفسية,وهي ما تبي تروح,ياربي وش أسوي,قطع تفكيرها صوت أخوها ينادي عليها:أميرة,أميرة
أميرة وهي توقف:نعم يا سالم
سالم:تعالي أبيك
أميرة وهي تمشي لغرفة أخوها:نعم بغيت شي
سالم وهو منسدح على السرير:أبي ماء
أميرة:دقايق بس وتكون عندك,أميرة وهي تتوجة للمطبخ:غريبة,ما في يوم سالم طلب مني شي,أخذت أميرة الماء من الثلاجة وتوجهت لغرفة سالم
أميرة:تفضل
سالم وهو يحاول يجلس,وبتعب قال:بارك الله فيك
أميرة بخوف:سالم فيك شي
سالم:لا ما فيني الا العافية,مرض بسيط وبيزول ان شاء الله
أميرة:ما تشوف شر




















دخلت المكتب وجلست على الكرسي وقالت بهدوء مصطنع:أنا نورة,أشتغل معاك في نفس المكتب
هديل:وأنا هديل,تشرفت بمعرفتك
نورة ما ردت عليها وكأن ما في أحد كلمها
هديل في نفسها:هذي شكلها راعية مشاكل,اللهم صبرني عليها
بعد فترة,دخل المكتب موظف
الموظف:لو سمحتي أستاذة هديل
هديل:تفضل
الموظف:المدير يبيك
هديل في نفسها:وش يبي ذا من جديد,هديل قالت للموظف:أوكي
قامت هديل من على الكرسي وتوجهة لمكتب المدير من غير ما تلاحظ العيون الي كانت تتبعها
وصلت هديل لباب المكتب طرقت الباب,ببعد ثواني سمعت صوت المدير يقول:تفضل
دخلت هديل المكتب:السلام عليكم
المدير:وعليكم السلام,تفضلي اجلسي
هديل جلست على الكرسي:نع
قاطعها المدير:ابي أقول لك ان غدا اي أحد يبي تصميم لحفلة,بتكوني انتي المصممة,فكوني مستعدة
هديل بتوتر:ط طيب ليش
المدير:أبي أشوف تصميمك في الحفلات,ونورة بتكون مرافقة ليك
هديل وهي كاره اسم نورة:ليش نورة بالذات هي الي بتكون المرافقة لي
المدير تنحنح:إحم,إنت أول وحدة تطاول معاي بالكلام,بس بجاوبك,لان نورة أفضل مصممة عندي
هديل وهي منزل راسها:أسفة لتطاولي
المدير:تقدري تتفضلي
قامت هديل من الكرسي وطلعت من المكتب وكملت شغلها تحت أنظار نورة الي تشتعل نار من الغضب
بعد ما خلص دوام هديل,طلعت من الشركةوركبت السيارة
السواق:على وين مدام
هديل:للبيت,بعد فترة سمعت هديل جوالها يرن,رفعت جوالها وناظرت الاسم(أميرة)
هديل:السلام ع
قاطعتها أميرة وهي تبكي:لحقي علي يا هديل
هديل بخوف:وش فيه يا أميرة,وش صاير
أميرة ببكاء:أخوي يا هديل
هديل:وش فيه أخوك,انتي وين الحين
أميرة:أنا في مستشفى........تعالي بسرعة
هديل:طيب مسافة الطريق واكون عندك,هديل قفلت من اميرة وقالت لسواق:بسرعة ودني لمستشفى.......


















بعد ما رجع من الشركة دخل جناحة,وتروش وبدل ملابسة وارتمى على السرير بتعب
أحمد وهو منسدح على السرير قال في نفسه:بإذن الله بكرا ينحل كل شي واعرف من هي هديل,اه يا أمل لو كنت موجودة بتعرفي همي من غير ما أقول لك,وينك يا أمل وينك,انتي حية او ميته,اذا كنتي حية وينك,واذا كنتي ميتة وين قبرك(نزلت دمعة من عينة حارة مسحها وهو يقول بصوت واطي)وينك يا أمل اشتقت لك كثير,غمض عيونة ونام من شدة التعب



















وصلت للمستشفى وراحت للاستقبال,وعرفت ان اخو اميرة سالم في غرفة العناية المركزة,وصلت هديل لمكان الغرفة,ولقت أميرة جالسة على كرسي قدام باب الغرفةويديها على وجهها وصوت بكاها واضح,جلست هديل جنب اميرة وحطت يدها على كتف اميرة
هديل بحنية:لا تخافي ان شاء الله أخوك ما فيه الا كل خير,هو محتاج لدعائك,لا تبكي وادعي ان ربي يقومة بالسلامة
أميرة ارتمت بحضن هديل وبكت أكثر,هديل ضمت أمير بقوة ودموعها على طرف عينها على حال صديقتها,طلع الدكتور من الغرفة الي فيها سالم,قامت هديل وتوجة لدكتور
هديل:بشر يا دكتور
الدكتور ووجه ما يبشر بخير:المريض عنده تليف بالكبد,وحالته خطيرة
سمعت اميرة كلام الدكتور وزادت في بكائها
هديل:أميرة لا تبكي باذن الله يتعالج اخوك,لا تبكي ادعي له هو محتاج دعائك















بعد ما قام من نومه نزل تحت لصالة
أحمد:السلام عليكم
الكل:وعليكم السلام
توجه احمد لأمه باس يدها وجلس
أم أحمد:خير يا ولدي,وجهك ما هو عاجبني
أحمد:لا يا أمي ما في الا كل خير,بس تاعب من الشغل
أسماء:طيب خذ لك إجازة
أحمد:لا ما أقدر يا اسماء
سارة وهي تمد الشاي:تفضل
أحمد وهو ياخذ الشاي منها:سلمتي يا سارة
أم أحمد:كم عمرك يا ولدي
أحمد بنفسه:لا يكون بتفتح لي موضوع الزواج,والله ما ناقصني
أم أحمد:أحمد يا ولدي أكلمك,وش فيك سرحت
أحمد:ولا شي,بس ليش السؤال
أم أحمد:انت جاوب على سؤالي أول
أحمد:عمري 26سنة
أم أحمد:انت تعرف ان الي في عمرك يكونوا متزوجين,ليش ما تتزوج
أحمد:لا يا أمي ما هو وقته الحين,اذا استقريت في الشركة أفكر بالموضوع
أم أحمد:على راحتك يا ولدي
أسماء بجرأة:لا وش على راحته, هذا إذا تركتيه على كيفه يمكن لين يموت ما يتزوج
أم أحمد:أسماء
أسماء:أمي أقنعيه يتزوج,أبي أصير عمة
أم أحمد بعصبية:انت بتسكتي ولا أقوم لك
أسماء:لا خلاص سكت
أحمد وهو يقوم:أستأذن
أم أحمد:على وين يا ولدي
أحمد:بمر على عزام
أم أحمد:انتبه على نفسك
بعد ما طلع أحمد أسماء:امي ليه تعاملي أحمد وكأنه طفل صغير
أم أحمد أعطتها نظرة حادة:انتي تسكتي أحسن لك,أم أحمد لاحظت ان سارة ما تكلمت أبد
أم أحمد:سارة ليه طول الوقت ساكته
سارة:ما في شي يا أمي
أسماء:وهي متى تكلمت عشان تسأليها ما هو شي غريب هي دايما ساكته
أم أحمد بتهديد:لو سمعت صوتك مرة ثانية,أقص لك لسانك تفهمين
أسماء:حاظر


















بعد ما طلع أحمد من القصر اتصل على صديقه عزام
أحمد:السلام عليكم
عزام:وعليكم السلام,هلا بأحمد وينك معاد تنشاف ولا ينسمع صوتك
أحمد:والله مشغول يا عزام ,كيف حالك
عزام:بخير دامك بخير
أحمد:بس أنا مو بخير
عزام بخوف:عسى ماشر,وش فيك يا أحمد
أحمد:عزام ممكن نتقابل في مقهى..........
عزام:مسافة الطريق وأكون عندك


هديل وأحمد كيف كل واحد يسمع وش يقول الثاني؟
هل أحمد بيقابل هديل ام لا؟
من هي أمل الي تكلم عنها أحمد؟

يتبع

تحياتي اسيرة الذكريات الحزينة

رد: رواية:ما قدرت على فراقك

السلام عليكم

اعتذر لاني لن اكتب البارت اليوم
لاني اكتب ولا اجد تفاعل في الرواية

سأكمل الرواية اذا كان هناك تفاعل
تحياتي اسيرة الزمن

رد: رواية:ما قدرت على فراقك

السلام عليكم
اعتذر لاني لن اكتب اليوم
وذالك لاني اكتب ولا اجد تفاعل
سأكمل الرواية اذا كان هناك تفاعل
تحياتي اسيرة الذكريات الحزينة

رد: رواية:ما قدرت على فراقك

السلام عليكم
اممم شكل الرواية ما نالت اعجابكم
فاذا كانت مو حلوة فقولو لي عشان احذفها

رد: رواية:ما قدرت على فراقك

حلوة الرواية إستمري للنهاية

تحياتي

رد: رواية:ما قدرت على فراقك

شكرا لدعمك لروايتي
تحياتي لك

رد: رواية:ما قدرت على فراقك

رواية تينن ......
اكملي بلييييز .....
مع تحياتي الكاتبة اسماء ...