سلام عليكوو

عندي سلفوفه عن رفيقتي من الطفوله واللي مايطلع جناني الا معها ،
هي تربت مع جدتي وأبوها وأخوها فقط. فا قبل فتره هي نزلت استوري تتكلم فيه عن نفسها تقول: "أنا أبويه علمني كل شي.. افك اسطوانه أركبها اسلك مواصير اصلح الكهرب والأفياش والدش واركب الدواليب والأثاث.. حتى انه أعطاني كورس اغير الكفرات معاه ووين اصب المويه اذا سخنت (وكلام نسيته)" بعدها قالت :" أنا تعبت في بيت أهلي ليه أخذ واحد دلوع ؟!..."
لانها كانت متزوجه واحد دلوع على قولتها.. بس ماتركته لهالسبب طبعا
المهم قلت لها البارح .. بنت ترا أخذت كورس اسطوانة الغاز والمركب، باقي بس تغيير الكفر لا أضيعك اذا سقنا دامك خبره لا يبنشر الكفر والا شي..ونفتح لنا ورشه نسائيه ونكون سباقات بهالبزنس قبل يسير فيه منافسات ههههههه..
على طول تذكرنا كشوونه اللي مشهوره في الميديا، اماراتيه معها شاص وربيعاتها معها بس يمسكون خطوط هههههههه تابعتها فتره لين استوعبت وضعها بعدها حذفتها .. كانت من عادتها تطلع مع بنت خالد على قولتها ف سرت اسمي بنت خالي بنت خالد وتضحك كل ما ناديتها كذا هههههههه

" مقتنع بالزمان, ومستريح الضمير
القدر في يد الله والصبر في يدي "






- تصويري

اليوم علقو الدراسة في الجنوب ومحافظاتها كلها :)

امطار والبرد رجع والملابس الشتويه بعد ما شلناها رجعناها،
الا ملابسي ماشلتها أصلا،سبحان الله التسويف أحيان يكون خيره

والله الجو حق حصة تعبير عن الخاطر ورغم ان الخاطر ممتلي من زمااااان لكن ماتسعفه التعابير، لذلك لا تعليق. كان ودي ما استهلك الصمت كثير، وأعبر زي الخلق لكن الصمت أسلم.

حكيت لكم مره عن صديقتي اللي حظي معها سيء في الاتصال،
كل ما أدق عليها تكون في عياده والا تجهز لعزيمه والا اولادها مايخلونها تسولف ،
بطلت أدق من سنه، وقبل البارح رجعت دقيت قلت ممكن الحظ تعدل لكن ماردت،
ورجعت تكتب لي تعتذر تقول والله كنت بمطعم اش هالحظ كل ما دقيتي وقالت بتدق علي.
طبعا كل مره تعتذر زي كذا برسايل طويله ولكن ما تتصل :'(
بقد حبي لها زعلت، والله زعلت
وقلبي مو مطاوعني اطلع زعلي لأني موعارفه ظروفها، خصوصا انها مسؤولة بيت وزوج وعيال، لكن عندها خدامه وكل الشله سارو مثلها أمهات ومامعهم خدم ومتوظفات، ويرجعون يتصلون.
والصدق ماعدت ابغا أسولف معها ولا تتصل خلاص..
عادة شاريه دماغي عن العتب والشرهات ما ازعل ، أول مره أوصل لمرحلة الزعل، واقول لنفسي لا تعاتبين احد خلاص اللي مايحس مو لازم تشحثين احساسه.

يالله يارب بس أهلي يوافقو ألف العالم لوحدي << اش دخل
بس كذا كل مازعلوني الأوادم ودي أسافر بعيييييد أبعد حتى من نفسي.
والله جمعت قريشات وباقي اكلم البابا ويالله ان تعييينه

جايه اشارك في النقاش تبع التعدد ومعايه مشاركة الوسمي








أنا معاك فيه مجتمعات عندنا التعدد فيها سلام سلام ومنتشر اكثر من الاكتفاء بواحده،
لكن لا تقول لي يامحلاهم، صحيح شفت نماذج كثييير مندمجات زي الأخوات وياحلوهم، لكن مو بالع الجمره وساكت إلى الأولى ! لا تحاول تقنعني مايعرف الحريم مثل الحريم، قليل جدا جدا اللي تكون هي اللي اقترحت على زوجها يتزوج وأعانته للظروف اللي يكونون مرو فيها ومن طيب خاطر لكن مستحيل يكون أمر سهل أبدا.

أما اللي مشاركه في التعدد يعني الزوجات ما بعد الأولى، ماهي صعبه عليها أبد، بتكون عارفه ان معها شريكه يعني ما دخلت حياتها وحده ثانيه!.... وهذي اروق حالا وماعليها خلاف.
اختي اخذت واحد متزوج وكانت هي وزوجته بينهم احترام وتقدير وأخوه لا توصف، لان الأولى ذلها من زمان انه بيتزوج وكانت في رعب مين اللي بتدخل عليها؟ ياترى انسانه زينه والا ماتخاف الله... طبعا أختي مارضت عليه لين كلمت مرته وشافت رايها وذيك ارسلت هديتها وتبريكاتها، فاختارت اختي انها ما تدخل في حياة الاولى ابد ولا تقابلها درأ للمشاكل والحساسيات، لكن يتواصلون عن بعد واذا ولدت وحده منهم ترسل الثانيه تجهيزات غرفة المستشفى كامله، بعد سنين بادرت الاولى وعزمت اختي ببيتها وراحت الحواجز. لكن البلا كان في الرجال نفسه وتركته.


لذلك كل وحده اذا اختارت تدخل في التعدد فهذا اختيارها وتتقي الله في الاوادم اللي بتدخل وتندمج في حياتهم واللي يبغى يعدد برضو محد بيمنعه ، لكن المعروف والعشره ما نخربها بهذي الأمور، زي ماقال وزير السلطان يضيق خاطر مرته اللي ماقصرت معه في مسيرة حياته ويعيشها في خوف وتهديد بإنه حتدخل عليها وحده ماتدري متى، والله عيب بجد، ما ألوم جدتي يوم ظلت عزباء من بعض طبايعكم يارجال .. شايف الواحد انه اخر حبه في الكون انقلع يالحبه

تدرون فيني سوالف والكتابة بالجوال شغلتها شغله ،
وتخيلتني أفعل الخاصيه اللي مسويتها عمتي بالجوال.. تسولف له وهو يكتب عنها
تخيلتني أرد في موضوع النقاش بهالطريقه ورى السواق وانا أصايح زي سلوى المطيري ههههههههه مشكله والله (بصوت أبو حمدان)


بقول لكم شي .. بصراحه الرجال في عائلتي وبيتي بالذات من اللي يحبون يكونون ثنائي وحده وواحد فقط، واذا عرفو ان فلان بيعدد يعاتبونه ليه ياخي فلانه مافي مثلها والحريم زي بعض والا كثرتهم مو حلوه. كذا اهلي حتى ابويه كثير ناس اغروه وقالو بنقط كلنا ونزوجك قال قطو وهاتوها لي طيب رغم انه هو والماما كثير مرو في مشاكل ولا ادري كيف صبرو هالثنين مع بعض, مختلفين تماما واحنا البنات نقول بصراحه نهنيك انو انتي بهالشخصيه وتحملتي ابويه هو اصعب شخصيه قابلتها في حياتي لذلك انا ثقتي عاليه حتى لو وقفت قدام وزير، لاني كنت مع هالشخص. المهم نروح لاخواني برضو واكثرهم تمردا.. ومايمشي على كيف احد حتى ابويه.. عايش بكيفه وممشي الدنيا بكيفه، يقول مره .." المجتمع اذا شافو الرجال كويس لمرته ويراعيها ويداريها ويحترمها يقولون عليه خاروف! وهذا الصح مفروض يكون كذا مع مرته" ومعروف مين الخاروف وهو بعيد كليا عن اللي يداريها من باب الاحترام والتقدير مش خوف وجبن.
وامي على فكره قالت لابويه اذا بتتزوج مابمنعك ، هي رزينه وتتعامل مع المواقف بذكاء، انو لو زعلت من هالسيره وسوت حركات الغيره والنكد راح يتزوج عناد لا أكثر.
وحصل فيه ناس سوو فيه مقلب واحرجوه وملكوه على بنتهم ! شوفو قمة الوقاحه.. شارينه هم بس ماهي طريقه ابدا.. لما طلع من عندهم ارسل ورقة طلاقها


" هما كذا الناااس ماخلو لاحد حالوو
ماافي
مااااااافي
ماااافي محب.. إلا ويشوووشوو باااله "


ابد غناها محمد عبده في راسي :)

نقلب الصفحه ونصك الباب بقوه
ماسارت صفحه هذي غرفه ههههههههههه


حابه أسولف عن فصلاتي الغير طبيعيه،
الان انا شكلي جدي وجديه بنجاح معظم الأوقات ، لكني أحب الضحك ما أوفره
خصوصا اذا جبت العيد والا شفت احد معصب ويهزيء،
مثل أبويه صراحه له رهبه ويحسبونه متكبر من كثر ماهو أسد، واذا خاصم اهلي افقد السيطره واضحك ، توتر وورطه والله ، أضحك وأنا أستنى صحن والا فنجال على راسي، لو كنت احد الشباب كان ذبحه، سبحان الله لطيف معي ,, يطالع فيني ويقول "كركر!!" خير يا كركر !!؟

ما انسى لما سار موقف زي كذا كان زعلان ويعطي محاظره لجميع العائلة ومعنا مرت اخويه وهي توها مستجده بيننا، وانا كالعاده فارطه ضحك ودمووع بمووت الله يشفيني، تقول والله خفت عليك وانتظره يحذفك بالملعقه هههههههههههه.. ودي اتماسك عشان هيبة الموقف لكن الله المستعان.

قلت لاخواني ترا احتمال تسير لي لو دخلت شوفه شرعيه لان اكيد بيكون الموقف بيضحكني كذا قالو بنبقسك قبل تدخلين عليه ههههههههه تدخلين تبكين اهون من الضحك


وفي العمل كنت مستغربه ان فيه طالبه معلوماتها مو طالعه في النظام، وراسلت كل الجهات انو فيه خطأ ياجماعه وأشغلت كل الجهات والمشكله كلهم رجال اللي اراسلهم واكلمهم مو حريم الفشله اهون، والرسايل في الايميل جماعي واتضح في الاخير اني ملخبطه بين وحده منتظمه ووحده منسحبه من زمان لكن اسمائهم متشابهه ، طبعا الخطأ حصل لأني جديده ما ادري ان فيه بنت سابقه بنفس الاسم،، المهم لما كلهم ردو علي ويقولون (هااااذي منسحبه يااابنت الحلااال ) تبطحت ع المكتب من الضحك احسب النظام شالها لكن ليت هالموقف مع نفر واحد لكن نفراات ومن مدن متحاذفه اشغلت اهلهم... اكيد قالو الله يعينا عليها لين تفهم شغلها.


ربي ستر انو ماجا اجتماع جاد وضحكني ، الا تذكرت مره سوينا اجتماع عن بعد مع رجال برضو بالصوت فقط، زميلاتي كانو يتابعون ويعلقون في النوتات ويحشون ، انا كنت حاسه اني لو لمحت سوالفهم الكتابيه بتجيني الحاله لاني في موقف مو مريح يعني رسمي، لمحت محش بالصدفه واختصر السوالف قمت من الكرسي اركض واضحك بعيد عن الكمبيوتر ههههههههههههه
هذي الضحكات لما تفك ماااحتسك اف منها ^^"

احس بصراحه ماهي زي زمان .. سرت ثقيلة دم شوي، ودي بذيك الضحكه لانها تسوي رفرش لكل النفسيه،، حتى لما كنت اطيح في الشارع والا اي مكان اكركر ضحك لين ادمع ولا اعرف اقوم

نسيييت كنت ناويه استفتح هالصفحه بهالصاروحه




لييييييييييه تنتهي
هذي اللي لما تفك ماحتسك، يارب كثر صدقان الصراحه واسعدهم وحقق كل أمانيهم في القريب العاجل ، واسعد كل من أسعدني يارب بكلمة بتقييم باهتمام بدعاء بمتابعة بحب الخير لي ولأحبابي، كلهم ياربي ياحبيبي

وصفك ونسجك للحروف لوحه بحد ذاته، بارك الله فيك وفي صديق الصراحه
كل ماضقت رحت لصفحتي قريت كلام اللطيفين امثالكم واللطيفين الباقين
جزاكم الله كل خير ^_^