وخلص عيدهم ورجعنا لكم من ثاني بعد اجازه اول مره
من فتره طويله اشوف هذه الاجازه حقت ذا الاسبوع طويله مدري ليه !!

يمكن كثره الاحداث اللي صارت لي فيها
مدري كمان بس الاهم ان الفلنتاين دي مر ببعض الكوارث نصها يكفي

اول اليوم صدمه خفيفه ف السياره خلتني ابدا الاجازه بشوي زعل
بس قلت لا ماهي مشكله قدر الله وماشاء فعل وكمل يومك على خير

قبل المغرب بشوي راجع البيت وخط عارف كل تفاصيله
بس حاطين جهاز لساهر جديد عليا صراحه وهوبااااا احلى ساهر صادني
واحلى تخريب لنهايه يوم الجمعه

يمين النفسيه وصلت لاسوا مراحلها حادث الظهر
ساهر قبل المغرب
لا بقى مباراة النصر بعد المغرب

وانا رايح للاستراحه عشان المباراه اسمع اصوات جديده فـ السياره
يارباااه مره ماهو وقتك والله قسم اول ماسمعت الصوت
عرفت المشكله لان الصوت مع الفرامل يزيد

يعني مشكلتي فـ الاقشمه " الفحمات " حقت السياره
يمين وصلت الاستراحه وزادت النفسيه طين وطين على طين

قلت كملت الحين كيف بنشوف المباراه فكرت اطنشها والله

وتجي المباراه ونفسيتي مطينه بستين طينه على قولت اخواننا المصاروه
وانواع الضغط مع المباراه

اخر عشر دقايق منها بس اللي قدرنا ننتنفس زين كـ نصراويين
والحمد لله فازو ومابغو يفوزون والله



تصدقون هذه المباراه هي اللي صنعتي يومي ورجعت الافضيله
وخلتني اعيش الاجازه صح !!

كميه احداث ماهي صاحيه وربي بس الحمد لله على كل حال
وتعوذت من ابليس بهذاك اليوم يمكن مليون مره

بس والله عدى فـ النهايه بشكل مره حلو اللهم لك الحمد
حسبت خسايري فيه والله قريب (1000) ريـال هذه خساير
ساهر والحادث وتغير اقمشة السيارة

لا وبنهايه الشهر

>> يلمح للسلف

يالله مبغى اطول عليكم خلوني اقفل هذا الرد الاول بالصفحه
ولي رجعه بعد شوي خليكم قريب

ســــلآم

الفواتير .. !!

شكلها رهيب يوم يكون البوك مليان وجديد ويوم تكتب فيه اللي ماجب
يجرب يكون من الناس اللي تكتب فيه متعه صراحه

امزح لا تصدقون

من اسواء الامور اللي تحصل لنا في اغلب العلاقات ان فيه ناس
عندها نفس هذه الفواتير يسجلون اخطائنا عثراتنا او كلامنا
ويحتفظون فيه للوقت اللي يشوفونه مناسب ويقدمونه لنا !!



دايم حاولو تتخلصون من هذه الفواتير لا تخلونها مرجع لكم في الحكم
على الناس او فـ الحكم على علاقتكم مع الناس

تجاوزو كل مرحله وحاولو تتعلمون منها ولا تفكرون ترجعون للمرحله الاولى
عشان تنتقمون من احد باي طريقه كانت

بعضهم يتفنن في تذكيرنا باخطائنا وتلقاه كل فتره يعيد نفس الكلام علينا
خلاص درينا اننا اخطانا في وقت مــا !

بس كمان حاول تساعدنا اننا نتجاوز اخطائنا مو بس فالح تذكرنا فيها

نصيحه ابعدو عن تسديد الفواتير من اخطاء سابقه لانها ماراح تفيد احد
بقد ماراح تكره الشخص في اصحاب تلك الفواتير
الغد اجمل دائما باذن الله لو نقدر نقفل الحسابات ونتجاوز كل شي

الامل لازم يكون فـ المستقبل
ونترك الماضي بنفوس اطهر واكثر تسامح وتقبل للمقبل من الايام

دايم خلونا نبدا افضل من السابق مهما كانت الفواتير مثقله ببعض الامور
خلونا نتعلم نبدا من جديد وبشكل افضل

وبس والله سلآمتكم .. ابدوا مع من تثقون بهم بشكل مختلف
فاجووهم بنسيان زلاتهم ولا تركزون عليها كثير فكلنا في النهايه بشر
لنا الكثير من الاخطاء والكثير من الامور الطيبه

مزقو تلك الفواتير لتسعدوا بمستقبل واعد
وعادي ترا تكرارنا للاخطاء يعني اننا مازلنا بشر لم نتجاوز ذلك الشي

وبس والله سلامتكم فلسلفه صباحيه مادري وش ابي فيها والله
حبت اقول لكم كم كلمه مسويه زحمه براسي واقطع اخر فواتيري

فـ امان الله وحفظه .. ســلآم

انتبهو لي تراني ع الحافه دفه بسيطه تلقوني على وجهي
فيني عجله ماهي صاحيه تقول احد يطرد وراي !!

وهلا بـ القدعان هلا والله

بجد احيان المدونات تفتح نفسك انك ترجع تكتب لو الظهر
فيه كميه قرقره بمخك ودك تطرحها فيذا

وتخاف تضيعها مع الوقت وكذا عاد تصدقون
صاير لي فتره انام على التفكير وش اكتب فـ المدونه

اي وربي احلى نومه

نصيحه اذ تبون النوم بشكل اسرع من العادي خلو تفكيركم
قبل نوم يطلع من صناديق حياتكم اليوميه والتفكير فيها

اطلع برا الصندوق وخل عنك التفكير فيه
قد ماتقدرون بعدو عنه

خويكم صاحب هـ المدونه صندوقي قبل النوم مدونتي
او الاعضاء اللي هنا امخمخ معهم بمخي لين اقول امين
ومدري الى وانا صاحي من البكره

عشان كذا ترا المكان هذا بالنسبه لي احسه بيت وانتم اهل
فـ الله الله بالسناعه مع بعضكم ولا شوف احد ينفس من الثاني

فـ الاخير

الله يسلمكم والشر مايجيكم وربي ترا الصدمه بسيطه مره لا تكاد تذكر
بس احيان تقهر اذ السياره جديده

وش بعد !!

ايوه ادور استشاره من احد ما بشان امرا ما من يفيدنا يـ ترى ؟

خلوني اجمع اوراقي واعرف كيف اقول لكم السالفه وبقولها لكم
بس عساني القى من يفيدنا بدون مايحاول يسال كثير

صعبه صح

طبع فيني لازم نسال كثير اذ كنا بنعطي احد رأينا في اي شي
كيف اذ كانت القضيه مهمه وكذا

يـ الله م عليكم كلن يصبح سيارته
وبس والله .. سلامتكم

ســــــلآم

>> معصب طيب
وخر عني بعدين اقول لك

ســـلآم

يقولون ..

لا تكمل قراءة كتاب .. إذا شعرت بالملل
أهمل المكالمة التي تزعجك
واحذف الرسائل التي تؤذيك أو تجاهلها على الأقل ،،

لا تجامل كذبا
ولا توافق خجلا

لم يمنحك الله روحا لتعذبها
ولم يسلمك زمام أمرك عبثا

توقف عن التذمر
وتحرك فأنت .. إنسان ..!

نحتاج للفرمته بين الحين والآخر لنبدأ من جديد بشكل افضل

وبس والله سلامتكم !!

ســلآم

أصبح "الكذب " كـ الرغيف اليومي
الذي لا يمكن أن يستغني البعض عنه !!

ف هو يحميهم من الوقوع ‘ ويحميهم من التجريح ..~
واصبحنآ نرغم على الكذب ل نساير العالم !!
اصبحنا نصدق ذلك كثيرا ..

حتى وصلت بنا الأحوال لتكراره وترديده حتى يحسبونه صدقأ

عجبي !!

داخل بمر شوي المكان وبطفي اللمبات الصبح خرجت
ونسيت اطفيهم وقلت برجع لها

المهم يوم جيت شوفو وش لقيت واصلني !!

الشعب من بعد 2030 كلهم خربو معاد فيه شي بلاش
هذا طبعا للي مايعرف السالفه امس قلت لكم ابغى احد
عشان عندي موضوع وادور احد ابغى استشيره واستانس بكلامه
او استشارته !!


وهذه خويتكم جايه تسترزق مني
وانا غلباااان ومحتاج

وامس معلمكم بسوالف سيارتي وساهر معاي وبشده


هنا فيه استغلال لشاب في مقتبل العمر وتوه
بيبدأ يكون نفسه !!

بس تدرون ادفع ماعندك مشكله و(200) مو بس خمسين
لكن عندي شروط

اول شي انزل كامل الرسايل اللي راح تكون بيينا في ذاك الموضوع
مع تشفير بسيط لها !!

ثاني شي تقنعني استشارتك واطلع منها بفايده او حل للموضوع
ويكون الحل مقنع لاني راح انزل المحادثه هنا والمتابعين يحكمون !

ثالث شرط الخمسين ترجع لي 500 اذ مافادتني استشارك وكذا
هذه شروطي وانتظر ردك قبل اقول انتي مين !!!

والشغله عرض وطلب ومانبي بكبكه وكذا

وبس والله سلامتكم

ســلآم

خف علينا

يـقــــال "

إن من عوامل بقاء الصحة النفسية
وجود الأصدقاء حولك، تزورهم ويزورونك

تتحدث إليهم بأحوالك
ويتحدثون إليك دون مصلحة أو منفعة

لم أجد قرينا للاكتئاب مثل العزلة
وقطع العلاقات !!

نحن نحتاج للخلوة أحيانا لكن ليس الانعزال
الأصدقاء يجددون روحك !

أخيـــرا

المميزون نادرون .. وأن فقدتهم ..
ستصبح وحيد .. فلا وجود لاشباههم ..!!

وبس والله سـلامتكم

ســلآم

يقـال أيضا "

يمكن لأي أحد أن يختارك في توهجك
‏لكن من يحبك فقط سيختارك دائما

‏حتى حين تنطفىء
‏وحين يرى النور في غيرك سيختار عتمتك

‏سيظل معك في أسوء حالاتك النفسية
‏سيغير تفاصيلك للأجمل

‏سيحتويك وأنت تبكي وأنت خائف او متردد
‏سينقي مزاجك المتعكر بحضن داعم !

‏سوف يدعو لك ويحبك لله
‏أكثر ما أنت تحب نفسك !!

يا الله ما أروع من يمتلكون تلك الصفات
وكم هو جميل حين تجتمع بـ احد هؤلاء !

لنجعل لهم مكاننا خاص في قلوبنا دائما لانهم يستحقونها

وبس والله سـلامتكم

ســلآم

ليحذر الشاب من مثل هذه النظرات التي تحمل خلفها الكثير
من التسحيبات
اذ جات نظره كذا ومعها ابتسامه عز الله راح فيها ابو الشباب

ماعلينا خلوني اوريكم كيف يباع السمك فـ البحر

هذا رد صاحبه الخمسين اللي امس يوم عطيتها شروطي
بتنصب عليا عيني عينك عطني فلوسي واشرب من البحر وتسبل عويناتها

ماهي مشكله اذ ما فادتني استشارتها او لا المهم المصاري

لا ياوخيتي مو لها الدرجه عاد !!

وبعدين من كلامي باين ان عندي اساله واجد بعد يعني مو بس كم كلمه ورد غطاها
<< هذا بيطلع الخمسين من عيونها

صوت الضمير خلك بعيد لا التفت لك

ع العموم شكرا لصاحبه العرض لكن لم يقبل الطلب بشروطي
فـ خلي فلوسي معاي واحتفظي حفظك الله بوقتك وخلاصه فكرك

وبس والله سلامتكم

ســلآم

قربو مربط النعامة مني ... !! برا برا

ماعندي شي بس جاي اقفل الصفحه بذا الرد وبكره باذن الله
نفتح صفحه جديده !!

احسني مستعجل ه اليومين على قلب الصفحات
لي وقفه مع الداعمين خلف الكواليس غدا باذن الله

ذكروني اذ نسيت !!

وكـ العاده لحد يقلب الصفحه لين يقرا السطر الاخير

وبس والله سلامتكم

ســـلآم