،
.



,
.

الســلآم عليكم

بدايه صفحه جديده ونهايه اسبوع قريبه واموركم باذن الله طيبه وسعيده
نقول لحد يرجع للصفحه اللي قبله هذه

خلوكم فـ الجديده ونبدا تفحيط ...



ودي اروح اجيب لكم كم اقتباس من كم مدونه اصحابها زمان عنها
يمكن احرك فيهم بعض السكون ويجون بس اخاف اجيب العيد

اشغلتني السياره اللي تفحط هذه

ماشاء الله جو المدونات امس اكثر نشاط واقل هدوء واحلى جو
ايوه فيه حركه طيبه حركونا معكم دوم

انه الحرف مبدعه بكم شغله مسويتها بجد شغلك ترا ابداعي
وورده طاله تتحلطم على المدرسه كالعاده بس هاالمره قاعده تنقط حكم

بجد انا معها بكل كلمه قالتها يازين يوم تكون مع نفسك اكثر وتخفف
من حده كل شي يضايقك وتبطل نفسنه مع اننا بالخريف

شهرزاد كالعاده تبدع في التدوين ماشاء الله عليها

بس فيه ذاكرة وجع !!

ذا الحساب وذيك المدونه ودي اشوف لها حل وش ذا المدونه
كلها وجع بوجع اشوفني نفسيه لين اروح لذيك المدونه

اشوفني وين وربي مافيني شي يوم اقرا لذاكره وجع

كتاباته والله حلوه بس توووجع ياخي او ياختي خففو شوي على انفسكم
ترانا بشر عايدي يعني ننكسر احيان نوجع احيان نتوهق احيان كمان

بس مو نخلي كل امورنا اوجاع ومدري كيف لا !! سلامات !!

وين المشكله لو ننقرص مره وثنين ونتالم مره وثنين
عايدي ياهوو وابشركم ماراح تكون الاخير فريحو روسكم بتجي وحده جديده

وبترجعون للمربع الاول

لاننا باختصار بشر ماندري وش بيصير بكره فاحسن شي بالعالم اننا نعيش اللحظه
بكل تفاصيلها احزن ياخي بس كمان افرح بكره

الخريف مصيره ينتهي على بالكم بيبقى على طول !!!

سامحو انفسكم لا تتعبوها بالنفسنه والزن ليه سويتي كذا ليه ماتتوبي ليه تتهوري
خلونا نتهور جعل مايتهور الى حنا وش فيكم !!

الايام مصيرها تعدل الامور والدنيا بتستمر بالدوران زي ماايام الاسبوع
نفسها تتكرر كل مره يمين مدري وش تسوي لكم

عصبتو بي بس

يالله خلوني افطر جا الفطور واذ عندي وقت طليت عليكم واذ
مهنا وقت الوعد الاحد وانتم طيبين باذن الله

كونو بخير .. ازعلو .. بس لا تنسون بعدها تفرحون .. طنشو .. وتذكرو تخلصون اشغالكم

فـ الاخير

كلنا نتبع ايام لاندري متى او ين يكون الافضل بس نصيحه كونو اكثر مع نفسكم

يالله اشوفكم على خير

ربي كما خلقتني واحسنت خلقي ! فـ أحسن اللهم خاتمتي


ســــلآم

دخول ع الطاير عشان نفر .. حياك الله يابو الاكواس وحمد لله ع السلامه
جعل ماينور المدونات الى انت ياللمبه

بس باين لسى يقرقع بقلب شي وفمك فيه ماااء !!

وبعدين تعالو هنا من يقول ان ذا عالم افتراضي هي الاسماء افتراضيه الاشخاص
حقيقين وكلنا عيال قريه وكلن يعرف اخيه

بس خلونا نخفف وسوسه وكذا

بعدين نفر انت باين احبابك وعلاقاتك كثيره في ذا العالم يعني اكيد
بيكون لك اعداء واعداء لاحبابك فتلقاهم ينبشون عن كل صغيره وكبيره لك علاقه فيها

خليك كووول مااان واتس اااب

المهم حمد لله ع السلامه وجعلها اخر الخفيات انت شمعه منوره لاتطفي نطفي معاك

واسمع .. لن يظر الكره السعوديه صغار اسيا

فـ الاخير

هذا عالمنا جميع لو كانت الاسماء والمعرفات افتراضيه او وهميه بس خلفها دايم
اصحاب راي سديد وكلام مفيد واكيد بتكون في علاقات بين تلكم الاقلام والمعرفات

يبقى الاحترام هو المهيمن علينا يبقى السر اذ وصل عندنا يمووت في محله
يبقى احترام الشخص موجود دايم وعلى طول

مهما سمعنا عنه او وصل لنا كلامه بخصوصه تبقى الامور زي ماهي
لا تخلون بعض التدخلات تكون سبب في اي شي

واللي ماسوا شي مستحيل بيخاف لان صغار اسيا لن يضرو الكره السعوديه
لن يضر الرياضه السعوديه صغار اسيا

مدري وش دخلها وانا اخوكم ..

تدرون عاد اننا نبقى اخوه مهما حصل ومهما جبنا الاعياد
بس والله مستحيل اغير فكره اخذتها عن احد ابدن ابدن

واصلا اسمع من اذن واطلع من الثانيه بكل سرعه ذا اللي المفروض يصير دايم
خاصه اذ احد جا يكلمني عن احد بعالمنا هذا

وبس والله طولتها وهي قصيره كنت جاي بس ارحب بنفرووش وربي

لكن عصبتو بي

اجازه سعيده باذن الله استانسو فيها قد ماتقدورن غيرو اماكنكم المعتاده
وكونو بخير اكثر

خودااافس

ســلآم عليكم .. يالله ان تحييكم جميع من اكبركم للصغير
ونقول بسم الله بدايه اسبوع جديد وشهر جديد

وبرد بدا يطل على استحياء كما بعض الاقلام في عبير
وتوقعات امطار باذن الله هاليومين ..

وعيد وطني سعيد باذن الله في ديار قابوس وكل عام واهل السلطنه بخير
والله يحفظ لكم اهلكم وقيادتكم ويزيد عمان عمار

وهلا بالعيآأإأآل

لقيت اختبارات واجد اليوم بمدونة شرهان المدونات بس بفطر وبروح
اجرب حظي معاكم عساني انجح بس

بجد الاجازات احيان تطلع المواهب وكذا
باين من البدايات

وهلا بالعيأإأآأل

ياخي قايلين لكم من زمان انها صعبه وقويه بس الله يهديهم
اخواننا الهلاليه دايم يحسبونها سهله

مع انها سهله البارح صراحه بس ماش مافاد معاهم الحظ كالعاده

ابو العز عساك ماحضرت المباراه البارح !!
يالله ماعليك ان شاء الله معوضين خير بس شدو حيلكم تستطيعون

وهلا بالعيأإأآإأآل

يقولون القوه القوه لابارك الله بالضعف قو قلبك وخل عنك كلام الناس
لا يهمونك لانهم كل همهم يضايقونك

والكلمه الطيبه بدها ولا تتردد بها لا بارك الله بالضعافه
يافيه عينات ودك انهم ينحجر عليهم وينقرضون بس هذا قدرنا انهم بيننا

بعضهم يستمتعون بتشويه الجمال باي شي قمه سعادتهم تشويه الجميل
لكن والله مع نفسهم الزين يبقى زين مهما صار

خلوكم منهم وكملو زي ما انتم دائما يبقى الطيب

والقوه القوه لا بارك الله بالضعف !!

وهلا بالعيأإأآأل

فـ الاخير

كلنا نستمد قوتنا من بعض الايجابيين هنا ويامكثرهم والحمد لله
لا تبخلون بالايجابيه ترا السلبيين بكل سهوله يحلون الايجابي لسلبي

وهلا بالعياإأآأإأل

كونو بخير وكما انتم لا تحاولون تتغيرون لانكم تخافون
الصعف وهن والقوه مطلب

فـ امان الله ولي رجعه مع من احب ان يهديني واياكم بعضا من فوائد علمه
فجزاه الله عني وعنكم كل خير

خليكم قريب

ســـلام

بنجي للكلام المفيد الحين ... ببدا بكلام رب العزه والجلال ..

" ربنا لا تؤاخذنا إن نسينا أو أخطأنا، ربنا ولا تحمل علينا إصرا كما حملته على الذين من قبلنا
ربنا ولا تحملنا ما لا طاقة لنا به واعف عنا واغفر لنا وارحمنا أنت مولانا فانصرنا على القوم الكافرين "

آخـر آايه في سوره البقره ,

فنستغفر الله ربنا من كل زله وهفوه او تقصير منا ونتوب اليه
واعتذر للكل عن بعض الهفوات التي تحدث مني بدون قصد او من تقصير مني

واشكر صاحبـ/ ـة الصراحه هذه



وعليكم السلام ورحمه الله هلا وسهلا من جد اسلوب راقي في النصح
او التوجيه شكرا لك على كل حال وكتب الله لك الاجر

وجزاك الله عنا كل خير !!

احيان نحتاج لبعض التوجيه يمكن نجيب العيد وننسى
فشكرا بجد لمن ارسل هذه الصراحه

وبس والله

كونو بخير واستانسو بهذه الاجواء بذا الايام صراحه اجواء
خونفشاريه وسلامتكم

فـ امان الله .. وشكرا مره ثانيه

ســـلآم

احيان كثيره نحتاج لمن يعيدون الينا توازننا يعيدوننا
اكثر لما كنا عليه !!

نحتاج لمن يقفون معنا لنتمكن من التحرك من جديد
بصوره افضل من السابق لنكون اقوى !!

لن نستطيع دائما ان نكون افضل لوحدنا
كلنا يحتاج ذاك الداعم !!

لا تبخلون على من تحبون بدعمهم بالاخذ بايديهم بمواصله ذلك
البعض لا يتحدث كثيرا بما يريد لكنه يريد !!

كن اكثر قربا منه خذ بيده اعنه على الاستمرار
فربما في الغد ستكون انت من يحتاج ذلك ستجده بالقرب منك ليدعمك !!

رب ان بعض الكلمات تكون اقوى من كل شي وهي مجرد كلمات
لنجعلها تكون داعما لمن يحتاجونها بالفعل !!

لن نخسر شيئا بالتاكيد لكن سنكسب من كنا داعمين لهم

شاركوهم فرحهم بفرح واخرجوهم من احزانهم للفرح
فاليوم لك وغدا لهم !!

انتهيت مما اريد قوله كونو بخير .. سلام

غـــدر النســـاء !!



قصة نص قصيره بس حليوه حبيت اشاركم فيها !!

يحكى ان حكيما من حكماء اليونان كان يحب زوجته حبا ملك عقله وقلبه. وكان يمازج هنائه خوفه من ان تدور الايام دورتها
فيموت ويفلت من يده ذلك القلب الى شخص آخر
وكلما صارح زوجته بخوفه من ان تتزوج بعد وفاته طمأنته بان هذا مستحيل وكان تقسم باغلظ الايمان
فيرتاح قليلا ثم لا يلبث ان يعود الى هواجسه ووساوسه

وفي احدى الليالي وهو يتمشى مر بمقبرة ورأى بين القبور امرأه بيدها مروحه تجفف بها قبرا جديدا لم يجف
ترابه فاقترب منها وسألها ماذا تفعلين

وقالت انتظر حتى يجف التراب ثم اخبرك وعنما انتهت اعطته المروحةهديه و قالت هذا زوجي توفي منذ ثلاثة ايام
وكنت اقسمت له ان لا اتزوج بعده حتى يجف تراب قبره واليوم ساتزوج بزوجي الثاني ولا اريد ان أحنث بيمين اقسمتها له

مشى الحكيم وهو متعجب من امرها ويحدث نفسه ويقول لقد احبها واحسن اليها فلما مات جلست فوق قبره لا لتبكيه
بل لتتحلل من يمين الوفاء التي اقسمتها له .

وصل منزله واستقبلته زوجته قال لها : ان أمرأه خائنه اهدته هذه المروحه فقبلتها منها اليك انها آداة من أدوات الغدر والخيانه
وانت اولى بها مني . ثم أنشأ يقص عليها قصة المرأه فغضبت زوجتها وأخذت المروحة من يده
ومزقتها إربا إربا وهي تسب وتلعن هذه المرأه ثم قال لها انت اقسمت لي انك لن تتزوجي من بعدي
فهل تفين بعهدك قالت نعم ورماني الله بكل مايرمي به الغادر ان انا فعلت ; فأطمأن لقسمها.

مضى عام ومرض الرجل مرضا شديدا حتى اشرف على الموت ودعا زوجته وذكرها بالقسم فما
غربت شمس ذلك اليوم حتى غربت شمسه وامرت ان يسجى بردائه ويترك وحده في قاعته حتى يحتفل بدفنه في اليوم التالي.
وجلست في غرفتها تبكيه وتندبه .

واثناء ذلك دخلت خادمتها تخبرها بان احد تلاميذ مولاها حضر ليزوره وعندما اخبرته بموته خر في مكانه مذعورا ولا تدري ماذا تصنع.
أمرتها الزوجة ان تأخذه اللى غرفة الضيوف وتتولى شأنه حتى يستفيق . وعادت الزوجه لبكائها ونحيبها .
فلما مر الهزيع الثاني من الليل دخلت الخادمة مره اخرى مذعورة تقول ان ضيفنا يعاني آاوجاعا وآلاما وان نحن اغفلنا امره سيهلك لا محاله .
فتحاملت الزوجة على نفسها حتى وصلت غرفة الضيف واقتربت منه ونظرت في وجهه فرأت اجمل ما خطته

يد القدره الالهيه فانساها حزنها على المريض الضيف حزنها على فقيدها الهالك واهتمت لامره
ولم تترك وسيلة من وسائل العلاج الا توسلت
بها اليه حتى استفاق ونظر اليها راكعة بجانب سريره فشكرها واثننى عليها ثم أنشأيقص عليها قصة حياته.

عرفت عنه كلما كان يهما ان تعرفه وانه غريب في قومه لا اب ولا ام ولا زوجة ولا ولد ;
ثم اطرقت رأسها تفكر طويلا ورفعت رأسها وأمسكت يده ; وقالت له: انت ثكلت استاذك
وانا ثكلت زوجي وأصبح همنا واحدا فهل لك

ان تكون عونا لي واكون عونا لك على هذا الدهر الذي لم يترك لنا مساعدا ولا معينا ,
علم ما بخبيئة نفسها وابتسم ابتسامة الحزن وقال لها : انها امنية عظمى ولكن هذا المرض الذي لا يهدأ عني وأفسد علي حياتي
وقد انذرني الطبيب بأقتراب ساعة اجلي ان لم تدركني رحمة الله . ابحثي عن السعادة عند غيري .
فقالت له : انك ستعيش وساعالجك فقال لها لا تتعبي نفسك انا عالم بدوائي
فقالت له : وما دواؤك ؟
قال : حدثني طبيبي ان دوائي في أكل دماغ ميت ليومه .
فاخذت تفكر ثم قالت أطمأن دواؤك لا يعجزني .

خرجت من الغرفة متسلله الى غرفة سلاح زوجها فأخذت فأسا قاطعة ثم مشت حتى وصلت غرفة الميت وفتحت الباب
وتقدمت الى السرير ورفعت الفأس لتضرب بها رأس زوجها , ولم تكد تهوي بها حتى رأت الميت فاتحا عينيه ينظر اليها ,
فسقطت الفأس من يدها وسمعت حركة وراءها فالتفتت ورأت الضيف والخادمه يضحكان ففهمت كل شئ

وهنا تقدم نحوها زوجها وقال لها : اليست المروحة في يد تلك المرأه اجمل من الفأس في يدك ؟
اليست التي تجفف تراب قبر زوجها بعد دفنه افضل من التي تكسر دماغه قبل نعيه ؟
فصارت تنظر اليه نظرا غريبا ثم شهقت شهقة كانت فيها نفسها .


من روائع ( مصطفة لطفي المنفلوطي )

سبب هذه القصه كلها تشبيهي بالكبير المنفلوطي سيد الحرف في عصره
والكاتب الكبير ملك السجع في زمانه





وبس والله سلامتكم واسفين ع الاطاله هالمره !!

آأإأم بآأإآك

تصدقون احب الصراحات بشكل رهيب صايره هي اللي تخليني
اكتب في مدونتي هنا من هناك اخذ روؤس الاقلام واجي اكتب هنا !!

يعني اللي يبغى سالفه من ولا شي بس يكتب لي فـ الصراحه
بكبر السالفه وبركب لها سيقان ورجول << ياهو وش الفرق سيقان عن رجول

ماعليكم من صوت الضمير طنشوه

هذه صراحه تتلكم عن ردي قبل الاخير امس تقول لنا صاحبه الصراحه
ان العبره خنقتها واني اتعمد او شي زي كذا والله ترا جا كلامي بالصدفه

لقيت الصوره وحبيتها وجبتها وعلقت عليها كلام وليد اللحظه وربي
ولا كان ببالي اصلا بس الصوره هي اللي خلت الكلام يطلع

زي القصه اللي في الرد اللي قبل ذا ماكنت ناوي اجيبها بس كذا جات بالصدفه

نفس الحاله مع كلامي امس والله شفت الصوره وجبتها
ثم طلع الكلام كذا لوحده يمكن استفزتني الصوره او شي ثاني براسي مدري والله

المهم ان القصد مو تفتيح جروح احد او شي لا وربي بس احيان ترا
اكتب على قولتهم كتابه وليده اللحظه او وليده موقف وهالمره كانت وليدت صوره !!

بس عاد تصدقون مرات كثيره اكتب ولا انتبه لقوه الكتابه الى بعدها بفتره
ارجع اقراه من ثاني اذا احد علق عليه زي تعليق الصراحه هذا خلاني ارجع اقرا كلامي

طلع بجد كلامي ينبش شوي جروح والله يوم اكتبه كنت اتريق
على بعض جماهير الهلال وقتها عندي بالدوام

يالله عدوها هالمره حزنتكم شوي بس عادي ترا امس كان
يومنا العالمي يعني مسموح نسوي اي شي

بس سوالي الحين الهلاليه يحق لهم يحتفل باليوم العالمي ماتجيهم حساسيه
من العالميه

سوري ابو العز بس انتم الله يصلح حال فريقكم تحيبون الطقطقه غصب عليكم

يالله خلوني اقوم ابصم ثمن اتقهوي ثمن افطر

لا تفوتكم القصه اللي فوق ارجوا اقروها من ثاني كلها عبر !!


كونو بخير مع من تحبون واتركو تنبيش الجروح والعزف على الفائت وكونو ابناء
اليوم و سلامتكم

ســـلام

آأإأآم باك اقين آأإأأآند آقين



والله ماقصدي اي مقارنات مع الجنس الاخر او التقليل منهم
او وضع احد في موضع المقارنه !!

بس وحده قاعد تطقطق عليا في الصراحه تقول خف علينا يالمنفلوطي
رحت بعرف العالم فيه لقيت له هذه الروايه او القصه

وجبتها !!

اعجبتني ماقلت لا بس ماقصدي شي ثاني وربي
تراني طيب وامشي بجنب الجدار من زمان خلاص ماعاد فيني حيل وشده للمهاوش

وماهو مكان نطلع عضلاتنا او زلات احد ضد احد كلنا عليال قريه وكلن يعرف اخيه

يعني لحد يزاود والامور كلها معروفه !!

فـ الاخير

شرهان المدونات شهرزاد اللقب حصري لها لحد يعطيه احد غيرها
لو كنت انا

بس ماش اشوفها بتنعزل شكل الرصيد الشرهاني قل او شي
المهم زي ماقلت لكم السالفه اللي جبتها اليوم وربي

روايه من كتاب للكاتب مصطفى المنفلوطي ورااايه او سالفه غير حقيقه
ياناس ركزو بالله

وبس سلامتكم

<< ادب ادب صاي خواف يابو
مالك دخل انت فارق بس امتحان صوت الضمير

المهم

ابو العز ياالغالي شاركنا يابو لو بلايك اهم شي خلنا نشوف لك تواجد يالذيب
وربي المدونات بدون طلعاتك وكذا مالها طعم !!

يالله كونو بخير .. ونشوفكم باذن الله بكره

فـ امان الله = خودافس

ســلام

ايووه هذه الاجواء اللي ودك يطول مشوارك للدوام عشان بس
تسنانس بالاجواء يارباااااه وربي اجوائنا اليوم

بالمدينه كلااام ودك مغير تحوم بالسياره
رافع ضغطي بس المدرسين يوم يعلقون لهم الدراسه ياخي ظلم
وحنا طيب !!

يالله ماعليه المفروض مع ذا الاجواء تكون روحنا حلوه

صبحكم الله بكل خير والله يجعل ذا المطر امطار خير وبركه على البلد
وعلى العباد قولو امين !!

يامشاء الله من 1 البارح للان المطر ورشاته ماوقفت ياربي لك الحمد
بجد تحس كل شي حولك مستانس اشجارنا المغبره فـ الشوارع صايره

تلق لق من الخضار ماشاء الله

الشعب كلهم مداومين بدري والنفسيات تقل اخر يوم بالدوام
ياسبحان الله يالامطار ياهي تهدي النفوس بشكل ماهو بسيط

الله يديمها علينا من نعمه !!

عاد اللي يرفع الضغط بجد الطلاب طول الليل يدورون التعليق
بعد مانامو جات اخبار تعليق الدراسه يستاهلون ماهم وجيه فرح

الحين وش يمسكني بالدوام ومايخليني اطلع كل شي يقول لا تجلس
الى المدير يقول اليوم مافيه مدارس لحد يروح مهنا اعذار

سوبحان الله كل العالم مروقين والمدراء منفسين !!

يالله ماعليكم بعطيهم لين 10 ونص ومع نفسهم بس يارب محد من الشباب
يشوف كلامي ذا ماني ناقص تحريش ع الصبح

المهم

كونو بخير .. واستانسو بالمطر تراه باذن الله عام ع البلد كلها
يعني اللي ماجاهم اليوم باذن الله بكره او بعده

هذه امطار الشتاء حيا الله الشتا وذكريات الشتا


اجازه سعيده للطلاب ومدرسينهم وباذن الله تمتد للخميس التوقعات
تقول اليوم وبكره امطار يعني التعليق جاي جاي

يحزنون اللي برا السعوديه مطر ولا بدون تعليق دراسه مافيه
<< ورده ترا يقصدكم

يالله فـ امان الله

ســـلآم

أخـــر الكلام وماراح اعيد او ازيد
وباخر رد بالصفحه هذه !!

ياخواني والله ياجاني كلام بالصراحه يشيب ويضحك بنفس الوقت
اقول لكم معلقات حش في غدر الشباب والرجال بشكل عام

ماكاني تكلمت امس وقلت لكم القصه ماجبتها للمقارنه !!

جبتها رد على الناس اللي تطقطق عليا بالصراحه بس

لحظه بوريكم جزء من رد طويل جاني هناك من ضمن والله يمكن
عشر ردود كلها تتكلم عن نفس الموضوع !!



اكثر شي اعجبني استخدام مفرده ( الحرمه ) ههههاي زمان ما شوف احد يكتبها
باين اللي مرسله الصراحه معصبه بقووه اجل الحرمه

المهم ماعليكم اللي يضحك بالموضوع اخر سطر !!

حنا سبب غدر الحريم !!

لا لا امانه لا حنا لو مالقينا تجاوب من الحرمه من البدايه
مادخلنا مملكتها عشان تغدر !!

يووه لو برد بتعب ادري ماراح اخلص بس اعذروني استفزني والله ذا الرد
بالصراحه وجبته !!

فـ الاخير

لازم يعرفن الحريم بشكل عام ان الرجال فطرتهم تختلف امكانيه اتساع
قلوبهم للحب ولاكثر من امراه شي عادي واقل من عايدي

ولا ماكان ابيح لنا التعدد بكل بساطه لاننا نقدر نحب اكثر من شخص
ونقدر نحتوي اكثر من حرمه

فلا تقارنون قلوب الرجال بفلوبكن جزاكن الله كل خير

وبس والله

ماعاد راح اتلكم بالموضوع عندكم صفحه الصراحه
كملو الغزوات حقتكم هناك لاني بقفل ع الموضوع بالمدونه

بس ماظمن نفسي وربي يمكن ارجع << ماللرجال امان

صوت الضمير فكنا من شرك يرحم ابوك

يالله كونو بخير واستانسو بالامطار .. سلام