لسا ما كملتيها

بليز كمليها بسرعه

الجزء العشرون:


لما كانت السياره بتصدمها دزها جواد ادحرجوا اثنينهم هي صارت على الأعشاب القريبه لشارع اما هو اصتدم راسه بعمود الكهربه حق الشارع والدم الي كان فيها دمه.

كان شكله مايوحي اذا كان عايش أو ميت.

ساره دموعها طاحت سيلان:جواد .. هزته .. جواد كلمني جواد قول شي .. تكفى لاتموت لاتخليني .. سوي الي تبغاه عذبني انشر صورتي افضحني سوي الا تبغاه بس لاتموت لاتموت .. جواد أحبك لا تموت قبل ماتسمعها ولله أحبك جواد جواد.

رفعت راسه عشان تمسح الدم الي على وجه شافت اياديها كلها دم ماقدرت تتحمل منظر الدم حست بدوار طاحت...........


فتحت عيونها طالعت المكان رفعت نفسها .. أني في المستشفى.
دخلت لها الممرضه:دانتي اصحيتي.
ساره بسرعه:وين جواد؟؟
الممرضه:قصدك الراجل الي كان معاكي .. داه من أول ماجابوه وهو في حاله خطيره اوي خسر دم اكتير خالص.
ساره قامت من السرير لبست عباتها:وديني له.
الممرضه:بس انتي لساتك عيانه.
ساره حقرتها مشت.
الممرض راحت وراها:دانتي ماتقدريش اتشوفيه .. هو لساتوا في غرفة العمليات.
ساره:العمليات!!!!!!!!!!!!!!!!!!!!!
بدت ادموعها اطيح على خدودها .. الممرضه حاولت اتهديها.
الممرضه:انتي اقعدي مكانك وأنا حاروح اندهلك الشرطه.
ساره:الشرطه!!!!!!!!!!!!!!!!!!!!!!
الممرضه:ايوه هم لازم يعرفوا كيف وقع الحادث.
طلعت الممرضه .. ساره راحت عند الدريشه اتصيح بهدوء .. حست بحد وراها لفت على طول حضنته صاحت.
سلمان يبين من صوته أنه تعبان ومهموم:ساره خلاص هذا قضاء وقدر.
ساره اتصيح:كل مني أني اسبب.
سلمان:لا ساره لاتقولي جذي أنتي مالش خص.
ساره من سمعت كلامه زاد اصياحها.
ساره اتصيح:كله مني كل مني.
سلمان: انتي ليش امحمله نفسش اسبب الي صار لهم مالش دخل فيه.
ساره رفعت راسها:أنت عن من تتكلم.
في هالحظه اندق الباب .. سلمان راح ايشوف من في الباب رجع لها:ساره ليش الشرطه يبغوا ايحققوا معاش .. قالي الشرطي الي برى عشان الحادث بس اي حادث.
ساره استغربت اذا مايدري عن الي صار لها ولجواد عجل عن شو كان يتكلم وعلى ويش يهديها.
ساره:الي صار لي ..نزلت راسها.. ولجواد.
سلمان:شو صار لكم؟!
ساره:انت ماتدري؟؟!!
سمعوا دق الباب مره ثانيه.
سلمان:اتغطي الشرطي بيحقق معاش.

ساره اتغطت وهي اتفكر اذا مايدري عن الي صار ليش ايهدئها ومن الي كان يتكلم عنهم.

الشرطي حقق معاها وقالت له كل شي بس ماقالت شي عن الصوره.
ساره بعدها اتصيح:و صحيت لقيت نفسي اهني.
سلمان مستغرب:وجواد وينه الحين؟؟
ساره بنبرة اصياح:قالتلي الممرضه في غرفة العمليات
الشرطي:طيب وين ولي أمرك؟؟
سلمان قبل ماترد ساره:أنا ولي أمرها.
ساره مع أنها كانت اتصيح بس استغربت جواب سلمان:لا ابووليد ولي أمري .. هم بعدهم مايرجعوا من المطار خالي راح ايوصلهم.
سلمان انصدم ماكان يدري أن ماحد قالها.
الشرطي:دحين من ولي أمرك؟؟
سلمان:أنا.
ساره طالعته من ورى الغطى باستغراب ..ليش يصر أن هو ولي أمري؟؟
سلمان اتفاهم مع الشرطي و تركهم بروحهم.....
ساره شالت الغطى:ليش قلت أنك ولي أمري؟؟
سلمان قعدها على السرير وهو مو عارف من وين يبدئ:ساره أنتي عارفه سنة الحياه وكل انسان مصيره ايموت(ساره طاحت ادموعها ماتدري ليش) وانتي انسانه مؤمنه أبربش
اندق الباب مره ثانيه.
سلمان اتنفس بعمق راح يفتح الباب .. دخل ابو جواد وكانت حالته حاله.
ساره على طول راحت له:أكيد كنت عند جواد طمني.
ابو جواد بصوت مبحوح:بعده في العمليات محد طلع من عنده.
ساره صاحت:كله مني كل مني .. وين أمي أبغى أشوفها حتى وأني في المستشفى ماتعبت نفسها اجي تطمن علي .. وين هي؟؟
سلمان: ساكت.
ابو جواد:!!!!!!!!!!!!!!!!!!!!!!!!!!!!
ساره اتصرخ:ويش فيكم ساكتين؟؟
سلمان:ساره اهدئي واسمعيني
ساره اتصيح وتصرخ:مابهدء قولولي وين أمي وين وليد ليش قلت أنت ولي أمري وجوهكم ماطمن.
ابو جواد:ساره اهدئي و
ساره قاطعته:هاه بهدء يلا قولوا لي .. قعدت على السرير هزت رجلها اليمين بتوتر.
سلمان قعد امقابلها على الأرض:الله امرنا بالصبر وانتي أنسانه مؤمنه ولازم تصبري
ساره تقاطعه:لا أنت تكذب ماصار فيهم شي .. خالي قول شي.
سلمان يطالع الأرض:لما اتصلوا لي كان جوالي مو عندي من جذي مارديت فتصلت أمش على ابوجواد يجي ياخذهم بس الظاهر انهم ماقدروا ينتظروا فأخذوا تكسي ..سكت اشوي كمل كلامه..صدمتهم سياره ابو وليد مات على طول لكن أمش و وليد ..ماتوا في المستش
ابوجواد ايصرخ:ساره.
سلمان رفع راسه شاف ساره طايحه على السرير.
ابو جواد حاول ايصحيها:ساره ساره .. روح نادي الدكتور.
سلمان طلع ابسرعه.
ابو جواد بطحها على السرير عدلها و عدل احجابها.

جى سلمان ومعاه الدكتور .. الدكتور قالهم أنها مغمى عليها ولازم يتركوها ترتاح لأنها ماتتحمل صدمات.

تركوها راحوا لهادي الي كان عند غرفة العمليات الي فيها جواد وكان في حاله لا يرثى لها........
ابوجواد:ماحد طلع؟؟
هادي كان ضام رجليه حاط وجه بينهم:لا ..رفع راسه.. كيف حالها؟؟
ابوجواد قعد على الكرسي:اغمى عليها مره ثانيه.
هادي بوجه خالي من المشاعر:ليش؟؟
ابوجواد:ماقدرت تتحمل موت اهلها كلهم مره وحده.
هادي اتفاجئ:اهلها!!!!!أنا الي اعرفه ان زوج أمها هو الي مات.
ابوجواد اتنهد:وأختي و وليد ماتوا في المستشفى.
هادي رجع الى نفس وضعيته الاكان عليها:الله يرحمهم و يساعدها.
سلمان كان طول الوقت ساكت يفكر في وضع ساره الي يقطع القلب وحال جواد الي ماحد يدري عنه شي.

طلع الدكتور من الغرفه على طول راحوا له....
ابو جواد:هاه طمنا.
الدكتور:أنت ابوه.
ابوجواد:هيه.
الدكتور:بصراحه حالته خطيره وممكن ان يكون عنده ارتجاج بالمخ أو يفقد ذاكرته وطبعا في أحتمال كبير أنه يدخل في غيبوبه لأن من أول ماجابوه وهو مايتحرك في جسمه غير قلبه حتى تنفسه بطئ.
ابوجواد:غيبوبه!!!!!!!!!!!!!!!!!!!!!
الدكتور:من الي جابه؟؟
هادي:أنا.
الدكتور:شفته يتكلم أو يتحرك؟؟
هادي بكل حزن:لا.
الدكتور:ماراح تقدروا اتشوفوه الحين.
ابو جواد:ليش؟؟
الدكتور:غير العمليه الي سويتها في راسه يحتاج لعمليه في رجله اليمين وأشعه في يده اليسار لأنها يمكن انكسرت.
هادي:عمليه في رجله!!؟؟
سلمان:ليش؟!
الدكتور:لأنه كان حاط جواله في مخباه ولما صار الحادث اتكسر الجوال ودخلت في رجله قطع منه وهذا خطير ممكن اسبب له تتسمم أو شي ثاني.
تركهم الدكتور في خوف على مصير جواد.
هادي قعد على الأرض من الصدمه و صاح صاح على ولد خالته الي يحبه أكثر من اي شي الي كان الأخ والصديق وكل شي بدنيا تذكر كل ايامه معاه لعبهم ضحكهم مسخرتهم حتى زعلهم كانوا لما يتزاعلوا يتصالحوا في نفس اليوم كل اسرارهم عند بعض حتى اطباعهم نفس الشي تذكر لما خبره بحبه لشيماء تذكر كيف اصر عليه جواد انه يتعلم على البيانوا حتى لما سافر جواد كانوا يكلموا بعض كل يوم تذكر لما قاله جواد عن حبه لساره تذكر احساس جواد لما قاله انه حاس على شي بيصبيه .. رفع راسه:عمي جواد كان حاس حاس بس هو وعدني ماراح نفترق وعدني يحظر عرسي وانا بحظر عرسه هو بيصحى لازم يصحى لازم يسمعها اتقوله أحبك هو يحبها صدقوني.
ابوجواد مع انه مو فاهم شي من الي يقوله هادي نزل لمستواه:بس ياوليدي انت رجال كون اقوى من جذي شبقيت للحريم.
هادي:ماقدر ماقدر جواد أكثر من اخوي هذا جزء مني تعرف يعني شنو يعني لو ينفصل عنك شي اكيد بتموت وانا مابي اعيش من دون صديق عمري.
سلمان:انت ادعي له يقوم بالسلامه.

هادي كان أكثر شخص متأثر لأنه شاف الدم الي طلع من جواد وكيف كان وجهه مايبين من كثر الدم.

بعد ربع ساعه جوا لهم ابو اسعد واسعد وام جواد شيماء دانه .. طبعا سوو المستشفى مناحه صاروا ايهدؤ الأولى اتصيح الثانيه ايسكتوا الثانيه تقلبها مناحه الثالثه .. ابو جواد قالهم يروحوا غرفة ساره بعذر أنها لما تصحى لازم تلاقي أحد بجنبها ولأن قعدتهم مامنها فايده .. دانه وشيماء راحوا بعد اقناع منه بس ام جواد مارضيت اتروح.

بعد سبع دقايق جت لهم دانه اتصيح:الحقوا على ساره.
ابوجواد وام جواد راحوا مع دانه لكن سلمان راح معاهم بس بقى برى لأن شيماء ودانه داخل.

لما دخلوا شافوا شيماء اتصيح والممرضه مو عارفه ويش اتسوي اما عن ساره فكانت قاعده على السرير وفال شعرها.
ساره تهز راسها تغني:ماما زمنها جايه جايه بعد اشويه جايبه معاها حجات هههههههه.
نطت من السرير:خالي خالي ماشفت ثوب عرسي ..أخذت الشرشف الي على السرير لفته عليها .. عيب لا اتطالعوا البس ثوبي.. أخذت واحد ثاني من الموجودين حطته على راسها .. شوفوا طرحتي طويله .. طالعت نفسها في المرايه الموجوده .. الله اهبل مكياجي مره احليوا.
الممرضه حاولت تتقرب منها.
ساره:لا تقربي انتي تبغي اتبوقي ثوبي اكيد عجبش هههههههه .. شوفوا شوفوا أمي جت أكيد تبغى اتودعني وتحضني .. يووه كاهوا ابو وليد جايب جواد هههههههه.
ام جواد ماقدرت تتحمل منظر ساره على طول طلعت أما دانه وشيماء فكانوا ايصيحوا على حالها الي يقطع القلب بنت في مثل عمرها اتعرضت لأربع صدمات في يوم ماتوا اهلها كلهم و الأنسان الي اتحبه ماحد يدري عن مصيره.. ابوجواد ما قدر يستوعب الحاله الي فيها ساره كان جامد في مكانه.
ساره لبست عباتها شافت الدم الي في كمها:يمه دم ..بدت ملامحها تتغير.. هذا هذا جواد .. هيه هيه هذا فيمتو جواد كت علي الفيمتو .. ركبت على السرير اتناقز .. شوفوا وليدو يعفس سريري جذي .. وقفت حكت شعرها حطت اظفر صبعها بين اسنانها .. بس بس وليد خلاص بح مات هههههه مات و أمي خلاص مافي أمل تعطيني حنان حتى وابو وليد بح صار مافي ابو وليد ههههههاي مافي و و جواد ماأدري صار مافي لو في .. راحت لأبوجواد:خالي خالي متى جواد بيصير بح عشان أني اصير بح هههه
الا وجيها كف من سلمان بكل قوته.(سلمان ماقدر ينتظر برى خصوصي لما سمع الي كانت اتقوله)
طاحت على الأرض .. سلمان قعد على الأرض جنبها مسكها من اكتافها:حرام عليش الي اتسويه بنفسش ارحمي حالش .. حضنها وصاحت في حضنه لين اغمى عليها مره ثالثه.

حملها بطحها على السرير:قعدوا معاها .. طلع برى.
شيماء الدموع في عيونها:و جواد؟؟
ابوجواد:بنخبركم اذا صار شي .. طلع شاف سلمان واقف.
ابوجواد:الله يكون بعونها.
سلمان من غير مايحس طاحت دمعه من عينه الي يصير لساره ذكره بنفسه أنسان وحيد عايش من دون أبو ولا أم ولا حتى أخوه ماحد يملي حياته غير ساره حتى الأنسانه الي يحبها مو قادره تنسى الي سواه.
سمع صوت جوال ابو جواد فقطع حبل افكاره.
ابوجواد:هيه .. بس يابوفاضل ماأقدر اترك ولدي بهالحاله .. خلاص جايك الحين.
ابوجواد:بيدفنوهم.
سلمان:بروح معاك .. طلعوا من المستشفى راحوا مع بعض.

..........

بعد ثلاث ساعات صحت بس هالمره مابدت اي انفعال ظلت ساكته ماتكلمت ولاكلمه كانوا يسألوها اذا تبغى شي مثلا ماي او يسألوها عن حالها بس هي ماكانت اتجاوبهم اصلا مانطقت بولا حرف.
طالعت الساعه الموجوده على الجدار شافتها تسع و نص تقريبا .. قامت من سريرها بهدوء.
شيماء بوجه كئيب:ساره وين رايحه؟؟
ساره طالعتها بوجه مافيه حياه دخلت الحمام .. لما طلعت طالعت شيماء الي كانت جالسه لوحدها لأن دانه راحت تسألهم عن حالة جواد .. تنقلت بنظرها من شيماء لجميع انحاء الغرفه بعدها عادت بنظرها لشيماء راحت لها مدت ايدها.
شيماء بستغراب:وشوو!!؟؟
ساره طالعت عباتها.
شيماء فهمت قصدها:اها .. قامت من مكانها طلعت لها سجاده و حرام لصلاه.

صلت الا بدخلة دانه الغرفه .. شافت ساره اتصلي فقعدت جنب شيماء......
شيماء بصوت واطي:ها ويش صار طمنيني.
دانه:طلعوه من غرفة العمليات بس ايقولوا لازم اتمر اربع و عشرين ساعه على مايعرفوا حالته.
شيماء بفرح:يعني نقدر انشوفه.
دانه بكل حزن:لا هو في العنايه المشدده ممنوع احد يدخل عليه .. اتكلمت معاش.
شيماء بكئابه:لا.
قعدوا يطالعوها وهي اتصلي .. لما خلصت طالعتهم ولا كأنها اتطالعهم كان وجهها مافيه حياه مافيه روح راحت انبطحت على السرير.

دانه شيماء كانوا خايفين عليها لأن مفروض اتسوي اي شي بس مو جذي.

بعد نص ساعه جى سلمان خلص اوراقها من المستشفى و اخذها راحوا البيت.

اول مادخلت البيت على طول راحت غرفتها حضنت دبدوبها .. جى لها سلمان قعد على سريرها...
سلمان:ساره ماتبغي تاكلي شي؟؟
ساره ماردت عليه بس طالعته.
سلمان:خلاص براحتش اذا احتجتي شي ناديني.
ساره لفت على الجهه الثانيه.



#بيت ابو جواد#

دانه ماقدرت اتنام فراحت غرفة شيماء .. دخلت سمعت صوتها اتصيح بس ماشافتها لأن امطفيه اليتات شغلت اليتات راحت لها.
دانه:شيماء لاتصيحي انشالله بيقوم بالسلامه.
شيماء اتصيح:ماأقدر ماأقدر جواد مو بس اخوي جواد اخوي وصديقي و كل شي ولله ماأتخيل حياتي من دونه كان أكثر واحد مايقدر على زعلي مايرضى علي مايقدر ايشوفني حزينه الا يفرحني ماأقدر صدقيني ماأقدر.
دانه بدت اتصيح لا شعوري:ولا أني ماأقدر يمر علي يوم ماأشوف ظحكته فيها ماكان يقدر ايزعل احد ولا يراضيه ولله ماأتخيل البيت من دونه كان هو الي يسوي جو في البيت مو قادره انام من دون ما أطمن عليه.

قعدوا ايصيحوا مع بعض .. شيماء مارضيت اتخلي دانه اتنام في غرفتها خلتها اتنام معاها.


في الصبح الكل عرف بالي صار .. أمل أم حسن زهراء و حوراء ام قيس راحوا لساره .. ام جواد شيماء دانه كانوا هناك وكانوا موجودين الجيران والأهل وجميع معارفهم.

ساره كانت في غرفتها ماتحركت عنها أصلا .. الكل حاولوا يتكلموا معها بس هي ماقالت ولا حرف وجهها نظراتها حركاتها كلها مافيها حياه.
أمل قريب اتصيح على صديقتها:ساره قولي أي شي لا تظلي ساكته.
ساره طالعتها ببرود.
شيماء:ولله مو زين الي اتسويه صيحي صرخي بس لا تكبتي الي بداخلش.
حوراء:على الأقل قولي اي حاجه طمنينا على صوتش.
كلامهم ماحرك شي في ساره ظلت ساكته.

قيس وابو قيس رائد راحوا عزى الرجال و لما طلعوا راحوا لجواد المستشفى.

ام جواد كانت كل اشوي تتصل لأبو جواد تطمن على حالة جواد بس ابوجواد كان ايقول لها أن لحد الحين ماقالوا لهم شي.

في اليل بعد ماراحوا كل الناس جى لهم هادي ياخذهم .. شيماء حاولت في هادي ايخليها اتنام مع ساره بس هادي مارضى عشان سلمان.

لما وصلوا البيت هادي نزل معاهم راح المجلس مع شيماء.......
هادي ايهدء شيماء الي صارت اتصيح بصوت بعد الي قاله لها:شيماء أنا قلت لش عشان اتخففي عني مو اتزيدي همي بصياحش.
شيماء اتصيح:كان ماقلت لي أحسن.
هادي:لو ماقلت لش أنا بيقولش أحد غيري.
شيماء:أمي تدري؟؟
هادي:لا الحين بيقولها ابوش.
شيماء عودت اتصيح.
هادي:حيبيتي خلاص كافي الي فيي .. رفع راسها مسح ادموعها بصبعه حضنها مسح على شعرها .. شيماء صاحت في حظن زوجها.

..........

ابو جواد كان قاعد مع ام جواد في غرفتهم كانت حاسه أنه يبغى ايقول لها شي بس مو عارف كيف ايقول.
ام جواد بخوف:حاسه انك تبغى اتقول شي قول لا تخاف علي.
ابوجواد قعد جنبها:انتي
ام جواد قاطعتها:ماأحتاج لمقدمات عشان اتقول الي بتقوله حاسه انه يتعلق بجواد فقول بسرعه لأنك حرقت اعصابي.
ابوجواد:جواد دخل في غيبوبه.
ام جواد انصدمت ودموعها طاحوا بسرعه.
ابوجواد:سكينه كوني قوي
ام جواد قاطعته:أنت ماتفهم هذا ولدي الوحيد ماعندي ولد غيره.
ابوجواد اصرخ:و ولدي بعد .. لفها له .. قومي صلي وادعي ربش يصحى دعاء الأمهات مستجاب.
تركته راحت اتمسحت صلت دعت ربها يصحى جواد ويقوم بالسلامه.



بعد أسبوع الكل عرف ان جواد في غيبوبه بس ماحد قال لساره الي فيها كافيها بس ساره عرفت .. كانت عطشانه و الماي الي في غرفتها خلص نزلت تحت شافت سلمان ايكلم في الصاله بس عطنها ظهره يعني ماشافها.
شربت ماي وتوها بتعود غرفتها الا تسمع سلمان يتكلم عن جواد فوقفت.
سلمان:تقصد جواد .. سوو له عمليتين وحده في راسه والثانيه في رجله .. لأن جواله اتكسر في رجله ..ادعي له دخل في غيبوبه وماحد يدري متى بيصحى.

ماقدرت تتحمل على طول راحت غرفتها سكرت الباب مسكت دبدوبها قعدت اتصيح .. ياربي أني فقدت أمي وابوي وأخوي وزوج امي مأبغى افقد جواد .. ليش أنقذني كان خلاني أموت .. أحبك ولله أحبك .. انبطحت على السرير وهي تذكر كل الأيام الي قضتها مع جواد ذكرت أول يوم شافته في محل الورد لما شافها في غرفة شيماء يوم حفلته لما اتصل لها قال أنه برى تعبان وطلعت له بس طلع اكذب عليها .. هيه الصوره لهذاك اليوم ..غمظت عيونها.. مو معقول ايكون يخدعني لو كان جذي كان ماضحى بحياته عشاني ياربي جواد مو قادره اتحمل أني اسبب كل من غبائي ليش شكيت فيك .. رجعت لذكرياتها معاه ذكرت لما جى ياخذها من المدرسه بس هي ماوافقت راحت مع سلمان وكان بيذبح سلمان عشانها .. لما ماتت جدتها وكيف كان خايف عليها عالج يدها بعد ماكسرت امرايتها فنجرحت ايدها.. مسكت ايدها باستها .. ذكرت ردة فعله لما قالوا الممرضات أنها خطيبته .. ذكرت كل الأشياء الي صارت بينها و بينه عزفه صوته ظحكته جنونه رسايله لها .. صاحت صاحت صاحت لين نامت.



أمل اتكلم حوراء......
حوراء:ولله ماتستاهل الي صار لها.
أمل:الله ايساعدها حالتها اتقطع القلب.
حوراء:ولله صرت أخاف اتكون غتمت وراح صوتها لحد الحين مانطقت بولا حرف.
أمل:لا لاتفاولي عليها انشالله تتكلم واتريحنا.
حوراء:انشالله.
أمل:انزين أني قلت لها باروح لها الصبح اتروحي معاي؟؟
حوراء:ماأتوقع يمديني الصبح باروح العصر.
أمل:اوكيه يلا كشي باي.
حوراء:ههههه باي.



صحت الصبح على طول راحت المستشفى الغرفه الي هو فيها كانت بتدخل بس منعوها الدكاتره قاومتهم دخلت الا اتشوف الدكتور يغطي وجه جواد .. طالعته كأنها ماتبغى اتصدق الي اتشوفه بس الدكتور حرك راسه بالنفي ماقدرت اتصدق .. جواد مات مات قبل ماأكلمه مات بسببي بسببي بسببي لا لا ا

سلمان فتح باب غرفتها بسرعه بعد ماسمع اصراخها راح لها وهي اتصيح حظنها:حلم كنتي تحلمي.
ساره صاحت بصوت في حظنه.
سلمان صحيح كان خايف عليها بس فرح لما سمع صوتها على الأقل اطمن عليه .. ظل معاها لين اذن راح ايصلي وهي اتصلي .. بعد ماصلوا رجع لها لأنها ماقدرت اتنام خايفه تحلم مره ثانيه بقى معاها ليما نامت بس هو ماقدر انام خايف تصحى ماتلاقيه.

بعد ساعتين صحت.......
سلمان قريب اينام:محتاجه لشي تبغي اسوي لش فطور؟؟
ساره ساكته ماتكلمت.
سلمان:ساره كلميني ليش تسكتي؟؟
ساره لفت وجهها على الجهه الثانيه ماردت عليه.
سمعوا نغمة جوالها .. طالعت الجوال لفت على سلمان.
سلمان:جت؟؟
ساره هزت راسها.
سلمان اتأملها اتنهد طلع من غرفتها راح يفتح الباب.....
أمل:السلام عليكم.
سلمان:وعليكم السلام.
دخلت وتوها بتركب فوق...
سلمان:أمل
أمل غمضت عيونها(لا تنطق أسمي أرجوك ماأقدر) لفت له.
سلمان من دون مايحس أتأملها.
أمل استحت من نظراته:ويش بغيت؟؟
سلمان انتبه على نفسه:امممم ممكن اتلاقي صعوبه معاها اليوم.
أمل:ليش؟؟
سلمان:أمس صرخت الظاهر حلمت بكابوس.
أمل بفرح:صرخت ابصوت؟؟
سلمان ابتسم:هيه.
أمل بسبب انفعالها وفرحها نست حالها راحت له حطت ايديها على كتفه:أحلف قول ولله واتكلمت معاك قالت شي
أنتبهة لحركتها من نظراته المتفاجئه وركبت فوق بسرعه من كثر ماكانت مستحيه من حركتها.
سلمان حط ايديه على كتفه .. أحبش ياترى حسيتي بنفس احساسي .. راح انبطح على الكنبه ومن شدة نعسه نام.

وقفت عند باب غرفة ساره وهي تلتقط انفاسها و اتحاول اتسيطر على دقات قلبها .. دقت الباب دخلت الغرفه.
أمل بوجه مبتسم:صباح الخير.
ساره أشرت لها تجي تقعد جنبها.
أمل قعدت بجنبها .. ساره حطت راسها في حظنها صاحت .. أمل خلتها على راحتها اطلع الي فيها.
أمل:باروح اسوي لش عصير ايهدء اعصابش .. راحت المطبخ سوت العصير لما جت بتركب انتبهت على سلمان الي كان نايم بطريقه مو مرتاح فيها ايده على الأرض ورجليه صايرين برى الكنبه.
لاشعوريا راحت له اتأملت كل تقاسيم وجهه .. صحيح أني غبيه لو صحى و شافني اطالعه ويش بيكون موقفي.
كانت بتمشي بس قلبها ماطاوعها تتركه جذي .. اممم أناديه عشان يصحى لالالا ويش بقول سلمان قوم موعدله .. اممم اهزه هههه حدي ظريفه ماأشوف نفسي الا اهزه وين قاعدين .. انزين مستحيل اخليه جذي .. هيه بقول لساره اتصحيه.

راحت لساره الغرفه....
أمل:ساره سلمان نايم على الكنبه حرام روحي صحيه شكله تعبان.

ساره تركتها نزلت تحت .. قعدت بجنبه هزته بصوت مبحوح:سلمان سلمان قوم نام في غرفتك.
سلمان مابين النايم والصاحي:تعبان خليني أنام.
ساره:انزين قوم نام في غرفتك.
سلمان فتح عيون وحده ولما استوعب قام:وحشني صوتش .. حضنها.

ركبوا مع بعض هو راح غرفته وهي رجعت لأمل.

أمل كانت اتكلم:ليش جيت .. ماقلت لك تجي الحين .. افففف منك غبي صحيح هندي .. خلاص باجي .. أحلف هذا الا ناقص.
سدت الخط لفت لساره بعصبيه:غبي هالسواق قلت له لا يجي جى.
ساره فكرت قعدتها على السرير:من متى عندكم سواق؟؟
أمل فرحانه:ياعمري وحشني صوتش.
ساره:مو هذا وقتش .. أبغاش اتوديني المستشفى الحين لازم أشوف جواد.
أمل:بس و سلمان.
ساره:مايهمني أبغى أشوف جواد مو كافي الي فقدتهم ماأبغى افقد جواد .. صاحت.
أمل:خلاص ساره لاتصيحي قومي بدلي ثيابش بس مانتأخر.
ساره : عادي أهم شي أشوفه.

بدلت اثيابها لبست عباتها راحوا المستشفى......

كانت طول الطريق خايفه بس من شو ماتدري .. سألت الرسبشن عن غرفته راحت.

أمل بقت برى تنتظرها أما هي دخلت بقلب الحبيبه الخايفه على حبيبها .. شافت الألات موزعه على كل انحاء جسمه ماقدرت تتحمل وقفت مكانها .. بعد ثواني اتقدمت قعدت بجنبه .. بعد تردد مسكت ايده أتأملت وجه(كانت جبهته ملفوفه بشاش وايده اليسار مجبسه).
ساره بنبرة اصياح:جواد تكفى قوم مالي عيشه من دونك .. جواد تدري أمي ماتت ابو وليد مات ووليد مات .. قاوم مرضك لاتموت .. أنت أملي في الحياه ماأقدر أعيش من دونك من لي غيرك سلمان مصيره بيتزوج وأني وين بروح مستحيل أتزوج غيرك .. أحبك ولله أحبك .. تذكر لما شفتني في محل الورد .. ابتسمت.. كان وجهك ايضحك لما قلت لك أني أعرفك .. تذكر لما

ماكملت كلامها حست ان في أحد وراها لفت وكانت هذي مفاجئتها ماتوقعت أصلأ أنها اتشوفها مره ثانيه ووين في غرفة جواد:مرام!!!!!!!!!!!!!!!!!!!!!!!!!!!!!!!!!!!!!!!!! !!

شوو راح ايصير بين مرام و ساره؟؟؟؟
ليش مرام جايه لجواد؟؟؟؟
هل بيصحى جواد من غيبوبته؟؟؟؟
تتوقعون سلمان بيعرف ان ساره راحت لجواد وشو راح بيسوي؟؟؟؟
تتوقعوا علاقة أمل و سلمان بترجع مثل ماكانت أولا؟؟؟؟

الجزء الواحد والعشرون:


ماكملت كلامها حست ان في أحد وراها لفت وكانت هذي مفاجئتها ماتوقعت أصلأ أنها اتشوفها مره ثانيه ووين في غرفة جواد:مرام!!!!!!!!!!!!!!!!!!!!!!!!!!!!!!!!! !!!!!!!!!!
مرام طالعتها بشمئزاز:أنتي أهني فكرتش في مستشفى المجانين ههههه.
ساره ظغطت على يد جواد:ويش تبغي؟؟ [كان باين على ساره التعب و الأرهاق]
مرام اتطالع اظافر ايدها بغرور:كنت ماره فقلت أشوف حبيبي الوسيم ..طالعت وجهه.. والكذاب.
وقفت عند وجهه وبكل وقاحه مسحت بأيدها على جرح كان ممدود على طول خده اليمين بس من جنب:كان يقصد بتشوه هذا الجرح!!! صدق كذاب.
ساره امعصبه:أنتي كيف تسمحي لنفسش؟!
مرام بستهزاء:هه زي مإنتي سامحه لنفسش تمسكي ايده.
ساره ارتبكت بس ظلت ماسكه ايده:أنتي ويش تبغي مو كافي الي سويتيه.
مرام بسخريه:أني!! ماسويت شي لحد الحين .
ساره بدت اتصيح:ويش سويت لش عشان تكرهيني جذي ؟؟
مرام بسخريه:ياربي قطعتي قلبي ..راحت عند الدريشه عطت ظهرها لساره.. ولا عمري كرهت انسانه زيش .. لفت لها .. في البدايه كنت ماأطيقش لأنش أخذتي شيماء مني .. أني بطبعي اذا حبيت شي لازم امتلكه بس حسيت أنش أخذتيها مني .. حطيتش في بالي قلت لازم أخليها تكرهش ..طالعتها.. تدري ويش سويت؟؟
ساره ادموعها اتطيح ماتدري ليش.
مرام اتكمل:اتفقت مع صاحبتي على خطه ونجحت .. شيماء صدقتنا و كرهتش حتى كانت بتنتقم منش بس جواد أقنعها أن هو الي ينتقم.
ساره طالعتها متفاجئه على طول خطرت على بالها الصوره ماتدري ليش.
ساره بنظرات ترجي و خوف:لا تقولي الصوره الي شفتها لها علاقه بالي قلتيه.
مرام حست أن ساره ماتعرف شي أخذت هالنقطه لصالحها غيرت رايها في الكلام الي كانت بتقوله:هيه جواد صورش عشان يهددش بصوره و يخليش تترجي شيماء تسامحش
ساره قاطعتها بصياحها:مستحيل جواد ايحبني
مرام نظراتها كلها شر:هذا جزء من خطته عشان توثقي فيه و اتحبيه .. واذا مو مصدفتني اسألي شيماء أسألي نفسش ليش جواد امصورنش.
ساره تشهق من كثر الصياح:ليش اتسوي لي جذي أني ماسويت لش شي.
مرام:الصافع ينسى بس المصفوع ماينسى.
ساره اتصيح:حرام عليش ولله حرام الي اتسويه.
مرام:قلت لش اسألي شيماء عشان تتأكدي.
ساره:أنتي كذابه جواد ايحبني لو ماكان ايحبني كان ماضحى بحياته عشان ينقذني.
مرام:يعني انتي السبب لو مات بتكوني انتي السبب
ساره حطت ايديها على أذنها:بس خلاص لاتقولي جذي لا تزيدي عذابي.
مرام:جواد اذا ماصحى من غيبوبته بتكوني انتي اسبب أنتي الي بدخلي الحزن لعائلته
ساره صرخت:بسش خلاص ماأتحمل .. طاحت على الأرض.

مرام ماكان في قلبها رحمه خاصه على ساره .. ماجابت خبر لها على طول طلعت.

التقت بأمل عند باب الغرفه .. أمل سمعت اصراخ ساره فراحت للغرفه بس اترددت تدخل و اتفاجئت لما شافت مرام.............
مرام بنظرات كلها أحتقار:مسكينه ماقدرت تتحمل شوفة حبيبها في هالحاله.
أمل ماردت عليها خافت على ساره .. دخلت الغرفه على طول.

شافت ساره طايحه .. حاولت اتصحيها بس ماصحت .. بخطوات سريعه نادت على الدكاتره .. أخذوا ساره ودوها غرفه فحصوها جطوا عليها مغذي.

أمل كانت اتصيح مو عارفه ويش اتسوي أو كيف تتصرف .. كانت ندمانه على أنها طاوعت ساره وجابتها .. فكرت في سلمان هو الوحيد الي بيقدر يتصرف ولازم اتقوله.

أخذت شنطة ساره طلعت منها الجوال .. دقت على سلمان وقلبها ايدق بقوه
أنتظرت
وانتظرت
وانتظرت
بس مارد عليها (الأخ غاطس في النوم).

مايئست دقت مره ثانيه و ثالثه و رابعه وفي الثامنه رد عليها.
سلمان بصوت كله نوم:الوو
أمل ساكته ماعرفت ويش اتقول.
سلمان نعسان حده:ولله ناس فاضيه الواحد حتى مايمديه يحلم بحبيبته اتخربوا عليه.
أمل أحمر وجهها استحت سدت الخط.

مامرت دقيقه الا واتصلت له مره ثانيه لأنها استوعبت ان فعلا مو هذا وقت قلبها واستحاءها و لازم اتقول لسلمان عن ساره.

ردت اتصلت بس مارد فاتصلت مره ثانيه....
سلمان:اوهووو وبعدين ولله نعسان.
أمل بتردد:الووه.
سلمان مانتبه لصوتها:اسمعي أنا واحد تعبان وابغى أنام اذا فاضيه اتصلي بعدين بعطيش رقم صديقي أنا ماعندي هالسوالف ..اتثاوب من كثر نعسه.. وله أقولش مايحتاج تتصلي بعدين روحي شاهدي سبيس تون اتراوالي ايحطوا فيها كراتينات عدله
أمل ماقدرت تمسك نفسها:هههههههههه.
سلمان مغمض عيونه بينام:تدري ظحكتش حلوه بس صدق أبغى أنام .. باي
أمل قبل لايسده:لحظه سلمان أني أمل.
سلمان:اي أمل؟؟ ..كأنه توه يستوعب عدل قعدته طالع شاشة جواله .. استغرب ليش أمل متصله؟؟؟؟
سلمان بخوف:ساره فيها شي؟؟
أمل اتحاول انها ماتخوفه أكثر:هي بخير الحين لا اتخاف تعال مستشفى ال****

سد الخط وعدة أسئله ادور في تفكيره ليش ساره في المستشفى؟؟ وليش أمل معاها؟؟ ومن الي وصلهم؟؟ ليش ماصحوه عشان هو ايوديهم؟؟

كل هالأسئله كانت اتدور في باله بس مالقى لها حل .. أخذ مفتاح سيارته طلع على طول.

............

أم حسن كانت تتصل لأمل خايفه عليها لأنها اتأخرت واجد .. أمل قالت لها أنها مع ساره في المستشفى وأنها بتتأخر أشوي.

بعد ربع ساعه سمعت دق على الباب قالت في نفسها هذا أكيد سلمان .. عدلت نفسها خلته يدخل.

أول مادخل على طول راح لساره:ويش قالولش عنها؟؟
أمل:قالوا ارهاق وأنها تحتاج لعنايه خاصه في الأكل لأنها ماتاكل.
سلمان:أنا أبغى أعرف ويش الي صار؟؟
أمل اترددت اتقوله لأن أكيد بيلومها كفايه أنها ندمانه أنها طاوعتها.
سلمان ايحاول مايعصب عليها:قوليلي ويش الي صار؟؟ ليش ساكته؟؟

أمل بعد سكوت و تفكير قالتله كل الي صار بس ماذكرت شي عن مرام لأنها أصلا ماتعرف ويش صار.

سلمان امعصب لحده:وأنتي كيف اطاوعيها ؟؟ عارفه أنها مرهقه و تعبانه مفروض ماأطلعيها من البيت.
أمل:أني كنت
سلمان قاطعها بصراخه:أنتي لو صدق اتخافي عليها كان ماجبتيها .. لو صار فيها شي أنتي اسبب .. ومره ثانيه لاتسوي شي على كيفش فاهمه.

(عاد أمل قتلوها ولا أحد ايصرخ عليها حتى لو كانت غلطانه .. هي صحيح مفروض ماطاوعتها وهي بعدها مريضه بس ماكانت تقدر اتشوف أحب صديقه لها وهي تترجاها و ماتقدر اطاوعها و بجد سلمان زودها)

أمل والدموع متجمعه في عيونها وبنبره عاليه:لا تصرخ علي ..بدت اتصيح.. ولله ساره غاليه علي ماقدرت أرفض طلبها أصلا ماخطر على بالي ايصير لها جذي .. صاحت.

سلمان ماعرف ويش ايسوي حتى أندم أنه صرخ عليها بس صدق كان امعصب.

أمل ماحبت تبقى اتصيح قدامه خاصه أنها ماتحب اتكون ضعيفه قدام أحد ومو أي أحد سلمان حبيبها.

أخذت نشاف مسحت ادموعها راحت عند ساره اتأملتها وكانت تتحاشى نظرات سلمان لها .. أخذت شنطتها كانت بتطلع بس
سلمان بهدوء:لحظه ..طالعها.. أنا أسف ماكنت أقصد الي قلته .. كنت امعصب و أنتي تعرفي مكانة ساره عندي .. ساره مو زي أي شخص هي بنسبه لي حياتي كلها ماأبغى إخسرها زي ماخسرت أهلي .. ابتسم ابتسامه باهته.. وحبيبتي.

أمل أرتبكت نزلت راسها و الدموع بعدها متجمعه في عيونها.

سلمان اتقرب لها:أدري مو هذا وقته ولا هذا المكان المناسب بس ولله أحبش أرجوش سامحيني.
أمل تتهرب من الي قاله خاصه أن قلبها اتحسه بيفضحها من كثر دقاته:أتأخرت لازم أروح ..

كانت بتمشي بس سلمان مسكها من أيدها .. طالعت أيده مستغربه من حركته.

سلمان ترك ايدها:أسف بس لي رجاء عندش قبل لا تروحي .. فكري بلي قلته بقلبش.

طالعته و راحت.

أتنهد من قلبه .. أخذ له كرسي قعد جنب ساره .. ولله ماتستاهلي الي اتعانيه.

وهي تمشي كانت اتفكر في كلامه .. ذكرت جملته الي عورت قلبها بجد {ماأبغى أخسرها مثل ماخسرت أهلي و حبيبتي}
عيونها دمعت .. بس أني بعدي أحبه الا أموت فيه .. اه.

رفعت راسها .. شافت شيماء هادي ام جواد داخلين المستشفى .. شيماء من شافتها على طول راحت لها.

شيماء:أمل!!! ليش انتي أهني؟! أحد فيه شي؟؟
أمل:ساره .. جت اتشوف جواد وأغمى عليها في غرفته .. ولحد الحين ماصحت.
شيماء:ودوها أي غرفه؟؟

قالت لها أمل عن الغرفه .. شيماء قالت لأم جواد و هادي أنها بتروح لساره .. أم جواد قررت أنها تروح لجواد أول بعدين تروح لساره.

.............

ا اه
هذي كانت صرخة ساره بعد ما صحت من الحلم الي حلمته.

سلمان راح لها على طول .. وهي رمت نفسها بحضنه صاحت.
ساره اتصيح:أبغى أمي سلمان أبغى أمي
سلمان ماعرف ويش يقول لها كيف يجيب لها أمها وهي ميته خلاص راحت.
ساره صياحها بدى يعلى:ماأبغى حنان ماأبغى منها شي بس ترجع .. صاحت صاحت على أمها.. أمها الي ماحسستها بوجودها ماحسستها بأنها البنت الوحيده عندها ولا عمرها كلفت نفسها تسألها عن حالها أو دراستها كان كل همها وليد وزوجها بس مع هذا كله ساره اتحبها.

سلمان قعد يهديها بس كيف يهديها وهو عارف شمعنى أن الواحد يفقد أمه وياريت بس أمها الا كل أهلها.

سمع دق على الباب
سلمان:لحظه بشوف من يدق الباب.
ساره مسكته:لا لاتتركني ولله خايفه .. صاحت
سلمان طلعها بحنيه رفع راسها:مابتركش بس بشوف من برى.
هزت راسها ودموعها تنزل على عيونها.
سلمان مسح ادموعها راح يشوف من برى.

شيماء:السلام عليكم.
سلمان حس براحه في أحد بيبقى مع ساره ليما يسأل الدكتور عن حالتها:وعليكم السلام .. تفضلي.

سلمان اتقدم قبلها:ساره أنا بروح و راجع بنت خالش جت بتقعد معاش.
ساره طالعت شيماء الي توها داخله صرخت:لا ماأبغاها لاتتركني بروحي معاها .. غطت وجهها بأياديها صاحت.

شيماء كانت اتطالع سلمان بأستغراب مستغربه ردة فعل ساره.

اتقدمت لها حظنتها .. ساره بدى صياحها يعلى في حظن شيماء .. شيماء أشرت لسلمان أنه ايروح بس سلمان كان متردد لأنه خايف على ساره.
سلمان:ساره أروح؟؟

بعد فترة صمت هزة راسها بأنه يروح ويتركهم بروحهم.

أول ماسكر الباب اتباعدت عنها وبكل هدوء:أني سويت لش شي ضايقش؟؟
شيماء مستغربه:طبعا لا
قبل ماتكمل قاطعتها ساره:عجل ليش سويتوا جذي؟؟ ليش شكيتوا في؟؟ مو كافي العذاب الي أني فيه .. صاحت.
شيماء حظنتها وهي مو فاهمه شي من الي قالته ساره.

أنتظرتها تهدء بس ماهدئت بالعكس اصياحها كل ماله و يعلى أكثر و أكثر.

شيماء:ساره أني مو فاهمه شي!!
ساره تتنفس بصعوبه من كثر ماصاحت:مرام
شيماء:!!!!!!!!!!!!!!!!!!!!!!!!!!!!!!!
ساره بنرة اصياح وهي تشهق:أني كنت في غرفة جواد .. جت مرام قالت لي الصوره الي في سيارة جواد الي هو كان ايبوس ايدي فيها قالت لي أنه صورني عشان ينتقم مني لش .. صاحت .. مو حرام عليش اني اعتبرش اختي الا امي ماولدتها امي ماجابت لي خوات ولا حبتني ..شهقت.. شيماء جيبي لي امي جيبي لي وليد

شيماء ضاعت منها الكلمات ماعرفت ويش اتقول بس أول شي خطر على بالها .. كيف اجيب اليش امش الله ايعينش بتعيشي من دونهم اني جواد وماني قادره اعيش من دونه اسم لله عليه انشاء ايقوم الينا بسلامه ..و الشي الثاني الي خطر على بالها هو كيف الصوره في سيارة جواد وهو دور عنها بس مالقاها.


بعد صمت وحيره من شيماء و اصياح من ساره قررت شيماء تقول لها عن كل شي.
بس كيف اتقول اليها وهي مي راضيه تسكت من صياح.


ساره اصياحها مدمج مع صراخها:ليش ليش ماأتأكدتوا من أول حرام تضلموني .. انزين ليش ماقلتوا لي؟؟ وليش الصوره بعدها عند جواد؟؟
شيماء:جواد كان خايف اذا عرفتي تحتقريه أو تكرهيه .. والصوره كان امضيعنها.
ساره اتصرخ:جواد في غيبوبه من الصوره مني أني لو قلتوا لي ..صاحت.. أبغى أموت ماأبغى أعيش ..طالعت المغذي الي في ايدها و بكل عصبيه حاولت اتشيله.. هذا ماأبغاه ماأبغى شي أبغى أموت .. قعدت اتصرخ و أتصرخ .. شيماء نادت على الدكاتره .. أول شي ماعرفوا لها لأنها كانت اتصرخ و اتقاومهم بس بعدين عطوها مهدئ نامت.

أم جواد بعد ماشافت جواد راحت غرفة ساره .. شافت شيماء ومعاها سلمان الي توه جاي وكانوا يتكلموا مع الدكتور .. لاحظت تغير وجه سلمان بعد ماسمع الكلام الي قاله الدكتور فراحت لهم.
أم جواد:السلام عليكم.
شيماء سلمان:وعليكم السلام.

سلمان حده رد عليها دخل الغرفه على طول.

أم جواد:شيماء ويش قال لكم الدكتور؟؟
شيماء:أنهيار عصبي.
أم جواد:ليش؟!!!!!!!!!!!!!!!!!!!!!!!!!!!!!!!وعلى قلبي مسكينه ماتستاهل حرام ويش حالها الحين؟؟
شيماء: عطوها مهدئ نايمه
أم جواد تركتها دخلت الغرفه.



#بيت أبو جواد#

دانه ماراحت معاهم لأن أبو جواد كان تعبان وهي ظلت معاه.

أبو جواد نام وهي حست بالملل حتى الكمبيوتر مالها خلق له .. طلعت من غرفتها راحت الصاله شغلت التلفزيون بس مالقت شي تشاهده أصلا ماكان لها نفس اتشاهد شي .. طفت التلفزيون .. كانت بتعود غرفتها بس غيرت اتجاهها راحت غرفة جواد.

دخلت الغرفه أتأملت كل أنحائها مو ناقص الغرفه غير صاحبها .. حست بدمعه اتخونها اتطيح على خدها .. طالعت كل أشيائه و الاغراض سريره كمدينته عطوراته الجلي حقه كان حاط له جلي قبل الحادث هالشي خلاها اتصيح.

مسحت ادموعها راحت قعدت على كرسي البيانو .. طالعته بدت ادموعها اتطيح مره ثانيه .. ولله أشتقت لعزفك و صوتك ولك الله ايقومك بالسلامه .. صاحت.


الشي الي خلاها تسكت هو صوت نغمة جوالها.

دانه بصوت مبحوح:الووه
دلع<<قيس خاف عليها من نبرة صوتها:دانه فيش شي؟؟
دانه انفجرت:ولله مو قادره أتحمل ولله وحشني وجوده في البيت وحشني كل شي فيه.
دلع<<قيس:دانه صار شي جديد؟؟
دانه:لا.
دلع<<قيس:خلاص أنتي ادعي له وانشالله بيقوم بالسلامه واذا واحشنش لهدرجه روحي له المستشفى.
دانه:ماأدري أحس نفسي مخنوقه.
دلع<<قيس:اممم ويش رايش ادردش معاش اشوي عشان تظحكي.
دانه:لاوالله مالي خلق شي.
دلع<<قيس:لامالي دخل اني مايهون علي اتركش وانتي ضايق خلقش.
دانه ارتاحت أشوي:مادري والله حتى ابوي تعبان ومالي خلق شي.
دلع<<قيس:سلامته مايشوف شر انشاء الله .
دانه:انشاء يارب يسمع منش.

بعد سكوت دام عدة ثواني

دلع<<قيس ببتسامه:ويش حال قيوسش؟؟
دانه:ههههههه قيوسي مره وحده قولي قيسي.
دلع<<قيس:تسلملي هالظحكه انشاءالله دوم مو يوم وعمركله.
دانه:يوووه ظحكت واليش يارب.
دلع<<قيس:قلت لش بظحكش.

دانه طلعت من غرفة جواد راحت غرفتها.



#بيت أبو حسن#

من أول ماوصلت وهي على حالها راميه نفسها على السرير اتصيح.
مشكلتها أنها مو عارفه لنفسها هي اتحبه و اتموت فيه بس في شي في عقلها مو متقبلتنه بس مو عارفه شو هو و هذا الشي الي يخليها تكره حتى نفسها.
حاولت اتفكر بقلبها مثل ماقال لها سلمان بس لقت نفسها تذكر كل موقف صار لها معاه من أول يوم شافته فيه في الكرنيش الى اليوم حتى موقف الكف ذكرته ولم جت بتطيح يوم فتح الباب ومسكها ويوم كان بيعطيها علبة ناشف صارت اصابعها على اصابعه ولما كانت في بيت جدة ساره مارضت حوراء اتروح اتجيب ماي قامت امل راحت المطبخ شافت سلمان وقال لها ((وحشتيني)) يوم ابوها يمرض وسلمان يساعدهم ذكرت رسالته لي رسالها بالبلوتوث يعتذر اليها .. راحت فتحت الرساله قعدت تقرها ( انا اسف سامحيني ماكان قصدي s‏ ‏) تذكرت اشباقهم وقعدت بس تستعيد ذكرياتها

(خلنا نبتعد عن جو الحزن و الكأبه انروح للعرسان)


كانوا عايشين حياتهم لحظه بلحظه .. مافكروا بشي غير سعادتهم خاصه في هالوقت شهر العسلهم.
كل يوم يطلعوا مع بعض صحيح أنهم يرجعوا هلكانين بس يقضوا أوقات حلوه و ماتنسى.

كانوا يتمشوا على البحر............

راشد:حبيبتي ويش رايش نسبح في البحر؟؟
فاطمه:راشد أنت اتخبلت.
راشد:مو قصدي نسبح بمعنى نسبح.
فاطمه:عجل شو؟؟
راشد:أقصد ..مسك ايدها.. تعالي معاي.
فاطمه:لحظه راشد أني مو فاهمه شي.
راشد:مو أنا أحبش
فاطمه:ام
راشد:وأنتي أتحبيني
فاطمه:ام واجد واثق بعمرك.
راشد:ليش مو من حقي؟؟
فاطمه:راشد قول ويش تبغى؟؟
راشد مسكها:تعالي.


راحت معاه لين وقفوا عند البحر يعني رجايلهم في الماي.

راشد رش عليها شوية ماي بيده.
فاطمه:هههه راشد تبغاني اتبلبل.
راشد:عادي مابيقولوا شي هذيل عادي عندهم كل شي.
فاطمه:حتى لو عادي أني ماأبغى اتبلبل .. ابتسمت .. بس أنت عادي .. رشت عليه الماي .. ههههههه.
راشد:ههههههههههه.



أمل حوراء عرفوا أن ساره في المستشفى .. أمل ماكانت تدري أنهم بيرقدوها ولما عرفت أنها مرقده قالت لحوراء راحوا مع بعض مع قيس لأنه يبغى يزور جواد.

حوراء أمل:السلام عليكم.
ساره كانت شبه منسدحه:وعليكم السلام.
حوراء:ها الحلوه ويش أخبارها اليوم؟؟
أمل:أنشالله بخير.
ساره اتنهدت:بخير لأني شفتكم.
أمل اتقدمت لها:ساره أسفه ماكنت أتوقع أن مرام بتكون
ساره قاطعتها:أمل أرجوش لاتجيبي طاريها .. أني الي طلبت منش اتجيبني مايحتاج تتأسفي.

فترة صمت.

حوراء [كعادتها تبغى تلطف الجو]:ويه حر كيف تقدري تصبري.
ساره:أعتقد الجو بارد واذا حرانه محد جبرش تقعدي.

حوراء انصدمت وأمل نفس الشي.

ساره اتصيح:ولله أتعبت اتعبت .. صاحت.
حوراء كانت الأسرع لها أخذتها في حضنها .. أمل قعدت بجنبهم.

حوراء و أمل بطبعهم بسرعه يتأثروا فعلى طول صاحوا معاها.

ساره اتصيح:خلاص مابغى أعيش كل الا احبهم ايروحوا .. ابوي يوم اني صغيره يشتري كل شي احبه كان عندي بادنيا وبعدين تركني راح .. جدتي الا كانت حضن دافي لي حنان الي انحرمنت منه راحت الا تهتم في اذا كنت تعبانه اتحس اني تعبانه اتسوي لي اي شي احبه راحت راحت الغاليه .. امي الا هي امي ماحبتني بس اني حبيتها ماتسال عني عادي لاتسال بس ترجع .. طالعت امل .. وليد قولي له يرجع بلعب معاه باشاهد معاه سبيس ستون طالعت حوراء .. قولي اني في حلم و بيرجعو .. شهقت .. فقدت كل شي مابغى اعيش لحظة فقدان جواد.
حوراء بنبرة صياح مسحت على شعرها:خلاص ساره لاتسوي في روحش جذي خلاص ادعي اليهم برحمه هذي مو اخر الدنيا احنا كلنا انحبش اني واملوه وسلمان كلنا ماراح نتخلها عنش الدنيا ماتوقفت الى اهني وبس انتي لازم تكملي حياتش وتعيشيها.
امل:اي والله انتي لازم تكملي حياتش ترجعي ساره الا نعرفها
ساره :كيف ارجع اني السبب في الا صار لجواد امل تعرفي يعني شو انش تفقدي اهلش كلهم في لمح البصريعني تقعدي ماتشوفيهم ويش بيكون شعورش؟؟
امل حزنت على حال صديقتها راحت اليها مسكت ايدها قعدت اتواسيها.
أمل:ساره أحنا معاش و جواد انشالله بيقوم بالسلامه.
حوراء:ودموعش ولله غاليه علينا تكفي ماأبغى أشوف ادموعش مره ثانيه.

ساره اكتفت بأنها تهز راسها و خلاص.......
--------------------------------------------------------------------------------

في جهه ثانيه من المستشفى وفي غرفة جواد بالتحديد كان قيس قاعد بجنب جواد.

قيس(سامحني جواد .. ولله هالشي مو بيدي ماأقدر يمر يوم من دون ماأسمع صوتها أسولف معاها .. اه أدري أني غلطان بس ويش أسوي أنا أحبها أبغاها اتكون لي زوجه ولا أقدر ماأكلمها)

قيس صار يعتبر جواد صديقه مو هاين عليه أنه يخون صديقه .. هو صار له أيام ايفكر في هالشي و كل ماكلم دانه يحس بذنب بس مايقدر يمنع نفسه.

ياترى بيقدر يصبر و يمنع نفسه؟؟؟؟
خلنا انشوف.

طلع برى الغرفه .. أتصل لحوراء......
قيس:هلا.
حوراء:أهلين.
قيس:يلا أنا بطلع.
حوراء:لا مو الحين خلنا أشوي.
قيس:لا وراي مشاوير بسرعه اطلعوا.
حوراء:انزين باي.
قيس:باي.

حط جواله في مخباه .. لف لوراه عشان يمشي بس وقف .. دقات قلبه اتزيد .. هو يدري أنها بتجي لجواد اليوم بس ماتوقع أنها بتجي في هالوقت.

بالنسبه لدانه فكانت متفاجئه لأنها أصلا ماتوقعت اتشوفه.

دانه كانت جايه مع أمها و أبوها [بعدين بتعرفوا ليش شيماء ماجت معهم].

أم جواد على طول دخلت الغرفه أما أبو جواد راح لقيس .. أما دانه كانت واقفه مثل ماهي .. هي تبغى تدخل أتشوف جواد بس شوقها لقيس ماخلاها تدخل.

أنتبهت على نظرات قيس الي من جنب .. حست برجفه تسري في جسمه .. دخلت الغرفه على طول.



سلمان كان عارف أن أمل و حوراء بيروحوا لساره فاتصل على صديقه وائل عشان يجي ياخذه لأنه ماله نفس ايسوق ..........

وائل:وين تبغى اتروح؟؟
سلمان بضيق:اي مكان مو مهم لو أنشالله بنبقى في السياره عادي.
وائل:خلاص انروح مطعم و على حسابي بعد.
سلمان:حدك فاضي.
وائل:ياخي ماتشوف شكلك كيف صار.
سلمان أتنهد.
وائل:أذا أنت جذي هذا بنت أخوك كيف؟؟
سلمان:أنا مو هامني غيرها.
وائل:الله يعينها .. ببتسامه .. أي مطعم تبغى؟؟
سلمان مامداه يتكلم على طول اتكلم وائل.
وائل:بس مايكون غالي.
سلمان:بخيييل ماأبغى عزيمتك.
وائل:ههههههههههه.





شيماء كانت مع هادي في البحر.

( هادي كان حاسس أنه مخنوق فتصل على شيماء قال لها أنه بيطلع معاها من جذي ماراحت شيماء معاهم ).

كانوا قاعدين في جهه فاضيه تقريبا عشان شيماء تاخذ راحتها تفتح وجهها........

هادي:أحس نفسي مخنوق.
شيماء:وأني أكثر.
هادي طالعها ظحك بستخفاف:هه جبتش عشان تساعديني طلعتي حتى أنتي محتاجه أحد يساعدش.
شيماء مسكت ايده:ولله ماأقدر أشوفك بهالحاله بس
هادي قاطعها طالع ايدها:يكفيني هذا.
شيماء استحت كانت بتشيل ايدها بس هادي مسكها بقوه.
هادي:أحبش.
شيماء:أموت فيك.
ابتسم لها طالع البحر.

بعد فترة صمت كانوا يتأملوا فيها البحر.

شيماء:بتروح لجواد بكره؟؟
هادي:هيه.
شيماء:في أحد بيروح معاك؟؟
هادي:لؤي صديقه .. هو سافر في نفس يوم الحادث وتوه راجع اليوم ماكان يدري.
شيماء:أها.
هادي:حبيبتي قومي نتمشى.
شيماء ببتسامه حابه اتخفف عنه:يلا.
هادي فهمها بادلها الأبتسامه مشوا...



#في ألمانيا#

كانوا قاعدين في غرفتهم في الفندق......

راشد:حبيبتي قومي البسي بنطلع.
فاطمه:وين؟؟
راشد:أنتي وين نفسش اتروحي؟؟
فاطمه:أي مكان أنت اتكون معاي فيه.
راشد ابتسم:عجل يلا.
فاطمه بدلع:بلبس وبرجع لك.

لبست خلصت كانوا بيطلعوا بس قبل مايطلعوا رن جوال فاطمه.....
فاطمه ببتسامه:هلا.
حوراء بنبره عاليه عشان تسمعها:أهلين وحشتيني خيوه .. ويش حالش؟؟ شخبارش؟؟ ويش امسويه؟؟ ويش حال عريس الهنا؟؟ ويش
فاطمه قاطعتها:هههههه لحظه لحظه كيف بجاوب عليهم كلهم.
حوراء:مو مهم وحشتيني ولله وحشتيني.
فاطمه:لو وحشتش كان اتصلتي من زمان.
حوراء ارتبكت:الا تعالي وين انتوا الحين؟؟
فاطمه:في الغرفه كانا بنطلع.
حوراء لقتها فرصه:يوووه عطلتكم عجل يلا مع السلام سلمي على راشد.

فاطمه استغربت ردت فعل حوراء خافت لايكون صاير شي.

راشد:ويش فيش؟؟
فاطمه:مادري أحس حوراء خاشه عني شي.
راشد:ماعليش لو صاير شي كان ماتكلمت معاش بهالهجه اذا أنا سمعتها من نبرت صوتها العاليه.
فاطمه:ههههههههههه.
راشد:هيه جذي ابغاش ..مسك ايدها.. يلا مشينا.

حوراء ماكانت تبغى فاطمه تعرف بالصار لساره عشان لا تتكدر في شهر عسلهاوهي بعد توه عروس بعدهي ماطلع من الاربعين وماحبت تخلعها.

طلعت من غرفتها راحت الصاله .. قعدت اتشاهد بس حست بالملل طالعت التلفون الي بجنبها .. رفعته اتصلت لعقيله.

قعدوا يسولفوا كانت معظم سوالفهم عن ساره و حالتها.
عقيله:يعني هي في المستشفى الحين؟؟
حوراء:هيه.
عقيله:تدري أحس أني أبغى أزورها خاصه بعد الي قلتيه.
حوراء فرحت:هيه عشان اتحس أن صدق أحنا انحبها .. أني و أمل بنروح بكره روحي معانا.
عقيله:خلاص باشوف.

.......

و من الساعه ثمان الصبح كانوا في المستشفى مع ساره بس بدون أمل لأن أمها قالت لها أنها محتاجتنها في هالوقت واذا تبغى اتروح لساره اتروح لها العصر.

قعدوا معاها نص ساعه طلعوا عشان ترتاح.

لما قربوا يطلعوا من المستشفى وقفت عقيله.
حوراء:ليش واقفه؟؟
عقيله اتطالع جهه بأهتمام:طالعي هناك .. أول مره أشوف رجال ايصيح.
حوراء:وين؟؟
عقيله:قدامش على طول.
حوراء طالعت:يوء الي معاه هادي خطيب شيماء.
عقيله:هيه صحيح هذا هو بس ليش الي واقف معاه ايصيح .. شكله يكسر الخاطر.
حوراء:انزين أمشي لمتى بنظل واقفين؟؟

عقيله مشت بس كان قلبها معورنها عليه لأن أكيد صاير شي كبير خلاه ايصيح قدام الناس.

طول الطريق كان تفكيرها فهالشاب الي كان يصيح.
حوراء:عقيله اتفكري في شو؟؟ مو من عادتش تسكتي.
عقيله:عادي بس أفكر ليش كان ايصيح.
حوراء طلعت جوالها:الحين بنعرف.
عقيله:يامجنونه ويش بتسوي؟؟

حوراء:هلا .. كيف الحال .. تعالي شيماء بسألش هادي راح المستشفى اليوم؟؟ .. اوكيه تعرفي من الي راح معاه .. اها .. اوكيه باي .. بعدين أقولش يلا باي.

عقيله:يلا قولي من هو؟؟
حوراء:الظاهر أنه صديق جواد لؤي يمكن كان ايصيح على حال صديقه.
عقيله:أها.. تدري شفته من قبل بس وين ماأذكر.



#بيت ابو جواد#

كانت قاعده في غرفتها اتفكر و بأيدها الصوره .. كيف جواد ماشاف الصوره وهي في السياره؟؟

[شيماء بعد ماعرفت من ساره الي صار قالت لهادي يشوف سيارة جواد اذا كانت الصوره فيها أو لا .. وفعلا شاف الصوره عطاها شيماء]

بعد تفكير وصلت لنتيجه حست أن في أنه في الي صار .. هادي شاف الصوره قبل بيوم من تنظيف تينا لسياره و جواد ايقول أن محد ركب السياره غير الأهل و لما سأل تينا ارتبكت .. ويش سر هالأرتباك؟؟
لازم أعرف أكيد هي ورى فقدان الصوره.

طلعت من غرفتها.
شيماء:تينا تينا تينا.

جت لها تينا:نئم >> نعم.
شيماء بنبره عاليه:ليش ماجيتي بسرعه؟؟
تينا:أنا في اسوي
شيماء قاطعتها:دخلي الغرفه.

دخلوا الغرفه...

شيماء ماسكه الصوره بأيدها:شفتي هالصوره من قبل؟؟
تينا ارتبكت:لا مايسوف >> ماشفتها.
شيماء بذكاء:كذابه أني شفتش لما .. سوت حركه بمعنى أنها تعرف الا صار.
تينا قريب اتصيح:أنا مايكصد أخدتها رجعت >> ماكنت أقصد أخذتها بعدين رجعتها.
شيماء عصبت:ليش أخذتيها أصلا غبيه أطلعي برى لا أرتكب فيش جريمه.
تينا طلعت بسرعه.




*بعد شهرين*

الأحوال ظلت مثل ماهي بس الجديد أن ساره صارت اتزور جواد كل أسبوع بس من دون ماحد يدري .. فاطمه و راشد رجعوا البلد طبعا فاطمه عرفت بالا صار لساره راحت لها .. أما عن جواد فحالته مثل ماهي ماتغيرت.
قيس قدر يتحكم على نفسه في أنه مايكلم دانه بس كان ايسولف معاها اذا دخلت الماسنجر.


#بيت ابو قيس#

حوراء كانت مع رائد........
حوراء:قلت لك ماأبغى أروح.
رائد:ليش ؟؟ مابيصير شي لو رحتي؟؟
حوراء:ومابيصير شي لو مارحت.
رائد:الا بيقولوا خطيبتي ما اتوجب.
حوراء:اوففف تبغى الصراحه جنان ماأطيقها كيف تبغاني اروح لها .. أني تعبانه مالي خلق اروح حفلات وغير جذي باروح لساره.
رائد:أنتي ليش ماتطيقيها؟؟
حوراء:مايحتاج أقول أنت عارف ليش؟؟
رائد:دام أنها انخطبت يعني شالتني من بالها.
حوراء:بالها مو قلبها.
رائد:يعني مابتروحي؟؟
حوراء:لا.
رائد:أخر كلام.
حوراء:هيه.
رائد(ماعليه بخليش اتغاري عدل).

قعد معاها ربع ساعه طلع.

راحت غرفتها شافت جوالها فيه مكالمتين من عند عقيله فتصلت لها .

حوراء:الو هلا.
عقيله:الو أهلين كيفك؟؟
حوراء:زينه الحمدلله و أنتي.
عقيله:أني بعد زينه .. ويش صار مع رائد بتروحي حفلة جنان؟؟
حوراء:طبعا لا كني فاضيه لها.
عقيله:هههه حرام روحي لها.
حوراء:مالت عليها غيري الموضوع.
عقيله:خلاص بغيره .. اتخيلي حوروه ويش صار لي ويلي أحترق وجهي.
حوراء تتمسخر:ويلي عسى ماتوشهتي؟؟
عقيله:مالت عليش حتى مالت عليش أقصد استحيت.
حوراء:هههههه أدري بس انكت.
عقيله:خلاص مابقولش.
حوراء:أمزح معاش يلا قولي.
عقيله:عرفت وين شفت لؤي من قبل.
حوراء:اي لؤي؟؟
عقيله:لؤي صديق جواد الي شفناه في المستشفى.
حوراء:اها ذكرته .. وين شفتيه؟؟
عقيله:أسمعي كنت رايحه محل "شهد فون" الي بجنب بيتنا عشان ذاكره لجوالي.

عقيله:لو سمحت أبغى memory card.
الرجال:كم حجمها؟؟
عقيله:100 كيلوبايت.
الرجال:لحظه .. عطاها اياها.
عقيله:بكم؟؟
الرجال:لعيونش ياحلوه بخمسين ريال.
عقيله(متزوج و عنده ولد قاعد يغازل) بعصبيه:خلصني بكم؟؟
الرجال:حلوه لما اتعصبي.
عقيله بصوت عالي:أحترم نفسك أحسن لك قليل أدب

في هالحظه دخل لؤي.
لؤي:السلام عليكم.
الرجال عدل وضعيته:وعليكم السلام.

عقيله ظلت مكانها متفاجئه ماتوقعت تشوفه مره ثانيه غير جذي ذكرت وين شافته من قبل الا هو طلع راعي المحل.

لؤي:اي خدمه أختي؟؟
عقيله مستحيه بصوت واطي حده:بغيت أسأل بكم memory card.
لؤي:ههههههه ماسمعت شي وين راح صوتش الي سمعته من برى.

أهني عقيله صدق احترق وجهها مثل ماقالت لدرجة أنها طلعت من المحل بسرعه.

حوراء:يوه بعدين ويش صار؟؟
عقيله:ماصار شي طرشت أخوي علي يشتري لي.
حوراء:هههه بسألش كيف أحلى لما كان ايصيح و لا يضحك؟؟
عقيله فهمت قصدها:مالت عليش فهمتيني غلط.

غيروا السالفه.



#بيت سلمان#

أمل وصلت قبل حوراء قعدت تسولف مع ساره.

أمل:ساره أنتي اضعفتي واجد.
ساره: ساكته
أمل:حتى وجهش مصفر.
ساره(معقول ايبين علي):يمكن من الأرهاق.
أمل مسكتها:ارجوش لاترهقي نفسش.
ساره ابتسمت بستهزاء:انشالله.

سمعوا صوت الجرس كانت حوراء الي جايه.

قعدوا ايسولفوا لين قطع عليهم اتصال رائد.

حوراء:هلا.
رائد:أهلين وين انتي؟؟
حوراء:بيت صديقتي.
رائد:راحت عليش الحفله اتهبل.
حوراء:مامداها اتخلص.
رائد:لا أنا طلعت من وقت لأن صار لي موقف.
حوراء بأهتمام:ويش صار؟؟
رائد:شفت جنان بالغلط << بس يبغى ايحرها.
حوراء بدت اتهز واتغيرت ملامحها:هيه و كيف بالغلط؟؟
رائد:كانت توها جايه من الكوافير و شفتها.
حوراء صارت نيران:يعني بالمكياج؟؟
رائد حاب يرفع ظغطها أكثر:بصراحه ماتوقعتها جذي صارت أحلى خساره راحت علي.
حوراء:باي.
رائد انصدم:وشو باي أنا المتصل.
حوراء مفوله:عجل سد الخط أحسن لك.
رائد:مابسده.
حوراء بعدها مفوله:رائد بتسده بكرامتك لو اسده أني.
رائد عصب:باي.

حوراء من كثر ماكانت امعصبه رمت الجوال ضرب في الجدار اتكسر.

ساره و أمل على طول راحوا لها ايهدوها.

حوراء قريب اتصيح بس بعدها امعصبه:هالغبي هذا كلام يقوله لخطيبته هالي مايستحي ..قلدته.. شفت جنان بالغلط ماكنت اتوقع أنها حلوه خساره راحت علي .. هالغنمه ويش امفكرني هذا ماعندي أحساس.
ساره:انزين هدي يمكن يمزح.
حوراء:اي يمزح اي بطيخ هذا مزح.
ساره:حوراء أني اغلط لما ظلمت جواد على الصوره و النتيجه جواد بعده في غيبوبته .. و سلمان غلط لما ظلم أمل و النتيجه أنهم لحد الحين ماتصالحوا تبغي اتكوني مثلنا؟؟

أمل نزلت راسها.

حوراء:وضعي يختلف .. راحت اتشوف جوالها .. الغلاف اتكسر و الشاشه الي داخل انكسرت .. أخذت شريحتها.
امل:حطيتي حرتش في الجوال.
حوراء:أحسن لأنه من عنده .. ساره وين التلفون.
ساره:على الكمدينه.

حوراء اتصلت لقيس عشان ايجي ياخذها.

ساره:انتظري لا تروحي وانتي جذي.
أمل بجديه:فكري بالا قالته ساره.
حوراء لبست عباتها:بحاول.

جى قيس راحت على طول .. أول مادخلت البيت على طول راحت غرفتها قعدت اتصيح و اتصيح و اتصيح.

رائد بعد ماهدى اتصل لها بس طبعا طلع عنده مقفل .. خاف عليها لأنها مستحيل اتقفل جوالها حتى لو كانت زعلانه .. أتصل لقيس و اطمن أنها رجعت البيت بأمان.

*في الصباح*

صحت حست براسها ايعورها غير أن شكلها جاها زكام لأنها نامت بدموعها و المكيف على وجهها.

حست بالعطش نزلت تحت تشرب ماي كانت حدها نعسانه .. شافت كاس فوق البراد على طول صبت لها ماي فيه شربته بسرعه حست أن الماي فيه شي حست بدوار على طول.

جت ام قيس:صباح الخير.
حوراء راسها ايعورها بالقوه بالأظافه لبطنها:الماي ويش فيه.
أم قيس صرخت:شربتي من هالكاس؟؟
حوراء:هيه!!
ام قيس صرخت:ياغبيه فيه كلوركس .. روحي البسي عباتش بنوديش المستشفى.

راحت تتصل لأبو قيس وهي خايفه على بنتها
#بيت ابو جواد#

رن تلفون البيت شيماء هي الا ردت لأنها شافت الرقم.
شيماء:هلا.
هادي فرحان:هلا بقلبي و حياتي أحبش شيوم.
شيماء فرحت لأنه فرحان:هههه ليش فرحان؟؟
هادي:بعطيش خبر بمليون ريال بس أنا ماأبغى مليون أبغى بوسه.
شيماء:حمستني قول.
هادي بفرح:جواد صحى.




شو تتوقعوا راح يصير؟؟
شو راح يصير في حوراء؟؟
هل بيقدر قيس يصبر أكثر من جذي عن مكالمة دانه؟؟
هل بتصير علاقه بين عقيله و لؤي؟؟
كيف بيكون لقاء جواد مع ساره؟؟


.

الجزء الثاني و العشرون:


هادي:بعطيش خبر بمليون ريال بس أنا ماأبغى مليون أبغى بوسه.
شيماء:حمستني قول.
هادي بفرح:جواد صحى.
شيماء صرخت من الفرحه:أماه
هادي:هاي وين رايحه لحظه تعالي.
شيماء من فرحتها كانت بتترك السماعه اتروح اتقول لأمها:باروح أقول لأمي.
هادي:هههههه الحين بيجي ابوش ياخذكم أجهزوا.
شيماء تتكلم بسرعه:انزين باروح أقول لأمي يلا باي.
هادي:ههههههه باي.

راحت لأمها........

شيماء:أماه جواد جواد صحى.
أم جواد أول شي ماصدقت ظلت فتره ليما استوعبت و امتلت عيونها بدموع الفرح:كللللووووويش أفضل الصلاة و السلام عليك ياحبيب الله محمد كللللووووويش الحمدلله أحمدك يارب الهم صلي على محمد و ال محمد.

دانه سمعت صوتها على طول راحت لهم اتشوف ويش صاير.

دانه فرحانه لفرح أمها مستغربه:ويش صاير؟؟
أم جواد:جواد.
دانه فهمت على طول:لولولولولولويش.
شيماء:الحين بيجي ابوي ياخذنا.
دانه راحت غرفتها بسرعه:ياي باشوف جوادوه قاعد .. راحت غرفتها تجهز.
شيماء نفس الشي راحت غرفتها.
أم جواد صلت قرت قرأن.

بعد نص ساعه جى لهم ابو جواد .. راحوا معاه المستشفى كلهم فرحانين ينتظروا اللحظه الي يشوفوا فيها جواد.





مل من مكتبه و من كثر تفكيره في حوراء بعده خايف عليها لأن جوالها مقفل.
أخر شي قرر أنه يروح لقيس يسأله عنها.

رائد:السلام عليكم.
قيس:وعليكم السلام.
رائد قعد على الكرسي الي قدام قيس:خلصت شغلي.
قيس منشغل بالأوراق الي عنده:وأنا ويش أسوي لك؟؟
رائد:سولف معاي.
قيس:ولله أنك فاضي.
رائد:هيه فاضي و أبغاك اتكلم حوراء ويش سالفتها ليش قافله جوالها.
قيس:اففف منك ماتشوفني مشغول.
رائد:ياخي أبغى أطمن عليها.
قيس:هذوه تلفون أتصل انت اطمن.
رائد:مامنك فايده .. أتصل على البيت بس ماحد رد عليه فتصل مره ثانيه و محد رد عليه.
رائد:محد ايرد.
قيس:لا أكيد أمي قاعده .. رد اتصل.
رائد:نفس الشي ماحد ايرد.

قيس أخذ جواله أتصل على جوال أمه......
قيس:الوو أماه وينش ليش ماتردوا على البيت؟؟ .. ويش .. هالغبيه كيف ماأنتبهت .. يعني ماشمته .. اي زكام اي بطيخ .. خلاص الحين جاي في اي مستشفى انتوا؟؟ .. انزين مع السلامه.

رائد:طمني من في المستشفى؟؟
قيس:يعني من حوروه.
رائد خاف عليها:ويش فيها؟؟
قيس:تعال معاي و أقولك في السياره.

راحوا مع بعض......




وصلوا المستشفى وكل وحده تسابق الثانيه...
أبو جواد:هايه لحظه وين رايحين غيروا غرفته؟؟
أم جواد:يوووه ليش ماقلت من أول.
أبو جواد:انتوا أسرع مني مامداني أقولكم.
شيماء:وين غرفته بسرعه أبغى أشوفه؟؟
أبوجواد:أمشوا وراي.
دانه:أبوي أنت بطيئ قول كم رقم غرفته وأحنا انروح.
أبو جواد:هههههههههه.

وصلوا عند غرفته دخلوا..
على طول هادي راح لهم..
هادي بحركه بصبعه:اششش نام لاتزعجوه.
دانه بصوت عالي أشوي:نعم نعم وشو اينام ماكفاه نوم شهرين و نص.
شيماء:يعني مايدري أن أحنا بنجي له.
أم جواد:ماعليك منهم أهم شي لما قعد أكل شي؟؟ قال شي؟؟ ويش حاله؟؟ ويش قالوا عنه الدكاتره؟؟ ويش
جواد:ههههههه كل هالأسئله بيجاوب عليها هادي ما

ماكمل جملته الا ثلاثهم نطوا عليه.

جواد:اي اي اي لحظه لحظه أيدي.
أبو جواد:اشوي اشوي عليه لا تنسوا ايده.
أم جواد اتصيح من فرحتها:حمدلله على سلامتك ياولدي ولله البيت من دونك مو حليو.
شيماء دمعت عيونها:أشتقنا لك مالت عليك و أنت قاعد أتقول أيدي.
دانه حالها من حال أمها و شيماء:هيه جوادوه ولله أشتقنا لك.
جواد:هههههه ياحظي ثلاث مره وحده.
الكل:هههههههههههههه.
هادي:طيب أنا أستأذن.
جواد:وين وين رايح؟؟
هادي:لا برجع بعدين .. بخليهم على راحتهم << كان يقصد دانه.
هادي:اوكيه أشوفكم على خير.
الكل:مع السلامه .. طلع

دانه على طول فسخت عباتها:صحيح ويش حال ارجولك؟؟
جواد:ماأدري قالو لي ماأمشي عليها واجد عشان العمليه.
أم جواد:شهرين و نص ماحركتها مفروض تشفى.
جواد:بل غيبوبتي شهرين و نص .. راح علي المسلسل.
دانه شيماء:ههههههههههه.
أم جواد:بدل هالخرابيط الي اتقولها قوم صلي.
جواد:صليت .. أصلا أنا صحيت من الفجر بس أتصلوا لهادي لأنه أول رقم عندهم و هادي ماخبركم الا لما شبع مني.
أم جواد:محد يشبع منك الله ايخليك لي ويش تبغى اطبخ لك اليوم أدري أكلهم مو حلو.
دانه:أقول شكلش نسيتي أن عندش بنات ثنتين الله ايخلينا .. طالعت شيماء.
شيماء:خلاص أني بسوي حادث عشان اتدلليني جذي.
أم جواد:ويه اسم لله عليش.
جواد:انطموا ثنتينكم أنا البكر و ولدها الوحيد أكيد بدللني.
دانه:مالت عليك.
جواد:ايقول هادي خلصتوا ادموعكم كلها علي.
شيماء:ولله ادموعي غاليه مفروض تفرح لو اطيح دمعه وحده عليك.
جواد:ماتقدري ماتصيحي علي.
دانه:ولله شايف عمرك.
جواد:مريض و من حقي.
أم جواد:ماتحس بألم في راسك مكان العمليه؟؟
جواد اتحسس الشاش الي في راسه:ماأدري أحس بألم بس أقاومه.
أم جواد:اذا تعبان ارتاح.
جواد:مو تعبان.
شيماء:جواد اذا تعبان
جواد قاطعها:قلت لكم مو تعبان .. بس عطشان.
شيماء جابت له ماي.

شرب الماي الا بدخلة ابو جواد.....
أبو جواد:يلا مابتروحوا؟؟
جواد:ليش مامداكم.
أبو جواد:أنت تعبان و لازم ترتاح.
جواد:بمل بروحي.
شيماء:بجي لك مع هادي العصر.
دانه:وأني؟؟
شيماء بشكل مزاح:هادي مابياخذ راحته اذا جيتي معنا.
دانه:حلفي.
شيماء:ههههه أمزح.
أم جواد:لا دانه أنتي تعالي معاي بعدين لما أجيب له الغذى .. لبست عباتها راحت لجواد باسته .. أعتني بنفسك.
جواد:انشالله.
دانه راحت باسته:أشوفك بعدين.
جواد ابتسم.
جت له شيماء وقبل ماأتقول أي شي ساسرها.
جواد بصوت واطي:لا اتقولي لساره أني صحيت.
شيماء بستغراب:ليش؟!
جواد:بعدين أقولش .. قولي لدانه ماتقول لها.
شيماء:انزين .. باسته .. باي .. راحوا.

انسدح على السرير وهو حاسس بألم في راسه بس الألم الي كان أقوى هو ألمه على ساره .. هادي قاله عن موت أهلها يعني أم ساره ووليد لأنه ماكان يدري عن موتهم بس درى عن أبو وليد بس هادي ماقاله بالتفصيلات يعني وش صار لساره و هلأشياء من جذي يبغى الوقت يمشي بسرعه عشان اتجي شيماء و يسألها.

أتصل لساره عشان يسألها عن الغذى بس ماردت فتصل على البيت و ماردت .. خاف عليها راح البيت على طول........

سلمان:ساره ساره ساره.

ماسمع رد فركب فوق .. لقى باب غرفتها مفتوح.

سلمان:ساره ساره أنتي أهني.

ساره طلعت من الحمام و هي اتنشف فمها بالفوطه وكان باين على شكلها تعبانه.

سلمان:ساره فيش شي؟؟
ساره مرتبكه:هاه لا مافي شي بس كنت كنت أرجع << تتقيئ.
سلمان:و الحين ويش اتحسي؟؟
ساره:لا أحسن بس برتاح و
قاطعها:خلاص ارتاحي و أنا بنظف الحمام.
ساره:لا لا لا مايحتاج اتنظفه نظفته من اشوي .. اممم صحيح ليش جاي؟؟
سلمان:أتصلت لش عشان أسألش عن الغذى مارديتي خفت عليش جيت .. أنتي ارتاحي الحين بس ويش تبغى الغذى؟؟
ساره:عادي الي يصير.
سلمان:اوكيه ارتاحي .. باي .. راح.

ساره انبطحت على السرير ترتاح.




قيس و رائد وصلوا المستشفى........

راحوا لغرفتها شافوا الشرطه طالعين من الغرفه و معاهم ابو قيس.

قيس:ويش حالها و ليش الشرطه؟؟
أبوقيس:ايقولوا يمكن كانت تبغى تنتحر من جذي حققوا معها.
رائد:المهم هي كيفها الحين؟؟
أبوقيس:سوو لها غسيل معده حطوا لها مغذي.
رائد:عادي ادخل؟؟
ابوقيس:مافي أحد غير أم قيس .. ادخل.

رائد دخل و قيس دخل وراه....

قيس:سلامات ماتشوفي شر.
حوراء من غير ماتطالع رائد:الله ايسلمك الشر مايجيك.
رائد بنظرات أسف:حمدلله على السلامه.
حوراء من دون ماتطالعه:الله ايسلمك.
قيس:كيف حالش الحين؟؟
حوراء:زينه.
أم قيس:قالوا بيرقدوها.
رائد وجه سؤاله لحوراء:ليش؟؟
حوراء من دون ماتطالعه:عن لايصيري لي مضاعفات.
قيس:كيف شربتيه؟؟ معقوله مانتبهتي أنه كلوركس.
حوراء:مانتبهت لأني كنت نعسانه توني قاعده من النوم و غير جذي متزكمه.
قيس:أها.

رائد أنتبه أن حوراء من أول ماجى وهي ماطالعته ابد .. افف بعدها زعلانه .. كيف بقدر أقولها أني كنت أمزح .. مستحيل أقول قدام الجماعه .. خلاص باجي لها بعدين بتفاهم معاها.

رائد:ليش جوالش مقفل؟؟
حوراء لأول مره اليوم طالعته بس بنظره مو عدله:انكسر وأني أكلمك أمس طاح من عندي وانكسر.
رائد فهم قصدها لأن مابينكسر الجوال بمجرد أنه طاح طيحه عاديه.
قيس:ماقلتيلي.
حوراء:مامداني .. تعال اذا رحت البيت جيب جوالي القديم و شريحتي حطيتها على التسريحه.
قيس:انزين.



#في المستشفى في غرفة جواد#

شيماء و هادي توهم واصلين.......

شيماء:هاي.
جواد:هلا.
هادي:ها ويش اتحس الحين؟؟
جواد:ماأدري .. زين.
شيماء قعدت بالكرسي الي جنبه:أكيد أشتقت لي.
هادي:لا أشتاق لي أنا.
جواد:لا تتشابقوا ماشتقت لكم اشتقت لناس ثانين.
شيماء وقفت منقهره:مالت عليك .. هادي خلنا انروح مايستاهل الواحد يضيع وقته معاه.
هادي:ايه حبيبتي قومي خلنا لا انضيع وقتنا عليه.
جواد:ههههه شفيكم أنا قلت جذي عشان لا تتشابقوا.
شيماء:لا ولله كان يمديك اتقول أشتقت لكم اثنينكم.
جواد:أمزح .. تعالي قعدي.
شيماء قعدت.
جواد:قوليلي ويش صار و بالتفصيل.

شيماء قالت له كل شي صار....

جواد:الحقيره كيف قالت لها جذي؟؟
شيماء:استغلت ضعف ساره و حالتها و ألفت قصه أشبه بالحقيقه وساره صدقتها.
جواد سكت اشوي كلام شيماء ألمه لأن هذي الحقيقه:وساره ويش صار لها؟؟
شيماء:جاها انهيار عصبي.
جواد اتفاجئ.
شيماء:اترقدت في المستشفى ثلاث أيام .. وأني عرفت أن تينوه هي الي أخذت الصوره بعدين خافت و رجعتها.
جواد:وساره ويش صار لها؟؟
شيماء:مادري بس ضعفت واجد و اتغيرت و من بعد ذاك اليوم ماشفتها تزورك.
جواد:كلميها الحين و حطيه اسبيكر.
شيماء طالعته.
جواد:اممم هادي
هادي ابتسم:بطلع بس برجع بسرعه.
جواد ابتسم له .. طلع هادي.

شيماء اتصلت لساره رن رنه رنتين ثلاث....
ساره:الووه.

حس بشي يتحرك بداخله عود عليه الم راسه.
شيماء حست له بهمس:جواد فيك شي؟؟
جواد:لا لا كلميها.

ساره:الووو شيماء.
شيماء:هلا.
ساره:أهلين.
شيماء:ويش حالش؟؟
ساره:زينه الحمدلله.
شيماء:ساره بقولش شي.
ساره:قولي.
شيماء طالعت جواد وبنبره فرحانه:جواد صحى من غيبوبة اليوم وهو بخير.
ساره متفاجئه: ساكته
جواد و شيماء ينتظروا ردها.
ساره ببرود:حمدلله على سلامته.

اثنينهم انصعقوا من ردة فعلها و برودها.

ساره:شيماء أخليش سلمان يناديني.
شيماء بعدها متفاجئه:اوكيه باي.
ساره:باي.

جواد انسدح على السرير:ليش؟؟!
شيماء:جواد ساره هلأيام متغيره مادري ويش فيها.
جواد اتنهد:اتصلي لهادي.




سدت الخط من شيماء و على طول صاحت من فرحتها و من شي ثاني .. كانت متعمده تخفي فرحها عن شيماء لسبب ماتبغى أحد يعرفه.

مسحت ادموعها راحت اتصلي صلاة شكر قرت قرأن حست براحه .. فكرت تتصل لحوراء تسأل عنها بعد الي صار لها أمس......

ساره ببتسامه:الووه.
حوراء:هلا .. ساروه الحقي على صديقتش علي .. اتخيلي من غبائي الفايح شربت كلوركس بدل الماي.
ساره:حلفي و أنتي وين الحين؟؟
حوراء:في المستشفى سوو لي غسيل معده و مادري ويش.
ساره:ويش حالش الحين؟؟
حوراء:مادري عادي بس أحس بدوار.
ساره:في اي مستشفى انتي؟؟
حوراء:مستشفى ال**** .. قولي لأملوه مامداني أقولها.
ساره:اوكيه باي.
حوراء:باي.


أتصلت لأمل قالت لها .. اتفقوا انهم يروحوا مع بعض.

راحت لسلمان و ابتسامتها اتشق الحلق:عمي بطلع.
سلمان استغرب ابتسامتها لأنها كانت تعبانه و لأنه طول الفتره الي راحت ماشافها تبتسم جذي:وين؟؟!
ساره:صديقتي في المستشفى باروح لها.
سلمان:في المستشفى و انتي فرحانه!!!
ساره:لا هي بخير الحين .. المهم باروح لها زين.
سلمان:تعالي من بيوديش؟؟
ساره:أمل بتمر علي.
سلمان كان بيتكلم بس سكت.
ساره:ويش كنت بتقول؟؟
سلمان:ولا شي .. راح غرفته.

كان بيقول لها أنا بوصلكم بس غير رايه.




بعد الغذى راح غرفته نام ساعه و ربع صحى ارتاح له اشوي .. راح لكمبيوتره فتح ايميله مالقى دانه طفاه .. فتح مجره أخذ جواله الثاني لقى 4 مكالمات و رساله.

فتح المكالمات و كانوا من عند دانه .. فتح الرساله.

"هلا دلعوه باركي لي أخوي صحى من غيبوبته وهو بخير.
دلعوه ليش كل مأتصل ماتردي فيش شي؟؟"

قيس: معقول جواد صحى!!!
على طول اتصل لها بس قبل ماترد انتبه أنه مو حاط الي يغير الصوت .. اوووه كنت باروح فيها.

دانه:هلا .. مالت عليش يالسخيفه اتصلت لش ليش ماتردي؟؟
قيس ويلي وحشني هالصوت.
دانه:الوووو
قيس<<دلع:هلا معاش معاش حمدلله على سلامة أخوش متى صحى؟؟
دانه:الله يسلمش اليوم الصبح.
قيس<<دلع:أها.




وصلت فاطمه المستشفى قبل أمل ساره.......

أول مادخلت فاطمه على طول راحت لحوراء و راشد سلم عليها راح....

فاطمه:حمدلله على السلامه ولله خفت عليش .. ويش حالش الحين؟؟
حوراء:الله ايسلمش .. عاد مو لهدرجه مو كلوركس هو مصختوها.
فاطمه:جزاة الخير خايفين عليش.
حوراء:أكيد بتخافوا علي ماعندكم الا حوحو وحده.
فاطمه:لا حلفي .. المهم وين أحط الباقه؟؟
حوراء أشرت:هناك.
راحت فاطمه حطت الباقه:وين أمي؟؟
حوراء:في الحمام(أكرمكم الله).

الا تطلع ام قيس:يووء فاطمه جيتي.
فاطمه راحت لها باستها:ويش حالش اماه؟؟
ام قيس:زينه الحمدلله .. تعالي راشد راح؟؟ ابغاه ايوديني البيت.
فاطمه:لحظه باشوفه .. اتصلت له.....

راشد:هلا حبيبتي.
فاطمه مبتسمه:أهلين .. تعال وين أنت؟؟
راشد:عند باب المستشفى ليش؟؟
فاطمه:أذا ماعليك أمر وصل أمي البيت.
راشد:افا عليش الحين جاي.
فاطمه ابتسمت:تسلم .. مع السلامه.
راشد:الله ايسلمش.

فاطمه:الحين بيجي .. تعالي كيف شربتيه معقوله ماشميتي ريحته؟؟!
حوراء بحركه سريعه:اصص
أم قيس:ايه بعد تعرفي بنات هلأيام ابد ماعندهم دبره اتوصل و تشرب ابد ماتفكر تغسله أول.
حوراء:افف أماه كنت نعسانه مانتبهت ..كل منش احين بتلعي علي كفايه من شوي لعت علي.
فاطمه:وأني وش دخلني؟؟
حوراء:انتي الي فتحتي الموضوع.

اندق الباب الا هو راشد و راحت معاه أم قيس.

بعد ربع ساعه وصلوا أمل ساره......

أمل ساره:حمدلله على السلامه.
حوراء:الله ايسلمكم.

راحوا سلموا عليها و على فاطمه قعدوا...

أمل:ويش حالش فاطمه؟؟
فاطمه:بخير الحمدلله.
ساره:حوراء أنتي بخير الحين؟؟
حوراء:بل طالعه غريبه حوراء حوروه أحسن.
الكل:هههههههههههه.
حوراء:هيه بخير و بكره بيطلعوني مايحتاج اقعد في المستشفى