السلام عليكم =)

والله مافيني حيل أكتب,, يبغالنا خاصية المشاركات الصوتية
بس ربي نجاكم من الفتنة

بما إني سرت أنام الليل وأصحى الصباح,, رغم اني لازلت أعاني من الأرق لكن في تقدم بسيط ولله الحمد..
ف بشارككم ببعض الكلام.......
\\
ممتنه لوالدي.. لأنه رغم حرصه وملازمته لنا أنا وأخواتي بتوجيهاته ونصايحه,, إلا انه كان يتركنا نتحمل مسؤولية أنفسنا وتصرفاتنا
ما كان يعاملنا بتفرقة مع أخواني الأولاد إلا في الشدة ,, والشدة كانت على الشباب أكثر.
واللي لاحظته في كثير من البيوت يولون الأخ على الأخت بطريقة خطاء, صحيح الأخ له إحترامه وهو عزوة أخواته, لكن بعض الأمهات والاباء
يجعلون للولد مكانة الأب حتى وإن كان عاصي لوالديه ومبهذل العائلة. يعني يقل أدبه مع أمه أخواته ويعاملونه على انه رجال البيت
الولد يكون في مكانة الأب في حالة وحده, إذا صنع له محبة وإحترام في البيت بأفعاله وإهتمامه وشعوره بالمسؤولية,,
أما لأنه ولد خلاص يسير السيد! لأ مو صح وكل أم تشوف هذا التصرف في البيت بدون ما تسوي وقفه مع توجيه وتأديب
راح يتبجح معاها ويعاملها تعامل ما يليق بها.
يعجبني في أمي إن ردودها جاهزه ماشاء الله وتأديبها أول بأول لولا الله ثم تربيتها ما كانو أخواني وأخواتي أصدقاء وتعاملنا مع بعض باحترام,,
عيب الصغير يرفع صوته ع الكبير,, الكبير ما يستعبد الصغير,, لذلك تلاقونا نسمع كلام بعض بدون تردد وعلاقتنا حلوه ولله الحمد.



انتهى بعض الكلام

تسلم الأيادي

سلام


اليوم رجعت من الدوام وأحس بألم في جدار المعده من الجوع
أخاف المعده جالسه تاكل نفسها << سجل عندك واحد سماجه
اسواء حيره هي لما تحتار تاكل والا تنام،، وكلهم مستعجلين راسي ومعدتي :)
اخذت شابوره والله يسهل النوم .


الحين زبوناتي بالمحل أول ما تدخل الوحده ما يمديها دقيقتين إلا سيارتها تضرب بواري
بشكل منرفز ومربك،، تكون مختاره اشياء ومع الربكه ترمي بعضها تبغاني أحاسب بسرعه يعني
بدال ما تاخذ اللي تبغاه، تضيع حتى يمكن ما تنتبه اذا مقاسها أو لا..

المهم اليوم أنا وصلت معي الود ودي أطلع بالبندقيه وأتكي على شباك السياره أقول نعم !!؟
ليش متعب نفسك وجايب المدام، ليييييش البواري ياجليل الحيا << من العصبيه تغيرت اللهجه ههههههه

اللي باركولي وهنوني بالوظيفه أشكركم فردا فردا والله على مشاركتكم لفرحتي
اللي مربكني هي الفلووس وأمانتها ،، ثقيله على ظهري أحس من خوفي لا يقولون في شي ناقص
سرت أعد ٣ مرات وبرضو مو واثقه. المهم ان الدوام معي حتى في نومي لأن محد قايم بالمحل غيري
الله يجيب العواقب سليمه. لابد أتعلم كيف أسكت مخي وأخليه ينسى من الدوام مجرد ما اروح للبيت.

هذي مو حلطمه أو شكوى،، مجرد كلام لأنها أول وظيفه وأول تجربه
والا أنا قدها ^_ << أخف عليكم والا تمام

لما كنا نتحمس للعبة،، وياخذنا الحماس من مرحلة لمرحلة
لين نلقى أنفسنا ختمناها وماعاد فيها شي مغري،
نتبلد اتجاهها ولا نفكر نعيدها..
لأننا تعبنا فيها وقضينا وقت كبير بس النتيجة تافهة
مجرد مراحل وانتهت.


سرت أحس بهالتبلد في مسألة التعلق بالأشخاص،
والحمد لله على هذي النتيجه .

( كن صديقا لنفسك واسعد نفسك بنفسك...)
هذي النصيحة بأي أسلوب أو مفردات مختلفه تظل مهمه بس كثير مايستوعبون كيف يطبقونها.. التطبيق يتطلب حب للنفس واستثمار الشخص لقدراته واهتماماته مثل الناجحين،، كانو متعلقين بإهتمام أو مهارة يملكونها ومعطينها
كل وقتهم وجهدهم.

أبحكي لكم قصة فنانه مدهشه،، ما أقدر أوصف مدى إببببداعها إلا اني أعطيكم صفحتها وتتأملون..شفت لها عرض على المسرح تحكي فيه كيف بدأت قصة نجاحها.. ممكن تخونني الذاكره لأن شفت المقطع زمان وماله ترجمه ومالي حيل ارجع أشوفه بس البنت عاديه جدا ولو مثلا أحد الحاضرين مايعرف موهبتها كان مافكر يسمع لها ويكمل المتابعه جدا عاديه وما كملت في الجامعه كل شوي ترسب ولما توظفت انطردت،، تقول أكتشفت إنها سيئه في الدراسه وفي الوظيفه،، يعني مالها نفعه.

لكن رجعت للبيت واحتارت كيف تقضي حياتها وقررت تقضي وقتها بممارسة الرسم لأنها تحب هذي الهواية ولأنها تتوتر كثير والرسم يريحها، ف طلبت من أهلها كم دولار تشتري فيهم قلم وأوراق ترسم عليها،، وسارت تقضي يومها كله ترسم بس بطريقتها الفريده،، ما تطلع من البيت ولا تحتك بأحد،،كانو الناس يكلمون أهلها يقولون شكل بنتكم دخلت حالة إكتئاب لما يئست من الدراسة والوظيفة وسارو أهلها يقلقون ويقولون لها في خاطرك شي ؟ انتي طيبه ومرتاحه ؟....وهي تقول انا تمام

استمرت البنت بالرسم في غرفتها وتنزل الصور ع الانستقرام على طول،،اشتهر الحساب لدرجة انو تجيها لقاءات في البيت وعروض لحد عندها :)
وتوسع مجهودها لين أصبحت تسوي معارض وسار لها فريق خاص.


تفضلو حسابها


المميز برسمها إنه بالتنقيط بالقلم ،،تستخدم نوع واحد فقط !
مو زي اللي يشتري علب أقلام رصاص وفحم ومتدرجه من الغامق للفاتح
وشنطة عده وعتاد هههههههه والرسمات بالقطاره << أنا منهم



أتمنى أعجبتكم القصه مثلي

الوسمي يحسب اني أأجز مع الشعب

نظام شغلي معطينا يوم واحد بالأسبوع لكن ما يكون لا الخميس ولا الجمعه ولا السبت لأن فيها زباين كثير.
لكن الصدق داومت اسبوعين بدون ما أخذ إجازه برغبه مني.. مو مستعجله ع الراحه أبغى أحس اني متمكنه من شغلي.
وكمان أحاول أجمعها لإجازة الحج عشان أسافر مع أهلي ^_^

يالله تهنو بالويك إند

شهر ناقص

انت شكلك كل ما دخلت هالقسم معاك سجل الغياب.. "مين غايب اليوم؟ " ههههههه
ماعليه
الشغل النظيف ياخذ وقت