وعدنا اليكم من جديد .. ياخوان الوضع هنا والله يجيب السعاده نفسي اصور لكم
خلف الكواليس في لوحة التحكم كميه اطراء وترحيب قسم بالله تبيض الوجهه
تخليكم تطلع وتكتب بطريقه ماهي صاحيه

والله اهلي بالمنتدى هنا دايم يرفعون الراس ورايتهم بيضا ومامنهم قصور
الله يسلمكم جميع ويحفظكم يارب

شكرا لكمية الجمال اللي وصلتني لين اليوم
شكرا مليووون لكم يارب هنا وكمان ما انسى صفحه الصراحه لانها ماتقل عن لوحة التحكم جمال
وتالق وابداع من الناس اللي ترسل لا وبعضهم الظاهر له سنين مادخل هنا وكتب

بس كتبو بالصراحه كلام رهيب وربي
احلى شي يوم يعرفون بانفسهم يارباااااااه وربي سعيد جدا بمروركم ياناس
الله يسعدكم بقد السعاده اللي حسيت فيها يوم شفت كلامكم !!

شكرا لانكم اصدقائي شكرا لانكم اخواني شكرا لاني عرفتكم هنا واسعد جدا
بهذه المعرفه

فـ الاخير

تكفون لحد يتضايق من غياباتي وكذا مع انه المفروض اننا تعودنا على
ذا الشي بس والله احيان كثيره اشياء بين السطور ماتخليني اقول لكم الاسباب
اظن مع الوقت راح تعرفون وكذا

وبس والله سلامتكم حبيت اشكر الجميع
وأوريكم قد ايش كلامكم اسعدني الله يسعدكم

وقبل اطلع احد يشوف لنا طيف وين هي مختفيه اخذت فتره كل شوي ترسل متى ترجع
لمدونتك وتكتب وكذا ويوم ارجع ما شوف لها تدوين هنا ان شاء الله تكون بخير
وأمورها زينه ...!!

صح قبل انسى وهذه اضافه للتدوينه او تعديل بعد مانزلتها
اكره يوم تكون التدوينه الاولى بصفحه جديده وفيه كلام قبلها بالرد الاخير وابغاكم
تشوفونه وكذا

على قولتهم

"" لا تقلب الصفحه حتى تقرأ السطر الاخير ""



ســـلآم

ســـــلآم

تصدقون جاي كـ العاده بتاخير لايكاد يذكر للدوام لكنه تاخير
نفس امس بـ دقيقه واحده اسجل التاخير هذه الايام

ماعلينا

تصدقون اكتشفت شي اليوم ان التقييم مستمر لايتوقف
تقدر تقييم بشكل مستمر شكرا للقائمين على هذه المكان احب هذه الميزه صراحه
يوم تجي تقيم احد على بعض ماطرح وتكون سبب لو بسيط في اسعاد البعض

شكرا

وصح قبل انسى نور عتبان يقول لا تغيب وكذا مشاغل وانا اخوك
واحيان مملل من بعض الامور تخبرنا احيان نصير مشغولين وحنا فاضين
بس ابشر وانا اخوك ماطلبت كثير بكون متواجد هالفتره

فـ الاخير

احد يشوف لنا حل مع الكسل هذا عشان تكون فايق وكذا يبغالك ابو يومين
وزيها عشان تنشط خاصه يوم تغير مكانك من يوم رجعت للمدينه للان
الظاهر اكثر واحد كسلان بالعالم انا

يالله ماعليكم اهم شي الاخلاق وكذا

خليكم قريب بكمل بالرد الجاي .. ســـلآم

قـــربوا !

تعالو هنا بقول لكم شي تصدقون ان عدد اللي زارو هذه المدونه فـ الكم يوم اللي راحت
انه وصل الف زائر طبعا بتكرار الدخول لهذا المكان يارباه بجد شي رهيب
يوم تشوف عدد الزوار والمشاهدات لهذا المكان يرتفع بهذه الطريقه

والله وناسه !

مدري ليه احيان ندور اشياء بسيطه عشان نفرح فيها
واحيان ندور اشياء تافهه عشان نزعل على شانها !!

ياخوااان !

والله امور كثيره من حولنا تصنع فينا اشياء حلوه وتعطينا انطباع ان الدنيا بخير
بس على اللي ينتبه لها ويفتح عيونه زين ويقلل شوي حلطمه وكذا

ليه !

اغلب الاحيان نصر نرجع لبدايه اسطر المفروض اننا تجازوناها من زمان
وش يخلينا نرجع للاشياء اللي تكون سبب في تعكر اجوائنا ليه نحب كذا

المفروض !!

اننا نكون اقوى واسرع ونفكر بشكل افضل للي راح يجي صح ؟

بس عاد تعالو هنا احيان جمال الاشياء مع الرجوع قليلا للوراء بجد لانه في احيان كثيره
العوده قليلا للوراء واسترجاع جميل تلك الايام كمان شي حلو
المكان واسع دائما الشاطر اللي يعرف وين المفروض يكون فيه ووين يلقى نفسه صح

تصدقون !!

بعضهم بكلمات قليله يغيرنا للافضل وبعضهم يمكن بكلمه يخليك افضل
خلوكم حول الناس اللي كذا اللي مهما مرت الايام تجدهم دائما طيبين
العطاء عندهم متواصل حبهم للتفائل اكثر واجمل

وبس والله !!

برجع اقرا كلامي من ثاني ويمكن فيه اشياء فاتتني بكملها بالرد الجاي
خليكم قريب كـ العاده

ســـلآم

كذا يوم اقرا مدونات قريبه من هنا يمين نفس هذا الشعور
عاد يوم اصحاب المدونات الطيبين كلهم فيذا يارباااه

من اول قاعد اتذكر الناس الطيبه اللي هنا والله ودي اكتب اسماء
بس اخاف انسى احد !!

فبلاش اكتب اسماء وكذا

ليه كلامي كثير وعلى قل فود مدري صراحه لاني زي ماقلت لكم افر هنا بالمدونات واجد
فيه بعضهم كم كلمه ورد غطاها بس مبدعين والله
كلامهم بالصميم ويوصل الفكره بكل سهوله



متى اوصل لكذا اكتب سطر واترك اسطر مالها داعي مدري والله
مريت مدونه صاحبتها تتكلم عن صوره او لوحه في سطرين بس وحاطه رابط للصوره
في سطرين شدني اشوف اللوحه بسرعه وبجد طلع كلامها ووصفها بليغ وابداعي والله

بجد فن الكتابه ماهو سهل

بعضنا لو يغيب عن مكانه شهور ويجي يكتب كم سطر والله يكون قمه في الابداع
يوم يقيمك بكم كلمه تكون قمه في الرقي والحسن والزين

المشكله كل مره اقول بصير كذا واقلل بربره القاني اجي هنا ابربر واتفلسف وكذا
احد يقفل المدونه عني اذ صرت غايب قبل لفتره

عشان بجد اطفشكم بكلام ماله داعي ومدري وش ابي اصلا بس اكتب
فـ اعذورني ومشوها كم يوم واهجد

يـ الله عاد بطلع الان .. كونـو دائما بخير .. وبس والله ..

ســـلآم

كذا وضعي من يوم قريت ذا الكلام بالتقييم قبل شوي
مدري اخاف او افرح او ايش بـ الضبط !!

ايوه هذا هو الكلام اللي وصلني بالضبط !!
هيا عطوني العلم تتوقعون شي يخوف او شي زين او كلام من باب الصداقه وكذا
مدري والله !

ع العموم

قلت لكم من سنين ماحب اذ جيت بطلع اروح اقول للناس تراني طالع وماني راجع
مره سويتها امزح وقصدي شي مو الخروج النهائي فيه ناس تضايقو واجد
وخلاص من بعدها قلت والله ماعاد اقول لاحد اني بطلع وماني راجع

اطلع اغيب مده ثم ارجع لكم من ثاني وبس والله لا ادور عذر للغياب ولا سبب للرجعه
واكيد اللي ارسل لي هذا الكلام اللي فوق اكثر واحد يعرفني زين
وسبق وصار لي معاه موقف ووصلني من غيره وانه زعل مره يوم قلت بطلع وكذا

فلا احد يتنظر اني بقول بطلع وماني راجع واذ قلتها تراني امزح او اطقطق مو اكثر
باذن الله باقي وبكتب وبسير عليكم فيذا كل شوي وكل مافضيت وكذا

لانكم بالنسبه لي عائله اسعد كثير بالتواجد بينكم الله يسعدكم ويحفظ احبابكم
وايش بعد !!

ودي ارسل رساله بين السطور واخاف انفهم غلط ومتررد عطوني رايكم ارسل الرساله واللي
يصير يصير او اعقل واسكت ؟؟

لان ماعندي مكان اوصل رسالتي الى من هنا فـ ما الحل !!

اقبل الاجابه فـ التقييم لانه مفتوح تقيم باي وقت
او فـ الصراحه لانها كمان مفتوحه على طول وبس والله سلامتكم

اجازه سعيده للناس المداومه ونهايه اجازه باذن الله كانت سعيده
للطلاب اللي عندنا لان اجازتهم بتنتهي بعد يومين

يالله كونو بخير دائما وخليكم اطيب مني واكتبو في مدوناتكم تراني شايف بعضكم
ماعاد يكتبون الى بالدف وطيف وتنهيده وشهرزاد اكبر مثال

يالله فـ امان الله

ســـلآم وخودافس

ياخي وربي انكم سعاده مع هذا الصباح كذا لقيتكم مرسلين يوم دخلت
والله اشياء تسعد وتقلق شوي لاني اذكر
في رساله معها تهديد وكذا
فـ حاط يدي على قلبي يوم شفت الصوره هذه اول مادخلت



من زمان ماشفت كذا والله
طيران رصورت الشاشه وقلت برزها هنا كنت بعلق قبل اشوف
عشان احس احلى التعليق قبل تشوف حدي دخلت هنا
ونزلت الصوره وبكتب تنحت !!

قلت ياولد ليه ماشوف قبل اكتب واكيد اللقافه مليون فـ طنشت الكتابه هنا
ورحت اشوف صندوق الوارد يارباااااه

طلعت الامور مره بسيطه والعقاب من حلاته ليت كل من بيعاقبني
يكون عقابه نفس هذه العقابات

الرساله الثانيه رهيبه والله جميله من ناس لهم سنين مادخلو المنتدى سجلو دخول
بس عشان يرسلون ويتحمدون بالسلامه على رجعتنا وكذا
يارباااه كم هم كرماء معنا بعض الاصدقاء يحرجونك بكرمهم وطيبتهم
شكرا مليووون اي والله شكرا مليووون وزياده وماتكفي

وباذن الله نشوفهم راجعين بشكل كامل للمكان لانه بجد يفتقد الطيبين
امثالهم وهاه ننتظركم جميع تنزلون شوي من فوق السطوح

التقييمات كمان كانت جميله بجمال وطيبه اصحابها
بكرمهم كمان وروعة حضورهم
احيان من جماليات هذا المكان ان يكون فيه ناس كذا مبدعين في كل شي
ثلاث تقييمات كانت هي كل شي رغم اختصارها كثيرا لكنها جميله بجد

شكرا والله مليون وثنين وثلاثه لكرمكم وطيبكم وتالقكم ودعمكم
لاني اعتبر اي شي فـ تقييم هو زي الدعم لي شكرا والله

التقييم الاخير جبته لانه رهيب وصاحبه روحه رهيبه ودمه خفيف وصدره وسيع
لحظه بوريكم وش كاتب

اسمع وانا اخوك حين تكون كريما مع الكل طيبا بقدر عالي ومحترم
اكيد الغالبيه هنا بتكون معك محترمه وبتغليك وتفرح لوجودك معهم

والحمد لله من اول ماعرفت المكان محافظ على هذا الشي
عشان كذا القى هذه الطيبه والكرم والاحترام والحفاوه والتقدير

بس والله اعجبني تقييمك والضحكه اللي فـ الاخير هذه لحالها ابداع
فيها اشياء كثير

شكلي طولت الكلام اليوم بس مشتاق وربي للسوالف معكم
بروح اخذ لفه ع الطاير على المكان وبترك لي بعض البصمات في بعض المدونات
لان فيه ناس تحتاج تشوف نتيجه او اثر للي يكتبونه

فـ الاخير

كونو دائما بخير لا تبخلون ولا تقصرون على من تحبون ببعض الكلمات الطيبه
خلونا نفرح معكم وشاركونا بعض افراحنا

وبس والله سلامتكم

ســـلآم

والله كنت بطلع بروح افظر واخلص كم شغله
تاركها من الاسبوع اللي فات على المكتب بس قبل اطلع اشوف فيه تنبيه فوق
قلت عسى خير هذا تنبيه طازج ويدخن من كثر ماهو حار قلت بشوفه

يوم دخلت لقيته تقييم والله لا يوريكم فيه كمية طقطه وشماته
عاد صاحبه اذ ماطقطق وعلق مايرتاح له خاطر الى يطقطق

على خويكم الطيب ابو قلب مسندح على جنب
بالله شوفو كيف يتشمت صاحبه فيني

كيف ببشر وبالسطر اللي بعده تمنى انها تكون فلقه وضرب وتعليق رجول
ياربااااه تقييم كله عنف وتحريض على العنف
عاد الان بوقت الشكوى سهله باين التحريض على العنف بهذا التقييم

كويس صاحب العقاب ماشاف كلامها واللا كان صارت علوم
وطارت رجول وعقل وكذا ليه كل هذا الاجرام والعنف مع الصبح ليييييه

دنا غلبنااااان << بصوت عادل امام اقروها

ع العموم حكايه التقييمات المفتوحه هذه رهيبه بجد توصل كلامك بطريقه حلوه
يعطيك العافيه ياللي تدورين الفلقه بس الحمد لله مو انتي المعاقبه

ويازينك وانتي فـ المدرج مع نفسك

يالله الآن بطلع بس بسرعه قبل يجي شي جديد يخليني ارجع لكم من ثاني

هيـا سلآم

يافضحي فضحاااه طيف لحد يقيمها ويهاوشها بس هي عادي
تقييم وتططق بعد امس علقت على كلامها عن العلاقات وبعض القصص

راحت فتحت على خويكم النار من كل الاتجاهات وكتبت تدوينه الظاهر
لو هنا يعطون اطول تدوينه في المدونات جائزه كان اخذتها على طول من طول
التدوينه اللي جايبتها امس ياربااااه قعدت يومين لين خلصتها

بس فيها كميه لطافه وطرافه وخفه دم وابداع تصويري للمواقف والله رهيبه
انصحكم رورحو شوفوها وعاد سهل تلقونها في مدونتها مافيه اطول منها بالردود

سالفتها مع المتوحش او الحبيب الخفي ولد خالها مدري خالتها
بس ماقلتي لنا وش صار معاه تزوج او للان ينتظرك تعترفين بحبك له

بجد احيان نفتقد للناس اللي تكتب بهذه الطريقه الحلوه في السرد وتذكر المواقف
وطرحها بطريقه محببه للنفس تخليك تقرا الكلام كله لو انه طوووويل مره
والله استمتاع يوم تقرا سوالفا المفهيه مع خالها وعياله

احسني والله تفشلت يوم قيمتها امس واطقطق على قصص العشاق اللي منزلتها
طلعت انا الغلطان ومن هنا اسحب كلامي وابصم بالعشره لك ياطيف صادقه

وسويت فلاش باااك سريع لحياتي ايام البزرنه والطفوله اكتشفت اشياء واجد
وبلاوي واجد فيها اغلبها تلميحات من اهلنا للي بيصير لنا وحنا كبار
وكنا ماخذين الامور بسهاله ولعب عيال طلع تخطيط بعيد المدى منهم

شايل هم احد من عيال عمامي او خوالي يتابعني هنا وللا قلت لكم بعض سوالف
ابوانهم واهلي معنا وحنا بزارين يارباااااه

كله من طيف رجعتنا مدري كم عشر طعشر سنه معها

فـ الاخير

طيف !! اهنيك على طرحك هنا وكتاباتك وبجد تراك تملكين ملكه وروح حلوه للكتابه والسرد
عندك طريقه حلوه في الكتابه بس عاد لا تطولين بالحيل وكذا
بعضنا عجولين الله يصلحهم لا شاف السطور واجد قرا البدايه وطنش الباقي اساليني عن هذه العينات

وبس والله سلامتكم

مبغى ازيد واطول وانا اطقطق ع البنت من امس عشان كلامها الكثير
يالله جا وقت الفطور

اذ فيه وقت رجعت وكتبت اذ مارجعت الوعد باذن الله بكره
وطبعا ننتظر بعض الطيور المهاجره تنورنا وتنفض الغبار عن مدوناتهم

وبس والله سلآمتكم

ســـلآم

النفسيه اليوم زفتين وطين ماعندي شي بس جاي كذا
وودي اكتب كم كلمه للناس اللي تموت اذ ماتنقد ياخي ارحم نفسك
قبل ترحم العالم اللي مقنع نفسك انك تنقدهم

وبس والله سـلامتكم

مدري ليه معصب وربي بس فيني طاقه سلبيه وكذا
بجد قالوها من زمان " رب كلمه تقول لصاحبها دعني "

ماودي اقفل الموضوع وودي اطول بس معصب شوي اليوم من الدوام
من الصحوه متاخر من الزحمه اللي عندي بالشغل
كلها جات مع بعض شكلي بسوي زي هاري واسحب يدي من كل شي

هيا كملت هذا جاي يتساءل عندي تراني منتهي وخالص وماعندي
غير الدجه والرجه لا تعب نفسك تدور شي
بس انصحك شوف هاري وش سوى فيه العشق قبل تغرق مثل خوينا

اخر كلمه نصيحه اخو اللي يدور مفيد هنا لا يتعب نفسه
ماراح يحصل شي والله كلام طويل واستخفاف دم على الفاضي

لو فيه خاصيه سكيب بالمدونات احس مدونتي بتفوز بالمركز الاول للسكيبات
يالله ما علينا اهم شي الاخلاق

<<

طيب سلام

ياصبــــــر الأرض !!