صباحكم روعه


مشاركات نفر كويس عن الحب أو العشق رهيبه دائما
كان ودي اجيب مشاركه سابقه له كانت عن مقولات قديمه وأبيات وموضوعها واحد،
انو هل الحب للحبيب الاول فقط ؟ والا الحالي والا الأفضل فيهم وكذا :) موضوع جميل
و الان مشاركته الأخيره برضو جميله.


انتقل لموضوع احترام المواعيد في مدونة تنهيده،
للأسف الإنتظار يعصب اللي مايعصب، أنا طويلة بال وصبوره لكن انتبهت قد ايش الانتظار يضايقني ، ويقتلني اذا ماجا احد للموعد أصلا . ولأنه للأسف قليل اللي يكونو ع الوقت ويحترموه وأعتبرهم نادرين، سرت أشغل نفسي أثناء الانتظار بالجوالا والا بكتاب عشان ما استقبلهم وقلبي مليان ههههههههه، الزبده ان هالحال كان حيأثر علي وأسير مثلهم.
عادة اذا عندي مشوار أكلم أخواني قبلها بيوم وأحجز , ومره جا الموعد وقلت هيا، قال أجليها!
قتلني، لي يوووم انتظر ومتجهزه نفسيا ويكنسل! طبعا زعلت ورحت ع المواعين اغسلها ماكان عندي اي مجال لتفريغ الطاقه البدنيه الا المهام المنزليه وتسمعون المواعين من الشارع ههههههههه وجا دخل المطبخ قال اش فيك؟! وطلعت اللي بقلب من زعل كييييف تعطيني كلمه وتكنسل ع الاقل نسق مع احد اخواني والا بلغني قبلها ، ضحك و قال يالله يالله نمشي . وقتها انسدت نفسي والله بعد ايش بعد ما تنكدت تقول يالله، وعييت ولكنه أصر ورحت معاه وأنا زعلانه لكن ناسيه تعدل مزاجي بعدها والا لا . هو لما يوديني لمول والا مطعم اقابل صديقاتي والا أي مكان بقابل فيه أحد يقول جو والا لسى ؟! أقول ليه ، يقول عارفك انتي لازم تجين قبل الناس يالأمريكيه وتجلسين تصجيني تأخرت تأخرت وانتي كذابه هههههههههه. قلت له علي مني أنا ماعلي من مواعيدهم

والله وحشني خيو



الا سوالفكم عن ابو الأربعاء وغيبته قلت أكيد عشان الاختبارات بعدين تذكرت انه تخرج!.. لا يكون يعطي دروس خصوصيه عادي المهم يكون بخير هو وجميع الغايبين عشان الامتحانات ربي يوفقكم أجمعين .. اللهم آمين

الحين بتكلم عن الأذواق

أنا وزميلاتي أحيان نسولف عن الطالبات ومين اللي جمالها اعجبنا أكثر،، فيه جميلات كثير ربي يحفظهم، بيض وسمر وكل التدرجات اللونيه ههههههه لأن فيه طالبات من تهامه وماجاورها فبشرتهم سمراء، وكلنا الموظفات ما اتفقنا على وحده، كل وحده وترشيحها ، لما قلت انا حبيت وجه فلانه يجيب السعاده وابتسامتها ترد الروح الله يحفظها، استغربو مني هم وقالو غريبه اللي اعجبونا ما اعجبوك وكمان اخترتي ذي...!
قلت انتو اللي اعجبوكم جمالهم يصلح صوره فقط، يعني تقولي سبحان من صور الملامح وبس، لا روح ولا شخصيه وما تنبلع.
بعدين بعد فتره قالو لي ان اللي رشحتها لما انتبهو لها أبهرتهم من كثير نواحي، قلت اي اختياري عميق فنان .
ومن الاختيارات رشحت سمراوات كثير، ملامحهم جميله الله يحفظهم .
مره تناقشنا عن البشره السمراء وقلت ترا انا ما أحب البيض لا شكلا ولا خفة دم ولا شخصيه
الا ماندر طبعا، واني أفضل السمر وماعندي مانع اتزوج اسمريكا بأصول أفريقيه بعد، انا اقولها عشان أشوف ردة فعلهم هل فيه عنصريين والا والا ههههههههه
ثنتين جلسو يوصون علي اني اشيل الفكره من راسي عشان اولادي مستقبلا حيواجهو مشاكل من المجتمع (قصدهم العنصريين) قلت اولادي بيواجهون جميع الاشكال وجميع التعاملات المختلفه سواء كانو سمر او بيض، والمعاناه تصنع الشخصيه ولا عليهم خوف << هههههه واثقه من اولادها وهم مابعد جو
احسهم بالغو والله، ما اعجبهم ردي عن الزواج بأسود تحديدا قلت لهم اذا اخترت اللي بآخذه (عن قناعه) مالي ومال الناس ، بعيدا عن الالوان أختي مره خطبها واحد شين وملكو، بعد ماشافوه الكهيل عندنا في الملكه ازعجونا اتصالات يابنت الرجال عيفه(يعني مو حلو ) ههههههههههه قلت لهم وش المشكله اذا هي مقتنعه فيه والرجال مو بشكله بشخصه، قالو باقي نشوف لك اذا جا عريسك ( قصدهم اني بدور ع الشكل) ،كان ودي ارد واقول مابشاوركم وقتها بس لحقت لساني ههههههههه.

بس احذرو الانطباع الاول في اي شخصيه تقابلكم ، الشكل يمكن يعطيكم فكره بعيده عن حقيقة الشخص، خليكم من العجله وتأملو الشخصيه فتره وعلى فكره مستحيل تعرفو أحد على حقيقته ١٠٠٪‏ وهالدرس تعلمته لما تأملت ناس كثير اقراب وبعاد،، لان الشخص نفسه ما يعرف نفسه ١٠٠٪‏ لكن اللي نقدر ناخذه عن بعض هي (فكره) يعني مش معرفه شامله.

‏" ماذا يعني الصبر..؟
‏أن تنظر إلى الليل وترى الفجر "

صباح السعاده


اليوم صحيت على التهاب في الحنجره الذهبيه بعيد عنكم،
والان من الطفش جالسه اغني في السناب بصوتي التعبان طالعه التسجيلات كأنها من شريط كاست متشمس لين احترق
ولكني في حيره من أمري أداوم او لا، لو اظمن ان الدكتوره تعطيني عذر ياسلام، قلت لها البارح في مجال ياغزال تعطيني اجازه ، قالت لا اصبري احتمال تصحين وانتي احسن، صراحه ماني طمعانه بالاجازه لكن اخاف احسبني تحسنت وبنص الدوام انتكس. سارت لي مره وما ابغى تنعاد.

اكره لحظة انقاذ احد من الموت، ما احب اتذكر حتى :(
بنت اختي دخل بسكوت في حلقها واختنقت وسارت زي لوح الخشب يابسه،
وكانت بحضن أمي ، أمي تحسبها شرقت فقط، وتبغى تشربها مويه
وشلتها من حضن امي واطبق طريقة الانقاذ وطلع البسكوت
قبل كذا سارت لي مع اخوها لما بلع لعبه بلاستك وطلعتها منه
الله يصلحهم كم يفجعوني، الله لا يعيدها من مواقف
اخاف اذا اختنق شخص كبير كيف بسوي معاه
أعرف الطريقه لكن هل بطبقها صح والا لا.. معرفش.
الله لا يفجعكم في حبيبي او قريب

" ‏المتعه هالفتره إنك تشوف الكل يتحلطم من الإختبارات وانت بس منسدح وتقراء "

هللو إفري بدي
لقيت لكم فلم جميل بس تذكرت انكم في امتحانات بلاشي اتحد انا والظروف عليكم ،
بجمع اسماء الافلام اللي تناسب الجميع والصق اسماءها << املائي هنا ذكرني بالمدقق الاملائي عبد العزيز الحربي الله يستر عليه خطفته الجامعه بقوه.. الله يوفقه وجميع الطلاب والطالبات اللهم امين.
أختي مع ضغط الامتحانات سار شعرها زي لعبة باربي اللي بس شعرتين في اعلى الراس، كم تترجاني القى لها حل وتبغى تجرب ادويه، قلت مرحله لابد منها ياوخيتي ماعرفت شي اسمه تساقط شعر الا مرحلة الجامعه ولا نحفت مثل العود الا فيها،، بعد ما تتخرجين تعود لك العافيه
احزن اذا جتني مشكله جماليه لسبب نفسي، لان ماينفع معها لا خلطات ولا أكلات، لازم الشخص يعالج الضغط والتوتر ويسترخي .. لو تسألوني كيف والله مدري
إذا عرفتو علموني.

يالله بكمل قراءة في كتابي هالشهر، لما اخلصه واطلع منه بدروس راح الخصها لكم ان شاء الله.

وأسماء الافلام بنزلها بعد الاختبارات :)

مساء الخير والمسرات

اسبوع عصيب مع المرض ونسيت المضاد الحيوي في العمل وخفت ارجع استخدمه بعد ما تركته يوم كامل، فاللي حصل ، زاد المرض والله يجعله طهاره من الذنوب ورحمه .. اللهم آمين.

سعيده بعودتكي تنهيده ^_^.... وانا اقوول وين مختفيه البنت عن كل البرامج، اثرك في سفر وتماشي ربي يسعدك ويهنيك،،، باقي أنه حرف مختفيه وطيف والباقيات اختبارات عارفه عذرهم .. ربي يوفقهن


ما أحكيلكون كيف انجليزيتي مقارنه بالعميده والموظفات، كويسه ولكني بطيئه مقارنه بهم، ما خربت مهاراتي الا في اخر سنه عطاله لأني وقتها دخلت حالة يأس وزعل من كل شي وبطلت اراجع واحافظ على مستوى انجليزيتي. فاللي حاصل اني قالبه اللغه تنكيت في العمل، بدال ما تكون مواقفي محرجه أخليها ضحك، طلبتني العميده اكتب تقرير عن اجتماع لها وحضرت فيه عشان أسجل هالتقرير، وتكلمت عن اختبار محدد وله اسم غريب عني، رحت لقوقل وكتبته بإملائي وماعرفه، فرحت لها وقلت مليني املائه , قالته بسررررررررررعه ! مالحقت الا اول حرفين، قلت لها شويه شويه عليه أصل تعليمي مجاني ههههه وهي تمليني وأنا أنطقها باستهبال ( سه ، إه ، به، ته....)

الموقف اللي اعتبره ورطه لما كنا مسوين اجتماع بخصوص بنت غشت، انا والعميده واستاذه كنديه واستاذه عربيه وأنا. اول ما بدأنا قالت شهرزاد انتي ترجمي للطالبه، أثناء مايتكلمون ترجمت لها ولما جا القرار الحاسم، قالته الكنديه بكلمه وحده وسكتووو .. ينتظروني اترجمه لها طب هالكلمه ماعرفتها والله، ولما لاحظت انهم ينتظروني انطق، طالعت فيها وقلت يعني يابنت الحلال الموضوع منتهي مافي حل هههههههه المهم ما سلموني ملفي وقالو اتكلي على الله.

الان عميدتنا الجديده بتجي الاحد ومن اسمها انجليزيه اصل فصل، والله يستر من المواقف اللي بتجي .. الانجليزيه الاكاديميه فيها كلمات كثيره معقده، اذا ما راجعتها ولا كثرت من القراءه لابد نتفاجأ بكلمات مانعرفها، ان شاء الله ما اقطع المراجعه والاطلاع .

سبحان مغير الأحوال.....
سواقنا الهندي اول ماجانا كان ماهو حق سواقه، ولما تعلم وساق فينا كان يبهذلنا بسواقته وأخلاقه، ينافخ ومايسمع لتوجيهاتنا ..ويامن شراله من حلاله عله، لا سواقه ولا طبايع.
ف اللي حصل أبويه أعفاه من السواقه واعطاه المزارع وقال اشتغل فيها والنص بالنص، جلس فيها واحنا جبنا سواق هندي ثاني اخلاقه صفر برضو لكن اشطر في السواقه.
وعندما مرت السنون << أدري سنين .. سافر السواق الثاني وردينا الأول يسوق بنا.
أخلاق وشهامه وجنتله،، وسوااااقه !! .. تغير عجيب الله يديمها عليه. كانت فيهم نذاله ويفتنون علي اذا عرفو اني رحت مشوار بدون ما اعلم ابويه من باب الملعنه، يعني كانو ثنينهم مش تمام. لكن الي رجع وتغير للأحسن أعتقد تحسنه كان لسببين، الأول انه انضرب من أحد العمال العربيين أثناء ما أبويه كان مسافر، وراحت أمي هزأته وهددته بالشرطه ما يمد يده على الهندي، فهو يقول ماما كويسه انا ماكنت كويس معها. ثانيا، ممكن لما جرب كرف المزارع تأدب.
الان معانا في الرخاء والشده
حتى لما اطلع متأخره للدوام وابويه مانعه من السرعه ويعرف من البنزين انه يسرع او لا، يقول مدام انتي تأخر ؟ اقول ايه ويدددعس
ماهذا اللطف والاهتمام يا بوليوود .. الله يصلحه ويسخره لنا.