رد: رواية / الحارس الشخصي ...منقولة

الله يعافيك

رد: رواية / الحارس الشخصي ...منقولة

<<<
طلعت البيت وانا خايف علي يوسف لا يصير فيه شي وهو ماشي بذي الحاله اتصلت فيه بعد ما دخلت شقتي
لكنه مارد علي رجعت اتصلت فيه مره ثانيه بعد مارد علي المره الثالثه قفل الجوال
يا الله قد ايش خفت عليه اخذت ادور بالبيت مثل المجنو مو عارف كيف اتصرف وفي الاخير قررت انزل واروح بيته الي هو شوي قريب من بيتي الله يعين امشي بهالحر
نزلت من العماره ورحت امشي كنت امشي واتصل بيوسف عل وعسي يحن ويفتح جواله الي قفله بوجهي
وانا ماشي شوي ووقفت سياره بجنبي طالعت فيه كان رجال كبير شوي بالسن وحسيت اني اعرفه طلب مني اني اطلع معه لكني رفضت وعللت بأن البيت قريب
لكنه كان مصر انه يوصلني ويكسب فيني اجر
بعد الحاح منه صعدت وسألني عن وجهتي الصراحه انا كنت تعبان من المشي وماصدقت صعدت السياره حتي ريحت ضهري عالمرتبه ,,
رديت عليه بعد ما ارتحت شوي
_ انت امشي وانا ادلك
مشي ويوم قرب من بيت يوسف طلبت منه انه يوقف انا فرحت يوم شفت سيارته واقفه عند البيت تطمنت انه بخير
وقبل لا انزل تذكرت فين شفت الرجال هذا الي كان يراقبنا بالمستشفي
التفت له _ انت كنت بالمستشفي اليوم الصبح
ابتسم ومارد علي
_ وش تبي انت , انت تعرفني
_ لا انا اعرف يوسف .
_ ايه ومن فين تعرفه ..
تنهد _ انا ابو حسام ,
ابتسمت بسخريه _ حسام . ماكنت احسب ان عنده اهل
ما علق علي كلامي
_ طيب وصلتك لجهتك يا الله مع السلامه
_ لا انا ابي اعرف انت اليوم ايش كنت تبي
_ ماكنت ابي شي كنت بشوف ولدي وين رايح يوم خرج
_ ايه يعني كنت تراقب ولدك ؟
_ ايه عندك مانع ,, ولو سمحت قول لصاحبك يبعد عنه ولا مراح يحصل له طيب
ضحكت _ انا الي اترجاك ان ولدك يبعد عن يوسف .
حاولت معه لكنه مايفهم
تنهد وطلب مني اني انزل لأن عنده شغل مهم
ومايبي يتأخر عليه ..
...
نزلت وصعدت بيت يوسف وانا افكر هل راح اقوله عن ابو حسام ,,
وليش يراقب ولده ياتري هل يعرف عن سر علاقته بيوسف ,, وايش هي العلاقه الي تجمعهم ,
طرقت الباب محد رد علي رجعت طرقته عده طرقات شوي وفتح لي الباب واستغرب وجودي طالع فيني شوي
وماعلق سمح لي ادخل , انا استغربت الي اشوفه
البيت مكركب وكأنه حط حرته بأغراض البيت ,
ماعلقت وكأني ماشفت شي , جلست عالكنبه وماتكلمت ,,جلس بعيد عني عالأرض وماتكلم هو بدوره ,
مكان فيه شي نتكلم فيه انا كان يكفيني أني عرفت انه بخير وطيب وهذا اهم شي ,
مر وقت حتي تكلم بصوت خافت
_ ايش الي جابك ؟
ابتسمت _ ايه جيت اخذ سيارتي ,
طالع فيني _ سيارتك تحت مو عندي هنا
مارديت عليه
سند ظهره عالجدار _ انا تعبان يا ناصر تعبان حيل
وانهمر بالبكاء كسر خاطري قمت من مكاني وجلست بجنبه قرب مني وضمني بقوه حسيت فيه يرتجف بين يدي ,,
وضع راسه علي رجلي وغمض عيونه مثل الطفل الصغير ,
اخذت اربت علي شعره حتي نام وكأنه كان يحتاج لأحد يكون بجنبه
جلست مكاني ماتحركت ,, حتي لا ازعجه
مر وقت ويوسف نايم علي رجلي اتصلت فيني امي تسأل عني ماقدرت اتكلم معها لوقت طويل , حتي لا ازعج يوسف كانت تتطمن علي وضعي مع رؤي اكيد سمعت بالحرب الي دايره بيننا هذه الأيام طمنتها ان الوضع زين ومافي شي صاير وكل مافي الأمر دلع حريم
لا اكثر ولا اقل
,,,,,,,
حسيت بالنعاس بدوري وغمضت عيوني استسلمت للنوم
سندت ظهري عالجدار ونمت
,,,,,
يوووه ايش هذا الازعاج
فتحت عيوني لقيت نفسي بمكان غريب وفيه صوت تلفزيون مزعج
,
جلست شوي حتي استوعبت الوضع انا نايم عالارض في بيت يوسف وكنت متغطي بلحاف ريحته تجنن
قمت جلت بنظري ادور علي يوسف مالقيت تمغطت الساعه كانت تشير للتاسعه مساء يا الله من التعب نمت كل هذا الوقت
,,,,,,,,
قمت من مكاني كنت احس بالكسل الشديد والتعب رحت يم دور المياة اكرمكم الله غسلت خشتي وتوضيت بصلي العصر والمغرب والعشاء خرجت من الحمام وشفت يوسف طالع من غرفته وكان لابس ملابس خرجه استغربت وين بيروح الحين
ولع نور الصاله الي كان مطفي ,, ووطي صوت التلفزيون جلس عالكرسي وانا استأذنته بروح المجلس بصلي الفروض الي فاتت ابتسم البيت بيتك سوي الي تبيه ,,
رحت وصليت صلاتي
ويوم خلصت خرجت وكان يوسف جالس بالصاله
الجوع ذبحني لأني من الصبح ما اكلت شي
فأقترحت علي يوسف انا نروح مطعم ونتعشي هناك
ضحك_ طيب وانا جاهز من بدري يا الله وين تبي تعشيني .
_ ليش هو العشاء علي حسابي ,
_ ايه انا مامعي فلوس الحين طفران وعلي باب الله
ضحكت علي كلامه اول مره يوسف من عرفته يقول مامعي فلوس وتذكرت الاوراق وسالفه البيع يعني معقوله يوسف الحين ماعنده فلوس ,, ويمكن هذا السبب الي مخليه يتردد بسالفه سفر جاد انه مامعه حق العلاج لا مو معقول ,
,,,
خرجنا ورحنا مطعم قريب من البيت وطلبنا نص الي بالمنيو اكلنا واكلنا واكلنا لحد ماقلنا بس ,
خلاص كنت احس بطني بينفجر من الأكل وبعدين طلبنا شاهي اخضر علي اساس نهضم الطعام
ههههههههه
الجو بالمطعم كان رايق فجلسنا نتكلم انا ويوسف عن امور الحياة كالمعتاد حاولت اخرجه من الهم الي كان فيه تجنبت الحديث معه عن جاد ووضعه تجنبت الكلام معه عن اي شي ممكن يضايقه
,,
وتمنيت بنفسي اني اقدر اساعده تمنيت لو فيه شي بيدي اقدر اقدمه له واسعده لو السعاده تنهدي كان اهديتها ليوسف بدون تفكير ,,
واحنا جالسين نتكلم عن سالفه غبيه ,
رن جواله طالع فيه
_ هذا رقم غريب ,,
فكر شوي ورد عليه يوم سمع الصوت ابتسم وحسيت وجهه نور وكأن صاحب الصوت شخص عزيز عليه
_ هلا بولاء اليوم كنتي علي بالي
استغربت مين ولاء معقوله تكون وحده يحبها
,,
نسي نفسه وجلس يتكلم معها ويلومها علي غيابها
ماحبيت ابقي وقلت خليني اتركه لحاله كنت بقوم لكنه اشر لي اجلس بيده
احترت اجلس ولا امشي فجلست اصلا لو خرجت وين بروح ,,
شوي وانهي المكالمه ووعدها انه راح يتصل فيها بالقريب
حط الجوال عالطاوله وتنهد تنهيده محب ومغرم
ضحكت _ لا ياشيخ ,, ههههههههههه
طالع فيني مستغرب _ ايش فيه
_ مين ولاء الي غيرت عالمك بأتصال ,,
ابتسم بأستحياء _ هذه البنت الي بتزوجها ,
ماصدقت الله اكبر يوسف يفكر بالزواج يالهوي , شي مو معقووول
_ انت من جدك تبي تتزوج
_ طالع فيني _ ليش مالي نفس اتزوج مو من حقي اعيش حياتي ,,
_ الا من حقك بس غريبه ماقد سمعتك جبت طارئ الزواج
تنهد _ ماكنت اعرفها من قبل ويوم عرفتها تغيرت نظرتي للحياة وصرت افكر بأيجابيه
( صراحه كلامه صدمني ,,
_ ومن متي عرفتها
مارد علي
وماكررت السؤال
جا في بالي جاد
_ اليوم مارحت مسيت علي جاد حدك فيه الصبح
طالع فيني _ ايه اتصلت عالدكتور وقال انه علي حاله
_ طيب وايش تبي تسوي
_ ولا شي ,,
طالع بالساعه _ يووه تأخرت علي موعد مهم
وقام _ يا الله انت مو ماشي
حسيته يتهرب مني ومايبي يتكلم بموضوع جاد
,,,,,,,
اليوم التالي
ماطلعت من البيت حدي بس رحت العمل وجلست شوي وخرجت نفسيتي من يوم صحيت وهي تعبانه
اشتقت لرؤي والعيال اشتقت لحسهم بالبيت
فكرت اتصل بأمي واقول لها كل شي علي ابيها تفزع معي
وتقنع رؤي انها ترجع البيت
وياليتني ماقلت لك يأم ناصر
راحت المليحه ووقفت معها ضدي وطلعتني انا الغلطان
,,,



اليوم التالي
ماطلعت من البيت حدي بس رحت العمل وجلست شوي وخرجت نفسيتي من يوم صحيت وهي تعبانه
اشتقت لرؤي والعيال اشتقت لحسهم بالبيت
فكرت اتصل بأمي واقول لها كل شي علي ابيها تفزع معي
وتقنع رؤي انها ترجع البيت
وياليتني ماقلت لك يأم ناصر
راحت المليحه ووقفت معها ضدي وطلعتني انا الغلطان
,,,
حسيت بالحقد علي رؤي ليش تسوي فيني كذا وفكرت اني اطنشها واخليها براحتها
وطنشتها بالفعل ومرت ايام ما اتصل فيها ولا اسئل عليها وامي كانت تطلب مني اني اراضيها لكني ماكنت ارد عليها
,,,,
يوسف وجاد
مر الاسبوع وانا كنت خائف جاد يموت بأي لحظه كما قال الطبيب
كنت احاول اقنع يوسف من دون ما اصغط عليه بأنه يفكر بموضوع السفر
لكنه كان صام اذنه ولا يسمع لي حاولت افهمه لكني ماقدرت وفكره انه مايبي اخوه يتألم مادخلت براسي ابدا
,,
اليوم السبت اول ايام الأسبوع
اتصلت فيني امي البارح تطلب مني اني ازورها اول ما اخلص من عملي و لا اتأخر دقيقه لأن فيه موضوع مهم يبون يكلموني فيه
خلصت من شغلي وانا افكر وش تبي امي وايش الموضوع المهم الي تبيني فيه رحت البيت واول ماوصلت الحي تذكرت منصور وسالفته الي محد دري عنها لأني عرفت بعدين ان الموضوع محد يدري عنه وان اهل منصور مفهمين الناس ان منصور مسافر بره
,, يعني عشان كذا مادريت عن الموضوع ومرام ماقدرت تقولي يوم سألتها فكرت ياتري هل يوسف يقدر يساعدها وهل يملك المبلغ المطلوب
,,دخلت بيتنا وانا حاس ان فيه شي
لقيت امي جالسه بالصاله تنتظرني وعندها عيالي اول ماشفتهم حسيت بشي
جلست عندها _ يمه وش السالفه ؟
طالعت فيني _ رؤي طالبه الطلاق ؟
؟؟!!
ماصدقت الي اسمعه وش طالبه الطلاق
_ ليش يمه
هزت راسها _ مدري اسئل نفسك وشوف انت ايش مسوي لها البنت مو قادره تعيش معك ولا دقيقه حتي العيال ماتبيهم
استغربت وش السالفه مو لهذه الدرجه
قمت من عندها بروح لين بيتهم اشوف وش سالفتها
لكن امي رفضت اني اروح لها لأن حالتها النفسيه مو بزينه قلقت عليها وش فيها رحت غرفتي السابقه ايام العزوبيه واتصلت فيها ماردت علي ارسلت لها رساله اسألها وش فيها وان الموضوع مايستاهل كل هذا
,,
شوي وردت علي برساله مقتضبه وانها تعبانه وانها تبي الطلاق واني لو ما نفذت طلبها راح تطلب الخلع يالهوي ,,, الخلع
,,
جلست شوي استوعب كلامها الي بالرساله مو مصدق لهذه الدرجه كارهتني لدرجه انها تهدد بطلب الخلع وهذا كله ليش السبب مو كايد يعني مدري ايش اقول ,,
.. وانا جالس منبلهه واطالع بالجوال الا ويتصل فيني يوسف رديت عليه قلت بنفسي ياليت عنده خبر مفرح يفرح فيه قلبي الجريح
لكن
اتاني صوته من بعيد ,, وكان مين انه مو طبيعي حسيت ان فيه شي
_ هلا ناصر انت فين ؟
سكت شوي وغمضت عيوني واعددت نفسي لتلقي الخبر
_ انا في بيت ابوي , سلامات يوسف ايش فيك ؟
سكوت وهدوء ,, تنهد بقوه
_ جاد ,, عطاك عمره ,, ؛(قالها بهدوء
واستأذن وسكر الجوال بوجهي , عرفت السالفه
جاد مات اليوم ...

لملمت نفسي ورحت يم ابوي وقلت له عن الخبر هو ماعرف اصلا ان يوسف عنده اخ واستغرب يوم قلت له وطلب انه يروح معي حتي نواسيه تذكرت اني ماسألته هو فين ,,
اتصلت فيه وانا خارج من البيت رد علي
_ هلا يوسف انت فين الحين ؟
اتاني صوته المتعب والمبحوح _ انا في المستشفي الحين
تعال يناصر ابيك
_ ايه انا جاي مع ابوي انت خليك مكانك لا تتحرك
وبسرعه رحنا المستشفي
وهناك شفت يوسف وكان جالس عالأرض با الممر المؤدي لثلاجه الموتي ولكنه كان هادئ عيونه حمرا يبغي يبكي لكنه كان متماسك
..
ياعيني كسر خاطري رحت يمه واول مشافني قام وضمني لصدره بقوه حسيته وده يدخل داخل جسمي من قوه الضمه
,,,,
بعد عني شوي قال انه ماقدر يشوفه لحاله وانه فكر اني ممكن ابي اشوفه معه ,, ابتسمت حسيته انه يمكن مو مستوعب ايش صار ,,
دخلت معه حتي يشوفه ابوي ماقدر يدخل يوم عرف انه طفل صغير ماقدر يشوفه فجلس بره ينتظرنا انا حسيت برعشه بجسمي تذكرت الموت والحساب
يا الله حسن الختام
,,,
وقف يوسف يطالع بجاد بهدوء غريب قربت منه
ابتسم يوسف ابتسامه رضاء استغربتها
وقرب منه وباسه
_ اشوفك بالجنه يا اخوي سلم لي علي ابوي وعادل
بكيت عندما سمعت كلامه
ضميته لصدري بقوه
....
شوي وحسيت بثقل يوسف علي ماقدرت امسكه طاح من بين يدي اغمي عليه المسكين
ناديت ابوي و ساعدني حتي نشيله وكان متأثر بالي شافه
... واول مره اشوف ابوي يبكي بحرقه
يوسف كان يعاني من ارهاق نفسي وجسدي الطبيب طلب انه يجلس بالمستشفي ثلاثه ايام كحد اقصي لكنه رفض البقاء بالمستشفي وانا لا الومه ابدا
,,,,
العزاء مر بهدوء لأن اصلا محد جا محد يعرف يوسف وجاد مايعني لا اهله شي
مكان فيه احد الا انا واهلي واصحابي جات امه بس ماجلست معه بقيت يوم ومشت
جا عمه طارق بس سلام مثل الاغراب ولا كانه عمه
ومشي
مثله مثل الضيف
,,,
موت جاد شكل صدمه لي تعلقت بالولد وحبيته ومات انا تأثرت وكنت ابكي من حين لحين لما اتذكره
لكن يوسف كان هادئ ومتماسك ويبتسم بوجهي كلما اتقت اعيننا
استغربت
ماشفت دمعه نزلت من عيونه ,, مع ان ملامح الحزن باديه علي وجهه
اتي الشيطان ووجد مدخل من هنا حتي يفرق بيننا
نسيت ان الدموع تحرق الميت وان البكاء عليه يعذبه وان يوسف مكان يبكي حتي لا يعذب جاد
الشيطان خلاني اعتقد ان يوسف سعيد بموت جاد وانه الحين ارتاح منه
وراح يتهني بحياته

خصوصا وانه كان قد اخبرني عن موضوع زواجه من ولاء
ياتري مين هو الشيطان الي تدخل وزرع هذه الأفكار براسي وجعلني ادمر اجمل انسان واطهر شخص عرفته بحياتي ,,

.......
اتمنى يعجبكم البارت .البارت الجاىهو الاخير واتمنى تسامحونى على التاخير

رد: رواية / الحارس الشخصي ...منقولة

والله البارت جنان و كتيير متشوقة للنهاية لا تتأخري بليييز

رد: رواية / الحارس الشخصي ...منقولة


.......
اليوم مر اسبوعين علي وفاة جاد
كنت جالس عند يوسف في بيته الجو عامه هادئ بيننا لم نتبادل اي حوار يوسف ملتزم الصمت ويتابع برنامج التفاح الأخضر بقناة ام بي سي
انا كنت جاي من بيت رؤي وكانت بعد مصره عالطلاق نفسيتي كانت شوي تعبانه بس ماحبيت ازعج يوسف بكلامي عن اموري الشخصيه ,, واحنا جالسين شوي ويدق جوال يوسف طالع فيه شوي وقام من عندي وراح غرفته وسكر الباب
مين الي اتصل فيه الحين ومايبيني اسمع كلامه شوي وخرج من الغرفه
ورجع جلس بجنبي _ وليد يبي يجي عندي ,, اذا انت حاب تمشي عادي , روح مبين انك تعبان
طالعت فيه _ وليد , يا الله هو لساته حي
ضحك كمجامله لي _ ايه لساته حي واتصل يقول يبي يسهر معي ,
مارديت وحسيتها اصلا طرده لي وانه مايبيني اكون موجود يوم يجي وليد استأذنت وخرجت من عنده ماحبيت اشغل نفسي فيه وايش عنده مع وليد عالأقل وليد بالنسبه لي ارحم من حسام المعفن
خرجت من عند يوسف وانا مالي نفس اروح البيت ركبت سيارتي وجلست الف بشوارع المدينه ماخليت شارع مادخلته واكتشفت حواري جديده الصراحه مدينتي تحتاج شويه نظافه ههههههه
,, المهم
وقفت عند احد المحلات التجاريه الواقعه بأحد الأحياء السكنيه الي قادتني سيارتي اليها , فكرت اني اشتري شويه حاجات اعرف اني لن احتاجها ابدا ولكن ,, كان معي 500 ريال تصرخ بمحفضتي الا انها تنصرف اليوم فحنيت عليها وقلت خليها تشوف النور
,,
اشتريت كم غرض كلفتني 357 ريال رميتها بالسياره من ورا , ومشيت عالبيت بعد ماحسيت بالتعب ,
دخلت بيتي وانا مرهق رميت نفسي عالسرير ,
جلست اطالع بالسقف افكر بحياتي الغبيه ووين وصلت وكيف راح تنتهي حسيت بغصه بحلقي وانا افكر برؤي وليش هي مصره عالطلاق مع ان الأمور كانت شوي وراح تتحسن ليش هي قفلت جميع الأبواب قدامي وماخلت غير باب الطلاق مفتوح
وانا جالس افكر رن جوالي طالعت فيه كان رقم غريب
ياتري مين الي يتصل فيني
رديت بعد رابع رنه
_ الو ,, الووو ,, مين
اتاني صوت بنت وكأني اعرفه
_هلا ناصر
سكت بستوعب نبره الصوت كنت احاول اتذكر مين صاحبته .
_ ناصر انا مرام ماعرفتني ؟
_ ايه مرام هلا كيفك
سكتت شوي وماتكلمت مرت لحظه صمت طويله
_ انا اتصلت بيوسف كذا مره بس هو مايرد ابي اعرف اذا انه فكر بالموضوع الي كلمته فيه قبل مده
تنهدت وقلت لها عن جاد
تفأجئت _ ماكنت اعرف ان عنده اخ مقال لي
_ ايه يوم كان يعرفك مكان يعرف عنه شي
ماردت علي يمكن استحت مني واني انا علي خبر بموضوعهم السابق
عرضت عليها خدماتي واني اذا اقدر اساعدها مراح اقصر لكنها قالت ان يوسف هو الي يقدر يساعدها بما انه عنده علاقات ويملك الماده ,,
تذكرت انه باع املاكه بس ماقلت لها شي وعرضت اني راح اتصل بيوسف واكلمه
...
طار النوم من عيوني وجلست احوس بالبيت ادور علي شغله اضيع فيها وقتي وانا جالس اخربط هنا وهناك قلت خليني اتصل بالشباب ونسهر بالبيت وفعلا اتصلت بخالد والعيال كلهم وبعد كلمت مأمون وبربع ساعه ماشاء الله امتلي المجلس بالشباب
سهرت معهم لين ساعات الصباح الأولي صلينا الفجر بالمسجد القريب من بيتي الكل مشي رايح بيتهم الا مأمون رجع معي البيت وقال انه يبغاني بموضوع شوي خاص
رحبت فيه
ورجعنا البيت افطرنا حاجات خفيفه جلست معه بالمجلس انتظره يتكلم حسيت ان وراه شي كان متردد ويطالع بالارض ومو عارف من وين يبدا السالفه
حسيت بالمملل من الانتظار _ يامأمون قول وش عندك
تنهد _ الصراحه مكان ودي اقولك السالفه بس انت من حقك تعرف
_ ايه وش السالفه قول
_ السالفه عن يوسف
_ يوسف ,, وش فيه تكلم
وبخمس دقائق سرد علي مسامعي قصص عن يوسف وروايات صور لي يوسف شيطانا ماردا انسان لا يعرف الرحمه ,, صوره قاتل محتال مخادع ,,ومنحرف ,وانه له علاقات غير اخلاقيه مع شباب وذكر لي حسام وهذا ماجعلني اصدقه ,, قال انه هو من اراد لجاد انه يموت وانه كان يدفع لأحدي الممرضات حتي تمنع عنه الدواء ولذا حالته كانت تسوء ولا تتحسن
,, ماجعلني اصدقه هوا قصه عادل ,,
وانه هو المتسبب بالحادث عمدا ,, وكله عشان الفلوس
حتي يكون الوريث الوحيد لا اموال ابيه
وزوجه ابيه الثانيه هددها بالقتل اذ ماتنازلت عن جاد وسافرت ,,
ودعم قصته بكلام يوسف ذلك اليوم بلندن عندما كان
سكيرا وانه كان يختلس من الشركه اموالا طائله ,,
.........
ماقدرت اتحمل اسمع اكثر من كذا انصدمت بيوسف مستحيل يسوي كذا مستحيل
طلبت منه انه يسكت ولا يكمل ,, كلامه اصلا ايش باقي
ومقاله ,, لي تركت مأمون وخرجت دخلت غرفتي
وجلست لحالي
وكانت تمر علي صوره يوسف ايام العزء وعدم بكائه وسكوته ,,
ماخرجت من غرفتي وطنشت مأمون الي مشي من البيت
بدون مايودعني ,,
,,,,,,,,,,,,
الساعه وحده الظهر شلت نفسي ورحت لين بيت يوسف ابي اعرف الحقيقه منه هو بالذات وكنت مصر اني اعرف
صعدت الدرج بخطوات سريعه , , قلبي يدق كلام مأمون يتردد بذهني وصور من الماضي الي جمعني بيوسف يمر بخيالي لقطات جميله كانت تمر بخيالي وتشوهها لحظات سئيه مرت بنا
,,
وقفت عند باب الشقه
وقبل ما امد يدي حتي اطرق الباب
_ انا ماطلبت منك انك تبعدين عن ناصر ؟ وتتركينه بحاله ,,
تروحين تسحرين زوجته انتي ماتخافين الله ,,
قاطعه صوت
صوت
نهاد
_ انت الي عرفتني عليه , انت الي خليتني احبه , انت السبب انت السبب
كانت تبكي ,, نهاد من طرف يوسف .
يوسف الي عطاها رقمي ابد ماجا علي بالي طوال هذه السنوات ابدا مافكرت فيه ,
ونهاد ساحره زوجتي رؤي ياربي راسي مو قادر يستوعب هذه المعلومات كلها بوقت واحد مو قادر ارتب افكاري الحين انا بأيش راح ابدي لو دخلت عليهم ايش المهم اولا
اواجهه يوسف بكلام مأمون ..
ولا نهاد بسحرها لرؤي ,
ولا يوسف اسأله ليش عطي نهاد رقمي وليش وليش وليش وليش
ولا هم ايش يبون فيني دخلو حياتي ومرمطوني ليش
,,, حسيت اني لعبه فيدهم يلعبون فيني وان يوسف مو يوسف الي اعرفه
,,
ياتري انت مين يايوسف ,,,,
.

اه لو ارجع بعمري كم سنه
كان اصير انسان ثاني مو انا
كان اصلح كل غلطات السنين كان اصلح كل غلطات السنين
,,,,

طرقت الباب بقوه
_ افتح يايوسف افتح ياحيوان افتح ياجبان
,, اعتراني الغضب اعمي بصيرتي شعرت بأني صغير بعيون نفسي لا اعرف لماذا كل شي انهدم وتكسر امام عيناي كرهت يوسف وكرهت نهاد وكرهت نفسي كرهت كل شي اردت لذالك ان ينتهي
,,,
شوي وفتح لي يوسف وكل ما اتذكره الحين هو ان الخوف كان يملاء عيناه الحزينه لم اراها حزينه بذالك الوقت ولكن عندما اتذكرها الان اري الحزن فيها ,,
دفعته عالجدار والتفت ادور علي نهاد الي اختبئت بأحدي الغرف
_ وينها الحيوانه وين راحت
كنت اصرخ كالمجنون
_ وينها ,, وينها
يوسف حاول يهديني ويدعي انه لا احد هنا
_ مافي احد ياناصر انت تقصد مين ؟
قربت منه وشديته من شعره واخذت اهزه بقوه كان خفيفا جدا كنت الوح به يمينا ويسارا وهوا لم يكن يقاوم
_ انت عارف مين نهاد انا سمعتك تكلمها الحين ,, انت طوال السنين هذه كنت تلعب علي وتضحك وتمثل علي دور البرئ وانت حقير وسافل ومنحرف اليوم عرفت كل شي اوراقك كلها انكشفت وانفضحت واي شي راح تقوله لي مراح اصدقه
,, رميته عالأرض ورحت اطرق ابواب الغرف ادور علي نهاد حتي اكمل عليها
كانت مقفله الباب وماقدرت افتحه ,,
هددت اني ارح اتصل بالشرطه حتي يجون ويمسكونها بالجرم المشهود وحد متزوجه في بيت عزابي ,,
ويوم سمعت هذا الكلام خرجت مطأطأ الراس
يوسف كان ضعيفا وجالس مكانه عأالارض ماتحرك لكني لم اهتم به ابدا
طلبت من نهاد انها تفك السحر الي سوته لرؤي
ادعت انها ماتعرف وين مكانه ,, عصبت طلبت منها انها تدلني علي الي راحت له رفضت وقالت ان الجن راح يأذونها لو دلتني عليه
,,
ماصدقت كلامها ومديت يدي عليها وكنت بذبحها لولا ستر الله وانفلتت من بين يدي الشريره ,, وهربت من البيت
بقيت انا ويوسف الي كان جالس مكانه
جلست عالكرسي _ مستحيل تكون انسان الي عرفته اليوم الي سمعته والي شفته ,,,
ما ادري ايش اقول يايوسف حسافه الوقت الي ضيعته من عمري معاك حسافه الدموع الي نزلت عشانك خساره الحب الي بقلبي لك خساره كل شي جمعني فيك ,, ,
رفع راسه طالع فيني وعيونه مليانه دموع _ ليش انا ايش سويت ,, ياناصر
هذه الجمله مازالت تتردد بذهني
( انا ايش سويت ياناصر ,,
,,,,,,
مازلت اذكرها ولكنها بذالك الوقت اغضبتني لم اكن بعقلي حتي افكر واتروي
,,
_ ايش سويت ,, انت تسألني ايش سويت ,,
اول شي ضحكت علي ,, وخليتني مضحكه لك ولغيرك
وثاني شي قتلت اخوك لا مو اخوك قتلت اخوانك الأثنين عادل وجاد ,, كله عشان الفلوس
يا اخي حرام عليك ,,
و ,,,
ماخلاني اكمل ,,قام من مكانه كمن قرصته عقرباء
وقرب مني _ نعم .. عادل ,, انت الحين تقول اني انا الي قتلت عادل
طالعت فيه _ ايه انت الي قتلت عادل وجاد وما ادري يمكن انت قتلت ابوك محد يدري كيف مات ( هذه جبتها من عندي سالفه ابوه بس كنت مقهور منه )
الغريب انه ابتسم لي وبعد عني جلس عالكرسي بعيد شوي عني
لحظه سكوت مرت علينا كنت انتظره يتكلم يبرر لي سواته يقول اي شي لكنه ابد ماتكلم
_ شوف يايوسف انا بغض النظر عن كل شي سويته الا نهاد ابيك الحين تقول ليش سويت فيني كذا ليش دخلتها حياتي
وسمحت لها انها تدمرها
طالع فيني شوي ونزل راسه ضحك ضحكه صغيره
_ الحين نهاد دمرت حياتك ؟
مارديت عليه
قام من مكانه وقرب مني _ انا عرفتك عليها يوم كنت حر ماكنت مرتبط هي الي جاتني وقالت تبي تتعرف عليك شافتك ومدري ليش اعجبت فيك وعطيتها رقمك وبس انا مالي ذنب بالي صار بينكم بعدين
_ بس ليش ماجيت وقلت لي و ,,
دفعني بيديه بقوه كدت افقد توازني لكني تمالكت نفسي _ انت مجنون يعني لو قلت لك وقتها كنت بترفض بتقول لا راح تدمر حياتي بعد ما اتزوج رؤي الي توني ماتعرفت عليها ولا شفتها ولا اهلي خطبوها لي يعني كنت بتعرف ان ذا كله بيصير الامر بدا بلعبه اعترف اني كنت بتسلي فيك ,, لكني لا انا ولا انت كنا ندري ان ذا بيصير يناصر صح ولا لا
..
_ يعني تعترف انك كنت تتسلي فيني
هز راسه _ تسليه بريئه ماكنت بأذيك وانت عارف اني لا يمكن اني اذيك ابدا
ضحكت بأستهزاء _ بلاه من جد ماكنت بتأذيني ,, طيب واخوانك الي اذيتهم وسواتك بنفسك وعلاقاتك مع ,, استغفر الله
ماقدرت اكمل كلامي ,,
طالع فيني _ كمل كلامك قول الي بنفسك علاقاتي مع مين ,, تقصد حسام ,, ولا كاثرين ومرام
يوم قال مرام تذكرت سالفتها ,,
_ ايه حتي عمل الخير يوم جاك ماسويته مرام اتصلت فيك تبيك تساعد اخوها وانت طنشتها ومارديت عليها
ابتسم بألم _ لا كنت بساعدها بس التهيت بجاد وانت عارف يناصر اني لو ماكان عندي ضرف كنت راح اساعدها وانا اصلا كنت مكلم ناس بس موت جاد خلاني أتأخر
ضحكت بحقاره يالي من انسان حقير وتافه يألي من شخص قاسي واناني
,,
_ حلو التبرير لو قلته لي امس كان صدقته
مارد علي جلس عالكرسي وطأطأ راسه
حبيت اني انهي علاقتنا بهذا اليوم ,,,,,,
مشيت الي الباب _ من اليوم انا ما اعرفك ولا انت تعرفني انسي انك عرفت شخص اسمه ناصر وانا عن نفسي نسيت اني عرفتك
اسف علي كل شي ,,
وما انتظرت رده علي كلامي الغبي
وفتحت الباب وخرجت ,,
,,,,,,,,,,,,,,,,,,,,,
..

استمرت الحياة
,,,
كعادتها الايام تمر ونحن نعيش كعادتنا
نهاد بعد محاولات عده وتدخلت عده اطراف بالحكايه
قدرنا نعرف منها مكان السحر والساحر الي عمل السحر والحمد الله وبفضل الله انفك السحر عن رؤي
وتقريبا عادت المياة الي مجاريها ,,رؤي اجهضت الجنين بوقت سابق عندما كانت تحت تأثير السحر الملعون
اصابتها حاله نفسيه بعدما افاقت وعرفت هي ايش سوت تعبت جدا المسكينه وانا تعبت معها تعبت من تعبها كانت ايام صعبه
ولكن مع الصبر والحب قدرنا نعديها
,,,

............................
اليوم كان قد مر اربعه شهور علي أخر مره شفت فيها يوسف وهو بهذاك اليوم
السبت ,, الساعه 7 المساء
كنت جالس بالبيت مع رؤي والعيال يلعبون وانا وزوجتي جالسين نشرب القهوه ونطالع التلفزيون الجو حلو واحنا رايقين
كنت اطالع بعيالي وادعو الله انه مايغير علينا ويخليهم لي واني اشوفهم وهم يكبرون قدامي بصحه وعافيه
,,..,,
يطرق الباب طرقات خفيفه
ياتري مين الي جاي الحين
قمت وفتحته بدون ما اعرف مين
كان طارق عم يوسف استغربت جيته
ابتسم لي _ ممكن ادخل
دخلته من باب المجلس
كنت اتسأل وش يبي ,,
وبدون مقدمات ومبين انه كان مستعجل اصلا يبي يخلص مهمته ويمشي
طلع لي ضرف كبير ومده لي _ هذه العازه من عند يوسف هو سافر قبل اسبوع بس لا تسألني وين لأني ما اعرف وطلب اني اوصلها لك
مديت يدي واخذت الضرف وانا مستغرب وش فيه
وماخلاني اتكلم قام
_ يا الله انا استأذن واسف علي ازعاجك
مارديت كنت مستغرب جيته والضرف وش السالفه
خرج عم يوسف من عندي وانا دخلت غرفتي وقفلت الباب بشوف وش فيه الضرف
وكان صك بيته الكبير يا الله كاتبه بأسمي ,, وبطاقه ائتمان , وورقه تسجيل سياره اخر موديل بأسمي, وشريط فيديو ,,وورقه صغيره
كانت بخط يده كتب فيها ( انا ايش سويت يناصر
بس هذا الي كتبه
ترددت قبل ان افتح شريط الفيديو ياتري ايش فيه ,,
ماقدرت افتحه بنفس اليوم كنت متخوف
مرت ثلاثه ايام
حتي قررت اخيرا اني افتحه وكنت لحالي بالبيت
,,,,,,,,,,,,,,,,,,,,,,,,,,,,,,,,,,,
كان يوسف قد صور نفسه وكان يكلمني يوجهه كلامه لي يا الله لما شفته كان واحشني وتمنيت لو اني اقدر ادخل جوا التلفاز واضمه لصدر حيييل
كان كما عهدته مرحا وحزينا بنفس الوقت يضحك معي يلقي نكاتا ويسكت فتره ويعود ليتكلم
ومن بين الحديث كان يسألني انا ايش سويت يناصر
ويسكت ربما كان يتمني ان ارد علي سؤاله ..
حكي لي عن الحادث وكيف صار ,, وانه كان يتمني لحد اليوم ان لو هو الي مات مو عادل واني انا مو اول واحد شككت فيه
ولكنه انصدم فيني انا من بين الناس كلها
,, حكي لي عن حسام يوسف ما انكر ان له علاقه غير سويه معه ولكنه تاب وكانت تلك العلاقه غلطه حاول ان يمحيها من سجل حياته ولكن حسام كان يترصد له ويكيد له ويوسف رجع علاقته فيه حتي يتخلص منه نهائيا حسام كان ماسك عليه بعض الصور والمقاطع ويوسف كان يبغي يتوصل لها حتي يتخلص منها
والحمد الله قدر يتخلص منها وحسام بلغ عنه الهيئه يوسف سمع عن سهره ماجنه كان حسام يقيمها بأحدي الشاليهات علي البحر
انتهي فصل حسام من حياة يوسف
,,,
حكي لي عن جاد وكانت دموعه تنساب وهو يحكي لي عنه وكيف انه كان كالضوء في اخر النفق بالنسبه له وانه حس ان حياته راح تتعدل بوجود جاد وان اجمل ايام حياته قضاها معه
وعندما مرض ,,, لم يرد له ان يتعذب ,, لانه جرب الم المرض وعذابه خاف ان لا يكون بجانبه عندما يشعر با التعب اراد له ان يرتاح ويلاقي والده ,, سيكون بمكان افضل ,,,
,,
حكي لي عن كل شي لم اكن اعرفه او كنت اعرفه ولكني لم اكن افهمه حكي لي عن نهاد
,, وكيف انها طلبت رقمي منه لما كنا بالمستشفي ,, وانه اعطاها رقمي حتي اتسلي معها شوي
. وانه مكان يدري ان الامور راح تتطور وتنتهي بهذه النهايه
.....
,,
طلب مني اني اسامحه ,, وان اتقبل هديته برحابه صدر
وانه مسافر بره يبغي يريح نفسه ويراجع افكاره ,, ووعدني انه راح يرجع بيوم من الايام وانه يتمني ان استقبله
وانا نبدا بدايه جديده ,, مع بعض

يوسف _انا ايش سويت يناصر
ناصر و الناس _ ماسويت شي يايوسف غير انك ((( كنت طيب ,,,
,,
انتهي

كل عام وانتم بخير

رد: رواية / الحارس الشخصي ...منقولة

الله يعطيك العافيه
مشكوره لانك كملتيها لنا ..

رد: رواية / الحارس الشخصي ...كامله

يسلمووو ع الرووووايه جد جنان
ربي يعافيك
ننتظر جديدك

رد: رواية / الحارس الشخصي ...منقولة

الله يعافيك...العفو

رد: رواية / الحارس الشخصي ...كامله


الله يسلمك ويعافيك

رد: رواية / الحارس الشخصي ...كامله

3الله يعطيك الصحة وينجيك من العافية

رد: رواية / الحارس الشخصي ...كامله

جميلة