رواية عشاق من أحفاد الشيطان // كامله

**أحلى من الحلا** · 29-04-2008, 04:54 PM

°..° .. .. ما كنت اصدق بدموع الرجاجيل ...
حتى لمحت الدمع يملى عيونه.. .. °..°

كان الفزع والصدمه مالين الرياض كلها .. بنظر اهل فيصل ..

اللي كانوا عارفين انكروا .. الحقيقه ..

واللي ما كانوا عارفين بسرطان الدم اللي مشى بجسمه بالايام الاخيره ..

رجله ثقيله ترتجف وهو يدخل للقصر .. خاله فيصل مات ..

كيف .. ومتى .. ليه محد حكى له انه مريض ..

ليه محد حس بادمانه .. ليه ..؟؟!

نادئها مثل الطفل اللي ينادي امه .. ارتجف صوته : وع .. .. ود ..

وعود كانت معصبه من رياض طوال وقتها..
حاول يعتذر منها ..

لكن وعود مجروحه .. فيها جرح مانبراء ..

صحيح تعطيه واجباته الزوجيه .. لكن في حواجز بينهم .. لان رياض مو من النوع اللي يعترف باخطاءه ..

وعود وقفت عند الباب : خير ..!!

رياض جلس على الكنبه بتعب وهو يفتح قلاب ثوبه : عطيني مويه ..

وعود ناظرته باستغراب : اوكي ..

دخلت للمطبخ واخذت مويه بكاس وعيونها على رياض ..فيه شي ..

رياض اخذ من وعود الكاسه .. طاحت منه من شده الرجفه

تكسر القزاز في الارض ..

وعود شهقت : رياض ..

بعدت عن القزاز .. وناظرت رجلها ونقاط من مويه على بنطلونها ..

كانت بتساله وش فيك بس كابرت ولفت عنه ..للمطبخ تجيب له كاس مويه ثاني ..

رياض : وعوووود تعالي ..

وعود بدون نفس : دقيقه بجيب لك مويه ..

رياض بحه قويه بصوته .. : تعالي مو لازم ..

وعود راحت له مستغربه : انت وش فيك اليوم ..؟!وش قصتك ..

رياض سكت وهو يناظر بالارض .. مايبغى يحكي بس يبغى وعود قريبه من عنده ..

بعد فتره طويله قال بصعوبه : خال .. ي في ... صل م .. ات ..

وعود مارمش لها جفن ..
ضلت تناظر برياض ببرود ..

ايوه هاللحين لما احتاج لها ركض لعندها ..
وقبل تاكل تبن ..
ليه الرجال كذا ..
مايعروفوا زوجاتهم الا عند ضعفهم ..
مايعرفوا صدرها الحنون الا وقت حاجتهم ..

قالت بصوت ولهجهه هي ماعرفت نفسها فيها .. : عقبال ماسمع خبر وفاتك .. ..

انصدمت من كلمتها ..

رياض رفع راسه مصدوم من الكلمه .. لهدرجه تتمنى موته ..ماتصور كرهها لهدرجه ..

كانت وعود تناظر فيه بكره ماقد حسته ..
اكثر انسان تاذت منه بحياتها هذا ..

جارته بنفاقه لها .. وتصنعه انه يحبها علشان يكسب رضاها ..

اتهمها بشرفها وشكك باصل ولدها ..
اللي طاح رحمه من ربي له ..

متعلق بالمسيحيه وحجتها يبغى يدفعها كل شي دفعه لها ..

رياض وقف وعيونه مغرقه يحس بغصه تخنقه ..
الا كرهها له مايتمناه ..

وعود ماهربت منه مثل العاده ولا بكت ..
جلست بكل برود على كنبه قريبه منها ..
بيضربها يضرب..
لان ناقصه الضرب ويكمل حقارته معها ..

رياض وقف عندها ونزل عند رجولها على ركبته وهو مصدوم : تتمني موووتي ..تتمنى موتي ياوعود ..

وعود ماهز شعره من راسها .. قلبها حجر وقاسي .. ليه ماتدري ..ماناظرت عيونه ..
علشان ماتضعف او تتراجع .. محترمه حالته وفاه خاله بس ماقد ربطت رياض بفيصل اي علاقة ود كانوا مثل الغازوالنار اذا جلسوا مع بعض يحترقوا
بين اسنانه قالت وهي تدعي ربها ياثر فيه كرهها له ومايببيع : ايوه ..

رياض حط ايديه على ركبتها وقرب من وجهها وعيونه مغرقه : مووووتي ياوعود موووتي ..

وعود ماردت ولا رمشت عينها ناظرته باحتقار ..

رياض يدور بعيونها وعود الحنون الطيبه ..
وش اللي غيرها فجاءه كذا ..
زادت البحه بصوته : وعوود انا رياض تتمني موتي .. ليه ..؟!

وعود ياجبل مايهزك ريح .. تناظره بقوه غريبه .. ليه هالكره الفضيع له ..

رياض : وعود انا اعشقك وانتي تتمني موتي .. ليه ..

وعود قالت بغصه : لاني اكرهك .. انا مو عبده عندك والا وحده تشتريها بفلوسك .. متى مادورت حضن ارتميت عندها ..- ارتجف صوتها - انا انسانه يارياض انسانه ..تحس وفي عندها قلب .. مو لعبه بيدك ..

رياض مسك يدينها بلهفه : ليه هالحكي .. انا وش عملت لك ..

وعود غرقه عيونها : انت ماتحترمني ولا انت مناظرني .. بس تبغاني تحدي لنفسك ان مافي بنت ترفض ..

رياض قاطعها : ومن قالك .. انتي زوجتي واغلى انسانه عرفتها ..

وعود : بس مو حبيبتك هذيك الاستقلاليه النصابه اللي تعبد الصاليب حبيبتك واللي انت متعلق فيها ..

رياض : لا والله انتي ياوعود بالقلب انتي حبيتي وم

وعود قاطعته وهي تدفه : ايوووه اكذب علي .. اضحك على عقلي ... انا احبك بس بخليها اعاقبها .. واللي يعاقب وحده يعاملها مثل زوجته .. رياض لاتحاول انا خلاص عفتك ..

رياض مايتخيل ان وعود من جدها .. يعني بتاخذ اغراضها وترجع لشرقيه .. عملتها اول مره ومايمنعها شي تعملها هاللحين ..

: كيف اثبت لك ..

وعود : مابغى منك شي .. بس تتركني بحالي ..

رياض صرخ بعصبيه وهو يمسك زندها قبل لاتتحرك : تحلميييييين انا ماصدقت لقيتك اتركك ..

وعود قالت بتحدي وهي متوقعه رفض رياض وحججه السخيفه : تطلق المسيحيه هذي .. وتسكنني بعيد عن اهلك ببيت مثل مانت مسكن الكلبه هذيك ..

رياض بسرعه : موافق .. وتجلسي ..

وعود بجديه وطريق عمليه طفشت من كذبه : ماصدقك لما اشوف بعيوني ..

رياض : تعالي معي عندها وشوفي بعيونك كيف اطلقها وهي ت

قاطعته بحده : انا ماروح لحد هي تجي لعندي وتطلقها قدامي .. ومانام الليله عندك وهي بالسعوديه ..

رياض ناظر وعود بتامل ..: ليه القسوه كذا..

وعود : بركاتك ..

رياض استغرب من وعود .. وهمه صار همين بدل ماتخفف عنه زادتها عليه ..
قال بضعف : بعد مادفن خالي لك اللي تبين ..

وعود احترمت الميت .. وحست على دمها بس مارتاحت نسبيا ان رياض وعدها ينفذ ..

مناها تشوف رياض وهو يطلق كات قدام عيونها وعلشانها ..
لو يعملها جد تنرمي بحضنه وتطبطب عليه جد ..

**********************
عشاق من احفاد الشيطان ... روايه رومنسيه حزينه .. ... وخياليه
**************************

صلوا عليه صلاه العصر ..

وابوه واقف بعيد عنهم .. وعمل بوصيه فيصل .. انه مايرفع كفنه .. ولايغطيه بالتراب .. او حتى ينزله بقبره ..

فهد كان بلحضه ذهول .. فيصل ماحكى له عن مرضه او حتى لمح ياما حكى معه ماقاله شي ..
مشاعره غريبه حزينه .. يبكي والا يسكت ..

ارتفع صوت متعب الجهوري : ادعوا له الله يبثبته عند السوال .. تراه يسال ..
ادعوا له بالرحمه والمغفره ..

علاء الهمس باصوات مختلفه وادعيه مختلفه ..
كثير اللي اخذو بعزاه ..

بعضهم يعرفه وحزنان عليه وبعضهم يكرهه ويبغضه .. وبعضهم مايعرف اساسا بس انه ولد الرالي ..

حتى بالدفن مصالح ..
ماعادت المقابر لاخذ العظه والعبره والتفكر بما بعد الموت ..

لما يضيق القبر او يتسع ..

ياروضه من رياض الجنه .. ياحفره من حفر النار ..

اللهم اجرنا من النار ..

.
.
.

ناظر الجمع الغفير اللي تحضر الدفن ..
جاء يركض ورجله تتعثر بالتراب ..

جد فيصل مات والا اشاعه ..

دور بعيون الموجودين كلهم اهل فيصل الا هو ..مو معهم ..

ناظر بدموع بو جراح اللي يداريها عن الناس ..

وتاكد له المصاب ..

فيصل خويه ورفيق دربه بالشر والخير مات ..

بعد الناس بسرعه .. يبغى يوصل للقبر .. صرخ فيهم : ابعدوا هذا خويي ..انا صديييق فيصل .. انا اقرب له من نفسه .. ابعدوا ..

ناظروا فيه بلا حول ولاقوه ..

مسكوه تركي ومتعب ..
وهو يجثي على ركبته عند القبر ..

ودموعه على خده هتان ..

فهد ساعدهم ووقفوه ودموعه اللي مسكها تنزل .. : يزيد يابن الحلال .. قم ..

يزيد كان جسمه ضعيف ..
سحب نفسه منهم وهو يشهق : مات ياناس..
مات قبل لاشوفه واسلم عليه ....فهد سلمت عليه شفته .. نصحته ..

.
.
.

رجعوا من المقبره واللكل همه ثقيل على صدره ..
وقفوا على العزا .. كل منهم يصبر الثاني ..

الا بو جراح اللي ماتحرك من المقبره ..
ضل جالس عند القبر ..

يدينه مسندهم على الحجر الابيض الصغير ..
ويناظر القبر بفراغ كبير ..

صدمه لهاللحين ماليته ..

بطى استيعاب ..

صدق اللي بالقبر ولده فيصل ..مات بجرعه مخدرات زايده ..
يعني من جد كان مريض ومدمن وكل هذا ماكانت مزحه ...

شد على ايده وضغطها بالحصى الابيض ...مات فيصل .. مات ..

مر قباله شريط حياته مع فيصل ..ماقد كان الاب الحنون .. ماكان الصدر الدافي.. الا كان سبب تعقيد ولده ...

وقف بسرعه ونفض ايده .. هرول لحد السياره يركض من الحقيقه ومثل العاده يفكر بالهروب ..

ليه لما يموت الواحد نحس بقيمته ونفقده ..
وتجف جفوننا من الدمع اللي سكبناه ..

ليه نتمنى يرجع ونضمه ونمسح همه ...
ولا دمعه تنزل من عيونها .. لحضه سكووون ..

.
.
.

حال الحريم ماكان احسن منهم ابدا ..

شموخ جالسه بحاله غياب عن اللي حولها .. عيونها معلقهه بصورة فيصل اللي مزينه صالة القصر الواسعه ..

دموعها صامته لانها متعوده على العزاء .. لو في حد بيعطوه جائزه على عدد المتوفين من حبايبه بتكون لها ..

صوت شهقات سجى طاغي المكان ..
كانت تبكي بقوه وصوت وناتها عالي ..

ام جراح وكلت امرها لربها بمصيبتها .. ودموعها حزن عليه ..

ربى كانت بجنب امها تهديها وتهدي نفسها ..

**********************
عشاق من احفاد الشيطان ... روايه رومنسيه حزينه .. ... وخياليه
**************************

المكان مظلم ..

الا من نور الشمعه البسيطه اللي بداخل جره فواحة الريحه ..

وريحه الفراوله ماليه الغرفه ..

تقلبت بالسرير ماهي قادره تنام ..

تحس بصراع فضيع داخلها ..

تكره تصرفات سامي و علاقاته المشبوهه ..
علاقاته اللي الله كشفه عندها ..
وشافتهم بالشريط ..
ومن وقاحته مصورهم بفيديو ..
صدمتها فيه كانت كبيره مررره ..
وماتتخيل تعيش بدونه من دون مايطل عليها كل صباح يصبحها ..
وكل مساء يمسيها .. واهتمامه الواضح مثل الشمس فيها ..

تنهدت وهي تقرب ايدها لصدرها ..
وتذكر كيف مسكها بنعومه
وقسم بالله انه من عرفها ..
مالمس مراءه غيرها ..

يقصد ايش ..؟
من ملك عليها ..
والا عرفها اول مره هذاك اليوم ..

تلقبت الجهه الثانيه ..
وحكيه باذنها .. بهذاك اليوم ..
كان يحكي عن وحده وكانها لغز ..مافهمه ..
من هذي اللي معذبته ويشوفها دايم مثل مايقول ..

غطت وجهها بالمخده وصرخت : اه اطلع من راسي خلاص ..

امتلت الغرفه الظلمه .. فجاءه بصوت راشد الماجد الرومنسي ..

(( ..غمض عيونك حبيبي .. غمض عيونك .. بقول لك شي
بس اسمعني بقلبك ..
محتاج لك في حياتي ماقدر بدونك ...او بختصر لك واقول احبك ..احبك ))

قلبها دق بسرعه وهي تسمع صوت الجوال ..

سحبته بسرعه من الكومينه اللي بجنبها ..
فتحته بسرعه وبلهفه ..

كان مسج ..

فكرت بصوت عالي : من اللي بيرسل لسامي هالوقت ..
- قالت بغيض بين اسنانها - اكيد وحده من خوياته .. والله وبيكشفك جوالك ..

فتحت المسج ..وكان من .. " زوجك سامي .."

ناظرت بصدمه .. زوجك سامي .. يعني هذا الجوال لها .. والا وش القصه ..

قرت المسج بسرعه ..
((.. زوجتي الكرستاليه ..

مبروك الجوال الجديد ..
اعتبريه هديه بسيطه اعتذر فيها عن اخطائي الكثيره ..
وانا متاكد ان قلبك الابيض بيسامحني ..
ولكل انسان ماضي ..

انا محتاج لك تساعديني اتخلص منه ..

ندى بنتي الصغيره ..
.. انا اسف ..))

قلبها دق بسرعه ..
وقرت المسج فوق العشر مرات

شغلت الابجوره بنورها الاحمر ..
والصراع اللي بداخلها يزيد ..

كل انسان ..له ماضيه وغلطاته ..

وانتي اكبر دليل ياندى غلطتي لما هربتي من اهلك ..

مانتي باحسن منه بشي ..

انتي خنتي اهلك وحبهم لك .. وهو خان نفسه قبل اي احد ..

هو ترك هالطريق .. وحلفلك ..
ليه ماتصدقيه ..

اساسا لو و احد غيره مافكر يخطبك وانتي هاربه من اهلك ..

قالت بصوت مرتفع تصبر : يحمد ربه .. انا اللي مفروض أغتر .. هو اللي من بتوافق عليه بعد سواد وجهه ..

ربك يغفر ويرحم وانتي ماترحمي ..

بس هو مايستاهل .. هو ذنبه كبير ..
وانا احتقر امثاله ..

قاطع افكارها مسج ثاني ..

دققت بكلمات راشد .. اكثر ..

(( ..غمض عيونك حبيبي ..
غمض عيونك ..

- - غمضت عيونها باسترخاء

بقول لك شي..
بس اسمعني بقلبك ..

- حطيت ايدها على قلبها -

محتاج لك في حياتي ماقدر بدونك ...
او بختصر لك واقول احبك ..

احبك ))

قلبها نبض بسرعه رهيبه ..
يقصد الاغنيه اللي حاطها والا لا...

فتحت المسج بلهفه ...

(( والله مو قادر انام ..

قولي لي وش الحل.. ؟!))

عبس وجهها .. وناظرت بالمكان اللي طاح فيه اليوم ..
حست بتانيب الضمير لان هي السبب في طيحته .. واكيد مو نايم من الم ظهره ..

ترددت ترسل له والا لا..

ارتجفت اصابعها .. وتوكلت على الله ورسلت ..

.

.

.

فاتح دفتر ريان الاسود ويقلب بصفحاته ..

يدور كلمات حلو ه يرسلها رساله ثالثه .. حالف يغثها اليوم ..

ماتصور ان ريان بقلبه كل هذي المشاعر لشموخ ..

كلماته بسيطه وغامضه ..

لكن تهز اللي يقراءها ..

حس بغصه بحلقه وهو يتذكر حال اخوه ريان ..

صدق لما كتب على مقدمه دفتره
" اتسع رجال الارض "

لودرى ريان انه اخذ دفتره ورسوماته الكثيره وش راح يعمل فيه ..
ابتسم وهو تخيل شكل ريان معصب ويدخن السيجاره بتوتر .. ويساله قراء اللي فيه والا لا ..
: هههههههههه

رفع الجوال بصدمه وهو يطالع المسج ..
"ورده الكريستال .." مرسله له .. اخر شي توقعه ..

فتحه بلهفه .. وسوال واحد بباله ..
بتسامحني و تساعدني والا لا ..

((مساء الخير ..

اكيد من الم ظهرك ..موقادر تنام ..
قل لاحمد ياخذك للمستشفى اذا كنت مو قادر تسوق ..

وشكرا على الجوال ))

ابتسم وزفر : اه ياخلق الله اعشقها ..وربي اعشقها ....
اكيد خايفه علي .. ياربي خذ من عمري واعطيها..

اشتغل عنده الخبث .. لازم يعلقها فيه اكثر ..
هو مانام من كثر تفكيره فيها .. بس ها جائته على طبق من فضه ..

فكر وفكر وش يعمل وبالاخير ارسل ..
وحس بصدق كل حرف يكتبه .. وتمنى يكتبه بدمه لها ..

.

.

.
.

حست بالحماس من لعبة المسجات
على الاقل تقضي ليلها اللي مو قادره تنامه ..

((مساء النور .. وعطر الكادي والمسك ..
العفو يالغلا .. الجوال وصاحبه تحت امرك ..
بصراحه يابنوتي ندى ..

اسمحي ابقولك بنتي عارفه ليه ..لانك بنتي الصغيره ..
واختي اللي ماتت .. وابوي اللي فقدته .. وامي البعيد عنها ..
انتي كل اهلي واللي حولي ..

انا مو قادر انام لاثنين ..
انتي مو راضيه تطلعي من بالي ..حاولت اطلعك ماقدرت ..
وقلت دامك اخذتي قلبي عندك
- ندى شهقت : قلبه ..؟؟!!-
اكيد اخذتي عقلي معه ..

لاتشهقي عارفك .. ويا خوفي يحصل لك شي من هالشهقات ...
- ندى حطت ايدها على فمها وهي تضحك .. عاررف ردات فعلها المرجوجه : ههههه –

بنوتي ماعندي مرهم ..
وماني قادره اتحرك علشان اروح للمستشفى ..)))

خافت عليه وقرت اخر سطر ثلاث مرات ..: ماهو قادر يتحرك ..- ضربت خدها وغرقه عيونها – ياويلي .. كنت عارفه انه يتالم بس ماحكى ..

ارتبكت وش تعمل وسامي يتالم ..

ناظرت ساعه الجوال .. الوقت متاخر ماتقدر تدق على احمد ياخذه ..
ولاتقدر تقول للمى تصحيه لان لمى دم ضروسها سامي بعد اللي حصل ..

حطت الجوال في جيب الشورت .. ولبست الشبشب ..
فتحت درج واخذت المرهم ..

طلعت لبره وكانت الشقه هاديه كل البنات نايمات ..
تسحبت بهدوء ومن دون صوت ..
للمطبخ ..

شغلت النور وعقلها متخربط .. ايش ممكن تعمل له ..
تذكرت امها لما يرجع ابوها من الدوام تعبان ..
كانت تعمل له ..
هذيك الشوربه الكريه طعمها .. شوفان وجزر ..

وخلال ربع ساعه .. صارت الشوربه على النار ..
جلست على طاولات المطبخ .. ورجلها تدله وتلعب فيها .. قدام ورى ..
وتلعب بخصله بشعره ..
خايفه على سامي
قلبها يدق بسرعه من الخوف عليه ..
ماتنسى شكل ابوها من الالام الظهر ..

غرقه عيونها وهي تذكر حنان ابوها ..
بيسامحها والا لا...

سكبت الشوربه بصحن .. وحطته بالصينيه وبجنبه المرهم ..
تحس بشوق رهيب لامها .. هذا المرهم مايفرق ايد امها علشان ابوها وتحطه بشنطها من الاوليات ..
تحس ان تشبه امها ..

اخذت عبايتها اللي معلقه عند الباب
وفتحته بهدوء .. وقلبها يدق بسرعه ..

حطت الصينيه على الارض بجنب باب شقتهم .. ودقت الجرس ...

.
.
.

وهو مندمج يقراء اللي كتبه ريان ويكتبه بجواله ..
سمع صوت الجرس واستغرب من جائي هالوقت ..

كان بيطنش..لكن اضطر يقوم .. من تافف من اصرار اللي عند الباب ..

مشى للباب وهو معصب من قله ذوق اللي داق ..
فتحه بعصبيه .. وشاف باب شقه البنات يتسكر وبطرف عبايه ..

استغرب وخاف .. وتوه بيتحرك الا صدمه رجله بصينيه ..
نزل عيونه وناظر فيها .. لثواني ..

بعدها نزل وهو مبتسم ..
رفع المرهم وناظره بحب .. والشوربه ريحتها دخلت لخياشيمه ..

رفع الصينيه وهو يتمنى يركض لعندها ويبوسها ..

جلس على الطاوله والصينيه قباله .. لحد هاللحين مذهول ..

حنونه .. حنونه كثييير ..

رفع الملعقه وهو يتخيلها صاحيه من نومها وفراشها علشان تعمل له الشوربه ..

ملى الملعقه ولما قربها .. من فمه ..
رجع الملعقه لصحن .. وابعد الصينيه عنه ..
واحتفت ابتسامته .. والضيقه ملت صدره ..

هو اناني ..
واكبر اناني ..

اللي بحنانها تحب العيال ..
اللي بهبالها ونشاطها فيها طاقه امومه اكثر من غيرها ..

رفع الجوال على صوت المسج ..
(( بالعافيه ..
ولاتصدق نفسك .. لو اي احد غيرك عملت له ..
مو تقول خايفه علي ومش عارفه ايش ..؟؟))

ابتسم بالالم ..

وارسل لها.. كلمه وحده .. مافي غيرها يعبر عن اللي يحسه ..
(( احبك ))

وسحب الصينيه واكل الشوربه علشان خاطرها ومايضيع تعبها ...

.
.
.

ندى حست بالكلمه غيرر عن كل مره تقراءها فيها ..
غير كثيير .. لها طعم مختلف ..

ابتسمت وتاكدت انها طاحت ومحد سمى عليها ..

تغطت وحسن براحه مو طبيعيه .. غمضت عيونها وهي مبتسمت .. ونامت ..

.
.
.
.

احيانا يقولوا ان الكلام المخربط والعادي يوصل للقلب اكثر من الموزون والمرتب ..

وهذا اللي حصل مع سامي ..

بدون شعور ارسل لها رساله ثانيه .. ودفى الشوربه يملي جسمه البارد المرتجف ..

(( انتي اكثر من اللي استاهله .. والله انك كثير علي ..
يارب يقدرني واسعدك ..))

**********************
عشاق من احفاد الشيطان ... روايه رومنسيه حزينه .. ... وخياليه
**************************

(( سحابه صيف وتعدي ..))

رياض مستثقلها
..يحس بعصبيه من صغر عقل وعود ماهي محترمه الميت ..

ناظر بوعود
ثمن كاترين اللي تبتسم له بدلال .. وتبتسم لوعود بانتصار ..

طوال الفتره اللي فاتت .. أخذ من كاترين كل فلوسها واللي عندها بحجه انه بيرسلهم لسويسرا ..ويعيشوا سوا هناك ..

وقف قريب من وعود ومسك ايدها بتملك : كاترين ..

كاترين ابتسمت له غنج : اي حبيبي ..

رياض ابتسم لها ببرود : انتي طالق ..

كاترين شهقت : شووو ..

وعود صرخت فيها وكانها شي موقت وانفجر: ماسمعتيها انتي طالق .. يعني ضفي وجهك – دفت كاترين بقرف وبكل قوتها – يله يله فارقي الله لايوفقك يالمسيحيه ..

كاترين عصبت : يامجنونه شوبك .. رياز ابعد هي عن وشي ..

رياض اشر لها بقرف وهي يكتم ضحكته على شكل وعود المقهوره مره من كاترين وتدفها من قلب : هيثم ينتظرك تحت .. ضفي وجهك مثل ماقالت وعود للاردن ولا ابغى اسم صوتك والا ربيتك ..

كاترين فهمت اللعبه صح .. ضحك عليها رياض .. علشان وعود ..: انا بفرجيك انت وهيي .. انا كات بتلعبوا معي هيك ..

وعود دفتها بكل قوتها لحد ماطاحت بالارض : انقلعي الله لايردك ..
يا ميرري ..صوووفي تعالوا بعدوا هذي الحشره من هنا ..

جروا الخدامات كاترين لبره وهي تسب وتلعن .. وتتوعد ..

التفتت وعود لرياض وهي تاخذ انفاسها ..

رياض ناظرها بحذر وقال بهدوء : وعود حبيبتي عملت لك كل اللي تبغيه ..ممكن تسمعيني ..

وعود ابتسمت بخبث : لا ..
ركضت لعند رياض قفزت بحضنه وهي تضحك براحه سحابه صيف وعدت هالكاترين ..: هههههههه

رياض طاح على الكنب من قوه قفزتها ..: وعود انهبلتي هههههههه ..

وعود عضت شفايفها : خلاص مليت ابغى اعيش شبابي مع حبيبي ورووحي وحياتي ...

رياض مو فاهم شي
بوعود .. ولاهي فاهمه نفسها ..

ضحك عليها هو يوعد نفسه تكون وعود اهم شي بحياته ..: ههههههههههه

**********************
عشاق من احفاد الشيطان ... روايه رومنسيه حزينه .. ... وخياليه
**************************

..

(( لا تظلمن إن كنت مقتدراً *** فإن الظلم ترجع عقباه إلى الندم
تنام عيناك والمظلوم منتبه ٌ*** يدعو عليك وعين الله لم تنم ))

يوم جديد يشبه اللي قبله .. عند ه ..
نفس الحال كل يوم ماتغير شي ..
التهمه لازقته لازقته

سند راسه على الجدار وظهره يلامس برودته ..

الضيقه ماليه صدره .. والهم مثقله ..

هو ريان الخيال بشموخه وجبروته. .

ينرمي بالسجن وتتحجر امواله الحرام ..

ايوه الحرام .. ولاريال يصرفه حلال ..

والا خريج جامعه البترول والمعادن .. يصير مسؤؤل بالبلديه وتاجر كبير بالاسهم .. وبظرف كم شهر ..

اي عقل هذا اللي يصدق ويستوعب ..

ماكان يعرف بغسيل والاموال ولاخطر بباله ..
وحتى لو عرف يعني بيعترض وبيقول حرام ..
الا بينبسط وبيمشي بطريقهم ..

هو عارف ان اللي فيه من ظلمه لغيره وان رب العباد يمهل ولايهمل ,...

سد اذنه بيدينه ..
عارف هالحقيقه ومتاكد منها ..
مايذوق طعم النوم والراحه بسبب تانيب ضميره ..

وعرف مرها اكثر لما جرب يكون مكان المساكين والفقراء بغير وجه حق ..

حس بهدوء نسبي باعصابه وريحه الدخان تدخل لانفه ..
التفت بسرعه لريحه معشوقته ..

وناظر العسكري مسند رجله على القبضان ..وهو يبتسم بخبث ويدخن السيجاره ..

احتقره ريان ولف راسه عنه .. محتاج لسيجاره وحده بس ..

حاول يقاوم ويقاوم .. لكن وين ..
وهو كان يدخن بشراهه اكثر من خمس بكيتات باليوم الواحد ..

وقف بعصبيه : اعطيني وحده يا أنت ..

العسكري ناظره باستخاف ..: : ليكون قصدك هذي السيجاره ..

ريان بين اسنانه : ايوه ..

العسكري سحب منها اكثر من نفس .. وقال بخبث اكفر : ماتدري ان هذي الحلوه ممنوعه هنا ..

ريان ابتسم .. لسخريه القدر ..
رجعت فيه ذاكرته لما كان بمكتبة جرير اللي حرق نصها ..
تذكر حكيه مع السكيورتي المسكين ... نفس الحوار ..
لكن الادور مبدله ..

اشر بلامبالاه لشرطي ورجع جلس : قال عسكري قال .. – باستهزاء - انت من اللي يخدموا الوطن ..لا بالله رحنا فيها ..

العسكري انبسط واشفاء غليله من ريان .. رمى السيجاره وداسها : هي راحت فيها دام فيها اشكالك ..

ريان عد بداخله للعشره يضبط اعصابه ..
هو الاضعف هنا .. مو من مصلحته يرد ..

**********************
عشاق من احفاد الشيطان ... روايه رومنسيه حزينه .. ... وخياليه
**************************

ثاني ايام العزاء ..

الالوان الغامقه ماليه المجلس .. الكحلي والاسود والزيتي ..

اشكالهم مثل امس ماتغيرت .. ولا وحده منهم قدرت تجف دموعها ..

اللي راح كان غالي عليهم .. وله مكانته بقلوبهم ..

مازاد من المعزين الا روابي وامها .. وعود .

خديجه بهمس : هو كيف مات ..؟!

وعود بهدوء : سرطان بالدم ..

خديجه بنفس همسها : اها الله يرحمه .. بس يقولوا انه كان مدمن ..

وعود عصبت من عمتها اللي مو مهتمه بشموخ القريبه منهم وتسمعهم : لا اعوذ بالله .. بس معه سرطان ..

خديجه : وصدق ان شموخ حامل ..

وعود : ايوه بس بالشهور الاولى ..

خديجه : اها .. ورى ماجاء حد من اهلها ..

وعود بدون نفس : مادري يمكن مادروا ..

خديجه : وش دعوه معقوله مادروا .. – بدون نفس كملت – يمكن اختس نديه تدري من رجلها .. مو هو ولد عم شموخ ..

وعود ناظرت عمها مستغربه كيف عرفت عن زواج ندى صدق من سماءها ام بي سي اف ام ..
: لا ندى ماتدري وزوجها بعد مايدري .. اتوقع ..

شموخ كانت بتصرخ فيهم .. ناس ماتحترم مشاعر غيرها .. مسحت دموعها وتنهدت ..

خديجه : ليه هم رجعوا من مصر والا دراست اختس مانتهت ..

وعود تاففت من اساله عمتها اللي تصدع : لا مابعد خلصت وزوجها شغله هناك ..

خديجه : اها يعني ماهم مسوين عرس .. انا قلت بعد اخوه بالسجن وهو يحتفل ..

وعود قبل ماتسال عمتها كانت شموخ لافه عليهم وجهها مصدومه : بالسجن .. من اللي بالسجن ..

ارتبكت خديجه وابتسمت بهدوء لشموخ : مادري .. بس عيالي يقولوا ان .. ان .. ولد عمك ريان مسجووون ..

شموخ حطت ايدها على راسها بتعب ..
وش هالمصايب ..

فيصل راح .. وهذا ريان بالسجن ..

مسكت قلبها.. خلاص مافيها قدره تتحمل ..

ناظرتها سجى من بعيد ..
وتذكرت حالها بوفاه مروج ..
اكيد هاللحين ماكلت شي مثلها ..

وقفت عندها وهمست : شموخ ..

شموخ كانت تبكي بقهر هزت راسها بالنفي مالها خلق احد ..

مسكتها سجى : قومي معي ..

شموخ راحت مع سجى بس تبعد عن وجه خديجه ..

سجى دخلت شموخ لغرفه بعيده عن الناس : ارتاحي هنا شوي .. بجيب لك شي تاكليه

شموخ هزت راسها ..جووعانه مرره ..

طلعت سجى وكان بوجهها وعود ..

وعود : شكلها تعبانه مره .. وين امها ..؟!

سجى : متعب راح يجيبها ..ريان مسجون وسامي شكله بمصر مايدري ..

وعود : ايوه اكيد مايدري ن اخوه حتى والا كان رجع ..

سجى : الله يعين تهقين بيرجع معه ندى ..

وعود رفعت كتوفها : ماتوقع لان ابوي مو راضي ترجع للبيت .. ماعلينا انتي وين رايحه .. امي تبغاك ..

سجى : ماما .. وعود اذا ماعليك امر تاخذي شي لشموخ تاكله من امس جوعانه ..

وعود : اوكي ..

راحت سجى لامها : هلا ماما ..

ام رياض بحنان : وين رحتي ..

سجى استغربت من حنان امها اللي طلع فجاءه امس : للمطبخ اخذ شي لشموخ ..

ام رياض : اها ..

سجى : ماما بغيتي شي ..

ام رياض ابتسمت بتعب : لا ماما بس لاتنسي عطي لجدتك حبوب الضغط ..

سجى هزت راسها وهي مبسوط من تغير امها واهتمامها بغيرها ..
يمكن موت فيصل يغيرها بعد مافقدت اخوها الثاني ..

شموخ اخذت من وعود السندوتشات واغتصبتهم .. تحس بالجوع لكن نفسها مسدوده ..

وعود : كلي انتي حامل وتحتاجي للاكل ..

شموخ قالت بصوت مبحوح : ومن يسال عن الاكل ..

وعود : متعب بيجيب امك من الشرقيه ..

شموخ : انا ابغى ارجع لشرقيه بنخنق هنا ..

سجى دخلت : لا ماينفع خذي عزى خالي على الاقل ..

وعود : وليه ترجعي انتي مكانك هنا ولدك ولدهم ..

سجى : ايووه اكيد خلالاص ياشموخ انتي مننا ..

شموخ بضيقه : لا ابغى ارجع لبيتنا .. عند امي وعيال عمي .. ماني طايقه الرياض ..

وعود : ايوه بس ح

قاطعتها شموخ : اتركوني على راحتي وافهموني الرياض بدونه تخنق ..

سكتوا ومحد حكى ..الا صوت بكي شموخ وسجى يقطع المكان

شموخ : سجى سامحيني .. – بكت اكثر – والله اسفه ..

سجى تنهدت وهي تحس انها كبرت سنوات لقدام ....: شموخ مو وقته كلي هاللحين ونامي لك شوي .. مارتحتي من امس ..

.. شموخ سكتت وهي مرتاحه بعد ماحكت لام رياض كل اللي حصل بالحفله لحد ماخذها تركي ..

**********************
عشاق من احفاد الشيطان ... روايه رومنسيه حزينه .. ... وخياليه
**************************

**أحلى من الحلا** · 29-04-2008, 04:56 PM

صحيت من النوم على صراخ شمس ..

فتحت الباب وحكت شعرها وهي تتثاوب : ايش فيه ..؟!

شمس اليوم دورها بتنظيف الشقه ..ومعصبه من صحون الشوربه والمواعين..
وقفت عند ندى متخصره : اكيد انتي اللي عامله هالحوسه بالمطبخ ..

ابتسمت ندى لشمس برواقه : صباح الخير .. ليه معصبه..؟؟!

شمس : ليه حايسه المطبخ كذا ...

ندى ابتسمت اكثر وتنهدت : لاني حلوه وطيوبه ..

شمس دفتها مالها خلقها : والله انك فاضيه ...

نجود مرت عندها بالمكنسه تدخلها غرفه ندى : خذي رتبي غرفتك ..

ندى دخلت وهي تتمدد بروقان : لا مالي خلق ابغى ارقص اليوم واغني ..

رفعت نجود جوال ندى من على الطاوله : مو هذا جوال سامي ..

ندى ابتسمت بخجل : لا جوالي عطاني اياه ..

نجود قلبته : والله حلو وش اسمه هالجوال ..

ندى رفعت كتوفها : مادري بس حلو صح .. الخطوط الفوشيه محليته ..

نجود : ايوه مررره
وبعفويه من نجود فتحته .. شافت مسج ..
: اووه حركات مسج ..

ندى بسرعه راحت لعندها : جد من مين ..

فتح نجود المسج : من زوجك سامي .. مالت على وجهك وحده تسمي زوجها بجوالخا .. زوجك سامي ..

ندى : لا مو انا مسميته هو مسمي نفسه .. والله اني مافتشت الجوال ولا شفت ايش فيه من امس ..

نجود كانت مشغوله تقراء المسج .. ضحكت مبسوطه لندى : هههه شكل الطيحه اللي امس جابت نتيجه ههههه ..

ندى اخذت الجوال : كلي تبن ..
(( انتي اكثر من اللي استاهله .. والله انك كثير علي ..
يارب يقدرني واسعدك ..))

ناظرت بنجود مبتسمه وقفزت : ياسلام ..

نجود : هههه الله يعينه عليك ..

ندى بغرور : ماقريتي .. اكثر من اللي استاهله .. يعني هو راضي ..

نجود : نظفي غرفتك بس وتروشي احسن لك ..

طنشت ندى التنظيف ودخلت تروشت ..واستشورت شعرها ..
رايقه مره ..

.

.

.

.

قال بملامح مسكينه مصطنعه : يله شموسه كم ولد اخت عندك .. لاتتناذلي ..

شمس تاففت بجلستها : مادري وش معجبك فيها .. تراها ماتبغاك وأساسا ماتناسبك ..

سامي اسند ظهره لورى وقال بخشونه : جعلي ماطرك .. الله لايقطني تحت .. خلاص مابغى منك شي ..

شمس خافت انه يزعل : لا خلاص بقولها وامري لله وياليت عاد يبان فيك ..

سامي اشر على الساعه اللي لابستها شمس : لا يبان فيني ..

شمس ضحكت : يعني اللي يسمع يقول انت شاريها كانت من خويتك ..

سامي قدم لعندها بسرعه وفجاءه : شموووس كم مره قلتلك انسي .. وانتبهي لاتسمعك ندى ..

شمس قلدته وهو يقول ندى بكل رقه : ندى .. مالت عليك وعليها..

سامي رجع لورى : انا سبي للفجر اما صغيرونتي حدك عليها ..

شمس وقفت : صغيرونتك هذي عجل مو صغيرونه ..

.

.

.

دخلت لشقه واخذت نفس وهي تناظر بندى تلعب مع لمى ونجود " اونو" ..

قالت بلهفه وهي تحاول تمثل عليهم : يابنات الحقوا علي ..

لفوا عليها خايفين : ايش فيك ..؟؟!

شمس ناظرت بندى : مادري سامي يتالم ومايرد عليها ..

ندى رمت الاوراق من ايدها بسرعه :سامي ..؟؟ لهالحين يتالم ..؟!

بسرعه راحت لشقه ..لحقوها البنات وقفتهم شمس وهي تهمس : نصاب ..هههههههه

.
.
.

فتحت ندى الباب بلهفه .. الم الظهر هذا كان صديق ابوها وتحس بالحسره كل ماشافته كيف هاللحين سامي وهو صغير ..

سامي اول ماشاف مقبض الباب يتحرك مسك ظهره بالم .. وجهه تجعد بعصبيه ..

.. قدرته بالتمثيل لايعلى عليها ..

مارفع راسه ضل يناظر الارض وهو ماسك ظهره : اه .. اه .. شموسه الم ..

ندى وقفت ماعرفت وش تقول ..؟! .. يضنها شمس ..

مشت بسرعه لعنده وهو يتالم .. :..مو انا قلتلك ظهرك يعورك قلتلي لا .. هاللحين احمد مو فيه ياخذك .. تعالا معي نروح لعياده قريبه من هنا ..

سامي رفع راسه وبنفس التجعيدات وقال بهدوء : لا مولازم شويه ويخف ..

ندى : اي شوويه هذا مافيه مزح الم ظهر .. ظهررر ..

سامي كان كاتم ضحكته وهي من جدها خايفه عليه .. : لا ندووش انتي مكبره الموضوع ماي

ندى قاطعته وهي تمسك ايده وتوقفه .. : لا الظهر فيه عيالك فيه انك ماتقدر تمشي ..

رفع عيونه عندها واختفت التسليه اللي كانت بعيونه ..
صوتها وهي تحكي بجديه ..
(( فيه عيالك ..))

سحب ايده من ايدها بهدوء وقف .. يبغى يبعد عنها ..
قاصده تقوله كذا ..
تبغى تجرحه ..

تعوذ من الشيطان لانها باختصار ماتدري ..
: لا من جد ندى هاللحين احسن ..

ندى عارفه انه يكذب ويكابر : لا مو احسن .. سامي بدل ثيابك بسرعه وعلى المستشفى ..

سامي ابتسم لها بخبث وهو يحاول يرجع طبيعي : خايفه علي ..

ندى ارتبكت وقالت ببرود مصطنع : لا .. انا بس .. انا كذا ..

سامي ضحك : ههههه وش خسرانه قولي ايوه ..

ندى مدت بوزها وناظرت للارض : ايوه خفت عليك .. – رفعت راسها بسرعه – بس لاتصدق حالك .. انت باسمي علشان كذا خفت عليك ..

سامي : باسمك هههههه يابنت

ندى مشت بسرعه لشقتهم تتهرب منه ..

سامي وقف عند الباب بسرعه وسده : ندوووش .. ممكن طلب ..

ندى ناظرته يمنعها تطلع يمكن ظهره لها لحين يالمه : سم

سامي ابتسم وقال برومنسيه بلهجه المصريه : تخرقي معاي لسيما*_^ ..- وغمز لها -

ندى حمرت خدودها : لا ..

سامي يتمسكن : ندوووش .. اول مره اطلب منك شي ..

ندى بعصبيه تكابر فيها : ومن انت علشان تطلب ..

سامي : انا ولله الحمد باسمك .. زوجك .. يله هذي المره بس ..

ندى ماحبت انه يتذلل اكثر هزت راسها : اووكي ..

سامي ابتسم ابتسامه عريضه : تجننن ياخلق الله اموووت فيها ..

ندى ناظرته بعصبيه وهي تكتم ضحكتها : ابعد عن الباب ..

سامي : ماطلبتي .. انتظرك الساعه 6 اوكي ..

ندى طلعت بسرعه وسكرت الباب بعصبيه ..
واول مادخلت عند البنات ضحكت باعلى صوتها ونفسها تطير : هههههههههههه ..

**********************
عشاق من احفاد الشيطان ... روايه رومنسيه حزينه .. ... وخياليه
**************************

رحت اسولف للجبال الصم عن قصة رحيله
ما تركت متونها الا ينحت الدمع بصخرها

(( ماضاع حق وراه مطالب ..))
يسمع لحكي المحامي وماهو مقتنع بحرف واحد منه ..
موقفه قوي ومعه شهود كثير يشهدوا ..

واللي معطيه قوه اكثر انه بياخذ حق نجلاء قبل اي شخص ..

قال بجديه وهي يلم الاوراق اللي قباله : انا مقتنع بموقفي .. والله لاركض وراهم لحد مايكونوا بمكانهم الطبيعي السجن ..

المحامي : غيررك حاول وماقدروا عليهم هذولاء مو لوحدهم في وراهم كباريه ..

احمد : وانا وراي ربي .. مافي اكبر من ربك .. ومافي حد يرضى ان ارواح الناس تروح كذا ..

المحامي : بس اوراقهم كلها قانونيه ..

احمد : كل مجرم لازم يترك وراه شي .. وانا اكبر غلط تركوه مشعل وابوه ..
اعتقد ان التلاعب واضح باوراق حالتي – لمعه عيونه بحزن – ولو زوجتي نجلاء عايشه وضحت لك كل شي ..- قال بفخر – زوجتي كانت دكتوره ممتازه وذكيه

المحامي ابتسم لاصرار احمد : اوكي انا معك .. وباذن الله نتخلص من هذولاء الفساد بالمجتمع ..

احمد تنهد : وامثالهم كثير .. بس والله باللي رفع سبع سموات لا علمهم ان الله حق ..

المحامي : الله يعينك ويعني هههههههه ..

احمد ابتسم له بهدوء وامل سجن مشعل مع ابوه يكبر بداخله..
هذولاء مايستحقوا يكونوا دكاتره او يفتحوا مستشفيات .. قالوا قسم مانفذوه ..

**********************
عشاق من احفاد الشيطان ... روايه رومنسيه حزينه .. ... وخياليه
**************************

اقابلكم على خيرة الله بالبارت الجاي ..

ومع النهايه ..

* (( انا غضبان عليك ليوم الدين ..))
اب غضبان ..
ودموع ندم ..

*......: مابغى فلوووسها مابغى ريال واحد والله ابيع كل هذا بس ابغى حريتي ابغى ارجع لبيتنا ..

*.....: ماعرف اخاف احترق مثل هواجس ..
صرخت .....: هواجس محروقه هواجس محروقه هواجس محرررروقه ..

* همست له : بكره نفطر فوق ..
ابتسم تفهم عليه : يكوون احسن ..

*....: جيبي المصحف واحلف لك ..
...: قالوا للحرامي احلف قال جائنا الفرج ..

*...: ورب العزه والجلاله من بكره جائي لك خاطب ..

* بنت زوجك ... ياحليها والله متعلقه فيك شكلك حنونه عليها ..والا تغار من اخوها اللي ببطنك ..

* : لاتقربي اسمعي للاخر .. انا عقيم مافيني عيال ..

قالت ببلاهه : عقيم ..

*: اطلع من هنا .. ابعد عن وجهي ..

ابتسم وريقه جف : اوكي اهم شي راحتك .. بعطيك فتره تفكري واذا قررتي حاكيني ..

طلع بسرعه بدون ما يودعها وهو يقاوم الضيقه اللي بتجيه .. اول مادخل السياره وسكر الباب جئته الحاله وهو توقع انه تخلص منها ...

انتظر ردودكم على احر من الجمر ...

**أحلى من الحلا** · 29-04-2008, 04:58 PM

المشاركة الأصلية بواسطة أفكارها وردية

*ياترى وش راح يسوي ريان مع شموخ .؟ وكيف بتطلع نفسها من هالورطه ..؟ وليه سبب الكره الكبير بينهم ..؟

اتوقع بيتهاوش معاها و تحقيق لأنه يكرهها

* رويوف وش صار معها ..؟

اكيد بتحاول تنتقم من شموخ بس شموخ ذكية و ما راح تخليها

* ومن هذي منى ..؟وش دورها بالقصه ..؟

اتوقع اللي أأتمنت ريان ع الشركة و لها قرابة بالعائلة

* عائله بو نواف من تكون وايش علاقتها فيهم..؟

صراحه ما ادري !!:l:

مشكووووووووووووووووووووووررررررررررررررره حبيبتي على تفاعلك معي هذا الشي شجعني

**أحلى من الحلا** · 29-04-2008, 05:02 PM

المشاركة الأصلية بواسطة شوشونه

شو احلى من الحلى متى بتنزلين الاحداث تراني ادخل ولاشوفها انا من متشوقه اعرف النهايه

ابشري من عيوني ياعيوني

**أحلى من الحلا** · 29-04-2008, 05:05 PM

المشاركة الأصلية بواسطة SAM WAYIES

بصراحه قصه اكثر من رائعه لقد اندمجت معها جدا لدرجت انى كنت انام و احلم بالشخصيات
فأنا اتمنى و اترجاكى انك تكملى القصه لأنى مشتاق لأعرف النهايه
لقد غبت كثيرا جدا عن المنتدى و هذا اول رد لى هنا بعد هذه الفتره (لم استطع ان أصمت لجمال و روعة القصه)

مشكووووووووووووووووووووووووررررررررررررررررررررررر اخوي

هذا شرف لي ,,,,وانا اتشرف فيك ضيف على قصتي

**SAM WAYIES** · 29-04-2008, 06:37 PM

الللللللللللله
فعلا فصل رائع و به حماس كثير
اشعل نار الفضول بداخلى للنهايه
و اترجاكى حاولى تنزلى الجزء الجاى فى أقرب وقت مناسب لكى

انتظر الباقى بلهفه

**موتي ولاموت المشاعر** · 29-04-2008, 07:05 PM

وي وي وي وي وي وي

من زمان مادخلت بس تراني اقراها يالله تكفين كملي عن جد روايه تجنن يسلمووو يالغلا

**وليدة العاطفة** · 30-04-2008, 03:15 PM

حياتي لاتقولين انك تكلمين نفسك والله اني انا لي اسبوع تعبانه ومهمومه وماطيق اكلم احد وعلى كذا ادخل واقرا حياتي تكفين كمليها الله يبارك فييك فدييييييييييييييييتك
لا عدمناك

**صغيرونه بس شيطونه** · 01-05-2008, 01:24 AM

احلى الللللللللللللللللللله يعطيك الف عافيه بصراحه لو انك قريبه مني كان اعطيتك بوووووووسه <هههه
بصراحة رواياتك مرررررررره خطططيره لدرررجة اني صرت اعععععيش جوهم وكل وقتي افكر فيهم تتتسلمي
بس تكفي لات طولي علينا
بصراححححححه تجنننننننننننن ( غارقات بالحب والرومنسيه)وووووووووو(عشاق من احفاد الشيطان) من اجمل الروايات <اللي قرأته
تقبلي تحياتي صغيرونه بس شيطونه <ههههههه تشاوووووووووووووو

**فروحة الدلوعة** · 01-05-2008, 07:18 AM

اختي كمليها بليز بسرررعة

ويسلموو ع القصة الحلووة والروعة
تقبلي مرووري...

رواية عشاق من أحفاد الشيطان // كامله

تعليق

تعليق

تعليق

تعليق

تعليق

تعليق

تعليق

تعليق

تعليق

تعليق

google Ad Widget