.
,
.



السعـــادة قـــرار !

السعاده دايم وبشكل عام تختلف من شخص للثاني وكلن يشوفها ويعيشها
بطريقة مختلفه عن الثاني !

تكون في قمتها عند الاطفال لانهم سهل يكونو سعداء واحيان كثيره
سهل كمان يخلون اللي حولهم سعداء لانهم اطفال وعلى النيه

السعاده قــرار !

المفروض حنا اللي نتخذه ونعيشه ونحاول دايم نصنع لانفسنا السعاده من ابسط الاشياء
اخترعو اشياء تكونو فيها اسعد اقل حزن واكثر فرح

ماهي صعبه ترا كلها قرار بسيط من الشخص وباذن الله بيسعد ..

السعادة قــــرار !

شوف ايش تحب او يسعدك وتفائل فيه وعيش كل لحظه فيه بسعاده من قبل يصير لك
بعطيكم امثله بسيطه ...

لايك على الرد هذا من بعض الاشخاص وربي انه سعاده بالنسبه لي
تقييم ياربااااه قمه في السعاده كيف لو يكمل بتعليق في مدونه او رساله فـ الصراحه

خلاص هنا اكون في قمه السعاده وربي

لاني باختصار بنيت سعادتي على امور اعيشها هنا واتوقعها باي وقت
عشان كذا اقول لكم السعاده قرار !

السعادة قـــرارا !

كمان تسجيل دخول بعض الاشخاص للمنتدى وتشوف اسمائهم من ضمن المتصلين
هذه سعاده بالنسبه للبعض

كيف اذ كتب في مدونته لان بعضهم وربي تواجده وكتابته سعاده بحد ذاتها
ياخي ليه نحرم بعض من هذه السعاده !!

شايفين كيف نجيب السعاده لانفسنا وانها سهله !!

السعاده قـــرار !

انتظر مباراه من قبلها بكم يوم هذه سعاده بحد ذاتها تعيشها بوقتها
كمان سعاده

رساله لشخص تسعده فيها هذه كمان سعاده لنا

ضحكه بوجه احد تقابله هذه سعاده كمان

السعاده قـــرار !

خلونا من تعقيد الامور واخذها اغلب الوقت على محمل الجد
فكونا من الخوض فـ النوايا ومتابعة كل صغيره وكبيره

وفـ الاخير بنتضايق وبنشيل فـ خواطرنا

عيشوه بشوي تفائل ونظره افضل لليوم من بدايه وبلاش تفكير سلبي وكذا

لان باختصار

السعاده قــــرار !

ضحكه امك .. سعاده
ضحكه طفل .. سعاده
ضحكه نصر .. سعاده

يالله هذه الحلقه الاولى من سلسله بحاول اكملها معاكم

عاد اللي حاب يشاركنا لا يقصر

تكلمو عن اشياء تجيب السعاده وتفرح الشخص او مواقف
تجيب السعاده

وبس سلامتكم

ســـلام

نهايه الحلقه الاولى
يتبع >>>

هلآ بالعيآآأل

وش رايكم برسمتي اكملها ولا بلاش تخبرون اخاف من العين
وكذا وكمان اخاف اكل الجو ع الرسامين هنا !!

لحد يصدق ترى اكذب ماهي رسمتي وربي بس احس سهله
وانا مغمض ارسم زيها ويمكن احسن < برا اقول

طيب قلت لك امزح وربي ماهي رسمتي وش فيكم عصبتو
يمكن فـ الخط ابدع شوي بس مالي بالرسم مع اني نفسي ارسم
اللي يقهر ماعندي وقت اذكر تابعت كثير برامج تعليم وكذا

بس ماعندي صبر وتاكدت ان الشغله موهبه مو تعلم
زي ما الخط موهبه مو تعلم !!

نقطه ونهايه سطر

الحين تعالو هنا بقول لكم سالفه صغيرونه

الحين وين المشكله يوم تعرف احد على احد بمكان عام
ايوه هذا فلان وهذا فلان ونعم فيه مثلك وشرواك >> شرواك الطيب

لين هنا حلوين وكل واحد راح بطريق
المشكله يمكن بس غاب عن الثنين ان اللي عرفهم على بعض الشخص نفسه

يمكن نسو هذا الشي ويمكن تناسو المهم خوينا يقول اللي عرفهم على
بعض صارو تقريبا اصحاب والسبب هو ويمكن لقافتهم خلتهم اصحاب

فهو مايدري بالضبط !!

لين هنا حلوين والامور مهنا احلى منها << طيب وش تبي انت ؟

اركد بقول لك بس خلني اشرب مويا شوي نشف ريقي
ايوه وش كنا نقول

تذكرت خوينا قال لنا انه عرف ثنين على بعض بس ناسي هو عرفهم
بحضرت الثنين او كل واحد لوحده مو متاكد بالضبط

المهم خوينا يقول بعد فتره صاور الثنين يكرهونه او زعلو منه
وهو ولا يدري وش السالفه بالضبط ولا وش سوى

فقعد يكلمنا وقعدنا نطقطق عليه قلنا عطنا السالفه زين وبالكامل
وبعدين نعطيك راينا مو كذا نص السالفه ضايعه

الزبده !!

الحين معقول نزعل لمعرفتنا امور عن اشخاص كنا نجهل بعضها !!
ويحق لنا ناخذ بخواطرنا كذا من الباب للطاقه !!

هذه تساؤولات خوينا وليتني عطيته اليوزر والرقم السري وهو قعد
يكتب لانه كان يبغاني اديه الارقام وهو يكتب او افتح له الحساب وهو يتكلم

بس قلت تحلم انا اكتب وانت تابع وانت ساكت

وبس سلامتكم

ســـلآم

نكمل مع

السعـــاده قـــرار !!

خليكم من سوالف خوينا اللي ماعنده سالفه قال ايش عرفتهم ماعرفتهم سلامات

ايوه نرجع ونقول " الســـعادة قــــرار "

انت وانتي وانا وهو وهي حنا اللي نتخذ القرار اللي يجيب لنا السعاده المفروض ماننظر احد يقرر
متى نكون سعداء وكذا لا المفروض نصنع الحدث اللي يجيب السعاده

سالت مره شيخ عن الصدقه واشراك اكثر من شخص معاي فـ النيه
وذكر اسمائهم وقتها !!

قال ايوه عادي ولك الاجر باذن الله ولهم الاجر ان شاء الله لانك اشركتهم بالنيه

تدرون ان ذا الشي يجيب السعاده وربي جربوه وشوفو كيف
تحس بسعاده ماهي طبيعيه انك توصل لشخص شي وهو ماهو متوقعه وكذا

السعاده قـــرار !!

جلسه بوقت غير مع امك وسوالف تختمها لك بدعوه والله انها ســعاده
هديه بسيطه لطفل بوقت هو متاضيق والله سعاده

ابتسامه لعامل في محل او مطعم وربي سعاده يوم تشوف رده فعله كيف
تغيرت بعد ابتسامتك وتعاملك معاه يمين سعاده

السعـــاده قــرار !!

حضن فجاه من امك بوقت ماكنت متوقعه وانت تسولف مع احد
وتجيك من وراك وربي ســــعااااده بشكل ماهو طبيعي تقعد فتره متذكره

غرورك قدام احد يهمك امره عشان تستفزه وكذا والله سعاده

ياخي باختصار

السعــاده قــــرار !!

قررو تسعدون انفسكم واللي حولكم باي شي اقلها رساله فيها كميه ثناء
او مدح انت بتفرح انك ارسلت والمتلقي بيكون سعيد لانك ذكرته

بوقت يكون هو في حاجه لبعض السعاده

من اول ماعرفت التدوين والمدونات كنت احاول ارسل تقييمات محفزه مشجعه على طول
احيان ينفهم قصدي غلط بس الحمد لله مع الوقت تعودو عليا الشعب

صارو يعرفون ان القصد منها كان الدعم وارسال نوع من التحفيز
والسعاده لهم

اخرها اليوم !!

يالله مبغى اطول عليكم

ناخذ فاصل وننهي الحلقه الثانيه

وتذكرو دايم ترى بجد السعاده قرار المفروض حنا نبنيه
نصنعه نوجده من العدم ونحاول استمراره


ســـلآم

يتبع >>>

السلام عليكم .. هاي قايز

وانتهى اول اسبوع اختبارات وباقي يومين وتنتهون يالطلاب مبرووك مقدما
لاني مدري مين بيسقط بعد الانظمه الجديده عندنا

الكل ناجح ومحد بتفرق معاه وكذا
اللي ماكلين هوا حقين اخر سنه بالثانوي مسوين زحمه يبون نسبه ومدري ايش
واخرتها بيكملون دراسه وجامعه وجلستن بالبيت خاصه البنات

قليل اللي تلقى لها مكان تتوج فيه سنوات دراستها !!

يالله ماعليكم كل واحد يصلح سيارته

اليوم خميس ماعليكم من شي ورمضان قرب يالله يارب ان يبلغنا هو على خير
فيه عمليات تطهير جماعي وشكلها شملتني

يالله كل شي باجره

دامنا طيبين وكذا ياربي لك الحمد والمنه الرضى اساس كل شي والنيه
الطيبه هي المهمه ادري اننا احيان كثيره مو قد الثقه اللي اخذنا

بس دايم نحاول واذ قدرنا كان بها واذ لا فالعذر والسموحه
رمضان قرب والنفوس المفروض تكون للخير اقرب وكذا

من هنا لحد يشيل بخاطره وش دعوه وربي الامور ماتستاهل نقلل من احد
او نستمر فـ الغمز واللمز اللي ماله داعي ولا يوكل عيش

صفو النوايا تطيب النفوس كونو بقد الثقه اللي اخذتوها وبس

فـ الاخير

لحد يفصل شي على هواه ترا الامور ماهي كذا واسهل بكثير من كذا
يعني عادي وربي كل الامور عاديه

والدوران مستمر والاستمرايه تقريبا معدومه
كونو بخير واسترو ماواجهتم فلكل منا اخطائه

وسلامتكم

خودافس !!

ياخوان يازين بعض التعليقات والردود وربي تفتح النفس بجد
يكفي بعضها والله بس تشوف الاسم تعرف ان وراه كلام يفتح النفس

الله يسعد كل من تعنا وتكلف وتكلم والله انكم ماتقصرون
تدرون وين المشكله فـ انك تبي ترد شي من الجميل وما انت عارف شلون

احيان نكتفي برد لايقل عن الرد الجميل الاول
واحيان نوقف فتره طويله قدام الكلام مانقدر نرد من كثر مافيه من جمال

نضطر بس نقرا ونعيد القراءه كذا مره !!

تصدقون في بعضنا مدري ليه يبخلون بالكلمه الطيبه بس حدك تقول شي
وفيه مجال للنقد تلقاهم اول ناس ينتقدون فيه ناس كل هما النقد

ياخي خلي عندك باب للثناء كما باب للنقد تعلم تكون اكثر مرونه
اكثر تفتح واتقان للموقف لان بعض المواقف ماتتحمل الزياده والاخذ والرد الزايد

كلمه ورد غطاها !

بعضنا مايعرف عرق ويسيح دمه والله لو ايش ماعنده حل وسط
خلاص البتر او الكي هو الدوا لا سلامات

يالله ماعلينا قلنا قبل " الدوران مستمر والاستمراريه معدومه "

يبقى دائما الصيت والسمعه الطيبه هو الاهم يابخت من كانو
سمته والصفه الطاغيه فيه

يابخت من كان لحضوره وتواجده زي كذا !!

فـ الاخير

ورده في قول " اخ كريم وابن اخ كريم "
في سوال الاختبار الاجابه الصحيحه للشرح هي " التواضع "

يعني انت اخ كريم وابن اخ كريم ومتوقع منك الكرم هنا القصد التواضع دام السائل ماتعدى
هذا الجزء من النص اذا القصد لم يكن العفو والتسامح بل التواضع

هذا السوال القصد منه فهم لغوي وقراءه لما بين السطور وبس

حبيت اقول لك ان الاجابه هناك صحيحه >> ياويك

يالله كونو بخير وبالتوفيق ان شاء الله فـ اختباراتكم وكذا
صح قبل انسى طيف وين هي مختفيه اللي يشوفها يجرها بشوشتها ويجيبها هنا

مو على كيفها كل شوي مختفيه

يالله ::: سلام

خودافس

ياصبآآأإأح الخير ياوجيه الخير

ماعندي شي بس صراحه اعجبني ضيف هذا الشهر بذا القسم عزا الله انكم اخترتوا لها
الاكثر اناقه الاروع اجابات الاكثر قدره على التالق
باي مكان تكون فيه

اهلأ بـ " انـة الحرف "

ضيفة للقسم في لقاءات الأعضاء ادعوكم من ذا المكان رورحو هناك
وشاركو مشرفي القسم المبدعين في لقائهم

احسنتن الاختيار صراحه ونعم الاختيار

وبس سلامتكم

صح قبل انسى جاي اترزز باللوك الجديد وكذا يعني عادي اللي بحش
او يمدح المجال مفتوح وادري بعضكم ماعرفني باللوك ذا

بس وربي عجبتني الصوره واشتقت اخذ لي سيجاره << الخلا اقول

يالله كونو بخير

واضحه ماله داعي يـــا الله ان تسعد الجميع
والله ان سعادة ناس تساوي سعادتي وتصنعها اصلا !

لان لهم فضل كبير عليا !

# مقصوده !

ســـلآم

آأإأآم بآأإأآك

ركوود اليوم ماهو طبيعي مدري هي الدوفره ولا بدا السبات الشتوي
للطلاب خاصه عندنا كثير انتهت اختباراتهم وبدت اجازتهم يالله يارب ان توفقهم
وتعطيهم بقد اجتهادهم وكذا

والاخوه فـي ماتبقى من الجزيره العربيه الظاهر اختبارتهم اليوم اول
ايامها نسال الله لهم التوفيق ان شاء الله

بس ماش الجو راكد كذا مو شي عطونا قصايد على الاقل
لاتخلوني اسوي زي بعضهم اروح اجيب لكم قصايد وانتم ماتقصرون مدح تقال انا اللي
كاتبها وفـ الاخير ترى بس تم نقلها

يالله ماعليكم كلن يصلح سيارته قسم اني امزح ولا اقصد شي
تخبرون مهوي وفاضي احيان وادور السوالف وكذا

فلا احد يشيل هم شي وربي ماتسوى الامور ناخذ بخواطرنا فيها

نقطه ونهايه سطر

نجي للمهم جاني سوال فـ الصراحه
قبل يمكن نص ساعه او اكثر المهم قبل الصلاه وقلت اصلي وارجع لكم

الحين ماشغلني السوال اشغلني اللي ارسل السوال
مين هو ؟؟؟

(wasssme)

هذا عنواني في كل مواقع التواصل اللي يبغى شي يروح هناك يسال
لاني اذ ماعرفت من انت وتسال ذا السوال ماراح اقول شي

وبعدين انتم او ا لغالبيه اللي يتابعونن هنا يعرفوني زين
ماجيب اسماء واتكلم فيها كذا بس لا بالعاده اذ بجيب اسماء والله اطقطق معهم
او استهبل اما كلام بالجد ماحب ولا ني من راعين الكلام عن الناس

فـ لا احد ينتظر مني رد على سوال فيه اسم شخص او شي بيقى رد مني !!

نظامي كذا عكس ماحب اتكلم عن احد بالاسم بشكل جدي ماحب

بس بشكل عام الامور تمام ولا فيه شي ياربي لك الحمد
هو انا اقدر ازعل من احد اصلا لا والله وبعدين وربكم ماخذ النت للوناسه
والسوالف وكذا فمستحيل بزعل من احد والله لايجيب الزعل

مشكلتي احيان اتهور واكتب بدون مانتبه اشياء وتنفهم غلط واقعد بها
يبغالي وقت لين ادري ان احد زعل مني او شي

وثم اشوف لي حل واشرح وتتضح الامور بشكل افضل باذن الله
بس وربكم مافيه شي الان ينقال والامور زي ماقلت طيبه وبتبقى طيبه

وبس سلامتكم وشاكر اهتمام البعض بس ياليت بالاسم الصريح
عشان اعرف ارد او كيف ارد وكذا

كونو بخير

وزي ماقلت لكم من سنين والله ماخذ الامور بشكل اكثر سهاله وبساطه
ووناسه وودي الكل ياخذه كذا اصلا وش نبي حنا الى راحة البال وسعه الصدر

لا تعقدونها وهي ماتستاهل

وترى للكل وصاحب ذا المدونه اولكم لنا حياه طبيعيه نعيشها ويكفي اللي فيها
من افراح واحزان ليه نتضايق كمان بالعوالم الافتراضيه ونشيل الهم ماينفع كذا وربكم

هنا مكان للراحه والفرح غير كذا اشوفه غلط
نحترم بعض ومانحاول نقلل من احد او شي لاننا كلنا اخطاء لو بندقق بنطلعنا كلنا عيوب

خليكم اكثر تفهم وكونو اكثر عقلانيه واوبن يور مايند انت وهي وهو وخلو عنكم
توافه الامور ولا تكبروها

طلوت الرد ادري بس كله منكم جعان هرج والكل نايم اليوم واشتقت للتنبيهات قسم بالله
ماله طعم الكلام بدون تنبيه ولو يلحقه تقييم ابي اوصل للمليون قبل رمضان

الوزير وتنهيده وصلوه وشهرزاد قريبه منه شكلي ببيع كم صفحه
من المدونه يمكن اجيب المليون

كونو بخير وبس والله

خودافس

بالله شفوفو كيف يوم دخلت اليوم وش لقيت !! !!
بالله هالصوره ماهي تفرح اي احد معاه عقل ويكتب بمكان عام

لين هنا حلو !!

المشكله بعد كذا وش صار يوم دخلت صرت كذا

من جد عرفت وش يعني ذا المثل " من برا الله الله من جوا يعلم الله "
عشان كذا اللي يعرف يسحب النقاط يسحبها الله لايجيب الشي بدون نفس ما ابغاه
على بالكم بتهمني النقاط لا والله ..

مدري ليه في تعمد استفزاز وكذا قاعد يصير معاي من فتره مدري ش السالفه
بالضبط ادري اني ابو النكبات واجيب العيد كثير

واتكلم واجد بس والله النيه صافيه والامور ماخذها باكثر اريحيه وتقبل
تخبرون الدعوه اغلبها طقطقه بس مشكلتي تدرون وين

اني احيان كثيره ارسل كلام بين السطور ماظنيت بيوصل لاحد طبعا اللي
بيفهم الكلام قليل والباقي المشكله بيحسبوني القصد عليهم

ماعليكم من ذا اللخبطه !!

بس تكفون شيلو النقاط اللي جات كذا كانها مدري كيف والله مابيها
اقول لكم لو ابي نقاط بذا الطريقه وربي اجيبها بالراحه

القصد من كلامي امس ودي العالم تقييم وكذا بس مو بهذه الطريقه
مدري ش القصد منها لكن ماودي فيها فتكفون اذ تعرفون تشيلون شيلو اذكر
فيه طريقه بس والله مدري شلون !!

ماحب الشي اللي فيه ريحه " من "
<< قسم انك نفسيه امس تقول شي واليوم تهاوش وش نسوي لك

لا سلامتك بس باين وربي باين كاني قاعد اشحد
تكفون واللي يرحم والدينكم لا تجبروني اطلع والله متعلق بذا المكان فوق ماتتصورون

ولا كان من زمان تركته ومشيت بس مقدرش
وبس سلامتكم

خودافس !!

ولا عاد اشوف احد يقييم

سلام

ســلآم ياشباب وصبايا عبير كيفكم عساكم بخير
مبارك عليكم الشهر والله يتقبل من الجميع الصيام وصالح الاعمال

وينكم عسى ماشر اشوف المكان اقل زحمه واقل هربته والعالم اكثر نوم
من قبل وش فيكم عسى ماشر

ترى عادي ياهوو الكتابه فـ المدونات ماتفطر
شهرزاد وطيف وابو العز حسستونا ان الكتابه هنا تفطر لا وانا اخوكم
عادي ترا كلها لحظات ادونا شوي من يومياتكم الرمضانيه وكذا

او اتحفونا ببعض الاخبار والسوالف او النصايح الرمضانيه
خلونا نتطمن عن احوالكم

هيا عاد شاركونا مو حلو المكان وهو تقريبا مهجور من كثير مننا
<< علم نفسك طيب

لا عاد صاحب ذا المدونه غير نفسيه شوي مو زيكم
يعني عادي اغيب فتره طويله ثمن ارجع واسوي امون تقول ماغبت ولا يوم
يعني لحد يقيس نفسه فييني تراني شوي مهوي

المهم

طمنونا عنكم وعطونا اخباركم وشاركونا تدوينكم الرمضاني في اوقات واجد برمضان
الواحد يكون فاضي من بعد السحور لين الفجر
او قبل السحور بساعات عادي ترى تسولفون اذ خايفين من المشاركه وانتم صايمين

ماعليكم اهم شي انكم طيبين وبخير وكذا

لحظه خليكم قريب بروح اجيب لي شي وجاي
جعان هروج وربي ومشتاق لذا المكان

لحد يغير القناه فاصل ونواصل

سلام

يامشاء الله الاجواء الفرائحيه باغلب المدونات الله يبشركم بكل خير
ويوفق الجميع ان شاء الله

ببدا من الوزير سلطان الف مبرووك بالخوي ومنها للاعلى باذن الله مبرووك التخرج
الف مليوون مبرووك وعقبال ماتكمل الافراح وتتوجها بالافضل

شد حيلك فرحت لك وربي والف مليووون مبروك ايوه هذه الاخبار
يازين رمضان مع الاخبار الزينه

اذكر العام بنفس ذا الوقت اخذت شهادتي وتخرجت اللهم لك الحمد
مرت سنه وكانها امس

هذا اخونا ابو العز ولد حرب كمان ماشاء الله تبارك الله تجاوز ترم
على خير وزي ماكان يبغى وافضل

الف مبرووك ياولد العم وعقبال ماتفرحنا بتخرجك ان شاء الله يالطيب
الف مبرووك والله يكفيك شر العين والناس اللي ماتعطي خير

الف مبرووك

هذه اختنا معزوفه امل تبلغنا انها قربت من اتمام واكمال
نص دينها بالزواج الله يبارك لهم ويوفقها ويكتب لها كل خير

مبروووك الف مبرووك اختاه والله يتمم لك على خير
وعقبال الفرحه الكبيره باذن الله

رجعت اقرا مدونة العروس وطلعت تمزح يالله باذن الله فال خير
والله يكتب لك اللي فيه الخير يامهويه ذي الصيام لاعبن فيها شوي



وش بقى بعد ماشفته

ايوه صح نسيت وربي

فيه اوسمه للمراقبين المميزين معنا في عبير
من هنا ابارك لمراقبتنا تنهيدهـ حصولها على وسام الافضليه لذا الشهر
الف مبرووك تنهيده ومنها للاعلى

بجد الوسام تشرف بحصولك عليه تستحقين التكريم صراحه
الف مبرووك

وعقبال كل مجتهد وكذا

يالله خلوني اصحصح شوي لسى فيني النوم

قبل اطلع

للناس اللي ماخذين اجازه عن التدوين في رمضان مايصير ياهوو
ادونا بعض من وقتكم وتعالو اكتبو المكان يفتقد بقوه تواجدكم

بجد اتكلم بصراحه غياب بعض الاقلام يفرق كثير
ياليت يكون لتواجدكم بعض الخربشات

وبس كونو بخير

ســلام