.. زهـايـمر حكـي .~

**تنهيدهـ** · 23-04-2018, 09:28 AM

رد: ✒ .. خآصرة حرف رمآدية

فيني طبع صاير مدري شلون قايل .. واتوقع انه عند الاغلب
بس الزبدة انه فيني .. اللي هو .. اذا احد اشتكى لي
اسلك له .. أغير الموضوع .. انصح وأعطي حلول سريعة ولا
أتعمق .. خصوصا المتزوجات .. اذا بدت الوحدة تشتكي
وااااي ما تخلص ماتخلص ..
سبب التسليك لهم .. انه ماودي ادخل في مسألة التخبيب
ولا ودي اشب نار بين اثنين ماعرف منهم الا طرف واحد ..
ولاني م احب اسمع الا من طرفين ثم احكم :) ..

ثانيا .. الناس صايرة نفسيات .. الواحد يشتكي لك من فلان
واذا قلت له .. يمكن متضايق ولا ما انتبه وتتعذر للطرف الاخر
من باب السبعين عذر .. يهب بوجهك ..
انت ضدي .. ولا انتي تبين رجلي وعينك عليه ..
تقولين يا مسلمه اتقي الله .. أبد ماعندها تبديل رأي ،،
من زينك ومن زين رجلك عاد .. والله العظيم ..

الزبدة .. صايرة اسلك بشكل عظيم جدا .. لأني احب الضحك
والتشكي مو جوي .. حتى لو اشتكيت في يوم ما .. اكره
نفسي ويأنبني ضميري لانها مو شخصيتي ..

ماعلينا .. التدريس من بعد هالترم للطبقات المخملية .. علشان
يحلون أمورهم مع الوزير بالواسطات ..
محتاجة سواق خاص ع مزاجي بسوي بسطه ^_^

**تنهيدهـ** · 23-04-2018, 09:53 AM

رد: ✒ .. خآصرة حرف رمآدية

‏⁧دامك معي الكون كله ولاشي
‏يا اجمل مشاعر عاشت سنين فيني

‏رغم الغياب الحب مازال لك حي
‏وفي داخلي تسوى حياتي وعيني

تنهيده
‏⁧‫

**تنهيدهـ** · 23-04-2018, 02:10 PM

وهرد: ✒ .. خآصرة حرف رمآدية

اللي تجيك تشتكي قولي لازم اسمع منك ومن زوجك عشان اقدر احكم صدقيني معاد بتجيك تشتكي - على فكرة طيحتي كرتنا بغيابك

هذي فكرة نفر بخصوص التشكي .. حبيت السالفة بس تدري
مب قايلتلها بسمع منك ومن رجلك كذا صريحة .. لا مب غباء
السالفة .. هذي تصلح متى .. لما نسوق ..
أسوي نفسي دعمت ريلها وأقول شنو انتا عمي ما تشوف
واخذ چم بيزه واشبكه >> هذي لاتسوق وجه فقر

اما على طاري طاح كرتكم صدقت امزح امزح ههههههه
كل واحد له كرته وبالنهاية هذا يقال له أسلوب .. يعني مثلا
انا ما اعصب اذا تحلطمت .. لكن اللي يقرا لي حلطمة يقول
لي بالصراحة انتي معصبه .. وهذا سبب تفردي ان الصدق
ما يعجبكم >> شفيها هذي قلبت عليهم هههههه

كنت في مدونة تنهيده طلت بعد طول غياب والله فقدتك في عبير حتى وانتي معي على طول ^_^

لما أقرأ أبياتك ودي أشارك وأعبر عن مشاعيري لكن مامعي الا أغني..
ولفيت كلمات أغاني أم كلثوم وطلال باقي محمد عبده.

وه وه وه بس .. عاد هنا م اقدر اقول شي .. لب الروح تفقدني
وتقول اني اخليها تغني ام كلثوم ومحمد عبده .. لحظه ..
تقصد انه إحساسي فنان وكذا .. وااااي استحيت شسمه ذا
مدري ليه تخبون مشاعيركم .. علموني إنكم تفقدوني علشان
اقطع الدشره وارجع .. لان سبب الغياب اني ادشر مع البنات
في أنحاء الرياض .. حتى النوم زين من زمان عنه ..
وه بس لبى قلوبكم

اما بالنسبة للي يسأل عن طيف فهي بخير وما بها الا العافية بس تجيها حالات قبل النوم
مع الينانوه .. تطير عقلها بسم الله عليها .. جعلني افداها ..

وبس

**تنهيدهـ** · 24-04-2018, 01:22 PM

رد: ✒ .. خآصرة حرف رمآدية

علمتني الحياة اشيا كثير
رغم ان الحال ( كانت ساخرة )

بس كان الدرس الاجمل والاخير
ان بعض الناس مثلك فاخرة

تنهيده

**تنهيدهـ** · 28-04-2018, 02:47 AM

رد: ✒ .. خآصرة حرف رمآدية

إنهمار المشاعر في عيونك يبان
يوم تلمس كفوفي دون تحكي بها

لا تكابر بـ صمتك / واضحه للعيان
ارتجافة شفاتك مين معني بها

تنهيده

**تنهيدهـ** · 30-04-2018, 03:49 PM

رد: ✒ .. خآصرة حرف رمآدية

اكسب كثير اشخاص لكن في الاخير
مو كل شخص يجوز لي باول لقا

واجمل علاقات الحياة اللي مثير
صديق واحد .. / يسوى كل الاصدقا

وانتي صديقة عمر / لا .. اكثر كثير
انتي الصفا .. انتي الأمل .. وانتي النقا

تنهيدهـ

**تنهيدهـ** · 02-05-2018, 08:58 AM

رد: ✒ .. خآصرة حرف رمآدية

إلى صديقتي التي - تفتح ذراعيها - برحابة السماء كلما
عدت إليها أهرب من ضيقي الذي يطاردني ..
صديقتي التي تغلق علي دائرتها قبل أن تخنقني دائرتي ..
صديقتي التي تخبئ في صدرها حزني وترسم على وجهي
سعاداتها ..

صديقتي التي تشعرني بأن العالم بخير ثم تتهالك خلفي ..
صديقتي التي تسندني في ضعفي وان كانت في داخلها مدن
تنهار ..
صديقتي التي لاترضى وقوفي في منتصف الطريق فتدفعني
لتصبح خلفي ..

رحمك الله وغفر لك ذنوبك حتى يطهرك ..

**تنهيدهـ** · 04-05-2018, 02:38 PM

رد: ✒ .. خآصرة حرف رمآدية

مساء الورد ..

من زمان مب مسولفه .. وغالبا بسبب الإرهاق .. كل م أمداني
ادخل ارتجل بيتين من الشعر واطلع .. وأطول علشان اكتب
شي .. يعني لو تقولون وش مشغلك بقول الجو :)
كل م زان طقيت عباتي مع خواتي وطلعنا .. ظهر عصر ليل
عاد اي وقت ..
وانتوا تعرفون جو الرياض كيف صاير هالفترة .. صيف شتا
ربيع .. كل الألوان ..

الزبده .. م علينا ..
اكتشفت هالفترة انه الناس فعليا تبين معادنهم عند الفلوس
انا بالنسبه لي .. طز بالفلوس في كل الأحوال .. اصرف
خصوصا على الصغارين .. ألعاب او ملابس او أشياء
يحبونها .. ولا نيب اطالع اللي بيد غيري ..
وتعمدت الترم هذا اني اكون انسانه مش مدخرة .. وادلل
نفسسي بكل الأشكال ..
بس البعض يتعدى حبه للمال أشياء كثير .. علاقاته واهله
ويتجاوز الى اخلاقه .. مايجي يكلمك بأدب وقت الطلب
لا .. ومستحيل ..
اسلوب مستفز .. اخلاق مش ولا بد .. اوك هي حلوه وتنحب
بس مو لهدرجه ياخي :)

اما بالنسبه للسلف .. اذا جيت اتسلف .. فيه ناس م اقدر
انوم اذا جيت اخذ منهم .. ما احس بالراحه ..
وفيه ناس لا .. احب ألجأ لهم اذا حسيت اني مرا احتجت
وفي الغالب اسبوع او اقل مدة السلف عندي .. م احب
اطول .. اتعب نفسيا ..

^{واهم نظام في بيتنا} .. بين البنات طبعا .. اذا أعطيتك اقل
من ٥٠ ريال خلاص ما اخذها .. عيب وينقدون عليك البقيه
وبعد اذا وصلت لمرحلة صرافتي فيها ٣٠ ريال كيف يصير
النظام هنا ^_^
اي وحده اقل مني تحول لي اللي بصرافتها لين تصير
٥٠ .. اهم شي ما اقعد بدون شي هالكم يوم ..

الزبدة ..
انا قررت اكمل تدريس العام القادم .. الحياة مع العمل
حلوة .. الا اذا صار شي طارئ مثلا يخليني اخذ فترة راحه
ف راح تلاقوني مبثرتكم هنا .. تخيلوا عاد

برب ..

**تنهيدهـ** · 04-05-2018, 03:20 PM

رد: ✒ .. خآصرة حرف رمآدية

يحبها .. / لكنها ما تحبه
حبت كثير أشياء ماحبته هو

المشكله ماهي بحجم المحبه
المشكله ماشي على عادة السو

لازم تحبيني ومن دون سبه
تفرض علينا عادة الأهل هالجو

يا قلبها الضايع علاجه وطبه
خلك عظيم وعيش لحظاتنا تو

دون الصبر وضعك مع الحب صعبه
ولا ينفع بحالك تمني ولا لو

دام العمر ماشي وحالتك رحبه
والحال طيب وانت مازلت تحلو

عيش الحياة بطولها مستتبه
والحب خله للخيالات ب النـو

تنهيـــدهـ

**تنهيدهـ** · 04-05-2018, 03:28 PM

رد: ✒ .. خآصرة حرف رمآدية

كيفني معاكم هالفترة .. اطلبوا تراي رايقه :)
من مزعلكم بس .. من زمان ماسمعت شي قوي
اتحلطم عليه ..
انا تاكيه هنا تعالوا ..

https://tan1987.sarahah.com/

.. زهـايـمر حكـي .~

تعليق

تعليق

تعليق

تعليق

تعليق

تعليق

تعليق

تعليق

تعليق

تعليق

google Ad Widget