،



ومساكم الله بـ الخير .. ونقلب الصفحه ..ونبدا من جديد باذن الله بالافضل
قلق .. فـ العاده تتبعه امور تتعبنا شوي .. لكن بتمر باذن الله

ليتنا نخلي الامور اسهل من التعقيدات اللي نتوقعها لها
دايم نضطرب ونخاف ونعقدها بشكل شوي مبالغ فيه

اليوم النفسيه فـ اسواء حالتها عندي !!

من صحيت الصبح والحاله وربي ماش وودي بس اهاوش احد مدري ليه لكن
النفسيه مخيسه اقوى شي

هذه الورقه في جوالي من فتره طويله كل مامريت الصور اشوفها ترتاح شوي
واحيان تضحك على نفسك تقول يوم كنت مروق اشوفها صح

بس اليوم مع نفسها اجل ورقه بتغير مودي

بجد على حسب الوضع اللي انت تكون فيه تتكون عندك رده الفعل للموضوع
احيان تكون فـ افضل حالات تشوف الاشياء الصغيره مفرحه بشكل كبير

مع انها صغيره بس انت تستانس عليها !!

واحيان لو يسون لك اكبر شي يمكن يصير لك تشوفه عادي جدا بكل بساطه
لان نفسيتك زفت

لاجل كذا لحد يستعجل فـ اي شي خذو وقتكم اطول فـ المتابعه وخلو الاحكام على جنب
لانها بتطلع تفضح فـ الغالب اذ المتحكم فيها مزاجك

بتكون العواقب فـ الغالب وخيمه !!

بس قبل اختم ردي اللي يسد النفس هذا خلوني اقول لكم

لحد يحكم على احد من واقع فرضيه يتوقعها فيصدر حكمه من راسه ويدخل نفسه
فـ امور ماتسره ويمكن يدخل في التشكيك بالشخص وفي ذمته

ويدخل في امور هو في غنى عنها !!

كلنا معرضين للاخطاء ويمكن نحكم للامور بشكل ماهو صحيح لكن بعدو عن اصدار الاحكام
على الناس لمجرد اختلافكم معهم او مشكله صارت بينكم في سنه من السنوات

ويمكن لكميه النفسنه الغبيه اللي اذ اجتمع معها التحليل الغبي يطلع كل الغباء
خلونا نكون اقل حكم على الاشخاص وتوقع اشياء مالها دخل بالواقع

خافو شوي من دعوه مظلوم جاته امور خلته يلجا لمن ياخذ بحقه منكم

وبس والله .. سلامتكم

ســـلآم

كل السرقات حرام
ماعدا السعاده !

اينما وجدتها اسرقها
فهى سرقه لا يعاقب عليها القانون

كل ما عليك

ان تكون سارق ماهر لتحصل عليها
فهى تجيد الاختباء !!

،،

وتبقى بعض الرسائل لها
رائحة الورد

لا نمل من قرائتها

لأنها لامست
أرواحنا بلطف

وتركت فينا
أثرا جميلا

لا يمحى !!

،،

يــقــآل

" كما تدين تدان "
ليس فقط في

الانتقام ،

بل ستدان
حين تجبر خاطرا ،

أو تزيل هما ،
أو تسعد شخصا ،

سيأتي اليوم
الذي يدان لك فيه جميلك !!

،،

الناس بطبيعتها
تحب المبالغة
وتأليف القصص !!

يعني كل شي
قابل للمبالغة حتى الحب

والخيال

إلا الحقيقة
غير قابلة لأي مبالغات

ولا تحريف !!

،،

نختم بهذه لليوم طبعا وان جد جديد سأكون هنا من جديد

يــقــآل

ان السعادة لا يمكن
أن تكون إلا من الداخل ..

لكننا مشغولون جدا
بالكذبة الكبرى ..

متوهمين أن السعادة

هي : " أحد ما " في "مكان ما "

،،

أخيــــرا

الشخص الذي يحترم الجميع
وينظر الى مشاعرهم قبل عقولهم

صعب يجرح ولا يتجاهل ابدا
وصاحب مواقف لاتنسى

كونوا مثل ذلك الشخص
لانه لا يعرف الحقد

ولا يعرف إلا التواضع
كـ لغة للتواصل مع الجميع

،،

وبس والله سلامتتكم .. لتكونوا دائما بخير

وبالتوفيق ان شاء الله للناس اللي عندهم اختبارات
وان شاء الله تنتهي امورهم على خير

نقطه ونهايه تجميع من كل مكان

ســـلآم ​

سلام .. بجد اغلبنا كذا !!

نشوف الشي السلبي في من هم بالقرب منا نتركهم ونذهب للآخرين
لنحدثهم بذلك !!

غريبه صح

بعض اصدقائنا يبخلون علينا ببعض مايرونه فينا من اخطاء او انحراف
عن الطريق السليم لانهم يظنون انهم سيخسرون صداقتنا

بس ماعندهم مشكله يتكلمون عن اخطائنا امام غيرنا
لينتشر امرنا ثم يصلنا بطريقه او بأخرى الكلام !!

ليه اللفه تعالو وتكلموا لنصلح ما افسد من الامر لنجعل النقاط على حروفنا
اصدقائي اصبح البعض منهم يبتعد عن انتقادي امامي

نقول نقطه ونهايه سطر

لان كلامنا احيان كثيره لا يصل كما ينبغي له ان يصل او مايعجب
من كان لهم الشأن الاكثر اهميه

احب اكتب كذا مدري ليه يوم اتحمس بس اتذكر كلام نور الله يسعده
واوقف على طول اعرف ان كلامي ماله داعي او ماهو مفهوم

تصدقون عاد احيان نكتب اشياء نشوفها زوينه او بتكون موديه للغرض
نتفاجا بردات الفعل البارده فـ نندم ونبرد ونبطل

النقطه مدري وين هي مو راضي انهي السطور والله !!

لحظه لحظه قبل احط النقطه وانهي السطر

خلوني اقول لكم شي !!

احيان نقول كلام او نرسل اشياء فيها بعض التحفيز او التقدير للبعض
من باب الصداقه او الاخوه او اي شي سموها

بس تتفاجا كمان برده الفعل تحس انك مسوي بلاوي
وينفهم كلامك بالغلط والله لليوم قايل اللكلام ذا مليون مره فـ المدونه
واحس اني كل شوي اعيده الامور ماهي صعبه التقدير موجود
بس امانه لا تخلونا نشوف اشياء مالها داعي او نشعر فيها بس !!

الحين نقطه ونهايه سطور

فـ الاخير

دعو عنكم مايبدى قلقكم واعقلوها وتوكلو دائما وخلونا نشوف الافضل منكم
من قبل كم يوم مريت على اغلب اللي اعرفهم هنا وارسلت لهم

بعضهم والله يمكن له شهور مادخل او سنين بس ارسل له
من باب ان الذكرى تنفع المومنين

نور ياويلك لو تجيب الايه وتحطها بمكان ثاني

المهم نكمل اقول لكم ارسلت لكثير هنا يعني اسلم وكذا لا اكثر والله
في رد وصلني يارباااه فخم والله وصاحبه من شهوووور مادخل
بجد اسعدني رده الله يسعده ويكتب له الخير وين ماكان !!

وبس والله سلامتكم

المهم !!

لا تخلونا نندم على بعض مانقول تراه هي فـ الاخير امور بسيطه
لا نبحث الى عن زرع ابتسامه للبعض ليس اكثر

يالله طولتها والله

خليكم قريب لي رجعه باذن الله

ســـلآم

اعجبتني الرسمه بصراحه والخط واخيرا الكلام !

فـ اللي مثلي يصف جنبي بعض الابداع يكون فن تكمل معاه للاخر
ياخي احسد الرسامين احيان طريقتهم رهيبه فـ التعبير

اصدقائنا اللي هنا وعندهم فن الرسم بس ماش اوقاتهم
ماهي ملك لهم مع انهم لو يشفون شوي يلقون انفسهم مشغولين باشياء
ماتشغل يعني !!

شكلي بنطرد يوم اسوي فاهم !!

ماعليكم اهم شي الاخلاق

عاد اليوم خميس المفروض محد يفكر يزعل لو هو زعلان
وبقى اقل من كم يوم وتنتهي الاختبارات عند الشعب يعني كل شي يقول الزود عندي

واجازه وكذا يارباااه ليتني طالب وللا مدري راس السنه بكون بدبي
عاد هالسنه كانهم مخططين لها راس السنه بنص اسبوع الاجازه

يعني من الحين كلن يكثر قروشه ويعرف وين يروح
ياخي بعضنا طيبين يبون جده بس مقصد احد ترا بس كذا جات

المهم كلن على ليلاه فـل يغني !!

ماعليكم

اجازه سعيده باذن الله للكل للناس اللي منفسين للعالم الجعانه للي خايفين من البرد
للنفسيات للمتحلطمين اتمنى لكم اجازه سعيده

<< يابو تراك مداوم

ادري والله ولا عندي اجازه بس متحمس معكم يحق لي ياخي نص الشعب اللي معي
ياطلاب يامدرسين فـ عادي نفرح معهم والله

وبس سلامتكم مديرنا شوي ويجي يحذفني بعقاله من اول ينادي
وساحب عليه ومعكم فيذا

اذ صار لي شي وتاخرت اعرفو انه قفل النت عني بالدوام
يالله ماعليكم اهم شي الاخلاق ومعها كم لايك عشان تضبط النفسيه وكذا

امزح امزح

كونـ و دائـ ما بخيـــ ر

وبس ووالله سلامتكم واجازه سعيده باذن الله للكل اشوفكم الاحد
وان الله ماكتب الوعد اقرب يالله فـ امان الله

ســـلآم

سلام ... وبعدو عني تراني مطنقر ومعصب وادور احد احط حرتي فيه
كذا وضعي من امس العشا لين الان وضع مزري وبس اتحلطم !!

تقل حياه الفهد

وماكنت ابغى اكتب فـ المدونه ولا شي لاني شوي وطالع اصلا من الدوام
بس مريت مدوناتكم كـ العاده طبعا وشفت او سمعت كلام تنهيدهـ
وانها زعلانه على شاحن الجوال ومعصبه

يابنت اركدي اذ على الشاحن وكذا
تخيلي يصير لك مثلي جوالي ضرب ولا عندي غيره واحتست معاه حوسه
وللان ماعندي جوال عاد تخيلو من امس الساعه 10 للان الساعة بتوصل 10
واكثر بعد وما معاي جوال !!!

ادري معها حق تنهيده تعصب على الناس اللي تلطش اشياء غيرها
بدون ماتستاذن لا والمصيبه تاخذه وماعاد ترجعه يارباااااه ياقو قلوب بعضهم !!

ماعلينا خلوني اكمل لكم السالفه حقت الجوال

الحين جوالي اول اصدار جديد نزلته ابل 6 العادي مو الاس يعني يمكن له اربع سنوات
او اكثر والله مدري الجوال صاير مخيس بالفتره الاخيره لازم البطاريه حقت الشحن معاي
عشان اقدر اتابع فيه شي الشحن يطير كانه مدخن ماخذ جره من سيجارته

قبل امس قدمت طلب لتسهيل عشان اخذ جوال جديد بداله بالاقساط وطبعا الموضوع
يبغاله كم يوم للموافقات وكذا جوالي شكله عرف اني بسحب عليه
وقال والله غير تجي السبحه مني وسواها امس ابن اللذينا

وطفى بدون اي مقدمات او خلونا نقول توفى دماغيا يابو منا منا عطنا وجه
لين بكره ع الاقل وماعاد فيه فود !! معند الى الانسحاب يكون من طرفه !!

شايفين كيف الدنيا على قولتهم صغيره
دايم ننظر لها انها تتعبنا ونقعد نضرب اخماس فـ اسداس وكذا وهي ماتستاهل

هنا مثالين لوحده ضيعت شاحنها وشافتها حاجه كبيره
وواحد ضرب جواله بكبره وشافها ام المصايب

يعني خلونا ناخذ الامور دايم باقل حده وكذا خلوها تمشي والله انها بتمشي بـ كل الاحوال
وبس والله سلامتكم

خلوني اروح اخلص اموري اخذ لي جوال جديد والله بدون جوال ونت
بجد اوقاتنا تمر بشكل عبيييييط وملل ومالها داعي عرفو كيف يشغلونا الخواجات

يالله استودعكم الله .. سلام

وصبحكم الله بـ الخير .. يازين البرد وجو الصبح البارد مع
انه يجيب النوم بس شي وربي البرد يكفي المكيف ماله داعي بـ الحياه

مدري متى بعقل وابطل احط صور بالردود
شكلي ادمنت ذا الشي مع انه مايضيف شي للسالفه بس احبه

جو المدونات امس وقبله حلو ويفتح النفس اعمده الهربته
اشوف مدوناتهم تتسابق انها تكون في الصفوف الاولى وذا شي حلو للمكان

عقبال مانشوف ابو العز يتحمس ويقول شي ذا الهلال بعد
الفار وذا الحركات ماعاد له حس شكله خايف من العالمي مع الدروي رايح لهم

ماعليكم اهم شي الروح الرياضيه وكذا !!

ايون وقبل انسى اجازه جميله للطلاب وكذا وتقطعونها بالعافيه << ليه كيك
مدري بس يمكن تحمست شوي نفس اعرف حقين عمان عندهم اجازه او لا

مدري ليه الى اليوم لا جات اجازه عندنا للطلات اول من يجي ببالي ورده الامل
اذكر اني كنت مطفشها بكثر اجازات طلابنا هنا الله يذكرها بالخير

انشغلت بنفسها وماعاد تهربت مثل اول وكذا !!

شهرزاد كـ العاده ماتصدق بطلعه اواجازه وتحلل امها تحليل
لا وبعدين تقعد تتحلطم لها كم يوم عاد ياقبل يابعد الاجازه وهي ماشاء الله عليها

محللها الاجازه تحليل >> اذكر الله طيب

والله ذكرته وقلت ماشاء الله لا توصي هذه بنيتنا ونخاف عليها بعد
اجازه سعيده لك انتي بعد !!

تنهيدهـ مازالت صامده فـ وجه اغلب اللي يعارضون تدوينها الصوتي
مع اني من زمان قايل لها هنا عطيني البرامج اللي تسجلي فيها والموقع
يمكن نتحمس وننزل تدوين صوتي بس ماعطتنا شي وتقول بعطيكم وتسفهنا على قولتهم

ابو الاكواس احسه من كثر ماهو مستانس بالتقاعد المبكر صاير
مايسولف مثل قبل وينسى كثير ويمكن لوضع الاتحاد بالدوري دور والله مدري
اجل الاتحاد صاير بالاخير ونقاطهم ماتتعدى اليد الوحده للاسف وضعه ماش

لا واللي يرفع الضغط فيهم كل الفرق اخذت منهم اللي تبغى يوم جا النصر
مسوين علينا فريق كبير اصحو ياهوو ترا محد انهزم منكم للان غير الباطن
وتبون النصر يخسر منكم لا هذه كبيره والله

معوضين خير بالدرجه الاولى عاد شي يوم تصير كبير وتلعب مع الصغار
ماعليك يابو الاكواس اهم شي فـ الرياضه الاخلاق

نور للان يغرد خارج السرب احسه يدور شي يحمسه يعلق عليه
وارشح له ملكه الدراما هنا طيف وطيرها احسها منتهيه ذا البنت اجل كل ذا الصياح
على طير سلامات !!

طيف اذكر اني ربيت حمام وانا صغير وطولت وانا اربيه الى فتره قريبه بعد ماكبرت
وصار المناقز فوق السطوح فضيحه تخبرون اغلب الحمامجيه يناقزون بالسطوح

يوم كبرت استصعبت السالفه وبطلت وبعت كل الحمام !!

الزبده من السالفه تدرين كنت اطردهم من الصناديق حقتهم طرد واطيرهم واتعب نفسي
وهم مصرين الى يرجعون للصناديق حقتهم

مهما طارو رجعو لها وازعجوك عشان يدخلون فيها وانواع الافلام معهم
عشان اطيرهم ومايبون الى يرجعون للاقفاص والصناديق

تدرين ليه لانها بيوتهم خلاص اعشاشهم مناطقهم حياتهم
فـ عادي جدا انهم يبقون فيها فـ لا تسوين على روسنا حياه الفهد وكذا

وبالله اكتبي فـ اليوتيوب ببغاء يزعل لان صاحبه كسر قفصه وشوفي رده
فعل الطير لان صاحبه كسر القفص الطير شوي ويصير فيه شي من الغبنه
وهذه تقول لحد يححطهم با قفاص !!



اجل تتحسبين على الرجال بس !!! على كيفك !!
وايوه كنت اصيد وابيع واتاجر فيها واحبس يارباااه تذكرت ايام اول

والله وناسه وبقووه بعد لا وكنا نزوجهم بعد اقصد الحمام
عادي نحط حبه ذكر مع انثى ثلاث ايام بقفص مايطلعون ابد رابع
يوم نلقاهم توالفو على بعض وصارو زوج ونطلقهم مع الحمام الثاني

شايفه كيف الحماس بس

يبغالي اخصص رد عن تربيه الحمام والله وناسه بشكل ماهو طبيعي
لا واحيان كثيره اذ جعت وكم حمامه مسويه ازعاج للباقين على اقرب نار

واحلى شوي مع الشباب

قالت حزن هههههههههاي لحد يسمعك بس !!

فـ الاخير

ردي احسه طال وربي اليوم مدري ش السالفه بس اظن جوالي الجديد له دور
مدري بس كذا حسيت المهم بكون قريب لحد يبعد

وايش بعد

ايوه بكلمكم عن الحمام وتربيته والوناسه اللي فيها والافلام اللي كنا
نسويها مع الناس بسببه بس ذكروني

يـ الله ذحين بطلع .. كونو دائما بخير واسعد ..

ســــلآم

سلام .. اليوم السالفه فيها تكشخ وتضبيط وترحيب فلخوني اتشيك
واتضبط واعدل الجلسه واسنع اموري زين مازين !!

اول شي تعليق ع الطاير للكلام اللي بالصراحه

ايون ناكل الحمام ونشويه شويا عالميا بعد واحيان نحطه بقصدير مع شوي طماطم
وبهارات وحركات يارباااه الطعم حكايه والله انصحكم فيه

نقظه نهايه سطر

نجي للترحيب بالناس اللي طبو علينا امس وكان لتواجدهم وحضورهم شكل حلو
فـ اهلا مليون بكبيره المهربتين هنا ورده وحمد لله ع السلامه وبالتوفيق
ان شاء الله فـ اختباراتك وكذا وربي يريحكم منها على خير

وهلا كمان بالسيده الاولى فـ المدونات ومراقبتنا ملكه حياك الله وحمد لله ع السلامه
ومبروك انتهاء اختباراتك وبالتوفيق ان شاء الله فـ النتيجه وتكون كلها بياض وجهه
عاد نبي الحلى وكذا يوم تطلع ا لنتايج !!

كمان نقطه ونهايه سطر

نجي للسالفه الاهم هذا اليوم تساؤل تنهيدهـ فـ مدونتها وياحبي للتساؤلات
اللي يدور صاحبها بعض الاجوبه و بعض المشاركه معاه فيها !!

بجيب لكم السالفه عشان اللي يبغى يشاركنا بعد

فـ الغالب وبنسبه كبيره يستمرون وتتغير الامور ميه وثمانين درجه بعد العلم بذا الموضوع
ايوه يتحول من انفصال الى مواصله الزواج عشان البيبي

يمكن لانهم يعيدون حساباتهم ويكتشفون انه من المصلحه بينهم انهم يكملون
ويتنازل كل طرف شوي عن الاشياء اللي كان راكب راسه ومعند فيها عشان هذا الموضوع

ويمكن سبحان الله يكون في تراجعهم خيره لهم ماندري !!

من بعض التجارب اللي اعرفها كان فيه تراجع واستمرت الامور بعدها لسنوات طويله
والامور طيبه والحد لله وجا بعد البيبي بيبيات كثيره

يقال ان التصاهر يذيب دائما الخلافات بين بعض العوايل لانهم اصبحوا انساب
وتزوج احدهم من الاخر

فـ مابالكم بالانجاب والعلم بقربه ماهو اولى ان يكون مصلحا للحال بين بعض الازواج حتى لو كبر الخلاف بينهم
اشوف ان هذا الموضوع باذن الله راح يذيب الكثير من الخلافات

متى ما ابدى كل الاطراف الاستعداد لبعض التنازلات وترك التعنت الغبي
والالتفاف اكثر للعائله واستمرارها وانه من المفيد الاستمرار

احيان يكون الطلاق لاسباب واهيه نجح الشيطان في زرع بذورها وهذا شي مذكور في كثير
من الاحاديث والقصص ونحتاج فـ احيان كثيره لاسباب لان نعيد تذكير انفسنا بالرجوع
لنقظه الاولى والتفاهم اكثر لنجاح هذه الشراكه واستمرارها

ومافيه افضل من العلم بالحمل ليكون بدايه جديده للانظلاق للافضل

هذه وجهه نظري وفلسفتي بذا الموضوع اليوم

فـ الأخير

الامر يستحق التراجع بكل تاكيد وبقوه بعد الى اذ لا قدر الله وكان الشق اكبر كثيرا
من الرقعه هنا لا يكفي وكلن يكون في طريق

بس من ناحيه الاستحقاق فـهو يستحق

وبس والله سلامتكم

نقظه ونهايه سطور

ســـلآم